እውነተኛ እንቅፋት

ሊዋሽ የማይችለውን ማመን፣ ሊያድንም እንደሚችል የምናውቀውን መታመን በራሱ ፈጽሞ አስቸጋሪ ነገር አይደለም፤ ቢሆንም አንባቢዬ ሆይ፣ ይህን እንኳ ለአንተ ከባድ የሚያደርግ አንድ ነገር በመካከል ሊገባ ይችላል። ያ እንቅፋት የተሰወረ ሊሆን ይችላል፤ ሆኖም ስለ ተሰወረ እውነተኛነቱ አይቀንስም። አንድ በር የሚዘጋው ሁሉም በሚያየው ትልቅ ድንጋይ ሳይሆን ከዓይን እይታ ፈጽሞ ርቆ ወደ መያዣው በሚገባ በማይታይ መቀርቀሪያ ሊሆን ይችላል። አንድ ሰው ጤናማ ዓይኖች ኖረውትም ሌላ ነገር በመካከል ስለ ገባ አንድን ነገር ማየት ያቅተው ይሆናል። መሐረብ ወይም ተራ የጨርቅ ቁራጭ እንኳ ፊትህ ላይ ቢታሰር ፀሐይን ራሷን ማየት አትችልም ነበር። ወይ፣ ሰዎች በገዛ ዓይኖቻቸው ላይ አጥብቀው የሚያስሩት ማሰሪያ!

በልብ ውስጥ ተሸሽጎ የሚኖር የሚጣፍጥ ኃጢአት ነፍስ ክርስቶስን በእምነት እንዳትይዝ ያግዳታል። ጌታ ኢየሱስ የመጣው ከኃጢአት ሊያድነን ነው፤ እኛ ግን በኃጢአት ለመቀጠል ከቈረጥን ክርስቶስና ነፍሳችን ከቶ አይስማሙም። አንድ ሰው መርዝ ቢጠጣና ሕይወቱን ለማዳን ሐኪም ቢጠራ፣ ሐኪሙ እርግጠኛ የሆነ ማርከሻ ይዞ ሊመጣ ይችላል፤ በሽተኛው ግን የመርዙን ጠርሙስ ከከንፈሩ ሳያርቅ ገዳዮቹን ጠብታዎች መጠጣቱን ቢቀጥል ሐኪሙ እንዴት ሊያድነው ይችላል? መዳን በአብዛኛው ኃጢአተኛውን ከኃጢአቱ መለየት ነው፤ ስለዚህ አንድ ሰው ኃጢአትን እየወደደና አውቆ በእርሱ እየኖረ ድኗል ለማለት የመዳንን ባሕርይ ራሱን መለወጥ ያስፈልግ ነበር። ሰው ነጭ ሆኖ ጥቍር ሆኖ መቀጠል አይችልም፤ ተፈውሶ ታሞ መኖር አይችልም፤ እንዲሁም ማንም ድኖ ክፋትን እንደ ወደደ ሊኖር አይችልም።

ሰካራም በክርስቶስ በማመን ይድናል—ይህም ማለት ከሰካራምነቱ ይድናል ማለት ነው፤ ነገር ግን አሁንም መስከሩን ለመቀጠል ቢቈርጥ ከእርሱ አልዳነም፣ በኢየሱስም በእውነት አላመነም። ውሸታም ከሐሰት በእምነት ሊድን ይችላል፤ ያን ጊዜ ግን መዋሸቱን ይተዋል፣ እውነትንም ለመናገር ይጠነቀቃል። ውሸታም በቀድሞው የማታለልና የሐሰት ልማዱ እየቀጠለ ከውሸታምነቱ ሊድን እንደማይችል በግማሽ ዓይን የሚያይ እንኳ ይረዳዋል። ከሌላው ጋር በጠላትነት ያለ ሰው በጌታ በኢየሱስ በማመን ከዚያ የጠላትነት ስሜት ይድናል፤ ነገር ግን የጥላቻን ስሜት በልቡ ይዞ ለመኖር ቢምል ከእርሱ እንዳልዳነ ግልጥ ነው፤ ለመዳንም በጌታ በኢየሱስ እንዳላመነ እንዲሁ ግልጥ ነው። ዋናው ነገር ከኃጢአት ፍቅር መዳን ነው፤ ይህም በአዳኙ የመታመን እርግጠኛ ፍሬ ነው፤ ነገር ግን ይህ ፍሬ ከመፈለግ ይልቅ ጭራሽ ቢጠላ፣ ለመዳን በአዳኙ ስለ መታመን የሚነገረው ሁሉ ከንቱ ወሬ ነው። አንድ ሰው ወደ መርከብ ጽሕፈት ቤት ሄዶ ወደ አሜሪካ ሊወስዱት ይችሉ እንደ ሆነ ይጠይቃል። አንዲት መርከብ ለመነሣት ተዘጋጅታ እንዳለች፣ እርሱም መሳፈር ብቻ እንደሚበቃውና በቅርቡ ኒው ዮርክ እንደሚደርስ ይነግሩታል። እርሱ ግን፦ «ነገር ግን አትላንቲክን በምሻገርበት ጊዜ ሁሉ እዚሁ እንግሊዝ አገር ቤቴ ተቀምጬ ሱቄን መጠበቅ እፈልጋለሁ» ይላል። ወኪሉም ከእብድ ጋር እየተነጋገረ እንዳለ ያስባል፤ ሥራውን እንዲያይና በቂልነት ጊዜውን እንዳያባክን ይነግረዋል። በኃጢአት ለመቀጠል ቈርጠህ ሳለህ ከኃጢአት እንዲያድንህ ክርስቶስን የምታምን መስሎ መታየት በክርስቶስ ላይ መዘበት ነው። አንባቢዬ እንዲህ ያለውን የማቃለል በደል እንዳይሠራ እለምነዋለሁ። ቅዱሱ ኢየሱስ የዓመፃ ደጋፊ ይሆናል ብሎ በሕልሙም እንኳ አያስብ።

