Kristo Yote katika Yote

Soma Wakolosai 3:11.

Kristo ni yote katika yote kwa kila mtu ambaye amemwona yeye kwa kweli. Yeye ni Mwokozi wetu, na Mkombozi wetu, na Mwokoaji wetu, na Mchungaji wetu, na Mwalimu wetu; tena hutimiza kwetu huduma nyingine nyingi zaidi, ambazo nataka kuvuta fikira zenu kwazo.

1. Tukienda katika Luka 2:10, 11, twaona Kristo akitangazwa huko kuwa

MWOKOZI WETU:

“Tazama, mimi nawaletea habari njema ya furaha kuu itakayokuwa kwa watu wote. Kwa kuwa leo katika mji wa Daudi amezaliwa kwa ajili yenu Mwokozi, ndiye Kristo Bwana.” Sisi twajifunza kumjua Kristo kuwa Mwokozi wetu, na kukutana naye juu ya mlima Kalvari, na kumtazama yeye kuwa Mwana-Kondoo wa Mungu anayevuja damu, kabla ya kumjua kuwa Mkombozi wetu, na Mwokoaji wetu, na Mchungaji wetu. Basi, nikiutazama mkutano huu mkubwa, mimi nisiyeijua mioyo ya watu, siwezi kujua kama ninyi mwaweza kusema Kristo ni Mwokozi wenu. Wako wengi, nategemea, wawezao kusema hivi, nao hushangilia katika wokovu wake; ingawa, bila kuwa mkali kupita kiasi, mimi naogopa kwamba wako wengi wasiojua kitu chochote katika nafsi zao wenyewe juu ya Yesu kuwa Mwokozi wao.

Yeye anatolewa kwa kila mmoja wenu leo kuwa Mwokozi; “Mungu alimtoa yeye kwa ukarimu kwa ajili yetu sisi sote,” ili sisi sote kwa yeye tupate kuokolewa. Kama wewe ni wa ulimwengu huu, mimi naweza kuthibitisha kwamba unaye Mwokozi. Kama ungekuwa wa sayari nyingine, kama mwezi au nyota yoyote, basi nisingeweza kusema kwamba Mwokozi ametolewa kwako; kwa maana haikufunuliwa kama watu wa dunia hizo za mbali, hata ikiwa zimekaliwa na watu, wanahitaji wokovu au hawauhitaji. Lakini hili najua, kwamba kila mtu juu ya tufe hili anatolewa Mwokozi.

WOKOVU NI BURE KWA WOTE.

Mimi sikubaliani hata kidogo na watu wale wanaotaka kuufunga wokovu wa Mungu uwe kwa watu wachache fulani. Naamini kwamba Kristo alikufa kwa ajili ya wote watakaokuja. Nimepokea barua nyingi zenye kunilaumu, zikisema kwamba hakika mimi siliamini fundisho la kuchaguliwa. Mimi naliamini kuchaguliwa; lakini sina shughuli ya kulihubiri fundisho hilo kwa ulimwengu wote. Ulimwengu hauna shughuli na kuchaguliwa; una shughuli na mwito peke yake, “Na ye yote anayetaka, atwae maji ya uzima bure.” Huo ndio ujumbe kwa mwenye dhambi. Mimi nimetumwa kuihubiri injili kwa watu wote.

Baada ya wewe kuupokea wokovu, ndipo twaweza kunena juu ya kuchaguliwa. Ni fundisho kwa Wakristo, kwa Kanisa, wala si kwa ulimwengu usioongoka. Ujumbe wetu ni “habari njema, itakayokuwa kwa watu wote; kwa kuwa leo amezaliwa kwa ajili yenu Mwokozi, ndiye Kristo Bwana.” Ninyi watu wote, Mwokozi huyu anatolewa kwenu. Mkubalini yeye, na Mungu atawakubali ninyi; mkatae yeye, na Mungu atawakataa ninyi. Hatima yenu ya milele inategemea kukataa kwenu au kukubali kwenu Mwokozi anayetolewa. Jambo hili ni la kutoa na kutwaa, hivyo tu. Mungu hutoa; mimi napokea. Basi, kwanza kabisa ni lazima tumjue Kristo kuwa Mwokozi wetu.

2. Lakini yeye ni zaidi ya hayo: yeye ni

MKOMBOZI WETU.

Tuseme mimi nimemwona mtu akianguka ndani ya mto, nami nikaruka majini na kumwokoa; hapo ningekuwa mwokozi kwake—ningekuwa nimemwokoa. Lakini nikimfikisha ukingoni, yamkini ningemwacha hapo, nisimfanyie neno lingine zaidi.

Lakini Bwana hufanya zaidi. Yeye hatuokoi tu, bali hutukomboa pia—yaani, hutununua na kututwaa tena. Yeye hutulipia fidia na kututoa katika nguvu za dhambi, kama ningeahidi kumlinda mtu huyo niliyemwokoa daima, na kuona ya kwamba haanguki tena ndani ya maji. Bwana hatuokoi tu na mauti ya kiroho, bali hutukomboa hata milele, hata mauti isiweze kutugusa kamwe.

UHURU KWA MATEKA.

Nilipokuwa Richmond, katika nchi ya Marekani, watu weusi walikuwa wanakusudia kufanya mkutano. Ilikuwa siku ya kwanza ya uhuru wao. Nilikwenda katika kanisa la Waafrika, na kamwe, kabla ya siku hiyo wala baada yake, sikupata kusikia mifuriko ya ufasaha wa asili kama ile. “Mama,” akasema mmoja, “shangilia leo. Mwanao mdogo ameuzwa kutoka kwako kwa mara ya mwisho; wazao wako ni huru hata milele. Utukufu kwa Mungu aliye juu mbinguni! Ninyi vijana, mmesikia mjeledi wa mnyapara kwa mara ya mwisho; ninyi ni huru leo! Ninyi wanawali, mmepandishwa juu ya jukwaa la mnada kwa mara ya mwisho!” Walinena waziwazi, walipiga kelele kwa furaha; maombi yao yalikuwa yamejibiwa, hiyo ilikuwa injili kwao. Kwa jinsi iyo hiyo Yesu Kristo huutangaza uhuru kwa mateka. Wengine wamekwisha kuukubali; wengine, kama wale watu weusi maskini, hawakaribii kuiamini habari hiyo njema; lakini si kwamba habari hiyo si ya kweli. Kristo amekuja atukomboe kutoka utumwa wa dhambi. Basi, ni nani atakayekubali ukombozi huo? Alikuwako mwanamke mmoja mweusi, mtumishi katika hoteli moja katika majimbo ya Kusini, ambaye hakuweza kusadiki kwamba yeye ni huru. “Je, mimi ni huru, au mimi si huru?” akamwuliza mgeni mmoja. Bwana wake alimwambia kwamba yeye si huru, ndugu zake weusi walimwambia kwamba yeye ni huru. Kwa muda wa miaka miwili alikuwa huru bila kujua. Yeye huwafananisha wengi walio katika Kanisa la Mungu leo. Wanaweza kuwa na uhuru, na hata hivyo hawajui.

