Neno Moja—“Injili”

Soma 1 Wakorintho 15:1

Nitachukua kama andiko langu lile neno moja, “Injili.” Sidhani kama kuna neno katika lugha ya Kiingereza lisiloeleweka sana katika nchi hii ya Kikristo ya Uingereza kama neno hili hili, “Injili.” Tumelisikia tangu utoto wetu wa mapema kabisa. Hakuna siku, na kwa wengi wetu hakuna hata saa moja ya mchana, ambayo hatulisikii neno “Injili.” Na bado, nasema, mtu aliyeishiriki Injili hukaa muda mrefu kabla hajajua kweli maana ya neno hilo. Maana yake ni “habari njema.” Nadhani ingetufaa nyakati fulani kuchukua kamusi na kutafuta maana ya baadhi ya maneno tunayoyatumia mara nyingi hivi; baadhi ya maneno yale ya Biblia, kama vile “Injili” na “Kristo.” Nadhani yangebadilisha mawazo yetu. Nadhani mkutano huu ungekuwa wa furaha kubwa sana usiku huu, kama kila mmoja angeamini kweli kwamba Injili ni habari njema. Mtu au kijana na alete simu ya upepo katika mkutano huu na kumkabidhi mtu ye yote hapa, na kama inaleta habari njema utaiona mara moja katika uso wa mtu yule; uso wake hung’aa anapoifungua simu ile. Waweza kuona kwamba anaiamini kweli. Na kama kweli ni habari njema, kama inamletea habari za mwana aliyepotea zamani anayerudi nyumbani, basi, kama mkewe ameketi kando yake, humpa ile simu; anataka naye apate kuijua. Hangoji amwombe; hangoji mpaka wafike nyumbani. Vivyo hivyo ninapohubiri, wale wanaoiamini Injili kweli, kama niko karibu vya kutosha kuyatazama macho yao, naona nyuso zao zikiangaza, nao wanaonekana wachangamfu ajabu; lakini wale wasioiamini hukunja nyuso zao, na kuonekana kana kwamba umewaletea hati ya kuuawa, au umewaalika kuhudhuria mazishi.

HABARI NJEMA KULIKO ZOTE ULIMWENGUNI.

Hakuna habari njema zaidi zilizowahi kutoka mbinguni kuliko Injili. Hakuna habari njema zaidi zilizowahi kuyafikia masikio ya jamaa ya wanadamu kuliko Injili. Sikiliza! wasikie wale wachungaji wakizungumza wao kwa wao baada ya malaika kuondoka. Waliuamini ujumbe ule, nao wakajaa furaha. Waweza kuwaona sasa wakiwa njiani kwenda Bethlehemu. Walisema, “Twendeni tukaone jambo lililotukia.” Na ujumbe ule ambao malaika waliwaletea wachungaji wale ulikuwa upi? “Tazama, mimi nawaletea habari njema ya furaha kuu itakayokuwa kwa watu wote. Kwa kuwa leo katika mji wa Daudi amezaliwa kwa ajili yenu Mwokozi.” Basi, kama wachungaji wale wangalikuwa kama watu wengi wa wakati huu, wangalisema, “Hatuamini kwamba ni habari njema. Ni msisimko mtupu. Malaika wale wanataka kuanzisha uamsho. Malaika wale wanajaribu kutusisimua. Msiwaamini hata kidogo.” Hivyo ndivyo Shetani anavyosema sasa. “Msiamini kwamba Injili ni habari njema.” Kwa sababu anajua kwamba mara mtu anapoiamini habari njema, huipokea tu. Sijawahi kumwona mtu maishani mwangu asiyependa habari njema. Na kila mwanamume na mwanamke aliye chini ya nguvu za Ibilisi haamini kwamba Injili ni habari njema. Mara utokapo chini ya nguvu zake na mvuto wake, ndipo unapoiamini. Mungu na ajalie Injili izame ndani sana mioyoni mwenu, nanyi mpate kuiamini na kuokoka.

