ምዕራፍ 11 · 23 ደቂቃ ንባብ · 30 ደቂቃ ማዳመጥ
የኦክቶበር ወር
ኦክቶበር 1
የሚያስበው ኪዳን
«ለሚፈሩት ምግብን ሰጣቸው፤ ኪዳኑንም ለዘላለም ያስባል» መዝሙር 111:5
እግዚአብሔርን የሚፈሩ ችግርን መፍራት አያስፈልጋቸውም። በእነዚህ ሁሉ ረጅም ዓመታት ጌታ በምድረ በዳ ቢሆኑ፥ በኮራት ወንዝ አጠገብ ቢሆኑ፥ በምርኮ ቢሆኑ፥ ወይም በራብ መካከል ቢሆኑ፥ ለልጆቹ ዘወትር ምግብ አግኝቶላቸዋል። እስከ ዛሬ ድረስ ጌታ የዕለት እንጀራችንን ቀን በቀን ሰጥቶናል፤ ከእንግዲህ ምንም እስከማያስፈልገን ድረስ መመገቡን እንደሚቀጥል አንጠራጠርም።
ከፍ ያሉትንና የሚበልጡትን የጸጋ ኪዳን በረከቶች በተመለከተም፥ ጕዳያችን እንደሚጠይቀው ከመስጠት ፈጽሞ አያቋርጥም። ኪዳኑን እንደ ገባ ያስባል፤ እንደ ተጸጸተበትም ከቶ አያደርግም። እንዲያጠፋን ስናስቈጣው እንኳ ያስበዋል። ቃል እንደ ገባው ሊወድደን፥ ሊጠብቀንና ሊያጽናናን ያስባል። ከቃሎቹ አንዲቱ እንኳ በምድር ላይ እንድትወድቅ ሳይፈቅድ የገባውን ቃል ሁሉ እስከ አንዲት የውጣ እስከ አንዲት ነጥብ ድረስ ያስባል።
እኛ አምላካችንን በሚያሳዝን ሁኔታ እንረሳዋለን፤ እርሱ ግን በቸርነቱ ያስበናል። የኪዳኑ ዋስ የሆነውን ልጁን፥ ኪዳኑን በትጋት የሚፈጽመውን መንፈስ ቅዱሱን፥ ከኪዳኑ ጋር የተሳሰረውን የራሱንም ክብር ሊረሳ አይችልም። ስለዚህ የተደላደለ የእግዚአብሔር መሠረት ቆሞአል፤ ማንም አማኝ በጨው ኪዳን የእርሱ የሆነውን መለኮታዊ ርስቱን አያጣም።
ኦክቶበር 2
ወደ ቤት በሚወስደው መንገድ ላይ መጽናናት
«ዮሴፍም ወንድሞቹን አላቸው። እኔ እሞታለሁ፤ እግዚአብሔርም ፈጽሞ ይጐበኛችኋል፥ ከዚህችም ምድር ለአብርሃምና ለይስሐቅ ለያዕቆብም ወደ ማለላት ምድር ያወጣችኋል» ዘፍጥረት 50:24
ዮሴፍ ለወንድሞቹ ሥጋ የለበሰ መግቦት ሆኖላቸው ነበር። ዮሴፎቻችን ሁሉ ይሞታሉ፤ ሺህ መጽናናቶችም ከእነርሱ ጋር ይሞታሉ። ዮሴፍ ከሞተ በኋላ ግብፅ ለእስራኤል እንደ ቀድሞው ሆና አታውቅም፤ ለአንዳንዶቻችንም ዓለም የምንወዳቸው በሕይወት ሳሉ እንደ ነበረችው ዳግመኛ ልትሆን አትችልም።
ነገር ግን የዚያ አሳዛኝ ሞት ሕመም እንዴት እንደ ቀለለ እዩ! ሕያው እግዚአብሔር እንደሚጐበኛቸው ተስፋ ነበራቸው። ከእግዚአብሔር የሆነ ጕብኝት! እንዴት ያለ ሞገስ ነው! እንዴት ያለ መጽናናት ነው! በምድር ላይ እንዴት ያለ ሰማይ ነው! ጌታ ሆይ፥ በጣራችን በታች ልትገባ ባይገባንም እንኳ ዛሬ ጐብኘን።
ከዚህ የበለጠም ተስፋ ተሰጥቶ ነበር፤ ጌታ ያወጣቸዋል። ዮሴፍ ከሞተ በኋላ በግብፅ ቀዝቃዛ አቀባበል ያገኛሉ፤ እንዲያውም የባርነት ቤት ይሆንባቸዋል። ነገር ግን ለዘላለም እንዲህ አይሆንም፤ በመለኮታዊ ማዳን ከእርስዋ ወጥተው ወደ ተስፋይቱ ምድር ይጓዛሉ። እኛም እዚህ ለዘላለም አናለቅስም። ከውዶቻችን ጋር እንድንሆን ወደ ክብር ምድር ወደ ቤታችን እንጠራለን። ስለዚህ «እርስ በርሳችሁ በዚህ ቃል ተጽናኑ።»
ኦክቶበር 3
የጌታን ውበት የሚያንጸባርቁ
«እኔ ግን በጽድቅ ፊትህን አያለሁ፤ በነቃሁም ጊዜ በመልክህ እጠግባለሁ» መዝሙር 17:15
የሌሎች ሰዎች ድርሻ ሥጋቸውን ይሞላል፤ ልጆቻቸውንም ባለጠጎች ያደርጋል፤ የአማኙ ድርሻ ግን ሌላ ዓይነት ነው። የዓለም ሰዎች መዝገባቸው በዚህ ዓለም ነው፤ የሚመጣው ዓለም ሰዎች ግን ከፍ ብለው ወደ ሩቅም ይመለከታሉ።
ርስታችን ሁለት እጥፍ ነው። እዚህ የእግዚአብሔርን መገኘት፥ ወደ ፊትም መልኩን እናገኛለን። እዚህ በክርስቶስ ኢየሱስ ጸድቀናልና የጌታን ፊት በጽድቅ እናያለን። የታረቀንን አምላክ ፊት የማየት ደስታ እንዴት ታላቅ ነው! በኢየሱስ ክርስቶስ ፊት ያለው የእግዚአብሔር ክብር በምድር ላይ ሰማይን ይሰጠናል፤ በላይም የሰማያት ሰማይ ይሆንልናል።
ነገር ግን ማየት በዚያ አያበቃም፤ ወደምንመለከተው እንለወጣለን። ለጥቂት ጊዜ እናንቀላፋለን፤ ከዚያም ስንነቃ የጌታችንን ውበት የሚያንጸባርቁ መስተዋቶች ሆነን እንገኛለን። እምነት እግዚአብሔርን በሚለውጥ እይታ ያየዋል። የኢየሱስ ባሕርይ በነፍስ ላይ እስኪታተም ድረስ ልብ የኢየሱስን መልክ ወደ ጥልቁ ይቀበላል። እርካታ ይህ ነው። እግዚአብሔርን ማየትና እርሱን መምሰል — ከዚህ በላይ ምን እመኛለሁ? እዚህ የዳዊት የተረጋገጠ እምነት በመንፈስ ቅዱስ የጌታ ተስፋ እንዲሆን ተደርጓል። አምናለሁ። እጠብቀዋለሁ። ጌታ ሆይ፥ ስጠኝ። አሜን።
ኦክቶበር 4
ብርቱው ማግኔት
«እኔም ከምድር ከፍ ከፍ ያልሁ እንደ ሆነ ሁሉን ወደ እኔ እስባለሁ» ዮሐንስ 12:32
እናንተ ሠራተኞች ሆይ፥ ኑ፥ ተበረታቱ። ጉባኤን መሳብ እንደማትችሉ ትፈራላችሁ። የተሰቀለውን፥ የተነሣውንና ያረገውን አዳኝ መስበክ ሞክሩ፤ ይህ በሰዎች መካከል እስከ ዛሬ ከተገለጠው ሁሉ እጅግ ታላቁ «መሳቢያ» ነውና። ወደ ክርስቶስ የሳባችሁ ከክርስቶስ በቀር ምንድር ነው? አሁንስ ወደ እርሱ የሚስባችሁ ከብሩክ ራሱ በቀር ምንድር ነው? በሌላ ነገር ወደ ሃይማኖት ተስባችሁ ከሆነ ብዙም ሳይቆይ ከእርሱ ትሳባላችሁ፤ ኢየሱስ ግን ይዞአችኋል፤ እስከ መጨረሻም ድረስ ይይዛችኋል። እንግዲህ ሌሎችን የመሳብ ኃይሉን ለምን ትጠራጠራላችሁ? እስከ ዛሬ እልከኞች ወደ ነበሩት በኢየሱስ ስም ሂዱ፤ እንደማይስባቸውም እንደ ሆነ እዩ።
ከዚህ የመሳብ ኃይል በላይ የሆነ ማንም ዓይነት ሰው የለም። ሽማግሌና ወጣት፥ ባለጠጋና ድሀ፥ ያልተማረና የተማረ፥ የረከሰ ወይም ደግ — ሰዎች ሁሉ የሚስበውን ኃይል ይሰማቸዋል። ኢየሱስ ብቸኛው ማግኔት ነው። ሌላን አናስብ። ሙዚቃ ወደ ኢየሱስ አይስብም፤ ንግግር ማሳመር፥ አመክንዮ፥ ሥርዓት ወይም ጩኸትም አይስቡም። ኢየሱስ ራሱ ሰዎችን ወደ ራሱ መሳብ አለበት፤ ኢየሱስም በማንኛውም ሁኔታ ለሥራው ፍጹም ብቁ ነው። በዘመኑ አታላይ ብልሃቶች አትፈተኑ፤ ነገር ግን እንደ ጌታ ሠራተኞች በራሱ መንገድ ሥሩ፤ በጌታም በራሱ ገመድ ሳቡ። ወደ ክርስቶስ ሳቡ፥ በክርስቶስም ሳቡ፤ ያን ጊዜ ክርስቶስ በእናንተ ይስባልና።
ኦክቶበር 5
በእግዚአብሔር ትእዛዝ
«የያዕቆብም ቅሬታ በብዙ አሕዛብ መካከል ከእግዚአብሔር ዘንድ እንደሚወርድ ጠል፥ ሰውንም እንደማይጠብቅ የሰውንም ልጆች እንደማይቆይ በሣር ላይ እንዳለ ካፊያ ይሆናል።» ሚክያስ 5:7
ይህ ለሥጋዊው እስራኤል እውነት ከሆነ፥ ለመንፈሳዊው እስራኤል፥ ለሚያምኑት የእግዚአብሔር ሕዝብ፥ እጅግ የበለጠ እውነት ነው። ቅዱሳን መሆን እንደሚገባቸው ሲሆኑ፥ ተበትነው ለሚኖሩባቸው ሰዎች ሊቈጠር የማይችል በረከት ይሆናሉ።
እንደ ጠል ናቸው፤ በጸጥታና ሳይታዩ በዙሪያቸው ያሉትን ያለመልማሉና። በዝምታ ግን በብርቱ ከእነርሱ ጋር የሚኖሩትን ሕይወት፥ ዕድገትና ደስታ ያገለግላሉ። ከሰማይ ትኩስ ሆነው እየመጡ፥ በፀሐይ ላይ እንደ አልማዝ እያበሩ፥ ቸር ወንዶችና ሴቶች እያንዳንዱ የሣር ቅጠል የራሱን የጠል ጠብታ እስኪያገኝ ድረስ ደካሞችንና ታናናሾችን ይንከባከባሉ። በግል ትንሽ ቢሆኑም፥ በአንድነት ሲሆኑ ጌታ በእነርሱ በኩል ለሚፈጽመው የፍቅር ዓላማ ሁሉ በቂ ናቸው። የጠል ጠብታዎች ሰፋፊ እርሻዎችን ያለመልማሉ። ጌታ ሆይ፥ እንደ ጠል አድርገን!