3. Tena, Kristo ni

MWOKOAJI WETU.

Wana wa Israeli hawakuokolewa na kukombolewa tu kutoka utumwa wa Wamisri, bali walikuwa pia wameopolewa, hata wasiongozwe kurudi tena utumwani. Wengi wanaogopa; wanadhani kwamba hawana uwezo wa kushikilia hata mwisho, na kwa sababu hiyo hujiepusha na kuikiri imani. Lakini Kristo aweza kuwalinda ninyi msianguke; yeye aweza kuwaopoa katika saa ya giza ya taabu na jaribu, na katika hila zote za Shetani, na katika mtego wa mtega ndege.

Katika Isaya 49:24 twasoma: “Je! mateka wataondolewa kwa mtu mwenye nguvu, au wafungwa wa haki wataopolewa? Lakini Bwana asema hivi, Naam, mateka wa mtu mwenye nguvu wataondolewa, na mateka wa mtu mkali wataopolewa; kwa maana nitashindana naye yeye ashindanaye nawe, nami nitawaokoa watoto wako.” Mimi nitamwokoa; mimi nitamwopoa. Wana wa Israeli waliokolewa kutoka utumwa mkali wa Misri, waliongozwa kutoka nchi ya Gosheni; lakini hata hivyo hawakuwa wameopolewa kabisa. Jeshi kubwa la Wamisri lilikuwa likinguruma nyuma yao. Haikuwa hata walipopita salama katikati ya Bahari ya Shamu, ambayo ilipofunga nyuma yao ikalimeza jeshi la adui—haikuwa hata wakati huo ndipo walikuwa huru, ndipo walikuwa wameopolewa.

Na kwa jinsi iyo hiyo, katika nyakati zetu za hatari, tutaona kuwa ni kweli juu ya Kristo, “Aliiopoa nafsi yangu”; na tena katika Ayubu 33:24, “Ndipo yeye humfadhili, na kusema, Mwopoe asishukie shimoni; mimi nimeona fidia. Nyama yake ya mwili itakuwa laini kuliko ya mtoto; atarudia siku za ujana wake! Atamwomba Mungu, naye atamridhia; naye atauona uso wake kwa furaha; kwa kuwa yeye humlipa mwanadamu haki yake. Yeye ataiopoa nafsi yake isiingie shimoni, na uzima wake utaona nuru.”

Hapa tunayo kuokoa, na kukomboa, na kuopolewa kutoka shimoni. Mwanadamu ameanguka ndani ya shimo lenye kina, anazuiliwa huko kama mateka wa haki na yeye aliye mwenye nguvu. Kama atarudishwa kutoka giza la shimo aione nuru, basi lazima tuwe na fidia. Hapa Mungu hujitokeza, na kusema, “Mimi nimeona fidia.” Kristo ni fidia hiyo, naye atatuopoa. Ipigeni kelele hii, “Kristo ni Mwokoaji wetu.” Yeye ni hodari wa kuokoa, yeye aweza kuopoa.

KIONGOZI.

4. Lakini sasa twahitaji kitu kingine zaidi. Watazame tena wana wa Israeli; walipokwisha kupita kwa utukufu katikati ya Bahari ya Shamu, walikuwa wameokolewa, na kukombolewa, na kuopolewa; lakini je, hilo lilikuwa lote walilolihitaji? La; walikuwa wameletwa jangwani. Sasa wanahitaji nini? Lazima wapate njia ya kwenda katika jangwa lisilo na njia. Walihitaji kiongozi. Basi Kristo ni njia na kiongozi. Je, tumo katika shida, au katika shaka, au katika wasiwasi? Kristo ni njia yetu. “Mimi ndimi njia, na kweli, na uzima” (Yohana 14:6).

Nimewasikia watu wengine wakisema, “Naam, kama nikiongoka na kuwa mtu wa dini, mimi sijui ni kanisa gani ningekwenda. Kuna makanisa na madhehebu mengi mno tofauti. Kwa kweli sijui ni lipi lililo sahihi.” Kwa hiyo watu wengine wamefadhaika, wasijue njia ya kweli ni ipi. Basi, kwa watu wa namna hiyo mimi ningesema, Mtazameni yeye peke yake asemaye,

“MIMI NDIMI NJIA.”

Yeye ni njia ya kweli peke yake, na kama unataka kuufikia ufalme huna neno lingine ila kumfuata yeye. Twaweza kuwa katika giza, lakini yeye aweza kutuongoza katika njia iliyo sawa. Yeye ni Mchungaji wa kundi lake. Yeye atatutangulia na kutuongoza. Yeye anatuita tuondoke na kumfuata, naye atatuongoza kwa njia tusiyoijua; atatuongoza mpaka malisho ya majani mabichi kama tukimtazama yeye peke yake.

NGUZO YA WINGU.

Neno lote ambalo wana wa Israeli walikuwa na haja ya kulifanya ni kulifuata lile wingu. Kama wingu likakaa, wao wakakaa; kama wingu likaenda mbele, ndipo wao wakaenda. Naweza kuwazia ya kwamba neno la kwanza Musa alilolifanya, yanapopambazuka mapambazuko ya kijivujivu ya asubuhi, lilikuwa kutazama juu aone kama wingu lingali juu ya kambi. Usiku lilikuwa nguzo ya moto, ikiiangaza kambi, na kuwajaza hisia ya utunzaji wa Mungu unaowahifadhi; mchana lilikuwa wingu likiwakinga na hari kali ya miali ya jua, na kuwasitiri wasionekane na adui zao.

