ጸሎትና የሚስዮን ሥራ

«በዚያን ጊዜ ገደማ አንድ ቀን ከቀሩኝ ጥቂት ፍየሎቼ መካከል እንደሚታረዱ ወይም እንደሚሠቃዩ ያለ ያልተለመደ ጩኸት ሰማሁ። ወደ ፍየሎቹ ቤት ሮጥሁ፤ ወዲያውም የታጠቁ ሰዎች ቡድን ከቦኝ ራሴን አገኘሁት። ወጥመዱ ያዘኝ፤ መሣሪያዎቻቸውም ተነሥተው ነበር፤ በሚቀጥለው ቅጽበትም እሞታለሁ ብዬ ጠበቅሁ። እግዚአብሔር ግን በጽናትና በደግነት እንድናገራቸው አነሣሣኝ፤ ስለ ኃጢአታቸውና ስለ ቅጣቱ አስጠነቀቅኋቸው፤ በዚያ እንድቆይና መልካማቸውን እንድፈልግ ያደረገኝ ፍቅሬና ርኅራኄዬ ብቻ እንደ ሆነ፣ ቢገድሉኝም የሚገድሉት ከሁሉ የሚበልጥ ወዳጃቸውን እንደ ሆነ አሳየኋቸው። ደግሞም ለመሞት እንደማልፈራ አረጋገጥሁላቸው፤ ስሞት አዳኜ ወደ ሰማይ ይወስደኛልና፣ በምድር ከምኖረውም እጅግ ደስተኛ እሆናለሁና፤ በሕይወት ለመኖር ያለኝ ብቸኛ ምኞትም ጌታዬን ኢየሱስ ክርስቶስን እንዲወዱ በማስተማር ደስተኞች ላደርጋቸው ነው። ከዚያም እጆቼንና ዓይኖቼን ወደ ሰማያት አንሥቼ ኢየሱስ የታና ሰዎቼን ሁሉ እንዲባርክ፣ እኔንም እንዲጠብቀኝ ወይም ለበጎ መስሎ እንደ ታየው ወደ ሰማይ እንዲወስደኝ ድምፄን ከፍ አድርጌ ጸለይሁ። አንዱ በአንዱ እያፈተለኩ ከእኔ ሄዱ፤ ኢየሱስም እንደ ገና ከለከላቸው። ጌታ ኢየሱስ ለእምነት ጸሎት መልስ ለመስጠትና ለበጎአቸውና ለክብሩ እስከ ሆነ ድረስ በራሱ መልካም ጊዜና መንገድ ለአገልጋዮቹ እርዳታ ለመላክ ከሚቸኩለው በላይ፣ በአደጋ ሰዓት የሚያለቅስ ልጇን ለመጠበቅ የሮጠች እናት ከቶ ትኖር ይሆን?»—ጆን ጂ. ፔተን።

የሚስዮን ሥራ ማለት ስለ ክርስቶስና ስለ ማስተስረያ ሞቱ ፈጽሞ ላልሰሙት ለወደቀው የአዳም ዘር ወንጌልን መስጠት ማለት ነው። በጌታችን በኢየሱስ ክርስቶስ በኩል ስላለው መዳን እንዲሰሙ ለሌሎች ዕድል መስጠት፣ ወንጌል በተዳረሰባቸው አገሮች እኛ እንዳገኘናቸው ሌሎችም የወንጌልን በረከቶች እንዲቀበሉና እንዲያገኙ ዕድል መፍቀድ ማለት ነው። የወንጌልን ጥቅሞች የሚያጣጥሙ ሰዎች እነዚህኑ ሃይማኖታዊ ጥቅሞችና የወንጌል መብቶች ለሰው ልጆች ሁሉ ይሰጣሉ ማለት ነው። ጸሎት ከሚስዮን ሥራ ጋር እጅግ ብዙ ግንኙነት አለው። ጸሎት የሚስዮን ሥራ ረዳት ነው። የእውነተኛ የሚስዮን ጥረት ሁሉ ስኬት በጸሎት ላይ የተመሠረተ ነው። የሚስዮን ሥራ ሕይወትና መንፈስ የጸሎት ሕይወትና መንፈስ ነው። ጸሎትም የሚስዮን ሥራም የተወለዱት በመለኮት አእምሮ ውስጥ ነው። ጸሎትና የሚስዮን ሥራ የልብ ወዳጆች ናቸው። ጸሎት የሚስዮን ሥራን ይፈጥራል፣ ያሳካልማል፤ የሚስዮን ሥራም በጸሎት ላይ እጅግ ይደገፋል። ስለ መሲሑ በሚናገረው በሰባ ሁለተኛው መዝሙር «ሁልጊዜም ስለ እርሱ ይጸልያሉ» ተብሎ ተጽፏል። ሰውን ለማዳን እንዲመጣ ጸሎት ይደረግ ነበር፤ ሊመሠርተው ለሚመጣው የመዳን ዕቅድ ስኬትም ጸሎት ይደረግ ነበር።

