የእምነት መጨመር

የእምነትን መጨመር እንዴት ልናገኝ እንችላለን? ይህ ለብዙዎች እጅግ ልባዊ ጥያቄ ነው። ማመን እንደሚፈልጉ ነገር ግን እንደማይችሉ ይናገራሉ። በዚህ ጉዳይ ላይ እጅግ ብዙ ከንቱ ነገር ይነገራል። እኛ ግን ጉዳዩን በጥብቅ ተግባራዊ በሆነ መንገድ እንያዘው። ማስተዋል በሌላው ቦታ ሁሉ እንደሚያስፈልግ በሃይማኖትም እንዲሁ ያስፈልጋል። «ለማመን ምን ማድረግ አለብኝ?» አንድን ቀላል ተግባር ለማድረግ የተሻለው መንገድ ምን እንደ ሆነ የተጠየቀ አንድ ሰው፣ የተሻለው መንገድ ወዲያውኑ ማድረግ ነው ብሎ መለሰ። ተግባሩ ቀላል ሆኖ ሳለ ስለ ዘዴዎች በመነጋገር ጊዜ እናባክናለን። ለማመን አጭሩ መንገድ ማመን ነው። መንፈስ ቅዱስ ቅን ልብ ሰጥቶህ ከሆነ እውነት በፊትህ እንደ ቀረበ ታምናለህ። የምታምነውም እውነት ስለ ሆነ ነው። የወንጌል ትእዛዝ ግልጥ ነው፦ «በጌታ በኢየሱስ ክርስቶስ እመን፥ ትድናለህም።» ይህን በጥያቄና በማመካኛ ለማምለጥ መሞከር ከንቱ ነው። ትእዛዙ ግልጥ ነው፤ ይታዘዝ።

ቢሆንም አሁንም ችግር ካለብህ በጸሎት ወደ እግዚአብሔር አቅርበው። የሚያደናግርህን በትክክል ለታላቁ አባት ንገረው፤ ጥያቄውንም በመንፈስ ቅዱሱ እንዲፈታልህ ለምነው። በአንድ መጽሐፍ ውስጥ ያለውን ቃል ማመን ካቃተኝ፣ ደራሲውን ምን ማለቱ እንደ ሆነ ብጠይቀው ደስ ይለኛል፤ እውነተኛ ሰው ከሆነም ማብራሪያው ያረካኛል፤ ይልቁንም የቅዱሳት መጻሕፍትን አስቸጋሪ ነጥቦች የሚያብራራው መለኮታዊ ማብራሪያ የእውነተኛውን ፈላጊ ልብ እንዴት አብልጦ ያረካ ይሆን! ጌታ ራሱን ሊያስታውቅ ፈቃደኛ ነው፤ ወደ እርሱ ሂድና እንዲሁ እንደ ሆነ እይ። ወዲያውኑ ወደ እልፍኝህ ግባ፤ እንዲህም ብለህ ጩኽ፦ «መንፈስ ቅዱስ ሆይ፣ ወደ እውነት ምራኝ! የማላውቀውን አንተ አስተምረኝ።»

ደግሞም እምነት አስቸጋሪ መስሎ ከታየህ፣ እንድታምነው የታዘዝከውን እጅግ ብዙ ጊዜና በትጋት ብትሰማ እግዚአብሔር መንፈስ ቅዱስ እንድታምን ሊያስችልህ ይችላል። ብዙ ነገሮችን የምናምነው ብዙ ጊዜ ስለ ሰማናቸው ነው። በተራው ሕይወት አንድን ነገር በቀን ሃምሳ ጊዜ ብትሰማ በመጨረሻ ታምነዋለህ፤ እንዲህ ሆኖ አላገኘኸውምን? አንዳንድ ሰዎች በዚህ ሂደት እጅግ የማይመስሉ ነገሮችን ወደ ማመን ደርሰዋል፤ ስለዚህ መልካሙ መንፈስ እውነትን ደጋግሞ የመስማትን ዘዴ ብዙ ጊዜ ቢባርከውና ሊታመን ስለሚገባው ነገር እምነትን ለመሥራት ቢጠቀምበት አልደነቅም። «እምነት ከመስማት ነው» ተብሎ ተጽፎአል፤ ስለዚህ ደጋግመህ ስማ። ወንጌልን በትጋትና በጥንቃቄ ብሰማ፣ የእግዚአብሔር መንፈስ በአእምሮዬ ላይ በሚሠራው የተባረከ ሥራ፣ ከእነዚህ ቀናት በአንዱ የምሰማውን ሳምን ራሴን አገኘዋለሁ። ብቻ ወንጌልን መስማትህን ተጠንቀቅ፤ አንተን ለማንገዳገድ የተዘጋጀውን ነገር በመስማትም ሆነ በማንበብ አእምሮህን አትበትን።

