መደምደሚያ

አንባቢዬ ገጾቼን ሲያነብ ደረጃ በደረጃ ካልተከተለኝ በእውነት አዝናለሁ። በአእምሮ ፊት የሚያልፉት እውነቶች ካልተጨበጡ፣ የግል ገንዘብ ካልተደረጉና ወደ ተግባራዊ ፍጻሜያቸው ካልደረሱ መጽሐፍ ማንበብ ጥቅሙ ጥቂት ነው። ይህ አንድ ሰው በሱቅ ውስጥ ብዙ ምግብ አይቶ፣ ከእርሱ ግን ራሱ ስላልበላ ተርቦ እንደ መቅረት ነው። ውድ አንባቢዬ፣ ጌታዬን ክርስቶስ ኢየሱስን በእርግጥ ካልያዝኸው፣ እኔና አንተ መገናኘታችን ሁሉ ከንቱ ነው። በእኔ በኩል አንተን ለመጥቀም ግልጥ ፍላጎት ነበረኝ፤ ለዚህም የምችለውን ሁሉ አድርጌአለሁ። ያን መብት ለማግኘት ናፍቄ ነበርና በጎ ልሠራልህ ባለመቻሌ ያሳዝነኛል። ይህን ገጽ ስጽፍ አንተን እያሰብሁ ነበር፤ ብዕሬንም አስቀምጬ ለሚያነቡት ሁሉ በታላቅ አክብሮት ተንበርክኬ ጸለይሁ። አንተ ከእነርሱ ቍጥር ለመሆን እምቢ ብትል እንኳ፣ እጅግ ብዙ አንባቢዎች በረከትን እንደሚያገኙ ጽኑ እምነቴ ነው። ነገር ግን ስለ ምን እምቢ ትላለህ? ላመጣልህ የወደድሁትን የተመረጠ በረከት የማትፈልገው ከሆነ፣ ቢያንስ የመጨረሻው ጥፋትህ በደል በእኔ ደጅ ላይ እንደማይወድቅ በመቀበል ፍትሕን አድርግልኝ። ሁለታችን በታላቁና በነጩ ዙፋን ፊት በምንገናኝበት ጊዜ፣ ትንሿን መጽሐፌን ስታነብ ልትሰጠኝ የወደድኸውን ትኵረት በከንቱ እንዳባከንሁ ልትከሰኝ አትችልም። እያንዳንዱን መስመር ለዘላለማዊ መልካምህ እንደ ጻፍሁ እግዚአብሔር ያውቃል። አሁን በመንፈስ እጅህን እይዛለሁ። አጥብቄ እጨብጥሃለሁ። የወንድምነት ጭብጤ ይሰማሃልን? እያየሁህ እንባ በዓይኖቼ ሞልቶ እንዲህ እልሃለሁ፦ ለምን ትሞታለህ? ለነፍስህ ትንሽ እንኳ አታስብምን? በግዴለሽነት ብቻ ትጠፋለህን? ኦ፣ እንዲህ አታድርግ፤ ይልቁንም እነዚህን ከባድ ነገሮች መዝን፤ የዘላለም ጉዳይህንም አረጋግጥ! ኢየሱስን፣ ፍቅሩን፣ ደሙን፣ መዳኑን እምቢ አትበል። ስለ ምን እንዲህ ታደርጋለህ? ልታደርገውስ ትችላለህን?

እለምንሃለሁ፦

ከቤዛህ ፊትህን አትመልስ!

