Upendo wa Mungu kwa Ulimwengu Utendao Dhambi

Dhambi ndicho kitu kilicho ghali kuliko vyote katika ulimwengu wote. Hakuna kingine kiwezacho kugharimu kiasi hicho. Ikiwa imesamehewa au haikusamehewa, gharama yake ni kubwa isivyo na kikomo. Ikisamehewa, gharama yake huanguka hasa juu ya yule Mbadala mkuu wa upatanisho; isiposamehewa, sharti ianguke juu ya kichwa cha mwenye dhambi mwenye hatia.

Kuwako kwa dhambi ni jambo lililoonwa kila mahali--lililoshuhudiwa kila mahali. Iko dhambi katika wanadamu wenzetu, kila mahali, tena kwa uzito wa kutisha.

Dhambi ni uvunjaji wa sheria iliyo na umuhimu usio na kikomo,--sheria iliyokusudiwa na kupangwa ili kuulinda wema ulio mkuu kuliko yote wa ulimwengu. Kuitii sheria hii ni lazima kwa asili kwa ajili ya wema wa viumbe. Pasipo kutii, hapangekuwa na heri hata mbinguni.

Kwa kuwa dhambi ni uvunjaji wa sheria iliyo ya maana mno, haiwezi kupuuzwa. Hakuna serikali iwezayo kuuhesabu ukaidi kuwa jambo dogo, kwa maana kila kitu--hali njema yote ya serikali na ya watawaliwa wote--yategemea kutii. Kadiri ya thamani ya mambo yaliyo hatarini, ndivyo ilivyo lazima ya kuilinda sheria na ya kuadhibu ukaidi.

Sheria ya Mungu haina budi isivunjiwe heshima kwa lo lote atakalolitenda. Imekwisha vunjiwa heshima kwa ukaidi wa mwanadamu; kwa hiyo pana haja zaidi kwamba Mungu aisimamie, ili aurudishe utukufu wake. Sheria huvunjiwa heshima kwa ukamilifu kwa kuikana, kuiasi, na kuidharau. Haya yote, mwanadamu mwenye dhambi ameyatenda. Kwa hiyo, sheria hii ikiwa si njema tu bali ni ya lazima kabisa kwa furaha ya watawaliwa, huwa jambo la lazima kuliko yote kwamba Mtoa-sheria aihakikishie sheria yake haki. Sharti aitende kwa vyo vyote.

Kwa hiyo dhambi imeitia serikali ya Mungu katika gharama kubwa mno. Ama sheria sharti itekelezwe kwa gharama ya hali njema ya wanadamu wote, au Mungu sharti akubali kuyavumilia matokeo mabaya kuliko yote ya kuidharau sheria yake--matokeo ambayo kwa namna fulani sharti yalete gharama kubwa.

Tazama, kwa mfano, serikali yo yote ya kibinadamu. Tuseme sheria za haki na za lazima izitozazo zimekanwa na kuvunjiwa heshima. Katika hali kama hiyo, sheria iliyovunjwa sharti iheshimiwe kwa kutekelezwa kwa adhabu yake, au sharti kivumiliwe kitu kingine kisicho na gharama ndogo, tena yamkini gharama kubwa zaidi. Uvukaji wa sheria sharti ugharimu furaha, mahali fulani, tena kwa kiasi kikubwa.

Katika habari ya serikali ya Mungu, imeonwa kuwa vema kutoa mbadala, mmoja atakayelifikia kusudi la kumwokoa mwenye dhambi, na pia la kuiheshimu sheria. Jambo hili likiisha kuamriwa, swali kubwa lililofuata lilikuwa--Gharama italipwaje?

Biblia yatuarifu jinsi swali hilo lilivyoamuliwa kweli kweli. Kwa uandikishaji wa hiari--niuiteje,--au toleo? Tuuite vyo vyote, lilikuwa sadaka ya hiari. Nani atakayeongoza katika kutoa? Nani atakayeanza mahali ambapo kingi kiasi hicho chapasa kukusanywa? Nani atakayetoa dhabihu ya kwanza? Nani atakayepiga hatua ya kwanza katika mradi mkubwa hivyo? Biblia yatuarifu. Ulianza na Baba asiye na mwisho. Yeye alitoa toleo la kwanza lililo kuu. Alimtoa Mwanawe pekee--hili la kuanzia--naye akiisha kumtoa kwanza, hutoa kwa ukarimu kila kitu kinginecho ambacho mahitaji ya jambo hili yaweza kutaka. Kwanza alimtoa Mwanawe ili afanye upatanisho unaostahili sheria; kisha akamtoa na kumtuma Roho wake Mtakatifu aitwae kazi hii. Mwana kwa upande wake alikubali kusimama kuwa mwakilishi wa wenye dhambi ili aiheshimu sheria, kwa kuteseka mahali pao. Aliimwaga damu yake, akayafanya maisha yote ya mateso kuwa toleo la hiari juu ya madhabahu--hakuuzuia uso wake usitemewe mate, wala mgongo wake usipigwe mijeledi--hakurudi nyuma mbele ya matukano makuu kuliko yote ambayo watu waovu wangeweza kumwongezea. Vivyo hivyo Roho Mtakatifu naye hujitoa katika juhudi za kujikana nafsi bila kukoma, ili kulikamilisha kusudi lile kuu.

Ingekuwa njia fupi sana kuugeuza mkono wake juu ya waovu wa wanadamu wenzetu, na kuwashusha wote upesi mpaka kuzimu, kama alivyofanya wakati mmoja hapo malaika fulani "hawakuishika enzi yao ya kwanza." Uasi ulizuka mbinguni. Mungu hakuuvumilia muda mrefu, kandokando ya kiti chake cha enzi kilichoinuka. Lakini katika habari ya mwanadamu aligeuza mwendo wake--hakuwapeleka wote kuzimu, bali alibuni mpango mkubwa wa mbinu, uliohusisha kujikana nafsi na kujitoa dhabihu kwa ajabu kuu, ili kuzirudisha nafsi za watu katika kutii na mbinguni.