ይህ ግን ደካማ ምክር መስሎ ቢታይ፣ ቀጥሎ እንዲህ እጨምራለሁ፦ የሌሎችን ምስክርነት አስብ። የሰማርያ ሰዎች ሴቲቱ ስለ ኢየሱስ በነገረቻቸው ቃል አመኑ። ብዙዎቹ እምነቶቻችን የሚመነጩት ከሌሎች ምስክርነት ነው። ጃፓን የምትባል አገር እንዳለች አምናለሁ፤ አይቻት አላውቅም፤ ሆኖም ሌሎች ወደዚያ ስለ ሄዱ እንዲህ ያለች ስፍራ እንዳለች አምናለሁ። እንደምሞት አምናለሁ፤ ከቶ ሞቼ አላውቅም፤ ነገር ግን ቀድሞ የማውቃቸው እጅግ ብዙ ሰዎች ሞተዋል፤ ስለዚህ እኔም እንደምሞት እርግጠኛ ነኝ። የብዙዎች ምስክርነት ያን እውነታ ያሳምነኛል። እንግዲያስ እንዴት እንደ ዳኑ፣ እንዴት ይቅር እንደ ተባሉ፣ በጠባያቸውም እንዴት እንደ ተለወጡ የሚነግሩህን ሰዎች ስማ። ጉዳዩን ብትመረምር ልክ እንደ አንተ ያለ አንድ ሰው እንደ ዳነ ታገኛለህ። ሌባ ከነበርህ፣ አንድ ሌባ ኃጢአቱን በክርስቶስ ደም ምንጭ በማጠቡ ደስ እንዳለው ታገኛለህ። በሚያሳዝን ሁኔታ በዝሙት ኖረህ ከሆነ፣ በዚያ መንገድ የወደቁ ወንዶችና ሴቶች እንደ ነጹና እንደ ተለወጡ ታገኛለህ። ተስፋ ቆርጠህ ከሆነ፣ ወደ እግዚአብሔር ሕዝብ መካከል ገብተህ ጥቂት መጠየቅ ብቻ ይበቃሃል፤ ከቅዱሳኑ አንዳንዶቹ አንዳንድ ጊዜ እንዲሁ ተስፋ ቆርጠው እንደ ነበር ታውቃለህ፤ ጌታ እንዴት እንዳዳናቸውም ሊነግሩህ ደስ ይላቸዋል። የእግዚአብሔርን ቃል ፈትነው ያረጋገጡትን አንዱን ከሌላው በኋላ ስትሰማ፣ መለኮታዊው መንፈስ ወደ ማመን ይመራሃል። ውኃ አንዳንድ ጊዜ ሰው ሊራመድበት እስኪችል ድረስ እንደሚጠነክር ሚስዮናዊው ስለ ነገረው አፍሪካዊ ሰምተህ አታውቅምን? ሚስዮናዊው የነገረውን ብዙ ነገር እንዳመነ፣ ያን ግን ከቶ እንደማያምን ተናገረ። ወደ እንግሊዝ በመጣ ጊዜ፣ በአንድ የውርጭ ቀን ወንዙ ቀዝቅዞ ሲረጋ አየ፤ በላዩ ላይ ለመሄድ ግን አልደፈረም። ወንዙ ጥልቅ እንደ ሆነ ያውቅ ነበር፤ ቢደፍርበትም እንደሚሰጥም እርግጠኛ ነበር። ወዳጁና ሌሎች ብዙዎች በላዩ ላይ እስኪሄዱ ድረስ በረጋው ውኃ ላይ እንዲራመድ ሊያግባቡት አልተቻላቸውም፤ ከዚያም አመነ፤ ሌሎች በደኅና በተራመዱበት ስፍራ ራሱን አደራ ሰጠ። እንዲሁም ሌሎች በእግዚአብሔር በግ ሲያምኑ እያየህ ደስታቸውንና ሰላማቸውንም እያስተዋልህ፣ አንተ ራስህ በገርነት ወደ ማመን ትመራለህ። የሌሎች ተሞክሮ እግዚአብሔር ወደ እምነት ከሚረዳን መንገዶች አንዱ ነው። ወይ በኢየሱስ ማመን አለብህ ወይም ትሞታለህ፤ ከእርሱ በቀር ለአንተ ተስፋ የለም።

