Daima

Siku ya Thelathini. KUMNGOJEA MUNGU: Daima.

'Basi wewe umrudie Mungu wako: shika fadhili na hukumu, ukamngoje Mungu wako daima.'—Hosea 12:6.

KUDUMU bila kukatika ni mojawapo ya mambo ya msingi ya uhai. Ukatize uhai wa mtu kwa saa moja tu, umepotea, amekufa. Kudumu kusikokatika na kusikokoma ni jambo la lazima kwa maisha ya Kikristo yenye afya. Mungu anataka niwe, naye Mungu anangojea kunifanya, nami nataka kuwa, nami namngojea Yeye anifanye, kila dakika, kile anachotarajia kwangu, na kile kipendezacho machoni pake. Ikiwa kumngojea Mungu ndiko kiini cha dini ya kweli, basi kuudumisha ule moyo wa kumtegemea kabisa hauna budi kuwa ni jambo lisilokatika. Wito wa Mungu, 'Umngoje Mungu wako daima,' lazima ukubaliwe na kutiiwa. Zaweza kuwapo nyakati za kungojea maalum; lakini ile hali na mazoea ya nafsi lazima yawepo daima, bila kubadilika wala kukatizwa.

Kungojea huku daima kwa kweli ni jambo la lazima. Kwa wale wanaoridhika na maisha dhaifu ya Kikristo, huonekana kuwa ni anasa, kitu kilichozidi yale ya lazima ili mtu awe Mkristo mwema. Lakini wote waombao maombi haya, 'Bwana! unifanye mtakatifu kadiri mwenye dhambi aliyesamehewa awezavyo kufanywa! Unitunze niwe karibu nawe kadiri iwezekanavyo kwangu! Unijaze upendo wako kwa kadiri yote uliyo radhi kunijaza!' huona mara moja kwamba ni kitu ambacho hakina budi kupatikana. Wanaona kwamba hapawezi kuwa na ushirika usiokatika pamoja na Mungu, wala kukaa ndani ya Kristo kwa ukamilifu, wala kuudumisha ushindi juu ya dhambi na utayari wa kutumika, pasipo kumngojea Bwana daima.

Kungojea daima ni jambo linalowezekana. Wengi hudhani kwamba, kwa shughuli za maisha haya, jambo hilo haliwezekani kamwe. Hawawezi kuwa wakiliwaza sikuzote. Hata wanapotaka, husahau.

Hawaelewi kwamba ni jambo la moyo, na kwamba kile kiujazacho moyo ndicho kiushughulishacho, hata wakati fikira zimeshikwa na mambo mengine. Moyo wa baba waweza kujawa daima na upendo mkuu na shauku kwa ajili ya mke au mtoto aliye mgonjwa mbali naye, hata ingawa shughuli zinazomsonga zadai fikira zake zote. Moyo ukiisha kujifunza jinsi usivyo na uwezo wo wote hata kwa dakika moja kujilinda wenyewe au kuzaa jema lo lote, ukiisha kufahamu jinsi Mungu atakavyoulinda kwa hakika na kweli, nao ukiisha, katika kujikatia tamaa wenyewe, kuipokea ahadi ya Mungu ya kuufanyia lile lisilowezekana, hujifunza kustarehe katika Mungu; na katikati ya shughuli na majaribu waweza kungojea daima.

Kungojea huku ni ahadi. Amri za Mungu ni uwezesho; maagizo ya Injili yote ni ahadi, ufunuo wa yale ambayo Mungu wetu atatufanyia. Uanzapo kwanza kumngojea Mungu, huwa ni kwa kukatika mara kwa mara na kushindwa mara kwa mara. Lakini amini kwamba Mungu anakuangalia kwa upendo, na kwa siri anakutia nguvu katika jambo hilo. Ziko nyakati ambazo kungojea huonekana kuwa ni kupoteza wakati tu, lakini sivyo. Kungojea, hata gizani, ni kuendelea mbele kusikoonekana, kwa sababu ni Mungu unayeshughulika naye, naye anatenda kazi ndani yako. Mungu akuitaye umngojee, huziona jitihada zako dhaifu, naye hulitenda jambo hilo ndani yako. Maisha yako ya kiroho si kazi yako mwenyewe kwa jinsi yo yote: kama vile usivyoweza kuyaanza, ndivyo usivyoweza kuyaendeleza; ni Roho wa Mungu aliyeianza ndani yako kazi ya kumngojea Mungu; Yeye atakuwezesha kungojea daima.

Kungojea daima kutakabiliwa na kupewa thawabu na Mungu mwenyewe atendaye kazi daima. Tunakaribia mwisho wa tafakari zetu. Laiti wewe nami tungejifunza somo hili moja: Mungu hana budi, Mungu atatenda kazi daima. Yeye hutenda kazi daima sikuzote, lakini kuionja kazi hiyo huzuiliwa na kutokuamini. Lakini Yeye ambaye kwa Roho wake anakufundisha kungojea daima, atakufikisha pia kuona jinsi ambavyo, akiwa ndiye wa Milele, kazi yake haikomi kamwe. Katika upendo na uhai na kazi ya Mungu hakuwezi kuwa na mkato wala kukatizwa.

Usimwekee Mungu mipaka katika jambo hili kwa mawazo yako juu ya yale yanayoweza kutazamiwa. Kaza macho yako juu ya kweli hii moja: katika asili yake yenyewe, Mungu, akiwa ndiye peke yake Mtoaji wa uzima, hawezi kufanya vinginevyo ila kutenda kazi kila dakika ndani ya mtoto wake. Usitazame upande mmoja tu: 'Nikingojea daima, Mungu atatenda kazi daima.' La, tazama upande ule mwingine. Mtangulize Mungu, useme, 'Mungu hutenda kazi daima; kila dakika naweza kumngojea daima.' Tumia muda wa kutosha hata maono ya Mungu wako atendaye kazi daima, pasipo kukoma hata dakika moja, yaujaze utu wako wote. Ndipo kungojea kwako daima kutakuja kwenyewe. Nafsi ikiwa imejaa tumaini na furaha, mazoea yake matakatifu yatakuwa, 'Nakungoja Wewe mchana kutwa.' Roho Mtakatifu atakufanya uwe ukingojea sikuzote.

'Ee nafsi yangu, umngojee Mungu peke yake!'