Ni habari njema kuliko zote zilizowahi kuujia ulimwengu huu uliolaaniwa kwa dhambi. Maana yake ni “Good spell,” yaani neno jema, au, kwa maneno mengine, “God’s spell,” yaani neno la Mungu. Tu wafu kwa sababu ya makosa na dhambi, na Mungu anataka tupatanishwe naye. Ni Injili ya upatanisho, na Mungu anapiga kelele kutoka vilele vya utukufu, “Ee, enyi wanadamu, mimi nimepatanishwa, sasa nanyi mpatanishwe!” Tuna habari tukufu za kuwaambia—Mungu amepatanishwa, na anawasihi raia zake wapatanishwe. Yule mtume mkuu asema, “Twawasihi kwa ajili ya Kristo, mpatanishwe na Mungu.” Mara mtu anapoiamini Injili, mkono wake wa uasi hushuka chini, na ule ugomvi usio na usawa umekwisha. Nuru kutoka Kalvari huivuka njia yake, naye aweza kutembea katika jua lisilo na wingu, akipenda. Ni fursa ya kila mwanamume na mwanamke katika kusanyiko hili kubwa kuanzia saa hii kutembea katika jua lisilo na wingu wakipenda. Ni nini kilicholeta giza ulimwenguni? Giza lilikuja kwa sababu ya dhambi, na mtu asiyeiamini Injili amepofushwa na mungu wa dunia hii. Basi nataka kuwaambia kwa nini naipenda Injili. Ni kwa sababu imekuwa habari njema kuliko zote nilizowahi kuzisikia. Hiyo ndiyo sababu hasa napenda kuihubiri. Kwa sababu imenitendea mema mengi mno. Sidhani kwamba mtu aweza kuihubiri Injili mpaka yeye mwenyewe aiamini. Mtu lazima aijue ndani kabisa ya moyo wake mwenyewe kabla hajaweza kuieleza wazi; na hata hapo huieleza vibaya sana hata kwa ubora wake.

WAJUMBE DHAIFU.

Sisi ni wajumbe na matarishi dhaifu sana; lakini usimjali mjumbe, ushike ujumbe—hicho ndicho mnachohitaji. Kama kijana angeniletea habari njema usiku huu, nisingejali sura ya kijana yule; nisingejali kama ni mweusi au mweupe, msomi au asiye msomi. Ujumbe ndio ungenifaa. Watu wengi sana humtazama mjumbe badala ya ujumbe. Usimjali mjumbe. Rafiki zangu, ushikeni ujumbe usiku huu. Injili ndiyo iokoayo, na ninachotaka sasa ni kwamba mpate kuiamini Injili sasa hivi.

KRISTO ALIKUFA KWA AJILI YA DHAMBI ZETU.

Paulo asema katika sura hii ya kumi na tano ya Wakorintho wa Kwanza Injili ni nini. Asema, “Nawajulisha Injili.” Na jambo la kwanza analolitaja katika tangazo hilo kwa Wakorintho hawa ni hili: “Kristo alikufa kwa ajili ya dhambi zetu, kama yanenavyo maandiko.” Hiyo ndiyo ilikuwa Injili ya zamani. Natumaini hatutaiacha kamwe. Sitaki kitu kingine ila ile hadithi ya kale, ya kale. Watu wengine wana masikio ya kuwashwa wakitaka kitu kipya. Kumbukeni kwamba hakuna Injili mpya. Kristo alikufa kwa ajili ya dhambi zetu. Kama hakufa, tutaziondoaje? Je, mngemtukana Mwenyezi kwa kumtolea matunda ya mwili huu dhaifu ili kuilipia dhambi? Kama Kristo hakufa kwa ajili ya dhambi zetu, roho zetu zitakuwaje? Kisha anaendelea kueleza kwamba Kristo alizikwa, na kwamba Kristo alifufuka tena.

KRISTO AMEFUFUKA.

Alivunja vifungo vya mauti. Mauti haikuweza kumshika. Naweza kuwaza, walipomlaza katika kaburi la Yusufu, kama macho yetu yangalikuwepo pale, tungaliiona Mauti ikiwa imeketi juu ya kaburi lile, ikisema, “Nimempata; yeye ni mawindo yangu. Alisema yeye ndiye huo ufufuo, na uzima. Sasa nimemshika katika kumbatio langu la baridi. Mtazameni. Yeye yupo; imembidi kunilipa kodi. Wengine walidhani hatakufa kamwe. Wengine walidhani nisingempata. Lakini yeye ni wangu.” Lakini tazama tena. Asubuhi ile tukufu inafika, na Mwana wa Adamu anavunja vifungo vya mauti, akatoka kaburini. Hatumwabudu Mungu aliyekufa, bali Mwokozi aliye hai hata sasa. Naam, alifufuka kutoka kaburini; kisha wakamwona akipaa. Hiyo ndiyo Paulo anaiita Injili. Si kifo cha Kristo na kuzikwa kwake tu, bali kupaa kwake mbinguni. Alipanda juu akaketi mkono wa kuume wa Mungu, naye atarudi tena. Injili ina mambo matano: kifo cha Kristo, kuzikwa kwake, kufufuka kwake, kupaa kwake, na kuja kwake tena; kwa maana alisema, “Nitakuja tena.” Mungu ashukuriwe, anarudi karibuni. Atakuja na kuutwaa ufalme; atatawala kwa fimbo yake ya enzi kutoka mito hata miisho ya dunia. Bado kitambo kidogo naye atatawala na kumiliki. Na tuinue vichwa vyetu tukifurahi kwa kuwa wakati wa ukombozi wetu umekaribia.