Mchungaji wa Israeli aliweza kuwaongoza katika jangwa lisilo na njia. Kwa nini? Kwa sababu yeye alilifanya. Yeye alijua kila chembe ya mchanga ndani yake. Hawakuweza kupata kiongozi bora wa kuwapitisha jangwani kuliko Muumba wa jangwa lile.

Nawe, ewe mwenye dhambi, katika shida zako zote au mashaka na hofu zako, waweza kupata kiongozi bora kuliko Yehova? Ee, mimi nalipenda sana wimbo huo mzuri wa zamani:

“Uniongoze, Ee Wewe Yehova mkuu,

Mimi msafiri katika nchi hii kame;

Mimi ni dhaifu, bali Wewe u mwenye nguvu,

Nishike kwa mkono wako wenye uweza.

Mkate wa mbinguni,

Nilishe hata nisitake zaidi.”

Naam, hayo ni maombi ya kweli ya mwenye dhambi aliyefadhaika. Mungu anaweza, na zaidi ya hayo, yeye anataka, kutuongoza na kutulisha. “Uliwapa mkate kutoka mbinguni kwa njaa yao, na kuwatolea maji kutoka mwambani kwa kiu yao” (Nehemia 9:15). Yeye angali na uweza wa kumwongoza kila mmoja wetu kama alivyokuwa na uweza miaka elfu nne iliyopita wa kuwaongoza wana wa Israeli, “Kwa maana mimi ni Bwana, sibadiliki.” Kwa kila mmoja wetu yeye asema, “Usiogope, mimi nitakuongoza; mimi nitakusaidia.” Ni jambo la ajabu, sivyo, kuwa na Mungu atusaidie katika njia yetu?

Katika nchi zetu za Magharibi, watu wanapokwenda kuwinda ndani ya vichaka vinene, mahali pasipo na njia yoyote wala mapito, huchukua shoka lao na kuchonga kibanzi kidogo katika gamba la miti wanapopita, na kisha huiona njia yao kwa urahisi kwa alama hizo, wanaziita “vibanzi.” Wanaliita jambo hilo “kuchonga njia.” Na hivyo, kama mtaniruhusu kutumia usemi huo, Kristo “ameichonga njia.” Yeye mwenyewe ameisafiri njia hiyo, na kwa kuwa anaijua, anatuambia tumfuate, naye atatuongoza salama mpaka juu.

5. Sasa tumeona Kristo ni Mwokozi wetu, na Mkombozi wetu, na Mwokoaji wetu, na Kiongozi wetu, au Njia yetu. Lakini yeye ni zaidi ya hayo yote;

YEYE NI NURU YETU.

“Mimi ndimi nuru ya ulimwengu; yeye anifuataye hatakwenda katika giza kamwe, bali atakuwa na nuru ya uzima.” Yeye atakuwa na “nuru ya uzima” yenyewe. Naam, ni haki ya kila Mkristo kuenenda chini ya mbingu isiyo na mawingu.

Lakini je, sisi twaenenda hivyo chini ya mbingu isiyo na mawingu? La, Wakristo wengi mara nyingi wamo gizani. Kama ningeuuliza mkutano huu kama wote wanaenenda katika nuru, naamini hakuna hata mmoja, kama angesema hisia za kweli za moyo wake, ambaye hangejibu, “La, mimi mara nyingi nimo gizani.” Kwa nini iko hivyo? Ni kwa sababu sisi hatumfuati Kristo, wala hatushikamani naye kwa ukaribu. Sisi tumo gizani sana wakati ambao tungeweza kuwa katika nuru.

Tuseme madirisha yote ya jengo hili yamefungwa, na sisi tunalalamika juu ya giza; mtu yeyote angetuambia nini? Ndiyo, wangesema, “Ingizeni nuru; fungueni madirisha yote pande zote, na mara mtapata nuru tele.” Vivyo hivyo lazima tumkaribishe Kristo aingie, yeye aliye nuru, na kuifungua akili zetu impokee yeye, na mara tutaenenda katika nuru. Kuna giza kubwa sana siku hizi, hata ndani ya mioyo ya watu wa Mungu mwenyewe. Lakini mfuateni yeye, ndipo mtakapopata nuru tele. Ndipo Kristo atamwonyesha kila mmoja wetu kwamba yeye ni “Nuru”; naye atafanya zaidi, atatuwasha sisi kwa nuru yake, hata sisi nasi tuangaze kama nuru katika ulimwengu huu wa giza.

Mungu awasaidie watu wake mwenyewe

KUANGAZA KWA UNGAVU,

kumeta kutoka gizani, hata watu wapate kutambua kwamba sisi tumekuwa pamoja na Yesu. Lakini kumbukeni, ulimwengu huichukia nuru. Kristo alikuwa nuru ya ulimwengu, na ulimwengu ulitaka kuizima nuru hiyo huko Kalvari. Sasa yeye amewaacha watu wake waangaze. “Ninyi ni nuru ya ulimwengu.” Yeye ametuacha hapa tuangaze. Anakusudia sisi tuwe “nyaraka zilizo hai, zinazojulikana na kusomwa na watu wote.” Ulimwengu hakika utatuchunguza, na kunisoma mimi na wewe. Kama mwenendo wetu haulingani na maneno yetu, basi mwe na hakika kwamba ulimwengu utapata sababu ya kujikwaa kwetu.

Ulimwengu huona vizuizi vingi katika njia; sisi Wakristo na tuangalie tusiongeze vikwazo vingine zaidi kwa mwenendo wetu usio kama wa Kristo. Mungu atusaidie kuziweka nuru zetu ziwake safi na zenye ungavu! Huko Magharibi rafiki yangu mmoja alikuwa akitembea katika mojawapo ya barabara usiku wa giza, akaona mtu akimjia na kibatari. Alipomkaribia sana, aliona kwa ile nuru yake angavu kwamba mtu huyo hana macho. Alipita, lakini wazo likamjia, “Hakika mtu huyo ni kipofu.” Akageuka, na kusema, “Rafiki yangu, wewe si kipofu?” “Naam.” “Basi umechukua kibatari kwa nini?” “Nachukua kibatari ili watu wasijikwae juu yangu, bila shaka,” akasema yule kipofu. Sisi na tujifunze somo kwa kipofu huyo, na tuinue nuru yetu iwake kwa mng'aro safi wa mbinguni, hata watu wasijikwae juu yetu.

