ሁለተኛው ደረጃ፦ የቅለት ጸሎት

ሁለተኛው ደረጃ በተለያዩ ስሞች ተጠርቷል፦ ተመስጦ፥ የዝምታ ጸሎት፥ የዕረፍት ጸሎት ተብሏል፤ ሌሎች ደግሞ የቅለት ጸሎት ብለውታል፤ እኔም እዚህ የምጠቀመው ይህን የመጨረሻውን ስም ነው፤ እኔ ከምናገርለት ደረጃ እጅግ የላቀን የጸሎት ደረጃ ከሚያመለክተው ተመስጦ ከሚለው ስም ይበልጥ ተስማሚ ነውና።

እንዳልሁት፥ ከጊዜ በኋላ ነፍስ የእግዚአብሔርን መገኘት በቀላሉ እንደምታስተውል ይሰማታል፤ ልቧን በቀላሉ ትሰበስባለች፤ ጸሎት ተፈጥሯዊና አስደሳች ይሆንላታል፤ ወደ እግዚአብሔር እንደሚመራት ታውቃለች፤ የሽቱዎቹንም መዓዛ ታሸታለች።

ያን ጊዜ መንገዷን መለወጥ አለባት፤ የምለውንም፥ ከእውነት የራቀ ቢመስላትም ሳትደነቅ፥ በጥንቃቄ ልታስተውል ይገባታል።

በመጀመሪያ፥ በእምነት ራስህን ወደ እግዚአብሔር ፊት ስታቀርብ ለጥቂት ጊዜ በአክብሮት ዝምታ ቆይ። ገና ከመጀመሪያው ይህን የእምነት ድርጊት ስታደርግ የእግዚአብሔርን መገኘት ጥቂት ጣዕም ብትቀምስ፥ ስለ ምንም ርዕስ ራስህን ሳታስጨንቅ ባለህበት ቆይ፤ የተሰጠህንም እስከ ቆየ ድረስ ያዝ።

ቢለቅህ ደግሞ ፈቃድህን በአንዳች ርኅሩኅ ፍቅራዊ ስሜት አነሣሣ፤ የቀድሞው ሰላምህ እንደ ተመለሰ ብታገኝም በእርሱ ቆይ። እሳቱን በቀስታ መንፋት ያስፈልጋል፤ ልክ ሲቀጣጠልም መንፋቱን አቁም፤ አለበለዚያ ታጠፋዋለህ። ደግሞም ከእርሱ አንድ ነገር ለማግኘት ሳይሆን እርሱን ደስ ለማሰኘትና ፈቃዱን ለማድረግ ወደ እግዚአብሔር መሄድ ያስፈልግሃል፤ በሚቀበለው ዋጋ ልክ ብቻ ጌታውን የሚያገለግል አገልጋይ ምንም ዋጋ አይገባውምና።

እንግዲህ በእግዚአብሔር ለመደሰት ብቻ ሳይሆን እርሱ እንደሚሻህ ለመሆን ወደ ጸሎት ሂድ፤ ይህ በድርቀት ጊዜም በበረከት ጊዜም ያልተለወጥህ ያደርግሃል፤ እግዚአብሔር ገሸሽ ቢያደርግህ፥ ግድ የሌለው ቢመስልም አትደናገጥም።

ስለ መንፈሳዊ ድርቀት

እግዚአብሔር የሚሻው ብቸኛ ነገር ሊፈልገው ለምትናፍቅ አፍቃሪ ነፍስ ራሱን መስጠት በመሆኑ፥ ሊያነቃቃትና በፍቅርና በታማኝነት እንድትፈልገው ሊያስገድዳት ብዙ ጊዜ ራሱን ይሰውራል። ነገር ግን የተወደደችውን ታማኝነት እንዴት ይክሳል! የሚመስሉት ሽሽቶቹስ እንዴት ባለ የፍቅር እንክብካቤ ይከተላሉ!

ነፍስ እግዚአብሔርን በጥረት መፈለጓ የታማኝነቷና የጨመረው ፍቅሯ ማረጋገጫ እንደ ሆነ፥ ወይም ቢያንስ እንዲህ ያለው ፍለጋ እርሱን ቶሎ እንደሚመልሰው ታስባለች።

ነገር ግን አይደለም! በዚህ ደረጃ መንገዱ ይህ አይደለም። በፍቅር ትዕግሥት ማጣት፥ በጥልቅ ትሕትናና ራስን ዝቅ በማድረግ፥ ጥልቅ ሆኖ ሳለ በሚያርፍ ፍቅራዊ ስሜት፥ በአክብሮት ዝምታ የተወደደህን መመለስ መጠበቅ አለብህ።

በዚህም የምትወደው እርሱን ብቻና መልካም ፈቃዱን እንጂ እርሱን በመውደድህ የምታገኘውን ደስታ እንዳልሆነ ታሳየዋለህ። ስለዚህም እንዲህ ተብሏል፦ «በመከራ ጊዜ አትቸኩል። በፍጻሜህ ትበዛ ዘንድ ከእርሱ ጋር ተጣበቅ፥ አትለየውም» (ሲራክ 2:2-3)። የእግዚአብሔር የሚታዩ መጽናናቶች ቢቋረጡና ቢዘገዩ ታገሥ።

ዕድሜህን ሁሉ በትዕግሥት ከመጠበቅ በቀር ምንም ባታደርግ እንኳ፥ በትሑት፥ ራሱን ፈጽሞ በተወ፥ ፈቃዱን ባስገዛና በረካ ልብ የተወደደህን መመለስ እየጠበቅህ በጸሎት ታገሥ። ኦ፥ እንዴት ያለ ግሩም ጸሎት ነው! የእግዚአብሔርን ልብ እንዴት ያነቃቃል! ከማንኛውም ነገር ይበልጥ እንዲመለስም እንዴት ያስገድደዋል!