የእምነት ባንክ የቼክ ደብተር
የፌብሩዋሪ ወር

ምዕራፍ 3 · 22 ደቂቃ ንባብ · 28 ደቂቃ ማዳመጥ

የፌብሩዋሪ ወር

ፌብሩዋሪ 1

ፈጽሞ ተስፋ አትቁረጥ

«ለእናንተ ግን ስሜን ለምትፈሩ የጽድቅ ፀሐይ በክንፎችዋ ፈውስ ይዛ ትወጣላችኋለች» ሚልክያስ 4:2

ይህ የጸጋ ቃል በክቡር ጌታችን የመጀመሪያ መምጣት አንድ ጊዜ ተፈጽሟል፤ በሁለተኛውም መምጣቱ ገና የላቀ ፍጻሜውን ያገኛል፤ ደግሞም ለዕለት ዕለት ጥቅም የተሰጠ ነው። አንባቢ ሆይ፥ በአንተ ዘንድ ጨለማ ነውን? ሌሊቱ እየጠለቀ ወደ ድቅድቅ ጨለማ ይለወጣልን? ቢሆንም ተስፋ አንቁረጥ፤ ፀሐይ ገና ትወጣለች። ሌሊቱ እጅግ በጨለመ ጊዜ ንጋቱ እጅግ ቅርብ ነው።

የምትወጣው ፀሐይ ተራ ፀሐይ አይደለችም። እርሷ ያቺ ፀሐይ ናት — ጨረሯ ሁሉ ቅድስና የሆነው የጽድቅ ፀሐይ። ሊያጽናናን የሚመጣው እርሱ በምሕረት መንገድ ብቻ ሳይሆን በፍትሕ መንገድም ይመጣል፤ እኛን ለማዳን እንኳ አንዲትንም ሕግ ሊጥስ አይመጣም። ኢየሱስ የእግዚአብሔርን ፍቅር እንደሚገልጥ እንዲሁ ቅድስናውንም ይገልጣል። መዳናችን በመጣ ጊዜ ጽድቅ ስለ ሆነ አስተማማኝ ይሆናል።

የምንመረምረው አንድ ነገር ብቻ ሊሆን ይገባል — «የጌታን ስም እንፈራለንን? ሕያው እግዚአብሔርን እናከብራለንን? በመንገዱስ እንሄዳለንን?» እንዲህ ከሆነ ሌሊቱ ለእኛ አጭር ይሆናል፤ ንጋትም በመጣ ጊዜ የነፍሳችን ሕመምና ኀዘን ሁሉ ለዘላለም ያልፋል። ብርሃን፥ ሙቀት፥ ደስታና የዓይን ጥራት ይመጣሉ፤ ከደዌና ከጭንቀት ሁሉ መፈወስም ይከተላል።

ኢየሱስ በላያችን ወጥቶአልን? በፀሐዩ ብርሃን እንቀመጥ። ፊቱን ሰውሮአልን? መውጣቱን እንጠብቅ። እርሱ እንደ ፀሐይ በእርግጥ ያበራል።

ፌብሩዋሪ 2

እደጉ

«እናንተም ትወጣላችሁ፥ እንደ ጋጣ ጥጆችም ታድጋላችሁ» ሚልክያስ 4:2

አዎን፥ ፀሐይ ስትበራ በሽተኞች ከክፍሎቻቸው ወጥተው ንጹሕ አየር ለመተንፈስ ወደ ውጭ ይሄዳሉ። ፀሐይ ጸደይንና በጋን ስታመጣ ከብቶች ከጋጣቸው ወጥተው በከፍተኛዎቹ የአልፕስ ተራሮች ላይ መሰማሪያ ይፈልጋሉ። እንዲሁም ከጌታችን ጋር የሚሰማን ኅብረት ሲኖረን የተስፋ መቁረጥን ጋጣ ትተን በቅዱስ መታመን መስኮች እንመላለሳለን። ወደ ደስታ ተራሮች እንወጣለን፤ ከሥጋውያን ሰዎች መኖ ይልቅ ወደ ሰማይ በቀረበ ጣፋጭ መሰማሪያ እንመገባለን።

«መውጣት»ና «ማደግ» ድርብ ተስፋ ነው። ነፍሴ ሆይ፥ ሁለቱንም በረከቶች ለመደሰት ትጓጊ! ስለ ምን እስረኛ ትሆኛለሽ? ተነሺ፥ በነጻነትም ተመላለሺ። ኢየሱስ በጎቹ እንደሚገቡና እንደሚወጡ መሰማሪያም እንደሚያገኙ ይናገራል፤ እንግዲያስ ውጪ፥ ወሰን በሌለው ፍቅር በለመለሙ መስኮችም ተሰማሪ።

በጸጋ ስለ ምን ሕፃን ሆነሽ ትኖሪያለሽ? እደጊ። ወጣት ጥጆች በፍጥነት ያድጋሉ፤ በተለይም በጋጣ ቢቀለቡ፤ አንቺም የቤዛሽ ምርጥ እንክብካቤ አለሽ። እንግዲያስ በጸጋና በጌታሽና በአዳኝሽ እውቀት እደጊ። አትጨናነቂ፥ አትቀጨጪም። የጽድቅ ፀሐይ በላይሽ ወጥቶአል። እምቡጦች ለተፈጥሮ ፀሐይ እንደሚመልሱ ለጨረሩ መልሺ። ልብሽን ክፈቺ፥ ተዘርጊ፥ በነገር ሁሉ ወደ እርሱ እደጊ።

ፌብሩዋሪ 3

በልግስና ይሰጣል

«ለገዛ ልጁ ያልራራለት ነገር ግን ስለ ሁላችን አሳልፎ የሰጠው ያው ከእርሱ ጋር ደግሞ ሁሉን ነገር እንዲያው እንዴት አይሰጠንም» ሮሜ 8:32

ይህ በቅርጹ ተስፋ ባይሆን በእውነቱ ግን ተስፋ ነው። እንዲያውም ከአንድ ተስፋ በላይ ነው፤ የብዙ ተስፋዎች ክምችት ነው። ለማዕቀፋቸው የወርቅ ጉብታ ያለበት የቀይ ዕንቁ፥ የመረግድና የአልማዝ ክምር ነው። በልባችን ጭንቀት እንዲፈጥር ሆኖ ፈጽሞ ሊመለስ የማይችል ጥያቄ ነው። ጌታ ኢየሱስን ከሰጠን በኋላ ምን ሊከለክለን ይችላል? በሰማይና በምድር ያለውን ሁሉ ብንፈልግ ይሰጠናል፤ በየትም ስፍራ ወሰን ቢኖር ኖሮ የገዛ ልጁን ባስቀረ ነበርና።

ዛሬ ምን ያስፈልገኛል? መለመን ብቻ ነው የሚጠበቅብኝ። አጥብቄ ልፈልግ እችላለሁ፤ ነገር ግን ግፊት ማድረግና ከጌታ እጅ ያለ ፍላጎቱ ስጦታ መንጠቅ እንዳለብኝ አይደለም፤ እርሱ በልግስና ይሰጣልና። በገዛ ፈቃዱ የገዛ ልጁን ሰጠን። በእርግጥ ማንም እንዲህ ያለውን ስጦታ ባላቀረበለት ነበር። ማንም ሊለምነው ባልደፈረ ነበር። እጅግ ድፍረት በሆነ ነበር። አንድያ ልጁን በልግስና ሰጠ፤ ነፍሴ ሆይ፥ የሰማዩ አባትሽ ማንኛውንም ነገር፥ ሁሉንም ነገር እንዲሰጥሽ ልትታመኚው አትችዪምን? ኃይል ቢያስፈልግ ኖሮ ደካማው ጸሎትሽ በሁሉን ቻዩ ፊት ምንም ኃይል ባልኖረው ነበር፤ ነገር ግን ፍቅሩ እንደ ምንጭ በራሱ ይፈልቃል፥ ፍላጎትሽንም ሁሉ ለማሟላት ይትረፈረፋል።

ፌብሩዋሪ 4

ይመለሳል

«ወላጆች እንደ ሌላቸው ልጆች አልተዋችሁም፤ ወደ እናንተ እመጣለሁ» ዮሐንስ 14:18

ትቶን ሄደ፤ ቢሆንም ወላጆች እንደሌላቸው ልጆች አልተተውንም። እርሱ መጽናናታችን ነው፥ እርሱም ሄዶአል፤ እኛ ግን ያለ መጽናናት አይደለንም። መጽናናታችን ወደ እኛ እንደሚመጣ ነው፤ ይህም ረጅም በሆነው መለየቱ ውስጥ ሊያጸናን የሚበቃ ማጽናኛ ነው። ኢየሱስ ቀድሞውኑ በመንገድ ላይ ነው፤ «በቶሎ እመጣለሁ» ይላል፤ ወደ እኛ እየገሰገሰ ይመጣል። «እመጣለሁ» ይላል፤ መምጣቱን ማንም ሊከለክል ወይም ለሩብ ሰዓት እንኳ ሊያዘገየው አይችልም። በተለይም «ወደ እናንተ እመጣለሁ» ይላል፤ እንዲሁም ያደርጋል። መምጣቱ በተለይ ወደ ገዛ ሕዝቡና ስለ እነርሱ ነው። ይህም ሙሽራው ገና ስላልተገለጠ በሚያለቅሱበት ጊዜ የአሁን መጽናናታቸው እንዲሆን የታሰበ ነው።

