ኃጢአት ከመሥራት ስለ መዳን

በዚህ ስፍራ በክርስቶስ ኢየሱስ ያለውን በእምነት የመጽደቅን መንገድ ለሚያስተውሉ፣ ነገር ግን ችግራቸው ኃጢአት ከመሥራት ማቆም አለመቻላቸው ለሆነ ሰዎች አንድ ሁለት ግልጥ ቃል ልናገር እወዳለሁ። ቅዱሳን እስክንሆን ድረስ ደስተኞች፣ ዕረፍት ያለን ወይም በመንፈስ ጤነኞች ልንሆን ከቶ አንችልም። ከኃጢአት ልንላቀቅ ይገባናል፤ ነገር ግን ይህ መላቀቅ እንዴት ይፈጸማል? ይህ ለብዙዎች የሕይወትና የሞት ጥያቄ ነው። አሮጌው ተፈጥሮ እጅግ ብርቱ ነው፤ ሊገቱትና ሊገሩትም ሞክረዋል፤ ነገር ግን አይገዛም፤ የተሻሉ ለመሆን ቢጓጉም ከቀድሞው ይልቅ እየባሱ እንደ ሄዱ ሆኖ ያገኙታል። ልብ እጅግ ደንዳና፣ ፈቃድ እጅግ እልኸኛ፣ ስሜቶች እጅግ ቍጡዎች፣ አሳቦች እጅግ ተለዋዋጮች፣ ምናብ እጅግ የማይገታ፣ ምኞቶችም እጅግ ዱር ስለ ሆኑ፣ ሰውየው በውስጡ የአራዊት ዋሻ እንዳለ ይሰማዋል፤ እነዚያም አራዊት እርሱ ከሚገዛቸው ይልቅ ቀድመው ይበሉታል። ስለ ወደቀው ተፈጥሮአችን ጌታ ስለ ሌዋታን ለኢዮብ የተናገረውን ልንል እንችላለን፦ «ከወፍ ጋር እንደምትጫወት ከእርሱ ጋር ትጫወታለህን? ወይስ ለቈነጃጅቶችህ ታስረዋለህን?» ሰው በወደቀው ተፈጥሮው ውስጥ የሚኖሩትን እነዚያን ሁከተኛ ኃይሎች በገዛ ብርታቱ እገዛለሁ ብሎ ከሚጠብቅ፣ የሰሜንን ነፋስ በእጁ መዳፍ ውስጥ እይዛለሁ ብሎ ተስፋ ቢያደርግ ይሻለው ነበር። ይህ በአፈ ታሪክ ከሚነገሩት የሄርኩለስ ድካሞች ሁሉ የሚበልጥ ገድል ነው፤ እዚህ እግዚአብሔር ያስፈልጋል።

«ኢየሱስ ኃጢአትን ይቅር እንደሚል ማመን እችል ነበር» ይላል አንድ ሰው፤ «ነገር ግን ችግሬ እንደ ገና ኃጢአት መሥራቴና በውስጤም ወደ ክፉ የሚስብ እንዲህ ያለ አስፈሪ ዝንባሌ መሰማቱ ነው። ድንጋይ ወደ አየር ቢወረወር ፈጥኖ ወደ መሬት እንደሚመለስ፣ እኔም እንዲሁ በልባዊ ስብከት ወደ ሰማይ ብላክም እንኳ እንደ ገና ወደ ደነዘዘው ሁኔታዬ እመለሳለሁ። ወዮልኝ! እይታው እንደሚያፈዝ አፈ ታሪካዊ እባብ ባሉት በኃጢአት ዓይኖች በቀላሉ እማረካለሁ፤ በድግምት እንደ ታሰረ ሰው ተይዤ እኖራለሁ፤ ከገዛ ሞኝነቴም ማምለጥ አልችልም።»