Na turudi kwenye Injili sahili—Kristo alikufa kwa ajili ya dhambi zetu. Lazima kwanza tumjue Kristo pale Kalvari, kama

MBADALA WETU,

kama Mkombozi wetu; na mara tunapomkubali kuwa Mwokozi wetu na Mkombozi wetu, ndipo tunapokuwa washiriki wa Injili. Mara ninapomwamini Bwana Yesu Kristo kuwa mbadala wangu, kuwa Mwokozi wangu, wakati ule ule napata nuru na amani. Najua watu wengine husema, “Aa, si kifo cha Kristo, ni maisha ya Kristo. Msihubiri sana habari za kifo cha Kristo, hubirini habari za maisha yake.” Rafiki zangu, hilo halitamwokoa mtu ye yote kamwe. Paulo asema, “Nawajulisha Injili. Kristo alikufa”—si Kristo aliishi—“Kristo alikufa kwa ajili ya dhambi zetu,” “yeye mwenyewe alizichukua dhambi zetu katika mwili wake juu ya mti.” Basi, ninapomkubali Kristo kuwa Mwokozi wangu, kuwa Mbadala wangu, ndipo ninapohesabiwa haki katika mambo yote nisiyoweza kuhesabiwa haki kwa torati ya Musa.

KUMBUKUMBU ZANGU MWENYEWE.

Sababu ya kuipenda Injili ni kwamba imewaondoa njiani mwangu adui wabaya kuliko wote niliowahi kuwa nao. Akili yangu inarudi nyuma miaka ishirini iliyopita, kabla sijaongoka, na mara nyingi nafikiri jinsi mambo yalivyoonekana ya giza nyakati fulani nilipowaza habari za wakati ujao. Palikuwa na mauti—ilionekana adui wa kutisha kama nini! Nililelewa katika kijiji kidogo huko New England. Ilikuwa desturi pale mtu anapozikwa kuipiga kengele mara nyingi kama umri wake wakati wa mazishi yake. Nilikuwa nikiyahesabu mapigo ya kengele. Kila mara mauti ilipoingia kijijini mle na kumnyakua mmoja wa wakazi wake, sikukosa kuihesabu milio ya kengele. Nyakati fulani ilifika hata sabini, au kati ya sabini na themanini; kupita maisha aliyogawiwa mwanadamu, hata ilionekana mtu alikuwa akiishi kwa muda wa kuazima alipokatiliwa mbali. Nyakati nyingine ingeshuka chini kabisa hata miaka ya ujana, na ya utoto, na mauti ingemchukua mmoja wa rika langu. Ilikuwa ikinitia moyoni hisia nzito; nilikuwa mwoga mkubwa. Linapokuja suala la mauti, watu wengine husema, “Mimi siiogopi.” Mimi niliiogopa, na niliona hofu kuu nilipowaza juu ya mkono wa baridi wa mauti ukipapasa kamba za uhai, na kusukumwa kuingia umilele, kwenda katika ulimwengu nisioujua. Nilikuwa na mawazo ya kutisha juu ya Mungu; lakini yote yamekwisha sasa. Mauti imepoteza uchungu wake. Na ninapoendelea kupita ulimwenguni sasa naweza kupiga kelele ya shangwe kengele inapolia, “Ku wapi, Ewe mauti, uchungu wako?” Nami nasikia sauti ikibingirika kushuka kutoka Kalvari, “Umezikwa kifuani mwa Mwana wa Mungu.” Aliinyang’anya mauti uchungu wake; aliutwaa uchungu wa mauti kifuani mwake mwenyewe. Ukimchukua nyigu, na kumng’oa tu mwiba wake wa kuuma, hutamwogopa zaidi kuliko ungemwogopa inzi mdogo. Uchungu wake umeondolewa. Nawe huna haja ya kuiogopa mauti kama uko ndani ya Kristo. Kristo alikufa kwa ajili ya dhambi yako. Adhabu, mshahara wa dhambi, ni mauti. Kristo aliupokea mshahara ule pale Kalvari, na kwa hiyo hakuna hukumu ya adhabu. Mauti sasa inachoweza kupata ni huyu Adamu wa kale tu. Sijali ni upesi gani nitaondokana naye. Nitapata mwili bora, mwili wa ufufuo, mwili uliotukuzwa, mwili ulio bora kuliko huu kwa mbali. Naam, rafiki zangu, “Kufa,” asema mtume, “ni faida.”

HOFU YA MAUTI.

