ምዕራፍ 14 · 20 ደቂቃ ንባብ · 26 ደቂቃ ማዳመጥ
ዩቲካ ውስጥ የሆነው መነቃቃት
ሮም ውስጥ ሃያ ቀን ያህል እንደ ቆየሁ፥ በዩቲካ ከሚገኘው የአቶ ኤይከን ቤተ ክርስቲያን ሽማግሌዎች አንዱ፥ እጅግ የታወቁና እጅግ ጠቃሚ ሰው፥ አረፉ፤ እኔም የቀብራቸውን ሥርዓት ለመካፈል ወደዚያ ወረድሁ። የቀብሩን ሥርዓት የመሩት አቶ ኤይከን ነበሩ፤ ከእርሳቸውም የጸሎት መንፈስ በጉባኤያቸውና በዚያች ከተማ ውስጥ አስቀድሞ መገለጥ እንደ ጀመረ ተረዳሁ። ከጉባኤያቸው ዋና ዋና ሴቶች አንዲቱ ስለ ቤተ ክርስቲያኒቱ ሁኔታና በዚያች ከተማ ስለሚኖሩ ኃጢአተኞች በነፍሷ እጅግ ተጨንቃ ስለ ነበር፥ ኃይሏ ፈጽሞ እስኪዝል ድረስ ሁለት ቀንና ሁለት ሌሊት ያለ ዕረፍት ማለት ይቻላል እንደ ጸለየች ነገሩኝ፤ በነፍሷ ቃል በቃል የምጥ ጭንቅ ስለ ደረሰባት የራሷ ኃይል ባለቀ ጊዜ፥ በጸሎቱ ልትደገፍበት የምትችል ሰው፥ ፍላጎቷን ለእግዚአብሔር መግለጥ የሚችል ሰው፥ አብሯት በጸሎት ካልተጋ በቀር የአእምሮዋን ሸክም መቋቋም አትችልም ነበር።
ይህን ተረዳሁት፤ ሥራውም በልቧ ውስጥ አስቀድሞ እንደ ጀመረ ለአቶ ኤይከን ነገርኋቸው። እርሳቸውም በእርግጥ ይህን ተገንዝበው ነበር፤ ከእርሳቸውና ከሕዝባቸው ጋር ወዲያውኑ ማገልገል እንድጀምርም ፈለጉ። ብዙም ሳልቆይ ይህንኑ አደረግሁ፤ በእርግጥም ሥራው ወዲያውኑ ጀመረ። ቃሉ ወዲያው ሥራውን ሠራ፤ ስፍራውም በተገለጠው የመንፈስ ቅዱስ ኃይል ተሞላ። ስብሰባዎቻችን በየሌሊቱ ይጨናነቁ ነበር፤ ሥራውም ተስፋፋ፤ በተለይም በሁለቱ የፕሪስባይቴሪያን ጉባኤዎች ውስጥ በኃይል ቀጠለ፤ ከእነርሱም የአንዱ መጋቢ አቶ ኤይከን፥ የሌላው ደግሞ አቶ ብሬስ ነበሩ። እኔም አገልግሎቴን በሁለቱ ጉባኤዎች መካከል ከፋፈልሁ።
ዩቲካ ውስጥ ሥራ ከጀመርሁ ብዙም ሳይቆይ፥ ቀደም ብዬ የጠቀስኋቸው ሸሪፉ አቶ ቢ—— እኔ እንዳየሁት ወደ ስብሰባዎቹ እንደማይመጡ ለአቶ ኤይከን ተናገርሁ። ነገር ግን ከጥቂት ምሽቶች በኋላ፥ ልሰብክ ስነሣ፥ አቶ ኤይከን አቶ ቢ—— እንደ ገቡ በሹክሹክታ ነገሩኝ።
በመተላለፊያው ወደ መቀመጫቸው ሲያልፉም አመለከቱኝ። ጥቅሴን አንሥቼ ለጉባኤው መናገር ጀመርሁ። ጥቂት ደቂቃዎች ብቻ እንደ ተናገርሁ፥ አቶ ቢ—— በተቀመጡበት ረድፍ ውስጥ ቆመው፥ ቀስ ብለው ዞረው፥ ትልቁን ካፖርታቸውን ተጠቅልለው ሲንበረከኩ አየሁ። ይህም አጠገባቸው ተቀምጠው የነበሩትንና የሚያውቋቸውን ሰዎች ትኩረት እንደ ሳበ፥ በዚያም የቤቱ ክፍል ከፍ ያለ መነቃነቅ እንደ ፈጠረ አስተዋልሁ። ሸሪፉ በአገልግሎቱ ሁሉ ጊዜ በጉልበታቸው እንደ ተንበረከኩ ቆዩ። ከዚያም ይኖሩበት ወደ ነበረው ሆቴል ወደ ክፍላቸው ሄዱ። ዕድሜያቸው ምናልባት ሃምሳ ዓመት ገደማ የሆነ፥ ያላገቡ ሰው ነበሩ።
በኋላም ወደ ቤታቸው በሄዱ ጊዜ አእምሮአቸው እጅግ ተጭኖ እንደ ነበረና ሲያዳምጡት የነበረውን ጉዳይ እንደ ገና እንዳነሡት ነገሩኝ። እኔ ጉባኤውን ክርስቶስ በወንጌል እንደ ቀረበው እንዲሁ እንዲቀበሉት አጥብቄ አሳስቤ ነበር። የዚያ ስብከት ርእስ ክርስቶስን አሁኑኑ የመቀበል ጥያቄ፥ እንዲሁም ኃጢአተኛው ከእርሱ ጋር ያለውና እርሱም ከኃጢአተኛው ጋር ያለው ግንኙነት አጠቃላይ ሁኔታ ነበር። የተነሡትን ነጥቦች በአእምሮአቸው እንዳስቀመጡ፥ በፊታቸውም በታላቅ ጥንቃቄ እንዳቀረቡአቸው ነገሩኝ፤ እንዲህም አሉ፦ «ነፍሴ ሆይ፥ በዚህ ትስማሚያለሽን? ክርስቶስን ትቀበዪዋለሽን? ኃጢአትን ትተዪ ራስሽንስ ትሰጪያለሽን? ይህንስ አሁኑኑ ታደርጊዋለሽን?» በአእምሮአቸው ጭንቅ ውስጥ ሆነው ራሳቸውን በአልጋቸው ላይ እንደ ጣሉ ነገሩኝ። ይህን ነጥብ ከራሳቸው ጋር አጸኑት፤ «አሁኑኑ፥ እዚሁ» እንድትቀበል ነፍሳቸውን አጥብቀው ለመኗት። በዚያችው ቅጽበት፥ ይላሉ፥ ጭንቃቸው በድንገት ስለ ለቀቃቸው እንቅልፍ ወሰዳቸው፤ ለብዙ ሰዓታትም አልነቁም። በነቁ ጊዜም አእምሮአቸው በክርስቶስ ሰላምና ዕረፍት ተሞልቶ አገኙት፤ ከዚያችም ሰዓት ጀምሮ በሚያውቋቸው ሰዎች መካከል ለክርስቶስ ትጉህ ሠራተኛ ሆኑ።
ይኖሩበት የነበረውን ሆቴል በዚያን ጊዜ የሚያስተዳድሩት አቶ ኤስ—— የሚባሉ ሰው ነበሩ። መንፈስ በዚያ ቤት ውስጥ በኃይል ያዘ።
ብዙም ሳይቆይ ራሳቸው አቶ ኤስ—— የጸሎት ርእስ ሆኑ፤ ተለወጡም፤ ከቤተሰባቸውና በሆቴሉ ከሚኖሩት እንግዶች ብዙዎቹም ተለወጡ። በእርግጥም በከተማዪቱ ከሁሉ የሚበልጠው ያ ሆቴል የመንፈሳዊ ኃይል ማዕከል ሆነ፤ በዚያም ብዙዎች ተለወጡ። የመንገደኞች ሰረገሎች በከተማዪቱ ሲያልፉ በሆቴሉ ይቆሙ ነበር፤ በሕዝቡም ላይ ያረፈው ስሜት እጅግ ብርቱ ስለ ነበር፥ ለአንድ ምግብ ወይም ለአንድ ሌሊት ብቻ ያረፉ ሰዎች ከተማዪቱን ከመልቀቃቸው በፊት በኃይል የኃጢአት ወቀሳ ደርሶባቸው ስለ ተለወጡባቸው ስለ ብዙ አጋጣሚዎች ሰማሁ። በእርግጥም በዚህ ስፍራም ሆነ በሮም፥ ማንም ሰው በከተማዪቱ ውስጥ ሊኖር ወይም በእርሷ በኩል ሊያልፍ የእግዚአብሔርን መገኘት ሳያስተውል አይችልም፤ መለኮታዊ ኃይል ስፍራውን ሁሉ የሞላው ይመስላል፤ አየሩም ሁሉ በመለኮታዊ ሕይወት የተሞላ ይመስላል፥ የሚለው አነጋገር የተለመደ ነበር።