ውድ ወዳጄ ሆይ፣ መዳን ይህን የፈራረሰውን ሁኔታችንን ክፍል ባይመለከት እጅግ ጐደሎ ጉዳይ በሆነ ነበር። ይቅር መባል ብቻ ሳይሆን መንጻትም እንፈልጋለን። መቀደስ የሌለበት መጽደቅ ከቶ መዳን አይሆንም። ለምጻሙን ንጹሕ ብሎ ጠርቶ በበሽታው እንዲሞት በተወው ነበር፤ ዓመፁን ይቅር ብሎ ዓመፀኛው የንጉሡ ጠላት ሆኖ እንዲቀር በፈቀደለት ነበር። ውጤቶቹን አስወግዶ መንሥኤውን ቸል ባለ ነበር፤ ይህም ማለቂያ የሌለውና ተስፋ ቢስ ሥራ በፊታችን በተወ ነበር። ጅረቱን ለጊዜው ገድቦ የርኵሰትን ምንጭ ክፍት አድርጎ በተወ ነበር፤ ያም ምንጭ ይዋል ይደር እንጂ በበለጠ ኃይል ፈንድቶ በወጣ ነበር። ጌታ ኢየሱስ ኃጢአትን በሦስት መንገድ ሊያስወግድ እንደ መጣ አስታውስ፤ የኃጢአትን ቅጣት፣ የኃጢአትን ኃይል፣ በመጨረሻም የኃጢአትን መኖር ሊያስወግድ መጣ። ሁለተኛውን ክፍል ወዲያውኑ ልትደርስበት ትችላለህ — የኃጢአት ኃይል ወዲያውኑ ሊሰበር ይችላል፤ እንዲሁም ወደ ሦስተኛው፣ ማለትም የኃጢአት መኖር ወደሚወገድበት፣ በሚያደርሰው መንገድ ላይ ትሆናለህ። «እርሱም ኃጢአትን ሊያስወግድ እንደ ተገለጠ ታውቃላችሁ።»

መልአኩ ስለ ጌታችን፦ «እርሱ ሕዝቡን ከኃጢአታቸው ያድናቸዋልና ስሙን ኢየሱስ ትለዋለህ» አለ። ጌታችን ኢየሱስ የመጣው በእኛ ውስጥ ያለውን የዲያብሎስን ሥራ ሊያፈርስ ነው። በጌታችን ልደት የተነገረው በሞቱም ደግሞ ተገለጠ፤ ወታደሩ ጎኑን በወጋው ጊዜ ወዲያውም ደምና ውኃ ወጣ፤ ይህም ከኃጢአት በደልና ርኵሰት የምንድንበትን ድርብ ፈውስ የሚያሳይ ነው።

ነገር ግን ስለ ኃጢአት ኃይልና ስለ ተፈጥሮህ ዝንባሌዎች ብትታወክ — መታወክህም ተገቢ ነው — ለአንተ የሚሆን የተስፋ ቃል ይኸውልህ። እመነው፤ በነገር ሁሉ በተዘጋጀውና በጸናው በዚያ የጸጋ ቃል ኪዳን ውስጥ የቆመ ነውና። ሊዋሽ የማይችል እግዚአብሔር በሕዝቅኤል 36:26 እንዲህ ብሎአል፦

አዲስ ልብ እሰጣችኋለሁ፥ በውስጣችሁም አዲስ መንፈስ አኖራለሁ፤ የድንጋዩንም ልብ ከሥጋችሁ አወጣለሁ፥ የሥጋንም ልብ እሰጣችኋለሁ።

አየህን፣ ሁሉም «አደርጋለሁ»፣ «አደርጋለሁ» ነው። «እሰጣለሁ»፣ «አወጣለሁ»። ይህ ፈቃዱን ሁሉ ሊፈጽም የሚችለው የነገሥታት ንጉሥ ንጉሣዊ አነጋገር ነው። ከቃሉ አንዲቱ እንኳ ከቶ ወደ ምድር አትወድቅም።

ልብህን ልትለውጥ፣ ተፈጥሮህንም ልታነጻ እንደማትችል ጌታ በሚገባ ያውቃል፤ ነገር ግን እርሱ ሁለቱንም ሊያደርግ እንደሚችል ደግሞ ያውቃል። ኢትዮጵያዊው ቁርበቱን፣ ነብርም ዝንጕርጕርነቱን እንዲለውጥ ሊያደርግ ይችላል። ይህን ስማ፤ ተደነቅም፤ ዳግመኛ ሊፈጥርህ ይችላል፤ ዳግመኛ እንድትወለድ ሊያደርግህ ይችላል። ይህ የጸጋ ተአምር ነው፤ መንፈስ ቅዱስ ግን ይፈጽመዋል። አንድ ሰው በናያጋራ ፏፏቴ ግርጌ ቆሞ የናያጋራ ወንዝ ወደ ላይ ተመልሶ መፍሰስ እንዲጀምር፣ አሁን በሚያስደነግጥ ኃይል ወደሚወርድበትም ወደዚያ ታላቅ ገደል ዘሎ እንዲወጣ የሚያደርግ ቃል መናገር ቢችል እጅግ አስደናቂ ነገር በሆነ ነበር። ያን ድንቅ ሊፈጽም የሚችል ከእግዚአብሔር ኃይል በቀር ምንም የለም፤ ነገር ግን የተፈጥሮህ አቅጣጫ ፈጽሞ ቢገለበጥ ለሚሆነው ነገር ያ ተገቢ ምሳሌ ከመሆንም በላይ ነው። በእግዚአብሔር ዘንድ ሁሉ ይቻላል። የፍላጎቶችህን አቅጣጫና የሕይወትህን ፍሰት ሊገለብጥ ይችላል፤ ከእግዚአብሔር ርቀህ ወደ ታች ከመሄድ ይልቅ መላው ማንነትህ ወደ ላይ ወደ እግዚአብሔር እንዲያዘነብል ሊያደርግ ይችላል። በእርግጥም ጌታ በቃል ኪዳኑ ውስጥ ላሉት ሁሉ ሊያደርግ የገባው ቃል ይህ ነው፤ አማኞች ሁሉ በቃል ኪዳኑ ውስጥ እንዳሉም ከመጽሐፍ ቅዱስ እናውቃለን። ቃሉን እንደ ገና ላንብብ፦