እግዚአብሔርን የሚፈሩ ሰዎች የሰውን ፈቃድና ይሁንታ ሳይጠብቁ በእግዚአብሔር ትእዛዝ እንደሚመጣ ካፊያ ናቸው። ሰዎች ቢወድዱም ባይወድዱም ለእግዚአብሔር ይሠራሉ፤ ዝናብ እንደማይጠይቅ እነርሱም የሰውን ፈቃድ አይጠይቁም። ጌታ ሆይ፥ ዕጣችን በወደቀበት ስፍራ ሁሉ በአገልግሎትህ እንዲህ በድፍረት ፈጣኖችና ነጻዎች አድርገን።
ኦክቶበር 6
የመሪያችን አመራር
«ግን እርሱ የእውነት መንፈስ በመጣ ጊዜ ወደ እውነት ሁሉ ይመራችኋል» ዮሐንስ 16:13
እውነት ልንገባበት እንደምንወድድ ሰፊ ዋሻ ናት፤ ብቻችንን ግን ልናቋርጣት አንችልም። በመግቢያው ላይ ግልጥና ብሩህ ናት፤ ወደ ውስጥ ገፍተን እጅግ ውስጣዊ የሆኑትን ክፍሎቿን ልንመረምር ብንወድ ግን መሪ ያስፈልገናል፤ አለዚያ እንጠፋለን። እውነትን ሁሉ ፍጹም አድርጎ የሚያውቀው መንፈስ ቅዱስ የእውነተኛ አማኞች ሁሉ የተሾመ መሪ ነው፤ የእግዚአብሔርን ጥልቅ ነገሮች እንዲያዩና ምሥጢሩ እንዲገለጥላቸው፥ መሸከም በሚችሉት መጠን ከአንዱ ውስጣዊ ክፍል ወደ ሌላው ይመራቸዋል።
በትሕትና ለሚጠይቅ አእምሮ ይህ እንዴት ያለ ተስፋ ነው! እውነትን ልናውቅና ወደ እርሱ ልንገባ እንወድዳለን። ለመሳሳት ያለንን ዝንባሌ እናውቃለን፤ የመሪም አስቸኳይ ፍላጎት ይሰማናል። መንፈስ ቅዱስ መጥቶ በመካከላችን ስለሚኖር ደስ ይለናል። መሪ ሊሆነን ራሱን ዝቅ ያደርጋል፤ እኛም አመራሩን በደስታ እንቀበላለን። ወደ አንድ ወገን ያደላን ሚዛንም የሳትን እንዳንሆን «እውነትን ሁሉ» ልንማር እንወድዳለን። በዚህ በረከትን እንዳናጣ ወይም በኃጢአት እንዳንወድቅ ከመገለጡ ክፍል ማንኛውንም ሆን ብለን አለማወቅ አንወድድም። የእግዚአብሔር መንፈስ ወደ እውነት ሁሉ ሊመራን መጥቶአል፤ በሚታዘዝ ልብ ቃሉን እንስማ፥ አመራሩንም እንከተል።
ኦክቶበር 7
በኅብረት ሁልጊዜ ቀዳሚ
«ወደ ገሊላ ይቀድማችኋል፤ እንደ ነገራችሁ በዚያ ታዩታላችሁ።» ማርቆስ 16:7
ደቀ መዛሙርቱን ሊያገኛቸው በቀጠረበት ስፍራ በጊዜው በዚያ ይገኛል። ኢየሱስ ቀጠሮውን ይጠብቃል። በምሕረት ዙፋን፥ ወይም በጉባኤ አምልኮ፥ ወይም በሥርዓቶቹ ሊያገኘን ቃል ቢገባ፥ በዚያ እንደሚገኝ በእርግጥ ልንታመን እንችላለን። እኛ በክፋት ከተቀጠረው መገናኛ ስፍራ ልንቀር እንችላለን፤ እርሱ ግን ከቶ አይቀርም። እርሱ «ሁለት ወይም ሦስት በስሜ በሚሰበሰቡበት በዚያ በመካከላቸው ነኝ» ይላል፤ «በዚያ እሆናለሁ» አይልም፥ «አስቀድሜ በዚያ አለሁ» ይላል እንጂ።
ኢየሱስ በኅብረት ሁልጊዜ ቀዳሚ ነው፤ «ይቀድማችኋል»። ልቡ ከሕዝቡ ጋር ነው፤ ደስታውም በእነርሱ ነው፤ እነርሱንም ለማግኘት ከቶ አይዘገይም። በኅብረት ሁሉ እርሱ ይቀድመናል።
ነገር ግን ከእርሱ በኋላ ለሚመጡት ራሱን ይገልጣል፤ «በዚያ ታዩታላችሁ»። እንዴት ያለ አስደሳች እይታ ነው! ከተራ ሰዎች ታላቁን ለማየት ግድ የለንም፤ እርሱን ማየት ግን በደስታና በሰላም መሞላት ነው። እናየውማለን፤ በእርሱ ወደሚያምኑ እንደሚመጣና ራሱን እንደሚገልጥላቸው ተስፋ ሰጥቶአልና። እንዲሁ እንደሚሆን እርግጠኛ ሁን፤ ሁሉን እንደ ተስፋ ቃሉ ያደርጋልና፤ «እንደ ነገራችሁ»። እነዚያን የመጨረሻ ቃላት አጥብቀህ ያዝ፤ እስከ መጨረሻም «እንደ ነገራችሁ» እንደሚያደርግልህ እርግጠኛ ሁን።
ኦክቶበር 8
ፈጽሞ ብቻ አይደለህም
«ከእንግዲህ ወዲህ የተተወች አትባዪም» ኢሳይያስ 62:4
«የተተወች» የሚያስጨንቅ ቃል ነው። እንደ ሞት ደወል ይሰማል። የከፋ ኀዘን መዝገብ፥ የከፋ መከራም ትንቢት ነው። በዚያ «የተተወች» በሚለው ቃል ውስጥ የመከራ ጥልቅ ጕድጓድ ተከፍቶአል። ክብሩን በማለ ሰው መተው! ለረጅም ጊዜ በተፈተነና በታመነ ወዳጅ መተው! በውድ ዘመድ መተው! በአባትና በእናት መተው! በሁሉ መተው! ይህ በእውነት ወዮታ ነው፤ ቢሆንም ጌታ ቢያነሣን በትዕግሥት ሊታገሡት ይቻላል።
በእግዚአብሔር መተው ግን ምን ሊሆን ይሆን? ያን እጅግ መራራ ጩኸት አስቡ፤ «አምላኬ አምላኬ፥ ስለ ምን ተውኸኝ?» በዚያ ትርጕም የ«የተተወች»ን እሬትና ሐሞት በማንኛውም መጠን ቀምሰን እናውቃለን? እንዲህ ከሆነ ከዚህ ሊነገር ከማይችል ኀዘን መደጋገም ሁሉ እንዲያድነን ጌታችንን እንለምነው። እንዲህ ያለ ጨለማ ከቶ እንዳይመለስ ምነው! ሰዎች በክፋት ስለ አንድ ቅዱስ «እግዚአብሔር ትቶታል፤ አሳድዳችሁ ያዙት» አሉ። ነገር ግን ሁልጊዜ ሐሰት ነበር። የጌታ የፍቅር ሞገስ ጨካኞች ጠላቶቻችን የራሳቸውን ቃል እንዲበሉ፥ ወይም ቢያንስ አንደበታቸውን እንዲይዙ ያስገድዳቸዋል።
የዚህ ሁሉ ተቃራኒ ያ እጅግ የላቀው ቃል ሔፍጺባ ነው — «እግዚአብሔር በአንቺ ደስ ብሎታል»። ይህ ልቅሶን ወደ ዘፈን ይለውጣል። የተተዉ መስሎ የታያቸው ጌታ «አልለቅህም ከቶም አልተውህም።» ሲል ይስሙ።
ኦክቶበር 9
መባዎቻችንን የሚቀድሰው ምንድር ነው?
