የእምነት ባንክ የቼክ ደብተር
የኖቬምበር ወር

ምዕራፍ 12 · 22 ደቂቃ ንባብ · 29 ደቂቃ ማዳመጥ

የኖቬምበር ወር

ኖቬምበር 1

ፍጽምናና ጥበቃ

«የሚጠራችሁ የታመነ ነው፥ እርሱም ደግሞ ያደርገዋል» 1ኛ ተሰሎንቄ 5:24

ምን ያደርጋል? ፈጽሞ ይቀድሰናል። ከዚህ በፊት ያለውን ቁጥር ተመልከት። በሁሉም ክፍላችን ፍጹማን እስክንሆን ድረስ የመንጻትን ሥራ ይቀጥላል። «መንፈሳችንንም ነፍሳችንንም ሥጋችንንም ጌታችን ኢየሱስ ክርስቶስ በመጣ ጊዜ ያለ ነቀፋ ፈጽሞ» ይጠብቃል። ከጸጋ እንድንወድቅ ወይም በኃጢአት ግዛት ሥር እንድንሆን አይፈቅድም። እነዚህ እንዴት ያሉ ታላላቅ ሞገሶች ናቸው! እንዲህ ያሉ የማይነገሩ ስጦታዎችን ሰጪ ብናመልከው ተገቢ ነው።

ይህን ማን ያደርጋል? ከጨለማ ወደሚደነቅ ብርሃኑ፥ በኃጢአት ከመሞትም በክርስቶስ ኢየሱስ ወዳለው የዘላለም ሕይወት የጠራን ጌታ ነው። ይህን ሊያደርግ የሚችል እርሱ ብቻ ነው፤ እንዲህ ያለ ፍጽምናና ጥበቃ ሊመጣ የሚችለው ከጸጋ ሁሉ አምላክ ብቻ ነው።

ለምን ያደርገዋል? «የታመነ» ስለ ሆነ ነው — አማኙን ለማዳን ለተሰጠው ለራሱ ተስፋ የታመነ፤ ሕዝቡ ያለ ነውር በፊቱ መቅረባቸው ዋጋው ለሆነው ለልጁ የታመነ፤ በሚሠራ ጥሪያችን በውስጣችን ለጀመረው ሥራ የታመነ። ቅዱሳን የሚደገፉት በራሳቸው ታማኝነት ሳይሆን በጌታ በራሱ ታማኝነት ነው።

ነፍሴ ሆይ፥ ነዪ፤ ይህን የደበዘዘ ወር የምንጀምርበት ታላቅ ግብዣ ይኸውልሽ። በውጭ ጭጋግ ሊኖር ይችላል፤ በውስጥ ግን የፀሐይ ብርሃን ሊኖር ይገባል።

ኖቬምበር 2

ሰማያዊ ሀብት

«በቅንነት ከሚሄዱ መልካምን ነገር አይከለክልም» መዝሙር 84:11

ጌታ ደስ የሚያሰኙ ብዙ ነገሮችን ሊከለክል ይችላል፤ «መልካምን ነገር» ግን አይከለክልም። ለእኛ የሚበጀንን ከሁሉ የተሻለ የሚያውቅ ፈራጅ እርሱ ነው። አንዳንድ ነገሮች በእርግጥ መልካም ናቸው፤ እነዚህንም በጌታችን በኢየሱስ ክርስቶስ በኩል በመለመን ብቻ ልናገኛቸው እንችላለን።

ቅድስና መልካም ነገር ነው፤ ይህንም በነጻ በውስጣችን ይሠራል። በክፉ ዝንባሌዎች፥ በኃይለኛ ቍጣና በክፉ ልማዶች ላይ ድልን በደስታ ይሰጣል፤ እኛም ያለ እርሱ ልንቀር አይገባንም።

ፍጹም መተማመንን ይሰጣል፤ ከራሱም ጋር የቀረበ ኅብረትን፥ ወደ እውነትም ሁሉ መግባትን፥ በምሕረት ዙፋን ፊትም የሚያሸንፍ ድፍረትን ይሰጣል። እነዚህ ከሌሉን ምክንያቱ ለመቀበል የእምነት ጕድለት እንጂ እግዚአብሔር ለመስጠት አለመፈለጉ አይደለም። ጸጥታ፥ ሰማያዊ መንፈስ፥ ታላቅ ትዕግሥትና የጋለ ፍቅር — እነዚህን ሁሉ ለቅዱስ ትጋት ይሰጣል።

ነገር ግን «በቅንነት» መሄድ እንዳለብን በሚገባ አስተውሉ። የተጣመመ ዓላማና ጠማማ ግብይት አይኑር፤ ግብዝነትም ተንኰልም አይኑር። በርኵሰት ብንመላለስ እግዚአብሔር ሞገሱን ሊሰጠን አይችልም፤ ይህ ለኃጢአት ሽልማት መስጠት ይሆናልና። የቅንነት መንገድ የሰማያዊ ሀብት መንገድ ነው — ሀብቱም መልካሙን ነገር ሁሉ እስኪያጠቃልል ድረስ እጅግ ሰፊ ነው።

በጸሎት የምንማጸንበት እንዴት ያለ ተስፋ ነው! እንግዲያስ እንንበርከክ።

ኖቬምበር 3

በእግዚአብሔር ጊዜ

«ራእዩ ገና ለተወሰነው ጊዜ ነውና፥ በመጨረሻውም ይናገራል፥ አይዋሽምም፤ ቢዘገይም ጠብቀው፤ በእርግጥ ይመጣልና፥ አይዘገይም» ዕንባቆም 2:3

ምሕረት የዘገየች ልትመስል ትችላለች፤ የተረጋገጠች ግን ናት። ጌታ በማይሳሳት ጥበቡ የቸርነት ኃይሉ የሚገለጥበትን ጊዜ ወስኗል፤ የእግዚአብሔርም ጊዜ ከሁሉ የተሻለ ጊዜ ነው። እኛ እንቸኩላለን፤ የበረከቱ ራእይ ምኞታችንን ያነሣሣል፥ ናፍቆታችንንም ያፋጥናል፤ ጌታ ግን ቀጠሮውን ይጠብቃል። ከጊዜው ፈጽሞ አይቀድምም፤ ከጊዜውም ፈጽሞ አይዘገይም።

የእግዚአብሔር ቃል በዚህ ስፍራ እንደሚናገርና እንደሚመጣ ሕያው ነገር ተደርጎ ተነግሯል። መፈጸሙን ለረጅም ጊዜ ስንጠባበቅ እንድንፈራ እንደምንፈተነው የሞተ ፊደል ፈጽሞ አይደለም። ሕያው ቃሉ ከሕያው እግዚአብሔር ዘንድ በመንገድ ላይ ነው፤ የሚዘገይ ቢመስልም በእውነቱ አይዘገይም። የእግዚአብሔር ባቡር ከሰዓቱ አይዘገይም። ጉዳዩ የትዕግሥት ብቻ ነው፤ የጌታንም ታማኝነት በቅርቡ በገዛ ዓይናችን እናያለን። ከተስፋዎቹ አንዱም አይወድቅም፤ «አይዋሽም»። ከተስፋዎቹ አንዱም በዝምታ አይጠፋም፤ «ይናገራል»። ለሚያምን ጆሮ ምንኛ መጽናናትን ይናገራል! ከተስፋዎቹ አንዱም በሚከፈልበት ቀን መከፈል እንዳልቻለ ሐዋላ መታደስ አያስፈልገውም — «አይዘገይም»።

ነፍሴ ሆይ፥ ነዪ፤ አምላክሽን መጠበቅ አትችዪምን? በእርሱ ዕረፊ፤ በማይነገርም ሰላም ጸጥ በዪ።

ኖቬምበር 4

ጕድጓዶቹን አዘጋጁ

«እርሱም አለ። እግዚአብሔር እንዲህ ይላል። ይህን ሸለቆ ጕድጓድ በጕድጓድ አድርጉት። እግዚአብሔር እንዲህ ይላልና። ነፋስ አታዩም፥ ዝናብም አታዩም፤ ነገር ግን እናንተና ከብቶቻችሁ እንስሶቻችሁም ትጠጡ ዘንድ ይህ ሸለቆ ውኃ ይሞላል» 2ኛ ነገሥት 3:16, 17

ሦስት ሠራዊቶች በጥም እየጠፉ ነበር፤ ጌታም ጣልቃ ገባ። ደመናም ዝናብም ባይልክ ብዙ ውኃ አቀረበ። በተለመዱ መንገዶች ላይ የተመሠረተ አይደለም፤ ነገር ግን ሕዝቡን በአዳዲስ የጥበብና የኃይል ሥራዎች ሊያስደንቅ ይችላል። በዚህም የተለመዱ ሂደቶች ሊገልጡ ከሚችሉት በላይ እግዚአብሔርን እንድናይ እንደረጋለን። ጌታ እንደምንጠብቀው፥ እንደምንመኘው ወይም እንደምናስበው ስለ እኛ ባይገለጥም፥ በአንድም በሌላም መንገድ ያዘጋጅልናል። ወደ ታላቁ የመጀመሪያ ምክንያት ፊት እንድንመለከት ወደ ሁለተኛ ደረጃ ምክንያቶች ከመመልከት ከፍ ማለታችን ታላቅ በረከት ነው።

