ቦስተን — የሙሉ መዳን ሥራ

ረጅምና አድካሚ ጉዞ አድርገን ቦስተን እንደ ደረስን ወዲያው ወደ ወይዘሮ ባሮውስ ቤት ሄድን፤ ባሌ በሳምንቱ ቀናት ሥራ ላይ ሳለ እኔ በዚያ ምግብ እየተሰጠኝ እንድኖር አስቀድሞ አዘጋጅቶ ነበር። እርሱ በቼልሲ ይሠራ ስለ ነበር ደኅንነቴን ለማየት የሚመጣው በሳምንት አንድ ጊዜ ብቻ ነበር። በዚህ ቤት የሚኖሩት እንግዶች በአብዛኛው ወንዶች ነበሩ፤ ከእነርሱም ሁሉም ማለት ይቻላል ከክርስቶስ ውጭ ነበሩ። ወይዘሮ ባሮውስ የቤተ ክርስቲያን አባል ነበረች፤ የመዳንን ሙሉ ደስታ ግን ምንም አታውቅም ነበር።

እዚያ በደረስሁ በመጀመሪያው ሰንበት ወደ ቤተ ክርስቲያን ሄድሁ፤ ለክፍል ስብሰባውም ቀረሁ፤ የአባልነት ደብዳቤዬን ለአገልጋዩ ሰጠሁ፤ በቤተ ክርስቲያኒቱም አባል ሆኜ ተቀበልሁ። የመጀመሪያ ምስክርነቴን ስሰጥ ስለ ተሟላውና ደስታ ስለ ሞላበት መለወጤ፣ እንዲሁም የመንፈስ ቅዱስ ሁለተኛና የተለየ ሥራ ስለ ሆነው ስለ መቀደሴ ተናገርሁ።

ከክፍል ስብሰባው በኋላ ብዙ ሰዎች ስለ መቀደስ ጥያቄ እየጠየቁ ወደ እኔ መጡ፤ ሌሎች በቡድን ሆነው ራቅ ብለው ይነጋገሩ ነበር፤ ጥቂቶችም እስከምኖርበት ቤት ድረስ ተከተሉኝ። በነገርኋቸው ነገር ሁሉም እጅግ የተነቃቁ ይመስሉ ነበር። ከትውልድ አገሬና ከዘመዶቼ መካከል ወጥቼ እንድሄድ ያዘዘኝ የሰው ድምፅ ሳይሆን የውድ ጌታዬ ድምፅ እንደ ሆነ ማስተዋል ጀመርሁ። «እግዚአብሔርንም ለሚወዱት … ነገር ሁሉ ለበጎ እንዲደረግ» እንደ ሆነ አውቅ ስለ ነበር፣ ለተከተለው ነገር ሁሉ ፈጽሞ ተዘጋጅቼ ነበር። በአባቴ ዘንድ አስተማማኝ መኖሪያ ስለ ነበረኝ የሰዎች፣ የቦታዎችና የሁኔታዎች መለዋወጥ ለእኔ ምንም አልነበረም። አንዳንድ ሰዎች ክርስቲያናዊ ባልሆነ መንፈስ ስለ ቀረቡኝ እኔም ለእነርሱና ስለ እነርሱ ባልተጠነቀቀ መንገድ ተናግሬ ነበር። አሁን ወንጌል የሚጠይቀውን የከንፈርና የሕይወት ንጽሕና መጠበቅ እችል ዘንድ፣ ቃሎቼን ሁሉ በእግዚአብሔር ፊት ቆሜ እንዳለሁ አድርጌ መምረጥ እጅግ እንደሚያስፈልገኝ ይበልጥ እያየሁ መጣሁ። እግዚአብሔር ቅዱስ ነው፤ ከእርሱ ጋር ያልተቋረጠ ኅብረት እንዲኖረኝ ከፈለግሁ፣ በፍቅር በፊቱ ነውር የሌለኝ እሆን ዘንድ የነፍሴን መግቢያ ሁሉ መጠበቅ፣ የልቤን አሳብ ሁሉና የአንደበቴን ቃል ሁሉ መከታተል አለብኝ። ጌታ ሁልጊዜ ነቅቼ እንድጠበቅ፣ ሁሉንም ፈጽሜም እንድቆም ይርዳኝ። አሜን፣ አሜን።

ከጥቂት ወራት በኋላ ባሌ ከምኖርበት ቤት ፊት ለፊት፣ መንገዱን ተሻግሮ ያለ ቤት ተከራየ፤ እኔም የራሴን ቤት መምራት ጀመርሁ። እጅግ ግሩም ክርስቲያን የነበረችው «ማም» ራይሊ ከውድ እናቴ ርቄ በነበርሁበት በዚህ እንግዳ አገር እንደ እናት ሆነችልኝ። ጌታ ይባረክ! የሚያስፈልገኝን ሁሉ አሟላልኝ። «ማም» ራይሊ ሁለት ያደጉ ሴቶች ልጆች ነበሯት፤ አንደኛዋ በዕድሜ እኩያዬ ነበረች፤ ያገባችና ሁለት ልጆች የነበሯት ነበረች። ውድ ክርስቲያን ሴቶች ነበሩ፤ ለእኔም እንደ እኅቶች ነበሩ። እናታቸው በአንድ ወቅት የልብ ንጽሕናን በረከት አግኝታ እንደ ነበረ ታስብ ነበር፤ ልጆቹ ግን አንድ ሰው ተቀድሶ በዚያው ሁኔታ እንዲኖር እንደሚፈቀድለት እንኳ ሰምተው አያውቁም ነበር።* የሳንባ ነቀርሳ ታማሚና ጤናዋ ደካማ የነበረው ታላቋ ልጅ ብዙም ሳይቆይ በዚህ ጉዳይ እጅግ ተሳበች። ጽድቅን ትራብና ትጠማ ጀመር፤ በኢየሱስ ደም ታጥባ እስክትነጻ ድረስም አላረፈችም። ቤተ ሰቧ በአካባቢው ማኅበረሰብ ውስጥ በሀብትና በክብር ከቀዳሚዎቹ አንዱ ስለ ነበር፣ ጥርት ያለውና ግልጽ ምስክርነቷ በቤተ ክርስቲያኒቱ ላይ ታላቅ ተጽዕኖ አሳደረ።

እግዚአብሔር የዚህችን ወጣት ቅድስት እምነት ለሌሎች ባደረገችው የማያቋርጥ ድካም አስደናቂ በሆነ ሁኔታ አከበረው።

ለመውጣት አቅም ባገኘች ጊዜ ሁሉ ማለት ይቻላል ሳናቋርጥ አብረን ወደ ስብሰባዎች እንሄድና ከቤት ወደ ቤት እንጐበኝ ነበር። ለእግዚአብሔር ክብር ይሁን! ቤተ ክርስቲያኒቱ እጅግ ተነቃቃች፤ አንዳንዶቹ ወደ ፍጹም ፍቅር ውቅያኖስ ዘልቀው ገቡ፤ ስለ ደሙ ኃይል እየመሰከሩም ወጡ። ሌሎች ግን ይህን «የሞኝነት ትምህርት» — እነርሱ እንደ ጠሩት — አላመኑበትም፤ አፌዙበትም፤ ሳይበሉ መኖር እንደማይቻል ሁሉ ኃጢአት ሳይሠሩ መኖርም የማይቻል ነው አሉ፤ ይህንንም ለማስደገፍ ከዐውዳቸው የተቈራረጡ የመጽሐፍ ቅዱስ ክፍሎችን አመጡ።