6. Wapinzani wamesema kwamba haya ya kusema watu wa Kristo ni nuru katika njia ni mwangaza wa mwezi mtupu, yaani maneno matupu. Naam, hilo ndilo hasa tunaloliamini; sisi twaakisi nuru ya Kristo.

NURU ILIYOAKISIWA.

Kama vile mwangaza wa mwezi, nuru yetu ni nuru tuliyoazimwa. Tunapoishi katika nuru ya Mwokozi wetu, sisi twaangaza kwa nuru yake: kama vile uso wa Musa, ulioangaza baada ya yeye kuwa mlimani pamoja na Mungu. Sisi na tuishi katika hewa ya mbinguni, na hapo hatuwezi kukosa kuangaza. Lakini kila tunapovunjika moyo na kuwa dhaifu katika imani, ndipo hakika tunapoipoteza nuru yetu.

Nakumbuka wakati wa vita ya Marekani nilikuwa katika mkutano wa maombi. Sisi sote tulikuwa na giza na huzuni nyingi. Mambo yalikuwa yametuendea vibaya kwa muda. Mwishowe mzee mmoja akasimama, na kusema, “Tuna nini sisi, hata tumevunjika mioyo na kuwa na huzuni? Ni kupungukiwa kwetu imani, hivyo tu.” Musa, na Yoshua, na Daudi walikuwa watu wenye imani kubwa. Wao waliamini, na kwa hiyo Mungu aliwaheshimu. Kupungukiwa kwetu imani kunatoka wapi? Mungu hakufa. Yeye angali na uweza, na angali na utashi, wa kusaidia leo kama alivyokuwa siku zote. Kwa nini, basi, sisi hatujawa wenye imani tele katika yeye? Ni kumvunjia Mungu heshima kusahau ya kwamba yeye angali na nguvu, ijapokuwa majeshi yetu yameshindwa, na yote yaonekana giza na huzuni.

PANDENI JUU YA MAWINGU.

Nitawaambia lililonitokea siku zilizopita nilipokuwa huko Magharibi. Nilitaka kuufikia kilele cha mmoja wa milima ya Magharibi. Nilikuwa nimeambiwa ya kwamba kuchomoza kwa jua ni kuzuri sana kunapotazamwa kutoka kileleni. Tulifika nyumba ya kupumzikia iliyo katikati ya njia mchana mmoja, ambapo tulipaswa kupumzika hata usiku wa manane, na kisha kuanza safari ya kwenda kileleni. Mara kikundi kidogo chetu kilianza safari pamoja na kiongozi mzuri. Kabla ya muda mrefu ilianza kunyesha mvua, na kisha ikawa dhoruba kamili ya radi na umeme. Nilidhani hakuna faida ya kuendelea, nikamwambia kiongozi, “Nadhani ni bora tugeuke tuende nyuma; hatutaona kitu chochote asubuhi hii, kwa mawingu haya yote.” “Ee,” akasema kiongozi, “nategemea kwamba karibu tutayapenya mawingu haya, na kufika juu yake, na hapo tutapata mandhari ya utukufu.” Basi tuliendelea, wakati radi zilikuwa zikinguruma pale pale kwenye masikio yetu. Lakini mara tulianza kufika juu ya wingu la radi; hewa ilikuwa safi kabisa, na jua lilipochomoza tulipata mandhari nzuri sana ya miali yake ikiyapaka rangi vilele vya milima; na kisha, mwangaza wa jua wa utukufu ulipoanza kutuzukia pale tulipokuwa tumesimama, tuliweza kuliona wingu lenye giza chini sana ya kimo cha mlima wetu. Hilo ndilo watu wa Mungu wanalolihitaji—kufika katika hewa iliyo safi juu ya mawingu ya dhoruba, na

KUPANDA JUU ZAIDI

mbali juu mpaka kwenye kilele cha mlima. Huko ndipo mtakapoipata miali ya kwanza kutoka kwa Jua la Haki, mbali juu ya mawingu na ukungu. Wengine wenu mwaweza kuwa katika giza kuu na huzuni; lakini msiogope, pandeni juu zaidi, mkaribieni Bwana zaidi, na mara mtaipata miali yake angavu juu ya nafsi zenu wenyewe, nayo itameta na kuwaangazia wengine.

ZIWEKENI NURU ZA CHINI ZIWAKE.

Lazima tuishi kama watoto wa nuru, wala si kama watoto wa giza. Kama sisi tumo katika giza na huzuni, ulimwengu utajuaje kwamba sisi ni watoto wa amani, na furaha, na shangwe? Nia yetu lazima iwe kuziweka nuru zetu ziwake. Miaka michache iliyopita, penye mlango wa bandari ya Cleveland zilikuwako nuru mbili, moja kila upande wa ghuba, zilizoitwa nuru za juu na nuru za chini; na ili kuingia bandarini salama usiku, meli zilipaswa kuziona nuru hizo mbili. Maziwa hayo ya Magharibi nyakati nyingine ni ya hatari zaidi kuliko bahari kubwa. Usiku mmoja wa dhoruba kali, meli ya mvuke ilikuwa ikijitahidi kuingia bandarini. Nahodha na mwongoza-meli walikuwa wakizitazama nuru hizo kwa wasiwasi mwingi. Baada ya kitambo mwongoza-meli akasikika akisema, “Waziona nuru za chini?” “La,” likawa jibu; “lakini naogopa kwamba tumezipita.” “Ah, hizo ndizo nuru,” akasema mwongoza-meli! “na hizo, kwa kuwa zimesimama juu ya jabali, lazima ziwe nuru za juu. Tumezipita nuru za chini, na tumeikosa nafasi yetu ya kuingia bandarini.” Ilipasa kufanywa nini? Walitazama nyuma, na kuona kivuli hafifu cha mnara wa nuru za chini juu ya mbingu. Nuru hizo zilikuwa zimezimika. “Je, huwezi kuigeuza meli ielekee upande mwingine?” “La; usiku ni mkali mno kwa jambo hilo. Meli haitatii usukani.” Dhoruba ilikuwa ya kutisha hata wasiweze kufanya neno lolote. Walijaribu tena kuelekea bandarini, lakini wakagonga majabali kwa mshindo, na kuzama chini. Wachache sana waliokoka; wengi wao walipata kaburi ndani ya maji. Kwa nini? Kwa sababu nuru za chini zilikuwa zimezimika, hivyo tu.