Kama mtu yuko ndani ya Kristo, mauti na ije. Tuseme mauti ingenyemelea kupanda katika mimbari hii, na kuweka mkono wake wa baridi, wa barafu, juu ya moyo wangu, nao ukaacha kupiga; ningepaa kwenda ulimwengu mwingine, na ningekuwa pamoja na Mfalme. Ningekuwa mbali na mwili, lakini nikiwa pamoja na Bwana. Hizo si habari mbaya. Hakuna faida kujaribu kulificha jambo hili, mauti ni adui wa raha ya mwanadamu. Ni wazo tukufu kama nini kufikiri kwamba utakapokufa utazama mikononi mwa Yesu, naye atakuchukua kwenda kule katika ulimwengu wa nuru. Bado kitambo kidogo hapa, machozi machache zaidi, kisha waweza kupata raha isiyokatika kule katika ulimwengu wa nuru. Injili humgeuza adui huyo kuwa rafiki, nawe hata unaishangilia mauti. Basi, zamani nilikuwa nikienda kulitazama kaburi baridi, kimya, na nilikuwa nikiifikiria saa ile ya kutisha nitakapolazwa kaburini, na mwili huu utaliwa na funza. Lakini sasa kaburi limepoteza utisho wake na huzuni yake; naweza kwenda na kuchungulia ndani ya kaburi na kupiga kelele za shangwe juu yake, na kulia, “Ku wapi, Ewe kaburi, kushinda kwako?” Nami nasikia kelele ya shangwe ikipanda kutoka kaburini; ni kelele ya Mshindi, ya yeye aliyeshuka huko na kupima kina chake, ya Bwana wangu na Mwokozi wangu: “Kwa sababu mimi ni hai, ninyi nao mtakuwa hai.” Naam, kaburi limepoteza kushinda kwake. Kaburi halina utisho wo wote kwa mtu aliye ndani ya Kristo Yesu. Injili humwondoa adui huyo njiani.

DHAMBI IMEONDOLEWA.

Tena, nilidhani dhambi zangu zote zingewekwa wazi mbele ya kile kiti kikubwa cheupe cha enzi; kwamba kila dhambi niliyotenda utotoni na sirini, na kila wazo la siri, na kila tamaa ovu, ingewekwa wazi mbele ya ulimwengu wote uliokusanyika; kwamba kila jambo lililotendwa gizani lingeletwa nuruni. Lakini, Mungu ashukuriwe, Injili inaniambia kwamba dhambi zangu zote zimeondolewa katika Kristo. Kwa kuipenda roho yangu, amezichukua dhambi zangu zote na kuzitupa nyuma ya mgongo wake. Hapo ni mahali salama pa kuwekwa dhambi, nyuma ya mgongo wa Mungu. Mungu hageuki nyuma kamwe; yeye huendelea mbele sikuzote. Hataziona kamwe dhambi zako kama ziko nyuma ya mgongo wake. Hicho ni kimojawapo cha vielelezo vyake mwenyewe. Kwa kuipenda roho yangu, amezitwika dhambi zangu zote juu yake; si sehemu tu. Huziondoa zote njiani. Hakuna hukumu ya adhabu juu yake aliye katika Kristo Yesu. Waweza kulundika dhambi zako mpaka zipande juu kama mlima wa giza, kisha uzizidishe mara elfu kumi kwa ajili ya zile usizoweza kuzikumbuka; na baada ya kujaribu kuzihesabu dhambi zote ulizowahi kuzitenda, niache tu nilete mstari mmoja, na mlima ule utayeyuka—“Damu yake Yesu Kristo, Mwana wake, yatusafisha dhambi yote.” Damu huifunika dhambi.

MUNGU ASICHOWEZA KUKIFANYA.

Huko Ireland, zamani kidogo, mwalimu mmoja alimwuliza mvulana mdogo kama kuna kitu cho chote ambacho Mungu hawezi kukifanya, na yule kijana mdogo akasema, “Ndiyo; hawezi kuziona dhambi zangu kupitia damu ya Kristo.” Hicho ndicho hasa asichoweza kukifanya. Damu huzifunika.

Je, si habari njema kuondolewa dhambi yako? Unakuja hapa ukiwa mwenye dhambi, na ukiiamini Injili dhambi zako zinaondolewa. “Mwamini Bwana Yesu Kristo, nawe utaokoka.” Utahesabiwa haki katika mambo yote usiyoweza kuhesabiwa haki kwa torati ya Musa. Kwa kuamini, au kwa kuipokea Injili, Kristo anakuwa wako. Hebu fikiri, kijana, unaalikwa kuikubali Injili, unaalikwa kufanya mabadilishano—kuondolewa dhambi zako zote, na kumpokea Kristo mahali pake. Je, hilo si la ajabu? Utakuwa kijana mpumbavu kama nini usipofanya mapatano hayo. Bwana asema, “Nitazichukua dhambi zako, nami nitakupa nafsi yangu mwenyewe mahali pake.” Lakini wengi sana husema, “Hapana”; na kuikumbatia dhambi vifuani mwao. Mungu na akusaidie kuja mbele, mwenye dhambi, usiku huu, na kumpokea Bwana Yesu Kristo kuwa njia yako, kweli yako, na uzima wako.