አንድ የሎውቪል ነጋዴ በሙያው አንዳንድ ንግድ ለማከናወን ወደ ዩቲካ መጣ። አቶ ቢ—— ይኖሩበት በነበረው ሆቴልም አረፈ። በከተማዪቱ ያለው ንግግር ሁሉ እጅግ የሚያበሳጨው ሆኖ አገኘው፤ ምክንያቱም እርሱ ያልተለወጠ ሰው ነበር። ተናደደ፤ በዚያ ምንም ንግድ መሥራት እንደማይችል፥ ሁሉም ነገር ሃይማኖት ብቻ እንደ ሆነ ተናገረ፤ ወደ ቤቱ ለመመለስም ቈረጠ። ወደ የትኛውም ሱቅ ቢገባ ሃይማኖት ተገፍቶ ይቀርብለት ነበር፤ ከእነርሱ ጋርም ምንም ንግድ ማድረግ አልቻለም። በዚያ ምሽት ወደ ቤቱ ይሄዳል።
ይህን አነጋገር የተናገረው በሆቴሉ ይኖሩ በነበሩት በአንዳንድ አዲስ አማኞች ፊት ነበር፤ በተለይም በአቶ ቢ—— ፊት እንደ ነበር አስባለሁ። ሰረገላው በሌሊት ዘግይቶ ይነሣል ተብሎ ይጠበቅ ስለ ነበር፥ ሊተኛ ጥቂት ሲቀረው ሒሳቡን ለመክፈል ወደ መሸጫው ጠረጴዛ ሲሄድ ታየ፤ ሰረገላው ሲያልፍ አቶ ኤስ—— ምናልባት ተነሥተው ስለማይጠብቁ ከመተኛቱ በፊት ሒሳቡን መዝጋት እንደሚፈልግ ተናገረ። አቶ ኤስ—— ሒሳቡን በሚከፍልበት ጊዜ አእምሮው እጅግ ተረብሾ እንደ ነበር እንዳስተዋሉ ተናገሩ፤ በሆቴሉ ለሚኖሩ ለብዙ ጨዋ ሰዎችም የጸሎታቸው ርእስ እንዲያደርጉት ሐሳብ አቀረቡ። እኔ እንደማምነው ወደ አቶ ቢ—— ክፍል ወሰዱት፤ አነጋገሩት፤ ከእርሱም ጋር ጸለዩ፤ ሰረገላው ከመምጣቱም በፊት የተለወጠ ሰው ሆነ። ስለ ገዛ አገሩ ሰዎችም ወዲያውኑ እጅግ ከመጨነቁ የተነሣ፥ ሰረገላው በመጣ ጊዜ ተሳፍሮ ወዲያው ወደ ቤቱ ሄደ። ቤቱ እንደ ደረሰም ያገኘውን ተሞክሮ ለቤተሰቡ ነገረ፤ ሰብስቦአቸውም ከእነርሱ ጋር ጸለየ። እጅግ የታወቀና በግልጽ የሚናገር ዜጋ ስለ ነበር፥ ጌታም ለነፍሱ ያደረገለትን በየስፍራው ሁሉ ያወራ ስለ ነበር፥ በሎውቪል ውስጥ ወዲያውኑ እጅግ ጥልቅ የሆነ ስሜት አሳደረ፤ ብዙም ሳይቆይ በዚያ ስፍራ ታላቅ መነቃቃት አስከተለ።
በምሥራቅ በኩል በእነዚያ መነቃቃቶች ላይ እየተነሣ ስለ ነበረው ተቃውሞ መጀመሪያ የሰማነው በዩቲካው መነቃቃት መካከል ነበር። አቶ ኔትልተን አብሬአቸው እሠራ ለነበሩት ለአቶ ኤይከን አንዳንድ ደብዳቤዎችን ጻፉ፤ በእነዚህም ደብዳቤዎች ስለ እነዚያ መነቃቃቶች ጠባይ እጅግ እንደ ተሳሳቱ ግልጽ ነበር። አቶ ኤይከን ደብዳቤዎቹን አሳዩኝ፤ ደብዳቤዎቹም እንዲሆን እንደ ታሰበው በአካባቢው ባሉ አገልጋዮች መካከል ከእጅ ወደ እጅ ተዘዋወሩ። ከእነርሱም መካከል አቶ ኔትልተን በእነዚህ መነቃቃቶች አካሄድ ውስጥ ነቀፋ የሚገባው ብለው የሚያስቡትን በሙሉ የገለጡበት አንድ ደብዳቤ ነበረ፤ ነገር ግን እርሳቸው ያማረሩበት ዓይነት ነገር በእነዚያ መነቃቃቶች ምንም አልተደረገም፥ ጭራሹንም አልታወቀም ነበርና፥ ደብዳቤዎቹን ከማንበብና ከማሳለፍ በቀር ሌላ ትኩረት አልሰጠናቸውም። ይሁን እንጂ አቶ ኤይከን እንደዚህ ያሉ ነገሮች እንዳልተደረጉ ለአቶ ኔትልተን በማረጋገጥ ለአንዱ ወይም ለሁለቱ በግል መልስ ሰጡ። አቶ ኔትልተን ሴቶች አንዳንድ ጊዜ በኅብረት ስብሰባዎች ውስጥ ይጸልዩ ስለ ነበሩበት ሁኔታ አማርረው እንደ ሆነ አሁን አላስታውስም። ይሁን እንጂ በጥቂት አጋጣሚዎች ሴቶች፥ — ከእነርሱም አንዳንዶቹ እጅግ የታወቁና በመንፈሳቸው እጅግ የተገፋፉ ሴቶች፥ — በየቀኑ ከቤት ወደ ቤት በምናደርጋቸው የኅብረት ስብሰባዎች ውስጥ ጸሎት ይመሩ እንደ ነበር እውነት ነው። እኔ እስከማውቀው ድረስ በዩቲካም ሆነ በሮም በዚህ ላይ ምንም ተቃውሞ አልታየም። ይህን ልማድ በሕዝቡ መካከል በማስገባት ረገድ እኔ ምንም ድርሻ አልነበረኝም፤ ከዚያ በፊት በዚያ ይደረግ እንደ ነበረ ወይም እንዳልነበረም አላውቅም። በእርግጥም እኔ እስከማውቀው ድረስ ይህ ነገር በተፈጸመበት አካባቢ ብዙ የሚወራበት ወይም የሚታሰብበት ጉዳይ አልነበረም። ስለ መለኮታዊ ኃይል አሠራር እጅግ የሚያስቀይሙ ትምህርቶችን ይዘው የነበሩት አቶ ዊክስ እነዚያን መነቃቃቶች እንደሚቃወሙ የታወቀ እንደ ነበር ቀደም ብዬ ተናግሬአለሁ። እንደዚህ ያሉ ትምህርቶች ጭራሹን ተይዘው እንደ ነበር ለማያውቁ ሰዎች መረጃ እንዲሆን ይህን እላለሁ፦ አቶ ዊክስና ከእርሳቸው ጋር የሚስማሙት ሰዎች፥ ኃጢአትም ቅድስናም ሁሉን በሚችለው ኃይል በቀጥታ ሥራ በአእምሮ ውስጥ ይፈጠራሉ ብለው ያምኑ ነበር፤ እግዚአብሔር ሰዎችን እንደ ሉዓላዊ ፈቃዱ ኃጢአተኞች ወይም ቅዱሳን ያደርጋቸዋል፥ በሁለቱም ሁኔታ ግን ሁሉን በሚችለው ኃይል በቀጥታ ሥራ፥ እንደ ራሱ እንደ ፍጥረት ሥራ ሊቋቋሙት በማይቻል ሥራ ነው፤ በእርግጥም በዓለማት ሁሉ ውስጥ ትክክለኛው ሠሪ እግዚአብሔር ብቻ ነው፤ ፍጡራን ሁሉ የሚሠሩት ሊቋቋሙት በማይቻለው ኃይሉ ሲንቀሳቀሱና ሲገደዱ ብቻ ነው፤ በዓለማት ውስጥ ያለ ኃጢአት ሁሉ፥ የሰዎችም ሆነ የአጋንንት፥ በእግዚአብሔር በኩል የሆነ ቀጥተኛና ሊቋቋሙት የማይቻል ሥራ ውጤት ነው ይሉ ነበር። ይህንንም ከመጽሐፍ ቅዱስ ለማረጋገጥ ይሞክሩ ነበር።