Toleo hili kuu lilifanywa kwa ajili ya nani? "Mungu aliupenda ulimwengu hivi," maana yake, jamii yote ya wanadamu. Kwa neno "ulimwengu" katika mahali hapa haiwezekani kumaanisha sehemu fulani tu, bali jamii yote. Si Biblia tu, bali hali yenyewe ya jambo hili yaonyesha kwamba upatanisho sharti ulifanyika kwa ajili ya ulimwengu wote. Kwa maana ni dhahiri kwamba kama usingalifanywa kwa ajili ya jamii nzima, hangaliweza mtu ye yote wa jamii hiyo kujua kamwe kwamba ulifanywa kwa ajili yake mwenyewe, na kwa hiyo hangaliweza mtu kumwamini Kristo kwa maana ya kupokea kwa imani baraka za upatanisho. --Kwa kuwa pana kutokuwa na hakika kabisa kuhusu watu waliomo katika masharti yenye mipaka ambayo sasa twadhani yamefanywa, toleo lote sharti lishindwe kwa sababu ya kutowezekana kwa imani yenye akili ya kulipokea. Tuseme wosia umefanywa na mtu tajiri akiurithisha mali fulani kwa watu fulani wasiojulikana, walioelezwa kwa jina la "wateule" tu. Hawakuelezwa kwa njia nyingine ila kwa neno hili, na wote wakubali kwamba ijapokuwa mwenye kufanya wosia aliwakumbuka watu hao waziwazi moyoni mwake, lakini hakuacha maelezo yao ambayo ama watu hao wenyewe, ama mahakama, wala mtu ye yote aliye hai awezaye kuyafahamu. Basi wosia kama huo sharti uwe batili na wa bure kabisa. Hakuna mtu aliye hai awezaye kudai kwa wosia kama huo, wala si afadhali ijapokuwa wateule hao wangeelezwa kuwa wenyeji wa Oberlin. Kwa kuwa hauwahusu wenyeji wote wa Oberlin, wala hauonyeshi ni yupi kati yao, yote yapotea. Wote wakiwa na dai lililo sawa na hakuna aliye na dai lililo dhahiri, hakuna awezaye kurithi. Kama upatanisho ungalifanywa kwa njia hii, hangalikuwapo mtu ye yote aliye hai mwenye sababu ya haki ya kujiamini kuwa mmoja wa wateule, kabla ya kuipokea injili. Kwa hiyo hangalikuwa na ruhusa ya kuamini na kupokea baraka zake kwa imani. Kwa kweli upatanisho sharti uwe wa bure kabisa--kwa dhana hii--isipokuwa ufunuo wa pekee ufanywe kwa wale watu ambao umekusudiwa kwa ajili yao.

Lakini kama ilivyo hali, jambo lenyewe kwamba mtu ni wa jamii ya Adamu--jambo kwamba yeye ni mwanadamu, aliyezaliwa na mwanamke, latosha kabisa. Lamleta ndani ya mpaka. Yeye ni mmoja wa ulimwengu ambao Mungu alimtoa Mwanawe kwa ajili yao, ili kila mtu amwaminiye asipotee, bali awe na uzima wa milele.

Nia iliyokuwa ndani ya moyo wa Mungu kwa ajili ya kipawa hiki kikuu ilikuwa upendo, upendo kwa ulimwengu. Mungu aliupenda ulimwengu hivi hata akamtoa Mwanawe afe kwa ajili yake. Mungu aliupenda ulimwengu wote pia, lakini kipawa hiki cha Mwanawe kilichipuka katika upendo kwa ulimwengu wetu. Ni kweli katika tendo hili kuu alijitaabisha ili kuyalinda mambo ya ulimwengu wote. Alikuwa mwangalifu asifanye neno lo lote lililoweza hata kidogo kuudhoofisha utakatifu wa sheria yake. Kwa uangalifu mwingi alikusudia kujilinda na kutofahamika kuhusu kuithamini kwake sheria yake na mambo makuu ya kutii na furaha katika ulimwengu wake wa kiadili. Alikusudia mara moja kwa daima kuizuia hatari isije kiumbe cha kiadili cho chote kikajaribiwa kuidharau sheria ya kiadili.

Tena zaidi, si kwa upendo kwa roho za watu tu, bali kwa heshima ya roho ya sheria ya akili yake mwenyewe ya milele, ndipo alipomtoa Mwanawe afe. Katika hili ndimo kusudi la kumtoa Mwanawe lilipoanzia. Sheria ya akili yake mwenyewe sharti iheshimiwe na kushikwa kuwa takatifu. Hawezi kutenda neno lo lote lisilopatana na roho yake. Sharti afanye kila liwezekanalo ili kuizuia dhambi isitendwe na kuupata uthabiti na upendo wa watawaliwa wake. Aliyashika mambo haya makuu kuwa matakatifu hata angembatiza Mwanawe katika damu yake mwenyewe, kuliko kuuhatarisha wema wa ulimwengu. Pasipo shaka lo lote ni upendo na kuuthamini wema ulio mkuu kuliko yote wa ulimwengu ndio uliomwongoza kumtoa dhabihu Mwanawe mpendwa.

Sasa na tuutafakari kwa bidii asili ya upendo huu. Andiko latia mkazo wa pekee juu ya hili--Mungu aliupenda hivi--upendo wake ulikuwa wa asili ya namna hii, wa ajabu hivyo na wa pekee hivyo katika tabia yake, hata ukamwongoza kumtoa Mwanawe wa pekee afe. Ni dhahiri kwamba katika usemi huu kwamemaanishwa zaidi ya ukubwa wake tu. Ni wa pekee mno katika tabia yake. Tusipolifahamu hili, tutakuwa katika hatari ya kuanguka katika kosa la ajabu la Waumini-wote-huokoka, ambao daima hunena juu ya upendo wa Mungu kwa wenye dhambi, lakini fikira zao za asili ya upendo huu haziongozi kamwe kwenye toba wala kwenye utakatifu. Waonekana kuufikiri upendo huu kuwa ni wema wa tabia tu, na kumfikiri Mungu kuwa ni kiumbe mwenye tabia njema sana tu, ambaye hakuna aliye na haja ya kumwogopa.-- Fikira kama hizo hazina uvutano hata kidogo kuelekea utakatifu, bali ni kinyume chake kabisa. Ni tunapokuja kufahamu upendo huu ni nini katika asili yake ndipo twaihisi nguvu yake ya kiadili ikikuza utakatifu.