Kuna jina jingine lililokuwa likinisumbua sana—

SIKU KUU YA HUKUMU.

Nilidhani ile ingekuwa siku ya kutisha ambapo ningeitwa mbele za Mungu, wala nisingeweza kujua mpaka hapo kama ningepata kiti mkono wake wa kuume au wa kushoto. Mpaka nisimame mbele ya kiti kikubwa cheupe cha enzi cha hukumu nisingeweza kujua kama ningesikia sauti ya Mungu ikisema, “Ondokeni kwangu, enyi mliolaaniwa,” au kama Mungu angesema, “Ingia katika furaha ya Bwana.” Lakini Injili inaniambia kwamba swali hilo limekwisha kutatuliwa—“Sasa hakuna hukumu ya adhabu juu yao walio katika Kristo Yesu.” Sikilizeni mstari huu—“Amin, amin”—na unapoliona neno hilo “Amin, amin” katika Maandiko, waweza kujua kwamba kuna jambo la maana sana linakuja; maana yake ni, “Yazingatieni ninayowaambia,” au, “Kweli, kweli”—“Kweli, kweli, nawaambia, Yeye alisikiaye neno langu, na kumwamini yeye aliyenipeleka, yuna [y-u-n-a, yuna] uzima wa milele, wala haingii katika hukumu ya adhabu [maana yake, hukumuni]; bali amepita kutoka mautini kuingia uzimani.” Basi, sasa, siingii hukumuni kwa ajili ya dhambi. Swali limekwisha kutatuliwa, kwa sababu Kristo alihukumiwa kwa ajili yangu, akafa mahali pangu, nami naenda huru. Je, hizo si habari njema?

Nilimsikia mtu mmoja siku moja iliyopita akiomba kwamba mimi nipate kuushika uzima wa milele. Nisingeweza kusema Amina kwa hilo. Niliushika uzima wa milele miaka ishirini iliyopita nilipoongoka. Karama ya Mungu ni nini kama si uzima wa milele? Na hicho ndicho Mungu anachotaka kumpa kila mmoja katika ukumbi huu usiku huu, nayo ni karama kuu kuliko zote ziwezazo kutolewa kwa mtu ye yote huku chini katika ulimwengu huu wa giza. Kama malaika angekuja moja kwa moja kutoka katika kiti cha enzi cha Mungu hadi jukwaa hili, na kulitangazia kusanyiko hili kubwa kwamba Mungu amemtuma hapa kuwapa wasikilizaji hawa kitu kimoja cho chote watakachoomba, kwamba kila mmoja angepewa ombi lake mwenyewe, kilio katika kusanyiko hili kingekuwa nini? Kungekuwa na kilio kimoja tu kikipanda kutoka kwenu, na kelele ile ingeifanya mbingu ivume—“Uzima wa milele! uzima wa milele!” Kila kitu kingine kingeelea mbali na kupotea katika yaliyopita zamani. Hakuna kitu ambacho mtu anakithamini zaidi ya uhai wake. Mtu mwenye mali ya pauni milioni moja na awe katika meli iliyovunjika, na kama angeweza kuokoa maisha yake kwa miezi sita tu kwa kutoa milioni ile, angeitoa mara moja. Karama ya Mungu ni uzima wa milele; na je, si mojawapo ya maajabu makuu kabisa kwamba imetupasa kusimama na kuwasihi, na kuwaomba watu waipokee karama hii. Mungu na akusaidie kuipokea sasa. Usimsikilize Shetani tena. Nyosha mkono wa imani uipokee sasa. Kijana, “Mwamini Bwana Yesu Kristo, nawe utaokoka.” Mtumaini akuokoe sasa, na ndipo hakutakuwa na hukumu ya adhabu. Mauti itakuwa imepoteza uchungu wake, kaburi na kushinda kwake vitakuwa vimeondolewa njiani salama, na hukumu itakuwa imepita kwa ajili yako. Iamini Injili. Ushike uzima wa milele wakati Mungu anapokupa. Patanishwa usiku huu. Simama kando kabisa ya msalaba, nawe umeokoka kwa wakati huu na kwa milele. Nimeambiwa kwamba huko Rumi, ukipanda ngazi chache kwa mikono na magoti, hiyo ni miaka tisa nje ya toharani. Ukipiga hatua moja sasa uko nje ya toharani kwa wakati huu na kwa milele. Zamani ulikuwa na hatua mbili kuingia utukufuni—kutoka katika nafsi kuingia ndani ya Kristo, kutoka ndani ya Kristo kuingia utukufuni. Lakini sasa kuna njia fupi zaidi yenye hatua moja tu—kutoka katika nafsi kuingia utukufuni, nawe umeokoka. Mungu na akusaidie kupiga hatua hiyo sasa! Kimbieni, rafiki zangu, usiku huu kwenda Kalvari, mkaingie chini ya kivuli cha msalaba.

