መጽናት

ጳውሎስ ለቅዱሳን ሁሉ በልበ ሙሉነት የጠበቀውን ዋስትና ልብ እንድትል እፈልጋለሁ። እንዲህ ይላል፦ «በጌታችን በኢየሱስ ክርስቶስ ቀን ያለ ነቀፋ እንድትሆኑ እስከ ፍጻሜ ድረስ ያጸናችኋል።» ከሁሉ በላይ ሊመኙት የሚገባው መጽናት እንዲህ ያለው ነው። እንደምታየው፣ ሰዎቹ በትክክለኛው መንገድ ላይ እንዳሉ ይገምታል፤ በዚያውም ትክክለኛ መንገድ ሊያጸናቸው ያስባል። ሰውን በኃጢአትና በስሕተት መንገድ ማጽናት አስፈሪ ነገር በሆነ ነበር። በስካሩ የጸናን ሰካራም፣ ወይም በሌብነቱ የጸናን ሌባ፣ ወይም በውሸቱ የጸናን ውሸታም አስብ። ሰው በአለማመንና እግዚአብሔርን ባለመፍራት ቢጸና የሚያሳዝን ነገር በሆነ ነበር። መለኮታዊውን ማጽናት ሊያገኙ የሚችሉት የእግዚአብሔር ጸጋ አስቀድሞ የተገለጠላቸው ብቻ ናቸው። ይህ የመንፈስ ቅዱስ ሥራ ነው። እምነትን የሚሰጥ እርሱ ያበረታዋል፤ ያጸናዋልም፤ በእኛ ውስጥ ፍቅርን የሚያቀጣጥል እርሱ ይጠብቀዋል፤ ነበልባሉንም ያበዛዋል። በመጀመሪያ ትምህርቱ እንድናውቅ ያደረገንን ነገር ቸሩ መንፈስ በተጨማሪ ትምህርት ይበልጥ በግልጥና በእርግጠኝነት እንድናውቀው ያደርገናል። ቅዱሳት ተግባራት ልማድ እስኪሆኑ ድረስ ይጸናሉ፤ ቅዱሳት ስሜቶችም ቋሚ ሁኔታዎች እስኪሆኑ ድረስ ይጸናሉ። ልምምድና ተግባር እምነቶቻችንንና ውሳኔዎቻችንን ያጸናሉ። ደስታዎቻችንም ኀዘኖቻችንም፣ ስኬቶቻችንም ውድቀቶቻችንም ለዚያው ለአንዱ ዓላማ ይቀደሳሉ፤ ዛፍ በለስላሳው ካፊያም በብርቱውም ነፋስ ሥር እንዲሰድ እንደሚረዳ እንዲሁ ነው። አእምሮ ይማራል፤ በሚያድገውም እውቀቱ በመልካሙ መንገድ ለመጽናት ምክንያቶችን ይሰበስባል፤ ልብ ይጽናናል፤ በዚህም የሚያጽናናውን እውነት ይበልጥ አጥብቆ እንዲይዝ ይደረጋል። መያዙ ይበልጥ ይጠብቃል፤ እርምጃውም ይበልጥ ይረጋል፤ ሰውየውም ራሱ ይበልጥ ጠንካራና ጽኑ ይሆናል።

ይህ ተራ ተፈጥሮአዊ እድገት አይደለም፤ እንደ ልብ መለወጥ ሁሉ የመንፈስ ቅዱስ የተለየ ሥራ ነው። ጌታ ለዘላለም ሕይወት በእርሱ ለሚታመኑ በእርግጥ ይሰጠዋል። በውስጣዊ አሠራሩ «እንደ ውኃ የሚዋልሉ» ከመሆን ያድነናል፤ ተተክለንና መሠረት ተመሥርተን እንድንኖርም ያደርገናል። ይህ እኛን በክርስቶስ ኢየሱስ ማነጹና በእርሱ እንድንኖር ማድረጉ የሚያድነን የአሠራሩ አንድ ክፍል ነው። ውድ አንባቢ ሆይ፣ ይህን በየዕለቱ ልትጠብቅ ትችላለህ፤ ተስፋህም ከንቱ አይቀርም። የምትታመንበት እርሱ በውኃ ፈሳሾች ዳር እንደ ተተከለች ዛፍ ያደርግሃል፤ ቅጠልህ እንኳ እንዳይረግፍ አድርጎ ይጠብቅሃል።