በውስጣችሁም አዲስ መንፈስ አኖራለሁ፤ የድንጋዩንም ልብ ከሥጋችሁ አወጣለሁ፥ የሥጋንም ልብ እሰጣችኋለሁ (ሕዝቅኤል 11:19)።

እንዴት ያለ ድንቅ የተስፋ ቃል ነው! ደግሞም በክርስቶስ ኢየሱስ አዎንና አሜን ነው፤ በእኛም በኩል ለእግዚአብሔር ክብር ነው። አጥብቀን እንያዘው፤ እውነት እንደ ሆነ እንቀበለው፤ የራሳችንም እናድርገው። ያን ጊዜ በእኛ ይፈጸማል፤ በሚመጡትም ቀናትና ዓመታት የእግዚአብሔር ሉዓላዊ ጸጋ በእኛ ውስጥ ስላደረገው ስለዚያ አስደናቂ ለውጥ እንዘምራለን።

ጌታ የድንጋዩን ልብ ሲያወጣ ያ ሥራ መፈጸሙን፣ አንድ ጊዜ ከተፈጸመም በኋላ እርሱ የሚሰጠውን ያን አዲስ ልብና በውስጣችን የሚያኖረውን ያን ቅን መንፈስ ሊወስድ የሚችል የታወቀ ኃይል ከቶ አለመኖሩን ማሰብ እጅግ ተገቢ ነው። «እግዚአብሔር በጸጋው ስጦታና በመጥራቱ አይጸጸትም»፤ ይህም ማለት በእርሱ በኩል ጸጸት የለም ማለት ነው፤ አንድ ጊዜ የሰጠውን መልሶ አይወስድም። ያድስህ፤ አንተም ትታደሳለህ። የሰው ማሻሻያና ማጽጃ ፈጥኖ ያከትማል፤ ውሻ ወደ ትፋቱ ይመለሳልና፤ እግዚአብሔር ግን አዲስ ልብ በውስጣችን ሲያኖር አዲሱ ልብ ለዘላለም በዚያ ይኖራል፤ ከቶም እንደ ገና ደንድኖ ድንጋይ አይሆንም። ሥጋ ያደረገው እርሱ እንዲሁ ይጠብቀዋል። እግዚአብሔር በጸጋው መንግሥት በሚፈጥረው ነገር በዚህ ለዘላለም ደስ ልንሰኝና ሐሤት ልናደርግ እንችላለን።