«ካህኑም ከደሙ በእግዚአብሔር ፊት ባለው በጣፋጩ ዕጣን መሠዊያ ቀንዶች ላይ ያኑር» ዘሌዋውያን 4:7
የዕጣን መሠዊያ ቅዱሳን ጸሎታቸውንና ምስጋናቸውን የሚያቀርቡበት ስፍራ ነው፤ በታላቁም መሥዋዕት ደም እንደ ተረጨ ማሰብ ደስ ያሰኛል። አምልኮአችንን ሁሉ በእግዚአብሔር ዘንድ ተቀባይነት እንዲያገኝ የሚያደርገው ይህ ነው፤ የገዛ ልጁን ደም ያያል፤ ስለዚህም ስግደታችንን ይቀበላል።
ስለ ኃጢአት በቀረበው በአንዱ መሥዋዕት ደም ላይ ዓይኖቻችንን ማኖር ለእኛ መልካም ነው። ኃጢአት በቅዱሳት ነገሮቻችን ውስጥ እንኳ ይቀላቀላል፤ የሚያስተሰርየው መሥዋዕት ዋጋ ባይኖር ኖሮ ምርጥ ንስሐችን፥ እምነታችን፥ ጸሎታችንና ምስጋናችን በእግዚአብሔር ዘንድ ተቀባይነት ሊያገኙ ባልቻሉ ነበር። ብዙዎች በ«ደሙ» ያፌዛሉ፤ ለእኛ ግን የመጽናናትና የተስፋ መሠረት ነው። በመሠዊያው ቀንዶች ላይ ያለው ወደ እግዚአብሔር በምንቀርብበት ጊዜ በዓይኖቻችን ፊት ጎልቶ እንዲታይ የታሰበ ነው። ደሙ ለጸሎት ኃይልን ይሰጣል፤ ስለዚህም በመሠዊያው ቀንዶች ላይ ነው። «በእግዚአብሔር ፊት» ነው፤ ስለዚህ በእኛም ፊት ሊሆን ይገባዋል። ዕጣኑን ከማምጣታችን በፊት በመሠዊያው ላይ ነው፤ መባዎቻችንንና ስጦታዎቻችንን ሊቀድስ በዚያ አለ።
እንግዲህ ኑ፥ በእምነት እንጸልይ፤ መሥዋዕቱ ቀርቦአል፥ ዋጋው ተማልዶአል፥ ደሙ በመጋረጃው ውስጥ ነው፤ የአማኞችም ጸሎት በእግዚአብሔር ዘንድ ጣፋጭ መሆን አለበት።
ኦክቶበር 10
የተከፈተ የኅብረት በር
«እነሆ፥ በአንተ ፊት የተከፈተ በር ሰጥቼአለሁ ማንምም ሊዘጋው አይችልም» ራእይ 3:8
ለእግዚአብሔር እውነት ታማኝ ሆነው የሚኖሩ ቅዱሳን በፊታቸው የተከፈተ በር አላቸው። ነፍሴ ሆይ፥ ጌታ በቃሉ በገለጠው ልትኖሪና ልትሞቺ ቈርጠሻል፤ ስለዚህ ይህ የተከፈተ በር በፊትሽ ቆሞአል።
ከእግዚአብሔር ጋር ባለው በተከፈተው የኅብረት በር እገባለሁ። ማን ይከለክለኛል? ኢየሱስ ኃጢአቴን አስወግዶ ጽድቁን ሰጥቶኛል፤ ስለዚህ በነጻነት እገባለሁ። ጌታ ሆይ፥ በጸጋህ እንዲሁ አደርጋለሁ።
ወደ ቃሉ ምሥጢራት የሚያስገባ የተከፈተ በርም በፊቴ አለ። ወደ እግዚአብሔር ጥልቅ ነገሮች ልገባ እችላለሁ። ምርጫ፥ ከክርስቶስ ጋር አንድነት፥ ዳግም ምጽአት — እነዚህ ሁሉ በፊቴ ናቸው፤ ደስም ሊለኝባቸው እችላለሁ። አሁን ምንም ተስፋ፥ ምንም ትምህርት በእኔ ላይ አልተቈለፈም።
በስውር የመቅረብ የተከፈተ በር፥ በግልጥም የጥቅም የተከፈተ በር በፊቴ አለ። እግዚአብሔር ይሰማኛል፤ እግዚአብሔር ይጠቀምብኛል። በላይ ወዳለችው ቤተ ክርስቲያን ወደ ፊት እንድጓዝ፥ በታችም ካሉ ቅዱሳን ጋር ዕለታዊ ኅብረት እንዲኖረኝ በር ተከፍቶልኛል። አንዳንዶች ሊዘጉብኝ ወይም ሊያስወጡኝ ይሞክሩ ይሆናል፤ ሁሉ ግን ከንቱ ነው።
ብዙም ሳይቆይ ወደ ሰማይ የተከፈተ በር አያለሁ፤ የዕንቍው በር መግቢያዬ ይሆናል፤ ከዚያም ወደ ጌታዬና ወደ ንጉሤ እገባለሁ፤ ለዘላለምም ከእግዚአብሔር ጋር ተዘግቼ እኖራለሁ።
ኦክቶበር 11
ለመመላለስ ነጻ
«በእግዚአብሔርም አበረታቸዋለሁ፤ በስሙም ይመላለሳሉ፥ ይላል እግዚአብሔር» ዘካርያስ 10:12
ለታመሙ ቅዱሳን መጽናናት ይህ ነው። ደክመዋል፤ ከጥርጣሬና ከፍርሃት አልጋ ከቶ የማይነሡ መስሎ ይፈራሉ፤ ታላቁ ሐኪም ግን በሽታውን ሊያስወግድ፥ ከእርሱም የመጣውን ድካም ሊያርቅ ይችላል። ደካሞችን ያበረታል። ይህንንም በተሻለው መንገድ ያደርጋል፤ «በእግዚአብሔር» ይሆናልና። ኃይላችን በራሳችን ከሚሆን ይልቅ በእግዚአብሔር ቢሆን እጅግ ይሻላል። በጌታ ሲሆን ኅብረትን ያመጣል፤ በራሳችን ቢሆን ትዕቢትን ይፈጥራል። በራሳችን ቢሆን በሚያሳዝን ሁኔታ ውሱን ይሆን ነበር፤ በእግዚአብሔር ግን ወሰን አያውቅም።
ብርታት ሲሰጠው አማኙ ይጠቀምበታል። በጌታ ስም ወዲያና ወዲህ ይመላለሳል። ከሕመም በኋላ ወደ ውጭ ወጥቶ መመላለስ እንዴት ያለ ደስታ ነው፤ ከድካም ዘመንም በኋላ በጌታ መበርታት እንዴት ያለ ሐሤት ነው! ጌታ ለሕዝቡ ወዲያና ወዲህ የመመላለስን ነጻነት፥ ያንንም ነጻነት የሚጠቀሙበትን የውስጥ ዕረፍት ይሰጣቸዋል። ጨዋዎች ያደርገናል፤ ዕረፍትን የማያውቁና አንዳችም የማያዩ ባሪያዎች አይደለንም፤ በአማኑኤል ምድር ሁሉ በዕረፍት ለመዘዋወር ነጻ ነን እንጂ።
ልቤ ሆይ፥ ና፥ ከእንግዲህ ታማሚና ኀዘንተኛ አትሁን፤ ኢየሱስ እንድትበረታና በቅዱስ ማሰላሰል ከእግዚአብሔር ጋር እንድትመላለስ ያዝዝሃል። የፍቅር ቃሉን ታዘዝ።
ኦክቶበር 12
የጸጋ ኪዳን ምልክት
«አምላክህ እግዚአብሔርም በሕይወት ትኖር ዘንድ አምላክህን እግዚአብሔርን በፍጹም ልብህ በፍጹም ነፍስህም ትወድድ ዘንድ ልብህንና የዘርህን ልብ ይገርዛል» ዘዳግም 30:6
እዚህ ስለ እውነተኛው መገረዝ እናነባለን።
አድራጊውን ልብ በሉ፤ «አምላክህ እግዚአብሔር።» ልባችንን በውጤት ሊይዝና ሥጋዊነቱንና ርኵሰቱን ሊያስወግድ የሚችል እርሱ ብቻ ነው። እግዚአብሔርን በፍጹም ልባችንና በፍጹም ነፍሳችን እንድንወድ ማድረግ ሊሠራው የሚችል መንፈስ ቅዱስ ብቻ የሆነ የጸጋ ተአምር ነው። ለዚህ ወደ ጌታ ብቻ መመልከት አለብን፤ ከዚህም ባነሰ ነገር ፈጽሞ መርካት የለብንም።
ይህ መገረዝ የሚፈጸምበትን ስፍራ ልብ በሉ። የመንፈስ ነው እንጂ የሥጋ አይደለም። የጸጋ ኪዳን ዋና ምልክት ነው። ለእግዚአብሔር ያለ ፍቅር የተመረጠው ዘር የማይፋቅ ምልክት ነው፤ በዚህ በምሥጢር ማኅተም የጸጋ ምርጫ ለአማኙ ይረጋገጥለታል። በምንም የውጭ ሥርዓት እንዳንታመን፥ ነገር ግን በመንፈስ ቅዱስ ሥራ በልባችን እንድንታተም መጠንቀቅ አለብን።