Laweza kuulizwa kwa haki, Ikiwa Mungu aliupenda ulimwengu hivi, kwa upendo unaotambulikana kwa ukubwa na kwa ukubwa peke yake,-- kwa nini hakuuokoa ulimwengu wote pasipo kumtoa dhabihu Mwanawe? Swali hili latosha kutuonyesha kwamba pana maana ya ndani katika neno hili hivi, tena lapasa litutie katika kulichunguza kwa uangalifu maana hii.

1. Upendo huu katika asili yake si kupendezwa--yaani furaha katika tabia ya jamii hii. Hili halingaliwezekana, kwa maana hapakuwa na kitu cha kupendeza katika tabia yao. Mungu kuipenda jamii kama hiyo kwa kupendezwa kungalikuwa aibu kwake mwenyewe isiyo na kikomo.

2. Haukuwa hisia au mtetemo wa moyo tu. Haukuwa msukumo wa upofu, ijapokuwa wengi waonekana kudhani ulikuwa hivyo. Yaonekana mara nyingi kudhaniwa kwamba Mungu alitenda kama watu watendavyo wanapochukuliwa na hisia kali. Lakini hapangekuwa na wema katika jambo hili. Mtu aweza kutoa vyote alivyo navyo chini ya msukumo wa upofu kama huo wa hisia, wala asiwe mwema zaidi kwa jambo hilo. Lakini kwa kusema hivi hatuutengi kabisa mtetemo wote katika upendo wa hisani, wala katika upendo wa Mungu kwa ulimwengu uliopotea. Alikuwa na hisia, lakini si hisia tu. Naam Biblia hutufundisha kila mahali kwamba upendo wa Mungu kwa mwanadamu, aliyepotea katika dhambi zake, ulikuwa wa kibaba--upendo wa baba kwa mtoto wake--katika habari hii, kwa mtoto mwasi, mkaidi, mpotevu. Katika upendo huu, sharti bila shaka uchanganyike na huruma iliyo ya ndani kuliko zote.

3. Kwa upande wa Kristo, akihesabiwa kuwa Mpatanishi, upendo huu ulikuwa wa kindugu. "Haoni haya kuwaita ndugu zake." Kwa mtazamo mmoja anatenda kwa ajili ya ndugu, na kwa mwingine, kwa ajili ya watoto. Baba alimtoa kwa kazi hii na bila shaka hushiriki katika upendo unaostahili mahusiano yake.

4. Upendo huu sharti uwe usiotafuta faida yake mwenyewe kabisa, kwa maana hakuwa na cha kutumaini wala cha kuogopa--wala faida ya kupata kwa watoto wake kama wangeokolewa. Naam haiwezekani kumfikiri Mungu kuwa ni mwenye choyo, kwa kuwa upendo wake wakumbatia viumbe vyote na mambo yote sawasawa na thamani yake halisi. Bila shaka alipendezwa kuwaokoa jamii yetu--kwa nini asipendezwe? Ni wokovu mkuu kwa kila namna, tena huuongeza sana furaha ya mbinguni;-- utaugusa sana utukufu na heri ya Mungu asiye na mwisho. Atajiheshimu mwenyewe milele kwa upendo usiotafuta faida kama huo. Ajua pia kwamba viumbe vyake vitakatifu vyote vitamheshimu milele kwa kazi hii na kwa upendo uliozaa kazi hiyo. Lakini na iseme pia, alijua kwamba hawangemheshimu kwa kazi hii kuu isipokuwa waone ya kuwa aliifanya kwa ajili ya wema wa wenye dhambi.

5. Upendo huu ulikuwa wa juhudi, si ile hali ya moyo baridi ambayo wengine hudhani--si wazo tu lisilo na uhai, bali upendo, wa ndani, wenye juhudi, wa dhati, ukiwaka katika nafsi yake kama moto ambao hakuna kiwezacho kuuzima.

6. Dhabihu ile ilikuwa ya kujikana nafsi kuliko zote. Je, haikumgharimu Baba kitu kumtoa Mwanawe mpendwa ateseke, na kufa kifo kama hicho? Kama hicho si kujikana nafsi, ni nini kiwezacho kuwa? Basi kumtoa Mwanawe kwa mateso mengi hivyo,--je, hiki si kujikana nafsi kulikotukuka kuliko kote? Ulimwengu usingaliweza kamwe kuwa na wazo la kujikana nafsi kukuu, kama si kwa mfano kama huo.

7. Upendo huu ulikuwa wa kila mmoja peke yake kwa sababu ulikuwa wa wote, tena wa wote kwa sababu ulikuwa wa kila mmoja peke yake. Mungu alimpenda kila mwenye dhambi peke yake, na kwa hiyo aliwapenda wote. Kwa sababu aliwapenda wote pasipo upendeleo, bila kupendelea nyuso za watu, kwa hiyo alimpenda kila mmoja peke yake.

8. Huu ulikuwa upendo wenye saburi kuliko yote. Ni nadra kiasi gani kumpata mzazi ampendaye mtoto wake hata asikose saburi kamwe. Niniache nizunguke na kuuliza, ni wangapi kati yenu, enyi wazazi, mwezao kusema kwamba mnawapenda watoto wenu wote vema hivyo, na kwa upendo mwingi hivyo, na kwa upendo unaotawala kwa hekima hivyo, hata hamkupata kukosa saburi kamwe kwa ye yote wao;--hata mwaweza kuwakumbatia mikononi mwenu chini ya machokozi makuu kuliko yote, na kuwapenda hata washuke, kuwapenda hata watoke katika dhambi zao, kuwapenda hata waingie katika toba na katika roho ya kitoto? Ni yupi kati ya watoto wenu mwezao kusema, Ashukuriwe Mungu, sikupata kumkasirikia mtoto huyo kamwe; Ni yupi ambaye, kama mngekutana naye mbinguni, mngeweza kusema--Sikupata kumfanya mtoto huyo akasirike kamwe? Mara nyingi nimewasikia wazazi wakisema, Nawapenda watoto wangu, lakini ee jinsi saburi yangu inipungukiavyo! Na baada ya wapendwa hao kufa mwaweza kuisikia miguno yao ya uchungu, --Ee nafsi yangu, nilipataje kumsababishia mtoto wangu kujikwaa kwingi hivyo na dhambi nyingi hivyo!