የመገኘቱን የደስታ ስሜት ስናጣ እናለቅሳለን፤ ነገር ግን ተስፋ እንደሌላቸው ልናዝን አይገባም። ጌታችን በጥቂት ቍጣ ለቅጽበት ራሱን ከእኛ ሰውሮአል፤ ነገር ግን በሙሉ ሞገስ ይመለሳል። በአንድ ረገድ ይተወናል፥ ግን በአንድ ረገድ ብቻ ነው። ሲርቅ እንደሚመለስ መያዣ ትቶ ይሄዳል። ጌታ ሆይ፥ ፈጥነህ ና! አንተ ብትሄድ በዚህ ምድራዊ ኑሮ ሕይወት የለም። የጣፋጭ ፈገግታህን መመለስ እንናፍቃለን። ወደ እኛ መቼ ትመጣለህ? እንደምትገለጥ እርግጠኞች ነን፤ ነገር ግን እንደ ሚዳቋ ወይም እንደ ዋሊያ ግልገል ሁን። አምላካችን ሆይ፥ አትዘግይ!

ፌብሩዋሪ 5

ፍትሕ ረክቶአል

«ደሙንም ባየሁ ጊዜ ከእናንተ አልፋለሁ» ዘጸአት 12:13

እኔ የክቡሩን ደም ማየቴ ለመጽናናቴ ነው፤ ደኅንነቴን የሚያረጋግጠው ግን ጌታ እርሱን ማየቱ ነው። እኔ ላየው ባልችል እንኳ ጌታ ይመለከተዋል፥ በእርሱም ምክንያት አልፎኝ ይሄዳል። እምነቴ ስለ ደበዘዘ የሚገባኝን ያህል ዕረፍት ባይኖረኝም፥ የጌታ ዓይን ስላልደበዘዘና የታላቁን መሥዋዕት ደም በጽኑ እይታ ስለሚያይ እንደዚያው በደኅና ነኝ። ይህ እንዴት ያለ ደስታ ነው!

ጌታ የውድ ልጁ ሞት የሚያመለክተውን ሁሉ ጥልቅ ውስጣዊ ትርጉምና ወሰን የሌለውን ሙላት ያያል። ፍትሕ እንደ ረካና ተወዳዳሪ የሌላቸው ባሕርያቱ ሁሉ እንደ ከበሩ በሚያሳርፍ መታሰቢያ ያየዋል። ፍጥረትን በሂደቱ ተመልክቶ «እጅግ መልካም ነው» አለ፤ ስለ ቤዛነትስ በፍጻሜው ምን ይላል? የተወደደው ልጁ እስከ ሞት ድረስ ስለ መታዘዙስ ምን ይላል? እግዚአብሔር በኢየሱስ ያለውን ደስታ፥ ኢየሱስ ራሱን ያለ ነውር ለእግዚአብሔር ባቀረበ ጊዜ ባቀረበው ጣፋጭ መዓዛ ያለውን ዕረፍት ማንም ሊናገር አይችልም።

እንግዲያስ በጸጥታና በደኅንነት እናርፋለን። ፍጹም የደኅንነት ስሜት በእኛ ውስጥ እንዲፈጥሩ የእግዚአብሔር መሥዋዕትና የእግዚአብሔር ቃል አሉን። ክቡር ምትካችንን ስላልራራለት እርሱ ያልፈናል፥ ሊያልፈንም ግድ ነው። በደም ለተረጩት ሁሉ የዘላለም መዳንን ለማዘጋጀት ፍትሕ ከፍቅር ጋር እጅ ለእጅ ይያያዛል።

ፌብሩዋሪ 6

በከተማ ያለ በረከት

«የአምላክህን የእግዚአብሔርን ቃል ብትሰማ በከተማ ቡሩክ ትሆናለህ» ዘዳግም 28:2, 3

ከተማ በጭንቀት የተሞላች ናት፤ በየዕለቱ ወደዚያ መሄድ ግድ የሆነበትም ሰው እጅግ የምታደክምና የምታጠፋ ስፍራ ሆና ያገኛታል። በጩኸት፥ በሁካታ፥ በግርግርና በከባድ ድካም የተሞላች ናት፤ ፈተናዎቿ፥ ኪሳራዎቿና ጭንቀቶቿ ብዙ ናቸው። ነገር ግን ከመለኮታዊ በረከት ጋር ወደዚያ መሄድ የችግሯን ስለት ያደነዝዛል፤ ከዚያ በረከት ጋር በዚያ መኖርም በተግባሮቿ ደስታን፥ ለፍላጎቶቿም የሚመጥን ብርታትን ማግኘት ነው።

በከተማ ያለ በረከት ታላቅ ላያደርገን ይችላል፥ ነገር ግን መልካም አድርጎ ይጠብቀናል፤ ባለ ጠጋ ላያደርገን ይችላል፥ ነገር ግን ታማኝ አድርጎ ያቆየናል። ተሸካሚዎች ብንሆን ወይም ጸሐፊዎች፥ ሥራ አስኪያጆች ወይም ነጋዴዎች ወይም ዳኞች፥ ከተማ የምንጠቅምበትን ዕድል ትሰጠናለች። ብዙ ዓሣ በተሰበሰበበት ማጥመድ መልካም ነው፤ በሚጋፉ ሕዝብ መካከልም ለጌታችን መሥራት ተስፋ ሰጪ ነው። የገጠር ኑሮን ጸጥታ እንመርጥ ይሆናል፤ ነገር ግን ወደ ከተማ ብንጠራ ለጉልበታችን ስፍራ ስላለ በእርግጥ ልንመርጣት እንችላለን።

ዛሬ በዚህ ተስፋ ምክንያት መልካም ነገሮችን እንጠብቅ፤ ጥንቃቄያችንም ለጌታ ድምፅ የተከፈተ ጆሮ፥ ትእዛዙንም ለመፈጸም የተዘጋጀ እጅ እንዲኖረን ይሁን። መታዘዝ በረከትን ያመጣል። «ትእዛዛቱን በመጠበቅ ብዙ ዋጋ አለ።»

ፌብሩዋሪ 7

ከማፈግፈግ መመለስ

«ሁሉን ወደሚችል አምላክ ብትመለስ ትታነጻለህ» ኢዮብ 22:23

ኤልፋዝ በዚህ ንግግሩ የብዙ በመንፈስ የተጻፉ መጻሕፍት ማጠቃለያ የሆነውን ታላቅ እውነት ተናገረ። አንባቢ ሆይ፥ ኃጢአት አፍርሶሃልን? እንደ ፍርስራሽ ሆነሃልን? በንብረትህ ደኽይተህ በመንፈስም ተሰብረህ እስክትወድቅ ድረስ የጌታ እጅ በአንተ ላይ ወጥቶአልን? ይህን ሁሉ መፈራረስ ያመጣብህ የራስህ ስንፍና ነበርን? እንግዲያስ መጀመሪያ መደረግ ያለበት ወደ ጌታ መመለስ ነው። በጥልቅ ንስሐና በቅን እምነት ከማፈግፈግህ ተመለስ። ይህ ግዴታህ ነው፤ አገለግለዋለሁ ብለህ ከተናገርህለት ከእርሱ ዘወር ብለሃልና። ይህ ጥበብህ ነው፤ እርሱን እየተቃወምህ ልትከናወን አትችልምና። ይህ አስቸኳይ ፍላጎትህ ነው፤ ሁሉን ቻይ ሆኖ ለመቅጣት ስለሚችል በተግሣጽ መንገድ ሊያደርገው ከሚችለው ጋር ሲነጻጸር ያደረገው ምንም አይደለምና።

የሚጋብዝህ እንዴት ያለ ተስፋ እንደ ሆነ እይ! «ትታነጻለህ»። የወደቁትን ምሰሶዎች ሊያቆምና የሁኔታህን የሚንገዳገዱ ቅጥሮች ሊያድስ ከሁሉን ቻዩ በቀር ማንም አይችልም፤ ወደ እርሱ ብትመለስ ግን ይችላል፥ ያደርገውማል። አትዘግይ። ማመፅህን ብትቀጥል የደቀቀው አእምሮህ ፈጽሞ ሊከዳህ ይችላል፤ ነገር ግን ከልብ የሆነ ኑዛዜ ያሳርፍሃል፥ ትሑት እምነትም ያጽናናሃል። ይህን አድርግ፥ ሁሉም መልካም ይሆናል።