ውጤቱ ምን እንደ ሆነ ልብ በሉ፤ «በሕይወት ትኖር ዘንድ።» ስለ ሥጋ ማሰብ ሞት ነው። ሥጋን በማሸነፍ ሕይወትንና ሰላምን እናገኛለን። ስለ መንፈስ ነገር ብናስብ በሕይወት እንኖራለን። አምላካችን እግዚአብሔር በውስጣዊ ባሕርያችን ላይ የጀመረውን የቸርነት ሥራውን ምነው ቢፈጽም፤ ይኸውም በሙሉና በከፍተኛው ትርጕም ለጌታ እንድንኖር ነው።
ኦክቶበር 13
«ቢ» የሚል ቃልና ሦስት እጥፍ ተስፋ
«በስሜ የተጠሩት ሕዝቤ ሰውነታቸውን አዋርደው ቢጸልዩ፥ ፊቴንም ቢፈልጉ፥ ከክፉ መንገዳቸውም ቢመለሱ፥ በሰማይ ሆኜ እሰማለሁ፥ ኃጢአታቸውንም ይቅር እላለሁ፥ ምድራቸውንም እፈውሳለሁ» 2ኛ ዜና መዋዕል 7:14
በጌታ ስም የተጠራን ብንሆንም፥ የምንስት ወንዶችና ሴቶች ነን። አምላካችን ይቅር ለማለት የተዘጋጀ መሆኑ እንዴት ያለ ምሕረት ነው! ኃጢአት በሠራን ቁጥር ይቅርታን እየፈለግን ወደ አምላካችን የምሕረት ዙፋን እንፍጠን።
ራሳችንን ማዋረድ አለብን። ያን ያህል ፍቅር ከተቀበልን በኋላ ገና መበደላችን ሊያዋርደን አይገባምን? ጌታ ሆይ፥ በፊትህ በአፈር ውስጥ እንሰግዳለን፤ ከባድ ውለታ ቢስነታችንንም እንመሰክራለን። ወዮ፥ የኃጢአት ነውር! እኛ እንደ ተወደድነው ባሉ ሰዎች ላይ ሲሆንማ ሰባት እጥፍ ነውር ነው!
ቀጥሎም ስለ ምሕረት፥ ስለ መንጻት፥ ከኃጢአትም ኃይል ስለ መዳን መጸለይ አለብን። ጌታ ሆይ፥ አሁንም ስማን፤ ጩኸታችንንም አትከልክል።
በዚህ ጸሎት የጌታን ፊት መፈለግ አለብን። ስለ በደላችን ትቶናል፤ እንዲመለስም ልንለምነው ይገባናል። ጌታ ሆይ፥ በልጅህ በኢየሱስ ተመልከተን፥ በባሪያዎችህም ላይ ፈገግ በል።
ከዚህም ጋር እኛ ራሳችን ከክፉ መመለስ አለብን፤ እኛ ከኃጢአት ካልተመለስን እግዚአብሔር ወደ እኛ ሊመለስ አይችልም።
ከዚያም የመስማት፥ የይቅርታና የመፈወስ ሦስት እጥፍ ተስፋ ይመጣል። አባታችን ሆይ፥ ስለ ጌታችን ስለ ኢየሱስ ክርስቶስ እነዚህን አሁኑኑ ስጠን።
ኦክቶበር 14
ፈጽሞ አለማፈር
«ስለዚህ በሰው ፊት ለሚመሰክርልኝ ሁሉ እኔ ደግሞ በሰማያት ባለው በአባቴ ፊት እመሰክርለታለሁ» ማቴዎስ 10:32
የቸርነት ተስፋ! ስለ ጌታዬ መመስከር ለእኔ ታላቅ ደስታ ነው። ስሕተቶቼ ምንም ቢሆኑ በኢየሱስ አላፍርም፤ የመስቀሉንም ትምህርቶች ለመናገር አልፈራም። ጌታ ሆይ፥ ጽድቅህን በልቤ ውስጥ አልሰወርሁም።
ጥቅሱ በፊቴ ያኖረው ተስፋ እንዴት ጣፋጭ ነው! ወዳጆች ይተዋሉ፥ ጠላቶችም ደስ ይላቸዋል፤ ጌታ ግን ባሪያውን አይክድም። ጌታዬ በዚህ እንኳ እንደሚቀበለኝና አዲስ የሞገሱን ምልክት እንደሚሰጠኝ ጥርጥር የለውም። ነገር ግን በታላቁ አብ ፊት የምቆምበት ቀን ይመጣል። ያን ጊዜ ኢየሱስ እንደሚመሰክርልኝ ማሰብ እንዴት ያለ ብፅዕና ነው! እርሱም፥ «ይህ ሰው በእውነት በእኔ ታመነ፤ ስለ ስሜም ለመነቀፍ ፈቃደኛ ነበረ፤ ስለዚህ የእኔ እንደ ሆነ እመሰክርለታለሁ» ይላል። በቅርቡ አንድ ታላቅ ሰው ባላባት ተደረገ፤ ንግሥቲቱም ዕንቍ የተለበጠ ማዕረግ ሰጠችው፤ ይህስ ምንድር ነው? ጌታ ኢየሱስ በሰማያት በመለኮታዊው ግርማ ፊት ቢመሰክርልን ከክብር ሁሉ የሚበልጥ ክብር ይሆናል። ጌታዬን ለመመስከር ፈጽሞ አልፈር። በፈሪነት ዝምታ ፈጽሞ አልጠመድ፤ በልበ ደካማነትም አልደራደር። ሊመሰክርልኝ ተስፋ በሰጠኝ ለመመስከር አፍራለሁን?
ኦክቶበር 15
በመመገብ መጽናት
«ሕያው አብ እንደ ላከኝ እኔም ከአብ የተነሣ ሕያው እንደምሆን፥ እንዲሁ የሚበላኝ ደግሞ ከእኔ የተነሣ ሕያው ይሆናል» ዮሐንስ 6:57
ከእግዚአብሔር ልጅ ጋር ባለን አንድነት ኃይል ሕያዋን ነን። ጌታ ኢየሱስ አምላክና ሰው የሆነ መካከለኛ እንደ መሆኑ በላከው በራሱ ሕያው በሆነው አብ ሕያው ነው፤ እንዲሁም እኛ ሕያዋን ባደረገን በአዳኙ ሕያዋን ነን። የሕይወታችን ምንጭ የሆነው እርሱ ደግሞ መጋቢው ነው። ሕይወት በመመገብ ይጸናል። መንፈሳዊውን ሕይወት በመንፈሳዊ ምግብ መደገፍ አለብን፤ ያም መንፈሳዊ ምግብ ጌታ ኢየሱስ ነው። ሕይወቱ ወይም ሞቱ ወይም ሹመቶቹ ወይም ሥራው ወይም ቃሉ ብቻ አይደለም፤ እነዚህን ሁሉ የያዘው ራሱ ነው እንጂ። ኢየሱስን ራሱን እንመገባለን።
ይህ በጌታ እራት ይገለጥልናል፤ በእውነት የምንደሰትበት ግን ስለ ጌታችን ስናሰላስል፥ የራሳችን በሚያደርግ እምነት ስናምንበት፥ በፍቅር ወደ ውስጣችን ስንቀበለውና በውስጣዊው ሕይወት ኃይል ስንዋሐደው ነው። ኢየሱስን መመገብ ምን እንደ ሆነ እናውቃለን፤ ልንናገረው ወይም ልንጽፈው ግን አንችልም። ከሁሉ የሚበልጠው ጥበብ እርሱን መለማመድና ይህንንም እየጨመርን ማድረግ ነው። አብዝተን እንድንበላ ተለምነናል፤ ኢየሱስ መብላችንና መጠጣችን ሲሆንም እንዲህ ማድረግ ወሰን የሌለው ጥቅም ያስገኝልናል።
ጌታ ሆይ፥ ለአዲሱ ሕይወቴ አስፈላጊ የሆነው ይህ ነገር ደግሞ ታላቁ ደስታው ስለ ሆነ አመሰግንሃለሁ። ስለዚህ በዚህች ሰዓት አንተን እመገባለሁ።
ኦክቶበር 16
ከክርስቶስ ኢየሱስ ጋር አንድ
«እኔ ሕያው ነኝና እናንተ ደግሞ ሕያዋን ትሆናላችሁ» ዮሐንስ 14:19
ኢየሱስ በእርሱ የሚያምኑትን ሰዎች ሕይወት እንደ ራሱ ሕይወት የተረጋገጠ አድርጎታል። ራሱ ሕያው እንደ ሆነ ሁሉ ብልቶቹም ደግሞ ሕያዋን ናቸው። ኢየሱስ ከሙታን ካልተነሣ እንግዲያስ በኃጢአታችን ሙታን ነን፤ እርሱ ግን ስለ ተነሣ አማኞች ሁሉ በእርሱ ተነሥተዋል። ሞቱ መተላለፋችንን አስወግዶአል፤ በሞት ፍርድ ሥር ይዘውን የነበሩትንም እስራት ፈቷል። ትንሣኤው መጽደቃችንን ያረጋግጣል፤ ነጻ ተብለናል፤ ምሕረትም፥ «እግዚአብሔር ኃጢአትህን አርቆልሃል፤ አትሞትም» ትላለች።