መለኮታዊው በረከት የሚፈስስባቸውን ጕድጓዶች ለመቈፈር ዛሬ በቂ ጸጋ አለንን? ወዮ! እውነተኛና ተግባራዊ እምነትን በማሳየት ብዙ ጊዜ እንወድቃለን። ዛሬ የጸሎትን መልስ በንቃት እንጠባበቅ። ስለ ዝናብ ለመጸለይ ወደ ስብሰባ የሄደችው ልጅ ጃንጥላ ይዛ እንደ ሄደች፥ እንዲሁ እኛም ጌታ እንዲባርከን በእውነትና በተግባር እንጠብቅ። ሸለቆውን ጕድጓድ በጕድጓድ እናድርገው፤ ሁሉም ሲሞሉም ለማየት እንጠብቅ።

ኖቬምበር 5

የሚያሠቃየው ያበቃል

«ለዘላለም አልከራከርም፥ ሁልጊዜም አልቈጣም፤ መንፈስና የፈጠርኋቸው ነፍሳት በፊቴ ይዝሉ ነበርና» ኢሳይያስ 57:16

የሰማዩ አባታችን የሚፈልገው ትምህርታችንን እንጂ ጥፋታችንን አይደለም። ከእኛ ጋር ያለው ክርክር ለእኛ መልካም ዓላማ አለው። ሁልጊዜ በእኛ ላይ እንደ ተዋጋ አይኖርም። ጌታ በተግሣጹ የሚያረዝም ይመስለናል፤ ይህ ግን እኛ በትዕግሥታችን አጭሮች ስለ ሆንን ነው። ርኅራኄው ለዘላለም ይኖራል፤ ክርክሩ ግን አይደለም። ሌሊቱ የደከመ ርዝመቱን ሊጎትት ይችላል፤ በመጨረሻ ግን ለደስተኛ ቀን ስፍራ መልቀቅ አለበት። ክርክሩ ለጊዜው ብቻ እንደ ሆነ፥ እንዲሁ ወደ እርሱ የሚያደርሰው ቍጣም ለጥቂት ቅጽበት ብቻ ነው። ጌታ የመረጣቸውን ሁልጊዜ ሊቈጣቸው እጅግ ይወዳቸዋል።

አንዳንድ ጊዜ እንደሚያደርገን ሁልጊዜ ቢያደርገን ፈጽመን እንዝል ነበር፥ ተስፋም ቈርጠን ወደ ሞት በሮች እንወርድ ነበር። ውድ ልብ ሆይ፥ አይዞህ! ጌታ ተግሣጹን በቅርቡ ያቆማል። ታገሥ፤ ጌታ ይደግፍሃልና፥ እስከ መጨረሻም ያሻግርሃል። የፈጠረህ ምን ያህል ደካማ እንደ ሆንህና ምን ያህል ጥቂት መሸከም እንደምትችል ያውቃል። እጅግ በረቀቀ ሁኔታ የሠራውን በርኅራኄ ይይዘዋል። ስለዚህ ስለ አሁኑ ሕመም አትፍራ፤ ወደ ደስተኛ የወደፊት ጊዜ ይቸኩላልና። የመታህ ይፈውስሃል፤ ጥቂቱን ቍጣውንም ታላቅ ምሕረት ይከተለዋል።

ኖቬምበር 6

ደስታና ምኞቶች

«በእግዚአብሔር ደስ ይበልህ፥ የልብህንም መሻት ይሰጥሃል» መዝሙር 37:4

በእግዚአብሔር ደስ መሰኘት የሚለውጥ ኃይል አለው፤ ሰውንም ከወደቀው ተፈጥሮአችን ብልሹ ምኞቶች በላይ ያነሣዋል። በእግዚአብሔር ደስ መሰኘት በራሱ ጣፋጭ ብቻ አይደለም፤ ጌታ እንደሚፈጽማቸው ያለ ሥጋት ተስፋ ሊሰጥባቸው እስኪችል ድረስ የልብን ናፍቆቶች በማጣፈጥ ነፍስን ሁሉ ያጣፍጣል። ምኞቶቻችንን እንደ እግዚአብሔር ምኞቶች እስኪሆኑ ድረስ የሚቀርጽ ደስታ ታላቅ ደስታ አይደለምን?

የሞኝነት መንገዳችን መመኘት፥ ከዚያም የምንመኘውን ለማግኘት ሥራ መጀመር ነው። በእግዚአብሔር መንገድ አንሠራም፤ መንገዱም በመጀመሪያ እርሱን መፈለግ፥ ከዚያም ሁሉ እንዲጨመርልን መጠበቅ ነው። ልባችን በደስታ እስኪትረፈረፍ ድረስ በእግዚአብሔር እንዲሞላ ብንፈቅድ፥ ጌታ ራሱ አንዳች መልካም ነገር እንዳናጣ ይጠነቀቃል። ደስታን ፍለጋ ወደ ውጭ ከመሄድ ይልቅ ከእግዚአብሔር ጋር በቤት እንቀመጥ፤ ከገዛ ምንጫችንም ውኃ እንጠጣ። እርሱ ከወዳጆቻችን ሁሉ እጅግ የሚበልጥ ሊያደርግልን ይችላል። ስለ ጊዜና ስለ ሥጋ ስሜት ርካሽ ጥቃቅን ነገሮች እየተበሳጩና እየተከዙ ከመዞር በእግዚአብሔር ብቻ መርካት ይሻላል። ለጊዜው ተስፋ መቍረጥ ሊያጋጥመን ይችላል፤ እነዚህ ግን ወደ ጌታ ቢያቀርቡን እጅግ ሊከበሩ የሚገባቸው ነገሮች ናቸው፤ በመጨረሻ ትክክለኛ ምኞቶቻችን ሁሉ እንዲፈጸሙ ያረጋግጡልናልና።

ኖቬምበር 7

እውነተኛ ትሕትና ይሸለማል

«ራሱን ግን የሚያዋርድ ከፍ ይላል» ሉቃስ 18:14

ራሳችንን ማዋረድ ሊከብደን አይገባም፤ የምንመካበት ምን አለንና? ሳንታዘዝ ዝቅተኛውን ስፍራ ልንይዝ ይገባናል። አስተዋዮችና ቅኖች ብንሆን በዓይናችን ታናናሾች እንሆናለን። በተለይ በጸሎት በጌታ ፊት እንደ ምንም እንሆናለን። በዚያ ስለ ብቃት ልንናገር አንችልም፤ ምንም የለንምና፤ ብቸኛው ልመናችን ወደ ምሕረት መሆን አለበት፤ «አምላክ ሆይ፥ እኔን ኃጢአተኛውን ማረኝ»።

ከዙፋኑ የመጣ የሚያበረታታ ቃል ይኸውና። ራሳችንን ብናዋርድ ጌታ ከፍ ያደርገናል። ለእኛ ወደ ላይ የሚወጣው መንገድ ቍልቍለት ነው። ከራሳችን ስንገፈፍ ትሕትናን እንለብሳለን፤ ይህም ከልብሶች ሁሉ የሚበልጥ ነው። ጌታ በሰላምና በአእምሮ ደስታ ከፍ ያደርገናል፤ ቃሉን ወደ ማወቅና ከራሱ ጋር ወደ ኅብረት ከፍ ያደርገናል፤ የተረጋገጠ ይቅርታንና መጽደቅን በመደሰት ከፍ ያደርገናል። ጌታ ክብሩን ለሰጪው ክብር ሊለብሱት በሚችሉት ላይ ያኖራል። በእነርሱ ለማይታበዩ፥ ይልቁንም በበለጠ ኃላፊነት ስሜት ለሚዋረዱ ጠቃሚነትን፥ ተቀባይነትንና ተሰሚነትን ይሰጣል። ራሱን ከፍ የሚያደርገውን ሰው እግዚአብሔርም ሰውም ከፍ ሊያደርጉት አይሹም፤ ትሑት ብቃትን ግን እግዚአብሔርና መልካም ሰዎች በአንድነት ያከብሩታል።

ጌታ ሆይ፥ በአንተ እነሣ ዘንድ በራሴ ዘንድ አዋርደኝ።

ኖቬምበር 8

የጸጋ ታላቅነት

«ጸጋዬ ይበቃሃል፥ ኃይሌ በድካም ይፈጸማልና» 2ኛ ቆሮንቶስ 12:9

ድካማችን ለመለኮታዊ ኃይል ስፍራ እንደሚያዘጋጅ ሊከበር ይገባዋል። የተፈጥሮን ድካም ባይሰማን ኖሮ የጸጋን ኃይል ፈጽሞ ባላወቅን ነበር። በሥጋ ያለው መውጊያና የሰይጣን መልእክተኛ ወደ እግዚአብሔር ኃይል ሲነዱን ጌታ ይባረክ።

