Kwa Ajili ya Mambo Yasiyotazamiwa

Siku ya Ishirini na Tatu. KUMNGOJEA MUNGU: Kwa Ajili ya Mambo Yasiyotazamiwa.

'Maana tangu mwanzo wa ulimwengu watu hawakusikia, wala kufahamu kwa sikio, wala jicho halikuyaona, Ee Mungu, ila wewe, mambo aliyomwandalia yeye amngojeaye.'—Isaya 64:4.

TAFSIRI ya Kiingereza iitwayo Revised Version ina maneno haya: 'Wala jicho halikumwona Mungu ila wewe, atendaye mambo kwa ajili yake amngojeaye.' Katika tafsiri ya Kiingereza iitwayo Authorised Version, wazo ni kwamba hakuna jicho lililoliona lile jambo ambalo Mungu amelitayarisha. Katika R.V., hakuna jicho lililomwona Mungu mwingine, ila Mungu wetu, atendaye mambo kwa ajili yake amngojeaye. Tafsiri zote mbili zinashirikiana katika mawazo mawili haya: kwamba nafasi yetu ni kumngojea Mungu, na kwamba tutafunuliwa mambo ambayo moyo wa mwanadamu hauwezi kuyawaza. Tofauti ni hii: katika R.V. ni Mungu mwenyewe atendaye kazi; katika A.V. ni lile jambo atakalolitenda. Katika 1 Wakorintho 2:9, maneno haya yametumiwa kuhusu mambo ambayo Roho Mtakatifu atayafunua, kama ilivyo katika A.V., nasi katika tafakari hii twashikamana na maana hiyo.

Mistari iliyotangulia, hasa kuanzia sura ya 63:15, husema juu ya hali ya chini ya watu wa Mungu. Maombi yamemiminwa, 'Utazame kutoka mbinguni.' (mst. 15.) 'Mbona umeufanya moyo wangu kuwa mgumu hata nisiwe na kicho chako? Urudi kwa ajili ya watumishi wako.' (mst. 17.) Na 64:1, kwa bidii zaidi zaidi, 'Laiti ungezipasua mbingu, ukashuka, . . . kama moto uyeyushao uwakavyo, ili kulijulisha jina lako kwa adui zako!' Kisha hufuata hoja itokayo katika mambo ya zamani, 'Ulipotenda mambo ya kutisha tusiyoyatazamia, ulishuka, milima ikatiririka mbele zako.' 'Maana'—hii ndiyo imani iliyoamshwa sasa na kule kuyakumbuka mambo tusiyoyatazamia, yeye angali Mungu yule yule—'jicho halikuyaona, Ee Mungu, ila wewe, mambo aliyomwandalia yeye amngojeaye.' Mungu peke yake ndiye ajuaye awezayo kuwatendea watu wake wamngojeao. Kama Paulo aelezavyo na kuyatumia maneno haya: 'Mambo ya Mungu hakuna ayafahamuye ila Roho wa Mungu.' 'Lakini Mungu ametufunulia sisi kwa Roho.'

Hitaji la watu wa Mungu, na kilio cha kutaka Mungu aingilie kati, ni jambo la haraka siku zetu hizi kama lilivyokuwa siku za Isaya. Sasa, kama wakati ule, na kama ilivyokuwa nyakati zote, wako mabaki wamtafutao Mungu kwa moyo wao wote. Lakini tukiutazama ulimwengu wa Kikristo kwa jumla, na hali ya Kanisa la Kristo, iko sababu isiyo na mpaka ya kumsihi Mungu azipasue mbingu na kushuka. Hakuna kitakachofaa isipokuwa kuingilia kati kwa namna ya pekee kwa Uweza wa Mungu Mwenyezi. Nachelea ya kwamba hatuna fahamu iliyo sahihi ya jinsi ulimwengu uitwao wa Kikristo ulivyo machoni pa Mungu. Mungu asiposhuka 'kama moto uyeyushao uwakavyo, ili kulijulisha jina lake kwa adui zake,' kazi zetu huwa hazizai matunda ila kidogo tu. Angalia huduma ya neno—jinsi ilivyojaa hekima ya wanadamu na elimu ya vitabu—jinsi ulivyo mdogo ndani yake udhihirisho wa Roho na wa nguvu. Fikiri juu ya umoja wa mwili—jinsi ulivyo mdogo udhihirisho wa nguvu ya upendo wa mbinguni uwafungao watoto wa Mungu wawe wamoja. Fikiri juu ya utakatifu—utakatifu wa unyenyekevu wa mfano wa Kristo na wa kusulibiwa kwa ulimwengu—jinsi ulimwengu usivyoona ila kidogo kwamba wako kati yao watu waishio ndani ya Kristo mbinguni, ambao Kristo na mbingu huishi ndani yao.

Tufanye nini basi? Liko jambo moja tu. Hatuna budi kumngojea Mungu. Na kungojea kwa ajili ya nini? Hatuna budi kulia, kwa kilio kisichonyamaza kamwe, 'Laiti ungezipasua mbingu ukashuka, ili milima itiririke mbele zako.' Hatuna budi kutamani na kuamini, hatuna budi kuomba na kutazamia, kwamba Mungu atatenda mambo yasiyotazamiwa. Hatuna budi kuiweka imani yetu juu ya Mungu ambaye wanadamu hawajui aliyowaandalia wale wamngojeao. Mungu atendaye maajabu, awezaye kuyapita matazamio yetu yote, ndiye impasaye kuwa Mungu wa tumaini letu.

Naam, watu wa Mungu na waipanue mioyo yao ili kumngojea Mungu awezaye kufanya mambo ya kuzidi sana kupita yote tuyaombayo au tuyawazayo. Na tuungane pamoja kama wateule wake wamlilio mchana na usiku kwa ajili ya mambo ambayo wanadamu hawajayaona. Yeye aweza kuinuka na kuwafanya watu wake kuwa jina na sifa duniani. 'Atangoja, ili apate kuwaneemesha ninyi; heri wote wamngojao Yeye.'

'Ee nafsi yangu, umngojee Mungu peke yake!'