ንስሐ የሚሰጥበት መንገድ

ወደ ታላቁ ቃል እንመለስ፦ «ይህን እግዚአብሔር፥ ለእስራኤል ንስሐን የኃጢአትንም ስርየት ይሰጥ ዘንድ፥ ራስም መድኃኒትም አድርጎ በቀኙ ከፍ ከፍ አደረገው።» ጌታችን ኢየሱስ ክርስቶስ ወደ ላይ የወጣው ጸጋ ወደ ታች እንዲወርድ ነው። ክብሩ ጸጋው ይበልጥ እንዲዳረስ ይውላል። ጌታ የሚያምኑ ኃጢአተኞችን ከእርሱ ጋር ወደ ላይ የመሸከም ዓላማ ሳይኖረው አንዲትም እርምጃ ወደ ላይ አልወጣም። ንስሐን ሊሰጥ ከፍ ከፍ ተደርጎአል፤ ጥቂት ታላላቅ እውነቶችን ብናስታውስ ይህን እናያለን።

ጌታችን ኢየሱስ የሠራው ሥራ ንስሐን የሚቻል፣ የሚገኝና ተቀባይነት ያለው አድርጎታል። ሕግ ስለ ንስሐ ምንም አይጠቅስም፤ ነገር ግን፦ «ኃጢአት የምትሠራ ነፍስ እርስዋ ትሞታለች» ብሎ በግልጥ ይናገራል። ጌታ ኢየሱስ ሞቶ ባይነሣና ወደ አብ ባይሄድ ኖሮ፣ የአንተ ወይም የእኔ ንስሐ መግባት ምን ዋጋ ይኖረው ነበር? ጸጸትን ከነአስፈሪነቱ ልንሰማ እንችል ይሆናል፤ ንስሐን ከነተስፋው ግን ከቶ አናገኝም ነበር። ንስሐ እንደ ተፈጥሮአዊ ስሜት ታላቅ ምስጋና የማይገባው የተለመደ ግዴታ ነው፤ እንዲያውም በአብዛኛው ቅጣትን ከመፍራት ከሚመነጭ ራስ ወዳድነት ጋር ስለሚደባለቅ፣ እጅግ ርኅሩኅ የሆነው ግምገማ እንኳ ብዙ ዋጋ አይሰጠውም። ኢየሱስ ጣልቃ ገብቶ የብቃትን ባለ ጠግነት ባይፈጽም ኖሮ፣ የንስሐ እንባችን በምድር ላይ እንደ ፈሰሰ ውኃ በሆነ ነበር። ኢየሱስ በምልጃው ኃይል ንስሐ በእግዚአብሔር ፊት ስፍራ እንዲያገኝ በአርያም ከፍ ከፍ ተደርጎአል። በዚህ ረገድ ንስሐን ይሰጠናል፤ ያለ እርሱ ንስሐ ከቶ ሊይዘው ወደማይችለው የተቀባይነት ስፍራ ያኖረዋልና።

ኢየሱስ በአርያም ከፍ ከፍ በተደረገ ጊዜ፣ የሚያስፈልጉትን ጸጋዎች ሁሉ በእኛ ውስጥ እንዲሠራ የእግዚአብሔር መንፈስ ፈሰሰ። መንፈስ ቅዱስ ተፈጥሮአችንን ከተፈጥሮ በላይ በሆነ መንገድ በማደስና የድንጋዩን ልብ ከሥጋችን በማውጣት ንስሐን በውስጣችን ይፈጥራል። ኦ፣ የማይቻሉ እንባዎችን ለማውጣት ዓይኖችህን እያስጨነቅህ አትቀመጥ! ንስሐ ከማይፈቅደው ተፈጥሮ ሳይሆን ከነጻና ሉዓላዊ ጸጋ ይመጣል። በድንጋይ ልብ ውስጥ የሌሉ ስሜቶችን ለማውጣት ደረትህን ልትደቃ ወደ እልፍኝህ አትግባ። ነገር ግን ወደ ቀራንዮ ሂድ፤ ኢየሱስ እንዴት እንደ ሞተም እይ። ረድኤትህ ወደሚመጣበት ወደ ተራሮች ቀና ብለህ ተመልከት። መንፈስ ቅዱስ በአንድ ወቅት በጥልቁ ትርምስ ላይ ሰፍፎ ሥርዓትን እንዳወጣ፣ እንዲሁ በሰዎች መንፈስ ላይ እንዲጸልልና በውስጣቸውም ንስሐን እንዲያስገኝ ሆን ብሎ መጥቶአል። ጸሎትህን እንዲህ ብለህ ወደ እርሱ አቅርብ፦ «የተባረክህ መንፈስ ሆይ፣ ከእኔ ጋር ኑር። ኃጢአትን እንድጠላና ከልቤ ከእርሱ ንስሐ እንድገባ ልበ ርኅሩኅና ልበ ትሑት አድርገኝ።» ጩኸትህን ይሰማል፤ ይመልስልሃልም።