MOTO KATIKA NYIKA.

Huko katika nchi yetu ya magharibi, wakati wa vuli, watu wanapokwenda kuwinda, na hakujanyesha mvua kwa miezi kadhaa, nyakati fulani majani ya nyika hushika moto, na huvuma upepo mkali sana, na miali hubingirika tu ikiwa na kimo cha futi ishirini juu ya jangwa lile la magharibi, na kwenda kwa mwendo wa maili thelathini au arobaini kwa saa, ikiteketeza mtu na mnyama. Wawindaji wanapouona ukija, hufanya nini? Wanajua hawawezi kukimbia kasi kama moto uwezavyo kukimbia. Hata farasi mwenye mbio kuliko wote hawezi kuukimbia moto ule. Huchukua tu kiberiti na kuwasha majani yanayowazunguka, na kuiacha miali ienee, kisha huingia katika eneo lililokwisha kuungua na kusimama salama. Huisikia miali ikinguruma inapokuja, huiona mauti ikiwajia, lakini hawaogopi, hawatetemeki, kwa sababu moto umekwisha kupita mahali walipo, wala hakuna hatari. Hakuna kitu cha moto kuteketeza. Kuna kilele kimoja cha mlima ambacho ghadhabu ya Mungu imekwisha kupita juu yake—yaani, Mlima Kalvari, na moto ule ulimaliza ukali wake wote juu ya kifua cha Mwana wa Mungu. Simama hapa kando ya msalaba, nawe utakuwa salama kwa wakati huu na kwa milele. Jiponye nafsi yako; kimbilia mlima ule, nawe umeokoka dakika hii hii. Ee, Mungu na akulete Kalvari chini ya kivuli cha msalaba sasa! Ndipo mauti na kaburi na vije. Utapiga kelele, “Atukuzwe Mungu juu mbinguni.” Tutaicheka mauti na kujisifu juu ya kaburi, na kujua tu hili, kwamba tuko salama, tumehifadhiwa na damu ya thamani ya Mwana-Kondoo. Hakuna hukumu ya adhabu juu yake aliye katika Kristo Yesu.

Mungu anashuka na kukusihi uupokee msamaha. Kila mwanamume na mwanamke hapa ameivunja sheria, na yeye aliyevunja iliyo ndogo kabisa ya amri ana hatia ya zote. Nina hakika sizungumzi na mwanamume au mwanamke hata mmoja katika kusanyiko hili usiku huu awezaye kusema hajaivunja sheria.

“SASA NA KESHO.”

Ninyi nyote mmefanya dhambi, na kupungukiwa na utukufu wa Mungu, lakini Mungu anakuja, na kusema, “Nitawasamehe. Njoni sasa, tusemezane.” “Sasa” ni mojawapo ya maneno ya Biblia ambayo Ibilisi anayaogopa. Yeye husema, “Usiharakishe; kuna muda mwingi; usiokoke sasa.” Anajua uzito wa neno hilo “sasa.” “Kesho” ni neno la Ibilisi. Neno la Bwana ni “sasa.” Mungu asema, “Njoni sasa, tusemezane: dhambi zenu zijapokuwa nyekundu sana, zitakuwa nyeupe kama theluji; zijapokuwa nyekundu kama bendera, zitakuwa kama sufu.” Rangi nyekundu sana na nyekundu ya bendera ni rangi mbili zisizotoka; huwezi kuiondoa rangi bila kuliharibu vazi. Mungu asema, “Dhambi zenu zijapokuwa nyekundu sana na nyekundu kama bendera, nitazifanya kama sufu na theluji. Nitafanya hivyo.” Hivyo ndivyo Mungu anavyosemezana nasi. Yeye humwekea mwenye dhambi msamaha mbele ya uso wake kama jambo la kwanza kabisa. Ni njia ya ajabu ya kusemezana, lakini mawazo ya Mungu si mawazo yetu; na hivyo, rafiki zangu, mkitaka kuokoka, Bwana asema atawasamehe.

GAVANA NDANI YA CHUMBA CHA MFUNGWA ALIYEHUKUMIWA.