አቶ ዊክስ ስለ መለወጥ ወይም ስለ ዳግመኛ መወለድ የነበራቸው ሐሳብ ይህ ነበር፦ ሰዎችን ኃጢአተኞች ያደረጋቸው እግዚአብሔር፥ ዳግመኛ ሲወልዳቸውም ለክብሩ ኃጢአተኞች አድርጎ ሊፈጥራቸው፥ በቀጥታ በውስጣቸው ስለ ፈጠራቸው ወይም ሁሉን በሚችለው ኃይል ግድ ብሎ እንዲሠሩ ስላደረጋቸው ኃጢአቶችም ወደ ገሃነም ሊልካቸው መብት እንዳለው እንዲቀበሉ ያደርሳቸዋል። ኃጢአተኞችን ይህን የጉዳዩን አመለካከት እንዲቀበሉ ባላደረሱ መለወጦች ላይ ምንም እምነት አልነበራቸውም። በዚህ ጉዳይ ላይ የአቶ ዊክስን ዘጠኝ ስብከቶች ያነበቡ ሰዎች አመለካከታቸውን እንዳላዛባሁ ያያሉ። ይህም የአቶ ዊክስ አመለካከት በዚያ አካባቢ ባሉ አገልጋዮችና ሃይማኖተኞች ነን በሚሉ ሰዎች ዘንድ በከፍተኛ ደረጃ ተቀባይነት አግኝቶ ስለ ነበር፥ የታወቀው ተቃውሞአቸው ከአንዳንድ ሌሎች አገልጋዮች ተቃውሞ ጋር ተዳምሮ የሌሎችን ተቃውሞ እጅግ አደፋፈረው፤ አበዛውም።
ይሁን እንጂ ሥራው ሁሉንም ዓይነት ሰዎች እየለወጠ በታላቅ ኃይል ቀጠለ፤ በጥቂት ሳምንታት ውስጥም አቶ ኤይከን የአምስት መቶ ሰዎችን ተስፋ ያለበት መለወጥ እስኪዘግቡ ደረሰ፤ ከእነርሱም አብዛኞቹ፥ እኔ እንደማምነው፥ የራሳቸው ጉባኤ አባላት ነበሩ። መነቃቃቶች በዚያ አካባቢ በአንጻራዊነት አዲስ ነገር ነበሩ፤ አብዛኛውም ሕዝብ የእግዚአብሔር ሥራ እንደ ሆኑ ገና አላመነም ነበር። በኋላ እንደ ሆኑት በእነርሱ ፊት በፍርሃት አልተዋጡም ነበር። እነዚያ መነቃቃቶች ብዙም ሳይቆዩ እንደሚያልፉና ተራ የሥጋዊ ስሜት መነሣሣት ብቻ እንደ ነበሩ እንደሚገለጥ በሰፊው የሚታሰብ ይመስል ነበር። ይህን ስል በሥራው ውስጥ ተሳትፎ የነበራቸው ሰዎች እንደዚህ ያለ ሐሳብ ነበራቸው ማለቴ አይደለም።
በዚያ መነቃቃት መካከል በብርቱ ልብን የነካ አንድ ሁኔታ ተፈጸመ። መነቃቃቱ በሙሉ ኃይሉ እየቀጠለ በነበረበት ጊዜ የኦናይዳ ፕሪስባይተሪ በዚያ ተሰበሰበ። ከሌሎቹም መካከል ለእኔ እንግዳ የሆኑ አንድ አረጋዊ ቄስ ነበሩ፤ እርሳቸውም በመነቃቃቱ ግለትና ትኩሳት እጅግ ተበሳጩ። የሕዝቡ አእምሮ ሁሉ በሃይማኖት ጉዳይ ተውጦ፥ በየስፍራው፥ በሱቆችና በሌሎች ሕዝባዊ ስፍራዎች እንኳ ጸሎትና የሃይማኖት ንግግር እንዳለ አገኙ። ከዚያ በፊት መነቃቃት አይተው አያውቁም ነበር፤ በዚያም የሰሙትን ዓይነት ነገር ሰምተው አያውቁም ነበር። ስኮትላንዳዊ ነበሩ፤ እኔ እንደማምነውም በዚህች አገር ብዙ ጊዜ አልቆዩም ነበር።
አርብ ከሰዓት በኋላ፥ ፕሪስባይተሪው ከመበተኑ በፊት፥ ተነሥተው እየተካሄደ በነበረው መነቃቃት ላይ የከረረ ንግግር አደረጉ። የተናገሩትም በዚያ የነበሩትን ክርስቲያኖች እጅግ አስደነገጣቸው፤ አሳዘናቸውም። በእግዚአብሔር ፊት በግምባራቸው ተደፍተው የተናገሩት ነገር ምንም ጉዳት እንዳያደርስ እንዲከለክል ወደ እርሱ ለመጮኽ ተሰማቸው።
ፕሪስባይተሪው የተበተነው ልክ ሲመሽ ነበር። ከአባላቱ አንዳንዶቹ ወደ ቤታቸው ሄዱ፤ ሌሎቹም አድረው ቆዩ። ክርስቲያኖች ራሳቸውን ለጸሎት ሰጡ። ከዚያ ንግግር ሊመጣ የሚችለውን ማንኛውንም ክፉ ተጽዕኖ እንዲያከሽፍ በዚያች ሌሊት ወደ እግዚአብሔር ታላቅ ጩኸት ነበረ። በማግሥቱ ጠዋት ይህ ሰው በአልጋቸው ላይ ሞተው ተገኙ።
በእነዚህ መነቃቃቶች ዘመን፥ ጌታ ያደረገውን ሰምተው ወይም በሰሙት ነገር ጕጕትና መደነቅ ተስበው፥ ከሩቅ ስፍራዎች በሁሉም አቅጣጫ ማለት ይቻላል ሰዎች ራሳቸው ለማየት መጡ፤ ከእነርሱም ብዙዎቹ ወደ ክርስቶስ ተለወጡ። ከእነዚህ ጎብኚዎች መካከል፥ ብዙም ሳይቆዩ ሚስዮናዊ ሆነው ወደ ሳንድዊች ደሴቶች የሄዱትና ለብዙ ዓመታት በሚስዮን ወዳጆች ዘንድ በሰፊው የታወቁት ዶ/ር ጋርኔት ጃድ አንዱ ነበሩ። እርሳቸው ቀደም ብዬ የጠቀስኋቸው የአቶ ዊክስ ጉባኤ አባል ነበሩ። አባታቸው አረጋዊው ዶ/ር ጃድ ትጉህ ክርስቲያን ነበሩ። ወደ ዩቲካ ወርደው ከመነቃቃቱ ጋር በእጅጉ ተባበሩ።