ፌብሩዋሪ 8

የደስታ ደኅንነት

«በጽድቄ ቀኝ እጅ ደግፌ እይዝሃለሁ» ኢሳይያስ 41:10

መውደቅን መፍራት ጤናማ ነው። ደፋር መሆን የጥበብ ምልክት አይደለም። እጅግ ልዩ ድጋፍ ካላገኘን በቀር መውደቃችን እንደማይቀር የሚሰማን ጊዜያት ይመጡብናል። እነሆ፥ ድጋፉ በዚህ አለ። የእግዚአብሔር ቀኝ እጅ ለመደገፍ ታላቅ ነገር ነው። ልብ በል፥ ሰማይንና ምድርን በስፍራቸው የሚጠብቅ ቢሆንም እጁ ብቻ አይደለም፤ ቀኝ እጁ ነው፤ ከብልሃት ጋር የተዋሐደ ኃይሉ፥ እጅግ ጥበበኛ በሆነበት ስፍራ ያለ ኃይሉ ነው። ይህ ብቻ አይደለም፤ «በጽድቄ ቀኝ እጅ ደግፌ እይዝሃለሁ» ተብሎ ተጽፎአል። ቅድስናውን ለመጠበቅና የንጉሣዊ ፍርዶቹን ለመፈጸም የሚጠቀምበት ያ እጅ — እርሱ በእርሱ የሚታመኑትን ደግፎ ለመያዝ ይዘረጋል። አደጋችን የሚያስፈራ ነው፥ ደኅንነታችን ግን የደስታ ነው። እግዚአብሔር የሚደግፈውን ሰው አጋንንት ሊጥሉት አይችሉም።

እግሮቻችን ደካሞች ሊሆኑ ይችላሉ፥ የእግዚአብሔር ቀኝ እጅ ግን ሁሉን ቻይ ነው። መንገዱ ሸካራ ሊሆን ይችላል፥ ደጋፊያችን ግን ሁሉን ቻዩ ነው። በድፍረት ወደ ፊት መሄድ እንችላለን። አንወድቅም። ሁሉም ነገር በሚደገፍበት ዘወትር እንደገፍ። እግዚአብሔር ብርታቱን አይመልስም፤ ጽድቁም በዚያ አለና፤ ለተስፋው ይታመናል፥ ለልጁም ይታመናል፥ ስለዚህም ለእኛ ይታመናል። ምንኛ ደስተኞች ልንሆን ይገባናል! ደስተኞች አይደለንምን?

ፌብሩዋሪ 9

ዝቃጩ ተወገደ

«ሢሶውንም ወደ እሳት አገባለሁ፥ ብርም እንደሚነጥር አነጥራቸዋለሁ፥ ወርቅም እንደሚፈተን እፈትናቸዋለሁ፤ ስሜንም ይጠራሉ፥ እኔም እሰማቸዋለሁ፤ እኔም፦ ሕዝቤ ነው እላለሁ፤ እርሱም፦ እግዚአብሔር አምላኬ ነው ይላል» ዘካርያስ 13:9

ጸጋ ወደ ክቡር ማዕድን ይለውጠናል፤ ከዚያም እሳቱና እቶኑ እንደ አስፈላጊ ውጤት ይከተላሉ። በዚህ እንደነግጣለንን? እንደ ሜዳ ድንጋዮች ዕረፍት እንድናገኝ ከንቱ ተብለን መቈጠርን እንመርጣለንን? ይህ የተዋረደውን ዕድል መምረጥ ነው፤ እንደ ዔሳው ወጡን ወስዶ የኪዳኑን ርስት መተው ነው። ጌታ ሆይ፥ አይሆንም፤ ከፊትህ ከምንጣል ይልቅ ወደ እቶን በደስታ እንጣላለን!

እሳቱ ያነጥራል እንጂ አያጠፋም። በእሳቱ ውስጥ እንድናልፍ እንጂ በእርሱ ውስጥ እንድንቀር አይደለም። ጌታ ሕዝቡን እንደ ብር ይቈጥራቸዋል፤ ስለዚህም ዝቃጫቸውን ለማስወገድ ይደክማል። ጥበበኞች ብንሆን የማንጠሩን ሂደት ከመቃወም ይልቅ በደስታ እንቀበለዋለን። ጸሎታችን ከማቅለጫው እንድንወጣ ሳይሆን ቅይጣችን ከእኛ እንዲወሰድ ይሆናል።

ጌታ ሆይ፥ በእውነት ትፈትነናለህ! ከነበልባሉ ብርታት የተነሣ ልንቀልጥ ደርሰናል። ቢሆንም ይህ መንገድህ ነው፥ መንገድህም ከሁሉ የተሻለ ነው። በፈተናው ውስጥ ደግፈን፥ የመንጻታችንንም ሂደት ፈጽም፤ እኛም ለዘላለም ዓለም የአንተ እንሆናለን።

ፌብሩዋሪ 10

የማያቋርጥ ምስክር

«ባየኸውና በሰማኸው በሰው ሁሉ ፊት ምስክር ትሆንለታለህና» የሐዋርያት ሥራ 22:15

ጳውሎስ ከሰማይ ሆኖ የሚናገረውን ጌታ ለማየትና ለመስማት ተመረጠ። ይህ መለኮታዊ ምርጫ ለራሱ ታላቅ መብት ነበር፤ ነገር ግን በእርሱ እንዲያበቃ የታሰበ አልነበረም፤ በሌሎች ላይ፥ አዎን፥ በሰው ሁሉ ላይ ተጽእኖ እንዲኖረው የታሰበ ነበር። አውሮፓ እስከዚህ ሰዓት ድረስ ወንጌልን ያገኘችው በጳውሎስ ነው።

ጌታ የገለጠልንን በልካችን መመስከር የእኛ ድርሻ ነው፤ ክቡሩን መገለጥ ብንሰውር ራሳችንን በአደጋ ላይ እንጥላለን። በመጀመሪያ ማየትና መስማት አለብን፤ አለዚያ የምንናገረው አይኖረንም፤ ይህን ካደረግን በኋላ ግን ምስክርነታችንን ለመስጠት መጓጓት አለብን። ምስክርነቱ የግል መሆን አለበት፦ «ትሆናለህ»። ለክርስቶስ መሆን አለበት፦ «ምስክር ትሆንለታለህ»። የማያቋርጥና ሁለንተናን የሚይዝ መሆን አለበት፤ ይህን ከሌሎች ነገሮች ሁሉ በላይ፥ ብዙ ሌሎች ጉዳዮችንም አግልለን ልንሆን ይገባናል። ምስክርነታችን በደስታ ለሚቀበሉን ጥቂት ምርጦች ብቻ መሆን የለበትም፤ «በሰው ሁሉ ፊት» እንጂ — ልንደርስባቸው ለምንችል ሁሉ፥ ለወጣት ወይም ለሽማግሌ፥ ለባለ ጠጋ ወይም ለድሀ፥ ለመልካም ወይም ለክፉ። ዲዳ መንፈስ እንዳደረባቸው ፈጽሞ ዝም ማለት የለብንም፤ በፊታችን ያለው ቃል ትእዛዝም ተስፋም ነውና፥ ልናመልጠውም አይገባም — «ምስክር ትሆንለታለህ»። «እናንተ ምስክሮቼ ናችሁ፥ ይላል እግዚአብሔር»።

ጌታ ሆይ፥ ይህን ቃል በእኔም ደግሞ ፈጽም!

ፌብሩዋሪ 11

ልጆቹ ገብተዋልን?

«መንፈሴን በዘርህ ላይ፥ በረከቴንም በልጅ ልጆችህ ላይ አፈስሳለሁ» ኢሳይያስ 44:3

ውድ ልጆቻችን በተፈጥሮአቸው የእግዚአብሔር መንፈስ የላቸውም፤ ይህንም በግልጽ እናያለን። ስለ ወደፊታቸው የሚያስፈራን ብዙ ነገር በእነርሱ እናያለን፤ ይህም ወደ ጭንቅ ጸሎት ይገፋናል። አንድ ልጅ እጅግ ጠማማ ሲሆን ከአብርሃም ጋር «እስማኤል በፊትህ በሕይወት ቢኖር!» ብለን እንጮኻለን። ሴቶች ልጆቻችን ንግሥታት ከሚሆኑ ይልቅ እንደ ሐና ቢሆኑ እንመርጣለን። ይህ ቍጥር እጅግ ሊያበረታታን ይገባል። «ባሪያዬ ያዕቆብ ሆይ፥ አትፍራ» የሚለውን ቃል ይከተላል፤ ፍርሃታችንንም ሊያስወግድ ይገባዋል።

ጌታ መንፈሱን ይሰጣል፤ እያፈሰሰ በብዛት ይሰጠዋል፤ እውነተኛና ዘላለማዊ በረከት እንዲሆን በኃይል ይሰጠዋል። በዚህ መለኮታዊ መፍሰስ ልጆቻችን ወደ ፊት ይመጣሉ፤ «አንዱም፦ እኔ የእግዚአብሔር ነኝ ይላል፤ ሌላውም ራሱን በያዕቆብ ስም ይጠራል»።