የኢየሱስ ክርስቶስ መንፈስ የሚስዮን መንፈስ ነው። ጌታችን ኢየሱስ ክርስቶስ ራሱ የመጀመሪያው ሚስዮናዊ ነበር። የእርሱ ተስፋ መሰጠትና መምጣት የመጀመሪያውን የሚስዮን እንቅስቃሴ አስገኙ። የሚስዮን መንፈስ የወንጌል አንድ ገጽታ ብቻ፣ የመዳን ዕቅድ አንድ መለያ ብቻ ሳይሆን ዋና መንፈሱና ሕይወቱ ነው። የሚስዮን እንቅስቃሴ የሰው ልጆችን ዓለም ሁሉ ለክርስቶስ የመውረስ ዓላማ ይዛ በጦር ሰልፍ የምትገሠግሥ የኢየሱስ ክርስቶስ ቤተ ክርስቲያን ናት። በእግዚአብሔር መንፈስ የተነካ ሁሉ በሚስዮን መንፈስ ይቀጣጠላል። የሚስዮን ሥራን የሚቃወም ክርስቲያን ማለት እርስ በርሱ የሚጋጭ አነጋገር ነው። መለኮታዊና ሰብአዊ ኃይሎች ሰዎችን ከሚስዮን ዓላማ ጋር በማያሰልፍ ሁኔታ ሊያኖሩአቸው ስለማይችሉ፣ የሚስዮን ሥራን የሚቃወም ክርስቲያን መሆን የማይቻል ነው ማለት እንችላለን። የሚስዮን ግፊት የጌታችን የኢየሱስ ክርስቶስ የልብ ትርታ ነው፤ የራሱን ሕያው ኃይሎች በቤተ ክርስቲያን አካል ሁሉ ውስጥ ይልካል። የእግዚአብሔር ሕዝብ መንፈሳዊ ሕይወት በእነዚያ የልብ ትርታዎች ብርታት ይነሣል ወይም ይወድቃል። እነዚህ የሕይወት ኃይሎች ሲቆሙ ሞት ይከተላል። ስለዚህ የሚስዮን ሥራን የሚቃወሙ ክርስቲያኖች የሞቱ ክርስቲያኖች እንደ ሆኑ ሁሉ፣ የሚስዮን ሥራን የሚቃወሙ አብያተ ክርስቲያናትም የሞቱ አብያተ ክርስቲያናት ናቸው።

ሰይጣን ለእግዚአብሔር የሚሆንን ታላቅ እንቅስቃሴ መከልከል ካልቻለ እጅግ ተንኰለኛው ዘዴው እንቅስቃሴውን ማበላሸት ነው። እንቅስቃሴውን ፊት አስቀድሞ የእንቅስቃሴውን መንፈስ ወደ ኋላ ማድረግ ከቻለ እንቅስቃሴውን ቍሳዊ አድርጎታል፤ ፈጽሞም አበላሽቶታል። እንቅስቃሴውን ቍሳዊ ከመሆን የሚያድነውና የእንቅስቃሴውን መንፈስ ብርቱና ገዥ አድርጎ የሚያቆየው ኃያል ጸሎት ብቻ ነው።

የሚስዮን ስኬት ሁሉ መክፈቻ ጸሎት ነው። ያ መክፈቻ በአገር ቤት ባሉ አብያተ ክርስቲያናት እጅ ነው። ጌታችን በአሕዛብ አገሮች የሚያገኛቸው ድሎች የሚገኙት በሚጸልዩ ሚስዮናውያን እንጂ በባዕድ አገሮች ባሉ ሙያተኛ ሠራተኞች አይደለም። ይልቁንም ይህ ስኬት የሚገኘው በአገር ቤት ባሉ አብያተ ክርስቲያናት በሚቀርብ ቅዱስ ጸሎት ነው። እየጾመችና እየጸለየች የተንበረከከች የአገር ቤቷ ቤተ ክርስቲያን በዚህ አስከፊና የመጨረሻ ፍልሚያ ታላቋ የመንፈሳዊ ስንቅ ማዕከል፣ የጦርነቱ ብርታትና የድል ዋስትና ናት። በዚህ ውጊያ የገንዘብ አቅም እውነተኛው የጦርነት ብርታት አይደለም። ድርጅታዊ መዋቅር በራሱ የአሕዛብን ቅጥሮች ለማፍረስ፣ የሚሠሩ በሮችን ለመክፈትና የአሕዛብን ልብ ለክርስቶስ ለመማረክ ምንም ኃይል የለውም። ይህን ሥራ ሊሠራ የሚችለው ጸሎት ብቻ ነው።