በዚያው ጊዜ ገደማ ወይዘሪት ኤፍ—— ቲ—— የምትባል፥ ከኒው ኢንግላንድ ከአንድ አካባቢ የመጣች ወጣት ሴት፥ በሚከተለው ሁኔታ ወደ ዩቲካ መጣች፦ በኒው ዮርክ ግዛት በኒውበርግ አካባቢ የሁለተኛ ደረጃ ትምህርት ቤት ታስተምር ነበር። በዩቲካ ስለ ሆነው መነቃቃት በጋዜጦች ብዙ ይነገር ስለ ነበር፥ ወይዘሪት ቲ—— ከሌሎች ጋር በመደነቅና በመገረም ተሞላች፤ ነገሩ ምን ማለት እንደ ሆነ ሄዳ ራሷ ለማየትም ፈለገች። ትምህርት ቤቷን ለአሥር ቀን ዘግታ ወደ ዩቲካ በሰረገላ ተሳፈረች። በጄኔሲ ጎዳና አልፋ ወደ ሆቴሉ ስትሄድ፥ በአንዱ የንግድ ሰሌዳ ላይ ቢ—— ቲ—— የሚል ስም አየች። በዩቲካ ፈጽሞ እንግዳ ነበረች፤ በዚያም የምታውቀው ሰው ወይም ዘመድ እንዳላት አታውቅም ነበር። ነገር ግን በሆቴሏ አንድ ወይም ሁለት ቀን ካረፈችና ቢ—— ቲ—— ማን እንደ ሆኑ ከጠየቀች በኋላ፥ የአባቷን ስም ጠቅሳ የአቶ ቲ—— ልጅ በሆቴሉ እንዳለችና ሊያገኟት ብትችል ደስ እንደሚላት የሚገልጥ አጭር ማስታወሻ ላከችላቸው። አቶ ቲ—— ሊጠይቋት መጡ፤ የሩቅ ዘመዳቸው መሆኗንም አወቁ፤ ወዲያውኑም ወደ ቤታቸው ጋበዟት። እርሷም ግብዣቸውን ተቀበለች፤ እርሳቸውም ትጉህ ክርስቲያን ስለ ነበሩ ወዲያውኑ ወደ ስብሰባዎቹ ሁሉ ይዘዋት ሄዱ፤ በሃይማኖትም ጉዳይ እንድትሳብ ጣሩ። ባየችው ነገር ሁሉ እጅግ ተደነቀች፤ ብዙም ተበሳጨች።
ብርቱ፥ እጅግ የተማረችና ኩሩ ወጣት ሴት ነበረች፤ ሰዎች ያነጋገሯት መንገድና ልቧን ወዲያውኑ ለእግዚአብሔር የመስጠትን አስፈላጊነት አጥብቀው ያሳሰቧት መንገድ እጅግ አወካት። ከምሽት ወደ ምሽት የሰማችው ስብከት በጥልቅ ያዛት። በስብከቱ የኃጢአተኞች በደል በሰፊው አጽንዖት ይሰጠው ነበር፤ ለዘላለም ፍርድ የሚገባቸው መሆኑና በዚያም አደጋ ውስጥ መሆናቸው በሰማችው ነገር ጐልቶ ይቀርብ ነበር። ይህም ተቃውሞዋን ቀሰቀሰው፤ ሆኖም የኃጢአት ወቀሳ ሥራ በልቧ ውስጥ በኃይል ቀጠለ።
በዚህ መካከል እኔ እርሷን ለማነጋገር አላየኋትም ነበር፤ ነገር ግን ስለ አእምሮዋ ሁኔታ ከአቶ ቲ—— ሰምቼ ነበር።
ለጥቂት ቀናት በእውነቱ ሥር ስትታመስ ከቆየች በኋላ ወደ ማረፊያዬ መጣች። በእንግዳ መቀበያው ክፍል ውስጥ በሶፋው ላይ ተቀመጠች። እኔም ወንበሬን ከፊቷ አቅርቤ የእግዚአብሔርን የመብት ጥያቄዎች አጥብቄ ላቀርብላት ጀመርሁ። ኃጢአተኞች ወደ ዘላለም ገሃነም ሊላኩ ይገባቸዋል ብዬ የሰበክሁትን አንሥታ፥ ይህን ልትቀበል እንደማትችል፥ እግዚአብሔርም እንደዚህ ያለ አምላክ ነው ብላ እንደማታምን ተናገረች። እኔም እንዲህ ብዬ መለስሁላት፦ «አንቺም ደግሞ ኃጢአት በእውነተኛ ባሕርዩና በሚገባው ቅጣት ምን እንደ ሆነ ገና አልተረዳሽም፤ ብትረዺ ኖሮ እግዚአብሔር ኃጢአተኛውን ወደ ዘላለም ገሃነም ስለሚልከው አታማርሪበትም ነበር።» ከዚያም ያንን ጉዳይ በንግግር በተቻለኝ መጠን በግልጽ ዘርግቼ አቀረብሁላት። ልታምነው እጅግ ብትጠላም፥ የእውነቱ ወቀሳ ሊቋቋሙት የማይቻል እየሆነባት ነበር። የበሰለው የኃጢአት ወቀሳ ሊያሰጥማት መድረሱን እስካይ ድረስ ለተወሰነ ጊዜ በዚህ መንገድ ተነጋገርሁ፤ ከዚያም ዞር ብዬ ኢየሱስ ስለሚይዘው ስፍራ፥ እንዲሁም እንደዚህ ሊፈረድባቸው የሚገባቸውን ሰዎች መዳን በሚመለከት የነገሮች እውነተኛ ሁኔታ ምን እንደ ሆነ ጥቂት ቃላት ተናገርሁ።
ፊቷ ገረጣ፤ ወዲያውም እጆቿን ወደ ላይ አንሥታ ጮኸች፤ ከዚያም በሶፋው ክንድ ላይ ወደ ፊት ወደቀች፤ ልቧም ተሰበረ። ከዚያ በፊት ጭራሹን አላለቀሰችም ነበር ብዬ አስባለሁ። ዓይኖቿ ደረቅ፥ ፊቷ የተጐሳቈለና የገረጣ፥ ስሜቷም ሁሉ ተቈልፎ ነበር፤ አሁን ግን የጎርፍ በሮች ተከፈቱ፤ የሚፈስሰውን ልቧን ሁሉ በእግዚአብሔር ፊት አፈሰሰች። ከዚህ በላይ ምንም ልነግራት አላስፈለገኝም። ብዙም ሳትቆይ ተነሥታ ወደ ራሷ ማረፊያ ሄደች። ወዲያውኑ ማለት ይቻላል ትምህርት ቤቷን ተወች፤ የውጭ አገር ሚስዮናዊ ለመሆን ራሷን አቀረበች፤ አቶ ጉሊክ ከሚባሉ ሰው ጋር ተጋባች፤ እኔ እንደማስበውም ዶ/ር ጃድ በሄዱበት በዚያው ጊዜ ወደ ሳንድዊች ደሴቶች ሄደች። እንደ ሚስዮናዊ የነበራት ታሪክ የታወቀ ነው። እጅግ ውጤታማ ሚስዮናዊ ሆናለች፤ እነርሱም ደግሞ ሚስዮናውያን የሆኑ ብዙ ወንዶች ልጆችን አሳድጋለች።
መኖሪያዬን ዩቲካ ባደረግሁበት ጊዜ፥ ከዩቲካ በስተ ደቡብ አራት ማይል ርቃ በምትገኘው በኒው ሃርትፎርድ መንደር ብዙ ጊዜ እሰብክ ነበር። በዚያ የከበረና ኃይለኛ የጸጋ ሥራ ሆነ፤ በዚያን ጊዜ የፕሪስባይቴሪያን ቤተ ክርስቲያኑ መጋቢ አቶ ኮ የሚባሉ ሰው ነበሩ። ከዩቲካ በስተ ምዕራብ አራት ማይል ርቃ በምትገኘው በሌላዋ ውብ መንደር በዋይትስቦሮም እሰብክ ነበር፤ በዚያም ደግሞ ኃይለኛ መነቃቃት ነበረ። መጋቢው አቶ ጆን ፍሮስት በሥራው እጅግ ውጤታማ ሠራተኛ ነበሩ።
