በሕዝብ ፊት ማገልገል — ከቤተ ክርስቲያን መባረር

ከዚህ ጊዜ ጀምሮ በሕይወቴ ሥራ ላይ ተቃውሞ ተጀመረ፤ ያነሣሣውም መጋቢው አቶ ቢማን ነበር። በዚያን ጊዜ ስብሰባዎቻችን በሚደረጉበት አዳራሽ እንድሰብክ በቤተ ክርስቲያኒቱ ውስጥ ብዙዎች ጓጉተው ነበር፤ መጋቢውም በቀዝቃዛ ሁኔታ ሲይዘኝ ማየታቸው ጥቂት አላስደነቃቸውም። በመጨረሻም ከባለ አደራዎቹ ሁለቱ ከአረጋውያኑ እኅቶች አንዳንዶቹን ወደ መጋቢው ሄደው እንድሰብክ እንዲፈቅድልኝ እንዲለምኑት አደረጉ። የሰጠውም መልስ «አይሆንም፤ ያቺን የቅድስና ነገሯን እዚህ መስበክ አትችልም፤ እናንተም ይህን ከእኔ መጠየቃችሁ አስደንቆኛል» የሚል ነበር። እኅቶቹም አልተቈጣሁም ቢልም እጅግ የተናደደ ይመስል እንደ ነበር ተናገሩ።

ሰኞ ምሽት የማኅበሩ ስብሰባ ስላልነበረ፣ በቤተ ክርስቲያኒቱ የነበረ አንድ ወንድም እንድሰብክ ቤቱን ከፈተልኝ፤ ይህም አቶ ቢማንን እጅግ አስከፋው። ደጃቸውን ለእኔ የከፈቱትን ወንድምና እኅት ሄዶ ከዚህ በኋላ እንዲህ ያሉ ስብሰባዎችን እንዳይፈቅዱ፣ የቤተ ክርስቲያኒቱንም ሥርዓት እንዲጠብቁ እንዲነግራቸው ኮሚቴ ሰየመ፤ ባይታዘዙት ከቤተ ክርስቲያን እንደሚለዩም እንዲያምኑ አደረጋቸው። እኔም በዚህ ውይይት ላይ በአጋጣሚ ተገኝቼ ነበር፤ ኮሚቴውም ስለ ወሰድሁት አካሄድ ወቀሰኝ። እኔም ጉዳዬ ከጌታ ጋር እንደ ሆነ፣ የተከፈተ በር ባገኘሁበት ሁሉ ገብቼ ለጌታዬ ለመሥራት እንዳሰብሁ ነገርኋቸው።

በዚያው ስፍራ ሌላ ስብሰባ ተቀጠረ፤ እኔም በርግጥ ተገኘሁ፤ ከዚያ በኋላ ስብሰባዎቹ ለጊዜው ቆሙ፤ ይሁን እንጂ እነዚህ ሰዎች ከአቶ ቢማን ቤተ ክርስቲያን ከወጡ በኋላ በዚያ ብዙ ስብሰባዎችን አደረግሁ።

ከዚያም በገዛ ቤቴ ስብሰባ ማድረግ ጀመርሁ፤ መጋቢውም የቤተ ክርስቲያኒቱን ሥርዓት ስለሚጥሱ በስብሰባዎቹ ቢገኙ እንደሚቀጣቸው ለአባላቱ ነገራቸው። ስብሰባዎቹን እንደ ቀጠልሁና ጌታም ደካማ ጥረቴን እንደሚባርክ ባየ ጊዜ፣ ራሴን የእርሱ ቤተ ክርስቲያን አባል አድርጌ እቈጥር እንደ ሆነ እንዲጠይቁኝ ሁለት ሰዎች ያሉበት ኮሚቴ ላከ። እኔም አባል እንደ ሆንሁ፣ ከአባልነት የሚያስወጣ ጥፋት እስካላደርግ ድረስም ራሴን እንዲሁ እንደምቈጥር ነገርኋቸው።

በዚህ ጊዜ አቶ ቢማን ከኮሚቴው ጋር እንድገናኘው የሚጠይቅ ማስታወሻ አስይዞ ሌላ ኮሚቴ ላከ፤ እኔም ሄጄ አገኘሁት። ብዙ ጥያቄዎችን ጠየቀኝ፤ አብዛኞቹን ረስቻለሁ። አንዱን ግን አስታውሳለሁ፤ የቤተ ክርስቲያኒቱን የሥርዓት ደንብ ለማክበር ፈቃደኛ እንደ ሆንሁ ጠየቀኝ። እኔም «ደንቡ እግዚአብሔር ያዘዘኝን እንዳላደርግ የሚከለክለኝ ከሆነ ፈቃደኛ አይደለሁም፤ እኔ ከሰው ይልቅ እግዚአብሔርን እፈራለሁ» ብዬ መለስሁ። ተመሳሳይ ጥያቄዎችም ተጠየቁ፤ በተመሳሳይ መንገድም መለስሁ። ኮሚቴው ሊናገር የፈለገውን ተናገረ፤ ከዚያም ወደ ቤቴ መሄድ እንደምችል ነገሩኝ። ወደ በሩ ስደርስ ዘወር ብዬ እንዲህ አልሁ፦ «አሁን ምስክር እንዲሆንባችሁ የእግሬን ትቢያ አራግፋለሁ። ይህ ስብሰባ በፍርድ እንዳይነሣባችሁ ተጠንቀቁ።»

