Septemba

Septemba 1

Bwana MUNGU asema hivi, Tena kwa ajili ya jambo hili nitaulizwa na nyumba ya Israeli, ili niwatendee. Ezekieli 36:37.

Maombi ni mtangulizi wa rehema. Geukia historia takatifu nawe utaona ya kwamba haikuwa kawaida rehema kubwa kuja ulimwenguni humu bila kutanguliwa na dua. Maombi siku zote ni utangulizi wa baraka. Yanaitangulia baraka kama kivuli cha baraka. Nuru ya jua ya rehema za Mungu izukapo juu ya mahitaji yetu, hutupa kivuli cha maombi mbali chini tambarare. Au, kwa kutumia mfano mwingine, Mungu arundikapo kilima cha rehema, Yeye mwenyewe huangaza nyuma yake, naye hutupa juu ya roho zetu kivuli cha maombi ili tupate kuwa na hakika, tukiwa wengi katika maombi, kwamba dua zetu ni vivuli vya rehema. Hivyo maombi yameunganishwa na baraka ili kutuonyesha thamani yake.—Spurgeon.

Septemba 2

Tusichoke katika kutenda mema; kwa maana kwa wakati wake tutavuna, tusipozimia roho. Wagalatia 6:9.

Saa za maisha haya ya sasa ni zama za uhai ujao zikiwa bado tumboni.—A. J. Gordon.

Septemba 3

Uso wangu utakwenda pamoja nawe. Kutoka 33:14.

Kamwe hatupaswi kuondoka vyumba vyetu vya maombi asubuhi bila kuwa tumeelekeza fikira zetu kwa kina na kwa nguvu juu ya ukweli wa uwepo halisi wa Mungu pale pamoja nasi, akituzunguka, na kukijaza chumba kwelikweli kama vile ajazavyo mbingu zenyewe. Huenda isilete matokeo dhahiri mwanzoni, lakini, tunapofanya jitihada tena na tena za kutambua uwepo wa Mungu, utazidi kuwa halisi kwetu. Na, tabia hiyo izidipo kukua ndani yetu, tukiwa peke yetu chumbani, au tukikanyaga majani ya hekalu fulani la asili la msituni, au tukitembea barabara ya mawe—katika ukimya wa usiku, au katikati ya makutano yenye msongamano ya mchana—mara nyingi tutajikuta tukinong’ona maneno haya, “Uko karibu; upo hapa, Ee Bwana.”—F. B. Meyer.

Septemba 4

Rehema na msamaha ni vya Bwana Mungu wetu. Danieli 9:9.

Kama vile kufuli la kamani lijifungavyo lenyewe, lakini haliwezi kufunguliwa bila ufunguo, vivyo hivyo sisi wenyewe twaweza kukimbilia katika dhambi, lakini hatuwezi kurudi bila ufunguo wa neema ya Mungu.—Cawdray.

Septemba 5

Ni wakati muafaka wa kuamka katika usingizi. Warumi 13:11.

Nimesikia habari za mchoraji aliyependa kufanya kazi kwa nuru ya asubuhi. Alisema ya kuwa rangi hueleweka vizuri zaidi kwa nuru ya siku ya mapema, na hivyo alikuwa na desturi ya kuwapo studio yake akingoja kuchomoza kwa jua. Kisha kila dakika mwanga uliongezeka, akaona aweza kutimiza mambo asiyoweza kuyafikia kama angengoja hata siku iwe imesonga mbele.

Je, hakuna kazi inayotungoja—kazi ambayo hakuna mwingine awezaye kuifanya—kazi tena ambayo Bwana ameahidi kutusaidia kuitimiza? Je, atakuja na kutukuta bado tumelala? Au je, Jua la Haki, atakapotokea, atatukuta tunangoja, kama vile mchoraji yule alivyongoja, tukitazama na kutamani mng’ao wa kwanza wa siku? Hakika sisi tumngojao Bwana namna hii tutaongezewa nguvu, na, kama tai, tutapaa juu kulisalimu Jua.—Thomas Champness.