ነገሩን በጣም ቀላል አድርጌ ላስቀምጠው — ሮውላንድ ሂል ስለ ድመትና ስለ እርያ የሰጠውን ምሳሌ ሰምተህ ታውቃለህን? የአዳኛችንን ትርጕም ያለው ቃል — «ዳግመኛ ልትወለዱ ያስፈልጋችኋል» የሚለውን — ለማብራራት በራሴ አገላለጽ እነግርሃለሁ። ያቺን ድመት ታያታለህን? እንዴት ያለች ንጽሕት ፍጥረት ናት! በምላሷና በመዳፎቿ ራሷን እንዴት በብልሃት ታጥባለች! ማየቱ እጅግ ያምራል! እርያ እንዲህ ስታደርግ አይተህ ታውቃለህን? አይደለም፤ ከቶ አላየህም። ከተፈጥሮዋ ጋር ይቃረናል። በጭቃ መንከባለልን ትመርጣለች። ሄደህ እርያን ራሷን እንድትታጠብ አስተምራት፤ ምን ያህል ጥቂት ስኬት እንደምታገኝም ተመልከት። እርያዎች ንጹሓን ቢሆኑ ለንጽሕና ታላቅ መሻሻል በሆነ ነበር። ድመቷ ስታደርግ እንደ ነበረው ራሳቸውን እንዲያጥቡና እንዲያነጹ አስተምራቸው! ከንቱ ድካም ነው። ያቺን እርያ በግድ ልታጥባት ትችላለህ፤ እርሷ ግን ወደ ጭቃው ትቸኩላለች፤ ፈጥናም እንደ ቀድሞው ትቆሽሻለች። እርያን ራሷን እንድታጥብ ልታደርጋት የምትችልበት ብቸኛው መንገድ ወደ ድመት መለወጥ ነው፤ ያን ጊዜ ትታጠባለች፤ ንጹሕም ትሆናለች፤ ከዚያ በፊት ግን አይሆንም! ያ ለውጥ ተፈጽሞአል እንበል፤ ያን ጊዜ አስቸጋሪ ወይም የማይቻል የነበረው ነገር እጅግ ቀላል ይሆናል፤ ከዚያ ወዲያ እርያዋ ለእንግዳ መቀበያ ክፍልህና ለምድጃህ ዳር ምንጣፍ የምትበቃ ትሆናለች። እግዚአብሔርን የማይፈራ ሰውም እንዲሁ ነው፤ የታደሰ ሰው በታላቅ ፈቃደኛነት የሚያደርገውን ነገር እንዲያደርግ ልታስገድደው አትችልም፤ ልታስተምረው፣ መልካምም ምሳሌ ልትሆነው ትችላለህ፤ እርሱ ግን የቅድስናን ጥበብ ሊማር አይችልም፤ ልቡ ወደ እርሱ አያዘነብልምና፤ ተፈጥሮው በሌላ መንገድ ይመራዋል። ጌታ አዲስ ሰው ሲያደርገው ግን ሁሉ ነገር ሌላ መልክ ይይዛል። ይህ ለውጥ እጅግ ታላቅ ስለ ሆነ አንድ አዲስ አማኝ፦ «ወይ ዓለም ሁሉ ተለውጦአል፣ ወይ እኔ ተለውጫለሁ» ሲል ሰምቻለሁ። አሮጌው ተፈጥሮ ወደ ስሕተት እንደሚቅበዘበዝ፣ አዲሱ ተፈጥሮ እንዲሁ በተፈጥሮ ትክክለኛውን ይከተላል። እንዲህ ያለውን ተፈጥሮ መቀበል እንዴት ያለ በረከት ነው! ሊሰጠው የሚችል መንፈስ ቅዱስ ብቻ ነው።

ጌታ ለአንድ ሰው አዲስ ልብና ቅን መንፈስ መስጠቱ እንዴት ያለ አስደናቂ ነገር እንደ ሆነ ታስቦህ ያውቃልን? ምናልባት ከሌላ የባሕር ሸርጣን ጋር ተጣልቶ አንዱን ጥፍሩን ያጣ፣ በምትኩም አዲስ ጥፍር ያበቀለ የባሕር ሸርጣን አይተህ ይሆናል። ያ አስደናቂ ነገር ነው፤ ነገር ግን ለሰው አዲስ ልብ መሰጠቱ እጅግ የበለጠ የሚያስገርም እውነታ ነው። ይህ በእርግጥ ከተፈጥሮ ኃይሎች በላይ የሆነ ተአምር ነው። እነሆ አንድ ዛፍ አለ። ከቅርንጫፎቹ አንዱን ብትቈርጥ በቦታው ሌላ ሊበቅል ይችላል፤ ነገር ግን ዛፉን ልትለውጠው ትችላለህን? ጐምዛዛውን ጭማቂ ልታጣፍጠው ትችላለህን? እሾሁ በለስ እንዲያፈራ ልታደርገው ትችላለህን? የተሻለ ነገር ልታጣብቅበት ትችላለህ፤ ተፈጥሮም ስለ ጸጋ ሥራ የምትሰጠን ምሳሌ ይህ ነው፤ ነገር ግን የዛፉን የሕይወት ጭማቂ ፈጽሞ መለወጥ በእርግጥ ተአምር በሆነ ነበር። እግዚአብሔር በኢየሱስ በሚያምኑ ሁሉ ውስጥ እንዲህ ያለውን የኃይል ድንቅና ምሥጢር ይሠራል።