የጸና ክርስቲያን ለቤተ ክርስቲያን ምንኛ ብርታት ነው! ለሚያዝኑ መጽናኛ፣ ለደካሞችም ረዳት ነው። እንዲህ ያለ ሰው መሆን አትወድምን? የጸኑ አማኞች በአምላካችን ቤት ዓምዶች ናቸው። እነዚህ በትምህርት ነፋስ ሁሉ አይወሰዱም፤ በድንገተኛ ፈተናም አይገለበጡም። ለሌሎች ታላቅ ድጋፍ ናቸው፤ በቤተ ክርስቲያን የመከራ ጊዜም እንደ መልሕቅ ይሆናሉ። ቅዱሱን ሕይወት ገና የምትጀምር አንተ እንደ እነርሱ ለመሆን ተስፋ ለማድረግ እንኳ አትደፍርም። ነገር ግን መፍራት አያስፈልግህም፤ ቸሩ ጌታ በእነርሱ እንደ ሠራ በአንተም ይሠራል። አሁን በክርስቶስ «ሕፃን» የሆንህ አንተ፣ ከእነዚህ ቀኖች በአንዱ በቤተ ክርስቲያን «አባት» ትሆናለህ። ይህን ታላቅ ነገር ተስፋ አድርግ፤ ነገር ግን የሥራ ደመወዝ ወይም የገዛ ብርታትህ ፍሬ አድርገህ ሳይሆን የጸጋ ስጦታ አድርገህ ተስፋ አድርገው።

በመንፈስ የተነዳው ሐዋርያ ጳውሎስ ስለ እነዚህ ሰዎች እስከ ፍጻሜ እንደሚጸኑ ይናገራል። የእግዚአብሔር ጸጋ እያንዳንዳቸውን እስከ ሕይወታቸው ፍጻሜ ድረስ፣ ወይም ጌታ ኢየሱስ እስኪመጣ ድረስ እንደሚጠብቃቸው ይጠብቅ ነበር። በእርግጥም በየስፍራውና በየዘመኑ ያለችው የእግዚአብሔር ቤተ ክርስቲያን በሙሉ እስከዚህ ዘመን ፍጻሜ ድረስ፣ ጌታ ኢየሱስ እንደ ሙሽራ ሆኖ ፍጹም ከሆነችው ሙሽራዪቱ ጋር የሰርጉን ግብዣ ሊያከብር እስኪመጣ ድረስ እንደምትጠበቅ ይጠብቅ ነበር። በክርስቶስ ያሉ ሁሉ እስከዚያች የከበረች ቀን ድረስ በእርሱ ይጸናሉ። እርሱ፦ «እኔ ሕያው ነኝና እናንተ ደግሞ ሕያዋን ትሆናላችሁ» ብሎ አልተናገረምን? ደግሞም፦ «እኔም የዘላለም ሕይወትን እሰጣቸዋለሁ፥ ለዘላለምም አይጠፉም፥ ከእጄም ማንም አይነጥቃቸውም» አለ። በእናንተ መልካምን ሥራ የጀመረው እርሱ እስከ ኢየሱስ ክርስቶስ ቀን ድረስ ያጸናዋል። በነፍስ ውስጥ ያለው የጸጋ ሥራ ላይ ላዩን የሆነ ማሻሻያ አይደለም፤ በዳግመኛ ልደት የተተከለው ሕይወት ከሕያውና ለዘላለም ከሚኖር ከማይጠፋ ዘር የመጣ ነው፤ እግዚአብሔር ለአማኞች የሰጣቸው የተስፋ ቃሎችም ጊዜያዊ አይደሉም፤ ይልቁንም ፍጻሜያቸው አማኙ ማለቂያ ወደሌለው ክብር እስኪደርስ ድረስ መንገዱን ይዞ መጽናቱን ይጠይቃል። ለመዳን በእምነት በእግዚአብሔር ኃይል እንጠበቃለን። «ጻድቅ መንገዱን ይዞ ይጸናል።» ከገዛ ብቃታችን ወይም ከብርታታችን የተነሣ ሳይሆን፣ በነጻና በማይገባን ሞገስ ስጦታ የሚያምኑ «ለኢየሱስ ክርስቶስ ተጠብቀው» ይኖራሉ። ኢየሱስ ከበረቱ በጎች አንዱንም አያጣም፤ ከአካሉ ብልቶች አንዱም አይሞትም፤ ዕንቍዎቹን በሚሰበስብበት ቀን ከመዝገቡ ዕንቍዎች አንዱም አይጎድልም። ውድ አንባቢ ሆይ፣ በእምነት የሚቀበሉት መዳን የወራትና የዓመታት ነገር አይደለም፤ ጌታችን ኢየሱስ ስለ እኛ «የዘላለምን ቤዛነት» አግኝቶአልና፤ ዘላለማዊ የሆነው ደግሞ ፍጻሜ ሊኖረው አይችልም።