ይህ ጌታ እንዲጠየቅበት ከሚፈልጋቸው ተስፋዎች አንዱ ነው። በተወሰኑ ጊዜያት በተለየ ሁኔታ ስለ ልጆቻችን መጸለይ አይገባንምን? አዲስ ልብ ልንሰጣቸው አንችልም፤ መንፈስ ቅዱስ ግን ይችላል፤ እርሱም በቀላሉ ይለመናል። ታላቁ አባት በአባቶችና በእናቶች ጸሎት ደስ ይለዋል። ከመርከቡ ውጭ ያሉ ውዶች አሉንን? በጌታ በገዛ እጁ ከእኛ ጋር እስኪዘጉ ድረስ አናርፍ።

ፌብሩዋሪ 12

እግዚአብሔር መስጠት ደስ ይለዋል

«ሎጥም ከተለየው በኋላ እግዚአብሔር አብራምን አለው፦ ዓይንህን አንሣና አንተ ካለህበት ስፍራ ወደ ሰሜንና ወደ ደቡብ ወደ ምሥራቅና ወደ ምዕራብ እይ፤ የምታያትን ምድር ሁሉ ለአንተና ለዘርህ ለዘላለም እሰጣለሁና» ዘፍጥረት 13:14, 15

ለሚታወስ አጋጣሚ የተሰጠ ልዩ በረከት። አብራም የቤተሰብ ጠብ አብርዶ ነበር። «እኛ ወንድማማቾች ነንና በእኔና በአንተ መካከል ጠብ እንዳይሆን እለምንሃለሁ» ብሎ ነበር፤ ስለዚህም ለሰላም ፈጣሪዎች የሚገባውን በረከት ተቀበለ። የሰላም ጌታና ሰጪ ሰላምን ለሚሹና ለሚከተሉት ጸጋውን መግለጥ ደስ ይለዋል። ከእግዚአብሔር ጋር የቀረበ ኅብረት ብንመኝ በሰላም መንገዶች ይበልጥ ልንጠጋ ይገባናል።

አብራም ምድሩን እንዲመርጥ በመፍቀድ ለዘመዱ እጅግ በልግስና አድርጎ ነበር። ስለ ሰላም ራሳችንን ብንክድ ጌታ ከሚበልጥ መጠን ይክስልናል። ያ የአባቶች አለቃ ማየት እስከሚችለው ድረስ ሊይዝ ይችላል፤ እኛም በእምነት እንዲሁ ማድረግ እንችላለን። አብራም ምድሪቱን በእጁ እስኪይዝ መጠበቅ ነበረበት፤ ጌታ ግን ምድሪቱን ለእርሱና ለዘሩ በርስትነት አጸና። ወሰን የሌላቸው በረከቶች በኪዳን ስጦታ የእኛ ናቸው። ሁሉ የእኛ ነው። ጌታን ደስ ስናሰኝ በየስፍራው እንድንመለከትና ሁሉን የራሳችን አድርገን እንድናይ ያደርገናል፤ ያለውም ቢሆን የሚመጣውም ቢሆን ሁሉ የእኛ ነው፤ እኛም የክርስቶስ ነን ክርስቶስም የእግዚአብሔር ነው።

ፌብሩዋሪ 13

በእርሻ የተባረከ

«በእርሻም ቡሩክ ትሆናለህ» ዘዳግም 28:3

ይስሐቅ ለማሰላሰል በመሸ ጊዜ በእርሻ ሲመላለስ እንዲሁ ተባረከ። ብቻችንን በሆንን ጊዜ ጌታ ስንት ጊዜ ተገናኝቶናል! አጥሮቹና ዛፎቹ ለደስታችን ሊመሰክሩ ይችላሉ። እንዲህ ያለውን ብፅዕና እንደገና እንጠብቃለን።

ቦዔዝ መከሩን ባጨደ ጊዜ ሠራተኞቹም በምርቃት በተቀበሉት ጊዜ እንዲሁ ተባረከ። ጌታ ማረሻ የሚነዱትን ሁሉ ያከናውን! እያንዳንዱ ገበሬ የአምላኩን የእግዚአብሔርን ድምፅ በእርግጥ ቢሰማ ይህን ተስፋ በእግዚአብሔር ፊት ሊያቀርብ ይችላል።

አባታችን አዳም እንዳደረገው ልንደክም ወደ እርሻ እንሄዳለን፤ በፊተኛው አዳም ኃጢአት እርግማን በምድር ላይ ስለ ወደቀ በሁለተኛው አዳም በኩል በረከትን ማግኘት ታላቅ መጽናናት ነው።

ሰውነታችንን ለማንቀሳቀስ ወደ እርሻ እንሄዳለን፤ ጌታ ያንን እንቅስቃሴ እንደሚባርክና ለክብሩ የምንጠቀምበትን ጤና እንደሚሰጠን በማመን ደስተኞች ነን።

ተፈጥሮን ለማጥናት ወደ እርሻ እንሄዳለን፤ በሚታየው ፍጥረት እውቀት ውስጥ በመለኮታዊ ምርቃት ለከፍተኛ አገልግሎት ሊቀደስ የማይችል ምንም ነገር የለም።

በመጨረሻ ሙታናችንን ለመቅበር ወደ እርሻ መሄድ አለብን፤ አዎን፥ ሌሎችም በተራቸው በእርሻው ወዳለው ወደ እግዚአብሔር ቦታ ይወስዱናል፤ ነገር ግን በመቃብሩ አጠገብ ብናለቅስም ወይም በእርሱ ውስጥ ብናንቀላፋም ብፁዓን ነን።

ፌብሩዋሪ 14

ለማይገባቸው የሚደረግ ምሕረት

«በእግዚአብሔር የሚታመነውን ግን ምሕረት ይከብበዋል» መዝሙር 32:10

የመታመን ውብ ዋጋ ሆይ! ጌታዬ፥ ይህን በሙላት ስጠኝ! የሚታመን ሰው ከሰዎች ሁሉ በላይ ራሱን ኃጢአተኛ አድርጎ ይቈጥራል፤ እነሆም፥ ምሕረት ተዘጋጅቶለታል፤ ምንም እንደማይገባው ያውቃል፥ ምሕረት ግን ገብቶ በልግስና ቤቱን ይጠብቅለታል። ጌታ ሆይ፥ በአንተ እንደምታመን ይህን ምሕረት ስጠኝ!

ነፍሴ ሆይ፥ እንዴት ያለ ዘብ እንዳለሽ ተመልከቺ! መስፍን በወታደሮች እንደሚከበብ አንቺም እንዲሁ በምሕረት ተከብበሻል። በፊትና በኋላ፥ በሁሉም አቅጣጫ እነዚህ የጸጋ ፈረሰኛ ዘቦች ይጋልባሉ። በክርስቶስ ኢየሱስ ስለምንኖር በምሕረት ሥርዓት መካከል እንኖራለን።

ነፍሴ ሆይ፥ እንዴት ያለ አየር ትተነፍሻለሽ! አየር እንደሚከብብሽ የጌታሽ ምሕረትም እንዲሁ ይከብብሻል። ለኃጢአተኞች ብዙ ኀዘን አለ፤ ለአንቺ ግን ኀዘኖችሽ መጠቀስ እስከማይገባቸው ድረስ ብዙ ምሕረቶች አሉ። ዳዊት «ጻድቃን ሆይ፥ በእግዚአብሔር ደስ ይበላችሁ ሐሤትም አድርጉ፤ ልባችሁ የቀና ሁሉ እልል በሉ» ይላል። ለዚህ ትእዛዝ በመታዘዝ ልቤ በእግዚአብሔር ድል ይነሣል፥ ደስታዬንም እናገራለሁ። አምላኬ ሆይ፥ በምሕረት እንደ ከበብኸኝ እኔም መሠዊያዎችህን በምስጋና መዝሙሮች እከብባለሁ!

