Februari

Februari 1

Dumuni katika kusali. Wakolosai 4:2.

Je, huhitaji chochote? Basi naogopa kwamba hujui umaskini wako. Je, huna rehema ya kumwomba Mungu? Basi rehema ya Bwana na ikuonyeshe taabu yako. Nafsi isiyo na maombi ni nafsi isiyo na Kristo. Maombi ni kigugumizi cha mtoto mchanga aaminiye, kilio cha mwamini apiganaye, wimbo wa mwisho wa mtakatifu afaye alalapo usingizi katika Yesu.—Spurgeon.

Februari 2

Ambaye katika yeye jengo lote linaungwa vema pamoja na kukua hata liwe hekalu takatifu katika Bwana. Waefeso 2:21.

Hema la uzima ni jengo la ajabu; kuna nafasi kwa wafanyakazi wa kila aina katika kuinua kuta zake za siri na tukufu. Kama hatuwezi kufanya kazi iliyo kuu zaidi, twaweza kufanya iliyo ndogo zaidi. Mbingu yetu itatokana na kutambua ukweli kwamba lilikuwa ni hema la Mungu tulilokuwa tukilijenga, na kwamba tulikuwa tukifanya kazi chini ya baraka ya Mungu.—Joseph Parker.

Februari 3

Msiipende dunia. 1 Yohana 2:15.

Usiipende, na hata hivyo ipende. Ipende kwa upendo wa Yeye aliyemtoa Mwanawe afe kwa ajili yake. Ipende kwa upendo wa Yeye aliyeimwaga damu yake kwa ajili yake. Ipende kwa upendo wa malaika, wafurahiao kwa kuongoka kwake. Ipende ili kuitendea mema, ukitoa machozi yako kwa mateso yake, huruma yako kwa huzuni zake, mali yako kwa mahitaji yake, maombi yako kwa taabu zake, na kwa mashamba yake ya hisani, na ufadhili, na utauwa wa Kikristo, nguvu zako na saa zako za kazi. Huwezi kuishi bila kuiathiri, au kuathiriwa nayo. Utaifanya dunia kuwa bora, ama itakufanya wewe kuwa mbaya zaidi.

Mungu akusaidie kwa neema yake na Roho Mtakatifu ili uishi katika dunia hali ukiishi juu yake, na kutazama mbali zaidi yake; na kuipenda hivyo hata utakapoiacha, uiache ikiwa bora kuliko ulivyoikuta.—Guthrie.

Februari 4

Waufumbua mkono wako, wakishibisha haja ya kila kilicho hai. Zaburi 145:16.

Haja, ni neno zuri sana! Lingekuwa jambo kubwa kama angeshibisha hitaji, uhitaji; lakini Yeye huenda mbali zaidi ya hilo. Huruma huchochewa kukidhi hitaji letu; wajibu wakati mwingine waweza kuangalia mahitaji yetu; lakini kushibisha haja huonyesha uangalizi wa upole, ujuzi mtamu na wa neema juu yetu, shauku ya kubariki. Mungu hatosheki kamwe hata awe ameshibisha haja zetu.—Mark Guy Pearse.

Februari 5

Enyi watumishi wa Bwana, ninyi msimamao usiku katika nyumba ya Bwana. . . . Bwana aliyezifanya mbingu na nchi akubariki toka Sayuni. Zaburi 134:1, 3.

Kama ningetaka kujua upendo wa rafiki yangu, sharti nione uwezavyo kutenda wakati wa baridi. Vivyo hivyo na upendo wa Mungu. Ni rahisi sana kwangu kuabudu katika jua la kiangazi, wakati nyimbo za uzima zimo hewani na matunda ya uzima yamo mtini. Lakini wimbo wa ndege ukikoma, na tunda la mti likianguka; je, moyo wangu utaendelea kuimba? Je, nitasimama katika nyumba ya Mungu usiku? Je, nitampenda katika usiku wake mwenyewe? Je, nitakesha pamoja naye hata saa moja katika Gethsemane yake? Je, nitasaidia kuubeba msalaba wake juu ya Via Dolorosa? Upendo wangu umemjia katika kudhiliwa kwake. Imani yangu imemkuta katika unyonge wake. Moyo wangu umeutambua ukuu wake kupitia mavazi yake duni ya kujificha, nami hatimaye najua kwamba sitamani kipawa, bali Mtoaji. Nikiweza kusimama katika nyumba yake usiku, nimemkubali kwa ajili yake mwenyewe peke yake.—George Matheson.