በሥዕሌ ውስጥ ያለውን ዛፍ ታየዋለህን? ሐረጉ በላዩ ላይ ሁሉ ተጠምጥሞ እያነቀው፣ ሕይወቱን እየመጠጠና እየገደለው ነው። ያ ዛፍ ሊድን ይችላልን? አትክልተኛው ሊድን እንደሚችል ያስባል። የሚችለውን ሁሉ ለማድረግም ፈቃደኛ ነው። ነገር ግን መጥረቢያውንና ቢላውን መጠቀም ከመጀመሩ በፊት ሐረጉን እንዳይቈርጥ ይነገረዋል። እርሱም፦ «አዬ! እንግዲያስ የማይቻል ነው። ዛፉን የሚገድለው ሐረጉ ነው፤ ዛፉ እንዲድን ከፈለጋችሁ ሐረጉን ማዳን አትችሉም። ዛፉን እንድጠብቅላችሁ የምታምኑኝ ከሆነ ያን ገዳይ ሐረግ ከእርሱ እንዳስወግድ ፍቀዱልኝ» ይላል። ይህ ተራ የጤና አእምሮ አይደለምን? በእርግጥ ነው። ለዛፉ ገዳይ የሆነውን እንዲቈርጥ ካላመንኸው በቀር ዛፉን ለአትክልተኛው አሳልፈህ አትሰጠውም። ኃጢአተኛው ኃጢአቱን ይዞ ለመኖር ከፈለገ በእርሱ ውስጥ ይሞታል፤ ከኃጢአቱ ለመዳን ፈቃደኛ ከሆነ ግን ጌታ ኢየሱስ ይህን ሊያደርግ ይችላል፤ ጉዳዩንም ለእርሱ ጥበቃ አሳልፎ ቢሰጥ ያደርገዋል።

እንግዲህ የምትወደው ኃጢአትህ ምንድን ነው? ጸያፍ የሆነ በደል ነውን? እንግዲያስ ኀፍረት ራሱ ከእርሱ እንድትርቅ ሊያደርግህ ይገባል። የዓለም ፍቅር ነው ወይስ ሰውን መፍራት ወይስ ክፉ ትርፍን መመኘት? በእርግጥ ከእነዚህ ነገሮች አንዱም ቢሆን ከእግዚአብሔር ጋር በጠላትነት፣ በቍጣውም ሥር ለመኖር ሊያስማማህ አይገባም። ወይስ እንደ ነቀዝ ልብን የሚበላ የሰው ፍቅር ነው? ከጌታ ከኢየሱስ ጋር ሊፎካከር የሚችል ፍጥረት አለን? ማንኛውንም ምድራዊ ነገር ለአንዲት አፍታ እንኳ ከጌታ አምላክ ጋር እንዲወዳደር መፍቀድ ጣዖት ማምለክ አይደለምን? አንድ ሰው፦ «ታዲያ እኔን የማረከኝን ያን የተለየ ኃጢአት መተው በንግዴ ላይ ከባድ ጉዳት ያደርስብኛል፤ ወደ ፊት የማገኘውን ዕድል ያጠፋብኛል፤ በብዙ መንገድም ጥቅሜን ይቀንሰዋል» ይላል። ነገሩ እንዲህ ከሆነ ጉዳይህ በጌታ በኢየሱስ ቃል መልስ አግኝቷል፤ እርሱ ወደ ገሃነም ከምትጣል ይልቅ ዓይንህን አውጥተህ፣ እጅህን ወይም እግርህን ቈርጠህ ከአንተ እንድትጥል ያዝዝሃል። ተስፋህን ሁሉ ይዘህ ከክርስቶስ ውጭ ከምትሆን ይልቅ እጅግ በደከመ ዕድል፣ አንዲት ዓይን ኖራህ ወደ ሕይወት መግባት ይሻልሃል። እየዘለለ ከሚሄድ ኃጢአተኛ አንካሳ አማኝ መሆን ይሻላል። በሰይጣን ትእዛዝ ሥር ሆኖ ሠራዊትን ከፊት ከመምራትና ዋና አለቃ ከመሆን ይልቅ በክርስቶስ ሠራዊት ውስጥ በዕድሜ ልክ በኋለኛው ሰልፍ መቆም ይሻላል። ክርስቶስን ብታተርፍ የምታጣው ነገር ብዙም ግድ አይሰጥም። ብዙዎች ለዚህ ሕይወት ቈርጦ ያስቀራቸውንና ያሰናከላቸውን መከራ መቀበል ግድ እንደ ሆነባቸው አያጠራጥርም፤ ነገር ግን በዚህ ወደ ዘላለም ሕይወት ከገቡ ታላቅ ትርፍ አግኝተዋል።