Na kwetu sisi nuru za juu ziko salama. Kristo mwenyewe ni nuru ya juu, na sisi ni nuru za chini, na kilio kwetu ni hiki, ziwekeni nuru za chini ziwake, hilo ndilo tunalopaswa kulifanya. Katika mahali Mungu alipotuweka yeye anatarajia sisi tuangaze, tuwe mashahidi walio hai, tuwe nuru angavu inayometa. Wakati tuko hapa kazi yetu ni kuangaza kwa ajili yake, naye atatuongoza salama mpaka ufuo wa Kanaani ulioangaziwa na jua, mahali ambapo hapana usiku tena.

7. Lakini Kristo ni zaidi ya Nuru yetu katika njia; kwa maana yeye ni

MWALIMU WETU.

Ni jambo la ajabu kama nini kuwa na mwalimu aliyetumwa kutoka mbinguni. “Lakini mtu wa kwenu akipungukiwa na hekima, na aombe dua kwa Mungu, awapaye wote kwa ukarimu, wala hakemei; naye atapewa” (Yakobo 1:5).

“Mtu akipungukiwa na hekima”: naogopa wako wengi sana kati yetu wanaopungukiwa hekima, na hata walio bora kati yetu nyakati nyingine watakuwa katika wasiwasi. Ziko nyakati katika maisha ya sisi sote tunapoonekana kuwa tumefungiwa njia; twasimama tu, na kusema, “Nifanye nini? Sijui njia iliyo bora ni ipi.” Ee, mwachieni Mungu jambo hilo, yeye mwenyewe atakuwa mwalimu wetu!

“Njoni kwangu mimi, ninyi nyote msumbukao na wenye kulemewa na mizigo, nami nitawapa ninyi pumziko. Jitieni nira yangu juu yenu, nanyi mjifunze kwangu mimi.” Huyu ni mwalimu wa ajabu. Yeye amekuwa na shule kwa maelfu ya miaka mingi; amekuwa na watu bora kabisa katika shule yake; lakini hata hivyo mna nafasi kwa mwanafunzi mwingine humo. Chuo chake hakijajaa mno bado, na mwalimu ni yeye aliyetumwa kutoka mbinguni. Mtu yeyote, kila mtu katika mkutano huu, aweza kujiunga na shule hii. Yesu atawakaribisha humo. Je, unashuku juu ya jambo lolote? mwulize Yesu; yeye atakuambia.

Ewe mwenye dhambi uliyefadhaika, mtafute mwalimu mwema, kama Nikodemo alivyofanya: “Mwalimu, twajua ya kuwa u mwalimu uliyetumwa kutoka kwa Mungu.” Kama utamtafuta yeye hivi, yeye atakuelekeza. Yeye atakuhifadhi, na kukuongoza mpaka malisho ya majani mabichi na kando ya maji ya utulivu. Nilikutana na mwanamke siku hizi ambaye alikuwa amejaa mashaka na mawazo ya kutokuamini. Hakuweza kuamini. Kusoma kwa muda mrefu vitabu vya wakanaji kulikuwa kumeitupia akili yake pazia la giza na huzuni. Ilinifanya niwe na huzuni kumwona katika hali hiyo. Wengine wenu mwaweza kuwa kama yeye. Nataka mmtwae Kristo kuwa mwalimu wenu, na hapo giza lote litakimbia.

Kristo aweza kutufundisha. Tazama alivyowafundisha wanafunzi wake. Hakuchoka kamwe kwa wao kujifunza kwake. Hivyo yeye atatufundisha sisi kama tutamsikiliza yeye peke yake.

JAJI MZEE ALIPOOKOKA.

Nakumbuka, nilipokuwa nikitoka katika mkutano wa maombi wa kila siku katika mmoja wa miji yetu ya Marekani miaka michache iliyopita, mwanamke mmoja akasema kwamba anataka kunena nami; sauti yake ilitetemeka kwa hisia, nikaona mara moja kwamba alikuwa amelemewa sana na jambo fulani. Akasema kwamba amekuwa akimwombea mumewe muda mrefu, na kwamba anataka kujua kama mimi ningekwenda kumwona; alidhani kwamba jambo hilo lingemfaa kwa kitu. Jina lake nani? “Jaji ---,” naye akalitaja jina la mmojawapo wa wanasiasa mashuhuri kabisa katika jimbo hilo. “Nimesikia habari zake,” nikasema; “naogopa si lazima niende, yeye ni mtu asiyeamini aliyekita moyoni; siwezi kubishana naye.” “Hilo si analolitaka,” akasema mwanamke huyo. “Yeye amekwisha kupata mabishano mengi mno. Nenda unene naye juu ya nafsi yake.” Nikasema kwamba nitakwenda, ijapokuwa sikuwa na tumaini kubwa. Nikaenda nyumbani kwake, nikakubaliwa kuingia chumbani mwake, nikajitambulisha kwamba nimekuja kunena naye juu ya wokovu. “Basi umekuja kwa shughuli ya kipumbavu sana,” akasema; “hakuna faida ya kunishambulia mimi, nakuambia hivyo. Mimi nimehimili mambo haya yote, siyaamini.”

Naam, niliona hakuna faida ya kubishana naye; basi nikasema, “Mimi nitakuombea, nami nataka uniahidi kwamba utakapookoka utanijulisha.” “Ee, naam, nitakujulisha,” akasema kwa dhihaka. “Ee, naam, nitakujulisha nitakapookoka!” Nikamwacha, lakini niliendelea kumwombea. Baada ya muda nikasikia kwamba jaji huyo mzee amekwisha kuokoka. Nikawa nikihubiri katika mji huo tena baada ya kitambo, na nilipokwisha kunena, jaji mwenyewe akanijia, na kusema: “Niliahidi nitakujulisha nitakapookoka; nimekuja kukuambia habari hiyo. Je, hukusikia?” “Naam; lakini ningependa kusikia kutoka kwako mwenyewe jinsi ilivyotukia.”