Februari 6

Yeye asemaye ya kuwa anakaa ndani yake, imempasa yeye mwenyewe kuenenda vile vile kama yeye alivyoenenda. 1 Yohana 2:6.

Mahubiri ambayo dunia hii yaihitaji zaidi ni mahubiri yenye viatu yanayotembea pamoja na Yesu Kristo.—Selected.

Februari 7

Ndipo tutakapojua, tukiendelea kumjua Bwana. Hosea 6:3.

Bwana ametuleta katika njia ya kumjua yeye, na kutuamuru tuifuate njia hiyo katika mizunguko yake yote ya ajabu hata itakapofunguka kwenye uwanda ambako kiti cha enzi cha Mungu kipo. Maisha yetu ni kuendelea kumjua Bwana. Twastaajabia baadhi ya mambo tunayoitwa kupitia, lakini baadaye twaona kuwa yalitupatia ujuzi mpya juu ya Bwana wetu. . . . Hatuna budi kungoja fursa iliyo angavu zaidi; bali kwa kutumia vema wakati uliopo twapaswa kujijengea daraja la kuvukia hata wakati ule ujao.—G Bowen.

Februari 8

Toka wewe katika nchi yako, na katika jamaa zako, na katika nyumba ya baba yako. Mwanzo 12:1. Ibrahimu . . . akakusanywa pamoja na watu wake. Mwanzo 25:8.

Baada ya ushirika wote twakaa kama juu ya visiwa, vilivyotawanyika juu ya funga kubwa ya visiwa, kila mmoja juu ya mwamba wake mdogo na bahari ikitupiga kati yetu; lakini wakati waja ambapo, kama mioyo yetu imeelekezwa kwa Bwana yule mkuu ambaye uwepo wake watufanya kuwa mmoja, hakutakuwa na bahari tena na miamba yote iliyotengwa itakuwa sehemu za bara moja kubwa . . . Kama tukikuza hisia ile ya kujitenga na wakati uliopo na ya kuwa na jamaa zetu za kweli katika yasiyoonekana, kama tukikaa hapa kama wageni kwa sababu uraia wetu u mbinguni, ndipo mauti hayatatukokota mbali na wenzetu wala kutuwinda hata nchi ya upweke, bali yatatuleta mahali ambako vifungo vya karibu zaidi vitaunganisha “jamii tamu” pamoja, na kondoo watalala karibu mmoja na mwenzake kwa sababu wote wamekusanyika kumzunguka Mchungaji mmoja. Ndipo vifungo vingi vitafumwa upya, na msafiri mpweke atakutana tena na wapendwa ambao “aliwapenda tangu zamani na kuwakosa kwa kitambo.”—Alex. McLaren.

Februari 9

Kwa hiyo Bwana atangoja, ili apate kuwafadhili ninyi. Isaya 30:18.

Hii ndiyo njia ya Mungu. Katika saa za giza kuu za usiku hatua zake hukaribia juu ya mawimbi. Siku ya kunyongwa ipambazukapo, malaika humjia Petro gerezani. Kitanzi cha Mordekai kikikamilika, kukosa usingizi kwa mfalme kwaleta mabadiliko kwa faida ya taifa lililotishwa.

Ah, nafsi, huenda mambo yamekufikia hali mbaya kabisa kabla hujaokolewa; lakini utaokolewa! Mungu aweza kukuweka ukingoja, lakini atakumbuka daima agano lake, naye atatokea kulitimiza neno lake lisiloweza kutanguka.—F. B. Meyer.