ወዳጄ ሆይ፣ ነገሩ በጆን ባንየን ላይ እንደ ሆነው ሁሉ እንዲህ ያለ ነው፤ አንድ ድምፅ አሁን ይናገርሃል፤ እንዲህም ይላል—

ኃጢአትህን ይዘህ ወደ ገሃነም ትሄዳለህን?

ወይስ

ኃጢአትህን ትተህ ወደ መንግሥተ ሰማያት ትሄዳለህ?

ከዚህ ስፍራ ከመነሣትህ በፊት ጉዳዩ መወሰን አለበት። በእግዚአብሔር ስም እጠይቅሃለሁ፤ የትኛው ይሁን—ክርስቶስና መዳን ወይስ የምትወደው ኃጢአትና ኵነኔ? መካከለኛ መንገድ የለም። መዘግየት ወይም ለመወሰን እምቢ ማለት በተግባር ለክፉው እርግጠኛ ውሳኔ ማድረግ ነው። ሐቀኛ ይሁን አይሁን እያወጣና እያወረደ የሚቆም ሰው አስቀድሞ ከቀጥተኛው መስመር ወጥቷል፤ ከኃጢአት ሊነጻ ይወድ እንደ ሆነ የማያውቅ ሰውም የረከሰ ልብ እንዳለው ማስረጃ ይሰጣል።

ክፉውን መንገድ ሁሉ ለመተው ብትናፍቅ ጌታችን ኢየሱስ ወዲያውኑ ይህን ለማድረግ ያስችልሃል። ጸጋው የፍላጎትህን አቅጣጫ አስቀድሞ ለውጦታል፤ በእውነቱም ልብህ ታድሷል። ስለዚህ ፈተናዎች ሲነሡ እንድትዋጋቸው፣ የጌታንም ትእዛዛት ከቀን ወደ ቀን እንድትፈጽም እንዲያበረታህ በእርሱ ላይ ተደገፍ። ጌታ ኢየሱስ አንካሳውን እንደ ዋላ በማዘለልና ሽባዎች አልጋቸውን ተሸክመው እንዲሄዱ በማስቻል ታላቅ ነው። ክፉውን ልማድ እንድታሸንፍ ያስችልሃል። ዲያብሎስንም እንኳ ከአንተ ያወጣዋል። አዎን፣ ሰባት አጋንንት ቢኖሩብህ እንኳ በአንድ ጊዜ ሊያወጣቸው ይችላል፤ ለማንጻትና ለመቀደስ ያለው ኃይል ወሰን የለውም። አሁን ለመዳን ፈቃደኛ ስለ ሆንህ ታላቁ ችግር ተወግዷል። ፈቃድን ያቀና እርሱ የቀሩትን ኃይሎችህን ሁሉ ሊያስተካክልና ለምስጋናው እንዲሠሩ ሊያደርጋቸው ይችላል። እርሱ በስውር ወደዚያ አቅጣጫ ባያዘነብልህ ኖሮ ኃጢአትን ሁሉ ለመተው አጥብቀህ ባልተመኘህ ነበር። አሁን ብትታመንበት በአንተ መልካምን ሥራ እንደ ጀመረ ግልጥ ይሆናል፤ እኛም እርሱ ፍጻሜ እንደሚያደርሰው እርግጠኞች ነን።

---