Septemba 6

Kanisa la Mungu, alilolinunua kwa damu yake mwenyewe. Matendo 20:28.

Hakika aweza kufanya apendavyo na vilivyo vyake mwenyewe. Gharama aliyoilipa ili kuwafanya kuwa wake mwenyewe ni dhamana ya kutosha ya kwamba kamwe hatalidharau jambo lolote linalohusu hali njema yao kwa vyovyote. Sisi ni wa thamani kwake kwa sababu ya damu aliyoimwaga kwa ajili yetu, na yeye kuonekana wakati wowote akipungukiwa na uangalifu kwa furaha yetu kungekuwa ni kuitendea damu yake ile kama vile wenye dhambi wa ulimwengu huu waitendeavyo. Ushawishi wa upendo wa Kristo lazima uchorwe mioyoni mwetu kwa kina hata kusiwe na kivuli chochote cha kutojali kwa upande wake kitakachotutia doa dogo lolote. Huu ndio ushindi uushindao ulimwengu.—George Bowen.

Septemba 7

Mungu wa tumaini na awajaze furaha yote na amani katika kuamini, mpate kuzidi kuwa na tumaini, kwa nguvu za Roho Mtakatifu. Warumi 15:13.

Katika mambo ya kiroho kama ilivyo katika mambo ya kidunia mna nguvu kubwa katika tumaini, na, kwa hiyo, watu wa Mungu wanapaswa kuistawisha neema hiyo kwa uangalifu. Tumaini lililojengwa imara kwamba, tukiisha kufanywa viumbe vipya katika Yesu Kristo, sisi ni wake; kwamba, majina yetu, ijapokuwa hayajulikani kwa umaarufu, yakiandikwa katika Kitabu cha Uzima, twaimiliki neema na tunatazamia mbingu; kwamba baada ya miaka michache mifupi zaidi, tukiwa safi kama malaika waimbao mbele ya kiti cha enzi, tutaletwa kwa furaha ndani ya jumba la kifalme la Mfalme, tuwe kama Kristo na pamoja na Kristo, tukimwona jicho kwa jicho na uso kwa uso—matumaini kama hayo ni chemchemi zenye nguvu za matendo.—Guthrie.

Septemba 8

Alikuomba uhai, nawe ukampa; naam, wingi wa siku hata milele na milele. Zaburi 21:4.

Maskini watuombapo mambo kwa kawaida twawajibu kama vile mwangwi uujibuvyo sauti—jibu hukata nusu ya ombi. Ni nadra kuona kati ya watu adabu ya Yaeli, ya kuwapa maziwa wale waombao maji, isipokuwa iwe kama ilivyokuwa hii, faida yenye kunasa, ili kuleta ubaya kwa urahisi zaidi. Hakuna kina Naamani wengi kati yetu, ambao, umwombapo talanta moja, watakulazimisha uchukue mbili; bali jibu la Mungu kwa maombi yetu ni kama kioo cha kukuza, kifanyacho ombi kuwa kubwa zaidi katika jibu kuliko lilivyokuwa katika sala.—Bishop Reynolds.

Septemba 9

Huu ndio mwanzo wa miujiza Yesu aliyoufanya. Yohana 2:11.

Kilikuwa ni kutoka katika kitu cha kawaida ndipo kitu cha thamani kilipoletwa; na ni kutoka katika mambo ya kawaida ya maisha ya kila siku, yaletwapo kwa utii kwa Yesu na kuwekwa miguuni pake, ndipo Yeye aletapo vipawa vyake vitukufu, hata maisha yetu yote yakawa sakramenti moja kubwa.—W. Hay Aitken.

Septemba 10

Wakati wa mchana . . . aliwaongoza kwa wingu, na usiku kucha kwa nuru ya moto. Zaburi 78:14.

Mchana wangu ni ufanisi wangu; ni wakati ambapo jua la bahati huangaza juu yangu, na, kwa hiyo, ni wakati ambapo nahitaji kivuli. Kama mwangaza wangu wa jua usingekuwa na madoa-madoa ningekusahau, Ee Mungu wangu.