ይህ ከጌታችን ከራሱ ከንፈር የወጣ ውድ ቃል ነው። ጸሐፊውን በደስታ አስቆታል። የእግዚአብሔር ጸጋ ለእኔ ይበቃኛል! እንዴታ፥ በእርግጥ ይበቃል። ሰማይ ለወፍ፥ ውቅያኖስም ለዓሣ አይበቃምን? ሁሉን የሚያበቃው ለታላቁ ጕድለቴ ይበቃል። ለምድርና ለሰማይ የሚበቃው እንደ እኔ ያለውን የአንድ ምስኪን ትል ጉዳይ በእርግጥ ሊያሟላ ይችላል።

እንግዲያስ በአምላካችንና በጸጋው ላይ እንደገፍ። ኀዘናችንን ባያስወግድ ልንሸከመው ያስችለናል። ትሉ ተራሮችን እስኪወቃ ድረስ ኃይሉ ወደ እኛ ይፈስሳል፤ ከንቱ የሆነውም ከፍ ባሉትና በኃያላኑ ሁሉ ላይ ድል አድራጊ ይሆናል። ከራሳችን ኃይል ይልቅ የእግዚአብሔር ኃይል ቢኖረን ይሻለናል፤ አሁን ካለን ሺህ እጥፍ ብንበረታ በጠላት ፊት ሁሉም ከንቱ ይሆን ነበርና፤ አሁን ካለን ይበልጥ ብንደክም፥ ይህም የማይቻል ነው ማለት ይቻላል፥ ቢሆንም በክርስቶስ ሁሉን ልናደርግ እንችላለን።

ኖቬምበር 9

አስፈላጊ እውቀት

«እኔም አምላካቸው እግዚአብሔር ከእነርሱ ጋር እንደ ሆንሁ፥ እነርሱም የእስራኤል ቤት ሕዝቤ እንደ ሆኑ ያውቃሉ፥ ይላል ጌታ እግዚአብሔር» ሕዝቅኤል 34:30

የጌታ የራሱ ሕዝብ መሆን የተመረጠ በረከት ነው፤ እንደዚያ መሆናችንን ማወቅ ግን የሚያጽናና በረከት ነው። እግዚአብሔር ከእኛ ጋር እንደ ሆነ ተስፋ ማድረግ አንድ ነገር ነው፤ እንደ ሆነ ማወቅ ደግሞ ሌላ ነገር ነው። እምነት ያድነናል፤ መተማመን ግን ያረካናል። በእርሱ ስናምን እግዚአብሔርን አምላካችን አድርገን እንወስዳለን፤ የእርሱ ደስታ ግን የሚገኘን የእኛ እንደ ሆነና እኛም የእርሱ እንደ ሆንን ስናውቅ ነው። ማንም አማኝ ተስፋ በማድረግና በመታመን ብቻ ሊረካ አይገባውም፤ የተስፋ ጉዳዮች የእርግጠኝነት ጉዳዮች እንዲሆኑ ጌታ ወደ ፍጹም መተማመን እንዲመራው ሊለምነው ይገባል።

የኪዳንን በረከቶች ስንደሰትና ጌታችን ኢየሱስ ስለ እኛ የከበረ ተክል ሆኖ ሲነሣ ስናይ ነው የእግዚአብሔር ሞገስ ለእኛ እንዳለ በግልጥ የምናውቀው። የጌታ ሕዝብ መሆናችንን የምንማረው በሕግ ሳይሆን በጸጋ ነው። ዓይኖቻችንን ሁልጊዜ ወደ ነጻ ጸጋ እናዙር። የእምነት መተማመን በሕግ ሥራ ፈጽሞ ሊመጣ አይችልም። ወንጌላዊ በጎነት ነው፤ ወደ እኛም ሊደርስ የሚችለው በወንጌል መንገድ ብቻ ነው። ወደ ውስጣችን አንመልከት። ወደ ጌታ ብቻ እንመልከት። ኢየሱስን ስናይ መዳናችንን እናያለን።

ጌታ ሆይ፥ ከጥርጥርና ከፍርሃት ጭቃ አልፈን እንድንታጠብ እንዲህ ያለ የፍቅርህን ሙላት ጐርፍ ላክልን።

ኖቬምበር 10

ሳትሰናከል ተመላለስ

«እግርህን ለመናወጥ አይሰጠውም» መዝሙር 121:3

ጌታ ካልፈቀደ ሰዎችም አጋንንትም ሊያደርጉት አይችሉም። የሚያሳፍር ውድቀት ቢጥሉን፥ ከስፍራችን ቢያባርሩንና ከመታሰቢያ አጥፍተው ቢቀብሩን እንዴት ደስ ባላቸው ነበር! አንድ እንቅፋት ብቻ ባይኖር ኖሮ ይህን እንደ ልባቸው ባደረጉ ነበር፤ እርሱም ጌታ አይፈቅድም የሚለው ነው፤ እርሱ ካልፈቀደ ደግሞ እኛ አንጐዳም።

የሕይወት መንገድ በአልፕስ ተራሮች መካከል እንደ መጓዝ ነው። በተራራ መንገዶች ላይ ሰው ዘወትር እግሩ ለመንሸራተት ይጋለጣል። መንገዱ ከፍ ባለበት ራስ ያዞራል፤ ከዚያም እግሮች ቶሎ ይንሸራተታሉ፤ እንደ መስተዋት የለሰለሱ ስፍራዎች አሉ፥ ሌሎችም በተላቀቁ ድንጋዮች የሸከሩ ናቸው፤ በሁለቱም ውድቀትን ማስቀረት ከባድ ነው። በሕይወቱ ሁሉ ቀጥ ብሎ እንዲቆምና ሳይሰናከል እንዲመላለስ የተቻለው ሰው ለምስጋና ከሁሉ የተሻለ ምክንያት አለው። ከጕድጓዶችና ከወጥመዶች፥ ከደካማ ጕልበቶች፥ ከደከሙ እግሮችና ከተንኰለኛ ጠላቶች የተነሣ እግሩን ለመናወጥ የማይሰጠው የታመነ ፍቅር ባይኖር ኖሮ ማንም የእግዚአብሔር ልጅ ለአንድ ሰዓት እንኳ ጸንቶ ባልቆመ ነበር። «በሺህ ወጥመዶች መካከል እቆማለሁ፥ በእጅህ ተደግፌና ተጠብቄ፤ ያ የማይታየው እጅ አሁንም ይይዘኛል፥ ወደ ቅዱሱ ተራራህም ይመራኛል።»

ኖቬምበር 11

የጌታ ነጻ ሰዎች

«ኃጢአት አይገዛችሁምና፤ ከጸጋ በታች እንጂ ከሕግ በታች አይደላችሁምና» ሮሜ 6:14

ኃጢአት ቢችል ይነግሣል፤ ከልብ ዙፋን በታች ባለ ስፍራ ሊረካ አይችልም። አንዳንድ ጊዜ ያሸንፈናል ብለን እንፈራለን፤ ያን ጊዜም ወደ ጌታ «ኃጢአት ሁሉ አይግዛኝ» ብለን እንጮኻለን። የሚያጽናናው መልሱም ይህ ነው፤ «ኃጢአት አይገዛችሁም። ሊያጠቃችሁ፥ እንዲያውም ሊያቆስላችሁ ይችላል፤ በእናንተ ላይ ግን ሥልጣኑን ፈጽሞ አያጸናም።»

ከሕግ በታች ብንሆን ኖሮ ኃጢአታችን ኃይል አግኝቶ በሥልጣኑ ሥር ይይዘን ነበር፤ ሰው በኃጢአት ኃይል ሥር መውደቁ የኃጢአት ቅጣት ነውና። ከጸጋ ኪዳን በታች ስለ ሆንን ግን በኪዳኑ የተረጋገጠ አዋጅ ከሕያው እግዚአብሔር ከመራቅ ተጠብቀናል። ከመቅበዝበዛችን የምንመለስበት፥ ከርኵሰታችን የምንነጻበትና ከልማድ ሰንሰለት ነጻ የምንወጣበት ጸጋ ተሰጥቶናል።

ለዘላለም ሕይወት እንደሚሠሩ ባሪያዎች አሁንም ብንሆን ተስፋ ቈርጠን ልንተኛና «ለግብፃውያን መገዛትን ልንመርጥ» እንችል ነበር፤ ነገር ግን የጌታ ነጻ ሰዎች ስለ ሆንን፥ ኃጢአት ዳግመኛ ፈጽሞ በግዛቱ ሥር እንደማያስገባን ተረድተን ከብልሹነታችንና ከፈተናዎቻችን ጋር ለመዋጋት እንበረታለን። እግዚአብሔር ራሱ በጌታችን በኢየሱስ ክርስቶስ ድልን ይሰጠናል፤ ለእርሱ ከዘላለም እስከ ዘላለም ክብር ይሁን። አሜን።

