በጸጋ፣ በእምነት በኩል

«ጸጋው በእምነት አድኖአችኋልና» (ኤፌሶን 2:8)።

አንባቢዬ የመዳናችንን ምንጭ — እርሱም የእግዚአብሔር ጸጋ ነው — በአምልኮ እንዲመለከት እጠይቀው ዘንድ ጥቂት ወደ ጎን ዘወር ማለት መልካም ይመስለኛል። «በጸጋ ድናችኋል»። እግዚአብሔር ቸርና ባለ ጸጋ ስለ ሆነ ኃጢአተኞች ሰዎች ይቅር ይባላሉ፣ ይመለሳሉ፣ ይነጻሉ፣ ይድናሉም። የሚድኑት በእነርሱ ውስጥ ባለ ወይም ወደ ፊት ሊኖር በሚችል በአንዳች ነገር ምክንያት አይደለም፤ ነገር ግን ወሰን በሌለው በእግዚአብሔር ፍቅር፣ ቸርነት፣ ሐዘኔታ፣ ርኅራኄ፣ ምሕረትና ጸጋ ምክንያት ነው። እንግዲህ በምንጩ አጠገብ ጥቂት ቆይ። ከእግዚአብሔርና ከበጉ ዙፋን የሚወጣውን ንጹሕ የሕይወት ውኃ ወንዝ ተመልከት!

የእግዚአብሔር ጸጋ እንዴት ያለ ጥልቅ ነው! ስፋቱን ማን ሊለካ ይችላል? ጥልቀቱንስ ማን ሊመረምር ይችላል? እንደ ሌሎቹ መለኮታዊ ባሕርያት ሁሉ ወሰን የለውም። እግዚአብሔር ፍቅር የሞላበት ነው፤ «እግዚአብሔር ፍቅር ነው»ና። እግዚአብሔር ቸርነት የሞላበት ነው፤ በእንግሊዝኛ «ጎድ» (እግዚአብሔር) የሚለው ስም ራሱ «ጉድ» (ቸር) ከሚለው ቃል የተገኘ አጭር አጠራር ነው። ወሰን የሌለው ቸርነትና ፍቅር የመለኮት ማንነት ራሱ አካል ናቸው። ሰዎች የማይጠፉት «ምሕረቱ ለዘላለም ነውና» ነው፤ ኃጢአተኞች ወደ እርሱ ቀርበው ይቅር የሚባሉት «ርኅራኄው አያልቅምና» ነው።

ይህን አስታውስ፤ አለዚያ የመዳን መተላለፊያ በሆነው በእምነት ላይ አእምሮህን እጅግ በማተኮር የእምነት ራሱ እንኳ ምንጭና መገኛ የሆነውን ጸጋ በመርሳት ወደ ስሕተት ልትወድቅ ትችላለህ። እምነት በእኛ ውስጥ ያለ የእግዚአብሔር ጸጋ ሥራ ነው። በመንፈስ ቅዱስ ካልሆነ በቀር ኢየሱስ እርሱ ክርስቶስ ነው ሊል የሚችል ማንም የለም። ኢየሱስ፦ «የላከኝ አብ ከሳበው በቀር» ይላል፤ «ወደ እኔ ሊመጣ የሚችል የለም»። ስለዚህ ወደ ክርስቶስ መምጣት የሆነው እምነት የመለኮታዊ መሳብ ውጤት ነው። ጸጋ የመዳን የመጀመሪያና የመጨረሻ አንቀሳቃሽ ምክንያት ነው፤ እምነት ደግሞ አስፈላጊ ቢሆንም ጸጋ ከሚጠቀምበት መሣሪያ አንድ ጠቃሚ ክፍል ብቻ ነው። የምንድነው «በእምነት» ነው፤ መዳን ግን «በጸጋ» ነው። እነዚህን ቃላት በሊቀ መላእክት መለከት እንደሚነገሩ ያህል አስተጋባቸው፦ «በጸጋ ድናችኋል።» ለማይገባቸው እንዴት ያለ የምሥራች ነው!