Lakini ninazo nyakati za usiku za kukabili pamoja na za mchana. Usiku ni msiba wangu; ni wakati ambapo jua la bahati limekwenda chini nyuma ya vilima, nami nimeachwa peke yangu, na hapo ndipo, Ee Baba yangu, ninapohitaji nuru ya moto wako! Nuru yangu ya moto kwa usiku ni ono la Kalvari—ono la upendo wako katika Msalaba. Ninahitaji nuru ya moto wako “usiku kucha.”—George Matheson.

Septemba 11

Sasa tu wana wa Mungu; wala haijadhihirika bado tutakavyokuwa; lakini twajua ya kuwa atakapodhihirishwa, tutafanana naye, kwa maana tutamwona kama alivyo. 1 Yohana 3:2.

“Sasa tu wana wa Mungu.” Hiyo ndiyo nguzo iliyoko upande mmoja wa shimo. “Haijadhihirika bado tutakavyokuwa, lakini atakapodhihirishwa tutafanana naye.” Hiyo ndiyo nguzo iliyoko upande mwingine. Zitaunganishwaje hizo mbili? Kuna njia moja tu ambayo kwayo uana wa sasa utachanua na kuzaa matunda hata kufikia ufananao kamili ujao, nayo ni, tukivusha ng’ambo ya shimo, kwa msaada wa Mungu siku kwa siku, daraja la kuzidi kufanana naye Mwenyewe, na usafi utokanao nalo.—Alex. McLaren.

Septemba 12

Tazama, twapanda kwenda Yerusalemu. Mathayo 20:18.

Haikupata kuwako kupanda kwenda Yerusalemu kama huku ambako Yesu hapa awapendekezea wanafunzi wake. Apanda kwa hiari. Tendo hilo halikulazimishwa na shurutisho lolote la nje. Yerusalemu ingaliweza kuepukwa wakati huu. Ilitafutwa kwa makusudi. Kulikuwa ni kupanda kwenda kwenye ushindi utakaofikiwa kwa njia ya kushindwa, kutawazwa kutakakopatikana kwa njia ya aibu na fedheha.

Ee mwaminio, katika kutembea kwako ulimwenguni leo, uwe umetiwa nguvu, umefarijiwa, umetiwa moyo, kwa tukio la Kiongozi wa wokovu wako akipanda hivyo kwenda Yerusalemu! Na kumbuka, katika vifungu vyote vile vya maisha vionekanavyo kuwa vya kushuka, ambapo huzuni, na yaweza kuwa mauti, viko mbele yako, ya kwamba mishuko yote kama hiyo, ifanywayo au ivumiliwayo katika Roho ya Yesu, kwa hakika ni hatua za kupanda, zikuongozazo kwenye mlima wa Mungu na utukufu wa ufufuo.—J. B. Stratton.

Septemba 13

Hao ndio wafinyanzi, na wale waliokaa kati ya mimea na ua; huko walikaa pamoja na mfalme kwa kazi yake. 1 Nyakati 4:23.

Popote na kila mahali twaweza kukaa “pamoja na Mfalme kwa kazi yake.” Twaweza kuwa mahali pasipotarajiwa kabisa au pasipofaa kwa jambo hili; paweza kuwa katika maisha madogo ya shambani, penye machache mno ya kuonekana ya “miendo” ya Mfalme inayotuzunguka; paweza kuwa kati ya nyua za kila namna, vizuizi pande zote; paweza kuwa, tena, mikono yetu ikiwa imejaa vyombo vya udongo vya kila aina kwa kazi yetu ya kila siku. Haidhuru! Mfalme aliyetuweka “huko” atakuja na kukaa huko pamoja nasi; nyua ni sawasawa, la sivyo angeziondoa mara; wala haifuati ya kwamba kile kionekanacho kuzuia njia yetu kisiwe kwa ajili ya ulinzi wake wenyewe; na kwa habari ya vyombo vya udongo, basi, hivi ndivyo hasa alivyoona vyema kuvitia mikononi mwetu, na kwa hiyo ni, kwa sasa, “kazi yake.”—Frances Ridley Havergal.