Lakini Mungu hakasiriki kamwe--hakosi saburi kamwe. Upendo wake ni wa ndani hivyo na mkuu hivyo hata daima ana saburi.

Wakati mwingine wazazi wanapokuwa na watoto wenye bahati mbaya, walio hoja za huruma, waweza kuvumilia lo lote kutoka kwao; lakini watoto hao wanapokuwa waovu sana, waonekana kuhisi kwamba wana udhuru kabisa wa kukosa saburi. Katika habari ya Mungu, hawa si watoto wenye bahati mbaya, bali ni waovu mno, waovu kwa akili. Lakini ee, saburi yake ya ajabu--iliyoelekezwa hivyo kwenye wema wao, ikitamani hivyo hali yao njema kuliko zote, hata kwa vyo vyote wamtukanavyo, Yeye hujiweka tayari kuwabariki bado, na kuwalilia hata washuke, na kuwatolea damu hata washuke, na kuwafia hata washuke kwa kifo cha Mwanawe mahali pao!

9. Huu ni upendo wenye wivu, si kwa maana mbaya, bali kwa maana njema--kwa maana ya kuwa mwangalifu mno lisije likatokea neno lo lote la kuwadhuru wale awapendao. Kama vile mume na mke wapendanao kweli kweli walivyo na wivu, kwa wivu usiolala kamwe, juu ya hali njema ya kila mmoja, wakitafuta daima kufanya yote wawezayo ili kuyaendeleza mambo ya kweli ya kila mmoja.

Toleo hili limekwisha kufanywa--limefanywa kwa nia njema--halikuahidiwa tu, bali limefanywa kweli kweli. Ile ahadi, iliyotolewa tangu zamani, imetimizwa. Mwana amekuja--amekufa, amefanya ukombozi na yu hai ili kuutoa--wokovu uliokwisha tayarishwa, kwa wote watakaoukumbatia.

Mwana wa Mungu hakufa ili kutuliza kisasi, kama wengine waonekanavyo kuelewa, bali chini ya matakwa ya sheria. Sheria ilikuwa imevunjiwa heshima kwa uvunjaji wake. Kwa hiyo Kristo alijitwika kuiheshimu kwa kuyatolea matakwa yake uhai wake wa mateso na kifo chake cha upatanisho. Halikuwa ili kutuliza roho ya kulipa kisasi ndani ya Mungu, bali ili kuulinda wema ulio mkuu kuliko yote wa ulimwengu katika mpango wa rehema.

Kwa kuwa upatanisho huu umekwisha fanywa, watu wote katika jamii wana haki juu yake. U wazi kwa kila mmoja atakayeukumbatia. Ijapokuwa Yesu angali ni Mwana wa Baba, lakini kwa haki ya neema yeye ni wa jamii kwa maana iliyo ya maana--ni wa kila mmoja, hata kila mwenye dhambi ana sehemu katika damu yake ikiwa atakuja mbele kwa unyenyekevu na kuidai. Mungu alimtuma Mwanawe awe Mwokozi wa ulimwengu--wa ye yote atakayeamini na kuukubali wokovu huu mkuu.

Mungu hutoa Roho wake ili kuutumia wokovu huu kwa watu. Huja mlangoni pa kila mtu na kubisha, ili apate kuingizwa kama awezavyo, na kumwonyesha kila mwenye dhambi kwamba sasa aweza kuupata wokovu. Ee, ni kazi ya upendo iliyoje hii!

Wokovu huu sharti upokelewe, kama utapokelewa kabisa, kwa imani. Hii ndiyo njia pekee iwezekanayo. Serikali ya Mungu juu ya wenye dhambi ni ya kiadili, si ya kimwili, kwa sababu mwenye dhambi mwenyewe ni kiumbe cha kiadili wala si cha kimwili. Kwa hiyo Mungu hawezi kutuvuta kwa njia yo yote isipokuwa tutamkabidhi uthabiti wetu. Hawezi kamwe kutuokoa kwa kutuchukua tu mpaka mahali fulani paitwapo mbinguni--kana kwamba kubadili mahali kungeubadili moyo wa hiari. Kwa hiyo, haiwezekani kuwa na njia yo yote ya kuokolewa isipokuwa kwa imani tu.

Sasa msikose, mkidhani kwamba kuikumbatia injili ni kuyaamini tu mambo haya ya kihistoria, pasipo kumpokea Kristo kweli kweli kuwa Mwokozi wenu. Kama huu ndio ungekuwa mpango, basi Kristo angalihitaji tu kushuka na kufa; kisha kurudi mbinguni, na kungoja kimya ili aone ni nani atakayeyaamini mambo hayo. Lakini tazama jinsi hali halisi ilivyo tofauti! Sasa Kristo hushuka ili kuijaza nafsi kwa uhai wake mwenyewe na upendo. Wenye dhambi wanaotubu husikia na kuiamini kweli ya habari za Yesu, kisha humpokea Kristo ndani ya nafsi ili aishi na kumiliki humo kwa ukuu na milele. Katika jambo hili wengi hukosea, wakisema, Kama nikiyaamini mambo hayo kama habari za historia, yatosha. La! La! Hii sivyo hata kidogo. "Kwa maana kwa moyo mtu huamini hata kupata haki." Upatanisho kwa kweli ulifanywa ili kuitengeneza njia hata Yesu apate kushuka mpaka mioyoni mwa wanadamu na kuivuta katika umoja na huruma pamoja naye--hata Mungu apate kuiteremsha mikono ya upendo wake na kuwakumbatia wenye dhambi--hata sheria na serikali visivunjiwe heshima kwa ishara kama hizo za urafiki zinazoonyeshwa na Mungu kwa wenye dhambi. Lakini upatanisho hautawaokoa wenye dhambi hata kidogo isipokuwa kadiri unavyowatengenezea njia ya kuja katika huruma na ushirika wa moyo pamoja na Mungu.