አሮንና ሆር በሙሴ በኩል ለእስራኤል ድልን እንደ ሰጡ ያህል በእርግጥ፣ የምትጸልይ ቤተ ክርስቲያንም በኢየሱስ ክርስቶስ በኩል በአሕዛብ አገሮች በሁሉ የጦር ሜዳ ድልን ትሰጣለች። ይህ በአገር ቤት እውነት እንደ ሆነ ሁሉ በባዕድ አገሮችም እውነት ነው። ውድድሩን የምታሸንፈው የምትጸልይ ቤተ ክርስቲያን ናት። የአገር ቤቷ ቤተ ክርስቲያን ሚስዮኖችን ለመመሥረትና ሚስዮናውያኗን ለመደገፍ ገንዘብ ስታቀርብ ያደረገችው እጅግ ጥቃቅን ነገር ብቻ ነው። ገንዘብ አስፈላጊ ነው፤ ነገር ግን ያለ ጸሎት የሚሰጥ ገንዘብ ክርስትና ባልደረሰባቸው አገሮች ባለው ጨለማ፣ ጕስቍልናና ኃጢአት ፊት ኃይል የለውም። ጸሎት የሌለበት ስጦታ መካንነትንና ሞትን ይወልዳል። በአገር ቤት ያለው ደካማ ጸሎት በሚስዮን ሜዳ ላለው ደካማ ውጤት ምክንያቱ ነው። ጸሎት የሌለበት ስጦታ በዘመኑ የሚስዮን እንቅስቃሴዎች ውስጥ ላሉት ቀውሶች ሁሉ ምሥጢሩ ነው፤ በሚስዮን ቦርዶች ላይ ዕዳ እንዲከማችም ምክንያት ነው።

ሰዎች ከሀብታቸው ለሚስዮን ዓላማ እንዲሰጡ ማሳሰብ ተገቢ ነው። ነገር ግን ጸሎታቸውን ለእንቅስቃሴው እንዲሰጡ ማሳሰብ እጅግ የበለጠ አስፈላጊ ነው። የባዕድ አገር ሚስዮን ዛሬ ከገንዘብ ኃይል ይልቅ የጸሎት ኃይል ያስፈልገዋል። ጸሎት በሚስዮን ዓላማ ውስጥ ድህነትን እንኳ በችግሮችና በእንቅፋቶች መካከል ወደ ፊት እንዲገሠግሥ ሊያደርገው ይችላል። ያለ ጸሎት ብዙ ገንዘብ በሚስዮን ሜዳ ባለው ድቅድቅ ጨለማ፣ ኃጢአትና ጕስቍልና ፊት ረዳት የሌለውና ኃይል የሌለው ነው።

ይህ በተለየ ሁኔታ የሚስዮን ዘመን ነው። የፕሮቴስታንት ክርስትና በአረማውያን አገሮች ወደ ፊት በመግፋት ረገድ ከቶ ባልተነሣሣው መጠን ተነሣሥቷል። የሚስዮን እንቅስቃሴ ተስፋን የሚያነቃ፣ ቅንዓትን የሚያቀጣጥል፣ እጅግ ቀዝቃዛና ሕይወት አልባ የሆኑትን እንኳ ፍላጎታቸውን ባይሆን ትኵረታቸውን የሚጠይቅ መጠን ይዟል። ከሞላ ጎደል እያንዳንዷ ቤተ ክርስቲያን ይህ ስሜት ተጋብቶባታል፤ ያቀዱአቸው የሚስዮን እንቅስቃሴዎች ሸራዎችም የሚያግዘውን ነፋስ ለመያዝ በሰፊው ተዘርግተዋል። በአሁኑ ጊዜ ያለው አደጋ ይህ ነው፤ የሚስዮን እንቅስቃሴ ከሚስዮን መንፈስ ቀድሞ መሄዱ። ይህ ሁልጊዜ የቤተ ክርስቲያን አደጋ ሆኖ ቆይቷል፤ በጥላው ፍሬ ነገሩን ማጣት፣ በውጫዊው ቅርፊት መንፈሱን ማጣት፣ በእንቅስቃሴው ትርዒት ብቻ መርካት፣ የጥረትን ኃይል በመንፈሱ ላይ ሳይሆን በእንቅስቃሴው ላይ ማድረግ።

የዚህ እንቅስቃሴ ግርማ መንፈሱን እንዳናይ ዓይናችንን ሊያሳውር ብቻ ሳይሆን፣ በሚያግዝ ነፋስ የሚነዳ መርከብ ያ ነፋስ ወደ ዐውሎ ነፋስ ሲያብጥ ሊጠፋ እንደሚችል፣ ለእንቅስቃሴው ሕይወትና ቅርጽ ሊሰጠው የሚገባው መንፈስም በእንቅስቃሴው ሀብት ውስጥ ሊጠፋ ይችላል።

