Mzabibu (Yohana 15:1)

Mimi ndimi mzabibu wa kweli—Yohana 15:1

Vitu vyote vya duniani ni vivuli vya hali halisi za mbinguni—ni maonyesho, katika maumbo yaliyoumbwa na yanayoonekana, ya utukufu wa Mungu usioonekana. Uzima na Kweli viko Mbinguni; hapa duniani tunazo sura na vivuli vya kweli za mbinguni. Yesu asemapo: “Mimi ndimi mzabibu wa kweli,” anatuambia kwamba mizabibu yote ya dunia ni picha na alama zake yeye mwenyewe. Yeye ndiye hali halisi ya Kimungu, ambayo hiyo mizabibu ni maonyesho yake yaliyoumbwa. Yote yamwelekeza yeye, na kumhubiri yeye, na kumfunua yeye. Kama ungependa kumjua Yesu, uchunguze mzabibu.

Ni macho mangapi yamekazia na kustaajabia mzabibu mkubwa wenye matunda yake mazuri. Njoo ukakazie macho kwa Mzabibu wa mbinguni hata jicho lako ligeuke kutoka kwa vitu vyote vinginevyo ili kumstaajabia yeye. Ni wangapi, katika nchi yenye jua, waketio na kupumzika chini ya uvuli wa mzabibu. Njoo utulie chini ya uvuli wa Mzabibu wa kweli, ukapumzike ndani yake mbali na hari ya mchana. Ni hesabu isiyoweza kuhesabika ya watu wafurahiao tunda la mzabibu! Njoo, uchukue, ule tunda la mbinguni la Mzabibu wa kweli, na nafsi yako iseme: “Naliketi chini ya uvuli wake kwa furaha nyingi, na tunda lake lilikuwa tamu kinywani mwangu.”

Mimi ndimi mzabibu wa kweli.—Hii ni siri ya mbinguni. Mzabibu wa duniani waweza kukufundisha mengi juu ya Mzabibu huu wa Mbinguni. Mambo mengi ya kuvutia na mazuri ya kulinganisha hujitokeza yenyewe, na kutusaidia kupata dhana za yale Kristo aliyoyakusudia. Lakini mawazo kama hayo hayatufundishi kujua ni nini hasa Mzabibu wa mbinguni ulivyo, katika uvuli wake uburudishao, na tunda lake litoalo uzima. Kuonja hili ni sehemu ya ile siri iliyofichwa, ambayo hakuna awezaye kuifunua na kuitoa ila Yesu mwenyewe, kwa Roho wake Mtakatifu.

Mimi ndimi mzabibu wa kweli.—Mzabibu ni Bwana aliye hai, ambaye yeye mwenyewe hunena, na kutoa, na kutenda yote aliyo nayo kwa ajili yetu. Kama ungependa kujua maana na nguvu ya neno hilo, usifikiri kulipata kwa fikira au funzo; haya yaweza kukusaidia kukuonyesha kile unachopaswa kukipata kwake ili kuamsha shauku na tumaini na maombi, lakini hayawezi kukuonyesha Mzabibu. Yesu peke yake aweza kujifunua mwenyewe. Yeye hutoa Roho wake Mtakatifu ili kufumbua macho yakamtazame yeye mwenyewe, kuufungua moyo upate kumpokea yeye mwenyewe. Ni lazima yeye mwenyewe alinene neno hilo kwako na kwangu.

Mimi ndimi mzabibu wa kweli.—Nami nifanye nini, nikitaka siri hiyo, katika uzuri wake wote wa mbinguni na baraka, ifunuliwe kwangu? Pamoja na yale uliyoyajua tayari juu ya mfano huu, inama chini na utulie, abudu na ungoje, hata Neno la Kimungu liingie moyoni mwako, ukahisi uwepo wake mtakatifu pamoja nawe, na ndani yako. Kufunikwa na upendo wake mtakatifu kutakupa utulivu mkamilifu na pumziko la kujua kwamba Mzabibu atafanya yote.

Mimi ndimi mzabibu wa kweli.—Yeye anenaye ni Mungu, mwenye nguvu zisizo na mwisho awezaye kuingia ndani yetu. Yeye ni mwanadamu, aliye mmoja nasi. Yeye ni yule aliyesulubiwa, aliyetushindia haki kamilifu na uzima wa Kimungu kwa mauti yake. Yeye ni yule aliyetukuzwa, ambaye kutoka kwenye kiti cha enzi hutoa Roho wake ili kuufanya uwepo wake uwe halisi na wa kweli. Yeye hunena—lo, sikiliza, si maneno yake tu, bali yeye mwenyewe, akinong’ona kwa siri siku baada ya siku: “Mimi ndimi mzabibu wa kweli! Yote ambayo Mzabibu aweza kuwa kwa tawi lake, “Nitakuwa hivyo kwako.”

Bwana Yesu Mtakatifu, Mzabibu wa mbinguni uliopandwa na Mungu mwenyewe, nakusihi, ujifunue kwa nafsi yangu. Roho Mtakatifu, si katika fikira tu, bali katika uzoefu, anijalie kuyajua yote ambayo wewe, Mwana wa Mungu, ulivyo kwangu ukiwa mzabibu wa kweli.