Sasa Yesu huja mlangoni pa kila mwenye dhambi na kubisha;--sikilizeni--ni nini hicho? ni nini hicho? Kwa nini kubisha huku? Kwa nini hakuenda zake na kukaa mbinguni kama huo ndio ungekuwa utaratibu, hata watu wayaamini tu mambo ya kihistoria na kubatizwa, kama wengine wadhanivyo, ili wapate wokovu. Lakini sasa, tazameni jinsi ashukavyo--humwambia mwenye dhambi yale aliyoyafanya--hudhihirisha upendo wake wote--humwambia jinsi ulivyo mtakatifu na mtukufu, mtakatifu hivyo hata haiwezekani kabisa atende pasipo kuutazama utakatifu wa sheria yake, na usafi wa serikali yake. Basi akiingiza moyoni fikira zilizo za ndani na kubwa kuliko zote za utakatifu wake na usafi wake, husisitiza haja ya toba iliyo ya ndani, na wajibu mtakatifu wa kuziacha dhambi zote.

MAONI.

1. Biblia hufundisha kwamba wenye dhambi waweza kuipoteza haki yao ya uzawa na kujiweka nje ya kufikiwa na rehema. Si zamani sana tangu nilipowaambia neno fulani juu ya ulazima ulio dhahiri kwamba Mungu ajilinde na matumizi mabaya ya upendo wake. Hali zenyewe ni za namna iletayo hatari kuu kuliko zote ya matumizi mabaya kama hayo, na kwa hiyo sharti awajulishe wenye dhambi kwamba haiwapasi kuutumia vibaya upendo wake, wala hawawezi kufanya hivyo pasipo kuadhibiwa.

2. Chini ya injili, wenye dhambi wamo katika hali ya wajibu mkuu kuliko wote uwezekanao. Wamo katika hatari kubwa kuliko zote ya kumkanyaga chini ya nyayo zao Mwana wa Mungu mwenyewe. Njoni, wasema, na tumwue ili urithi uwe wetu. Mungu atumapo, mwisho wa yote, Mwanawe mpendwa mwenyewe, wao hufanya nini? Huongeza juu ya dhambi zao nyingine zote na maasi yao tukano lililo kuu kuliko yote kwa Mwana huyu mtukufu! Tuseme jambo linalofanana na hili lingefanyika chini ya serikali ya kibinadamu. Habari ya uasi yatokea katika baadhi ya majimbo. Mfalme humtuma mwanawe mwenyewe, si pamoja na jeshi, ili awakatilie mbali upesi katika uasi wao, bali kwa upole wote, kwa unyenyekevu, kwa saburi, huenda katikati yao, akizieleza sheria za ufalme, na kuwahimiza watii. Wao hufanya nini katika habari hiyo? Kwa nia moja hujiunga pamoja ili wamkamate na kumwua!

Lakini ninyi mwakana kuhusika kwa jambo hili, na kuniuliza, Ni nani aliyemwua Mwana wa Mungu? Je, hawakuwa Wayahudi? Naam, na je, ninyi, enyi wenye dhambi, hamkuwa na sehemu katika mauaji haya? Je, jinsi mlivyomtenda Yesu Kristo haikuonyesha kwamba mnashiriki kwa ukamilifu na Wayahudi wa kale katika kumwua kwao Mwana wa Mungu? Kama mngalikuwapo, je, kungekuwa na mtu ye yote ambaye angepiga kelele zaidi yenu, Mwondoshe--msulibishe, msulibishe? Je, hamkusema daima--Ondoka kwetu--kwa maana hatutaki kuzijua njia zako?

3. Ilinenwa juu ya Kristo kwamba, Ijapokuwa alikuwa tajiri, alikuwa maskini ili sisi tupate kuwa matajiri kwa umaskini wake. Jinsi hii ni kweli iliyo dhahiri kama nini! Ukombozi wetu ulimgharimu Kristo uhai wake; ulimkuta akiwa tajiri lakini ulimfanya maskini; ulitukuta tukiwa maskini pasipo kikomo lakini ulitufanya matajiri hata kwa utajiri wote wa mbinguni. Lakini katika utajiri huu hakuna awezaye kushiriki hata kila mmoja atakapoukubali kwa nafsi yake katika njia ya halali. Sharti upokelewe kwa masharti yaliyowekwa, au toleo hupita kabisa, nanyi mwaachwa maskini zaidi hata kuliko kama hazina kama hizo zisingaliwekwa kamwe miguuni penu.

Watu wengi waonekana kulifahamu vibaya kabisa jambo hili. Waonekana kutoyaamini ayasemayo Mungu, bali huendelea kusema, Kama, kama, kama tu ungekuwapo wokovu kwa ajili yangu--kama tu ungekuwapo upatanisho uliotolewa kwa msamaha wa dhambi zangu. Hili lilikuwa mojawapo ya mambo ya mwisho yaliyowekwa wazi akilini mwangu kabla sijaikabidhi kabisa nafsi yangu kumtumaini Mungu. Nilikuwa nikijifunza upatanisho; niliona mielekeo yake ya kifalsafa--niliona uliyoyataka kwa mwenye dhambi; lakini ulinikera nami nikasema--Kama ningekuwa Mkristo, ningejuaje Mungu angenitenda nini? Chini ya kero hii nilisema mambo ya kipumbavu na machungu juu ya Kristo--hata nafsi yangu mwenyewe ilishtuka kwa uovu wake mwenyewe nami nikasema--Nitalipatanisha jambo hili lote na Kristo kama jambo hilo lawezekana.