ራስህን ለመለኮታዊ አሠራሩ ብታስገዛ ጌታ ተፈጥሮህን ይለውጣል፤ አሮጌውን ተፈጥሮ ያስገዛል፤ አዲስ ሕይወትንም እፍ ይልብሃል። በጌታ በኢየሱስ ክርስቶስ ታመን፤ እርሱም የድንጋዩን ልብ ከሥጋህ ያወጣል፤ የሥጋንም ልብ ይሰጥሃል። ሁሉ ደንዳና በነበረበት ሁሉ ልስልስ ይሆናል፤ ሁሉ ክፉ በነበረበት ሁሉ በጎ ይሆናል፤ ሁሉ ወደ ታች ያዘነብል በነበረበት ሁሉ በብርቱ ግፊት ወደ ላይ ይነሣል። የቍጣ አንበሳ ለየዋህነት በግ ስፍራውን ይለቃል፤ የርኵሰት ቍራ ከንጽሕና ርግብ ፊት ይሸሻል፤ ወራዳው የተንኰል እባብ በእውነት ተረከዝ ሥር ይረገጣል።

በገዛ ዓይኖቼ እጅግ አስደናቂ የሆኑ የሥነ ምግባርና የመንፈሳዊ ጠባይ ለውጦችን ስላየሁ በማንም ተስፋ አልቈርጥም። ተገቢ ቢሆን ኖሮ፣ ቀድሞ ዘማውያን የነበሩ አሁን ግን እንደ ተነዳ በረዶ ንጹሓን የሆኑ ሴቶችን፣ ቀድሞ ተሳዳቢዎች የነበሩ አሁን ግን በጥልቅ ትጋታቸው በዙሪያቸው ያሉትን ሁሉ ደስ የሚያሰኙ ወንዶችን ልጠቍም እችል ነበር። ሌቦች ሐቀኞች፣ ሰካራሞች በመጠን የሚኖሩ፣ ውሸታሞች እውነተኞች፣ ዘባቾችም ቀናተኞች ይሆናሉ። የእግዚአብሔር ጸጋ ለአንድ ሰው በተገለጠበት ሁሉ ኃጢአተኝነትንና ዓለማዊ ምኞትን እንዲክድ፣ በዚህም ክፉ በሆነው በአሁኑ ዓለም ራሱን በመግዛትና በጽድቅ እግዚአብሔርንም በመምሰል እንዲኖር አሠልጥኖታል፤ ውድ አንባቢ ሆይ፣ ለአንተም እንዲሁ ያደርግልሃል።

«ይህን ለውጥ ማድረግ አልችልም» ይላል አንድ ሰው። ትችላለህ ያለህ ማን ነው? የጠቀስነው መጽሐፍ የሚናገረው ሰው ስለሚያደርገው ሳይሆን እግዚአብሔር ስለሚያደርገው ነው። የእግዚአብሔር የተስፋ ቃል ነው፤ የገባውን ቃል መፈጸምም የእርሱ ፈንታ ነው። ቃሉን ለአንተ እንዲፈጽም በእርሱ ታመን፤ ይፈጸማልም።

«ነገር ግን እንዴት ይደረጋል?» ይህ አንተን ምን ይመለከትሃል? ጌታ ከማመንህ በፊት አሠራሩን ሊያብራራልህ ይገባዋልን? በዚህ ጉዳይ የጌታ አሠራር ታላቅ ምሥጢር ነው፤ የሚፈጽመው መንፈስ ቅዱስ ነው። የተስፋውን ቃል የሰጠው እርሱ የተስፋውን ቃል የመጠበቅ ኃላፊነት አለበት፤ ለጉዳዩም በቂ ነው። ይህን አስደናቂ ለውጥ ተስፋ የሰጠ እግዚአብሔር ኢየሱስን በሚቀበሉ ሁሉ ውስጥ በእርግጥ ይፈጽመዋል፤ ለእንደነዚህ ሁሉ የእግዚአብሔር ልጆች ይሆኑ ዘንድ ሥልጣንን ይሰጣቸዋልና። ኦ፣ ምነው ብታምነው! ኦ፣ ታላቅ ተአምር ቢሆንም ይህን ለአንተ ሊያደርግ እንደሚችልና እንደሚያደርግ በማመን ለቸሩ ጌታ የሚገባውን ክብር ምነው ብትሰጠው! ኦ፣ እግዚአብሔር ሊዋሽ እንደማይችል ምነው ብታምን! ኦ፣ ለአዲስ ልብና ለቅን መንፈስ ምነው በእርሱ ብትታመን፤ ሊሰጥህ ይችላልና! ጌታ በተስፋ ቃሉ እምነትን፣ በልጁ እምነትን፣ በመንፈስ ቅዱስ እምነትን፣ በእርሱም እምነትን ይስጥህ፤ ለእርሱም ምስጋናና ክብር ግርማም ከዘላለም እስከ ዘላለም ይሁን! አሜን።