ደግሞም አስታውስ፤ ጌታችን ኢየሱስ ከፍ ከፍ በተደረገ ጊዜ ንስሐን የሰጠን መንፈስ ቅዱስን በመላክ ብቻ ሳይሆን፣ የተፈጥሮንና የመግቦትን ሥራዎች ሁሉ ለመዳናችን ታላቅ ዓላማ በመቀደስም ነው፤ ስለዚህም እንደ ጴጥሮስ ዶሮ ቢጮኽ ወይም እንደ ወኅኒ ጠባቂው የምድር መንቀጥቀጥ ወኅኒውን ቢያናውጥ፣ ከእነርሱ ማንኛውም ወደ ንስሐ ሊጠራን ይችላል። ጌታችን ኢየሱስ ከእግዚአብሔር ቀኝ ሆኖ በዚህ በምድር ያሉትን ነገሮች ሁሉ ይገዛል፤ ለተቤዣቸውም መዳን አብረው እንዲሠሩ ያደርጋቸዋል። በኃጢአተኞች ውስጥ ለአምላካቸው የተሻለ አሳብ እንዲያስገኝ መራራውንም ጣፋጩንም፣ መከራንም ደስታንም ይጠቀማል። ድሀ ወይም ሕመምተኛ ወይም ኀዘንተኛ ላደረገህ መግቦት አመስጋኝ ሁን፤ በዚህ ሁሉ ኢየሱስ የመንፈስህን ሕይወት ይሠራልና፤ ወደ ራሱም ይመልስሃልና። የጌታ ምሕረት ብዙ ጊዜ በመከራ ጥቁር ፈረስ ላይ ተቀምጦ ወደ ልባችን ደጅ ይመጣል። ኢየሱስ ከምድር ሊያላቅቀንና ወደ ሰማይ ሊያማልለን የተሞክሮአችንን ስፋት ሁሉ ይጠቀማል። ክርስቶስ በመግቦቱ ሂደቶች ሁሉ ደንዳና ልቦችን ወደ ንስሐ ጸጋ ልስላሴ ያስገዛ ዘንድ ወደ ሰማይና ምድር ዙፋን ከፍ ከፍ ተደርጎአል።

ከዚህም በላይ በዚህች ሰዓት በኅሊና ውስጥ በሚሰጣቸው ሹክሹክታዎቹ ሁሉ፣ በመንፈሱ መሪነት በተጻፈው መጽሐፉ፣ ከዚያ መጽሐፍ በምንናገረው በእኛ፣ በሚጸልዩ ወዳጆችና በቅን ልቦች ይሠራል። እንደ ሙሴ በትር የዓለት ልብህን የሚመታና የንስሐ ጅረቶችን የሚያፈልቅ ቃል ሊልክልህ ይችላል። ፈጥኖ የሚያሸንፍህን ልብ የሚሰብር ጥቅስ ከቅዱሳት መጻሕፍት ወደ አእምሮህ ሊያመጣ ይችላል። በምሥጢር ሊያለሰልስህ፣ እጅግ ባልጠበቅኸው ጊዜም ቅዱስ የልብ ሁኔታ ቀስ ብሎ እንዲወርስህ ሊያደርግ ይችላል። ወደ ክብሩ የሄደው፣ ወደ እግዚአብሔር ግርማና ታላቅነት ሁሉ ከፍ የተደረገው እርሱ፣ ይቅርታን በሚሰጣቸው ውስጥ ንስሐን የሚሠራባቸው ብዙ መንገዶች እንዳሉት እርግጠኛ ሁን። አሁንም እንኳ ንስሐን ሊሰጥህ እየጠበቀ ነው። ወዲያውኑ ለምነው።