የጸሎትን የግድ አስፈላጊነት የሚያጐላ አንድ ንግግር በሰማንበት ፋንታ ለሚስዮን ሥራ የገንዘብን የግድ አስፈላጊነት የሚያጐሉ አንደበተ ርቱዕና ልባዊ ብዙ ንግግሮችን የሰማን ከእኛ መካከል ጥቂቶች አይደለንም። ዕቅዶቻችንና ዘዴዎቻችን ሁሉ እምነትን ለማነቃቃትና ጸሎትን ለማበረታታት ሳይሆን ገንዘብ ወደ ማሰባሰብ ወደ አንዱ ግብ ያነጣጥራሉ። በቤተ ክርስቲያን መሪዎች ዘንድ ያለው የተለመደ ሐሳብ ገንዘቡን ካገኘን ጸሎት በራሱ ጊዜ ይመጣል የሚል ነው። እውነቱ ግን የዚህ ተቃራኒ ነው። ቤተ ክርስቲያንን በጸሎት ሥራ ላይ ብናሰማራት፣ በዚህም የሚስዮንን መንፈስ ብናረጋግጥ፣ ገንዘብ በራሱ ጊዜ የመምጣቱ ዕድል እጅግ ሰፊ ነው። መንፈሳዊ መሣሪያዎችና መንፈሳዊ ኃይሎች ግን ከቶ በራሳቸው ጊዜ አይመጡም። «በራሱ ጊዜ ይመጣል» ለሚለው ሕግ የተተዉ መንፈሳዊ ተግባሮችና መንፈሳዊ ምክንያቶች በእርግጥ ይወድቃሉ፤ ይሞታሉም። በመንፈሳዊው ግዛት የሚኖሩትና የሚገዙት አጽንዖት የተሰጣቸው ነገሮች ብቻ ናቸው። የሚሰጡ የግድ አይጸልዩም። በአብያተ ክርስቲያናቶቻችን ውስጥ በጸሎት አልባነታቸው የታወቁ ብዙ ለጋስ ሰጪዎች አሉ። የዛሬው የሚስዮን እንቅስቃሴ ክፋቶች አንዱ በዚያው ላይ ነው። መስጠት ከጸሎት ፈጽሞ ተለይቷል። ጸሎት ጥቂት ትኵረት ብቻ ያገኛል፤ መስጠት ግን ጎልቶ ይታያል። በእውነት የሚጸልዩ ለመስጠት ይነሣሣሉ። መጸለይ የመስጠትን መንፈስ ይፈጥራል። የሚጸልዩት በልግስናና ራሳቸውን በመካድ ይሰጣሉ። ወደ እግዚአብሔር ለመቅረብ ወደ ጸሎት እልፍኙ የሚገባ ሰው ለእግዚአብሔር ቦርሳውንም ይከፍታል። ነገር ግን ለይስሙላ የሚደረግ፣ በማጕረምረም የሚሰጥና በግዴታ የተጣለ መዋጮ የጸሎትን መንፈስ ራሱን ይገድላል። መንፈሳዊውን ችላ ብሎ ቍሳዊውን ማጕላት በማይለወጥ ሕግ መንፈሳዊውን ከቦታው ያስወጣዋል፤ ዋጋውንም ያሳንሰዋል።

በዘመናዊ ሃይማኖታዊ እንቅስቃሴዎች ውስጥ ገንዘብ እንዴት ታላቅ ድርሻ እንዳለውና ጸሎት እንዴት ጥቂት ድርሻ እንዳለው በእውነት የሚያስደንቅ ነው። ከዚህ በተቃራኒ፣ በቀደመችው ክርስትና ገንዘብ ወንጌልን ለማስፋፋት እንደ አንድ ምክንያት እንዴት ጥቂት ድርሻ እንደ ነበረውና ጸሎት በዚያ ውስጥ እንዴት ያለ ድንቅ ድርሻ እንደ ነበረው አስደናቂ ነው።

የመስጠት ጸጋ ከጸሎት እልፍኝ በበለጠ የበለጸገ እድገት የሚያገኝበት ስፍራ የለም። የሚስዮን ቦርዶቻችንና ጽሕፈት ቤቶቻችን ሁሉ ለሚጠፋው ዓለም የእውነተኛ ጸሎት ጭንቀትና ከክርስቶስ ጋር ምጥ እስኪመጣባቸው ድረስ ወደ ጸሎት ቡድኖች ቢለወጡ፣ የማይንቀሳቀስ ንብረት፣ የባንክ አክሲዮኖችና የአሜሪካ መንግሥት ቦንዶች የክርስቶስን ወንጌል በሰዎች መካከል ለማስፋፋት ለገበያ በቀረቡ ነበር። የጸሎት መንፈስ ቢሰፍን ኖሮ፣ አባሎቻቸው እያንዳንዳቸው ሚሊዮኖች ዋጋ ያላቸው የሚስዮን ቦርዶች በዕዳ ሸክም ሥር ባልተንገዳገዱ ነበር፤ ታላላቅ አብያተ ክርስቲያናትም ጥቂት ሚስዮናውያንን ብቻ ለመደገፍ የሚያሳፍር መዋጮ ለመክፈል ዓመታዊ ጕድለት፣ ዓመታዊ ማጕረምረም፣ ሳይወዱ መስጠትና ግፊት፣ ከዚህም በላይ ከእነርሱ አንዳንዶቹን ወደ አገር ስለ መመለስ የመከራከር ውርደት ባልገጠማቸው ነበር። የክርስቶስ መንግሥት ወደ ፊት መገሥገሥ በክርስቶስ ራሱ የተቈለፈው በጸሎት እልፍኝ ውስጥ እንጂ በመዋጮ ሣጥን ውስጥ አይደለም።

ነቢዩ ኢሳይያስ በባለ ራእይ ዓይን ዘመናትን አሻግሮ እየተመለከተ፣ የክርስቶስ መንግሥት በሰዎች መካከል እስኪመሠረት ድረስ በጸሎት ለመጽናትና ለእግዚአብሔር ዕረፍት ላለመስጠት ያለውን ዓላማ እንዲህ ይገልጻል፦

«ስለ ጽዮን ዝም አልልም፥ ስለ ኢየሩሳሌምም ጽድቅዋ እንደ ፀዳል፥ ማዳንዋም እንደሚበራ መብራት እስኪወጣ ድረስ አላርፍም።»