በዚህ አካባቢ ሳልጠቅሰው ማለፍ የሌለብኝ አንድ ሁኔታ ተፈጸመ። ከዋይትስቦሮ ጥቂት ከፍ ብሎ በኦሪስካኒ ወንዝ ላይ፥ አሁን ኒው ዮርክ ሚልስ ተብሎ በሚጠራው ስፍራ፥ የጥጥ ፋብሪካ ነበረ። ባለቤቱ አቶ ደብሊው—— የሚባሉ ያልተለወጡ ሰው፥ ነገር ግን ከፍ ያለ ማዕረግና መልካም ሥነ ምግባር ያላቸው ጨዋ ሰው ነበሩ። በዚያን ጊዜ የፋብሪካው የበላይ ተቈጣጣሪ የባለቤቴ ወንድም አቶ ጂ—— ኤ—— ነበሩ። በዚያ ስፍራ እንድሰብክ ተጋበዝሁ፤ አንድ ምሽትም ወደዚያ ወጥቼ በመንደሩ ትምህርት ቤት ሰበክሁ፤ ትምህርት ቤቱ ሰፊ ነበር፤ በአድማጮችም ተጨናንቆ ነበር። ቃሉ በሕዝቡ መካከል፥ በተለይም በፋብሪካው ውስጥ ይሠሩ በነበሩት ወጣቶች መካከል፥ በኃይል እንደ ሠራ ማየት ቻልሁ።
በማግስቱ ጠዋት ቁርስ ከበላሁ በኋላ ፋብሪካውን ለመጎብኘት ወደዚያ ገባሁ። እያለፍሁ ሳለ፥ በሸማ መሥሪያዎቻቸው፥ በፈትል ማጠንጠኛ መሣሪያዎቻቸውና በሌሎች የሥራ መሣሪያዎቻቸው ላይ ተጠምደው ከነበሩት ሰዎች መካከል ብዙ መታወክ እንዳለ አስተዋልሁ። እጅግ ብዙ ወጣት ሴቶች ሸማ በመሥራት ላይ ከተሰማሩበት ክፍሎች በአንዱ ውስጥ ሳልፍ፥ ከእነርሱ ሁለቱ ትኵር ብለው እያዩኝ እርስ በርሳቸው በብርቱ ሲነጋገሩ አስተዋልሁ፤ ሁለቱም ቢስቁም እጅግ እንደ ተረበሹ ማየት እችል ነበር። በዝግታ ወደ እነርሱ ሄድሁ። ስመጣ አዩኝ፤ በግልጽም እጅግ ተናወጡ። ከእነርሱ አንዲቱ የተበጠሰ ክር ለመቀጠል ትሞክር ነበር፤ እጆቿም ስለ ተንቀጠቀጡ ልትቀጥለው እንዳልቻለች አስተዋልሁ። በስተግራና በስተቀኝ ያሉትን መሣሪያዎች እያየሁ በዝግታ ቀረብሁ፤ ነገር ግን ይህች ልጅ ይበልጥ እየተረበሸች ሄዳ ሥራዋን መቀጠል እንዳልቻለች አስተዋልሁ። ከእርሷ ስምንት ወይም አሥር ጫማ ያህል ርቀት ላይ ስደርስ በግርማ ተመለከትኋት። እርሷም ይህን አስተዋለች፤ ፈጽሞም ተሸነፈች፤ ተዝለፍልፋ ወደቀች፤ እንባዋም ፈሰሰ። ስሜቱ እንደ ባሩድ ተቀጣጠለ፤ በጥቂት ጊዜም በክፍሉ ውስጥ የነበሩት ሁሉ ማለት ይቻላል በእንባ ተዋጡ። ይህ ስሜት በፋብሪካው ሁሉ ተሰራጨ። የድርጅቱ ባለቤት አቶ ደብሊው—— በዚያ ነበሩ፤ ሁኔታውንም አይተው ለበላይ ተቆጣጣሪው፦ «ፋብሪካውን አቁም፤ ሰዎቹም ለሃይማኖት ጊዜ ይስጡ፤ ይህ ፋብሪካ ከሚሠራ ይልቅ ነፍሳችን መዳኗ ይበልጥ አስፈላጊ ነውና» አሉት። መዝጊያው ወዲያውኑ ተዘጋ፤ ፋብሪካውም ቆመ፤ ነገር ግን የት እንሰብሰብ? የበላይ ተቆጣጣሪው የፈትል ማጠንጠኛው ክፍል ሰፊ እንደ ሆነ፥ ማጠንጠኛዎቹም ወደ ላይ ከተሰበሰቡ በዚያ መሰብሰብ እንደምንችል ሐሳብ አቀረበ። እንዲሁ አደረግን፤ ከዚያ የበለጠ ኃይለኛ ስብሰባ የተካፈልሁበት ጊዜ እምብዛም የለም። ስብሰባው በታላቅ ኃይል ቀጠለ። ሕንጻው ሰፊ ነበር፤ ከጣሪያው ሥር ካለው ሰገነት እስከ ምድር ቤቱ ድረስም ብዙ ሰዎች ነበሩበት። መነቃቃቱ በሚያስደንቅ ኃይል በፋብሪካው ሁሉ ዘለቀ፤ በጥቂት ቀናትም ውስጥ በፋብሪካው ከነበሩት ሰዎች ሁሉ ማለት ይቻላል በተስፋ የሚታይ መለወጥ ተለወጡ።
በዩቲካ ስለ ቴዎዶር ዲ. ዌልድ በተስፋ የሚታይ መለወጥ ብዙ ስለ ተነገረ፥ የነገሩን እውነት በትክክል ብዘግብ መልካም ሳይሆን አይቀርም። በዩቲካ የምትኖር ወይዘሮ ሲ—— የምትባል አክስት ነበረችው፤ እርሷም እጅግ ጸሎተኛና እግዚአብሔርን የምትፈራ ሴት ነበረች። እርሱ በኒው ኢንግላንድ የታወቁ የአንድ ቄስ ልጅ ነበር፤ አክስቱም ክርስቲያን እንደ ሆነ ታስብ ነበር። የቤተሰቧን አምልኮ ይመራ ነበር። መነቃቃቱ ከመጀመሩ በፊት በክሊንተን በሚገኘው ሃሚልተን ኮሌጅ ተማሪ ሆኖ ነበር። በዩቲካ የነበረው ሥራ እጅግ ብዙ ትኵረት ስለ ሳበ፥ ከክሊንተን ብዙ ሰዎች፥ ከእነርሱም መካከል አንዳንድ የኮሌጁ ፕሮፌሰሮች፥ ወደ ዩቲካ ወርደው በዚያ የሚሆነውን አውርተው ነበር፤ በዚህም ብዙ መነሣሣት ተፈጥሮ ነበር። ዌልድ በሃሚልተን ኮሌጅ ተማሪዎች መካከል እጅግ የጎላ ስፍራ ነበረው፤ እጅግ ታላቅ ተጽዕኖም ነበረው። በዩቲካ የሚሆነውን በሰማ ጊዜ እጅግ ተነሣሣ፤ ተቃውሞውም በብርቱ ተቀሰቀሰ። እኔ እንደ ተረዳሁት፥ ሥራውን በመቃወም በሚናገራቸው ንግግሮች ፈጽሞ ልክ ያጣ ሆነ።
ይህ ነገር በዩቲካ ታወቀ፤ ተቀምጦባት የነበረችው አክስቱም ስለ እርሱ እጅግ ተጨነቀች። እኔ ፈጽሞ አላውቀውም ነበር። አክስቱ ወደ ቤት መጥቶ አንድ ሰንበት እንዲያሳልፍ፥ ስብከቱን እንዲሰማና በሥራው እንዲሳብ ጠይቃ ጻፈችለት። መጀመሪያ እምቢ አለ፤ በመጨረሻ ግን አንዳንድ ተማሪዎችን ሰብስቦ ወደ ዩቲካ ለመውረድ እንደ ወሰነ፥ ነገሩ አክራሪነት ወይም ስሜታዊ ግለት መሆን እንዳለበት እንደሚያውቅ፥ እርሱንም እንደማያንቀሳቅሰው እንደሚያውቅ፥ እንደማያንቀሳቅሰውም እነርሱ ራሳቸው እንደሚያዩ ነገራቸው። በተቃውሞ ተሞልቶ መጣ፤ አክስቱም እኔ ስሰብክ ሊሰማ እንዳላሰበ ብዙም ሳትቆይ ተረዳች። ብዙውን ጊዜ አቶ ኤይከን ጠዋት መድረኩን ይይዙ ነበር፤ እኔ ደግሞ ከሰዓት በኋላና ማታ። አክስቱ ጠዋት አቶ ኤይከን ይሰብካሉ ብሎ ስለሚጠብቅ ወደ አቶ ኤይከን ቤተ ክርስቲያን ለመሄድ እንዳሰበ፥ እኔን ላለመስማት ስለ ቈረጠ ግን ከሰዓት በኋላም ሆነ ማታ እንደማይሄድ ተረዳች።