ጌታ ኢየሱስ ክርስቶስ ይህን ንስሐ በዓለም ውስጥ ይቀበሉታል ተብለው ለማይጠበቁ ሰዎች እንደሚሰጥ በብዙ መጽናናት ተመልከት። ለእስራኤል ንስሐን ሊሰጥ ከፍ ከፍ ተደርጎአል። ለእስራኤል! ሐዋርያት ይህን በተናገሩበት ዘመን፣ እስራኤል፦ «ደሙ በእኛና በልጆቻችን ላይ ይሁን» ለማለት በመድፈር በብርሃንና በፍቅር ላይ እጅግ የከፋ ኃጢአት የሠራ ሕዝብ ነበረ። ቢሆንም ኢየሱስ ንስሐን ሊሰጣቸው ከፍ ከፍ ተደርጎአል! እንዴት ያለ የጸጋ ድንቅ ነው! በደማቁ የክርስትና ብርሃን አድገህ ብትጥለው እንኳ አሁንም ተስፋ አለ። በኅሊናህ ላይ፣ በመንፈስ ቅዱስም ላይ፣ በኢየሱስም ፍቅር ላይ ኃጢአት ሠርተህ ከሆነ፣ አሁንም ለንስሐ ጊዜ አለ። እንደ ጥንቱ የማያምን እስራኤል ደንዳና ብትሆንም፣ ኢየሱስ ከፍ ከፍ ስለ ተደረገና ወሰን የሌለው ኃይል ስለ ለበሰ ልስላሴ አሁንም ሊመጣልህ ይችላል። በዓመፃ እጅግ ርቀው ለሄዱና በተለየ ክብደት ኃጢአት ለሠሩ፣ ጌታ ኢየሱስ ንስሐንና የኃጢአትን ስርየት ሊሰጣቸው ከፍ ከፍ ተደርጎአል። እንዲህ ያለ ሙሉ ወንጌል ለማወጅ በማግኘቴ ደስተኛ ነኝ! ልታነበው በመፈቀዱ አንተም ደስተኛ ነህ!

የእስራኤል ልጆች ልብ እንደ አልማዝ ድንጋይ ደንድኖ ነበር። ማርቲን ሉተር አንድን አይሁዳዊ ወደ ክርስቶስ መመለስ የማይቻል ነው ብሎ ያስብ ነበር። እኛ ከእርሱ ጋር ከመስማማት እጅግ የራቅን ነን፤ ቢሆንም የእስራኤል ዘር በእነዚህ ብዙ መቶ ዘመናት አዳኙን በመቃወም እጅግ የጸኑ እንደ ነበሩ ልንቀበል ይገባናል። ጌታ፦ «እስራኤልም አልፈለገኝም» ማለቱ እውነት ነው። «የእርሱ ወደ ሆነው መጣ፥ የገዛ ወገኖቹም አልተቀበሉትም።» ቢሆንም ጌታችን ኢየሱስ ስለ እስራኤል ንስሐንና ስርየትን ለመስጠት ከፍ ከፍ ተደርጎአል። አንባቢዬ ምናልባት ከአሕዛብ ወገን ይሆናል፤ ቢሆንም ለብዙ ዓመታት ጌታ ኢየሱስን ተቃውሞ የቆመ እጅግ እልኸኛ ልብ ሊኖረው ይችላል፤ ጌታችን ግን በእርሱም ውስጥ ንስሐን ሊሠራ ይችላል። ዊልያም ሆን ለመለኮታዊ ፍቅር እጁን በሰጠ ጊዜ እንደ ጻፈው አንተም ለመጻፍ ግድ ሊልህ ይችላል። እርሱ «የየዕለቱ መጽሐፍ» የተባሉት እጅግ አዝናኝ መጻሕፍት ደራሲ ነበረ፤ በአንድ ወቅት ግን ልበ ደንዳና ከሓዲ ነበረ። በሉዓላዊ ጸጋ በተሸነፈ ጊዜ እንዲህ ብሎ ጻፈ፦