ኖቬምበር 12

የተቀደሱ ነፍሳት ይረካሉ

«ሕዝቤም በበጎነቴ ይጠግባሉ፥ ይላል እግዚአብሔር» ኤርምያስ 31:14

ሁለት ጊዜ የሚመጣውን «የእኔ» የሚለውን አስተውል፤ «ሕዝቤም በበጎነቴ ይጠግባሉ»።

በእግዚአብሔር የሚረኩ ሰዎች የእግዚአብሔር የራሱ እንደ ሆኑ ተለይተው ታውቀዋል። እርሱ በእነርሱ ደስ ይለዋል፤ እነርሱ በእርሱ ደስ ይላቸዋልና። እነርሱ አምላካቸው ብለው ይጠሩታል፤ እርሱም ሕዝቡ ብሎ ይጠራቸዋል፤ እርሱ እንደ ድርሻው ሊወስዳቸው ይረካል፤ እነርሱም እርሱን ድርሻቸው አድርገው ይረካሉ። በእግዚአብሔር እስራኤልና በእስራኤል አምላክ መካከል የጋራ የደስታ ኅብረት አለ።

እነዚህ ሰዎች ረክተዋል። ይህ ታላቅ ነገር ነው። ዕጣቸው ምንም ቢሆን ከሰው ልጆች የሚረኩ እጅግ ጥቂቶች ናቸው፤ አልቅትን ውጠዋል፤ እርሷም ዘወትር «ስጡ! ስጡ!» ትላለች። የሚረኩ ነፍሳት የተቀደሱ ነፍሳት ብቻ ናቸው። እግዚአብሔር ራሱ ሊመልሰንም ሊያረካንም ይገባል።

የጌታ ሕዝብ በጌታቸው በጎነት መርካታቸው አያስደንቅም። ያለ ድብልቅ በጎነት፥ ያለ ገደብ ልግስና፥ ያለ ተግሣጽ ምሕረት፥ ያለ ለውጥ ፍቅር፥ ያለ ቍጥብነት ሞገስ እዚህ አለ። የእግዚአብሔር በጎነት ካላረካን ምን ያረካናል? ምን! አሁንም እናቃስታለን? የእግዚአብሔር በጎነት የማያረካው ምኞት ቢሆን በውስጣችን የተሳሳተ ምኞት በእርግጥ አለ።

ጌታ ሆይ፥ ረክቻለሁ። ስምህ ይባረክ።

ኖቬምበር 13

የማያንቀላፋ ጥበቃ

«እነሆ፥ እስራኤልን የሚጠብቅ አይተኛም አያንቀላፋምም» መዝሙር 121:4

እግዚአብሔር «የእስራኤል ጠባቂ» ነው። ጥልቁ እንቅልፍም ቀላሉ ሸለብታም፥ ምንም ዓይነት ራስን መሳት አያገኘውም። የሕዝቡን ቤትና ልብ መጠበቅ ፈጽሞ አያቋርጥም። ይህ በፍጹም ሰላም እንድናርፍ በቂ ምክንያት ነው። እስክንድር ወዳጁ ፓርሜንዮ ስለሚጠብቅ እንደ ተኛ ተናገረ፤ እኛማ አምላካችን ጠባቂያችን ስለ ሆነ እጅግ ይልቅ ልንተኛ እንችላለን።

«እነሆ» የሚለው ቃል ወደሚያበረታታው እውነት ትኩረታችንን ለመሳብ በዚህ ቆሟል። እስራኤል ድንጋይን ተንተርሶ በተኛ ጊዜ አንቀላፋ፤ አምላኩ ግን ነቅቶ ነበር፥ ለባሪያውም በራእይ ተገለጠ። ያለ መከላከያ በምንተኛበት ጊዜ እግዚአብሔር ራሱ ራሳችንን ይሸፍናል።

ባለ ጠጋ ሀብቱን እንደሚጠብቅ፥ የጦር አለቃ ከተማን በጭፍራ እንደሚጠብቅ፥ ዘብ ንጉሡን እንደሚጠብቅ ጌታ ሕዝቡን ይጠብቃል። በእንዲህ ያለ ጥበቃ ውስጥ ያሉትን ማንም ሊጎዳ አይችልም። ነፍሴን በውድ እጆቹ ውስጥ ላኑራት። ፈጽሞ አይረሳንም፤ በትጋት ስለ እኛ መጠንቀቅን ፈጽሞ አያቆምም፤ ሊጠብቀን የማይችልበትም ጊዜ ፈጽሞ የለም።

አቤቱ ጌታዬ፥ እንዳልቅበዘበዝ፥ እንዳልወድቅና እንዳልጠፋ ጠብቀኝ። ትእዛዛትህን እጠብቅ ዘንድ ጠብቀኝ። በማያንቀላፋው ጥንቃቄህ እንደ ታካች ከመተኛትና የሞትን እንቅልፍ እንደሚተኙ ከመጥፋት ከልክለኝ።

ኖቬምበር 14

የምንጠራበት ስም

«ማናቸውንም ነገር በስሜ ብትለምኑ እኔ አደርገዋለሁ» ዮሐንስ 14:14

እንዴት ያለ ሰፊ ተስፋ ነው! ማናቸውንም ነገር! ትልቅም ይሁን ትንሽ፥ ፍላጎቶቼ ሁሉ በዚያ «ማናቸውንም» በሚለው ቃል ተሸፍነዋል። ነፍሴ ሆይ፥ ነዪ፤ በምሕረት ዙፋን ፊት ነጻ ሁኚ፤ ጌታሽም «አፍህን አስፋ፥ እሞላዋለሁም» ሲልሽ ስሚ።

እንዴት ያለ ጥበበኛ ተስፋ ነው! ሁልጊዜ በኢየሱስ ስም ልንለምን ይገባናል። ይህ እኛን ሲያበረታታ እርሱንም ያከብረዋል። ይህ ዘወትር የሚገኝ ልመና ነው። አልፎ አልፎ ሌላው ልመና ሁሉ ይጨልማል፤ በተለይ ከእግዚአብሔር ጋር ካለን ግንኙነት ወይም ከጸጋው ልምዳችን ልናወጣው የምንችለው፤ በዚያን ጊዜ ግን የኢየሱስ ስም በዙፋኑ ፊት እንደ ቀድሞው ኃያል ነው፤ በፍጹም መተማመንም ልንማጸንበት እንችላለን።

እንዴት ያለ አስተማሪ ጸሎት ነው! የክርስቶስን እጅና ማኅተም ልጨምርበት የማልችለውን ማንኛውንም ነገር ልለምን አይገባኝም። የጌታዬን ስም ለራስ ወዳድ ወይም ለእልኸኛ ልመና ልጠቀምበት አልደፍርም። የጌታዬን ስም ልጠቀምበት የምችለው እርሱ በእኔ ሁኔታ ቢሆን ራሱ ለሚጸልያቸው ጸሎቶች ብቻ ነው። ኢየሱስ ራሱ እንደሚለምን ሆኖ በኢየሱስ ስም ለመለመን ሥልጣን መሰጠት ታላቅ መብት ነው፤ ለእርሱ ያለን ፍቅር ግን እርሱ በማያኖረው ስፍራ ያን ስም እንድናኖር ፈጽሞ አይፈቅድልንም።

ኢየሱስ የሚቀበለውን እለምናለሁን? ማኅተሙን በጸሎቴ ላይ ለማኖር እደፍራለሁን? እንግዲያስ ከአብ የምፈልገውን አግኝቻለሁ።

ኖቬምበር 15

ወሰን የሌለው ባለ ጠግነት

«አምላኬም እንደ ባለ ጠግነቱ መጠን በክብር በክርስቶስ ኢየሱስ የሚያስፈልጋችሁን ሁሉ ይሞላባችኋል» ፊልጵስዩስ 4:19

የጳውሎስ አምላክ አምላካችን ነው፤ የሚያስፈልገንንም ሁሉ ይሞላልናል። ጳውሎስ ስለ ፊልጵስዩስ ሰዎች ይህን እርግጠኛ ነበር፤ እኛም ስለ ራሳችን እርግጠኞች ነን። እግዚአብሔር ያደርገዋል፤ እንደ እርሱ ነውና፤ ይወደናል፥ ሊባርከን ደስ ይለዋል፥ ይህንም ማድረጉ ያከብረዋል። ርኅራኄው፥ ኃይሉ፥ ፍቅሩ፥ ታማኝነቱ፥ ሁሉ እንዳንራብ በአንድነት ይሠራሉ።

ጌታ እንዴት ባለ መስፈሪያ ይሠራል፤ «እንደ ባለ ጠግነቱ መጠን በክብር በክርስቶስ ኢየሱስ»። የጸጋው ባለ ጠግነት ታላቅ ነው፤ የክብሩን ባለ ጠግነት ግን ምን እንላለን? «በክርስቶስ ኢየሱስ ያለውን የክብሩን ባለ ጠግነት» ማን ሊገምተው ይችላል? እግዚአብሔር በዚህ ሊለካ በማይችል መስፈሪያ መጠን የፍላጎታችንን ሰፊ ጥልቅ ይሞላል። ጌታ ኢየሱስን የሙላቱ መያዣና መተላለፊያ ያደርገዋል፤ ከዚያም የፍቅሩን ሀብት በከፍተኛው መልኩ ያካፍለናል። ሃሌ ሉያ!