ፌብሩዋሪ 15

ዘወትር የሚያስብ

«እግዚአብሔር አሰበን፥ ይባርከንማል» መዝሙር 115:12

ለዚያ የመጀመሪያ ዓረፍተ ነገር ማኅተሜን ማኖር እችላለሁ። አንተስ አትችልምን? አዎን፥ እግዚአብሔር አስቦናል፥ አዘጋጅቶልናል፥ አጽናንቶናል፥ አድኖናል፥ መርቶናልም። በመግቦቱ እንቅስቃሴዎች ሁሉ ታናናሽ ጉዳዮቻችንን ሳይዘነጋ አስቦናል። አእምሮው በእኛ የተሞላ ነበር — ይህም «አሰበን» የሚለው ቃል ሌላው መልክ ነው። ይህ ከመጀመሪያ ጀምሮ አንዲትም ማቋረጥ ሳይኖር እንዲሁ ሆኖአል። ቢሆንም በልዩ ጊዜያት ይህን አሳቢነት ይበልጥ በግልጽ አይተናል፤ እነዚያንም በዚህ ሰዓት በተትረፈረፈ ምስጋና ልናስታውሳቸው እንወዳለን። አዎን፥ አዎን፥ «እግዚአብሔር አሰበን»።

የሚቀጥለው ዓረፍተ ነገር ከቀደመው የሚመነጭ ምክንያታዊ ድምዳሜ ነው። እግዚአብሔር የማይለወጥ ስለ ሆነ፥ ባለፈው ዘመን እንዳሰበን በሚመጣውም ዘመን ያስበናል፤ እኛን ማሰቡም እኛን ከመባረክ ጋር አንድ ነው። ነገር ግን እዚህ ያለን የአእምሮ ድምዳሜ ብቻ ሳይሆን የመንፈስ መገለጥ ቃል ነው፤ በመንፈስ ቅዱስ ሥልጣን ተነግሮናል፦ «ይባርከናል።» ይህ ታላቅና የማይመረመር ነገርን ያመለክታል። የተስፋው ቃል ያልተዘረዘረ መሆኑ ራሱ የማያልቅ ስፋቱን ያሳያል። እርሱ በራሱ መለኮታዊ መንገድ ይባርከናል፤ ይህም ለዘላለም ዓለም ነው። ስለዚህ እያንዳንዳችን፦ «ነፍሴ ሆይ፥ እግዚአብሔርን ባርኪ!» እንበል።

ፌብሩዋሪ 16

የምትገናኘው ከእግዚአብሔር ጋር ነው

«የቍጣዬን መቅሠፍት አላደርግም፥ ኤፍሬምንም ለማጥፋት አልመለስም፤ እኔ አምላክ ነኝ እንጂ ሰው አይደለሁምና» ሆሴዕ 11:9

ጌታ በዚህ ቃል የሚራራ ምሕረቱን ያሳውቃል። አንባቢው አሁን በከባድ ቍጣ ሥር ሆኖ ሁሉ ነገር ፈጣን ጥፋትን የሚያስፈራራው ሊሆን ይችላል። ይህ ቃል ከተስፋ መቍረጥ ደግፎ ያቁመው። ጌታ አሁን መንገድህን እንድታስብና ኃጢአትህን እንድትናዘዝ ይጋብዝሃል። እርሱ ሰው ቢሆን ኖሮ ከብዙ ጊዜ በፊት ባጠፋህ ነበር። አሁንም እንደ ሰዎች ልማድ ቢያደርግ፥ አንድ ቃልና አንድ ምት ብቻ ይሆን ነበር፤ ከዚያም ፍጻሜህ በሆነ ነበር፤ ነገር ግን እንዲህ አይደለም፤ «ሰማያት ከምድር ከፍ እንደሚሉ፥ እንዲሁ መንገዱ ከመንገዳችሁ ከፍ ይላልና።»

እርሱ እንደ ተቈጣ በትክክል ትረዳለህ፤ ነገር ግን ቍጣውን ለዘላለም አይጠብቅም፤ ከኃጢአት ወደ ኢየሱስ ብትመለስ እግዚአብሔርም ከቍጣው ይመለሳል። እግዚአብሔር አምላክ ነውና፥ ሰውም አይደለምና፥ እስከ ጕሮሮህ ድረስ በበደል ብትጠልቅም እንኳ ለአንተ ገና ይቅርታ አለ። የምትገናኘው ከአምላክ ጋር ነው እንጂ ከጨካኝ ሰው ጋር ወይም ጻድቅ ብቻ ከሆነ ሰው ጋር አይደለም። የትኛውም ሰው አንተን ሊታገሥ ባልቻለ ነበር፤ የሚያዝነውን አባትህን እንዳደከምከው መልአክንም ባደከምከው ነበር፤ እግዚአብሔር ግን ታጋሽ ነው። ና፥ አሁኑኑ ፈትነው። ተናዘዝ፥ እመን፥ ከክፉ መንገድህም ተመለስ፤ ትድናለህም።

ፌብሩዋሪ 17

እግዚአብሔር ሊያበረታህ ይችላል

«እናንተ ግን በርቱ፥ እጃችሁም አይላላ፤ ለሥራችሁ ዋጋ አለውና» 2ኛ ዜና መዋዕል 15:7

እግዚአብሔር ለንጉሥ አሳና ለይሁዳ ታላቅ ነገር አድርጎላቸው ነበር፤ እነርሱ ግን አሁንም ደካማ ሕዝብ ነበሩ። እግሮቻቸው በጌታ መንገድ እጅግ ይንገዳገዱ ነበር፥ ልባቸውም እጅግ ያመነታ ነበር፤ ስለዚህ ከጌታ ጋር እስካሉ ድረስ ጌታ ከእነርሱ ጋር እንደሚሆን፥ ቢተዉት ግን እንደሚተዋቸው ማስጠንቀቂያ ሊሰጣቸው ግድ ሆነ። እኅት መንግሥቲቱም በዓመፅዋ እንዴት እንደ ተጐዳች፥ ንስሐ ባሳየች ጊዜም ጌታ እንዴት እንደ ራራላት ተነገራቸው። የጌታ ዓላማ በመንገዱ እንዲጸኑና በጽድቅ እንዲበረቱ ማድረግ ነበር። ከእኛም ጋር እንዲሁ ሊሆን ይገባል። እግዚአብሔር በምንችለው ኃይል ሁሉ ሊገለገል ይገባዋል።

የእግዚአብሔር አገልግሎት አንዳች ዋጋ ካለው፥ ሁሉን የሚያህል ዋጋ አለው። የጌታን ሥራ በቍርጥ ትጋት ብንሠራው በውስጡ የሚበልጠውን ብድራታችንን እናገኛለን። ድካማችን በጌታ ከንቱ አይደለም፤ ይህንንም እናውቃለን። በግማሽ ልብ የሚሠራ ሥራ ምንም ብድራት አያመጣም፤ ነፍሳችንን ሁሉ ለዓላማው በሰጠን ጊዜ ግን መከናወንን እናያለን። ይህ ቃል ለእነዚህ ማስታወሻዎች ጸሐፊ በአስፈሪ ማዕበል ቀን ተላከለት፤ የከበረ ጭነት ይዞ በሰላም ወደብ እንደሚደርስ በማረጋገጥም፥ ሞተሩን በሙሉ ኃይል እንዲያስነሣ አነሣሣው።

ፌብሩዋሪ 18

እግዚአብሔር ይመልሳል

«የሚፈሩትን ምኞታቸውን ያደርጋል፥ ጩኸታቸውንም ይሰማል፥ ያድናቸውማል» መዝሙር 145:19

ይህን ምኞት በውስጣችን የሠራው የገዛ መንፈሱ ነው፤ ስለዚህም ይመልስለታል። ጩኸቱን የሚያነሣሣው በውስጣችን ያለው የገዛ ሕይወቱ ነው፤ ስለዚህም ይሰማዋል። እርሱን የሚፈሩት በእጅግ ቅዱስ ተጽእኖ ሥር ያሉ ሰዎች ናቸው፤ ስለዚህም ምኞታቸው እግዚአብሔርን ማክበርና ለዘላለም በእርሱ ደስ መሰኘት ነው። እንደ ዳንኤል የምኞት ሰዎች ናቸው፤ ጌታም ናፍቆታቸውን ያሳካላቸዋል።

ቅዱስ ምኞት በቡቃያ ያለ ጸጋ ነው፤ ሰማያዊው ገበሬም በዛላው ፍጹም ሰብል እስኪሆን ድረስ ይንከባከበዋል። እግዚአብሔርን የሚፈሩ ሰዎች ቅዱሳን፥ ጠቃሚዎች፥ ለሌሎችም በረከት እንዲሆኑ፥ በዚህም ጌታቸውን እንዲያከብሩ ይመኛሉ። ለችግራቸው ስንቅን፥ በሸክም ሥር እርዳታን፥ በጭንቀት መምራትን፥ በመከራ መዳንን ይመኛሉ፤ አንዳንድ ጊዜም ይህ ምኞት እጅግ ብርቱ፥ ጕዳያቸውም እጅግ አጣዳፊ ስለሚሆን፥ ሕመም እንደ ያዛቸው ሕፃናት በጭንቅ ይጮኻሉ፤ ያን ጊዜም ጌታ በሙላት ይሠራል፥ በዚህም ቃል መሠረት የሚያስፈልገውን ሁሉ ያደርጋል፦ «ያድናቸውማል።»