Februari 10

Kwa maana analipenda taifa letu, naye ndiye aliyetujengea sinagogi. Luka 7:5.

Marumaru na jiwe gumu ni makumbusho yaharibikayo, na maandishi yake huenda yakasomwa mara chache. Chora majina yako juu ya mioyo ya wanadamu; hiyo peke yake ndiyo isiyokufa!—Theodore Cuyler.

Februari 11

Wote niwapendao mimi . . . nawarudi. Ufunuo 3:19.

Wakati mmoja niliona kivuli cheusi kikikaa juu ya ubavu tupu wa kilima. Nilipoutafuta chanzo chake, niliona wingu dogo, angavu kama nuru, likielea katika buluu iliyo safi juu. Ndivyo ilivyo huzuni yetu. Yaweza kuwa yenye giza na isiyofurahisha hapa duniani; lakini tazama juu nawe utaiona kuwa si kitu ila kivuli cha mng’ao wake ambaye jina lake ni Upendo.—Dean Alford.

Februari 12

Mawe haya yana maana gani? Yoshua 4:21. Ninyi nanyi kama mawe yaliyo hai. 1 Petro 2:5. (R. V.)

Yapasa kuwe na kitu cha ajabu sana, cha pekee sana katika maisha na mazungumzo ya Mkristo hata watu walazimike kuuliza, “Hii ina maana gani?”. . . . Je, kuna kitu chochote katika tabia yako, maneno yako, na desturi za maisha yako kilicho tofauti sana na dunia inayokuzunguka hata watu walazimishwe bila kukusudia kujiuliza wenyewe au kuwauliza wengine, “Hii ina maana gani?” Si kwamba kuwe na upekee wa kulazimishwa, upekee kwa ajili ya kuwa wa pekee tu; hilo lingekuwa ni kuiga tu mafarisayo ya siku za kale. . . . Laiti tungetambua kwamba huu ndio makusudi ambayo kwayo Mungu hutupeleka ulimwenguni, kama alivyomtuma Mwanawe pekee!—S. A. Blackwood.

Februari 13

Wote . . . wakauona uso wake kama uso wa malaika. Matendo 6:15.

Uso hutengenezwa kila siku kwa maombi yake ya asubuhi, na kwa mtazamo wake wa asubuhi kutoka madirishani yanayofunguka kuelekea mbinguni.—Joseph Parker.

Februari 14

Kwa amri ya Bwana walikaa hemani, na kwa amri ya Bwana walisafiri. Hesabu 9:23.

Hii ndiyo siri ya amani na kuinuliwa kwa utulivu. Kama Mwisraeli, jangwani, angejiwazia moyoni kufanya harakati fulani bila kumtegemea Yehova; kama angejitwalia kusonga wakati umati ulipopumzika, au kusimama wakati umati ulipokuwa ukisonga, twaweza kwa urahisi kuona matokeo yangekuwaje. Na ndivyo itakavyokuwa kwetu daima. Kama tukisonga wakati tunapopaswa kupumzika, au kupumzika wakati tunapopaswa kusonga, hatutakuwa na uwepo wa Mungu pamoja nasi.—C. H. M.

Februari 15

Ambaye katika yeye ninyi nanyi, mlipokwisha kuamini, mlitiwa muhuri kwa Roho yule wa ahadi aliye Mtakatifu. Waefeso 1:13.

Bwana huweka muhuri juu ya walio wake, ili kila mtu apate kuwatambua. Kutiwa muhuri kwako ni Roho azaaye ndani yako mfano wa Bwana. Kadiri unavyozidi kuwa mtakatifu, ndivyo muhuri unavyozidi kuwa dhahiri na wazi, kuwa wa kuonekana zaidi kwa kila apitaye, kwa kuwa ndipo watu watakapotambua ya kuwa umekuwa pamoja na Yesu.—Andrew Bonar.

Februari 16

Usijisifu kwa ajili ya kesho. Mithali 27:1.