Kwa njia hii wengi husogea juu ya vitia-moyo vya injili kana kwamba ni jambo la kubahatisha tu, jaribio tu. Hupiga kila hatua ya mbele kwa uangalifu mwingi, kwa hofu na kutetemeka, kana kwamba pana shaka kubwa kuliko zote kama kungekuwa na rehema yo yote kwa ajili yao. Ndivyo ilivyokuwa kwangu mimi. Nilikuwa njiani kuelekea afisi yangu, swali lilipokuja mbele ya akili yangu--Wangoja nini? Huna haja ya kufanya zogo kubwa hivyo. Yote yamekwisha kufanyika. Wapaswa tu kuukubali usemi huu--utoe moyo wako kwake mara moja--hii ndiyo yote. Ni hivyo hivyo tu. Wakristo na wenye dhambi wote wapaswa kufahamu kwamba mpango wote umekamilika--kwamba Kristo wote--tabia yake, kazi yake, kifo chake cha upatanisho, na maombezi yake yaishiyo daima, ni mali ya kila mtu na wa kila mmoja, wala vyahitaji tu kukubaliwa. Kuna bahari tele ya jambo hili. Iko pale. Yakupasa uitwae vivyo hivyo kama usivyoitwaa. Ni kama vile ungesimama ukingoni mwa bahari ya maji laini, safi, ukikaribia kufa kwa kiu; wakaribishwa kunywa, wala huna haja ya kuogopa usije ukaimaliza bahari hiyo, au kumfisha mtu mwingine kwa njaa kwa kunywa wewe mwenyewe. Huna haja ya kuhisi kwamba hukupewa uhuru wa kuifikia bahari hiyo ya maji; wakaribishwa na kusihiwa kunywa--naam kunywa tele! Bahari hii yakidhi haja yako yote. Huna haja ya kuwa na sifa za Yesu Kristo ndani yako mwenyewe, kwa maana sifa zake huwa mali yako kihalisi kwa kila matumizi yawezekanayo. Kama Andiko lisemavyo--Yeye alifanywa kwetu hekima itokayo kwa Mungu, na haki, na utakaso, na ukombozi. Wahitaji nini? Hekima? Iko hapa. Haki? Iko hapa. Utakaso? Unao hapa. Yote yamo ndani ya Kristo. Je, waweza kufikiri jambo lo lote hata moja lihitajiwalo kwa usafi wako wa kiadili, au manufaa yako ambalo halimo hapa ndani ya Kristo? Hakuna. Yote yametolewa hapa. Kwa hiyo huna haja ya kusema, Nitakwenda na kuomba na kujaribu, kama uimbo usemavyo--

"Nitamwendea Yesu ijapokuwa dhambi yangu

Imeinuka kama mlima,

Labda atalikubali ombi langu;

Labda atalisikia sala yangu."

Hakuna haja ya labda yo yote. Milango i wazi sikuzote. Kama ile milango ya Hema la Broadway katika New York, iliyotengenezwa ifunguke na kujifunga ikiwa wazi, hata isiweze kurudi nyuma na kufungika juu ya makutano ya watu waliosongana kupita ndani yake. Ilipokuwa itengenezwe, nilikwenda mimi mwenyewe kwa mafundi na kuwaambia kwa vyo vyote waitengeneze ili sharti ifunguke na kujifunga katika hali hiyo.

Vivyo hivyo mlango wa wokovu u wazi sikuzote--umefungwa ukiwa wazi, wala hakuna mtu awezaye kuufunga--wala Papa, hata, wala Ibilisi, wala malaika ye yote atokaye mbinguni au atokaye kuzimu. Pale unasimama, umefunguliwa kabisa na njia iko wazi mwanya kwa kila mwenye dhambi wa jamii yetu kuingia kama atakavyo.

Tena, dhambi ndicho kitu kilicho ghali kuliko vyote katika ulimwengu. Je, wajua vema, Ee mwenye dhambi, ni bei iliyoje iliyolipwa kwa ajili yako ili upate kukombolewa na kufanywa mrithi wa Mungu na wa mbinguni? Ee ni shughuli ya gharama iliyoje kwako wewe kujifurahisha katika dhambi!

Na ni kodi kubwa iliyoje ambayo serikali ya Mungu imelipa ili kulikomboa jimbo hili kutoka katika uharibifu wake! Nena juu ya kodi ya maskini ya Uingereza na ya mataifa mengine yote pamoja;--yote si kitu ikilinganishwa na kodi-ya-dhambi ya serikali ya Yehova--kodi-ya-dhambi hiyo ya kutisha! Fikiri ni mitambo mingapi inayowekwa katika mwendo ili kuwaokoa wenye dhambi! Mwana wa Mungu alishushwa--malaika hutumwa kuwa roho zitumikazo kwa ajili ya warithi wa wokovu; wamisionari hutumwa, Wakristo hujitaabisha, na kuomba, na kulia kwa jitihada ya ndani na yenye wasiwasi--yote ili kuwatafuta na kuwaokoa waliopotea. Ni kodi ya ajabu--kubwa iliyoje itozwayo juu ya hisani ya ulimwengu ili kuiondoa dhambi na kumwokoa mwenye dhambi! Kama gharama ingeweza kuhesabiwa kwa dhahabu tupu, ni ulimwengu ulioje wa dhahabu--dunia nzima ya dhahabu yenyewe! Ni fungu la kazi na gharama lililoje, kutoka kwa malaika, Yesu Kristo, Roho wa Mungu, na wanadamu walio hai. Aibu iwe juu ya wenye dhambi wanaoshikilia dhambi ijapokuwa juhudi hizi zote za hisani za kuwaokoa! ambao badala ya kuaibika hata kuacha dhambi, watasema--Mungu na aihiare kodi hii: nani ajaliye! Wamisionari na wajitaabishe, wanawake watauwa na wachakaze vidole vyao vyenyewe ili kukusanya fedha za kuiweka mitambo hii yote ya kibinadamu katika mwendo; haidhuru: haya yote ni nini kwangu mimi? Nimependa anasa zangu nami nitazifuata! Ni moyo usio na hisia ulioje huu!