አዎን፥ እግዚአብሔርን ብንፈራ ሌላ የምንፈራው ነገር የለንም፤ ወደ ጌታ ብንጮኽ መዳናችን የተረጋገጠ ነው።

አንባቢው ይህን ቃል በምላሱ ላይ ያኑረው፥ ቀኑንም ሁሉ በአፉ ይያዘው፤ ለእርሱም «ከማር ጋር እንደ ተሠራ እንጎቻ» ይሆንለታል።

ፌብሩዋሪ 19

ወደ ፊት የተሻለ ነው

«ባስጨንቅህም እንኳ ከእንግዲህ ወዲህ አላስጨንቅህም» ናሆም 1:12

መከራ ወሰን አለው። እግዚአብሔር ይልከዋል፥ እግዚአብሔርም ያስወግደዋል። እያቃሰትህ፦ «ፍጻሜው መቼ ይሆን?» ትላለህን? ይህ ምስኪን ምድራዊ ሕይወት ሲያልፍ ኀዘናችን በእርግጥና በመጨረሻ እንደሚያበቃ አስብ። እስኪመጣ ድረስ በጸጥታ እንጠብቅ፥ የጌታንም ፈቃድ በትዕግሥት እንታገሥ።

እስከዚያው ድረስም በሰማይ ያለው አባታችን በትሩን የተጠቀመበት ዓላማው በሙላት ሲፈጸም በትሩን ያነሣል። ሞኝነታችንን በመገረፍ ባስወገደ ጊዜ ከዚያ በኋላ ምት አይኖርም። ወይም መከራው የተላከው ጸጋዎቻችን እግዚአብሔርን እንዲያከብሩ እኛን ለመፈተን ከሆነ፥ ጌታ ለምስጋናው ምስክር እንድንሆን ባደረገን ጊዜ ያበቃል። ልንሰጠው የምንችለውን ክብር ሁሉ እግዚአብሔር ከእኛ እስኪያገኝ ድረስ መከራው እንዲሄድ አንመኝም።

ዛሬ «ታላቅ ጸጥታ» ሊሆን ይችላል። እነዚያ የሚናወጡ ማዕበሎች ለብርጭቆ ባሕር ስፍራ ለቀው፥ የባሕር ወፎችም በለዘቡ ሞገዶች ላይ የሚቀመጡት ምን ያህል ፈጥኖ እንደ ሆነ ማን ያውቃል? ከረጅም መከራ በኋላ መውቂያው ይሰቀላል፥ ስንዴውም በጐተራ ያርፋል። ብዙ ሰዓት ሳያልፍ አሁን እንደምናዝን ያህል ደስተኞች ልንሆን እንችላለን። ሌሊትን ወደ ቀን መለወጥ ለጌታ አይከብደውም። ደመናትን የሚልክ ሰማያትንም እንዲሁ በቀላሉ ሊያጠራ ይችላል። እንጽናና። ወደ ፊት የተሻለ ነው። አስቀድመን ሃሌ ሉያ እንዘምር።

ፌብሩዋሪ 20

የማያቋርጥ መምራት

«እግዚአብሔርም ሁልጊዜ ይመራሃል» ኢሳይያስ 58:11

ምን ሆነሃል? መንገድህን ጠፋብህን? በጨለማ ጫካ ውስጥ ተጠላልፈህ ጐዳናህን ማግኘት አቃተህን? ቁም፥ የእግዚአብሔርንም ማዳን እይ። እርሱ መንገዱን ያውቃል፤ ወደ እርሱም ብትጮኽ በዚያ ይመራሃል።

እያንዳንዱ ቀን የራሱን ግራ መጋባት ያመጣል። የጌታ መምራት የማያቋርጥ መሆኑን ማወቅ እንዴት ደስ ያሰኛል! የራሳችንን መንገድ ብንመርጥ ወይም ከሥጋና ከደም ጋር ብንማከር የጌታን መምራት እንጥላለን፤ ከራስ ፈቃድ ብንርቅ ግን የመንገዳችንን እያንዳንዱን እርምጃ፥ የቀኑን እያንዳንዱን ሰዓት፥ የዓመቱን እያንዳንዱን ቀን፥ የሕይወታችንንም እያንዳንዱን ዓመት ይመራል። ለመመራት ብቻ ብንፈቅድ እንመራለን። መንገዳችንን ለጌታ ብናስረክብ ራሳችንን እንዳናጣ አካሄዳችንን ያቀናል።

ነገር ግን ይህ ተስፋ ለማን እንደ ተሰጠ አስተውል። የቀደመውን ቍጥር አንብብ፦ «ነፍስህንም ለተራበ ብታፈስስ።» ለሌሎች ልናዝንላቸው፥ ጥቂት የደረቀ ቍርስራሽ ሳይሆን እኛ ራሳችን ልንቀበለው የምንወደውን ልንሰጣቸው ይገባል። በችግራቸው ሰዓት ለባልንጀሮቻችን ርኅሩኅ ጥንቃቄ ብናሳይ፥ ጌታ ፍላጎታችንን ይመለከታል፥ ራሱንም የማያቋርጥ መሪያችን ያደርጋል። ኢየሱስ የስስታሞች ወይም ድሆችን የሚጨቁኑ ሰዎች መሪ ሳይሆን የደጎችና የርኅሩኆች መሪ ነው። እንደነዚህ ያሉ ሰዎች መንገዳቸውን ፈጽሞ የማይስቱ መንገደኞች ናቸው።

ፌብሩዋሪ 21

በታናሽነት ላይ የሚወርድ በረከት

«እግዚአብሔርን የሚፈሩትን ታናናሾችንና ታላላቆችን ይባርካቸዋል» መዝሙር 115:13

ይህ ዝቅተኛ ማዕረግና ድሀ ኑሮ ላላቸው የሚያጽናና ቃል ነው። አምላካችን ጥቂት ሀብት፥ ጥቂት ችሎታ፥ ጥቂት ተሰሚነት፥ ጥቂት ክብደት ላላቸው እጅግ ቸር አሳቢነት አለው። እግዚአብሔር በፍጥረት ውስጥ ያሉትን ታናናሽ ነገሮች ይጠነቀቃል፤ ድንቢጦች በምድር ላይ ሲያርፉ እንኳ ይመለከታቸዋል። ለእግዚአብሔር ታናሽ የሆነ ነገር የለም፤ ዓላማዎቹን ለመፈጸም የማይታወቁ መሣሪያዎችን ይጠቀማልና። ከሰዎች ሁሉ የሚያንሰው በታናሽነቱ ላይ ከእግዚአብሔር በረከትን ይፈልግ፤ ጠባቡም ስፍራው ደስ የሚያሰኝ ሆኖ ያገኘዋል።

ጌታን ከሚፈሩት መካከል ታናናሾችም ታላላቆችም አሉ። አንዳንዶቹ ሕፃናት፥ ሌሎቹም ኃያላን ናቸው። ነገር ግን እነዚህ ሁሉ የተባረኩ ናቸው። ትንሽ እምነት የተባረከ እምነት ነው። የሚንቀጠቀጥ ተስፋ የተባረከ ተስፋ ነው። የመንፈስ ቅዱስ ጸጋ ሁሉ ገና በእንቡጥ ቢሆንም እንኳ በውስጡ በረከትን ይዟል። ከዚህም በላይ ጌታ ኢየሱስ ታናናሾችንም ታላላቆችንም በአንድ ዓይነት የከበረ ደም ገዝቷቸዋል፤ ሙሉ ያደጉትን በጎች እንደሚጠብቅ ጠቦቶቹንም ሊጠብቅ ቃል ገብቷል። ልጅዋ ትንሽ ስለ ሆነ የምትዘነጋው እናት የለችም፤ እንዲያውም ባነሰ ቍጥር በበለጠ ርኅራኄ ትንከባከበዋለች። በጌታ ዘንድ አንዳች ምርጫ ቢኖር፥ እነርሱን የሚዘረዝራቸው «ታላላቆችንና ታናናሾችን» ብሎ ሳይሆን «ታናናሾችንና ታላላቆችን» ብሎ ነው።

ፌብሩዋሪ 22

ያለፈው ማዳን እምነትን ይወልዳል

«ዳዊትም ደግሞ። ከአንበሳ መዳፍና ከድብ መዳፍ ያዳነኝ እግዚአብሔር ከዚህ ፍልስጥኤማዊ እጅ ያድነኛል አለ» 1ኛ ሳሙኤል 17:37

ቃሉን ብቻ ብንመለከት ይህ ተስፋ አይደለም፤ በትርጉሙ ግን በእውነት ተስፋ ነው፤ ዳዊት የተናገረውን ቃል ጌታ እውነት በማድረግ አጽድቆታልና። ከቀደሙት ማዳኖች ተነሥቶ በአዲስ አደጋ እርዳታን እንደሚቀበል አመዛዘነ። በኢየሱስ የተስፋ ቃሎች ሁሉ በእኛ በኩል ለእግዚአብሔር ክብር አዎንና አሜን ናቸው፤ እንዲሁም ጌታ ከሚያምኑት ሕዝቡ ጋር የቀደመው አያያዙ ይደገማል።