ጸሐፊው በጌታ ሥራ መፈተን ምን እንደ ሆነ ያውቃል። ታማኝነት በቍጣ ተመልሷል፤ ለጋስ ሰጪዎችም መዋጮአቸውን አቁመዋል፤ ሊጨቍኑት የፈለጉት ግን አንዲት ሳንቲም እንኳ አልደኸየም፤ ይልቁንም ባለ ጠጋ ሆኗል፤ ይህ ተስፋ እውነት ሆኗልና፤ «አምላኬም የሚያስፈልገንን ሁሉ ይሞላልናል»። የእግዚአብሔር ስንቅ ከማንኛውም ባንክ ይበልጥ የተረጋገጠ ነው።

ኖቬምበር 16

እንዲከሽፉ የተፈረደባቸው መሣሪያዎች

«በአንቺ ላይ የተሠራ መሣሪያ ሁሉ አይከናወንም፤ በፍርድም በአንቺ ላይ የሚነሣውን ምላስ ሁሉ ትፈርጂበታለሽ» ኢሳይያስ 54:17

በጠላት ቀጥቃጮችና መፍሰሻዎች ውስጥ ታላቅ ጩኸት አለ። ቅዱሳንን የሚመቱበትን መሣሪያ ይሠራሉ። የቅዱሳን ጌታ ባይፈቅድላቸው ይህን ያህል እንኳ ማድረግ ባልቻሉ ነበር፤ ፍም በእሳት ውስጥ የሚያናፋውን ብረት ሠሪ የፈጠረው እርሱ ነውና። ነገር ግን እንዴት በትጋት እንደሚደክሙ እዩ! ስንት ሰይፍና ጦር ይሠራሉ! ይህ ምንም አይደለም፤ በእያንዳንዱ መሣሪያ ስለት ላይ «አይከናወንም» የሚል ጽሑፍ ታነባላችሁና።

አሁን ግን ሌላ ድምፅ አድምጡ፤ የምላስ ጠብ ነው። ምላስ በመዶሻና በመስፍ ከሚሠራው መሣሪያ ይልቅ የሚያስፈራ ነው፤ የሚያደርሰውም ክፋት ይበልጥ ጠልቆ ይቈርጣል፥ ይበልጥም ይሰፋል። እንግዲህ ምን ይደርስብናል? ስም ማጥፋት፥ ሐሰት፥ ሹክሹክታ፥ መሣለቅ — እነዚህ የተመረዙ ፍላጻዎች ናቸው፤ እንዴት ልንቋቋማቸው እንችላለን? ጌታ እግዚአብሔር ዝም ልናሰኛቸው ባንችል እንኳ ቢያንስ በእነርሱ ከመጥፋት እንደምናመልጥ ተስፋ ይሰጠናል። ለጊዜው ይፈርዱብናል፤ እኛ ግን በመጨረሻ ለዘላለም እንፈርድባቸዋለን። ሐሰትን የሚናገሩ አፍ ይዘጋል፤ ሐሰታቸውም በእነርሱ ምክንያት መከራ ለተቀበሉ ደጋግ ሰዎች ክብር ይሆናል።

ኖቬምበር 17

እግዚአብሔር ፈጽሞ አይተውም

«እግዚአብሔር ሕዝቡን አይጥልምና፥ ርስቱንም አይተውም» መዝሙር 94:14

አይደለም፤ ከእነርሱ አንዱን እንኳ አይጥልም። ሰው የሚጥላቸው አሉት፤ እግዚአብሔር ግን አንድም የለውም፤ ምርጫው የማይለወጥ፥ ፍቅሩም የዘላለም ነውና። ለማዳን ራሱን ከገለጠለት በኋላ እግዚአብሔር የተወውን አንድ ሰው እንኳ ማንም ሊያገኝ አይችልም።

ይህ ታላቅ እውነት በመዝሙሩ ውስጥ የተጠቀሰው የተጨነቀውን ልብ ለማጽናናት ነው። ጌታ የራሱን ይገሥጻል፤ ፈጽሞ ግን አይተዋቸውም። የሕግና የበትር ድርብ ሥራ ፍሬ ትምህርታችን ነው፤ የዚያም ትምህርት ፍሬ የመንፈስ ጸጥታና የአእምሮ ሰከንነት ነው፤ ከዚህም ዕረፍት ይወጣል። ኃጢአተኞች የሚወድቁበትና የሚያዙበት ጕድጓድ እስኪቈፈር ድረስ ይተዋሉ፤ ጻድቃን ግን ወደ ፊት ለሚጠብቃቸው ክቡር ዕጣ እንዲዘጋጁ ወደ ትምህርት ቤት ይላካሉ። ፍርድ ተመልሶ በዓመፀኞች ላይ ሥራውን ይፈጽማል፤ እንዲሁ ደግሞ ቅኖችንና ጻድቃንን ለማጽደቅ ይመለሳል። ስለዚህ የተግሣጹን በትር በጸጥታ በመገዛት ልንሸከም እንችላለን፤ ትርጕሙ ቍጣ ሳይሆን ፍቅር ነውና።

«እግዚአብሔር ይገሥጻል፥ ይቀጣልም፥

ቸል ማለት ግን ከቶ አይችልም፤

በታማኝነት ይዘልፋል፥

መውደዱን ግን ከቶ አያቋርጥም።»

ኖቬምበር 18

በግልጥ ከተፈጥሮ በላይ የሆነ

«በዚያ ቀን እግዚአብሔር በኢየሩሳሌም የሚኖሩትን ይጋርዳል፤ በዚያም ቀን ከመካከላቸው የደከመው እንደ ዳዊት ይሆናል፤ የዳዊትም ቤት እንደ እግዚአብሔር፥ በፊታቸውም እንዳለ እንደ እግዚአብሔር መልአክ ይሆናል» ዘካርያስ 12:8

ጌታ ሕዝቡን ከሚጠብቅባቸው መንገዶች እጅግ መልካሙ በውስጣዊ ኃይል ብርቱዎች ማድረግ ነው። ሰዎች ከቅጥር ይሻላሉ፤ እምነትም ከምሽግ ይበረታል።

ጌታ ከመካከላችን እጅግ የደከመውን ወስዶ እንደ እስራኤል ጀግና እንደ ዳዊት ሊያደርገው ይችላል። ጌታ ሆይ፥ ይህን በእኔ አድርግ! ኃይልህን በውስጤ አፍስስ፤ በእግዚአብሔር ታምኜ ግዙፉን በወንጭፍና በድንጋይ እንድገጥመው በቅዱስ ድፍረት ሙላኝ።

ጌታ ታላላቅ ጀግኖቹን አሁን ካሉበት እጅግ የበረቱ ሊያደርጋቸው ይችላል፤ ዳዊት እንደ እግዚአብሔር፥ እንደ ይሖዋ መልአክ ሊሆን ይችላል። ይህ አስደናቂ ዕድገት ነው፤ ነገር ግን የሚቻል ነው፤ ያለዚያ ባልተነገረ ነበር። ጌታ ሆይ፥ ከመሪዎቻችን መልካሞቹ ላይ እንዲህ ሥራ! የምትችለውን አሳየን፤ ይኸውም ታማኝ ባሪያዎችህን በግልጥ ከተፈጥሮ በላይ ወደ ሆነ የጸጋና የቅድስና ከፍታ ማውጣት ነው!

ጌታ ሆይ፥ በቅዱሳንህ ውስጥ እደር፤ እንደ እግዚአብሔርም ይሆናሉ፤ ኃይልህን በውስጣቸው አኑር፤ በይሖዋ ፊት እንደሚኖሩት ሕያዋን ፍጥረታት ይሆናሉ። ይህን ተስፋ በዚህ ዘመናችን ለመላዋ ቤተ ክርስቲያንህ ስለ ኢየሱስ ብለህ ፈጽም። አሜን።

ኖቬምበር 19

ከመታዘዝ ወደ በረከት

«ከዛሬ ጀምሬ እባርካችኋለሁ» ሐጌ 2:19

የሚመጡ ነገሮች ከእኛ የተሰወሩ ናቸው። ሆኖም ገና ያልተወለዱትን ዓመታት የምናይበት መስተዋት እነሆ። ጌታ «ከዛሬ ጀምሬ እባርካችኋለሁ» ይላል።

በዚህ ተስፋ የተጠቀሰውን ቀን ልብ ማለት ይገባል። መከር ጠፍቶ ነበር፤ ዋግና አረማሞ ነበረ፤ ይህም ሁሉ በሕዝቡ ኃጢአት ምክንያት ነበር። አሁን ጌታ እነዚህ የተገሠጹ ሰዎች ቃሉን መታዘዝና መቅደሱን መሥራት ሲጀምሩ አየ፤ ስለዚህ እንዲህ አለ፤ «የእግዚአብሔር መቅደስ መሠረት ከተጣለበት ቀን ጀምሮ አስቡ። ከዛሬ ጀምሬ እባርካችኋለሁ።» በማናቸውም ኃጢአት ኖረን ብንሆን፥ መንፈስም ከእርሱ እንድንነጻ ቢመራን፥ በጌታ በረከት ልንተማመን እንችላለን። ፈገግታው፥ መንፈሱ፥ ጸጋው፥ የእውነቱም የበለጠ መገለጥ ሁሉ የሰፋ በረከት ይሆኑልናል። ስለ ታማኝነታችን ከሰዎች የበለጠ ተቃውሞ ሊገጥመን ይችላል፤ ነገር ግን ከአምላካችን ከጌታ ጋር ወደ ቀረበ ኅብረት፥ በእርሱም ዘንድ ተቀባይነታችንን ወደ ማየት እንወጣለን።