በማግሥቱ ምሽት ከኮሚቴው አንዱ ወደ እኔ መጥቶ በመስበኬ የሥርዓት ደንቡን ስለ ጣስሁ ከእንግዲህ የቤተ ክርስቲያኒቱ አባል እንዳልሆንሁ ነገረኝ።

ይህ ውሳኔ በታወቀ ጊዜ ሰዎች አንድ ሰው መልካም ለማድረግ በመሞከሩ ብቻ እንዴት ከቤተ ክርስቲያን ሊባረር እንደሚችል ተደነቁ። እኔ ብዙ አልተናገርሁም፤ ወዳጆቼም ስብሰባ ከማድረግ በቀር ምንም እንዳላደረግሁ ብቻ ተናገሩ። ዝርዝሩን ለማወቅ የጓጉ ሌሎች ሰዎችም ችግሩ ምን እንደ ሆነ መጋቢውን ጠየቁት። እርሱም የፈለግሁትን ያህል እንድናገር ወይም እንድሰብክ ፈቅዶልኝ እንደ ነበር፣ ነገር ግን የስብከት መድረኩን የመጠቀም መብት ሊሰጠኝ እንዳልቻለ፣ እኔም በሌላ በማንኛውም ስፍራ እንዳልረካሁ ነገራቸው። ደግሞም የእርሱ ስብሰባዎች በሚደረጉበት ምሽት ስብሰባ እንደ ቀጠርሁ፣ ይህም ማንም አባል ሊያደርገው መብት የሌለው ነገር እንደ ሆነ ተናገረ። በእነዚህ ምክንያቶች ከቤተ ክርስቲያን እንዳባረረኝ ተናገረ።

ይህን የነገሩኝ ሰዎች እውነቱን ተናግረው ከሆነ — እንደ ተናገሩም አልጠራጠርም — አቶ ቢማን ግልጽ ሐሰት ተናገረ። እኔ መድረኩን ከቶ አልጠየቅሁም ነበር፤ ይልቁንም የምቆምበት ቦታ ግድ እንደማይሰጠኝ — የአዳራሹ የትኛውም ማዕዘን እንደሚበቃኝ — ለእርሱም ለሌሎችም ደጋግሜ ነግሬ ነበር። ለዚህም አቶ ቢማን «በአዳራሹ ውስጥ ምንም ቦታ ልታገኚ አትችይም» ብሎ መልሶልኝ ነበር። እኔም «በግል ቤት እሰብካለሁ» አልሁት። እርሱም «አይሆንም፤ በዚህ ስፍራ አይሆንም፤ እኔ በቦስተን ሁሉ ላይ ተሹሜአለሁ» ብሎ መለሰልኝ። በቦስተን ከተማ እንዳልሰብክ ቍርጥ ውሳኔ አድርጎ ነበር። በእኔ ላይ የወሰደውን የማታለልና የዓመፃ አካሄድ ለመሸፈንም ከላይ የተጠቀሱትን ሐሰቶች ተናገረ።

ከተናገረው ቃል የተነሣ ስለ እኔ ብዙ የተሳሳቱ ወሬዎች በብዙ ሰዎች ዘንድ ተአማኒነት አገኙ። በዚያን ጊዜ ለጉባኤው (ኮንፈረንስ) ደብዳቤ መጻፍ ግዴታዬም መብቴም እንደ ሆነ አሰብሁ፤ እውነታዎቹን ሁሉ የገለጽሁበትን ደብዳቤም በአካል ወስጄ ሰጠኋቸው። በዚያው ጊዜም አቶ ቢማን ሆነ ሌላ ማንም በሥነ ምግባሬ ወይም በሃይማኖታዊ ሕይወቴ ላይ በእውነት አንዳች ክስ ሊያመጣ እንደማይችል — ብቸኛው ጥፋቴ የክርስቶስን ወንጌል ለመስበክ መሞከሬ እንደ ሆነ — በአቶ ቢማንም ሆነ በሌላ በማንም ላይ ምንም ክፉ ስሜት እንዳልያዝሁ ነገርኋቸው፤ ነገር ግን ጉባኤው ጉዳዩን ያለ አድልዎ እንዲያይና ከዚያም አስተያየቱን የሚገልጽ የጽሑፍ መግለጫ እንዲሰጠኝ እንደምፈልግ ገለጽሁ። ደግሞም ራሴን የጉባኤው አባል አድርጌ እንደምቈጥርና፣ አባል አይደለሽም እስኪሉኝና ጥፋቴ ምን እንደ ነበረ ለዓለም እንዳሳውቅ ምክንያታቸውን እስኪሰጡኝ ድረስ እንዲሁ እንደምቈጥር ተናገርሁ።

ደብዳቤዬ በንቀት ታየ፤ ከዚያም ከጠረጴዛው ሥር ተጣለ። ለምንስ ያስተውሉታል? የአንዲት ሴት ብሶት ብቻ ነበር፤ በዚያም ዘመን ለሴቶች የሚሰጥ ፍትሕ አልነበረም። የክርስቶስ አገልጋዮች እንኳ ሴቶች ሊያከብሩላቸው የሚገባ ምንም መብት እንዳላቸው አይሰማቸውም ነበር።