Septemba 14

Nitakuelekeza, na kukufundisha katika njia utakayoiendea; nitakuongoza kwa jicho langu. Zaburi 32:8.

Mungu afanyapo uelekezaji, maisha yetu ni yenye manufaa na yaliyojaa ahadi, yafanyapo lolote; na nidhamu ina kazi yake ya kukamilisha.—H. E. Cobb.

Septemba 15

Mwana wa Adamu hakuja kutumikiwa, bali kutumika, na kutoa nafsi yake iwe fidia ya wengi. Mathayo 20:28.

Twapaswa kujisalimisha wenyewe kwa Kristo kiasi kwamba kusudi hili kuu la kuja kwake litadai na kumiliki maisha yote. Twapaswa kuishi, kama Mungu, ili kuwabariki wengine. Haya ndiyo mapenzi yake, kusudi lake juu yetu. Hiki ndicho nguvu zake zisubiricho kutufanyia. Na hili, tena, ni dai la upendo wake mkuu juu yetu.

Usiugulie kwa kukubali dhaifu ukweli wake, kisha upite kando kwa uzembe upande wa pili. Usilifikirie na kuliombea bila hata tumaini dogo lipitalo kwamba maombi yatajibiwa. Usijikusanye katika maazimio makuu ya kuwa mwema na wa manufaa. Piga magoti mbele ya yule Aliyesulubiwa. Katika msalaba wa Kristo, litambue kusudi lake kuu na upendo wake wa shauku kwa wanadamu. Uache moyo uhisi nguvu zote za mwaliko utujiao kutoka katika mikono na miguu ile iliyoraruliwa na paji la uso litokalo damu, kutoka katika aibu yote ya kutisha na maumivu ya Bwana wetu mpendwa. Na, ukiwa umenunuliwa na kufungwa kwa haya yote, jisalimishe kwake kwa ajili ya kusudi lake kuu. Mtwae yeye kuwa nguvu yako kwa kazi hii ya maisha.—Mark Guy Pearse.

Septemba 16

Yesu . . . alizunguka huko na huko akitenda mema. Matendo 10:38.

Sanaa iliyo bora kuliko sanaa zote nzuri ni sanaa ya kutenda mema; na hata hivyo ndiyo iliyostawishwa kidogo kuliko zote.—T. DeWitt Talmage.

Septemba 17

Malaika wa Bwana akamwambia [Hagari], Mrudie bibi yako, ukajinyenyekeze chini ya mikono yake. Mwanzo 16:9.

Unyenyekevu ni sheria kuu ya Kikristo, lakini twauona mapema katika Mwanzo, mapema katika historia ya wanadamu, nao waletwa na malaika.—Selected.

Septemba 18

Ndipo Sulemani akanena . . . Hakika nimekujengea nyumba ya kukaa ndani yake. 1 Wafalme 8:12, 13.

Sulemani, mkuu wa amani, peke yake ndiye aliyeweza kulijenga hekalu. Kama tungependa kuwa wavuvi wa nafsi na kulijenga kanisa, ambalo ni hekalu la Mungu, na tuangalie jambo hili; si kwa mjadala wala kwa hoja, bali kwa kumwinua Kristo ndipo tutakapowavuta watu kwake.—J. Hudson Taylor.

Septemba 19

Nimekuchagua katika tanuru ya mateso. Isaya 48:10.

Je, neno hilo haliji kama manyunyu laini, likituliza ukali wa mwali wa moto? Naam, je, silo silaha ya asbesto, ambayo joto halina nguvu juu yake? Mateso na yaje—Mungu amenichagua. Umaskini, waweza kuingia kwa hatua mlangoni pangu—lakini Mungu yumo nyumbani tayari, naye amenichagua. Ugonjwa, waweza kujiingiza, lakini nina zeri tayari—Mungu amenichagua. Lolote linipatalo katika bonde hili la machozi najua ya kuwa “amenichagua” mimi. Usiogope, Mkristo; Yesu yu pamoja nawe. Katika majaribu yako yote ya moto uwepo wake ni faraja yako na usalama wako pia. Kamwe hatamwacha yeye aliyemchagua kuwa wake mwenyewe. “Usiogope, kwa maana mimi ni pamoja nawe,” ndilo neno lake la ahadi la hakika kwa wateule wake katika “tanuru ya mateso.”—Spurgeon.

