Nyongeza

Binti za Yerusalemu

Swali huulizwa mara kwa mara, Ni nani wanaowakilishwa na binti za Yerusalemu?

Ni dhahiri kwamba wao si bibi-arusi, lakini hawapo mbali naye. Wanajua mahali ambapo Bwana-arusi hulaza kundi lake wakati wa adhuhuri; wanaagizwa na Bwana-arusi wasichochee wala kumwamsha pendo lake anapopumzika, akikaa ndani yake; wanavuta fikira kwa Bwana-arusi anapopanda kutoka jangwani kwa heshima na fahari; zawadi zao za upendo hupamba gari lake la fahari; bibi-arusi anawasihi wamsaidie kumpata Mpendwa wake, na, wakichochewa na maelezo yake yenye shauku ya uzuri wake, wanatamani kumtafuta pamoja naye; wanaeleza kwa ukamilifu uzuri wa bibi-arusi, lakini, kwa upande mwingine, kamwe hatuwaoni wakishughulika na nafsi ya Bwana-arusi; Yeye si kila kitu kwao; wanajali mambo ya nje na ya kidunia.

Je, hawawakilishi wale ambao, kama hawajaokoka kabisa, wako karibu sana na wokovu; au, kama wameokoka, wameokoka nusu tu? ambao kwa sasa wanajishughulisha zaidi na mambo ya ulimwengu huu kuliko mambo ya MUNGU? Kuendeleza masilahi yao wenyewe, kujipatia faraja yao wenyewe, kunawahusu zaidi kuliko kumpendeza BWANA katika mambo yote. Yamkini wao ni sehemu ya lile kundi kubwa linalotajwa katika Ufunuo 7:9-17, wanaotoka katika dhiki ile kuu, lakini hawatakuwa sehemu ya wale 144,000, “malimbuko kwa MUNGU na kwa MWANA-KONDOO” (Ufunuo 14:1-5). Wamesahau onyo la BWANA wetu katika Luka 21:34-36; na kwa hiyo “hawahesabiwi kuwa wamestahili kuokoka na mambo hayo yote yatakayotokea, na kusimama mbele za MWANA wa Adamu.” Hawajahesabu, pamoja na Paulo, “vitu vyote kuwa hasara kwa ajili ya ubora wa kumjua KRISTO YESU BWANA,” na kwa hiyo hawafaulu “kuufikia” ule ufufuo kutoka kwa wafu, ambao Paulo alihisi angeweza kuukosa, lakini alilenga kuufikia.

Twataka kuweka kumbukumbu ya usadikisho wetu mzito kwamba si wote walio Wakristo, au wanaojidhania kuwa hivyo, watakaoufikia ufufuo ule ambao Mtakatifu Paulo anaunena katika Wafilipi 3:11, au watakaokutana na BWANA hewani. Kwa wale ambao kwa maisha ya kujiweka wakfu wanaonyesha kwamba wao si wa ulimwengu, bali wanamtazamia Yeye, “atatokea pasipo dhambi kwa wokovu.”