ከዚህ የተሻለ መንገድ ደግሞ ይህ ነው፤ እንድታምን የታዘዝክበትን ሥልጣን ልብ በል፤ ይህም ወደ እምነት እጅግ ይረዳሃል። ሥልጣኑ የእኔ አይደለም፤ የእኔ ቢሆን ኖሮ ብትጥለው ትክክል በሆንህ ነበር። ነገር ግን እንድታምን የታዘዝከው በእግዚአብሔር በራሱ ሥልጣን ነው። በኢየሱስ ክርስቶስ እንድታምን ያዝዝሃል፤ አንተም ፈጣሪህን ለመታዘዝ እምቢ ማለት አይገባህም። የአንድ ፋብሪካ ሠራተኞች አለቃ ወንጌልን ብዙ ጊዜ ሰምቶ ነበር፤ ነገር ግን ወደ ክርስቶስ መምጣት አይፈቀድልኝ ይሆናል በሚል ፍርሃት ይታወክ ነበር። መልካሙ አሠሪው አንድ ቀን ወደ ፋብሪካው እንዲህ የሚል ካርድ ላከ፦ «ሥራ እንደ ተፈጸመ ወዲያውኑ ወደ ቤቴ ና።» የሠራተኞቹ አለቃ በአሠሪው ደጅ ላይ ቀረበ፤ አሠሪውም ወጥቶ በመጠኑ በኃይለ ቃል፦ «ጆን፣ በዚህ ሰዓት የምታስቸግረኝ ምን ፈልገህ ነው? ሥራ ተፈጽሞአል፤ እዚህ ምን መብት አለህ?» አለው። እርሱም፦ «ጌታዬ፣ ከሥራ በኋላ እንድመጣ የሚል ካርድ ከእርስዎ ደርሶኝ ነበር» አለ። «ከእኔ ካርድ ስለ ደረሰህ ብቻ ወደ ቤቴ መጥተህ ከሥራ ሰዓት በኋላ ልትጠራኝ ይገባል ማለትህ ነውን?» «እንግዲህ ጌታዬ» ብሎ የሠራተኞቹ አለቃ መለሰ፤ «አልገባኝም፤ ነገር ግን እርስዎ ስለ ላኩብኝ የመምጣት መብት ያለኝ ይመስለኛል።» አሠሪውም፦ «ጆን፣ ግባ» አለው፤ «ላነብልህ የምፈልገው ሌላ መልእክት አለኝ»፤ ተቀምጦም እነዚህን ቃላት አነበበ፦ «እናንተ ደካሞች ሸክማችሁ የከበደ ሁሉ፥ ወደ እኔ ኑ፥ እኔም አሳርፋችኋለሁ።» «ከክርስቶስ እንዲህ ያለ መልእክት ከደረሰህ በኋላ ወደ እርሱ ብትመጣ ልትሳሳት የምትችል ይመስልሃልን?» ድሃው ሰው ሁሉንም ወዲያውኑ አስተዋለ፤ ለማመን በቂ ዋስትናና ሥልጣን እንዳለው ስላወቀም በጌታ በኢየሱስ ለዘላለም ሕይወት አመነ። ድሃ ነፍስ ሆይ፣ አንተም እንዲሁ ዋስትና አለህ! ጌታ ራሱ እንድትታመነው ያዝዝሃልና ወደ ክርስቶስ ለመምጣት በቂ ሥልጣን አለህ።