ከዚያም የክርስቲያን ቤተ ክርስቲያንን የመጨረሻ ስኬት አስቀድሞ እየተናገረ እንዲህ ይላል፦

«አሕዛብም ጽድቅሽን፥ ነገሥታትም ሁሉ ክብርሽን ያያሉ፤ የእግዚአብሔርም አፍ በሚጠራው በአዲስ ስም ትጠሪያለሽ።»

ከዚያም ጌታ ራሱ በዚህ የወንጌል ነቢይ አፍ እንዲህ ይላል፦

«ኢየሩሳሌም ሆይ፥ በቅጥሮችሽ ላይ ጠባቂዎችን አቁሜአለሁ፤ ቀንና ሌሊትም ሁልጊዜ ዝም አይሉም፤ እናንተ የእግዚአብሔርን ስም የምታነሡ፥ ዝም አትበሉ፤ ዕረፍትም አትስጡት፥ እስኪያጸናት ድረስ፥ ኢየሩሳሌምን በምድር ላይ ምስጋና እስኪያደርጋት ድረስ።»

በመጽሐፍ ቅዱሳችን ዳር ማስታወሻ ላይ «እናንተ እግዚአብሔርን የምታሳስቡ» ይላል። ሐሳቡ እነዚህ የሚጸልዩ ሰዎች የእግዚአብሔር አሳሳቢዎች ናቸው የሚል ነው፤ የገባውን ተስፋ የሚያሳስቡት፣ የእግዚአብሔርም ቤተ ክርስቲያን በምድር እስክትመሠረት ድረስ ዕረፍት የማይሰጡት እነርሱ ናቸው።

በጌታ ጸሎት ውስጥ ካሉት ዋና ዋና ልመናዎች አንዱም የእግዚአብሔርን መንግሥት መመሥረትና የወንጌልን መስፋፋት ይኸንኑ ጉዳይ በአጭሩና በጠቋሚው «መንግሥትህ ትምጣ» በሚለው ልመና ይዳስሳል፤ «ፈቃድህ በሰማይ እንደ ሆነች እንዲሁ በምድር ትሁን» የሚሉት ቃላትም ተጨምረውበታል።

በሐዋርያት ዘመን በነበረችው ቤተ ክርስቲያን የሚስዮን እንቅስቃሴ የተወለደው በጾምና በጸሎት ከባቢ ውስጥ ነው። የክርስቲያን ቤተ ክርስቲያንን በረከቶች ለአሕዛብ ለማቅረብ ያለመው እንቅስቃሴ ራሱ ጴጥሮስ ሊጸልይ ወደ ጣራው በወጣበት ጊዜ በጣራው ላይ ነበር፤ በዚያ እግዚአብሔር የወንጌልን መብቶች ለአሕዛብ ለማዳረስና በአይሁድና በአሕዛብ መካከል ያለውን የሚለያየውን የመካከል ግድግዳ ለማፍረስ ያለውን መለኮታዊ ዓላማውን አሳየው።

ይልቁንም በተለየ ሁኔታ ጳውሎስና በርናባስ በአንጾኪያ የነበረችው ቤተ ክርስቲያን ከጾመችና ከጸለየች በኋላ ለሚስዮን ሜዳ በግልጥ ተጠሩ፤ ተለዩም። በዚያን ጊዜ መንፈስ ቅዱስ ከሰማይ እንዲህ ሲል መለሰ፦ «በርናባስንና ሳውልን ለጠራኋቸው ሥራ ለዩልኝ።»

ይህ የጳውሎስና የበርናባስ ወደ አገልግሎት የተጠሩበት ጥሪ እንዳልነበረ፣ ይልቁንም ወደ ባዕድ አገር ሜዳ የተጠሩበት የተለየ ጥሪ እንደ ነበረ እባክህ ልብ በል። ጳውሎስ ከዚህ ዓመታት ቀደም ብሎ፣ በተለወጠበት ጊዜ እንኳ፣ ወደ አገልግሎት ተጠርቶ ነበር። ይህ በአንጾኪያ ቤተ ክርስቲያን ውስጥ ከተደረገ ልዩና የማያቋርጥ ጸሎት ለተወለደ ሥራ የተደረገ ተከታይ ጥሪ ነበር። እግዚአብሔር ሰዎችን ወደ አገልግሎት ብቻ ሳይሆን ሚስዮናውያን እንዲሆኑም ይጠራል። የሚስዮን ሥራ የእግዚአብሔር ሥራ ነው። ሊሠሩትም የሚገባቸው በእግዚአብሔር የተጠሩ ሰዎች ናቸው። ባለፈው ዘመን በባዕድ አገር ሜዳ በመልካምና በስኬት የሠሩ ሚስዮናውያን እንደነዚህ ያሉት ናቸው፤ ወደ ፊትም ሥራውን የሚሠሩት እንደነዚሁ ያሉት ናቸው፤ ያለዚያ ሥራው አይሠራም።