Septemba 20

Vitu vilivyo duni vya dunia na vitu vinavyodharauliwa ndivyo alivyovichagua Mungu. 1 Wakorintho 1:28.

Katika baadhi ya kumbi kuu za Ulaya yaweza kuonekana michoro isiyochorwa kwa brashi, bali musaiki, iliyofanyizwa kwa vipande vidogo vya jiwe, kioo, au vitu vingine. Msanii huvitwaa vipande hivi vidogo, na, kwa kuvisugua na kuvipanga, huviunda kuwa mchoro mkuu na mzuri. Kila sehemu moja moja ya mchoro yaweza kuwa kipande kidogo kisicho na thamani cha kioo au marmar au kombe; lakini, kila kimoja kikiwa mahali pake, jumla yake huunda kito cha sanaa.

Ndivyo nadhani itakavyokuwa kwa wanadamu mikononi mwa Msanii mkuu. Mungu anaokota vipande vidogo visivyo na thamani vya jiwe na shaba ambavyo vingeweza kukanyagwa chini ya miguu bila kuonekana, naye anavifanya kuwa kito chake kikuu.—Bishop Simpson.

Septemba 21

Mtumikieni Bwana kwa furaha; njoni mbele zake kwa kuimba. Zaburi 100:2.

Mungu ataka maisha yetu yawe wimbo. Ametuandikia muziki katika Neno lake na katika wajibu utujiao katika nafasi zetu na mahusiano yetu maishani. Mambo tunayopaswa kufanya ni noti zilizowekwa katika mstari wa muziki. Ili kuyafanya maisha yetu kuwa muziki mzuri lazima tuwe watiifu na wanyenyekevu. Kutotii kwo kwote ni kuimba noti isiyo sahihi, nako huleta mvurugano.—J. R. Miller.

Septemba 22

Nawe usalipo, ingia katika chumba chako cha ndani, na ukiisha kufunga mlango wako, umwombe Baba yako aliye sirini. Mathayo 6:6.

Hapa ndipo ngome ya imani; hapa hujivika silaha kwa ajili ya vita vya kila siku. Ukimya katika chumba kile cha maombi hutabiri mauti katika nyumba yote. Mlango ule uachwapo utie kutu katika bawaba zake, na chumba kile kikaachwa ukiwa, ndipo nyumba ya moyo hurudishwa mara na Shetani, na pepo wabaya huingia na kukaa humo.—Theodore Cuyler.

Septemba 23

Muwe watakatifu; kwa kuwa mimi ni mtakatifu. 1 Petro 1:16.

Njia kuu ya utakatifu hupita kando ya barabara ya kawaida kabisa ya maisha—kando ya njia yako hasa. Katika upepo na mvua, hata ivumavyo namna gani—ni kwenda tu mkono kwa mkono pamoja naye.—Mark Guy Pearse.

Septemba 24

Bwana akasema, Je! Nimfiche Ibrahimu neno hili ninalolifanya? Mwanzo 18:17.

Ibrahimu, katika ushirika na Mungu, alijua kabla sana ya Lutu, aliyekuwa Sodoma, habari za uangamivu wa mji ule. Laiti tungekuwa na ushirika zaidi!—Selected.

Septemba 25

Uzima nilio nao sasa katika mwili. Wagalatia 2:20.

Natazamia kupita katika ulimwengu huu mara moja tu—kwa hiyo, kama kuna wema wowote niwezao kuonyesha au jambo lolote jema niwezalo kumtendea binadamu mwenzangu yeyote, na nilitende sasa; nisiliahirishe wala nisilipuuze, kwa maana sitapita njia hii tena.—Marcus Aurelius.

Septemba 26

Basi utufundishe kuzihesabu siku zetu, tupate kuelekeza mioyo yetu kwenye hekima. Zaburi 90:12.