ይህ እምነትን በአንተ ውስጥ ካላስገኘ፣ ልታምነው የሚገባህ ምን እንደ ሆነ አስብ፤ ይኸውም ጌታ ኢየሱስ ክርስቶስ በኃጢአተኞች ስፍራና ፋንታ መከራን እንደ ተቀበለ፣ በእርሱ የሚታመኑትንም ሁሉ ሊያድን እንደሚችል ነው። ይህ ሰዎች እንዲያምኑት ከተነገራቸው እውነታዎች ሁሉ እጅግ የተባረከው ነው፤ ለሟች አእምሮዎች ከቀረበው እውነት ሁሉ እጅግ ተስማሚው፣ እጅግ አጽናኙና እጅግ መለኮታዊው ነው። በእርሱ ላይ ብዙ እንድታስብ፣ በውስጡ ያለውንም ጸጋና ፍቅር እንድትመረምር እመክርሃለሁ። አራቱን ወንጌላውያን አጥና፤ የጳውሎስንም መልእክቶች አጥና፤ ከዚያም መልእክቱ እንድታምነው እስኪያስገድድህ ድረስ የሚታመን መሆኑን ራስህ እይ።

ይህም ካልበቃ፣ የኢየሱስ ክርስቶስን ማንነት አስብ፤ እርሱ ማን እንደ ሆነ፣ ምን እንዳደረገ፣ የት እንዳለና ምን እንደ ሆነ አስብ። እንዴት ልትጠራጠረው ትችላለህ? ዘወትር እውነተኛ የሆነውን ኢየሱስን አለመታመን ጭካኔ ነው። አለመታመን የሚገባውን ምንም ነገር አላደረገም፤ በተቃራኒው በእርሱ መደገፍ ቀላል ሊሆን ይገባል። ስለ ምን በአለማመን እንደ ገና ትሰቅለዋለህ? ይህ እንደ ገና የእሾኽ አክሊል እንደ መድፋትና እንደ ገና እንደ መትፋት አይደለምን? ምን! እርሱ የማይታመን ነውን? ወታደሮቹ ከዚህ የከፋ ምን ስድብ አፈሰሱበት? እነርሱ ሰማዕት አደረጉት፤ አንተ ግን ሐሰተኛ ታደርገዋለህ፤ ይህ እጅግ የከፋ ነው። እንዴት ላምን እችላለሁ? ብለህ አትጠይቅ፤ ነገር ግን ሌላውን ጥያቄ መልስ፦ እንዴት ላለማመን ትችላለህ?

ከእነዚህ ነገሮች አንዱም ካልጠቀመ፣ በአንተ ላይ ፈጽሞ የተበላሸ አንድ ነገር አለ፤ የመጨረሻ ቃሌም ይህ ነው፦ ራስህን ለእግዚአብሔር አስገዛ! ከዚህ አለማመን በታች ያለው ጭፍን ጥላቻ ወይም ትዕቢት ነው። የእግዚአብሔር መንፈስ ጠላትነትህን አስወግዶ እንድትገዛ ያድርግህ። አንተ ዓመፀኛ ነህ፤ ትዕቢተኛ ዓመፀኛ ነህ፤ በአምላክህ የማታምነውም ስለዚህ ነው። ዓመፅህን ተው፤ መሣሪያዎችህን ጣል፤ ያለ ቅድመ ሁኔታ እጅ ስጥ፤ ራስህን ለንጉሥህ ስጥ። በራስዋ ተስፋ ቈርጣ እጆችዋን አንሥታ «ጌታ ሆይ፣ እገዛለሁ» ብላ የጮኸች ነፍስ ሁሉ፣ ብዙም ሳይቆይ እምነት ቀላል እንደ ሆነላት አምናለሁ። ማመን የማትችለው ገና ከእግዚአብሔር ጋር ክርክር ስላለህ፣ የራስህን ፈቃድና የራስህን መንገድ ለመያዝ ስለ ቈረጥህ ነው። ክርስቶስ፦ «እናንተ እርስ በርሳችሁ ክብር የምትቀባበሉ … እንዴት ልታምኑ ትችላላችሁ?» አለ። ትዕቢተኛው እኔነት አለማመንን ይፈጥራል። ሰው ሆይ፣ ተገዛ። ለአምላክህ እጅ ስጥ፤ ያን ጊዜ በአዳኝህ በጣፋጭነት ታምናለህ። መንፈስ ቅዱስ አሁን በስውር ነገር ግን በኃይል በአንተ ውስጥ ይሥራ፤ በዚህችም ሰዓት በጌታ በኢየሱስ ወደ ማመን ያምጣህ! አሜን።