Miaka michache iliyopita, wakati Pennsylvania ilipokuwa na gavana Mkristo, palikuwa na kijana mmoja katika mojawapo ya wilaya aliyekamatwa kwa kosa la kuua. Aliletwa mbele ya mahakama, akashtakiwa, akaonekana na hatia, akahukumiwa kufa. Rafiki zake walidhani hapangekuwa na shida ya kupata kuahirishwa kwa adhabu au msamaha. Kwa sababu gavana alikuwa mtu Mkristo, walidhani hangetia sahihi hati ya kuuawa. Lakini aliitia sahihi. Walimwendea gavana, na kumsihi amsamehe kijana yule. Lakini gavana akasema, “Hapana, sheria lazima ifuate mkondo wake, na mtu huyu lazima afe.” Nadhani mama yake kijana yule alimwendea gavana na kumsihi, lakini gavana alisimama imara, akasema, “Hapana, mtu huyu lazima afe.” Siku chache kabla mtu yule hajauawa, gavana alipanda gari la moshi kwenda wilaya ile ambamo mtu yule alifungwa. Alimwendea sherifu wa wilaya ile, akamwambia, “Nataka unipeleke kwenye chumba cha mtu yule, uniache peke yangu pamoja naye kwa muda kidogo, wala usimwambie mimi ni nani mpaka nimeondoka.” Gavana akaenda gerezani, akazungumza na kijana yule habari za roho yake, akamwambia kwamba ingawa alikuwa amehukumiwa na wanadamu kuuawa, Mungu angemrehemu na kumwokoa, kama angeukubali msamaha kutoka kwa Mungu. Alimhubiri Kristo, akamweleza jinsi Kristo alivyokuja kutafuta na kuokoa wenye dhambi; na baada ya kumweleza kwa kadiri alivyoweza mpango wa wokovu, akapiga magoti akaomba, na baada ya kuomba akamshika mkono na kumuaga. Muda fulani baadaye sherifu alipopita karibu na chumba cha mfungwa yule aliyehukumiwa, mfungwa akamwita aje mlangoni pa chumba, akasema, “Yule mtu aliyezungumza na kuomba pamoja nami kwa upole hivi ni nani?” Sherifu akasema, “Yule alikuwa Gavana Pollock.” Mtu yule akageuka rangi kama mfu, akainua mikono yake yote miwili, akasema, “Yule alikuwa Gavana Pollock? yule mtu mwenye moyo wa huruma alikuwa gavana? Ee, sherifu, mbona hukuniambia? Kama ningalijua kwamba yule ni gavana, ningalianguka miguuni pake na kuomba msamaha; ningalimsihi anipe msamaha na kuniachia uhai wangu. Ee, bwana, gavana amekuwa hapa, nami sikujua.”

UPATANISHO.

Mwenye dhambi, nina habari njema za kukuambia. Yupo mmoja aliye mkuu kuliko gavana hapa usiku huu, naye anataka kumsamehe kila mmoja. Hataki uondoke ukiwa umehukumiwa. Anataka kukutoa chini ya hukumu ya adhabu; kuisamehe kila roho. Je, utaupokea msamaha, au utaidharau karama ya Mungu? Je, utaidharau rehema ya Mungu? Ee, usiku huu, wakati Mungu anakusihi upatanishwe, niruhusu niungane na mama yako anayekuombea, na baba yako anayekuombea, na mchungaji wako mcha Mungu, na mwalimu wako wa Shule ya Jumapili, na rafiki zako wote wanaokuombea; niruhusu niiunganishe sauti yangu na zao kukusihi usiku huu upatanishwe. Amua sasa, wakati ninaponena, kwamba hutavuka kizingiti cha mlango wako mpaka umepatanishwa, na kutakuwa na furaha mbinguni usiku huu kwa ajili ya uamuzi wako. Ee, Mungu na awalete mamia kufanya uamuzi usiku huu!

Mwingereza mmoja aliniambia zamani kidogo hadithi fupi ya upatanisho, inayoieleza kweli hii. Tunataka kuihubiri Injili ya upatanisho; habari njema kwamba Mungu amepatanishwa. Mungu hasemi kwamba anaweza kufanya, bali kwamba amekwisha kufanya. Lazima ukubali alichokwisha kukifanya. Hadithi yenyewe ni hii: Palikuwa na Mwingereza mmoja aliyekuwa na mwana mmoja tu; na wana wa pekee mara nyingi hudekezwa, na kuendekezwa, na kuharibiwa. Kijana huyu akawa mkaidi sana, na mara nyingi yeye na baba yake walikuwa na matata. Siku moja waligombana, na baba alikasirika sana, na mwana naye vivyo hivyo; na baba akasema anatamani kijana aondoke nyumbani asirudi tena kamwe. Kijana akasema angeondoka, wala asingeingia tena katika nyumba ya baba yake mpaka baba amtume kumwita. Baba akasema hatamwita kamwe. Basi, kijana akaondoka. Lakini baba anapomwacha mwana, mama hamwachi. Ninyi akina mama mtalielewa hilo, lakini akina baba huenda wasilielewe. Mnajua kwamba hakuna upendo duniani ulio na nguvu kama upendo wa mama. Mambo mengi sana yaweza kumtenganisha mume na mkewe; mambo mengi sana yaweza kumtenganisha baba na mwana; lakini hakuna kitu katika ulimwengu huu mpana kiwezacho kamwe kumtenganisha mama wa kweli na mtoto wake. Kweli, wapo akina mama fulani waliokunywa pombe nyingi hata wamekunywa upendo wao wote ukaisha. Lakini nazungumza habari za mama wa kweli; naye asingemtupa mwanawe.