ኢየሱስ የሕዝቡን ሕይወት እንደ ራሱ ሕይወት ዘላለማዊ አድርጎታል። ከእርሱ ጋር አንድ ሆነው ሳሉ እርሱ ሕያው እስከ ሆነ ድረስ እንዴት ሊሞቱ ይችላሉ? እርሱ ከእንግዲህ ስለማይሞት ሞትም ከእንግዲህ ስለማይገዛው፥ እነርሱም ደግሞ ወደ አሮጌው ኃጢአታቸው መቃብር ከእንግዲህ አይመለሱም፤ በአዲስ ሕይወት ለጌታ ይኖራሉ እንጂ። አማኝ ሆይ፥ በታላቅ ፈተና ውስጥ ሆነህ አንድ ቀን በጠላት እጅ እንዳትወድቅ ብትፈራ፥ ይህ ያጽናህ። መንፈሳዊ ሕይወትህን ፈጽሞ አታጣም፤ ከክርስቶስ ጋር በእግዚአብሔር ተሰውሮአልና። የጌታህን አለመሞት አትጠራጠርም፤ ስለዚህ ከእርሱ ጋር አንድ ስለ ሆንህ እንድትሞት ይተውሃል ብለህ አታስብ። ለሕይወትህ ማስረጃው የእርሱ ሕይወት ነው፤ በዚያም ላይ ምንም ፍርሃት ሊኖርህ አይችልም፤ ስለዚህ ሕያው በሆነው ጌታህ ዕረፍ።
ኦክቶበር 17
ቅዱስ ፍርሃት
«ትእዛዝን የሚፈራ ዋጋውን ይቀበላል» ምሳሌ 13:13
ለእግዚአብሔር ቃል ያለ ቅዱስ ፍርሃት እጅግ ተዋርዷል። ሰዎች ራሳቸውን ከጌታ ቃል ይልቅ ጠቢባን አድርገው ይቈጥራሉ፤ በእርሱም ላይ ይፈርዳሉ። «እኔ ግን እግዚአብሔርን ስለ ፈራሁ እንዲህ አላደረግሁም።» በመንፈስ የተገለጠውን መጽሐፍ የማይሳሳት አድርገን እንቀበለዋለን፤ ክብራችንንም በመታዘዛችን እናሳያለን። ቃሉን አንደነግጥበትም፤ ነገር ግን የልጅነት ፍርሃት አለን። ትእዛዛቱን ስለምንፈራ ቅጣቶቹን አንፈራም።
ይህ ለትእዛዙ ያለ ቅዱስ ፍርሃት ከትዕቢት ግዴለሽነት እጅግ የሚጣፍጥ የትሕትና ዕረፍትን ያስገኛል። በእንቅስቃሴአችን መሪ ይሆነናል፤ ቍልቍለት ስንወርድ ፍሬን፥ ዳገት ስንወጣ ደግሞ መነቃቂያ ነው። ለትእዛዙ ባለን አክብሮት ከክፉ ተጠብቀንና ወደ ጽድቅ ተመርተን፥ የወይን ጠጅ ምንጭ የሆነ ጸጥ ያለ ሕሊናን፥ ከሙታን እንደ መነሣት የሆነ ከኃላፊነት ነጻ የመሆን ስሜትን፥ በምድር ላይ ሰማይ የሆነ እግዚአብሔርን ደስ እያሰኘን እንደ ሆነ መተማመንን እናገኛለን። ኃጢአተኞች ለጌታ ቃል ባለን ጥልቅ አክብሮት ሊሳለቁ ይችላሉ፤ ይህስ ምንድር ነው? የላይኛው መጠራታችን ሽልማት በቂ መጽናኛ ይሆንልናል። የመታዘዝ ዋጋዎች የፌዘኛውን ፌዝ እንድንንቅ ያደርጉናል።
ኦክቶበር 18
እንባ፥ ከዚያም የደስታ መከር
«በእንባ የሚዘሩ በደስታ ያጭዳሉ» መዝሙር 126:5
የልቅሶ ጊዜያት ለመዝራት ተስማሚ ናቸው፤ መሬቱ እጅግ እንዲደርቅ አንፈልግምና። በቅን ጭንቀት እንባ የራሰ ዘር ቶሎ ይበቅላል። የጸሎት እንባ ጨው ለመልካሙ ዘር ከትል የሚጠብቀውን ጣዕም ይሰጠዋል፤ በታላቅ ትጋት የተነገረ እውነት ሁለት እጥፍ ሕይወት አለው። ስለ ልቅሶአችን መዝራታችንን ከማቆም ይልቅ ወቅቱ እጅግ የተመቸ ስለ ሆነ ጥረታችንን እጥፍ እናድርግ።
ሰማያዊውን ዘራችንን እየሳቅን ልንዘራው አይገባም። ለሌሎች ነፍሳት ያለ ጥልቅ ኀዘንና ግድ መሰኘት ከቅልልነት ይልቅ ለአምላካዊ ትምህርት እጅግ የተገባ አጋር ነው። በቀላል ልብ ወደ ጦርነት ስለ ሄዱ ሰዎች ሰምተናል፤ እነርሱ ግን ተሸነፉ፤ በዚያው ዓይነት ስልት የሚዘሩትም አብዛኛውን ጊዜ እንዲሁ ይሆንባቸዋል።
እንግዲህ ልቤ ሆይ፥ ና፥ በልቅሶህ መዝራትን ቀጥል፤ የደስታ መከር ተስፋ አለህና። ታጭዳለህ። አንተ ራስህ የድካምህን ፍሬ በከፊል ታያለህ። ይህም ደስታን እስኪሰጥህ ድረስ በብዙ መጠን ይመጣልሃል፤ ደሃና የጠወለገ ጥቂትም መከር ይህን ሊያደርግ አይችልም። ዓይኖችህ በብር እንባ ሲፈዙ የወርቁን እህል አስብ። የአሁኑን ድካምና ተስፋ መቍረጥ በደስታ ታገሥ፤ የመከሩ ቀን ሙሉ ዋጋ ይከፍልሃልና።
ኦክቶበር 19
የተመጠነ ተግሣጽ
«በመጠን እቀጣሃለሁ» ኤርምያስ 30:11
ሳይቀጡ መተው ገዳይ ምልክት ይሆን ነበር፤ ጌታ፥ «ከጣዖታት ጋር ተባብሮአል፤ ተዉት» እንዳለ ያረጋግጥ ነበርና። እግዚአብሔር ይህ ፈጽሞ ዕድል ፈንታችን እንዳይሆን ያድርግ! ያልተቋረጠ ብልጽግና ፍርሃትንና መንቀጥቀጥን የሚያመጣ ነገር ነው። እግዚአብሔር በርኅራኄ የሚወዳቸውን ሁሉ ይዘልፋቸዋል ይቀጣቸዋልም፤ ግድ የማይለውን ግን ለእርድ እንደሚዘጋጁ ወይፈኖች ያለ ፍርሃት እንዲወፍሩ ይተዋቸዋል። ሰማያዊ አባታችን በልጆቹ ላይ በትሩን የሚያነሣው በፍቅር ነው።
ነገር ግን እነሆ፥ ቅጣቱ «በመጠን» ነው፤ ፍቅርን ያለ መጠን ይሰጠናል፥ ተግሣጽን ግን «በመጠን።» በአሮጌው ሕግ ሥር ማንም እስራኤላዊ ከ«አንድ ሲጎድል አርባ ግርፋት» በላይ ሊቀበል እንዳልቻለ፥ ይህም በጥንቃቄ መቍጠርንና መከራን መወሰንን እንዳረጋገጠ፥ ከእምነት ቤተ ሰብ የሚጨነቀውም ሁሉ እንዲሁ ነው፤ ግርፋት ሁሉ ይቈጠራል። ተግሣጻችንን የሚወስነው የጥበብ መጠን፥ የርኅራኄ መጠን፥ የፍቅር መጠን ነው። እንዲህ መለኮታዊ በሆነ ውሳኔ ላይ ማመፅ ከእኛ ይራቅ። ጌታ ሆይ፥ መራራውን ጠብታ በጽዋዬ ውስጥ ለመስፈር አጠገቤ ከቆምህ፥ ያንን ጽዋ ከእጅህ በደስታ መቀበልና «ፈቃድህ ትሁን» እያልሁ እንደ መመሪያህ መጠጣት የእኔ ፈንታ ነው።
ኦክቶበር 20
ከኃጢአት ሁሉ
«እርሱ ሕዝቡን ከኃጢአታቸው ያድናቸዋል» ማቴዎስ 1:21
ጌታ ሆይ፥ ከኃጢአቴ አድነኝ። ኢየሱስ በሚለው ስምህ እንዲህ እንድጸልይ ተበረታታሁ። ልማዳቸው በምርኮ እንዳይዘኝ ካለፉት ኃጢአቶቼ አድነኝ። የራሴ ድካሞች ባሪያ እንዳልሆን ከባሕርዬ ኃጢአቶች አድነኝ። ጥላቻዬን እንዳላጣባቸው ሁልጊዜ በዓይኔ ፊት ካሉ ኃጢአቶች አድነኝ። ከስውር ኃጢአቶች፥ ብርሃን በማጣቴ ካላስተዋልኋቸው ኃጢአቶች አድነኝ። ከድንገተኛና ከማይጠበቁ ኃጢአቶች አድነኝ፤ በፈተና ጎርፍ ከእግሬ አልወሰድ። ጌታ ሆይ፥ ከኃጢአት ሁሉ አድነኝ። ማንኛውም በደል አይግዛኝ።