ከዚህ የተነሣ አቶ ኤይከን ጠዋት እኔ እንድሰብክ ሐሳብ አቀረቡ። እኔም ተስማማሁ፤ ወደ ስብሰባውም ሄድን። አቶ ኤይከን እንደ ልማዳቸው የመክፈቻውን ሥርዓት መሩ። ወይዘሮ ሲ—— ከቤተሰቧ ጋር ወደ ስብሰባው መጣች፤ ከእነርሱም መካከል አቶ ዌልድ ነበረ። እርሷ ራሷና አንድ ወይም ሁለት የቤተሰቡ አባላት ቀድመውት ካልወጡ በቀር በቀላሉ መውጣት እንዳይችል አድርጋ በመቀመጫው ረድፍ ውስጥ እንዲቀመጥ በጥንቃቄ አደረገች፤ እርሷ እንዳለችው፥ እኔ ልሰብክ መሆኑን ሲያይ ይወጣል ብላ ፈርታ ነበርና። በዩቲካ ወጣቶች መካከል ያለው ተጽዕኖ እጅግ ታላቅ እንደ ሆነ፥ ወደዚያ መምጣቱም ሥራውን ለመቃወም አንድ ሆነው እንዲተባበሩ ለማድረግ ብርቱ ተጽዕኖ እንደሚኖረው አውቅ ነበር። ገብቶ በተቀመጠ ጊዜ አቶ ኤይከን አመለከቱኝ።
ከመክፈቻው ሥርዓት በኋላ ተነሥቼ ይህን ጥቅስ ጠቀስሁ፦ «አንድ ኃጢአተኛ ግን ብዙ መልካም ነገርን ያጠፋል።» ከዚህ ጥቅስ ሰብኬም ሆነ ሲሰበክበት ሰምቼ አላውቅም ነበር፤ ነገር ግን በታላቅ ኃይል ወደ አእምሮዬ መጣ፤ ጥቅሱንም እንድመርጥ ያደረገኝ ይኸው ነበር። መስበክ ጀመርሁ፤ አንድ ኃጢአተኛ ብዙ መልካም ነገርን እንዴት ሊያጠፋ እንደሚችል፥ የአንድ ሰው ተጽዕኖም እጅግ ብዙ ነፍሳትን እንዴት ሊያጠፋ እንደሚችል በብዙ ምሳሌዎች ማሳየት ጀመርሁ። ስለ ዌልድ፥ ተጽዕኖውም ምን እንደ ሆነ፥ ምን ዓይነት ጥፋትም ሊያደርስ እንደሚችል ግልጽ የሆነ ሥዕል የሣልሁ ይመስለኛል። አንድ ወይም ሁለት ጊዜ ለመውጣት ሞከረ፤ ነገር ግን አክስቱ ይህን ስታስተውል ራሷን ወደ ፊት ጣል አድርጋ ከፊቷ ባለው መቀመጫ ላይ ተደግፋ በዝምታ ትጸልይ ነበር፤ እርሱም እርሷን ሳይቀሰቅስና ሳያስቸግር መውጣት አልቻለም፤ ስለዚህም ስብሰባው እስኪያበቃ ድረስ በመቀመጫው ተቀመጠ።
በማግስቱ ከአንዳንድ ሰዎች ጋር ለመነጋገር በጀነሲ መንገድ ወደሚገኝ አንድ ሱቅ ጎራ አልሁ፤ ለውይይት ከቦታ ወደ ቦታ መሄድ ልማዴ ነበርና፤ እዚያም ማንን ያገኘሁ ይመስላችኋል? ዌልድን! ያለ ምንም ይሉኝታ በእኔ ላይ ተነሣ፤ አንድ ሰዓት ያህል ወይም ሙሉ ሰዓት የሚያህል በእጅግ ተሳዳቢ አኳኋን ይናገረኝ የነበረ ይመስለኛል። እንዲህ ያለ ነገር ከቶ ሰምቼ አላውቅም ነበር። አንደበቱ ያለ ማቋረጥ ይፈስ ስለ ነበር እኔ ራሴ ልነግረው የቻልሁት እጅግ ጥቂት ነበር። በንግግር እጅግ የተካነ ነበር። ብዙም ሳይቆይ ይህ በሱቁ ውስጥ የነበሩትን ሁሉ ትኵረት ሳበ፤ ወሬውም በመንገዶቹ ተዛመተ፤ ከአጎራባች ሱቆችም ሠራተኞቹ ተሰብስበው እርሱ የሚለውን ለመስማት ቆሙ። በሱቁ ውስጥ ሥራ ሁሉ ቆመ፤ ሁሉም የእርሱን ስድብ ለማዳመጥ ራሳቸውን ሰጡ። በመጨረሻ ግን ልቡን ለመንካት እንዲህ አልሁት፦ «አቶ ዌልድ፥ አንተ የክርስቶስ አገልጋይ ልጅ አይደለህምን? ለአንተስ እንዲህ ጠባይ ማሳየት ይገባሃልን?» በዚያው አቅጣጫ ጥቂት ቃላት ተናገርሁ፤ ቃሉም እንደ ወጋው አየሁ፤ እርሱም አንድ እጅግ መራራ ነገር ወርውሮ ወዲያውኑ ሱቁን ለቆ ወጣ።
እኔም ደግሞ ወጣሁ፤ ለጊዜው ወደማርፍበት ወደ አቶ ኤይከን ቤት ተመለስሁ። ጥቂት ጊዜ እንኳ ሳልቆይ አንድ ሰው በሩን አንኳኳ፤ አንድም አገልጋይ በአቅራቢያ ስላልነበረ እኔ ራሴ ወደ በሩ ሄድሁ። የገባውስ ማን ይመስላችኋል? አቶ ዌልድ! ሊሰምጥ የደረሰ ይመስል ነበር። ወዲያውኑ ስላደረገብኝ ነገር እጅግ ትሑት የሆነ ኑዛዜና ይቅርታ መጠየቅ ጀመረ፤ ራሱንም እጅግ በጠነከረ ቃል ኰነነ። በደግነት እጁን ይዤ ጥቂት ተነጋገርን፤ በእርሱ ላይ ምንም ቂም እንዳልያዝሁ አረጋገጥሁለት፤ ልቡንም ለእግዚአብሔር እንዲሰጥ አጥብቄ መከርሁት። ከመሄዱ በፊት ከእርሱ ጋር የጸለይሁ ይመስለኛል። ሄደ፤ በዚያም ቀን ስለ እርሱ ከዚያ በላይ ምንም አልሰማሁም።