UPENDO WA MAMA.

Basi, mama huyu akaanza kumwandikia kijana na kumsihi amwandikie baba yake kwanza, na baba yake angemsamehe; lakini kijana akasema, “Sitarudi nyumbani kamwe mpaka baba aniite.” Alimsihi baba, lakini baba akasema, “Hapana, sitamwita kamwe.”

Mwishowe mama akaangushwa kitandani kwa ugonjwa, akiwa amevunjika moyo, na matabibu walipokata tamaa naye wakisema atakufa, mumewe, akitamani kulitimiza ombi lake la mwisho, alitaka kujua kama hakukuwa na jambo lo lote angeweza kumfanyia kabla hajafa. Mama akamtazama; alijua vema maana yake. Kisha akasema, “Ndiyo, liko jambo moja uwezalo kufanya, waweza kumwita mwanangu. Hilo ndilo ombi pekee duniani uwezalo kulitimiza. Usipomhurumia na kumpenda nitakapokuwa nimekufa na kuondoka, ni nani atakayefanya hivyo?” “Vema,” akasema baba, “nitampelekea habari kwamba unataka kumwona.” “Hapana,” asema mama, “wajua hatakuja kwa ajili yangu. Kama nitamwona kamwe lazima wewe umwite.” Mwishowe baba akaenda ofisini kwake akaandika simu ya upepo kwa jina lake mwenyewe, akimwomba kijana arudi nyumbani. Mara tu alipopata mwaliko kutoka kwa baba yake, aliondoka kwenda kumwona mama yake aliyekuwa akifa. Alipofungua mlango kuingia alimkuta mama yake akikata roho na baba yake kando ya kitanda. Baba aliusikia mlango ukifunguka, akamwona kijana, lakini badala ya kwenda kumlaki alikwenda upande mwingine wa chumba, akakataa kuzungumza naye. Mama yake akaushika mkono wake—jinsi alivyotamani kuubana! Akambusu, kisha akasema, “Sasa, mwanangu, zungumza tu na baba yako. Wewe zungumza kwanza, na yote yatakwisha.” Lakini kijana akasema, “Hapana, mama, sitazungumza naye mpaka yeye azungumze nami.” Akaushika mkono wa mumewe kwa mkono mmoja na mkono wa kijana kwa mkono mwingine, akazitumia dakika zake za mwisho na nguvu zake za mwisho akijaribu kuleta upatanisho. Alipokuwa akikata roho hakuweza kusema, basi akauweka mkono wa kijana yule mkaidi ndani ya mkono wa baba, akafariki. Kijana akamtazama mama, na baba akamtazama mkewe; na mwishowe moyo wa baba ukavunjika, akafungua mikono yake, akamkumbatia kijana yule kifuani mwake, na kando ya mwili ule wakapatanishwa. Mwenye dhambi, huo ni mfano hafifu tu, kielelezo duni, kwa sababu Mungu hakukasirikii. Mungu anakupa Kristo, nami nakuleta usiku huu kwenye mwili wa Kristo uliokufa. Nakuomba uyatazame majeraha ya mikono yake na miguu yake, na jeraha la ubavuni mwake. Rafiki zangu, yakazieni macho majeraha yake matano. Nami nawauliza, “Je, hamtapatanishwa?” Alipoiacha mbingu, alishuka chini kabisa hata horini ili apate kumshika mwenye dhambi aliye mwovu kuliko wote, na kuuweka mkono wa mwana mpotevu mkaidi ndani ya mkono wa Baba, naye alikufa ili mimi na wewe tupate kupatanishwa. Mkikubali shauri langu, hamtatoka katika ukumbi huu usiku huu mpaka mmepatanishwa. “Mpatanishwe.” Ee, Injili hii ya upatanisho! Rafiki zangu, rudini nyumbani usiku huu. Baba yenu anawataka mje. Semeni kama yule mpotevu alivyosema zamani, “Nitaondoka, nitakwenda kwa baba yangu,” na kutakuwa na furaha mbinguni.