ይህን ልታደርግ የምትችል አንተ ብቻ ነህ። እኔ የራሴን ሰንሰለት ልበጥስ ወይም የራሴን ጠላቶች ልገድል አልችልም። ፈተናን ታውቃለህ፥ ተፈትነሃልና። ኃጢአትን ታውቃለህ፥ ክብደቱን ተሸክመሃልና። በግጭቴ ሰዓት እንዴት እንደምትረዳኝ ታውቃለህ፤ ከመበደል ልታድነኝ፥ ከበደልሁም በኋላ ልታድነኝ ትችላለህ። ይህን እንደምታደርግ በስምህ ራሱ ተሰጥቶአል፤ ዛሬ ትንቢቱን እንዳረጋግጥ እለምንሃለሁ። ለቍጣ ወይም ለትዕቢት ወይም ለተስፋ መቍረጥ ወይም ለማንኛውም የክፋት ዓይነት አልሸነፍ፤ ኢየሱስ የሚለው ስምህ በእኔ አብዝቶ ይከብር ዘንድ ለቅዱስ ሕይወት አድነኝ እንጂ።
ኦክቶበር 21
የእግዚአብሔር የማባዛት ሰንጠረዥ
«ታናሹ ለሺህ፥ ትንሹም ለብርቱ ሕዝብ ይሆናል፤ እኔ እግዚአብሔር በዘመኑ አፋጥነዋለሁ» ኢሳይያስ 60:22
ለጌታ የሚሠሩ ሥራዎች ብዙ ጊዜ በትንሽ መጠን ይጀምራሉ፤ በዚህም አይከፉም። ድካም እምነትን ያስተምራል፥ እግዚአብሔርን ያቀርባል፥ ለስሙም ክብርን ያስገኛል። የመብዛትን ተስፋዎች ውድ አድርጋችሁ ያዙ! የሰናፍጭ ቅንጣት ከዘር ሁሉ ታንሳለች፤ ነገር ግን የሰማይ ወፎች በቅርንጫፎችዋ የሚሰፍሩባት ዛፍ የምትመስል ተክል ትሆናለች። በአንድ፥ ያውም «በታናሹ» ልንጀምር እንችላለን፤ ቢሆንም «ለሺህ ይሆናል።» ጌታ በማባዛት ሰንጠረዥ ታላቅ ነው። ብቻውን ለነበረው ባሪያው፥ «አበዛሃለሁ!» ስንት ጊዜ አለው! እናንተ አንድና ሁለት የሆናችሁ፥ በጌታ ታመኑ፤ በስሙ ብትሰበሰቡ በመካከላችሁ ይሆናልና።
«ትንሹ።» ራስ በሚቈጥሩና ኃይል በሚመዝኑ ሰዎች ዓይን ከዚህ የበለጠ የተናቀ ምን ሊሆን ይችላል! ቢሆንም ይህ የታላቅ ሕዝብ አስኳል ነው። በማታ መጀመሪያ የሚያበራው አንድ ኮከብ ብቻ ነው፤ ብዙም ሳይቆይ ግን ሰማዩ ቍጥር በሌላቸው ብርሃናት ይሞላል።
የመብዛቱም ተስፋ ሩቅ ነው ብለን ማሰብ አያስፈልገንም፤ ተስፋው፥ «እኔ እግዚአብሔር በዘመኑ አፋጥነዋለሁ» ይላልና። በስሜት በተቀሰቀሱ ስብሰባዎች እንደምናየው ያለ ያለ ጊዜው የሆነ ችኮላ አይኖርም፤ ሁሉ በጊዜው ይሆናል፤ ነገር ግን መዘግየት አይኖርም። ጌታ ሲያፋጥን ፍጥነቱ ክቡር ነው።
ኦክቶበር 22
የራሱን ተስፋ አቅርበህ ለምን
«ጌታ እግዚአብሔር ሆይ፥ አንተ ተናግረሃልና፤ በበረከትህም የባሪያህ ቤት ለዘላለም ይባረክ» 2ኛ ሳሙኤል 7:29
ይህ በልመና የቀረበ ተስፋ ነው፤ ስለዚህም እጥፍ ትምህርት ይሰጠናል። ጌታ እግዚአብሔር የተናገረውን ማንኛውንም ነገር በእርግጥ እውነት አድርገን ልንቀበለው፥ ከዚያም በዙፋኑ ፊት ልናቀርበው ይገባናል።
ወዮ፥ የገዛ አምላካችን የተናገረውን መጥቀስ እንዴት ጣፋጭ ነው! ዳዊት በዚህ ቍጥር እንዳደረገው፥ ተስፋው የሚያመለክተውን «ስለዚህ» መጠቀም እንዴት ውድ ነው!
የምንጸልየው ስለምንጠራጠር ሳይሆን ስለምናምን ነው። ባለማመን መጸለይ ለጌታ ልጆች አይገባም። አይደለም፥ ጌታ ሆይ፥ ልንጠራጠርህ አንችልም፤ እያንዳንዱ ቃልህ ለደፋሩ ተስፋ እንኳ የጸና መሠረት እንደ ሆነ ተረድተናል። ወደ አንተ መጥተን፥ «እንደ ተናገርህ አድርግ» እንላለን። የባሪያዎችህን ቤት ባርክ። ሕመምተኞቻችንን ፈውስ፤ የሚያመነቱትን አድን፤ የሚቅበዘበዙትን መልስ፤ በፍርሃትህ የሚኖሩትን አጽና። ጌታ ሆይ፥ እንደ ቃልህ ምግብና ልብስ ስጠን። ሥራዎቻችንን አከናውን፤ በተለይም ወንጌልህን በአካባቢያችን ለማሳወቅ የምናደርገውን ጥረት አቅና። አገልጋዮቻችንን አገልጋዮችህ፥ ልጆቻችንንም ልጆችህ አድርግ። በረከቱ ወደሚመጡት ትውልዶች ይፍሰስ፤ ከዘራችንም ማንም በምድር እስካለ ድረስ ለአንተ የታመኑ ሆነው ይኑሩ። ጌታ እግዚአብሔር ሆይ፥ «የባሪያህ ቤት ይባረክ።»
ኦክቶበር 23
የብርሃንና የደስታ መከር
«ብርሃን ለጻድቅ፥ ደስታም ለልበ ቅኖች ተዘራ» መዝሙር 97:11
በማንኛውም ዋጋ ጽድቅን ለሚጠብቅ ሰው ጽድቅ ብዙ ጊዜ ውድ ነው፤ በመጨረሻ ግን የራሱን ወጪ ይሸፍናል፥ ወሰን የሌለውንም ትርፍ ይመልሳል። ቅዱስ ሕይወት ዘር እንደ መዝራት ነው፤ ብዙ ይወጣል፥ በአፈርም ውስጥ የተቀበረ ይመስላል፥ ዳግመኛም የማይሰበሰብ ይመስላል። ፈጣን መከር ስንጠብቅ እንሳሳታለን፤ ስሕተቱ ግን እጅግ የሚያስገርም አይደለም፤ ብርሃንን መቅበር የማይቻል ይመስላልና። ቢሆንም ጥቅሱ ብርሃን «ተዘራ» ይላል። ተሰውሮ ይተኛል፤ ማንም ሊያየው አይችልም፤ ተዘርቶአልና። አንድ ቀን ራሱን መግለጡ እንደማይቀር ፈጽመን እርግጠኞች ነን።
ጌታ ለብርሃን ዘሪዎች መከርን እንደ ወሰነላቸው፥ እያንዳንዳቸውም ለራሳቸው እንደሚያጭዱት ፈጽመን እርግጠኞች ነን። ያን ጊዜ ደስታቸው ይመጣል። ስለ ብርሃን ዘር የደስታ ነዶ። ሰዎች ባያመሰግኑአቸውም፥ ይልቁንም ቢነቅፉአቸውም፥ ልባቸው በጌታ ፊት ቅን ነበረ፤ በዙሪያቸው ያሉት ነቃፊዎች ብለው ቢያወግዙአቸውም ጻድቃን ነበሩ። ገበሬዎች የከበረውን የምድር ፍሬ እንደሚጠብቁ መጠበቅ ነበረባቸው፤ ብርሃኑ ግን ተዘርቶላቸው ነበር፤ ደስታም በመከሩ ጌታ ይዘጋጅላቸው ነበር።
ወንድሞች ሆይ፥ አይዞአችሁ! መቸኰል አያስፈልገንም። በትዕግሥት ነፍሳችንን እንያዝ፤ ብዙም ሳይቆይ ነፍሳችን ብርሃንንና ደስታን ትወርሳለችና።
ኦክቶበር 24
አምላካዊ ጽናት
«ለዚህም ሕዝብ እንደ ተመሸገ የናስ ቅጥር አደርግሃለሁ፤ ይዋጉሃል፥ ነገር ግን አያሸንፉህም፤ አድንህና እታደግህ ዘንድ እኔ ከአንተ ጋር ነኝና፥ ይላል እግዚአብሔር» ኤርምያስ 15:20