“Naam,” akasema jaji, “usiku mmoja, muda kidogo baada ya wewe kunijia, mke wangu alikuwa amekwenda mkutanoni; hakuwako mtu ndani ya nyumba ila watumishi. Nilikaa kando ya moto wa chumba cha kupumzikia, nikaanza kufikiri: Tuseme mke wangu yuko sawa, kwamba kuna mbingu na kuna jehanamu; na tuseme yeye yumo katika njia iendayo mbinguni, mimi nakwenda wapi? Nikalitupilia mbali wazo hilo mara moja. Lakini wazo la pili likanijia: Hakika yeye aliyeniumba anaweza kunifundisha. Naam, nikafikiri, ni kweli. Basi kwa nini nisimwombe yeye? Nikashindana na wazo hilo, lakini mwishowe, ijapokuwa nilikuwa na kiburi mno kupiga magoti, nikasema tu, ‘Baba, yote ni giza; Wewe uliyeniumba unaweza kunifundisha.’

Kwa namna fulani, kadiri nilivyoomba zaidi ndivyo nilivyojisikia vibaya zaidi. Nilikuwa na huzuni nyingi. Sikutaka mke wangu aje nyumbani na kunikuta hivi, basi nikajiondoa nikaenda kitandani, na alipoingia chumbani nikajifanya kuwa nimelala. Akapiga magoti na kuomba. Nalijua kwamba alikuwa akiniombea mimi, na kwamba kwa miaka mingi mirefu alikuwa akifanya hivyo. Nilijisikia kama ningeweza kuinuka na kupiga magoti kando yake; lakini la, moyo wangu wa kiburi haukuniacha, basi nikalala kimya, nikijifanya kuwa nimelala. Lakini sikulala usiku huo. Mara nikayabadili maombi yangu; sasa yalikuwa, ‘Ee Mungu, uniokoe; uniondolee mzigo huu wa kutisha.’

Sikumwamini Kristo hata wakati huo. Nilidhani nitakwenda moja kwa moja kwa Baba mwenyewe. Lakini kadiri nilivyoomba zaidi nilizidi kuwa mwenye taabu; mzigo wangu ukazidi kuwa mzito. Asubuhi iliyofuata sikutaka kumwona mke wangu, basi nikasema ‘kwamba mimi si mzima, na kwamba sitangoja chakula cha asubuhi.’ Nikaenda ofisini, na mtumishi mdogo alipokuja nikamrudisha nyumbani apate mapumziko ya siku hiyo. Makarani walipokuja niliwaambia kwamba wanaweza kwenda kwa siku hiyo. Nikaifunga milango ya ofisi: nilitaka kuwa peke yangu na Mungu. Nilikuwa karibu kuchanganyikiwa kwa maumivu ya moyo wangu. Nikamlilia Mungu auondoe mzigo huu wa dhambi. Mwishowe nikaanguka juu ya magoti yangu, na kulia, ‘Kwa ajili ya Yesu Kristo uondoe mzigo huu wa dhambi.’ Baadaye nikaenda kwa mchungaji wa mke wangu, ambaye alikuwa akiomba pamoja naye kwa miaka mingi kwa ajili ya kuokoka kwangu, na mchungaji yeye yule aliyeomba pamoja na mama yangu kabla ya kufa kwake. Nilipokuwa nikishuka barabarani, mstari ambao mama yangu alinifundisha ukanijia akilini, ‘Yo yote myaombayo mkisali, aminini ya kwamba mnayapokea, na mtayapata.’ Naam, nikafikiri, mimi nimekwisha kumwomba Mungu, na hivi sasa nakwenda kumwomba mwanadamu. Sitakwenda. Naamini mimi ni Mkristo. Nikageuka nikaenda nyumbani. Nikamkuta mke wangu ukumbini nilipoingia. Nikamshika mkono, na kusema, ‘Mimi ni Mkristo sasa.’ Uso wake ukageuka rangi kabisa; alikuwa akiomba kwa miaka ishirini na moja kwa ajili yangu, na hata hivyo hakuweza kuamini kwamba jibu limekwisha kuja. Tukaingia chumbani mwetu, na kupiga magoti kando ya kitanda kile kile ambapo yeye alikuwa amepiga magoti mara nyingi kumwombea mumewe. Hapo tuliisimamisha madhabahu yetu ya nyumbani; na kwa mara ya kwanza sauti zetu zikachangamana katika maombi. Nami naweza kusema hivi tu, kwamba miezi mitatu iliyopita imekuwa miezi ya furaha kuliko yote niliyoipata katika maisha yangu.”

Kutoka wakati huo jaji huyo ameishi maisha ya Kikristo yanayolingana na kukiri kwake; na yote hayo kwa sababu alimjia Mungu, akiomba maongozi.

Kama yuko mtu hapa leo ambaye akili yake imejaa mawazo ya namna hiyo ya kutokuamini, mwendee Mungu kwa unyofu, naye atakufundisha njia iliyo sawa ya kupita jangwa la giza la kutokuamini. Yeye hatakuacha katika giza wala katika shaka. Ni kazi ya ibilisi mwenyewe kuwaongoza watu waingie katika mashaka ya namna hiyo; yeye anajua vema kwamba akiwapata humo mara moja, amewapata salama kabisa.

Ni kazi ya Shetani kukuweka katika ujinga au katika shaka. Ni kazi ya Mungu kukufundisha. Mwalimu ni Kristo; yeye ameteuliwa na Mungu kwa kazi hii. Mungu atusaidie sisi sote tumkubali yeye kuwa mwalimu wetu.

8. Sasa tumemwona Kristo kuwa Mwokozi wetu, na Mkombozi wetu, na Mwokoaji wetu, na Kiongozi wetu, na Nuru yetu, na Mwalimu wetu. Lakini yeye ni zaidi ya hayo; yeye ni pia

MCHUNGAJI WETU.

Ni wazo tamu sana kwangu, “Bwana ndiye mchungaji wangu; sitapungukiwa na kitu.”