ጌታ ሆይ፥ ለአንተ ይበልጥ ታማኝ ለመሆን፥ ትምህርትህንና ትእዛዝህንም በጥንቃቄ ለመከተል ቈርጫለሁ፤ ስለዚህ ከአሁን ጀምሮ ለዘላለም የዕለት ሕይወቴን ብፅዕና በክርስቶስ ኢየሱስ እንድታበዛ እለምንሃለሁ።

ኖቬምበር 20

የረካ ረሃብ

«የምትናፍቀውን ነፍስ አጥግቦአልና፥ የተራበችንም ነፍስ በበረከት ሞልቶአልና» መዝሙር 107:9

መናፈቅ መልካም ነው፤ ናፍቆቱም በበረታ ቍጥር የተሻለ ነው። የነፍስ ናፍቆት ምንም ያህል ታላቅና ሁሉን የሚውጥ ቢሆን ጌታ ያረካዋል። እግዚአብሔር አብዝቶ ይሰጣልና አብዝተን እንናፍቅ። በራሳችን ስንረካና ከናፍቆት ነጻ ስንሆን በትክክለኛ የአእምሮ ሁኔታ ላይ አይደለንም። ለበለጠ ጸጋ ያለ ምኞትና የማይነገር መቃተት የዕድገት ሕመም ናቸው፤ ይበልጥ እንዲሰሙን መመኘት ይገባናል። የተባረክህ መንፈስ ሆይ፥ ለተሻሉ ነገሮችና ለበለጠ መልካም ነገር እንድንቃትትና እንድንጮኽ አድርገን!

ረሃብ በምንም መንገድ ደስ የሚያሰኝ ስሜት አይደለም። ሆኖም ጽድቅን የሚራቡና የሚጠሙ ብፁዓን ናቸው። እንደነዚህ ያሉ ረሃባቸው በጥቂት ምግብ ብቻ አይታገሥም፤ ይጠግባሉ እንጂ። በማናቸውም ሻካራ ነገር አይጠግቡም፤ ምግባቸው ለቸሩ ጌታቸው የሚገባ ይሆናል፤ ይሖዋ ራሱ በበረከት ይሞላቸዋልና።

ኑ፥ ስለምንናፍቅና ስለምንራብ አንበሳጭ፤ ይልቁንም እግዚአብሔር ሲከብር ለማየት እርሱም የሚናፍቀውንና የሚራበውን የመዝሙረኛውን ድምፅ እንስማ፤ «ስለ ቸርነቱ ለሰው ልጆችም ስለሚያደርገው ተአምራቱ እግዚአብሔርን ምነው ቢያመሰግኑት!»

ኖቬምበር 21

ወደ ውጭና ወደ ላይ መመልከት

«እናንተ የምድር ዳርቻዎች ሁሉ፥ ወደ እኔ ተመልከቱ፥ ትድናላችሁም፤ እኔ አምላክ ነኝ፥ ሌላም የለም» ኢሳይያስ 45:22

ይህ የተስፋዎች ተስፋ ነው። በመንፈሳዊ ሕይወታችን መሠረት ላይ ይገኛል። መዳን የሚመጣው «ጻድቅ አምላክና መድኃኒት» ወደ ሆነው በመመልከት ነው። መመሪያው እንዴት ቀላል ነው! «ወደ እኔ ተመልከቱ።» ጥያቄው እንዴት ምክንያታዊ ነው! በእርግጥ ፍጥረት ወደ ፈጣሪው መመልከት ይገባዋል። ወደ ሌላ ስፍራ በቂ ጊዜ ተመልክተናል፤ ተስፋችንን ወደሚጠራውና መዳኑን ሊሰጠን ተስፋ ወደሚሰጠው ወደ እርሱ ብቻ የምንመለከትበት ጊዜ አሁን ነው።

መመልከት ብቻ! ወዲያውኑ አንመለከትምን? ከራሳችን ምንም ማምጣት የለብንም፤ ከመስቀሉ ወደ ወጣበት ወደ ዙፋኑ ወደ ጌታችን ወደ ውጭና ወደ ላይ መመልከት ነው እንጂ። መመልከት ዝግጅት፥ ኃይለኛ ጥረትም አይጠይቅም፤ ብልሃትም ጥበብም፥ ሀብትም ብርታትም አያስፈልገውም። የሚያስፈልገን ሁሉ በአምላካችን በጌታ ዘንድ ነው፤ ለሁሉም ነገር ወደ እርሱ ብንመለከት ያ ሁሉ የእኛ ይሆናል፤ እኛም እንድናለን።

እናንተ በሩቅ ያላችሁ፥ ኑ፥ ወደዚህ ተመልከቱ! እናንተ የምድር ዳርቻዎች፥ ዓይኖቻችሁን ወደዚህ መልሱ! ሰዎች ከሩቅ አገሮች ፀሐይን አይተው በብርሃኑ እንደሚደሰቱ፥ እንዲሁ እናንተ በሞት ዳርቻ በሲኦል ደጅ የተኛችሁ በመመልከት ብቻ የእግዚአብሔርን ብርሃን፥ የሰማይን ሕይወት፥ አምላክ የሆነውንና ስለዚህም ሊያድን የሚችለውን የጌታ የኢየሱስ ክርስቶስን መዳን ልትቀበሉ ትችላላችሁ።

ኖቬምበር 22

ኵነኔ የለም

«በዚያ ወራትና በዚያ ዘመን፥ ይላል እግዚአብሔር፥ የእስራኤል በደል ይፈለጋል፥ አይገኝምም፤ የይሁዳም ኃጢአት ይፈለጋል፥ አይገኝምም፤ ያስቀረኋቸውን ይቅር እላቸዋለሁና» ኤርምያስ 50:20

በእውነት የከበረ ቃል ነው! ለኃጢአተኞቹ ለእስራኤልና ለይሁዳ ሕዝቦች እንዴት ያለ ፍጹም ይቅርታ ተሰጥቶአል! ኃጢአት እስከማይገኝ ድረስ ይወገዳል፤ እስከማይኖርም ድረስ ይደመሰሳል። ይቅር ለሚለው አምላክ ክብር ይሁን!

ሰይጣን የሚከስብንን ኃጢአት ይፈልጋል፤ ጠላቶቻችን በእኛ ላይ ሊያላክኩት ይፈልጉታል፤ የራሳችንም ሕሊና በሕማማዊ ጕጕት እንኳ ይፈልገዋል። ጌታ ግን የኢየሱስን የከበረ ደም ሲረጭ ማንኛውንም ፍለጋ አንፈራም፤ «አይገኝም»፥ «አይገኝምም» ተብሎአልና። ጌታ የሕዝቡ ኃጢአት እንዳይኖር አድርጎአል፤ መተላለፍን ፈጽሞአል፥ ኃጢአትንም አስወግዶአል። የኢየሱስ መሥዋዕት ኃጢአታችንን ወደ ባሕር ጥልቅ ጥሎአል። ይህ በደስታ እንድንዘልል ያደርገናል።

ኃጢአት የሚደመሰስበት ምክንያት ይሖዋ ራሱ ምርጦቹን ይቅር ማለቱ ነው። የጸጋው ቃል ንጉሣዊ ብቻ ሳይሆን መለኮታዊ ነው። ይቅርታን ይናገራል፤ እኛም ነጻ እንሆናለን። ስርየትን ይረጫል፤ ከዚያችም ሰዓት ጀምሮ ሕዝቡ ከኵነኔ ፍርሃት ሁሉ የራቁ ይሆናሉ። ኃጢአትን የሚያጠፋ የአምላክ ስም ቡሩክ ይሁን!