Wenye dhambi waweza kabisa kutoa dhabihu ili kuwaokoa wenye dhambi wenzao. Paulo aliweza kwa ajili ya wenye dhambi wenzake. Alihisi kwamba alikuwa amefanya fungu lake katika kuwafanya watu kuwa wenye dhambi, na sasa ilimpasa afanye fungu lake pia katika kuwarudisha kwa Mungu. Lakini tazama pale--kijana yule adhani kwamba hawezi kumudu kuwa mhudumu, kwa maana aogopa kwamba hatategemezwa vema. Je, hana deni fulani kwa neema iliyoiokoa nafsi yake kutoka kuzimu? Je, hana dhabihu fulani za kutoa, kwa kuwa Yesu amemfanyia nyingi mno, na Wakristo pia, katika Kristo kabla yake--je, hawakuomba na kuteseka na kujitaabisha kwa ajili ya wokovu wa nafsi yake? Kwa habari ya hatari yake ya kukosa mkate katika kazi ya Bwana, na amtumaini Bwana wake Mkuu. Lakini na niseme pia kwamba makanisa yaweza kuwa na kosa kubwa kwa kutowategemeza vizuri wachungaji wao. Na wajue Mungu hakika atawafisha njaa kama watawafisha njaa wahudumu wao. Nafsi zao wenyewe na nafsi za watoto wao zitakuwa tasa kama mauti kama kwa uchoyo watawafisha njaa wale ambao Mungu katika riziki yake huwatuma kuwalisha mkate wa uzima.

Ni gharama iliyoje kuuondolea jamii namna fulani za dhambi, kama, kwa mfano, utumwa. Ni kingi kiasi gani kilichokwisha tumika, na ni kingi zaidi kiasi gani kinachosalia kutumika kabla uovu huu wa uchungu na laana na dhambi haujang'olewa katika nchi yetu! Hii ni sehemu ya kazi kuu ya Mungu, naye ataisonga mbele hata ikamilike. Lakini kwa gharama ya ajabu iliyoje! Ni maisha mangapi na uchungu kiasi gani ili kuiondoa dhambi hii moja!

Ole wao wafanyao faida kutokana na dhambi za watu! Fikiri tu juu ya mwuza-pombe--akiwajaribu watu wakati Mungu anapojaribu kuwazuia wasikimbilie mbele katika njia za dhambi na mauti! Fikiri hatia ya wale wanaojiweka hivyo katika safu kupingana na Mungu! Basi Kristo ana budi kushindana na wauza-pombe wanaofanya yote wawezayo ili kuizuia kazi yake.

Somo letu huonyesha kwa dhahiri asili ya dhambi kuwa ni ubinafsi mtupu. Haijali dhambi imgharimu Yesu Kristo kiasi gani--imgharimu kanisa kiasi gani, itoze kiasi gani hisia za hisani na kazi za kujitoa dhabihu za wote walio wema duniani au mbinguni;--haidhuru; mwenye dhambi hupenda kujifurahisha nafsi naye atakuwa nako maadamu awezavyo. Ni wangapi kati yenu mliowagharimu rafiki zenu machozi yasiyohesabika na taabu ili kuwarudisha kutoka katika njia zenu za dhambi? Je, hamwaibiki wakati mengi hivyo yamefanywa kwa ajili yenu, hata hamwezi kushawishiwa kuziacha dhambi zenu na kumgeukia Mungu na utakatifu?

Juhudi yote kwa upande wa Mungu kwa ajili ya mwanadamu ni ya mateso na kujikana nafsi. Ikianzia kwa dhabihu ya Mwanawe mpendwa mwenyewe, huendelezwa kwa dhabihu zinazofanywa upya daima na kazi za taabu--kwa gharama kubwa na ya ajabu. Fikiri tu ni muda mrefu kiasi gani juhudi hizi zimekwisha endelezwa--ni machozi mangapi yaliyomwagwa kama maji, imegharimu--ni maumivu kiasi gani katika namna nyingi ambayo kazi hii imesababisha na kugharimu--naam, dhambi hiyohiyo uisokotayo kama tonge tamu chini ya ulimi wako! Mungu aweza kabisa kuichukia aonapo ni gharama iliyoje, na kusema--Ee, msifanye neno hilo la machukizo nilichukialo!

Lakini Mungu si mwenye huzuni katika kujikana nafsi huku. Furaha yake katika matokeo ni kubwa hivyo, hata huyahesabu mateso yote kuwa kama jambo dogo tu kwa kulinganisha, kama vile wazazi wa duniani wafurahiavyo juhudi wafanyazo za kuwabariki watoto wao. Watazame; watakaribia kuchakaza mikono yao yenyewe;--akina mama hukesha usiku wakishona sindano zao hata wanapozunguzungu kwa uchovu na upofu--lakini kama ungeiona taabu yao, mara nyingi ungeiona pia furaha yao, kwa jinsi wawapendavyo watoto wao kwa nguvu.

Ndivyo ilivyo kazi, furaha na kujikana nafsi kwa Baba, Mwana na Roho Mtakatifu, katika kazi yao kuu kwa ajili ya wokovu wa mwanadamu. Mara nyingi huhuzunika kwamba wengi hivyo watakataa kuokolewa. Wakiendelea kujitaabisha katika huruma iliyo ya wote, hakuna jambo, ndani ya mipaka ifaayo, ambalo hawatalitenda au kuliteseka ili kuikamilisha kazi yao kuu. Ni ajabu kufikiri jinsi uumbaji wote nao ushirikivyo huruma katika kazi hii na mateso yake ya lazima. Rudi kwenye tukio la mateso ya Kristo. Je, jua liliomo mbinguni lingeweza kutazama chini pasipo kusukumwa juu ya tukio kama hilo? Ee la, halikuweza hata kuliona--bali lilifunika uso wake lisilione! Maumbile yote yalionekana kuvaa mavazi yao ya matanga ya ndani kuliko yote. Tukio lile lilikuwa zito mno hata kwa maumbile yasiyo na uhai kuvumilia. Jua liligeuza mgongo wake wala halikuweza kutazama chini juu ya jambo kama hilo!