በእግዚአብሔር ፍርሃትና እምነት መጽናት ሰውን ማንም ሊያፈርሰው ወይም ሊሰብረው እንደማይችል የናስ ቅጥር ያደርገዋል። እንደዚህ ያሉትን ሊሠራ የሚችል ጌታ ብቻ ነው፤ እንደዚህ ያሉ ሰዎች ግን በቤተ ክርስቲያን፥ በዓለምም፥ በተለይም በመስበኪያ መድረክ ያስፈልጉናል።
ይህ የአስመሳይነት ዘመን የማይደራደሩትን የእውነት ሰዎች በሙሉ ኃይሉ ይዋጋቸዋል። እንደ ቁርጥ ውሳኔ ሰይጣንንና ዘሩን የሚያስቈጣ ነገር ያለ አይመስልም። አሦራውያን የተመሸጉትን ከተሞች እንደ ከበቡ ቅዱስ ጽናትን ያጠቃሉ። ደስታው እግዚአብሔር በብርታቱ ያበረታቸውን ሊያሸንፉ አለመቻላቸው ነው። ሌሎች በትምህርት ነፋስ ሁሉ ወዲያና ወዲህ የሚወሰዱ ናቸው፤ እፍ ቢባልባቸው ብቻ ይበቃል፥ ይሄዳሉም፤ የጸጋን ትምህርቶች የሚወድዱ ግን፥ የትምህርቶቹ ጸጋ ስላላቸው፥ በሚናወጥ ባሕር መካከል እንደ ዓለት ይቆማሉ።
ይህ ጽናት ከወዴት ነው? «እኔ ከአንተ ጋር ነኝ፥ ይላል እግዚአብሔር»፤ እውነተኛው መልስ ይህ ነው። እግዚአብሔር የታመኑ ነፍሳትን ከባላጋራው ጥቃት ሁሉ ያድናቸዋል ይታደጋቸዋልም። ሠራዊት በእኛ ላይ ነው፤ የሠራዊት ጌታ ግን ከእኛ ጋር ነው። አንዲት ስንዝር እንኳ ለመነቃነቅ አንደፍርም፤ ጌታ ራሱ በስፍራችን ይዞናልና፤ በዚያም ለዘላለም እንኖራለን።
ኦክቶበር 25
እግዚአብሔር በመጀመሪያ፥ ከዚያም ጭማሪዎች
«ነገር ግን አስቀድማችሁ የእግዚአብሔርን መንግሥት ጽድቁንም ፈልጉ፥ ይህም ሁሉ ይጨመርላችኋል» ማቴዎስ 6:33
መጽሐፍ ቅዱስ እንዴት እንደሚጀምር እዩ፤ «በመጀመሪያ እግዚአብሔር።» ሕይወታችሁም እንዲሁ ይጀምር። በፍጹም ነፍሳችሁ ከሁሉ በፊትና አስቀድማችሁ የዜግነታችሁ ስፍራ የሆነውን የእግዚአብሔርን መንግሥት፥ የሕይወታችሁም ባሕርይ የሆነውን ጽድቁን ፈልጉ። የቀረው ግን ሳትጨነቁበት ከጌታ ራሱ ይመጣል። ለዚህ ሕይወትና ለአምላካዊ ኑሮ የሚያስፈልገው ሁሉ «ይጨመርላችኋል።»
ይህ እንዴት ያለ ተስፋ ነው! እርሱን ስትፈልጉ ምግብን፥ ልብስን፥ ቤትንና የመሳሰሉትን ሊጨምርላችሁ እግዚአብሔር ኃላፊነት ይወስዳል። እናንተ ጉዳዩን ያዙ፤ እርሱም ጉዳያችሁን ይይዛል። ወረቀትና ገመድ ብትፈልጉ፥ ይበልጥ አስፈላጊ የሆኑ ዕቃዎችን ስትገዙ በነጻ ይሰጣችኋል፤ እንዲሁ የሚያስፈልገንን ምድራዊ ነገር ሁሉ ከመንግሥቱ ጋር በጭማሪ እንቀበለዋለን። የመዳን ወራሽ የሆነ በረኃብ አይሞትም፤ ነፍሱንም በእግዚአብሔር ጽድቅ የሚያለብስ በጌታ ዘንድ ራቁቱን ሰውነቱ አይተውም። የሚያስጨንቅ ጭንቀት ይወገድ። አሳባችሁን ሁሉ ጌታን በመፈለግ ላይ አኑሩ። መጎምጀት ድህነት ነው፥ መጨነቅም ጕስቍልና ነው፤ በእግዚአብሔር መታመን ርስት ነው፥ እግዚአብሔርንም መምሰል ሰማያዊ ውርስ ነው። ጌታ ሆይ፥ እፈልግሃለሁ፤ ተገኝልኝ።
ኦክቶበር 26
ስለ እኛ
«እነዚያ ቀኖች ስለ ተመረጡት ሰዎች ያጥራሉ» ማቴዎስ 24:22
ጌታ ስለ ተመረጡት ብዙ ፍርዶችን ይከለክላል፥ ሌሎችንም ያሳጥራል። በታላቅ መከራ ውስጥ ጌታ ለተመረጡቱ ብሎ ነበልባሉን ባያበርደው እሳቱ ሁሉን ይበላ ነበር። እንዲሁም ምርጦቹን ስለ ኢየሱስ ሲያድን፥ የሰውንም ዘር ስለ ምርጦቹ ይጠብቃል።
በቅዱሳን ላይ እንዲህ የሚደረገው ክብር እንዴት ያለ ነው! በጌታቸው ዘንድ ያላቸውን ተሰሚነት እንዴት በትጋት ሊጠቀሙበት ይገባቸዋል! ስለ ኃጢአተኞች የሚጸልዩትን ጸሎት ይሰማል፥ ለመዳናቸውም የሚያደርጉትን ጥረት ይባርካል። በአለማመን ላሉት በረከት እንዲሆኑ አማኞችን ይባርካል። ብዙ ኃጢአተኛ ጌታ የሚያከብራት እናት ወይም ሚስት ወይም ሴት ልጅ በምትጸልየው ጸሎት ምክንያት በሕይወት ይኖራል።
ጌታ የሰጠንን ልዩ ኃይል በትክክል ተጠቅመንበታልን? ስለ አገራችን፥ ስለ ሌሎች አገሮችና ስለ ዘመኑ እንጸልያለንን? በጦርነት፥ በራብና በቸነፈር ጊዜ ቀኖቹ እንዲያጥሩ እየለመንን እንደ አማላጆች እንቆማለንን? የክህደትን፥ የስሕተትንና የመረን ልቅነትን መገንፈል በእግዚአብሔር ፊት እናለቅሳለንን? ጌታችን ኢየሱስ የራሱን የክብር መገለጥ በማፋጠን የኃጢአትን ግዛት እንዲያሳጥር እንለምነዋለንን? እንበርከክ፤ ክርስቶስም እስኪገለጥ ድረስ ፈጽሞ አናርፍ።
ኦክቶበር 27
አገልግሎቱ፥ ፊቱ፥ ስሙ
«ባሪያዎቹም ያመልኩታል፥ ፊቱንም ያያሉ፥ ስሙም በግምባሮቻቸው ይሆናል» ራእይ 22:3, 4
በክብር ምድር ሦስት የተመረጡ በረከቶች የእኛ ይሆናሉ።
«ባሪያዎቹም ያመልኩታል።» ሌሎች ጌቶች አይጨቁኑንም፤ ሌላ አገልግሎትም አያስጨንቀንም። ኢየሱስን ሁልጊዜ፥ በፍጹምነት፥ ሳንደክምና ሳንሳሳት እናገለግለዋለን። ይህ ለቅዱስ ሰማይ ነው፤ በሁሉ ነገር ጌታን ክርስቶስን ማገልገልና በእርሱ እንደ ባሪያው መታወቅ የነፍሳችን የዘላለም ከፍ ያለ ምኞት ነው።
«ፊቱንም ያያሉ።» ይህ አገልግሎቱን ደስ የሚያሰኝ ያደርገዋል፤ በእርግጥም የአገልግሎት የአሁኑ ዋጋ ነው። ጌታችንን እናውቀዋለን፤ እርሱ እንዳለ እናየዋለንና። የኢየሱስን ፊት ማየት ከጌታ ባሪያዎች እጅግ የታመነው ሊለምነው የሚችለው ከሁሉ የላቀ ሞገስ ነው። ሙሴ፥ «ፊትህን አሳየኝ» ከማለት ሌላ ምን ሊለምን ይችል ነበር?
«ስሙም በግምባሮቻቸው ይሆናል።» ስሙ በግምባራቸው ላይ እስኪታተም ድረስ ጌታቸውን ትኵር ብለው ያያሉ። በእርሱ ይታወቃሉ፥ እነርሱም ያውቁታል። የውስጣዊ ጸጋ ስውር ምልክት የተመሰከረ ዝምድና ወደሚያሳይ ግልጥ ፊርማ ያድጋል።
ጌታ ሆይ፥ በራስህ የብፅዕና መኖሪያ በሙላታቸው እንድንወርሳቸው፥ እነዚህን ሦስት ነገሮች በመጀመሪያቸው በዚህ ስጠን!