ለሥራው የሚያስፈልጉት የሚጸልዩ ሚስዮናውያን ናቸው፤ እነርሱንም የምትልካቸው የምትጸልይ ቤተ ክርስቲያን ናት፤ የተሰጠው ተስፋ ስኬት ትንቢቶች እነዚህ ናቸው። በሚስዮናውያን ወደ ውጭ የሚላከው የሃይማኖት ዓይነት የሚጸልይ ዓይነት ነው። የአሕዛብ ዓለም የሚለወጥበት ሃይማኖት የጸሎት ሃይማኖት ነው፤ ደግሞም ወደ እውነተኛው አምላክ የሚቀርብ የጸሎት ሃይማኖት ነው። የአሕዛብ ዓለም ቀድሞውንም ወደ ጣዖታቱና ወደ ሐሰተኛ አማልክቱ ይጸልያል። ነገር ግን በምትጸልይ ቤተ ክርስቲያን በተላኩ በሚጸልዩ ሚስዮናውያን ጣዖቶቻቸውን እንዲጥሉና የጌታን የኢየሱስ ክርስቶስን ስም መጥራት እንዲጀምሩ መማር አለባቸው። ጸሎት የሌላት ቤተ ክርስቲያን የሚጸልይ ሃይማኖትን ወደ አሕዛብ አገሮች ልታሻግር አትችልም። ጸሎት የሌለው ሚስዮናዊ ራሱ ከሁሉ በላይ የጸሎት ሰው እስኪሆን ድረስ አምላካችንን የማያውቁትን ጣዖት አምላኪ አሕዛብ በእውነተኛ ጸሎት ወደ ጕልበታቸው ሊያመጣቸው አይችልም። በአገር ቤት የእግዚአብሔርን ሥራ ለመሥራት የሚጸልዩ ሰዎች እንደሚያስፈልጉ ሁሉ፣ በጨለማ የተቀመጡትን ወደ ብርሃን ለማምጣትም የሚጸልዩ ሚስዮናውያን ያስፈልጋሉ።

እጅግ የታወቁትና እጅግ የተሳካላቸው ሚስዮናውያን ከሁሉ በላይ የጸሎት ሰዎች ነበሩ። ዴቪድ ሊቪንግስተን፣ ዊሊያም ቴይለር፣ አዶኒራም ጃድሰን፣ ሄንሪ ማርቲንና ሃድሰን ቴለር ከሌሎች ብዙዎች ጋር፣ በደከሙበት ስፍራ ማኅተማቸውና ተጽዕኖአቸው እስከ ዛሬ የሚኖር የታወቁ የሚጸልዩ ሰዎች ጓድ ናቸው። ለዚህ ሥራ ጸሎት የሌለው ሰው አይፈለግም። ከሁሉ በላይ ከፍ ብሎ፣ ለእያንዳንዱ ሚስዮናዊ ቀዳሚው ብቃት ጸሎት ነው። ከምንም በላይ የጸሎት ሰው ይሁን። የዘውዱ ቀን ሲመጣ፣ መዛግብቱም በታላቁ የፍርድ ቀን ተዘጋጅተው ሲነበቡ፣ የሚጸልዩ ሰዎች በአሕዛብ ምድር አስቸጋሪ ሜዳዎች እንዴት በመልካም እንደ ሠሩ፣ በእነዚያ ሜዳዎች የክርስትናን መሠረት በመጣልም ምን ያህል ለእነርሱ እንደሚገባ ያን ጊዜ ይገለጣል።

ለዚህ ወንጌል ዓለም አቀፍ ኃይል የሚሰጠው አንድና ብቸኛ ሁኔታ ጸሎት ነው፤ የዚህ ወንጌል መስፋፋትም በጸሎት ላይ የተመሠረተ ይሆናል። ድንቅ ግፊትንና በክፉና በብርቱ ጠላቶቹ ሁሉ ላይ ድል የሚነሣ ኃይልን ሊሰጠው የነበረው ጕልበት የጸሎት ጕልበት ነው።

የኢየሱስ ክርስቶስ መንግሥት ዕጣ ፈንታ የሚወሰነው በጠላቶቹ ድካም አይደለም። ጠላቶቹ ብርቱዎችና መራሮች ናቸው፤ ሁልጊዜም ብርቱዎች ነበሩ፤ ወደ ፊትም ይሆናሉ። ነገር ግን ኃያል ጸሎት—ጌታ ኢየሱስ ክርስቶስ መንግሥቱን ሙሉ በሙሉ እንዲወርስ፣ አሕዛብንም ርስቱ፣ የምድርንም ዳርቻ ግዛቱ አድርጎ እንዲያገኝ የሚያስችለው ይህ አንድ ታላቅ መንፈሳዊ ኃይል ነው።

ጠላቶቹን በብረት በትር እንዲሰብራቸው የሚያስችለው ጸሎት ነው፤ በትዕቢታቸውና በኃይላቸው እንዲንቀጠቀጡ የሚያደርጋቸውም እርሱ ነው፤ እነርሱ በአንድ የእጁ ምት የሚሰባበሩ ደካማ የሸክላ ሠሪ ዕቃዎች ብቻ ናቸው። መጸለይ የሚችል ሰው ክርስቶስ በዚህ ዓለም ካሉት መሣሪያዎቹ ሁሉ እጅግ ኃያሉ ነው። የምትጸልይ ቤተ ክርስቲያን ከገሃነም ደጆች ሁሉ ትበረታለች።