Somo hili huonyesha kwa nguvu thamani ya nafsi. Je, wadhani Mungu angalifanya haya yote kama angalikuwa na fikira zile duni juu ya jambo hili ambazo wenye dhambi huwa nazo kwa kawaida?

Wafia-dini na watakatifu hufurahia mateso yao--wakikamilisha ndani yao yale yaliyopungua ya mateso ya Kristo; si katika upatanisho wenyewe bali katika sehemu ndogo za kazi ipasayo kufanywa. Ni asili ya dini ya kweli kupenda kujikana nafsi.

Matokeo yatathibitisha kwa ukamilifu gharama yote. Mungu alikuwa amehesabu vema gharama kabla hajaanza. Muda mrefu kabla hajaumba ulimwengu wa kiadili alijua kikamilifu ni gharama gani ingempasa kuwakomboa wenye dhambi, tena alijua kwamba matokeo yangeithibitisha kwa wingi gharama yote. Alijua kwamba ajabu ya rehema ingetendeka--kwamba mateso yaliyotakiwa kwa Kristo, ijapokuwa yalikuwa makuu, yangevumiliwa; na kwamba matokeo matukufu pasipo kikomo yangepatikana kutokana nayo. Alitazama chini ya mkondo wa wakati mpaka enzi za mbali--ambako, zama zilipozunguka, kungeweza kuonwa furaha za watakatifu waliokombolewa, ambao huimba nyimbo zao na kupiga vinubi vyao upya kwa wimbo wa milele, katika umilele mrefu mrefu, MREFU wa heri yao;--je, hii haikutosha kwa moyo wa upendo usio na mwisho kufurahia? Nawe wailifikiriaje jambo hilo, Ee Mkristo? Je, utasema sasa, Naona haya kuomba nisamehewe? Nawezaje kuvumilia kupokea rehema kama hiyo! Ni bei ya damu, nami nawezaje kuikubali? Nawezaje kumtia Yesu gharama kubwa hivyo?

Wanena kweli usemapo kwamba umemgharimu gharama kubwa--lakini gharama imelipwa kwa furaha--maumivu yote yamekwisha vumiliwa, wala hayatahitaji kuvumiliwa tena, wala haitagharimu zaidi kama ukikubali kuliko kama ukikataa; na tena zaidi, na lifikiriwe kwamba Yesu Kristo hakutenda pasipo hekima; hakulipa kingi mno kwa ukombozi wa nafsi--wala si uchungu mmoja zaidi ya vile mambo ya serikali ya Mungu yalivyotaka na thamani ya nafsi ingavyothibitisha.

Ee, utakapokuja kumwona uso kwa uso, na kumwambia unavyolifikiri jambo hilo--utakapokuwa umezidi umri kwa maelfu kadhaa ya miaka kuliko ulivyo sasa, je, hutaiabudu hekima ile inayoendesha mpango huu, na upendo usio na mwisho ambao ndani yake ulizaliwa? Ee ni nini utakalolisema wakati huo juu ya kujishusha kule kwa ajabu kulikomshusha Yesu ili kukuokoa! Sema, Ee Mkristo, je, hukupata mara nyingi kuimwaga nafsi yako mbele ya Mwokozi wako ukikiri yale uliyomgharimu, na kukaonekana kama kuinuliwa fulani kana kwamba chini kabisa ya nafsi yako kungeinuka, nawe ungeumwaga moyo wako wote. Kama mtu ye yote angalikuona wangalishangaa ni nini kilichokupata kilichoiyeyusha hivyo nafsi yako katika shukrani na upendo.

Sema sasa, enyi wenye dhambi, je, mtaiuza haki yenu ya uzawa? Mtapokea kiasi gani kwa ajili yake? Mtapokea kiasi gani kwa ajili ya sehemu yenu katika Kristo? Kwa kiasi gani mtaiuza nafsi yenu? Muuzeni Kristo wenu! Zamani walimwuza kwa vipande thelathini vya fedha; na tangu wakati huo mbingu zimekuwa zikinyesha machozi ya damu juu ya ulimwengu wetu wenye hatia. Kama ungeulizwa na Ibilisi kuweka kiasi ambacho kwacho ungeiuza nafsi yako, ingekuwa bei gani itakayotajwa? Lorenzo Dow wakati mmoja alikutana na mtu alipokuwa akipanda njia ya faragha kwenda kutimiza miadi, na kumwambia--Rafiki, je, umepata kusali? La. Utapokea kiasi gani usisali kamwe baada ya haya? Dola moja. Dow akailipa, akaendelea kupanda. Yule mtu akaitia fedha mfukoni mwake, akaendelea mbele, akifikiri. Kadiri alivyozidi kufikiri, ndivyo alivyozidi kujisikia vibaya. Pale akasema, Nimeiuza nafsi yangu kwa dola moja! Sharti niwe nimekutana na Ibilisi! Hakuna mtu mwingine ambaye angenijaribu hivyo. Kwa nafsi yangu yote ni lazima nitubu au nihukumiwe milele!

Ni mara ngapi mmepatana kumwuza Mwokozi wenu kwa bei iliyo chini ya vipande thelathini vya fedha! La, kwa kitu kidogo kabisa!

Mwishowe, Mungu ahitaji watu wa kujitolea ili kuisaidia kazi hii kuu. Mungu amejitoa mwenyewe, na amemtoa Mwanawe, na amemtuma Roho wake;--lakini watenda-kazi zaidi wangali wahitajiwa; nawe utatoa nini? Paulo alisema, Nachukua mwilini mwangu chapa zake Bwana Yesu. Je, wautamani heshima kama huo? Utafanya nini--utateseka nini? Usiseme, Sina cho chote cha kutoa. Waweza kujitoa mwenyewe--macho yako, masikio yako, mikono yako, akili yako, moyo wako, vyote; na hakika hakuna kitu ulicho nacho kilicho kitakatifu mno na kizuri mno kisichoweza kutolewa kwa kazi kama hiyo kwa wito kama huo! Ni vijana wanaume wangapi walio tayari kwenda? na ni vijana wanawake wangapi? Ni moyo wa nani unaorukaruka ukilia-- Mimi hapa, nitume mimi?