ከቶ ከመታ ልብ ሁሉ እጅግ የታበየው

በእኔ ውስጥ ተሸንፎአል፤

ከቶ ከተነሣ ፈቃድ ሁሉ እጅግ ዱር የሆነው፣

ዓላማህን ሊንቅ፣ ጠላቶችህንም ሊረዳ የተነሣው፣

ጌታዬ ሆይ፣ በአንተ ጸጥ ብሎአል።

የእኔ ፈቃድ ሳይሆን ፈቃድህ ይሁን፤

ልቤ ለዘላለም የአንተ ይሁን፤

ኃያሉ ቃል እንደ ሆንህ እየመሰከርሁ፣

አዳኜ ክርስቶስ፣ አምላኬ፣ ጌታዬ ሆይ፣

መስቀልህ ምልክቴ ይሆናል።

ጌታ አንበሶችን ወደ ጠቦቶች፣ ቍራዎችንም ወደ ርግቦች እየለወጠ ንስሐ ይገባሉ ተብለው ለማይጠበቁት እንኳ ንስሐን ሊሰጥ ይችላል። ይህ ታላቅ ለውጥ በእኛ ውስጥ እንዲፈጸም ወደ እርሱ እንመልከት። በእርግጥ የክርስቶስን ሞት ማሰላሰል ንስሐን ለማግኘት እጅግ እርግጠኛና እጅግ ፈጣን ከሆኑት መንገዶች አንዱ ነው። ተቀምጠህ ከተበላሸው ተፈጥሮ ደረቅ ጕድጓድ ንስሐን ለመቅዳት አትሞክር። ነፍስህን አስገድደህ ወደዚያ የጸጋ ሁኔታ ልታስገባት ትችላለህ ብሎ ማሰብ የአእምሮን ሕግጋት የሚቃረን ነው። ልብህን በጸሎት ወደሚያውቀው ወደ እርሱ ውሰደውና፦ «ጌታ ሆይ፣ አንጻው። ጌታ ሆይ፣ አድሰው። ጌታ ሆይ፣ ንስሐን በውስጡ ሥራ» በል። የንስሐ ስሜቶችን በራስህ ለማስገኘት በሞከርህ መጠን ይበልጥ ተስፋ ትቈርጣለህ፤ ነገር ግን ኢየሱስ ስለ አንተ እንደ ሞተ በእምነት ብታስብ ንስሐ ይፈነዳል። ጌታ ከፍቅሩ የተነሣ ስለ አንተ የልቡን ደም እንዳፈሰሰ አሰላስል። ጭንቀቱንና እንደ ደም ነጠብጣብ የሆነውን ወዙን፣ መስቀሉንና ሕማማቱን በአእምሮህ ዓይን ፊት አኑር፤ ይህንም ስታደርግ የዚህ ሁሉ ኀዘን ተሸካሚ የነበረው እርሱ ይመለከትሃል፤ በዚያም መመልከቱ ለጴጥሮስ ያደረገውን ያደርግልሃል፤ ስለዚህም አንተም ደግሞ ወደ ውጭ ወጥተህ ምርር ብለህ ታለቅሳለህ። ስለ አንተ የሞተው እርሱ በጸጋ መንፈሱ ለኃጢአት እንድትሞት ሊያደርግህ ይችላል፤ ስለ አንተም ወደ ክብር የሄደው እርሱ ነፍስህን ከክፉ ርቃ ወደ ቅድስና እንድትሄድ ወደ ራሱ ሊስባት ይችላል።

ይህን አንድ አሳብ ትቼልህ ብሄድ እረካለሁ፤ እሳትን ለማግኘት ከበረዶ ግግር በታች አትፈልግ፤ ንስሐንም ለማግኘት በገዛ ተፈጥሮአዊ ልብህ ተስፋ አታድርግ። ሕይወትን ለማግኘት ወደ ሕያው ተመልከት። ከሲኦል ደጅ እስከ መንግሥተ ሰማያት ደጅ ድረስ ለሚያስፈልግህ ሁሉ ወደ ኢየሱስ ተመልከት። ኢየሱስ ሊሰጠው ከሚወደው ነገር ማንኛውንም ክፍል በሌላ ስፍራ ከቶ አትፈልግ፤ ነገር ግን አስታውስ፦

ክርስቶስ ሁሉ ነው።