ኦክቶበር 28
ባለማወቅ የሚሠሩ ኃጢአቶች
«ይቅርም ይባልላቸዋል፤ ባለማወቅ ነበረና» ዘኍልቍ 15:25
ባለማወቃችን ምክንያት ባለማወቅ የምንሠራቸውን ኃጢአቶች ፈጽመን አናውቅም። ቢሆንም በመሥራትም ባለመሥራትም መልክ ብዙ እንደ ሆኑ እርግጠኞች ልንሆን እንችላለን። እግዚአብሔር ፈጽሞ ያላዘዘውንና ፈጽሞ ሊቀበለው የማይችለውን ነገር በፍጹም ቅንነት እንደ እግዚአብሔር አገልግሎት እያደረግን ሊሆን ይችላል።
ጌታ እነዚህን ባለማወቅ የሚሠሩትን ኃጢአቶች አንድ በአንድ ያውቃቸዋል። በፍትሕ እነዚህን በደሎች ከእጃችን ስለሚሻ ይህ ሊያስደነግጠን ይችላል፤ በሌላ በኩል ግን እምነት በዚህ እውነት ውስጥ መጽናናትን ታያለች፤ ጌታ እኛ ያላየናቸው እድፎች ደግሞ እንዲታጠቡ ያደርጋልና። ኃጢአቱን ወደ ኋላው በመጣል ማየቱን ያቆም ዘንድ ያየዋል።
ታላቁ መጽናናታችን እውነተኛው ካህን ኢየሱስ ለእስራኤል ልጆች ማኅበር ሁሉ ማስተስረያ ማድረጉ ነው። ያ ማስተስረያ የማይታወቁ ኃጢአቶችን ይቅርታ ያረጋግጣል። የከበረ ደሙ ከኃጢአት ሁሉ ያነጻናል። ዓይኖቻችን ቢያዩትና ቢያለቅሱበትም ባያዩትም፥ እግዚአብሔር አይቶታል፥ ክርስቶስ አስተስርዮለታል፥ መንፈስም ስለ ይቅርታው ይመሰክራል፤ እንዲሁም ሦስት እጥፍ ሰላም አለን።
አባቴ ሆይ፥ በደሌን የሚያይ ብቻ ሳይሆን፥ በደለኛ መሆኔን ገና ሳላውቅ እንኳ ከበደሌ የሚያድነኝን ማስተስረያ የሚያዘጋጅ መለኮታዊ እውቀትህን አመሰግናለሁ።
ኦክቶበር 29
ልዩነቱን ጠብቅ
«በሕዝቤና በሕዝብህ መካከል ልዩነት አደርጋለሁ፤ ይህ ምልክት ነገ ይሆናል» ዘጸአት 8:23
ፈርዖን ሕዝብ አለው፥ ጌታም ሕዝብ አለው። እነዚህ በአንድነት ሊኖሩና አንድ ዓይነት ኑሮ የሚኖሩ ሊመስሉ ይችላሉ፤ ነገር ግን በመካከላቸው ልዩነት አለ፤ ጌታም ይገልጠዋል። አንድ ዓይነት ዕድል ለሁሉ ለዘላለም አይደርስም፤ በዓለም ሰዎችና እግዚአብሔር በመረጣቸው ሕዝብ መካከል ታላቅ ልዩነት ይሆናል እንጂ።
ይህ ጌታ ለቅዱሳኑ መቅደስ በሚሆንበት በፍርድ ዘመን ሊሆን ይችላል። ኃጢአታቸው ሲወገድ፥ የማያምኑ ግን በፍርድ ሥር ሲቀሩ፥ በአማኞች መመለስ እጅግ ግልጥ ሆኖ ይታያል። ከዚያች ቅጽበት ጀምሮ የተለየ ዘር ይሆናሉ፥ በአዲስ ሥርዓት ሥር ይገባሉ፥ በአዲስ በረከቶችም ይደሰታሉ። ከእንግዲህ ወዲህ ቤቶቻቸው ግብፃውያንን ከሚያረክሱና ከሚያሠቃዩ ከከባድ የክፋት መንጋዎች ነጻ ናቸው። ብዙ ቤተ ሰቦችን ከሚበሉ ከምኞት ርኵሰት፥ ከጭንቀት ንክሻ፥ ከሐሰት ብልሹነትና ከጥላቻ ጨካኝ ሥቃይ ይጠበቃሉ።
የተፈተንህ አማኝ ሆይ፥ ምንም እንኳ መከራዎች ቢኖሩብህ የዓለምን አለቃ አገልጋዮች ቤቶችና ልቦች ከሚወርሩ ከከፉ መከራዎች መንጋ እንደ ዳንህ እርግጠኛ ሁን። ጌታ ልዩነትን አድርጎአል፤ ልዩነቱን በመንፈስ፥ በዓላማ፥ በባሕርይና በባልንጀርነት እንድትጠብቅ ተጠንቀቅ።
ኦክቶበር 30
ፍጹም መንጻት
«ጥሩ ውኃንም እረጭባችኋለሁ፥ እናንተም ትነጻላችሁ፤ ከርኵሰታችሁ ሁሉ ከጣዖቶቻችሁም ሁሉ አነጻችኋለሁ» ሕዝቅኤል 36:25
ይህ እንዴት ያለ እጅግ ታላቅ ደስታ ነው! በኢየሱስ ደም ያነጻን እርሱ በመንፈስ ቅዱስ ውኃ ደግሞ ያጥበናል። እግዚአብሔር ተናግሮአል፤ ስለዚህ፥ «ትነጻላችሁ» መሆን አለበት። ጌታ ሆይ፥ ርኵሰታችን ይሰማናል፥ እናለቅስበትማለን፤ እንደምንነጻም በገዛ አፍህ መረጋገጡ ደስ ያሰኛል። ወዮ፥ ፈጥነህ ብትፈጽመው ምንኛ መልካም ነበር!
ከከፉ ኃጢአቶቻችን ያድነናል። የአለማመን መነሣሣት፥ ነፍስን የሚዋጉ አታላይ ምኞቶች፥ የትዕቢት ርኩስ አሳቦች፥ ቅዱሱን ስም እንድንሰድብ የሰይጣን ማሳሳቻዎች — እነዚህ ሁሉ ዳግመኛ እንዳይመለሱ ሆነው ይጠራሉ።
ደግሞም ከወርቅም ይሁን ከሸክላ ከጣዖቶቻችን ሁሉ ያነጻናል፤ ከርኩስ ፍቅራችንና በራሱ ንጹሕ ለሆነው ነገር ካለን ከልክ ያለፈ ፍቅር። ጣዖት ያደረግነው ነገር ከእኛ ይሰበራል፥ ወይም እኛ ከእርሱ ተሰብረን እንለያለን።
እርሱ ራሱ ስለሚያደርገው የሚናገር እግዚአብሔር ነው። ስለዚህ ይህ ቃል የጸናና የተረጋገጠ ነው፤ የሚያረጋግጥልንንም በድፍረት ልንጠብቅ እንችላለን። መንጻት የኪዳን በረከት ነው፤ ኪዳኑም በሁሉ የተዘጋጀና የጸና ነው።
ኦክቶበር 31
ሥራው እስኪፈጸም ድረስ የማይሞት
«አልሞትም፥ በሕይወት እኖራለሁ እንጂ፥ የእግዚአብሔርንም ሥራ እናገራለሁ» መዝሙር 118:17
ይህ መልካም ማረጋገጫ ነው! መዝሙረኛው በልቡ ውስጥ በሹክሹክታ በተነገረው ተስፋ ላይ እንደ ተመሠረተ ጥርጥር የለውም፤ ያዘውም ተደሰተበትም። የእኔ ሁኔታ እንደ ዳዊት ነውን? ጠላት ስለሚሰድበኝ አዝኛለሁን? ብዙዎች በእኔ ላይ ተነሥተው በእኔ በኩል ጥቂቶች አሉን? አለማመን ተሸንፌና ተዋርጄ ተኝቼ በተስፋ መቍረጥ እንድሞት ይነግረኛልን? ጠላቶቼስ መቃብሬን መቈፈር ጀምረዋልን?
እንግዲያስ ምን ይሁን? ለፍርሃት ሹክሹክታ ተሸንፌ ሰልፉን፥ ከእርሱም ጋር ተስፋዬን ሁሉ ልተውን? ይህ ይራቅ። ገና በውስጤ ሕይወት አለ፤ «አልሞትም።» ብርታት ይመለሳል፥ ድካሜንም ያስወግዳል፤ «በሕይወት እኖራለሁ።» ጌታ ሕያው ነው፥ እኔም ደግሞ በሕይወት እኖራለሁ። አፌ እንደ ገና ይከፈታል፤ «የእግዚአብሔርን ሥራ እናገራለሁ።» አዎን፥ የአሁኑንም መከራ የጌታ አምላኬ ድንቅ የሚሠራ ታማኝነትና ፍቅር ሌላ ምሳሌ አድርጌ እናገራለሁ። ለሬሳ ሳጥኔ ሊለኩኝ የሚወድዱ ጥቂት ቢጠብቁ ይሻላቸዋል፤ «እግዚአብሔር እጅግ ቀጣኝ፥ ለሞት ግን አልሰጠኝም»። ለስሙ ለዘላለም ክብር ይሁን! ሥራዬ እስኪፈጸም ድረስ አልሞትም። ጌታ እስኪፈቅድ ድረስ ምንም መቃብር ሊዘጋብኝ አይችልም።