እግዚአብሔር ለልጁ መንግሥት ክብር ያወጣው ውሳኔ ለመፈጸሙ በጸሎት ላይ የተመሠረተ ነው፦ «ለምነኝ፥ አሕዛብን ለርስትህ፥ የምድርንም ዳርቻ ለግዛትህ እሰጥሃለሁ።» እግዚአብሔር አብ ለልጁ በጸሎት በኩል ካልሆነ በቀር ምንም አይሰጥም። ቤተ ክርስቲያን በተሰማራችበት የሚስዮን ሥራ የበለጠ ያልተቀበለችበት ምክንያት የጸሎት ማጣት ነው። «…አትለምኑምና ለእናንተ አይሆንም።»

ዓለም በወንጌል በተዳረሰ ጊዜ በዘመን መጨረሻ የሚሆነውን የክርስቶስን መምጣት በጥላ የሚያመለክት እያንዳንዱ የእግዚአብሔር አሠራር ዘመን በእነዚህ መሠረታዊ ድንጋጌዎች—በእግዚአብሔር ውሳኔ፣ በተስፋዎቹና በጸሎት—ላይ ያርፋል። ያ የድል ቀን በርቀት ወይም በጊዜ፣ ወይም በጥላ ምሳሌ ርቀት ምንም ያህል የራቀ ቢሆን፣ ዘመኑ ብርቱ፣ ምሳሌያዊና ወካይ የሚሆንበት አስፈላጊ ሁኔታ ጸሎት ነው። ከእስራኤላውያን ሕዝብ የመጀመሪያው ከሆነው ከእግዚአብሔር ወዳጅ ከአብርሃም ጀምሮ እስከዚህ የመንፈስ ቅዱስ ዘመን ድረስ ይህ እውነት ሆኖ ቆይቷል።

«አሕዛብ ይጣራሉ! ከባሕር እስከ ባሕር
የሚያንቀጠቅጥ ጩኸት ይሰማል፤
‹ክርስቲያኖች ካላችሁ፣ ተሻገሩ፣
ሳንሞትም እርዱን።›»

«ጌታ ሆይ፣ ልባችን ጥሪውን ይሰማል፤
እጅ ከልብ ጋር ይተባበር፤
ለዓለምም ልመና መልስ እንስጥ፣
‹የአንተ የሆነውን› በመስጠት።»

በባዕድ አገር የሚስዮን ሜዳ ሠራተኞችን ለማግኘት ጌታችን ያለው ዕቅድ ሰባኪዎችን ለማግኘት ካወጣው ዕቅድ ጋር አንድ ነው። ይኸውም በጸሎት ሂደት ነው። ሰው ሠራሽ ከሆኑ ዕቅዶች ሁሉ የተለየው የጸሎት ዕቅድ ነው። እነዚህ የሚስዮን ሠራተኞች «የተላኩ ሰዎች» መሆን አለባቸው። እግዚአብሔር ሊልካቸው ይገባል። በእግዚአብሔር የተጠሩ፣ ወደዚህ ታላቅ ሥራ በመለኮት የተነሣሡ ናቸው። ወደ ዓለም የመከር እርሻዎች ገብተው ለሰማያዊው ጐተራ ነዶ እንዲሰበስቡ በውስጣቸው ተነሣሥተዋል። ሰዎች ሰባኪዎች ለመሆን እንደማይመርጡ ሁሉ ሚስዮናውያን ለመሆንም አይመርጡም። እግዚአብሔር ለቤተ ክርስቲያኑ ጸሎት መልስ ሠራተኞችን ወደ መከር እርሻዎቹ ይልካል። ጌታችን ያቀረበው መለኮታዊ ዕቅድ ይህ ነው፦

«ብዙ ሕዝብም ባየ ጊዜ፥ እረኛ እንደ ሌላቸው በጎች ተጨንቀው ተጥለውም ነበርና አዘነላቸው። በዚያን ጊዜ ደቀ መዛሙርቱን። መከሩስ ብዙ ነው፥ ሠራተኞች ግን ጥቂቶች ናቸው፤ እንግዲህ የመከሩን ጌታ ወደ መከሩ ሠራተኞች እንዲልክ ለምኑት አላቸው።»

መጸለይ የአገር ቤቷ ቤተ ክርስቲያን ሥራ ነው። ሠራተኞችን መጥራትና መላክ የጌታ ሥራ ነው። ጌታ ጸሎቱን አያደርግም። ቤተ ክርስቲያንም ጥሪውን አታደርግም። ጌታችን የደከሙትን፣ የተራቡትንና የተበተኑትን፣ እረኛ እንደ ሌላቸው በጎች ለክፉ የተጋለጡትን ሕዝብ ባየ ጊዜ ርኅራኄው እንደ ተነሣሣ ሁሉ፣ እንዲሁ ቤተ ክርስቲያን በነፍስ የደከሙትን፣ በጨለማ የሚኖሩትን፣ ጕስቍሎችንና ኃጢአተኞችን፣ የአዳም ዘሮች የሆኑትን የምድርን ነዋሪዎች እጅግ ብዙ ሕዝብ የምታይበት ዓይን ባላት ጊዜ ሁሉ ርኅራኄ ይነሣሣባታል፤ የመከሩንም ጌታ ወደ መከሩ ሠራተኞችን እንዲልክ መለመን ትጀምራለች።