ኖቬምበር 23

ጽናትን ማግኘት

«አምላክህ እግዚአብሔር እነዚያን አሕዛብ በጥቂት በጥቂቱ ከፊትህ ያወጣቸዋል» ዘዳግም 7:22

ለጌታ ኢየሱስ ድልን በአንድ ምት እናገኛለን ብለን መጠበቅ የለብንም። ክፉ መርሆችና ልማዶች በቀላሉ አይሞቱም። በአንዳንድ ስፍራ ነዋሪዎችን ከሚያረክሱ ብዙ ክፋቶች አንዱን እንኳ ለማውጣት የዓመታት ድካም ይጠይቃል። ግልጥ ስኬት ጥቂት ብቻ ቢሆንልንም ጦርነቱን በሙሉ ኃይላችን መቀጠል አለብን።

በዚህ ዓለም ያለን ሥራ ለኢየሱስ ማሸነፍ ነው። ክፋትን ማጥፋት እንጂ ከእርሱ ጋር መስማማት የለብንም። ከኃጢአት ጋር የማያቋርጥ ጦርነት መዋጋት እንጂ ተወዳጅነትን መፈለግ የለብንም። ክሕደት፥ ፓፓዊነት፥ ስካር፥ ርኵሰት፥ ግፍ፥ ዓለማዊነት፥ ስሕተት፤ እነዚህ ሁሉ «መውጣት» አለባቸው።

ይህን ሊፈጽም የሚችል አምላካችን ጌታ ብቻ ነው። በታማኝ ባሪያዎቹ በኩል ይሠራል፤ ስሙም ይባረክ፥ እንዲሁ እንደሚሠራ ተስፋ ይሰጣል። «አምላክህ ይሖዋ እነዚያን አሕዛብ ከፊትህ ያወጣቸዋል።» ይህን ቀስ በቀስ ያደርጋል፤ ጽናትን እንድንማር፥ በእምነት እንድናድግ፥ በትጋት እንድንተጋ፥ ሥጋዊ መዘናጋትንም እንድናስወግድ ነው። ስለ ጥቂቱ ስኬት እግዚአብሔርን እናመስግን፤ ለበለጠውም እንጸልይ። ምድሪቱ ሁሉ ለኢየሱስ እስክትገኝ ድረስ ሰይፉን ወደ ሰገባው አንመልሰው።

ልቤ ሆይ፥ አይዞህ! በጥቂት በጥቂቱ ቀጥል፤ ብዙ ጥቂቶች ታላቅ ሙሉ ይሆናሉና።

ኖቬምበር 24

ምሕረትና ይቅርታ

«ሁልጊዜ አይቀሥፍም፥ ለዘላለምም አይቈጣም» መዝሙር 103:9

አንዳንድ ጊዜ ይወቅሳል፤ ያለዚያ እንደ እኛ ላሉ ምስኪንና ስሕተተኛ ልጆች ጠቢብ አባት ባልሆነ ነበር። ወቀሳው ለእውነተኞች እጅግ ያማል፤ እንዴት እንደሚገባቸውና እርሱን ማሳዘን ከእነርሱ በኩል ምን ያህል ስሕተት እንደ ሆነ ይሰማቸዋልና። ይህ ወቀሳ ምን ማለት እንደ ሆነ እናውቃለን፤ እንዲቈጣን ስላደረግነውም እያዘንን በጌታ ፊት እንሰግዳለን።

ነገር ግን በእነዚህ ቃላት ውስጥ እንዴት ያለ መጽናናት እናገኛለን! «ሁልጊዜ» አይወቅስም። ንስሐ ገብተን ስለ ኃጢአት በተሰበረና ከኃጢአት በተለየ ልብ ወደ እርሱ ብንመለስ ወዲያው ፈገግ ይልልናል። በሙሉ ልቡ ወደሚወዳቸው የተኰሳተረ ፊት ማዞር ደስ አያሰኘውም፤ ደስታው ደስታችን ፍጹም እንዲሆን ነው።

ኑ፥ ፊቱን እንፈልግ። ተስፋ የምንቈርጥበት፥ እንዲያውም የምንተክዝበት ምክንያት የለም። የሚወቅሰንን አምላክ እንውደድ፤ ብዙም ሳይቆይ «ቍጣህ ተመለሰ፥ አንተም አጽናናኸኝ» ብለን እንዘምራለን። እናንተ የጨለማ ሥጋቶች፥ የነፍስ ቍራዎች፥ ሂዱ! እናንተ ትሑታን ተስፋዎችና የምስጋና ትዝታዎች፥ የልብ ርግቦች፥ ግቡ! ከረጅም ጊዜ በፊት እንደ ፈራጅ ይቅር ያለን እንደገና እንደ አባት ይቅር ይለናል፤ እኛም በጣፋጭና በማይለወጥ ፍቅሩ ደስ ይለናል።

ኖቬምበር 25

ሜዳ የሆኑ ተራሮች

«አንተ ታላቅ ተራራ ሆይ፥ ማን ነህ? በዘሩባቤል ፊት ሜዳ ትሆናለህ፤ እርሱም፦ ጸጋ፥ ጸጋ ይሁንለት እያሉ ሲጮኹ የመደምደሚያውን ድንጋይ ያወጣዋል» ዘካርያስ 4:7

በዚህች ሰዓት የችግር፥ የጭንቀት ወይም የእጦት ተራራ በመንገዳችን ላይ ሊሆን ይችላል፤ ተፈጥሮአዊ አእምሮም በላዩ፥ በውስጡ ወይም በዙሪያው መንገድ አያይም። እምነት ይግባ፤ ወዲያውም ተራራው ይጠፋል፥ ሜዳም ይሆናል። ነገር ግን እምነት በመጀመሪያ የጌታን ቃል መስማት አለበት፤ «በመንፈሴ እንጂ በኃይልና በብርታት አይደለም፥ ይላል የሠራዊት ጌታ።» ይህ ታላቅ እውነት የማይታለፉትን የሕይወት ፈተናዎች ለመጋፈጥ ዋና አስፈላጊ ነገር ነው።

ምንም ማድረግ እንደማልችል፥ በሰውም መታመን ሁሉ ከንቱ እንደ ሆነ አያለሁ። «በኃይል አይደለም።» በሚታይ መንገድ ሁሉ መታመን እንደማይቻል፥ ኃይሉ ግን በማይታየው መንፈስ እንደ ሆነ አያለሁ። እግዚአብሔር ብቻ መሥራት አለበት፤ ሰዎችና መንገዶችም እንደ ምንም ሊቈጠሩ ይገባል። ሁሉን የሚችለው እግዚአብሔር የሕዝቡን ጉዳይ በእጁ የሚወስድ ከሆነ ታላላቅ ተራሮች ምንም አይደሉም። ልጆች ኳስ እንደሚወረውሩ ወይም በእግራቸው እንደሚመቱ ዓለማትን ሊያነሣ ይችላል። ይህን ኃይል ሊያውሰኝ ይችላል። ጌታ የአልፕስን ተራራ እንዳንቀሳቅስ ቢያዘኝ በስሙ ላደርገው እችላለሁ። ታላቅ ተራራ ሊሆን ይችላል፤ ነገር ግን በደካማነቴ ፊት እንኳ ሜዳ ይሆናል፤ ጌታ ተናግሮአልና። እግዚአብሔር ከጎኔ ሳለ ምን ልፈራ እችላለሁ?

ኖቬምበር 26

ሰማያዊ ለውጥ

«ኀዘናችሁ ወደ ደስታ ይለወጣል» ዮሐንስ 16:20

የእነርሱ ልዩ ኀዘን የጌታቸው ሞትና መለየት ነበር፤ ከሙታን ተነሥቶ በመካከላቸው ራሱን ባሳየ ጊዜም ወደ ደስታ ተለወጠ። የቅዱሳን ኀዘን ሁሉ እንዲሁ ይለወጣል፤ ለዘላለም የምሬት ምንጭ ሆነው የሚቀሩ የሚመስሉት እጅግ የከፉትም እንኳ።

እንግዲያስ ኀዘን በበዛ ቍጥር ደስታ ይበዛል። የኀዘን ሸክም ቢኖረን የጌታ ኃይል ወደ ብዙ ቶን ደስታ ይለውጠዋል። መከራው በመረረ ቍጥር ደስታው ይጣፍጣል፤ የሰዓት ዘንግ ወደ ግራ ርቆ መወዛወዙ ወደ ቀኝም ይበልጥ እንዲሄድ ያደርገዋል። የኀዘኑ ትዝታ የደስታውን ጣዕም ያጎላዋል፤ አንዱን ከሌላው ጋር እናነጻጽራለን፤ የአልማዙም ብሩህነት ከበስተጀርባው ባለው ጥቁር መደብ ምክንያት ይበልጥ ይታያል።

ልቤ ሆይ፥ ና፥ አይዞህ! አሁን እንደ ተከዝሁ ከጥቂት ጊዜ በኋላ እንዲሁ ደስ ይለኛል። ኢየሱስ በሰማያዊ ለውጥ ኀዘኔ ወደ ደስታ እንደሚለወጥ ይነግረኛል። እንዴት እንደሚሆን አላይም፤ ነገር ግን አምናለሁ፤ አስቀድሜም መዘመር እጀምራለሁ። ይህ የመንፈስ ድብርት ለረጅም ጊዜ አይደለም፤ ቀንና ሌሊት ጌታን ከሚያመሰግኑ ደስተኞች ጋር በቅርቡ ወደ ላይ እሆናለሁ፤ በዚያም ከታላቅ መከራ ስላዳነኝ ምሕረት እዘምራለሁ።

ኖቬምበር 27

በመንገድህ ሁሉ ዕረፍት

«እርሱም፦ እኔ ራሴ ከአንተ ጋር እሄዳለሁ፥ አሳርፍህማለሁ አለ» ዘጸአት 33:14

የከበረ ተስፋ! ጌታ ሆይ፥ ፈጽሞ የራሴ አድርጌ እንድይዘው አስችለኝ።

በዚህ የምትኖር ከተማ የለችንምና በተወሰነ ጊዜ ከመኖሪያችን መሄድ አለብን። በአንድ ስፍራ ቤታችን እንደ ሆነ እጅግ በተሰማን ጊዜ ብዙውን ጊዜ በድንገት ከዚያ እንጠራለን። ለዚህ ችግር መድኃኒቱ እነሆ። ጌታ ራሱ አብሮን ይሆናል። ሞገሱን፥ ኅብረቱን፥ ጥበቃውንና ኃይሉን የሚያጠቃልለው መገኘቱ በጕዞአችን ሁሉ ዘወትር ከእኛ ጋር ይሆናል። ይህ ከሚናገረው እጅግ የበለጠ ማለት ነው፤ በእርግጥ ሁሉን ነገር ማለት ነውና። እግዚአብሔር ከእኛ ጋር ካለ ሰማይንና ምድርን ወርሰናል። ጌታ ሆይ፥ ከእኔ ጋር ሂድ፤ ከዚያም ወደምትወድበት እዘዘኝ!