እንግዲያስ ኑ፥ የጌታን የቀደመ ቸርነት እናስብ። ቀድሞ በራሳችን ኃይል እንድናለን ብለን ተስፋ ልናደርግ አንችልም ነበር፤ ጌታ ግን አዳነን። ዳግመኛስ አያድነንምን? እንደሚያድነን እርግጠኞች ነን። ዳዊት ጠላቱን ሊገጥም እንደ ሮጠ እኛም እንዲሁ እንሮጣለን። ጌታ ከእኛ ጋር ነበረ፥ ከእኛ ጋርም ነው፤ ደግሞም፦ «አልለቅህም ከቶም አልተውህም» ብሏል። ስለ ምን እንንቀጠቀጣለን? ያለፈው ዘመን ሕልም ነበርን? የሞቱትን ድብና አንበሳ አስብ። ይህ ፍልስጥኤማዊ ማን ነው? እውነት ነው፥ እርሱ ፍጹም አንድ ዓይነት አይደለም፤ ድብም አንበሳም አይደለም፤ እግዚአብሔር ግን ያው ነው፤ ክብሩም በዚህኛው እንደዚያኛው ይመለከተዋል። ከዱር አራዊት ያዳነን ግዙፍ ሰው እንዲገድለን አይደለም። እንበርታ።

ፌብሩዋሪ 23

ያልተቋረጠ ኅብረት አስፈላጊ ነው

«በእኔ ብትኖሩ ቃሎቼም በእናንተ ቢኖሩ የምትወዱትን ሁሉ ለምኑ ይሆንላችሁማል» ዮሐንስ 15:7

ለእርሱ ለመኖር በግድ በክርስቶስ ውስጥ መሆን አለብን፤ የዚህንም ተስፋ ልግስና ከእርሱ ለመጠየቅ እንድንችል በእርሱ መኖር አለብን። በኢየሱስ መኖር ማለት ለሌላ ፍቅር ወይም ለሌላ ዓላማ ፈጽሞ እርሱን አለመተው፥ ነገር ግን ከእርሱ ጋር በሕያው፥ በፍቅር፥ በንቃትና በፈቃድ አንድነት መኖር ነው። ቅርንጫፉ ሁልጊዜ ከግንዱ አጠገብ ብቻ ሳይሆን ሁልጊዜ ሕይወትንና ፍሬ ማፍራትን ከእርሱ ይቀበላል። እውነተኞች አማኞች ሁሉ በአንድ መንገድ በክርስቶስ ይኖራሉ፤ ነገር ግን የላቀ ትርጉም አለ፤ በዙፋኑ ፊት ወሰን የሌለውን ኃይል ከማግኘታችን በፊት ይህን ማወቅ አለብን። «የምትወዱትን ሁሉ ለምኑ» የሚለው ቃል ከእግዚአብሔር ጋር ለሚሄዱ ሄኖኮች፥ በጌታ ደረት ላይ ለሚጠጉ ዮሐንሶች፥ ከክርስቶስ ጋር ያላቸው አንድነት ወደማያቋርጥ ኅብረት ለሚመራቸው ነው።

ልብ በፍቅር መኖር፥ አእምሮ በእምነት መሠረት፥ ተስፋ ከቃሉ ጋር መጣበቅ፥ ሰውነትም ሁሉ ከጌታ ጋር መተባበር አለበት፤ አለዚያ በጸሎት ኃይልን በእኛ እጅ መስጠት አደገኛ በሆነ ነበር። ሙሉ ሥልጣን ያለው ባዶ ቼክ ሊሰጥ የሚችለው ሕይወቱ ራሱ «እኔም አሁን ሕያው ሆኜ አልኖርም ክርስቶስ ግን በእኔ ይኖራል» ለሆነ ሰው ብቻ ነው። ኅብረታችሁን የምታፈርሱ ሆይ፥ ምን ያህል ኃይል ታጣላችሁ! በልመናችሁ ብርቱዎች መሆን ብትወዱ ጌታ ራሱ በእናንተ፥ እናንተም በእርሱ መኖር አለባችሁ።

ፌብሩዋሪ 24

እንድትሰማ ስማ

«በእኔ ብትኖሩ ቃሎቼም በእናንተ ቢኖሩ የምትወዱትን ሁሉ ለምኑ ይሆንላችሁማል» ዮሐንስ 15:7

በሚገባ አስተውሉ፤ ኢየሱስ እኛን ሲናገር እንዲሰማን ከጠበቅን እኛ እርሱ ሲናገር መስማት አለብን። ለክርስቶስ ጆሮ ከሌለን እርሱም ለእኛ ጆሮ አይኖረውም። በምንሰማው መጠን እንሰማለን።

ከዚህም በላይ የተሰማው ነገር ሊቆይ፥ በእኛ ውስጥ ሊኖር፥ በጠባያችንም ውስጥ እንደ ብርታትና እንደ ኃይል ሊጸና ይገባዋል። ኢየሱስ ያስተማራቸውን እውነቶች፥ ያዘዛቸውን ትእዛዛት፥ በውስጣችንም የመንፈሱን እንቅስቃሴ መቀበል አለብን፤ አለዚያ በምሕረት ዙፋን ፊት ኃይል አይኖረንም።

የጌታችን ቃሎች ተቀብለን በእኛ ቢኖሩ፥ እንዴት ያለ ወሰን የሌለው የመብት መስክ ይከፈትልናል! በጸሎት ፈቃዳችንን እናገኛለን፤ ፈቃዳችንን አስቀድመን ለጌታ ትእዛዝ አስገዝተናልና። የሰማይን መክፈቻዎች ይዘው ደመናትን እንዲዘጉና እንዲከፍቱ ኤልያሶች የሚሠለጥኑት እንዲሁ ነው። እንደዚህ ያለ አንድ ሰው ከሺህ ተራ ክርስቲያኖች ይበልጣል። ለቤተ ክርስቲያንና ለዓለም አማላጆች ለመሆን፥ እንደ ሉተርም ከጌታ የምንወደውን ለማግኘት እንድንችል በትሕትና እንመኛለንን? እንግዲያስ ለተወደደው ድምፅ ጆሮአችንን ማዘንበል፥ ቃሎቹን ማከማቸት፥ በጥንቃቄም መታዘዝ አለብን። በውጤት መጸለይ የሚወድ ሰው «በትጋት መስማት» ያስፈልገዋል።

ፌብሩዋሪ 25

የተለዩ

«እናንተም የእግዚአብሔር ካህናት ትባላላችሁ» ኢሳይያስ 61:6

ይህ ለእስራኤል የተሰጠ ቃል በቃል ተስፋ በመንፈስ ረገድ እንደ መንፈስ ለሆነው ዘር፥ ማለትም ለአማኞች ሁሉ ይገባል። እንደ መብታችን ብንኖር፥ ለቅዱስ አገልግሎት እንደ ተለየን ሰዎች እስኪያዩና የጌታ ካህናት ብለው እስኪጠሩን ድረስ በግልጽና በተለየ መንገድ ለእግዚአብሔር እንኖራለን። እንደ ሌሎች ልንሠራ ወይም ልንነግድ እንችላለን፥ ሆኖም ፈጽሞና ሙሉ በሙሉ የእግዚአብሔር አገልጋዮች ልንሆን እንችላለን። ብቸኛ ሥራችን የዘወትርን የጸሎት፥ የምስጋና፥ የምስክርነትና ራስን የመቀደስ መሥዋዕት በኢየሱስ ክርስቶስ በኩል ለሕያው እግዚአብሔር ማቅረብ ይሆናል።

ይህ ብቸኛ ዓላማችን ስለ ሆነ፥ የሚያዘናጉ ጕዳዮችን ከዚህ የላቀ ጥሪ ለሌላቸው ልንተው እንችላለን። «ሙታናቸውንም እንዲቀብሩ ሙታንን ተዋቸው።» እንዲህ ተብሎ ተጽፏል፦ «እንግዶችም ቆመው መንጎቻችሁን ያሰማራሉ፥ የባዕድም ልጆች አራሾቻችሁና ወይን ጠባቂዎቻችሁ ይሆናሉ።» እነርሱ ፖለቲካን ሊያስተዳድሩ፥ የገንዘብ ችግሮችን ሊፈቱ፥ ሳይንስን ሊከራከሩ፥ የትችትን አዲስ ጥቃቅን ክርክሮች ሊቋጩ ይችላሉ፤ እኛ ግን እንደ ጌታ ኢየሱስ ለዘላለም ክህነት ለተሾሙ ሰዎች ለሚገባው አገልግሎት ራሳችንን እንሰጣለን።

ይህን የከበረ ተስፋ ቅዱስ ግዴታን እንደሚያስከትል አድርገን በመቀበል፥ የቅድስናን ልብስ እንልበስ፥ ቀኑንም ሁሉ በጌታ ፊት እናገልግል።

ፌብሩዋሪ 26

የጸና እውነት

«የእውነት ከንፈር ለዘላለም ትጸናለች፤ ሐሰተኛ ምላስ ግን ለቅጽበት ናት» ምሳሌ 12:19

እውነት አያረጅም። ጊዜ ይፈትነዋል፥ እርሱ ግን ፈተናውን በሚገባ ይቋቋማል። እንግዲህ እውነትን ተናግሬ ለጊዜው ስለ እርሱ መከራ መቀበል ቢኖርብኝ፥ በመጠበቅ መርካት አለብኝ። ደግሞም የእግዚአብሔርን እውነት አምኜ ልገልጠው ብተጋ፥ ብዙ ተቃውሞ ሊገጥመኝ ይችላል፤ ነገር ግን መፍራት አያስፈልገኝም፤ በመጨረሻ እውነት ማሸነፍ አለባትና።