ጳውሎስ ደግሞ የቆሮንቶስ ቅዱሳን «ያለ ነቀፋ እንድትሆኑ እስከ ፍጻሜ ድረስ ያጸናችኋል» በተባለው ቃል መሠረት እንደሚጸኑ የሚጠብቀውን ይገልጣል። ይህ ነቀፋ የሌለበት መሆን የመጠበቃችን ክቡር ክፍል ነው። በሰላም መጠበቅ ብቻ ሳይሆን ቅዱስ ሆኖ መጠበቅ ይሻላል። ሃይማኖተኞች ሰዎች ከአንድ ውርደት ወደ ሌላ ውርደት እየተደናበሩ ሲገቡ ማየት አስፈሪ ነገር ነው፤ ጌታችን ያለ ነቀፋ ሊያደርጋቸው እንደሚችል አላመኑም። ክርስቲያን ነን የሚሉ የአንዳንዶች ሕይወት ተከታታይ መሰናከል ነው፤ ፈጽመው አይወድቁም፤ ቢሆንም በእግራቸው ቆመው የሚታዩት አልፎ አልፎ ነው። ይህ ለአማኝ የሚገባ ነገር አይደለም፤ ከእግዚአብሔር ጋር እንዲመላለስ ተጋብዞአል፤ በእምነትም በቅድስና ያለማወላወል ወደ መጽናት ሊደርስ ይችላል፤ እንዲህም ሊያደርግ ይገባዋል። ጌታ ከሲኦል ሊያድነን ብቻ ሳይሆን ሳንሰናከል ሊጠብቀንም ይችላል። ለፈተና መሸነፍ አያስፈልገንም። «ኃጢአት አይገዛችሁም» ተብሎ ተጽፎ የለምን? ጌታ የቅዱሳኑን እግር ሊጠብቅ ይችላል፤ እንዲያደርገው ብንታመነውም ያደርገዋል። ልብሳችንን ማሳደፍ አያስፈልገንም፤ በጸጋው ከዓለም እድፍ ጠብቀን ልናቆየው እንችላለን፤ ይህን ልናደርግ ግዴታ አለብን፤ «ትቀደሱም ዘንድ ፈልጉ፥ ያለ እርሱ ጌታን ሊያይ የሚችል የለምና»።