እምነት የመተላለፊያ ወይም የውኃ ቧንቧ ስፍራ ይይዛል። ጸጋ ምንጩና ጅረቱ ነው፤ እምነት ደግሞ የተጠሙትን የሰው ልጆች ለማደስ የምሕረት ጎርፍ የሚወርድበት የውኃ መውረጃ ቦይ ነው። የውኃ መውረጃው ሲሰበር እጅግ ያሳዝናል። በሮሜ ዙሪያ ቅስቶቻቸው ስለ ተሰበሩና አስደናቂ ሕንጻዎቻቸው ስለ ፈረሱ ከእንግዲህ ወደ ከተማዪቱ ውኃ የማያደርሱትን ብዙ የከበሩ የውኃ መውረጃዎች ማየት አሳዛኝ ትዕይንት ነው። ጅረቱን ለማድረስ የውኃ መውረጃው ሳይሰበር ሙሉ ሆኖ መጠበቅ አለበት፤ እንዲሁም እምነት ለነፍሳችን የሚጠቅም የምሕረት መተላለፊያ ይሆን ዘንድ እውነተኛና ጤናማ፣ እስከ እግዚአብሔር ድረስ ቀጥ ብሎ የሚደርስና እስከ እኛም ድረስ ቀጥ ብሎ የሚወርድ መሆን አለበት።

ሆኖም እምነት መተላለፊያ ወይም የውኃ መውረጃ ብቻ እንጂ ምንጩ እንዳልሆነ እንደ ገና አሳስብሃለሁ፤ በእግዚአብሔር ጸጋ ውስጥ ካለው ከበረከት ሁሉ መለኮታዊ ምንጭ በላይ ከፍ እስክናደርገው ድረስ ወደ እርሱ እጅግ መመልከት የለብንም። እምነትህን ከቶ ክርስቶስ አታድርገው፤ የመዳንህ ራሱን የቻለ ምንጭ እንደ ሆነም አታስብ። ሕይወታችን የምትገኘው ወደ ገዛ እምነታችን በመመልከት ሳይሆን «ወደ ኢየሱስ በመመልከት» ነው። በእምነት ሁሉ ነገር ይቻለናል፤ ነገር ግን ኃይሉ በእምነት ውስጥ ሳይሆን እምነት በሚደገፍበት በእግዚአብሔር ውስጥ ነው። ጸጋ ብርቱው ሞተር ነው፤ እምነት ደግሞ የነፍስን ሠረገላ ከታላቁ አንቀሳቃሽ ኃይል ጋር የሚያያይዘው ሰንሰለት ነው። የእምነት ጽድቅ የእምነት የሥነ ምግባር ብቃት አይደለም፤ ነገር ግን እምነት የሚጨብጠውና የራሱ የሚያደርገው የኢየሱስ ክርስቶስ ጽድቅ ነው። በነፍስ ውስጥ ያለው ሰላም የገዛ እምነታችንን በማሰላሰል የሚገኝ አይደለም፤ ነገር ግን ሰላማችን ከሆነው ከእርሱ ወደ እኛ ይመጣል፤ እምነት የልብሱን ጫፍ ይዳስሳል፤ ኃይልም ከእርሱ ወጥቶ ወደ ነፍስ ይገባል።

እንግዲህ ውድ ወዳጄ ሆይ፣ የእምነትህ ድካም እንደማያጠፋህ ተመልከት። የምትንቀጠቀጥ እጅ የወርቅ ስጦታን ልትቀበል ትችላለች። የሰናፍጭ ቅንጣት የሚያህል እምነት ብቻ ቢኖረንም የጌታ መዳን ወደ እኛ ሊመጣ ይችላል። ኃይሉ ያለው በእግዚአብሔር ጸጋ ውስጥ እንጂ በእምነታችን ውስጥ አይደለም። ታላላቅ መልእክቶች በቀጫጭን ሽቦዎች ሊላኩ ይችላሉ፤ ሰላም የሚሰጠው የመንፈስ ቅዱስ ምስክርነትም የራሱን ክብደት እንኳ ለመሸከም የማይችል በሚመስል፣ እንደ ፈትል በቀጠነ እምነት አማካይነት ወደ ልብ ሊደርስ ይችላል። ከመመልከቱ ይልቅ ወደምትመለከተው ወደ እርሱ አብልጠህ አስብ። ከገዛ መመልከትህ እንኳ ዓይንህን መልሰህ ከኢየሱስና በእርሱ ከተገለጠው ከእግዚአብሔር ጸጋ በቀር ምንም ማየት የለብህም።