በዚያ ምሽት፥ እንደማስበው፥ በኒው ሃርትፎርድ ሰበክሁ፤ ሌሊቱም ከገፋ በኋላ ተመለስሁ። በማግስቱ ጠዋት እንደ ሰማሁት፥ እጅግ ተነክቶና ተዋርዶ ወደ አክስቱ ቤት ሄደ። እርሷም በቤተሰቡ ፊት እንዲጸልይ ጠየቀችው። እርሱም መጀመሪያ በሐሳቡ እንደ ደነገጠ ተናገረ። ነገር ግን ጠላትነቱ እጅግ ስለ ተነሣሣ፥ ይህ ገና ያልገለጸበት የተቃውሞው መንገድ እንደ ሆነ አሰበ፤ ስለዚህም ጥያቄዋን ለመፈጸም ወሰነ። ተንበርክኮ አክስቱ ጸሎት እንዲሆን ያሰበችውን ጀመረና ቀጠለ፤ እርሱ ራሱ እንደ ተረከው ግን ሊነገር ከሚችለው ሁሉ እጅግ የከፋ የስድብና የጥላቻ ንግግር ነበር። ሁሉም በስሜትና በመደነቅ እስኪንቀጠቀጡ ድረስ እጅግ በሚያስደንቅ ሁኔታ ቀጠለ፤ ከመጨረሱም በፊት መብራቱ እስኪጠፋ ድረስ ለረጅም ጊዜ ቀጠለ። አክስቱ ከእርሱ ጋር ለመነጋገርና ከእርሱ ጋር ለመጸለይ ሞከረች፤ ነገር ግን የልቡ ተቃውሞ እጅግ አስፈሪ ነበር። እርሱ ባሳየው የአእምሮ ሁኔታ ፈራች። ከእርሱ ጋር ከጸለየችና ልቡን ለእግዚአብሔር እንዲሰጥ ከለመነችው በኋላ ወደ መኝታዋ ሄደች።
እርሱም ወደ ክፍሉ ሄደ፤ አንዳንድ ጊዜ በክፍሉ ውስጥ ይመላለስ፥ አንዳንድ ጊዜ ደግሞ መሬት ላይ ይተኛ ነበር። ሌሊቱን ሙሉ በዚያ አስፈሪ የአእምሮ ሁኔታ ቈየ፤ ተቈጥቶ፥ ዐምፆ፥ ሆኖም በሕይወት ለመኖር እስኪያቅተው ድረስ የኃጢአት ወቀሳ ይዞት ነበር። ልክ ሲነጋጋ፥ በክፍሉ ውስጥ ወዲያና ወዲህ ሲመላለስ፥ እርሱ እንዳለው፥ ወደ መሬት ደፍቆ የሚያደቀው ጫና መጣበት፤ ከእርሱም ጋር ንስሐ እንዲገባ፥ አሁኑኑ ንስሐ እንዲገባ የሚያዝዘው የሚመስል ድምፅ መጣ። ያ ነገር ሰብሮ መሬት ላይ እንደ ጣለው ተናገረ፤ በዚያም ተኛ፤ ረፋድ ላይ አክስቱ ወደ ላይ ስትወጣ ራሱን ሺህ ጊዜ ሞኝ እያለ መሬት ላይ ተኝቶ አገኘችው፤ በሰው ዓይን ሲታይም ልቡ ፈጽሞ ተሰባብሮ ነበር።
በማግስቱ ምሽት በስብሰባው ውስጥ ተነሥቶ መናዘዝ ይችል እንደ ሆነ ጠየቀ። እኔም፦ «አዎን» ብዬ መለስሁለት፤ እርሱም በመላው ጉባኤ ፊት በይፋ ተናዘዘ። በሕዝቡ ሁሉ ፊት ያኖረውን ማሰናከያ ማስወገድ እንደሚገባው ተናገረ፤ የቻለውን ያህል በይፋ የሚናዘዝበትን አጋጣሚም ፈለገ። እጅግ ትሑት፥ ልባዊና በተሰበረ ልብ የተደረገ ኑዛዜም አቀረበ።
ከዚያን ጊዜ ጀምሮ በሥራው እጅግ ውጤታማ ረዳት ሆነ። በትጋት ሠራ፤ ኃይለኛ ተናጋሪ፥ በጸሎትና በአገልግሎትም እጅግ የተባረከ ስለ ነበረ፥ ለብዙ ዓመታት እጅግ ብዙ መልካም ነገር ለማድረግና እጅግ ብዙ ነፍሳት በተስፋ የሚታይ መለወጥ እንዲለወጡ መሣሪያ ሆነ። በመጨረሻ ከታላቅ ድካሙ የተነሣ ጤናው ደከመ። ኮሌጁን ለመተው ተገደደ፤ ወደ ላብራዶር ጠረፍም ዓሣ ለማጥመድ ጉዞ ሄደ። ጤናው ታድሶ፥ ከመሄዱ በፊት እንደ ነበረው ያው ትጉ ሠራተኛ ሆኖ ተመለሰ። ለመሥራት በምሞክርበት ስፍራ ለብዙ ጊዜ ውጤታማ ረዳት ሆኖ አገኘሁት።
እነዚህን መነቃቃቶች በመቃወም ታትመው ለወጡት ነገሮች ምንም ይፋዊ መልስ እንዳልተሰጠ ተናግሬአለሁ፤ ይኸውም ዶ/ር ቢቸር ወይም አቶ ኔትልተን ለጻፉት ለማናቸውም ነገር ማለት ነው። የኦናይዳ ማኅበርን ያቋቋሙት አገልጋዮች ሥራውን በመቃወም አንድ በራሪ ጽሑፍ እንዳሳተሙም ተናግሬአለሁ። ለዚህም ምንም ይፋዊ መልስ እንዳልተሰጠ አምናለሁ። በዚያው ካውንቲ በትሬንተን ይኖር የነበረ አንድ የዩኒቴሪያን አገልጋይ ሥራውን እጅግ አጣምሞ ያቀረበበትንና በእኔም ላይ የግል ጥቃት የሰነዘረበትን ተሳዳቢ በራሪ ጽሑፍ እንዳሳተመ አስታውሳለሁ። ለዚህም ከኦናይዳ ፕሪስባይተሪ አባላት አንዱ የሆኑት ቄስ ዌትሞር መልስ አሳተሙ።
ይህ መነቃቃት የሆነው በ1826 በብርዱ ወቅትና በጸደይ ወራት ነበር። የተለወጡት ሰዎች በካውንቲው ሁሉ ወደሚገኙት አብያተ ክርስቲያናት ከተቀበሉ በኋላ፥ በዋይትስቦሮ የፕሪስባይቴሪያን ቤተ ክርስቲያን እረኛ ቄስ ጆን ፍሮስት ስለ መነቃቃቱ በከፊል የሚተርክ በራሪ ጽሑፍ አሳተሙ፤ በትክክል የማስታውስ ከሆነም፥ በዚያ ፕሪስባይተሪ ክልል ውስጥ የተለወጡት ሰዎች ሦስት ሺህ እንደ ደረሱ ገለጹ። ከእነዚህ በራሪ ጽሑፎች የአንዱም ቅጂ የለኝም። ሥራው ከሮምና ከዩቲካ እንደ ማእከል ሆኖ ወደ ሁሉም አቅጣጫ እንደ ተስፋፋ ተናግሬአለሁ። አገልጋዮች ከብዙ ርቀት መጥተው ስብሰባዎቹን በመካፈልና በተለያዩ መንገዶች ሥራውን በማገዝ ጥቂትም ሆነ ብዙ ጊዜ አሳለፉ። እኔም የራሴን አገልግሎት በተቻለኝ መጠን በሰፊ መስክ ላይ አሰራጨሁ፤ በፕሪስባይተሪው ክልል ሁሉ ጥቂትም ሆነ ብዙ ሠራሁ። ጥቂትም ሆነ ብዙ ጊዜ ያሳለፍሁባቸውን ስፍራዎች ሁሉ አሁን ማስታወስ አልችልም። የእነዚያ አብያተ ክርስቲያናት እረኞች ሁሉ ከሥራው ጋር በጥልቅ ተባበሩ፤ እንደ መልካምና እውነተኛ ሰዎችም ራሳቸውን በመሠዊያው ላይ አኖሩ፤ ታላቁንና ክቡሩን እንቅስቃሴ ለማራመድም የቻሉትን ሁሉ አደረጉ፤ እግዚአብሔርም ብዙ ዋጋ ሰጣቸው።