Hakuna hata mmoja hapa, ila watoto wachanga sana, ambaye haifahamu kazi ya mchungaji. Yeye hulichunga kundi lake, huwahifadhi na hatari, huwalisha, huwaongoza mpaka malisho yaliyo bora. Kwa kweli, Zaburi ya 23 ni maelezo ya kazi za mchungaji mwema, hivyo tu: “Bwana ndiye mchungaji wangu; sitapungukiwa na kitu,” na kadhalika.

Wewe unataka kulishwa; je, utazungukazunguka ukitafuta kitu cha kuyatosheleza matamanio ya nafsi yako? Basi, nakuambia, hutapata kamwe kitu cha kuyatosheleza matamanio ya moyo wako. Ulimwengu hauwezi, wala haukuweza kamwe, kuitosheleza nafsi iliyo na njaa. Bwana Yesu anaweza—yeye ni Mchungaji wa kweli. Yeye anataka kuirejeza nafsi yako, na kukuongoza kurudi katika njia za haki. Hata mpaka mautini yeye atakuongoza, na kukuvusha salama kupita kivuli chake mpaka nchi iliyo bora. Ewe mama, ewe baba, je, utamdai yeye kuwa Mchungaji wako?

Ewe kijana mwanamume, ewe kijana mwanamke, je, utamtwaa yeye kuwa Mchungaji wako?

Mwanangu mdogo, je, utamtwaa Yesu kuwa Mchungaji wako? Yeye atakuongoza salama na kwa upole.

Ninyi nyote mwaweza, mkitaka. Kwa maana “Mungu alimtoa yeye kwa ukarimu kwa ajili yetu sisi sote,” ili atupate sisi tuwe kundi lake. Yeye atatuongoza katika maisha yote, mpaka kwenye ukingo wa Yordani; atatuvusha mto ule wa giza mpaka ufalme wake. Yeye ni Mchungaji mwenye upole na upendo.

Nyakati nyingine nakutana na watu katika chumba cha maulizo cha wanaohangaika, watu wanaotunza hisia ngumu na chungu juu ya Mungu, mara nyingi kwa sababu wamepatwa na mateso. Mama mmoja aliniambia siku hizi, “Ah, Bw. Moody, Mungu amenitenda pasipo haki; amekuja na kunichukulia mtoto wangu.” Enyi mama wapendwa mliopatwa na mateso, je, Mungu hakuwaondoa watoto wenu na kuwapeleka katika maisha safi na yenye furaha? Mwaweza kutokuyafahamu hayo sasa, lakini mtayafahamu baadaye. Yeye anataka kuwaongoza ninyi mpaka huko.

MCHUNGAJI WA MASHARIKI.

Rafiki yangu mmoja, aliyekuwa katika nchi za Mashariki, aliniambia kwamba alimwona mchungaji ambaye alitaka kundi lake livuke mto. Yeye mwenyewe akaingia majini na kuwaita; lakini la, hawakutaka kumfuata ndani ya maji. Akafanya nini? Ndiyo, akajikaza vibwebwe na kumnyanyua mwana-kondoo mmoja chini ya kila mkono, na kujitosa moja kwa moja ndani ya mto, na kuuvuka bila hata kutazama nyuma. Alipowanyanyua wale wana-kondoo, kondoo wazee walitazama juu usoni mwake na kuanza kulia kwa ajili yao; lakini alipojitosa ndani ya maji, kondoo mama walijitosa nyuma yake, na kisha kundi lote likafuata. Walipofika ng'ambo ya pili aliwaweka chini wale wana-kondoo, na mara mama zao wakawajia, na palikuwa na mkutano wa furaha.

Rafiki yangu asema kwamba aliona malisho ya ng'ambo ya pili ni bora zaidi na mashamba ni ya majani mabichi zaidi; na kwa sababu hiyo mchungaji alikuwa akiwavusha. Mchungaji wetu mkuu wa Palestina hufanya hivyo. Mtoto yule ambaye yeye amemwondoa duniani ameondolewa tu mpaka malisho ya majani mabichi ya Kanaani, na Mchungaji anakusudia kuvuta mioyo yenu iufuate mtoto huyo, na kuwafundisha ninyi “yafikirini yaliyo juu.” Alipomtwaa Mariamu wako mdogo, au Edith, au Julia, likubali jambo hilo kuwa ni mwito wa kutazama juu na mbali zaidi. Wewe, ewe mama, je, unalia machozi machungu kwa ajili ya mtoto wako mdogo? Usilie! Mtoto wako amekwenda mahali ambapo hapana kilio wala huzuni. Je, ungetaka arudi? Hakika kamwe.

Kristo ni Mchungaji wetu—mwaminifu na mwenye upendo. Ijapokuwa ugonjwa, au taabu, au hata mauti yenyewe, ikuje nyumbani mwetu na kuwadai wapendwa wetu kabisa, hata hivyo hawajapotea, bali wametutangulia tu. Mungu amsaidie kila mmoja wetu ampate yeye kuwa Mchungaji wake.

Kama wakati ungeniruhusu, ningependa kulitwaa somo la Kristo kuwa kuhesabiwa haki kwetu, na Hekima yetu, na Haki yetu, na Rafiki yule aambatanaye nasi kuliko ndugu; lakini ingechukua milele yote kueleza Kristo ni nini kwa watu wake, na anawafanyia nini.

Nakumbuka nilipokuwa nikihubiri juu ya somo hili huko Skotlandi, nilipokwisha kunena, nikamwambia mtu mmoja kwamba “nasikitika kwa kuwa sikuweza kulikamilisha somo hili kwa kukosa wakati.” “Kulikamilisha somo hilo,” akasema Mskoti huyo, “ee, jambo hilo lingehitaji milele yote, na hata hapo halingekuwa kamili; hiyo itakuwa kazi ya mbinguni.”

9. Tena kwa mara moja zaidi, na tumtazame Kristo kuwa

MCHUKUZI WA MIZIGO YETU.

Ee, napenda kumfikiri yeye kuwa mchukuzi wa mizigo yetu kama vile alivyo mchukuzi wa dhambi zetu. Yeye huzichukua dhambi zetu, ijapokuwa ni nyingi kuliko nywele za vichwa vyetu. Ijapokuwa mizigo hii ni mikubwa na ya kutisha, Mungu ameiweka yote juu ya Yesu.