ሐዋርያው ለእነዚህ አማኞች እኛም እንድንሻው የሚወደውን ነገር ትንቢት አድርጎ ተናገረ፤ ይኸውም በጌታችን በኢየሱስ ክርስቶስ ቀን ያለ ነቀፋ ሆነን እንድንጠበቅ ነው። በእንግሊዝኛው የተሻሻለው ትርጒም «ያለ ነቀፋ» በሚለው ፈንታ «የማይወቀሱ» የሚል ቃል አለው። ምናልባት የተሻለው ትርጒም «ክስ ሊቀርብባቸው የማይችሉ» ይሆናል። በዚያች በመጨረሻይቱ ታላቅ ቀን ከክስ ሁሉ ነጻ ሆነን እንድንቆም፣ በፍጥረተ ዓለሙ ሁሉ ማንም የጌታ የተዋጁ ነን የምንለውን ሊቃወም እንዳይደፍር እግዚአብሔር ይስጠን። የምናለቅስባቸው ኃጢአቶችና ድካሞች አሉብን፤ ነገር ግን እነዚህ ከክርስቶስ ውጭ መሆናችንን የሚያረጋግጡ ዓይነት ጕድለቶች አይደሉም፤ ከግብዝነት፣ ከማታለል፣ ከጥላቻና በኃጢአት ከመደሰት ንጹሓን እንሆናለን፤ እነዚህ ነገሮች ገዳይ ክሶች በሆኑ ነበርና። ጕድለቶቻችን ቢኖሩም፣ መንፈስ ቅዱስ በሰዎች ፊት እንከን የሌለበትን ባሕርይ በእኛ ውስጥ ሊሠራ ይችላል፤ ስለዚህ እንደ ዳንኤል ከሃይማኖታችን ጉዳይ በቀር ለከሳሽ አንደበቶች ምንም ምክንያት አንሰጥም። እጅግ ብዙ እግዚአብሔርን የሚፈሩ ወንዶችና ሴቶች ማንም ሊቃወማቸው እስከማይችል ድረስ ግልጥና ከዳር እስከ ዳር የተስማማ ሕይወት አሳይተዋል። ጌታ ሰይጣን በፊቱ በቆመ ጊዜ ስለ ኢዮብ እንደ ተናገረው ስለ ብዙ አማኞች፦ «ባሪያዬን ተመለከትኸውን? ፍጹምና ቅን፥ እግዚአብሔርንም የሚፈራ፥ ከክፉም የሚርቅ ሰው ነው» ሊል ይችላል። አንባቢዬ ከጌታ እጅ ሊጠብቅ የሚገባው ይህን ነው። የቅዱሳን ድል ይህ ነው፤ በሕያው እግዚአብሔር ፊት እንዳለን ሆነን ቅንነታችንን ጠብቀን በጉ ወደሚሄድበት ሁሉ መከተላችንን መቀጠል። ወደ ጠማማ መንገዶች ፈቀቅ ብለን ተቃዋሚውም የሚሳደብበትን ምክንያት ከቶ እንዳንሰጥ ይሁንልን። ስለ እውነተኛው አማኝ «ከእግዚአብሔር የተወለደው ራሱን እንዲጠብቅ ክፉውም እንዳይነካው እናውቃለን» ተብሎ ተጽፎአል። ስለ እኛም እንዲሁ ይጻፍ!

በመለኮታዊው ሕይወት ገና የምትጀምር ወዳጄ ሆይ፣ ጌታ ነቀፋ የሌለበት ባሕርይ ሊሰጥህ ይችላል። ባለፈው ሕይወትህ ወደ ኃጢአት እጅግ ርቀህ ገብተህ ቢሆንም እንኳ፣ ጌታ ከቀድሞ ልማዶችህ ኃይል ፈጽሞ ሊያድንህና የበጎነት ምሳሌ ሊያደርግህ ይችላል። ግብረ ገብ ሊያደርግህ ብቻ ሳይሆን የሐሰትን መንገድ ሁሉ እንድትጸየፍና ለቅዱሳን የሚገባውን ሁሉ እንድትከተል ሊያደርግህ ይችላል። አትጠራጠር። ከኃጢአተኞች ዋና የሆነው ከቅዱሳን ሁሉ ይልቅ ንጹሕ ከሆነው በምንም ማነስ የለበትም። ስለዚህ ነገር እመን፤ እንደ እምነትህም ይሁንልህ።

ኦ፣ በፍርድ ቀን ያለ ነቀፋ ሆኖ መገኘት ምንኛ ደስታ ይሆናል! ያን ውብ መዝሙር አብረን ስንዘምር አልተሳሳትንም፦

በዚያች ታላቅ ቀን በድፍረት እቆማለሁ፤
ማንስ በእኔ ላይ ክስ ያቀርባል፣
በደምህ ይቅር ተብዬ ነጻ ወጥቼ ሳለሁ
ከኃጢአት አስፈሪ መርገምና ኀፍረት?

ሰማይና ምድር ከሁሉ ፈራጅ ፊት በሚሸሹበት ጊዜ ያን የማይፈራ ድፍረት ማግኘት ምንኛ ብፅዕና ይሆናል! በክርስቶስ ኢየሱስ ወደ ሆነው ወደ እግዚአብሔር ጸጋ ብቻ ለሚመለከትና በዚያም ቅዱስ ኃይል ከኃጢአት ሁሉ ጋር ያለማቋረጥ ለሚዋጋ ሁሉ ይህ ብፅዕና ዕድል ፈንታው ይሆናል።