በሌላ በኩል ግን ጸሎቴ ተሰምቶ፣ አንባቢዬ ሆይ፣ አንተ በጌታ ኢየሱስ እንድትታመንና ከእርሱ በጸጋ መዳንን እንድትቀበል ተመርተህ ከሆነ፣ ይህን ትምህርትና ይህን የአኗኗር መንገድ ዘወትር አጥብቀህ ያዝ። ኢየሱስ ሁሉ በሁሉ ይሁንልህ፤ ነጻ ጸጋም የምትኖርበትና የምትንቀሳቀስበት ብቸኛ መስመር ይሁን። በእግዚአብሔር ሞገስ እንደሚኖር ሰው ያለ ሕይወት የለም። ሁሉንም እንደ ነጻ ስጦታ መቀበል አእምሮን ራስን ከማመጻደቅ ትዕቢትና ራስን ከመክሰስ ተስፋ መቍረጥ ይጠብቃል። ልብን በምስጋና ፍቅር ያሞቀዋል፤ በዚህም ከባርነት ፍርሃት ሊመጣ ከሚችል ከማንኛውም ነገር ይልቅ በእግዚአብሔር ዘንድ እጅግ እጅግ ተቀባይነት ያለውን ስሜት በነፍስ ውስጥ ይፈጥራል። የሚችሉትን ሁሉ በማድረግ ለመዳን ተስፋ የሚያደርጉ ሰዎች፣ እንደ እግዚአብሔር ጸጋ በነጻ ከተሰጠ መዳን ጋር የሚመጣውን ያን የሚነድድ ትጋት፣ ያን የተቀደሰ ሙቀት፣ በእግዚአብሔርም ያን ጥልቅ ደስታ ከቶ አያውቁም። ራስን በራስ የማዳን የባርነት መንፈስ ደስተኛውን የልጅነት መንፈስ ሊተካከለው አይችልም። ሕግን ከሚያገለግሉ ባሪያዎች ልፋት ሁሉ፣ ወይም በሥርዓቶች መሰላል ወደ ሰማይ ለመውጣት ከሚጥሩ ሃይማኖተኞች አድካሚ ድካም ሁሉ ይልቅ በትንሹ የእምነት ስሜት ውስጥ የበለጠ እውነተኛ በጎነት አለ። እምነት መንፈሳዊ ነው፤ እግዚአብሔር መንፈስ ነውና ስለዚህ ምክንያት በእምነት ደስ ይለዋል። ለዓመታት ጸሎትን መደጋገም፣ ወደ ቤተ ክርስቲያን ወይም ወደ ጸሎት ቤት መመላለስ፣ ሥርዓቶችንና ሃይማኖታዊ ትዕይንቶችን መፈጸም በእግዚአብሔር ፊት አስጸያፊ ብቻ ሊሆኑ ይችላሉ፤ ከእውነተኛ እምነት ዓይን የሚወጣ አንዲት እይታ ግን መንፈሳዊ ናት፤ ስለዚህም በእርሱ ዘንድ የተወደደች ናት። «አብ ሊሰግዱለት እንደ እነዚህ ያሉትን ይሻልና»። በመጀመሪያ ውስጣዊውን ሰውና መንፈሳዊውን ነገር ተመልከት፤ የቀረውም ከዚያ በኋላ በጊዜው ይከተላል።

አንተ ራስህ ድነህ ከሆነ፣ ለሌሎች ነፍሳት ንቁ ሁን። ባልንጀሮችህን ለመባረክ በብርቱ ጭንቀት ካልተሞላ በቀር የገዛ ልብህ አይለመልምም። የነፍስህ ሕይወት በእምነት ውስጥ ነው፤ ጤናዋ ደግሞ በፍቅር ውስጥ ነው። ሌሎችን ወደ ኢየሱስ ለመምራት የማይናፍቅ ሰው እርሱ ራሱ ከቶ በፍቅር ኃይል ሥር አልወደቀም። ወደ ጌታ ሥራ—ወደ ፍቅር ሥራ—ግባ። ከቤትህ ጀምር። ቀጥሎ ጎረቤቶችህን ጐብኝ። የምትኖርበትን መንደር ወይም መንገድ አብራ። እጅህ በሚደርስበት ስፍራ ሁሉ የጌታን ቃል ዝራ።

አንባቢዬ ሆይ፣ በሰማይ ተገናኘኝ! ወደ ሲኦል አትውረድ። ከዚያ የጭንቅ መኖሪያ ተመልሶ መምጣት የለም። የሰማይ ደጅ በፊትህ ተከፍቶ ሳለ ወደ ሞት መንገድ ለመግባት ስለ ምን ትሻለህ? ኢየሱስ ለሚታመኑበት ሁሉ የሚሰጠውን ነጻ ይቅርታና ሙሉ መዳን እምቢ አትበል። አታመንታ፤ አታዘግይም። ውሳኔ ብቻ እያደረግህ የቆየኸው ይበቃል፤ ወደ ተግባር ና። በሙሉና በፈጣን ውሳኔ አሁኑኑ በኢየሱስ እመን። ቃልን ይዘህ ዛሬ፣ አዎን ዛሬውኑ ወደ ጌታህ ና። ነፍስ ሆይ፣ አስታውስ፤ ለአንተ ምርጫው

አሁን ወይም ከቶውንም

ሊሆን ይችላል። አሁን ይሁን፤ ከቶውንም ቢሆን እጅግ አስፈሪ ነው።

ደግሞም አደራ እልሃለሁ፦

በሰማይ ተገናኘኝ።