በእነዚህ መነቃቃቶች የተሰበኩት ትምህርቶች ቀደም ብለው የቀረቡት ናቸው። ኃጢአተኞች የጸጋን መንገዶች እንዲጠቀሙና አዲስ ልብ እንዲሰጣቸው እንዲጸልዩ ከመንገር ይልቅ፥ ለራሳቸው አዲስ ልብና አዲስ መንፈስ እንዲያደርጉ ጠራናቸው፤ ወዲያውኑ ለእግዚአብሔር ራሳቸውን የማስገዛትንም ግዴታ አጥብቀን አሳሰብናቸው። መንፈስ አሁኑኑ ልባቸውን እንዲሰጡት፥ አሁኑኑ እንዲያምኑ፥ ለክርስቶስ ወደሚሰጥ፥ በእምነት፥ በፍቅርና በክርስቲያናዊ መታዘዝ ወደሚኖር ሕይወት ወዲያውኑ እንዲገቡ ለማድረግ ከእነርሱ ጋር እየታገለ እንደ ሆነ ነገርናቸው። መንፈስ ቅዱስን ለማግኘት እየጸለዩ ሳሉ ያለማቋረጥ እንደሚቃወሙት፥ ለራሳቸው የግዴታ ስሜት ወዲያውኑ ቢገዙ ግን ክርስቲያኖች እንደሚሆኑ አስተማርናቸው። ራሳቸውን ከማስገዛታቸው፥ ከማመናቸው፥ ልባቸውንም ለእግዚአብሔር ከመስጠታቸው በፊት ያደረጉትም ሆነ የተናገሩት ሁሉ ፈጽሞ ኃጢአት እንደ ሆነ፥ እግዚአብሔር እንዲያደርጉት የሚጠይቅባቸው ነገር ሳይሆን ንስሐን ማዘግየትና መንፈስ ቅዱስን መቃወም ብቻ እንደ ሆነ ልናሳያቸው ሞከርን።
እንዲህ ያለው ትምህርት በብዙዎች መቃወሙ የታወቀ ነው፤ ሆኖም በእግዚአብሔር መንፈስ እጅግ ተባረከ። ቀድሞ አንድ ኃጢአተኛ ለረጅም ጊዜ በኃጢአት ወቀሳ ውስጥ መቈየት አስፈላጊ እንደ ሆነ ይታሰብ ነበር፤ በሃይማኖት የቈዩ አሮጌ አማኞች ዕረፍት ከማግኘታቸው በፊት ለብዙ ወራት ወይም ዓመታት በኃጢአት ወቀሳ ውስጥ እንደ ነበሩ ሲናገሩ መስማት ያልተለመደ አልነበረም፤ በኃጢአት ወቀሳ ውስጥ በቈዩ መጠን በእውነት ለመለወጣቸው ያለው ማስረጃ የዚያኑ ያህል ይበልጣል የሚል ስሜት እንደ ነበራቸውም ግልጽ ነበር። እኛ የዚህን ተቃራኒ አስተማርን። ለረጅም ጊዜ በኃጢአት ወቀሳ ውስጥ ቢቈዩ በራሳቸው ጽድቅ የሚታመኑ የመሆን አደጋ ላይ እንደሚወድቁ አጥብቄ ተናገርሁ፤ ይኸውም እግዚአብሔር እንዲያድናቸው ለማግባባት ብዙ እንደ ጸለዩና ብዙ እንዳደረጉ ያስባሉ ማለት ነው፤ በመጨረሻም በሐሰተኛ ተስፋ ይረጋሉ። በዚህ በተራዘመ የኃጢአት ወቀሳ ሥር የእግዚአብሔርን መንፈስ አሳዝነው የማራቅ አደጋ ላይ እንዳሉ ነገርናቸው፤ የአእምሮአቸው ጭንቀትም ሲያቆም በተፈጥሮ የኋሊት ምላሽ ይመጣል፤ ጭንቀታቸው ይቀንሳል፤ ምናልባትም በተወሰነ መጠን መጽናናትን ያገኛሉ፤ ከዚህም ተለውጠናል ብለው የመደምደም አደጋ ላይ ይወድቃሉ፤ ተለውጠን ይሆናል የሚለው ተራ ሐሳብ እንኳ በተወሰነ መጠን ደስታን ሊፈጥር ይችላል፤ ያንንም ደስታ ክርስቲያናዊ ደስታና ሰላም ነው ብለው ሊሳሳቱት ይችላሉ፤ ይህም የአእምሮ ሁኔታ ለመለወጣቸው ማስረጃ ተደርጎ በመወሰድ ይበልጥ ሊያስታቸው ይችላል ብለን ነገርናቸው።
ይህን የሐሰት ትምህርት ፈጽመን ለማስወገድ ሞከርን። እግዚአብሔር ከእጃቸው ሊቀበለው የሚችለው ብቸኛው ነገር ወዲያውኑ ራስን ማስገዛት እንደ ሆነ፥ በማናቸውም ሰበብ የሚደረግ ማዘግየት ሁሉ በእግዚአብሔር ላይ ማመፅ እንደ ሆነ ያን ጊዜ፥ ከዚያም ወዲህ ሁልጊዜ እንዳደረግሁት፥ አጥብቀን አሳሰብን። በዚህ ትምህርት ሥር ሰዎች በጥቂት ሰዓታት ውስጥ፥ አንዳንድ ጊዜም በጥቂት ደቂቃዎች ውስጥ፥ በኃጢአት ተወቅሰው መለወጣቸው እጅግ የተለመደ ሆነ። እንዲህ ያሉ ድንገተኛ መለወጦች ብዙ መልካም ሰዎችን አስደነገጡ፤ በእርግጥም የተለወጡት ሰዎች ወደ ኋላ እንደሚመለሱና በትክክል እንዳልተለወጡ እንደሚገለጥ ተነበዩ። ነገር ግን ፍጻሜው እንዳረጋገጠው፥ ከእነዚያ ድንገተኛ መለወጦች መካከል በዚያ አካባቢ ከታወቁት ሁሉ እጅግ ተደማጭነት ያላቸው አንዳንድ ክርስቲያኖች ነበሩ፤ ይህም በአገልግሎቴ ሁሉ ካየሁት ከራሴ ተሞክሮ ጋር የሚስማማ ነው። አቶ ኤይከን ለአቶ ኔትልተንና ለዶ/ር ቢቸር ደብዳቤዎች አንዳንዶቹ በግል መልስ እንደ ሰጡ ተናግሬአለሁ። በዚያን ጊዜ ዶ/ር ቢቸር የጻፏቸው አንዳንድ ደብዳቤዎች ታትመው ወጡ፤ ነገር ግን ምንም ይፋዊ ትኵረት አልተሰጣቸውም። አቶ ኤይከን በፖስታ የላኳቸው መልሶች የአቶ ኔትልተንንም ሆነ የዶ/ር ቢቸርን ተቃውሞ ምንም ያስለወጡ አይመስሉም። ዶ/ር ቢቸር በዚያው ጊዜ ገደማ ለኒው ሄቨኑ ዶ/ር ቴይለር ከጻፉት ደብዳቤ፥ እነዚያን መነቃቃቶች በማራመድ የተሰማሩት ወንድሞች እውነተኞች አይደሉም የሚል ስሜት አንድ ሰው በእርሳቸው ላይ እንዳሳደረ ታየ። በዚያ ደብዳቤ ውስጥ በእነዚያ መነቃቃቶች የውሸት መንፈስ እጅግ ሰፍኖ ስለ ነበር እነርሱን በማራመድ የተሰማሩት ወንድሞች ፈጽሞ ሊታመኑ እንደማይችሉ አረጋግጠው ተናገሩ። ዶ/ር ቢቸር ለዶ/ር ቴይለር የጻፉት ይህ ደብዳቤ ታትሞ ወጣ። ዛሬ እንደ ገና ቢታተም፥ እነዚያ መነቃቃቶች በሰፈኑበት አካባቢ የሚኖሩ ሰዎች፥ ዶ/ር ቢቸር በግል ደብዳቤ እንኳ ቢሆን እነዚያን ታላላቅና ድንቅ መነቃቃቶች በማራመድ ስለ ተሰማሩት አገልጋዮችና ክርስቲያኖች እንዲህ ያሉ ነገሮችን መጻፋቸው እጅግ እንግዳ ነገር ሆኖ ይታያቸዋል።