Maandalizi pekee kwa ajili ya kesho ni kutumia vema leo. Jiwe lililo mikononi mwa mjenzi sharti liwekwe mahali pake na kupatanishwa ili kupokea jingine. Kesho huja bure, kama leo haikuzingatiwa. Usidharau wito ukujiao siku hii, kwa maana kudharau namna hiyo si kitu kingine ila kujisifu kwa ajili ya kesho.—G. Bowen.

Februari 17

Nitakusaidia, asema Bwana. Isaya 41:14.

Ee nafsi yangu, je, hii haitoshi? Je, wahitaji nguvu zaidi ya uweza wote wa Utatu ulioungana? Je, wataka hekima zaidi ya iliyomo kwa Baba, upendo zaidi ya ujidhihirishao katika Mwana, au uwezo zaidi ya udhihirikao katika kazi za Roho? Lete hapa gudulia lako tupu! Hakika kisima hiki kitalijaza. Fanya haraka, kusanya mahitaji yako, uyalete hapa—utupu wako, taabu zako, mahitaji yako. Tazama, mto huu wa Mungu umejaa kwa riziki yako; ni nini uwezacho kutamani zaidi? Toka, nafsi yangu, katika nguvu hii yako. Mungu wa milele ndiye msaidizi wako!—Spurgeon.

Februari 18

Kila mtu na kazi yake. Marko 13:34.

Yeye humtendea zaidi ulimwengu mkuu wa Mungu ambaye hutenda vyema zaidi katika ulimwengu wake mdogo mwenyewe.—Selected.

Februari 19

Leteni baadhi ya samaki mliowavua sasa. Yohana 21:10.

Kwa nini hivi? Oh, Bwana ataka tumhudumie yeye kama vile tupokeavyo kutoka kwake, na huduma yetu hupata mwisho wake wa kweli inapokuwa chakula kwa Bwana wetu mpendwa. Alipendezwa kula samaki wao huku wao wakila wa kwake. Ilikuwa ni karamu maradufu ambayo huisema katika ujumbe mpole wa ufunuo, “Nitakula pamoja naye, na yeye pamoja nami.”—A. B. Simpson.

Februari 20

Kwa imani Ibrahimu alipoitwa aliitika kutoka kwenda mahali ambapo baadaye angepapokea kuwa urithi. Waebrania 11:8.

Alikokwenda, hakujua; ilimtosha kujua kwamba alikwenda pamoja na Mungu. Hakutegemea sana ahadi kama alivyomtegemea Mwenye kuahidi. Hakuangalia matatizo ya fungu lake, bali alimwangalia Mfalme, wa milele, asiyekufa, asiyeonekana, Mungu aliye peke yake mwenye hekima, aliyekubali kuiweka njia yake, naye kwa hakika angejithibitisha mwenyewe. Ee imani tukufu! Hii ndiyo kazi yako, haya ndiyo yaliyowezekana kwako: kutosheka kusafiri kwa amri zilizotiwa muhuri, kwa sababu ya kuamini kusikoyumbayumba katika upendo na hekima ya Amiri Jeshi Mkuu wa Bahari, Bwana: kuwa tayari kuinuka, kuacha vyote, na kumfuata Kristo, kwa sababu ya uhakika wa furaha kwamba yaliyo bora ya nchi hayawezi kulinganishwa na yaliyo madogo ya mbinguni.—F. B. Meyer.

Februari 21

Bwana ni Mungu wa maarifa, na kwake yeye matendo hupimwa. 1 Samweli 2:3.

Mungu hapimi kile tumletacho kwake. Yeye hukipima uzito.—Mark Guy Pearse.

Februari 22

Baada ya kutiwa nuru mlistahimili mashindano makuu ya mateso. Waebrania 10:32.

Ujasiri wetu kwa ajili ya Mungu mbele ya ulimwengu sharti daima uwe tokeo la kushughulika kwetu binafsi na Mungu kwa siri. Ushindi wetu juu ya nafsi, na dhambi, na ulimwengu, sikuzote hupiganwa kwanza mahali ambapo hakuna jicho lionalo ila la Mungu. . . . Kama hatuna mapigano haya ya siri, huenda vyema tusiwe na yale ya wazi. Kutokuwepo kwa mapigano kwa nje hufichua usingizi wa ndani wa nafsi.—F. Whitfield.