Kila siku ni uhai mdogo; na maisha yetu yote ni siku moja tu iliyorudiwarudiwa: ndiyo maana Yakobo mzee huyahesabu maisha yake kwa siku; na Musa hutamani kufundishwa jambo hili la hesabu takatifu—kuihesabu siyo miaka yake, bali siku zake. Kwa hiyo, wale wathubutuo kupoteza siku, ni wabadhirifu wa hatari; wale wathubutuo kuitumia vibaya, wamekata tamaa.—Bishop Hall.

Septemba 27

Kristo ndani yenu, tumaini la utukufu. Wakolosai 1:27.

Dini si ngazi rahisi ya kuponyokea moto uijengayo kwa kutazamia hatari iwezayo kutokea, upande wa nje wa maskani yako, na kuiacha pale hata hatari ifikapo. Waiendea asubuhi fulani moto uzukapo nyumbani mwako, na kile kitu duni cha zamani ulichokijenga pale juu, na kudhani ya kuwa ungeweza kukitumia siku moja, kimeshikwa kutu na kuvunjika, na hali ya hewa imekipiga sana na jua limezizungusha bawaba zake, hata hakitafanya kazi. Hiyo ndiyo hali ya mtu aliyejijengea kile kionekanacho kuwa imani ya dini, tumaini kwa Mungu kwa kutazamia siku ambapo hatari itamfikia, naye amejiambia, Mimi ni salama, kwa maana nitajikimbiza humo wakati huo. Bali dini ni nyumba tuishimo, ni meza tuketimo, ni moto wa jikoni tusongeao karibu, ni chumba kitandazacho uwepo wake wa neema na wa kuzoeleka juu yetu; ni kitanda tulalapo juu yake na kufikiri juu ya yaliyopita, na kutazamia yajayo, na kukusanya burudisho letu.—Phillips Brooks.

Septemba 28

Ingojeni ahadi ya Baba. Matendo 1:4.

Kaa kwenye ahadi hata Mungu akutane nawe hapo. Yeye hurudi siku zote kwa njia ya ahadi zake.—Selected.

Septemba 29

Huu ndio ushindi uushindao ulimwengu, naam, imani yetu. 1 Yohana 5:4.

Ulimwengu hunishinda unapofanikiwa kunizuia nisimwone, nisimpende, nisiwe na ushirika naye, na nisimtumikie Baba yangu, Mungu. Nami huushinda niwekapo mkono wangu juu yake na kuulazimisha unisaidie kumkaribia zaidi, kuzidi kufanana naye, kumfikiri mara nyingi zaidi, kuyatenda mapenzi yake kwa furaha zaidi na kwa kudumu zaidi. Ushindi ule mmoja juu ya ulimwengu ni kuupinda unitumikie katika mambo yaliyo makuu—kupata ono lililo wazi zaidi la asili ya Uungu, kupata upendo ulio wa kina zaidi kwa Mungu Mwenyewe, na kujiweka wakfu na kutumika kwake kwa furaha zaidi. Huo ndio ushindi—uwezapo kuufanya ulimwengu kuwa ngazi ya kukupandisha kwa Mungu. Ulimwengu ujapo kati yako na Mungu kama pazia lifunikalo, umekushinda. Ulimwengu ujapo kati yako na Mungu kama kioo kipenyezacho nuru, wewe umeushinda. Kupata ushindi ni kuuweka chini ya miguu yako na kusimama juu yake, na kwa njia hiyo kufikia juu kwa Mungu.—Alex. McLaren.

Septemba 30

Atawaagiza malaika zake kwa ajili yako, wakulinde katika njia zako zote. Zaburi 91:11.

Usidhani wajibu wowote kuwa mdogo mno, wala mzunguko wowote wa maisha kuwa mdogo mno, wala kazi yoyote kuwa duni mno, kama ikija katika njia yako, kwa kuwa Mungu huihesabu kuwa ya maana hata kuwatuma malaika zake wakulinde ndani yake.—Mark Guy Pearse.