ነገር ግን የዕረፍት ስፍራ እናገኛለን ብለን ተስፋ እናደርጋለን። ጥቅሱ ይህን ተስፋ ይሰጣል። እግዚአብሔር ራሱ የሚሰጠው፥ የሚያዘጋጀውና የሚጠብቀው ዕረፍት ይኖረናል። መገኘቱ በጕዞ ላይ ሳለን፥ አዎን፥ በጦርነት መካከል እንኳ እንድናርፍ ያደርገናል። ዕረፍት! ሦስት ጊዜ የተባረከ ቃል። ሟቾች ሊደሰቱበት ይችላሉን? አዎን፥ ተስፋው አለ፤ በእምነትም እንማጸንበታለን። ዕረፍት የሚመጣው ከአጽናኙ፥ ከሰላም አለቃ፥ በሰባተኛውም ቀን ከሥራው ሁሉ ካረፈው ከክቡሩ አብ ነው። ከእግዚአብሔር ጋር መሆን በፍጹም ትርጕሙ ማረፍ ነው።

ኖቬምበር 28

እግዚአብሔር ሊባርከው የሚችለውን ማድረግ

«እግዚአብሔር በጎተራህና እጅህን በምትጭንበት ሁሉ በረከትን ያዝልሃል» ዘዳግም 28:8

አምላካችንን ጌታን ብንታዘዝ የሚሰጠንን ይባርካል። ሀብት በጌታ ሲባረክ መርገም አይደለም። ሰዎች ለዕለት ፍላጎታቸው ከሚያስፈልጋቸው በላይ ሲኖራቸውና በጎተራ ማከማቸት ሲጀምሩ የስስት ብስባሽ ወይም የልበ ደንዳናነት ዋግ ክምችቱን መከተሉ አይቀርም፤ በእግዚአብሔር በረከት ግን እንዲህ አይደለም። ጥንቃቄ ቍጠባውን ያስተካክላል፤ ልግስና ወጪውን ይመራል፤ ምስጋና መቀደስን ይጠብቃል፤ ውዳሴም ደስታን ያጣፍጣል። በብረት ሣጥንና በባንክ ሒሳብ ላይ የእግዚአብሔር በረከት መኖሩ ታላቅ ምሕረት ነው።

በመጨረሻው ሐረግ እንዴት ያለ ሞገስ የእኛ ሆነ! «እግዚአብሔር እጅህን በምትጭንበት ሁሉ ይባርክሃል።» የእግዚአብሔርን በረከት ለመለመን በማንደፍርበት ነገር ላይ እጃችንን አናኖርም፤ ያለ ጸሎትና ያለ እምነትም አንጀምረውም። ነገር ግን በማንኛውም ሥራ የጌታን እርዳታ መጠበቅ መቻል እንዴት ያለ መብት ነው! አንዳንዶች ስለ ዕድለኛ ሰው ይናገራሉ፤ የጌታ በረከት ከዕድል ይሻላል። የታላላቆች ድጋፍ ከእግዚአብሔር ሞገስ ጋር ሲነጻጸር ምንም ነው። በራስ መተማመን መልካም ነው፤ የጌታ በረከት ግን ከችሎታ፥ ከሊቅነት ወይም ከብልሃት ፍሬ ሁሉ እጅግ ይበልጣል።

ኖቬምበር 29

መጠበቅን እወቅ

«የሚያምን አይቸኩልም» ኢሳይያስ 28:16

የጌታን ትእዛዛት ለመጠበቅ ይቸኩላል፤ ነገር ግን በትዕግሥት ማጣት ወይም ተገቢ ባልሆነ መንገድ አይቸኩልም።

ለመሸሽ አይቸኩልም፤ ድንጋጤን በሚያመጣ ፍርሃት አይሸነፍምና። ሌሎች አእምሮአቸውን እንደ ሳቱ ወዲያና ወዲህ ሲሸሹ አማኙ ጸጥ ያለ፥ የተረጋጋና የሚያስብ ይሆናል፤ ስለዚህም በፈተና ሰዓት በጥበብ ሊሠራ ይችላል።

በሚጠብቀው ነገር አይቸኩልም፤ መልካሙን ነገር በዚያው ቅጽበት አይሻም፤ የእግዚአብሔርን ጊዜ ግን ይጠብቃል። አንዳንዶች ወፏን በእጃቸው ለመያዝ እጅግ ይጣደፋሉ፤ የጌታን ተስፋ በቍጥቋጦ ውስጥ እንዳለች የእነርሱ ልትሆን የማትችል ወፍ አድርገው ይቈጥሩታልና። አማኞች መጠበቅን ያውቃሉ።

ወደ ስሕተት ወይም ወደ አጠራጣሪ ድርጊት በመግባት አይቸኩልም። አለማመን አንድ ነገር ማድረግ አለበት፤ እንዲሁም የራሱን ጥፋት ይሠራል፤ እምነት ግን ከተገቢው ፍጥነት በላይ አይቸኩልም፤ ስለዚህም በግድየለሽነት በሄደበት መንገድ በኀዘን እንዲመለስ አይገደድም።

እኔስ እንዴት ነኝ? አምናለሁን? ስለዚህስ ከእግዚአብሔር ጋር የመሄድን የአማኙን ርምጃ እጠብቃለሁን? አንተ የምትርበተበት መንፈስ፥ ጸጥ በል! በጌታ ዕረፍ፥ በትዕግሥትም ጠብቀው! ልብ ሆይ፥ ይህን ወዲያውኑ እንድታደርግ ተጠንቀቅ!

ኖቬምበር 30

እግዚአብሔር በግንባር ቀደምትነት አለ

«በፊትህ የሚሄድ እግዚአብሔር ነው፤ እርሱ ከአንተ ጋር ይሆናል፤ አይጥልህም፥ አይተውህምም፤ አትፍራ፥ አትደንግጥም» ዘዳግም 31:8

በታላቅ ሥራ ወይም በታላቅ ጦርነት ፊት ትጥቃችንን እንድንታጠቅ የሚረዳን ጥቅስ እነሆ። ይሖዋ ራሱ በፊታችን የሚሄድ ከሆነ መከተል ያለ ጥርጥር አስተማማኝ ነው። ጌታ ራሱ በግንባር ቢሆን ማን ግስጋሴያችንን ሊያግድ ይችላል? ኑ፥ ወንድሞቼ ወታደሮች ሆይ፥ ፈጥነን ወደ ፊት እንግፋ! ወደ ድል ለመሻገር ለምን እናመነታለን?

ጌታ በፊታችን ብቻ አይደለም፤ ከእኛ ጋርም ነው። በላይ፥ በታች፥ በዙሪያና በውስጥ ሁሉን የሚችለውና በሁሉ ስፍራ ያለው አለ። በዘመን ሁሉ፥ እስከ ዘላለምም ድረስ፥ እንደ ነበረ እንዲሁ ከእኛ ጋር ይሆናል። ይህ ክንዳችንን እንዴት ሊያበረታው ይገባል! እናንተ የመስቀል ወታደሮች፥ በድፍረት ግቡበት፤ የሠራዊት ጌታ ከእኛ ጋር ነውና!

በፊታችንና ከእኛ ጋር ሆኖ እርዳታውን ከቶ አያነሣም። በራሱ ሊጐድል አይችልም፤ ለእኛም አይጐድልም። እንደ ፍላጎታችን እስከ መጨረሻ ድረስ መርዳቱን ይቀጥላል። ሊጥለን እንደማይችል እንዲሁ አይተወንም። የጦርነት ቀናት እስኪያልፉ ድረስ ብርታትንና ርዳታን ሊሰጠን ዘወትር የሚችልና የሚወድድ ይሆናል።

አንፍራ፥ አንደንግጥም፤ የሠራዊት ጌታ ከእኛ ጋር ወደ ጦርነት ይወርዳል፤ የውጊያውን ጫና ይሸከማል፥ ድልንም ይሰጠናል።

ቀዳሚ ቀጣይ