“Ee Kristo, mizigo mizito kama nini iliyoinamisha kichwa chako!

Mzigo wetu uliwekwa juu yako.”

Upande huo wa kuchukua mizigo tumekwisha kuutazama katika kazi yake kama Mwokozi na Mkombozi. Sasa nataka kulitwaa wazo lile tamu, ambalo limekuwa faraja kubwa kwangu.

“Hakika yeye alichukua masikitiko yetu, na kujitwika huzuni zetu.” Ni utukufu, sivyo, kujua kwamba tunaye Mwokozi wa namna hiyo? Je, waweza kuhisi kwamba yeye ameuinua mzigo wako kutoka mabegani yako na kuuweka juu ya bega lake mwenyewe? Ndipo utahisi wepesi moyoni.

MOYO MWEPESI.

Pindi moja, nilipokwisha kunena kwa jinsi hii, mwanamke mmoja akatokea mbele, na kusema, “Ee, Bw. Moody, ni jambo jepesi kwako kunena hivi juu ya moyo mwepesi. Lakini wewe u mtu mchanga, na kama ungekuwa na mzigo mzito kama wangu ungenena tofauti. Mimi nisingeweza kunena kwa jinsi hiyo, mzigo wangu ni mkubwa mno.” Nikamjibu, “Lakini si mkubwa mno kwa Yesu.” “Ee,” akasema, “mimi siwezi kuutupa juu yake.” “Kwa nini? hakika si mkubwa mno kwake. Si kwamba yeye ni dhaifu. Bali ni kwa sababu wewe hutaki kumwachia yeye. Wewe u kama wengine wengi. Wao hawataki kumwachia yeye. Wao huzungukazunguka wakiikumbatia mizigo yao, na hata hivyo wakiilalamikia. Kile Bwana anachokitaka ni hiki, wewe kumwachia yeye mzigo wako, kumruhusu yeye akuchukulie. Ndipo utakuwa na moyo mwepesi, huzuni itakimbia, wala hapatakuwa na kuugua tena. Ni upi mzigo wako, rafiki yangu, ambao hukuweza kumwachia Kristo?” Akanijibu, “Nina mwana ambaye anatangatanga juu ya uso wa dunia. Hakuna ajuaye yuko wapi ila Mungu.” “Je, Kristo hawezi kumtafuta na kumrudisha?” “Nadhani anaweza.” “Basi nenda umwambie Yesu, na kumwomba akusamehe kwa kuwa umeitilia shaka nguvu yake na utashi wake; wewe huna haki ya kumtilia shaka.” Akaenda zake akiwa amefarijika sana, nami naamini kwamba mwishowe alimrudishiwa mwanawe aliyetangatanga!

MAOMBI YA MAMA YALIYOJIBIWA.

Jambo hili linanikumbusha baba na mama wacha-Mungu katika nchi yetu, ambao mwanao mkubwa alikuwa amekwenda Chicago kwenye kazi. Jirani yao alikuwa mjini kwa shughuli fulani, akamkuta yule kijana akipepesuka barabarani akiwa amelewa. Akafikiri, “Nitawaambiaje wazazi wake?” Aliporudi kijijini mwao, akaenda na kumwita yule baba nje, na kumwambia. Ilikuwa pigo la kutisha kwa baba huyo, lakini hakumwambia mama neno lolote mpaka watoto wadogo wote walipokwenda kulala; watumishi walikuwa wamekwisha kwenda kulala, na kila kitu kilikuwa kimya katika shamba lile dogo lililokuwa katika nyanda za Magharibi. Wakavuta viti vyao mpaka meza ndogo ya chumba cha kupumzikia, na hapo akamwambia habari hiyo ya huzuni. “Mwana wetu ameonekana akiwa amelewa barabarani za Chicago—amelewa.” Ah, mama huyo aliumizwa sana; hawakulala usingizi mwingi usiku huo, bali walitumia saa zote katika maombi ya moto kwa ajili ya mwanao. Karibu na mapambazuko mama huyo alihisi ndani ya moyo wake hakika kwamba yote yatakuwa mema. Akamwambia baba “kwamba amelitupa jambo hilo juu ya Bwana, amemwachia Yesu mwanawe, na kwamba anahisi kwamba yeye atamwokoa.” Wiki moja kutoka wakati huo yule kijana akatoka Chicago, akafanya safari ya maili mia tatu kwenda mashambani; na alipoifikia nyumba yao, akaingia, na kusema, “Mama, nimekuja nyumbani kukuomba uniombee.” Ah, maombi yake yalikuwa yamefika mbinguni; alikuwa amemtupia Yesu mzigo wake, naye alikuwa amemchukulia. Yeye alitwaa mzigo, akayapeleka maombi yake yaliyonyunyiziwa damu ya upatanisho, na kuyapata yamejibiwa. Baada ya siku mbili yule kijana akarudi Chicago akifurahi katika Mwokozi. Ni jambo la ajabu kama nini kuwa na Kristo kuwa mchukuzi wa mizigo yetu! Ni jinsi gani mahangaiko yetu yanavyokuwa mepesi na rahisi tunapoyatupa juu yake!

Je, unasema Kristo si kitu kwako? Kama ni hivyo, ni kwa sababu wewe humtaki yeye, hivyo tu. Yeye ni kwa wote watakaomkubali Mwokozi wa kuwatoa katika mauti, na Mkombozi wa kuwatoa katika nguvu za dhambi, na Mwokoaji wa kutuopoa kutoka adui zetu, na Kiongozi wa kutupitisha jangwani; yeye mwenyewe ni njia, yeye ni Nuru katika giza, yeye ni Mwalimu kwa watu wake, yeye ni Mchungaji wa kundi lake, yeye ni kuhesabiwa haki kwetu, na Hekima yetu, na Haki yetu, na Ndugu Mkubwa wetu, na Mchukuzi wa mizigo yetu. Kwa kweli yeye ni “Yote yetu katika yote.”

Basi njoo kwa Kristo; ee, njoo leo,

Baba, na Mwana, na Roho wasema,

Bibi-arusi hurudia mwito ule,

Kwa maana yeye atakuosha uchafu wako wa hatia,

Upendo wake utatuliza maumivu yako ya uchovu,

Kwa maana Kristo ni Yote katika Yote.