ሚስዮናውያን እንደ አገልጋዮች ሁሉ ከሚጸልዩ ሰዎች ይወለዳሉ። የምትጸልይ ቤተ ክርስቲያን ለዓለም የመከር እርሻ ሠራተኞችን ትወልዳለች። የሚስዮናውያን እጥረት የማትጸልይ ቤተ ክርስቲያንን ያመለክታል። የሠለጠኑ ሰዎችን ወደ ባዕድ አገር ሜዳ መላክ ተገቢ ነው፤ ነገር ግን ከሁሉ በፊት በእግዚአብሔር የተላኩ መሆን አለባቸው። መላኩ የጸሎት ፍሬ ነው። ለመላካቸው ምክንያት የሚጸልዩ ሰዎች እንደ ሆኑ ሁሉ፣ በተራቸው ሠራተኞቹም የሚጸልዩ ሰዎች መሆን አለባቸው። የእነዚህ የሚጸልዩ ሚስዮናውያን ዋና ተልእኮም ጸሎት የሌላቸውን አሕዛብ ወደ ሚጸልዩ ሰዎች መለወጥ ነው። ጸሎት የጥሪያቸው፣ የመለኮታዊ ማረጋገጫቸውና የሥራቸው ማስረጃ ነው።

በአገር ቤት የሚጸልይ ሰው ያልሆነ በውጭ አገር የሚስዮን ሠራተኛ ለመሆን የሚያስፈልገው ያ አንድ ብቃት ይጎድለዋል። በአገር ቤት ወደ ኃጢአተኞች የሚያንቀሳቅሰው መንፈስ የሌለው በውጭ አገር ላሉ ኃጢአተኞች የርኅራኄ መንፈስ ሊኖረው አይችልም። ሚስዮናውያን የሚወጡት በአገር ቤት ካልተሳካላቸው ሰዎች አይደለም። በውጭ አገር የጸሎት ሰው የሚሆን ከምንም በፊት በአገር ቤቱ ቤተ ክርስቲያን የጸሎት ሰው መሆን አለበት። በአገር ቤት ኃጢአተኞችን ከጸሎት አልባ መንገዳቸው በመመለስ ሥራ ላይ ካልተሰማራ፣ አሕዛብን ከጸሎት አልባ መንገዳቸው በመመለስ ሊሳካለት አይችልም። በሌላ አነጋገር፣ የአገር ቤት ሠራተኛ ለመሆን የሚያስፈልገው መንፈሳዊ ብቃት የውጭ አገር ሠራተኛ ለመሆን ከሚያስፈልገው ጋር አንድ ነው።

እግዚአብሔር በራሱ መንገድ ለቤተ ክርስቲያኑ ጸሎት መልስ ሰዎችን ወደ መከር እርሻዎቹ ይጠራል። የሚስዮን ቦርዶችና አብያተ ክርስቲያናት ይህን መሠረታዊ እውነት ቸል ብለው ከእግዚአብሔር ተነጥለው የራሳቸውን የመረጧቸውን ሰዎች የሚልኩበት ቀን አሳዛኝ ቀን ይሆናል።

መከሩ ታላቅ ነውን? ሠራተኞች ጥቂቶች ናቸውን? እንግዲያስ «እንግዲህ የመከሩን ጌታ ወደ መከሩ ሠራተኞች እንዲልክ ለምኑት»። ኦ፣ እግዚአብሔር እጅግ ብዙ የሠራተኞች ሠራዊት ወደ ምድር ችግረኛ የመከር እርሻዎች እንዲልክ የሚለምን ታላቅ የጸሎት ማዕበል በቤተ ክርስቲያን ላይ ቢያልፍ ምንኛ መልካም ነበር! የመከሩ ጌታ እጅግ ብዙ ሠራተኞችን ልኮ እርሻዎቹን ያጨናንቃል የሚል ስጋት የለም። የሚጠራው እርሱ የሚጠራቸውንና የሚልካቸውን የሚደግፉበትን መንገድ በእርግጥ ያዘጋጃል።

በዘመናዊው የሚስዮን እንቅስቃሴ ውስጥ ያለው አንድ ታላቅ ፍላጎት አማላጆች ናቸው። በኢሳይያስ ዘመን ጥቂቶች ነበሩ። ቅሬታውም ይህ ነበር፦

«ሰውም እንደ ሌለ አየ፥ የሚማልድም እንደ ሌለ ተደነቀ።»

ስለዚህ ዛሬ ታላቅ የአማላጆች ፍላጎት አለ፤ በመጀመሪያ ያለ ወንጌል ላሉት ሺዎች ከክርስቶስ መሰል ርኅራኄ የተወለዱ፣ ለምድር ችግረኛ የመከር እርሻዎች የሚማልዱ፤ ከዚያም እግዚአብሔር ሠራተኞችን ወደ ምድር ችግረኛ እርሻዎች እንዲልክ የሚማልዱ አማላጆች ያስፈልጋሉ።