የሐሰት ጊዜያዊ ድል እንዴት ያለ ምስኪን ነገር ነው! «ሐሰተኛ ከንፈር ለቅጽበት ናት!» በአንድ ሌሊት በቅሎ በአንድ ሌሊት የሚጠፋ ቅል ብቻ ነው፤ ዕድገቱም በበዛ ቍጥር መበስበሱ በበለጠ ይገለጣል። በአንጻሩ ግን ፈጽሞ የማይለወጠውን እውነት፥ በማይለወጠው አምላክ በማይናወጥ እውነት ውስጥ የጸናውን የዘላለም ወንጌል መመስከርና መከላከል ለማይሞት ፍጡር እንዴት የተገባ ነው! የቀድሞ ምሳሌ፦ «እውነትን የሚናገር ዲያብሎስን ያሳፍራል» ይላል። የእግዚአብሔርን እውነት የሚናገር በእርግጥ በሲኦል ያሉትን አጋንንት ሁሉ ያሳፍራል፥ አሁን ሐሰታቸውን የሚያፏጩትን የእባቡን ዘር ሁሉ ያዋርዳል።

ልቤ ሆይ፥ በታናሹም በታላቁም በሁሉ ነገር በእውነት ወገን እንድትሆን ተጠንቀቅ፤ ይልቁንም ጸጋና እውነት በእርሱ ወደ ሰዎች መካከል በመጣው በእርሱ ወገን ሁን!

ፌብሩዋሪ 27

የማይናወጥ መታመን

«ከክፉ ወሬ አይፈራም፤ ልቡ በእግዚአብሔር ለመታመን የጸና ነው» መዝሙር 112:7

በጥርጣሬ መንጠልጠል አስፈሪ ነው። ከቤት ወሬ ሳናገኝ ስንቀር እንጨነቃለን፤ «ወሬ አለመምጣቱ መልካም ወሬ ነው» ብለን ልናምን አንችልም። ለዚህ የኀዘን ሁኔታ መድኃኒቱ እምነት ነው፤ ጌታ በመንፈሱ አእምሮን በቅዱስ ጸጥታ ያጸናዋል፤ ስለ አሁኑም ሆነ ስለሚመጣው ፍርሃት ሁሉ ይጠፋል።

መዝሙረኛው የሚናገርለት የልብ ጽናት በትጋት ሊፈለግ ይገባዋል። ይህ የጌታን ይህን ወይም ያን ተስፋ ማመን ሳይሆን በአምላካችን ላይ ያለ አጠቃላይ የማይናወጥ መታመን ነው፤ እርሱ ራሱ ክፉ እንደማያደርግብን፥ ሌላም ማንም እንዲጐዳን እንደማይፈቅድ በእርሱ ያለን መተማመን ነው። ይህ የማያቋርጥ መተማመን የሕይወትን የሚታወቀውንም የማይታወቀውንም ይገጥማል። ነገ ምንም ቢሆን አምላካችን የነገ አምላክ ነው። ለእኛ የማይታወቁ ምንም ዓይነት ነገሮች ቢደርሱ፥ አምላካችን እግዚአብሔር የሚታወቀውን ብቻ ሳይሆን የማይታወቀውንም ገዢ ነው። የሚመጣው ምንም ይምጣ በጌታ ለመታመን ቈርጠናል። እጅግ የከፋውም ነገር ቢደርስ፥ አምላካችን አሁንም ታላቅና ምርጥ ነው። ስለዚህ የፖስተኛው ማንኳኳት ቢያስደነግጠን፥ ወይም ቴሌግራም በመንፈቀ ሌሊት ቢቀሰቅሰን አንፈራም። ጌታ ሕያው ነው፤ ልጆቹ ምን ሊፈሩ ይችላሉ?

ፌብሩዋሪ 28

በሰማይ ያለ እውነተኛ ርስት

«የሚበልጥና ለዘወትር የሚኖር ገንዘብ በሰማይ ራሳችሁ እንዳላችሁ አውቃችሁ» ዕብራውያን 10:34

ይህ መልካም ነው። በዚህ ያለው ሀብታችን እጅግ ተጨባጭነት የሌለው ነው፤ በውስጡ ምንም እውነተኛ ነገር የለም። እግዚአብሔር ግን በክብር አገር እውነተኛ ርስት እንደሚሰጠን ተስፋ ሰጥቶናል፤ ያም ተስፋ በእርግጠኝነቱ ሙሉ ማረጋገጫ ወደ ልባችን ስለሚመጣ፥ በዚያ የሚኖር ሀብት እንዳለን በራሳችን እናውቃለን። አዎን፥ አሁንም እንኳ «አለን።» ሰዎች፦ «በእጅ ያለች አንዲት ወፍ በቍጥቋጦ ካሉ ሁለት ትበልጣለች» ይላሉ፤ እኛ ግን ወፋችን በቍጥቋጦውም በእጃችንም አለች። ሰማይ አሁንም እንኳ የእኛ ነው። የባለቤትነት ሰነዱ አለን፥ መያዣው አለን፥ በኵራቱም አለን። ሰማይን በዋጋው፥ በተስፋው፥ በመሠረቱም ይዘነዋል፤ ይህንንም የምናውቀው በጆሮ በመስማት ብቻ ሳይሆን «በራሳችን» ነው።

ከዮርዳኖስ ማዶ ያለው የተሻለ ሀብት ማሰብ ከአሁኑ ጥፋታችን ጋር ሊያስታርቀን አይገባምን? የምናወጣውን ገንዘብ ልናጣ እንችላለን፥ መዝገባችን ግን የተጠበቀ ነው። ጥላዎቹን አጥተናል፥ እውነተኛው ነገር ግን ይኖራል፤ አዳኛችን ሕያው ነውና፥ ያዘጋጀልንም ስፍራ ይጸናልና። የተሻለ አገር፥ የተሻለ ሀብት፥ የተሻለ ተስፋ አለ፤ ይህም ሁሉ በተሻለ ኪዳን ወደ እኛ ይመጣል፤ ስለዚህ በተሻለ መንፈስ እንሁን፥ ለጌታም፦ «በየቀኑ እባርክሃለሁ፥ ስምህንም ለዘላለም ዓለም አመሰግናለሁ» እንበለው።

ፌብሩዋሪ 29

የሚከተለን

«ቸርነትና ምሕረት በሕይወቴ ዘመን ሁሉ በእውነት ይከተሉኛል» መዝሙር 23:6

አንድ ቀናተኛ ገጣሚ እንዲህ ይዘምራል፦

«ጌታ ሆይ፥ አሁን እንደምታደርገው

በዘመኔ ውስጥ ቀንን ስታኖር፥

በሌሎች ዓመታት ያልታወቀውን፥ እለምንሃለሁ፥

መልኩ ምንም ቢሆን እንዲህ ያለ ጸጋ ያብራው፥

ቅድስናን እንዲጨምር፥ ምስጋናንም እንዲያረዝም!»

ይህ ቀን በአራት ዓመት አንድ ጊዜ ብቻ ይመጣል፤ ምነው በእርሱ ላይ አራት እጥፍ በረከት ባገኘን! እስከ አሁን ድረስ ቸርነትና ምሕረት እንደ ሁለት ጠባቂዎች ከቀን ወደ ቀን ተከትለውናል፤ ጸጋ ከፊት እንደሚመራ እነርሱም ከኋላ ይጠብቁናል፤ ይህም ያልተለመደ ቀን ከሕይወታችን ቀናት አንዱ ስለ ሆነ፥ ሁለቱ ጠባቂ መላእክት ዛሬም ከእኛ ጋር ይሆናሉ። ፍላጎታችንን የሚያሟላ ቸርነት፥ ኃጢአታችንንም የሚደመስስ ምሕረት — እነዚህ ሁለቱ በዚህ ቀን እያንዳንዱን እርምጃችንን፥ ቀናትም እስከማይኖሩ ድረስ በየቀኑ ይሸኙናል። ስለዚህ በዚህ ልዩ ቀን በልዩ የልብ መቀደስ ጌታን እናገልግል፥ ምስጋናውንም ከቀድሞው ሁሉ በበለጠ ትጋትና ጣፋጭነት እንዘምር። ዛሬ ለእግዚአብሔር ሥራ ወይም ለድሆች ያልተለመደ መባ ማቅረብ አንችልምን? በፍቅር ብልሃት ይህን የፌብሩዋሪ ሃያ ዘጠነኛ ቀን ለዘላለም የሚታወስ ቀን እናድርገው።

ቀዳሚ ቀጣይ