Februari 23

Filipo akamkuta Nathanaeli, akamwambia, Tumemwona yeye ambaye Musa katika torati na manabii waliandika habari zake. . . . Njoo utazame. Yohana 1:45, 46.

Jambo lifuatalo baada ya kujua kwamba “tumemwona yeye” ni kumpata mtu mwingine, na kusema, “Njoo utazame.”—Frances Ridley Havergal.

Februari 24

Upepo huvuma upendako, nawe waisikia sauti yake, lakini huwezi kujua utokako wala uendako; kadhalika na kila mtu aliyezaliwa kwa Roho. Yohana 3:8.

Twajua kwamba upepo hupenda kuvuma pale palipo na ombwe tupu. Ukikuta mvumo mkubwa wa upepo, wajua ya kuwa mahali fulani pana nafasi tupu. Nina hakika kabisa juu ya jambo hili: kama tungeweza kufukuza kiburi chote, ubatili, kujihesabia haki, kujitafutia nafsi, tamaa ya kusifiwa, heshima, na kupandishwa cheo—kama kwa uwezo fulani wa Mungu tungeweza kufanywa tupu kabisa na hayo yote, Roho angekuja kama upepo wa nguvu ukivuma ili kutujaza.—A. J. Gordon.

Februari 25

Upole wako umenifanya kuwa mkuu. 2 Samweli 22:36.

Upole wa Kristo ni pambo lililo zuri zaidi ambalo Mkristo aweza kuvaa.—William Arnot.

Februari 26

Yakobo akaenda zake, na malaika wa Mungu wakakutana naye. Mwanzo 32:1.

Ni katika njia ambayo Mungu ametuamuru tuiendee ndipo tutakapowakuta malaika wakituzunguka. Kweli twaweza kukutana nao katika njia tuzichaguazo sisi wenyewe, lakini itakuwa ni aina ya malaika yule aliyekutana na Balaamu, mwenye upanga mkononi mwake, hodari na mzuri, lakini mwenye ghadhabu pia; na afadhali tusimkabili! Bali wasaidizi wema, wajumbe wa upendo wa Mungu, mitume wa neema yake, hawazuruzuru njia tuzitengenezazo sisi wenyewe.—Alex. McLaren.

Februari 27

Mimi ndimi njia, na kweli, na uzima; mtu haji kwa Baba, ila kwa njia ya mimi. Yohana 14:6.

Mara nyingi mbingu huonekana kuwa mbali na isiyojulikana, lakini kama Yeye aliyeitengeneza njia ya kwenda huko ndiye kiongozi wetu, hatuna haja ya kuogopa kuipoteza njia. Hatutaki kuona mbali sana mbele—ila kadiri ya kutosha kumtambua yeye na kufuata nyayo zake. . . . Wao wamfuatao Kristo, hata katika giza, kwa hakika watamfikia Baba.—Henry Van Dyke.

Februari 28

Nikiyasahau yaliyo nyuma . . . nakaza mwendo, niifikilie mede kwa ajili ya thawabu ya mwito mkuu wa Mungu katika Kristo Yesu. Wafilipi 3:13, 14.

Si kwa kujuta yale yasiyoweza kurekebishwa ndipo kazi ya kweli hufanyika, bali kwa kutumia vizuri tulivyo. Si kwa kunung’unika kwamba hatuna vifaa vifaavyo, bali kwa kutumia vema vifaa tulivyo navyo. Tulivyo, na tulipo, ni mpango wa maongozi ya Mungu—ni tendo la Mungu, ijapokuwa laweza kuwa ni kosa la mwanadamu. Maisha ni mfululizo wa makosa, wala si Mkristo aliye bora zaidi yule afanyaye hatua chache za makosa. Aliye bora ni yule ashindaye ushindi ulio mtukufu zaidi kwa kurekebisha makosa.—F. W. Robertson.