Januari

Januari 1

Njoo asubuhi . . . ukajihudhurishe . . . kwangu juu ya kilele cha mlima. Kut. 34:2.

Baba yangu, ninakuja. Hakuna kitu katika tambarare ya chini kitakachonizuia nisifike kwenye vilele vitakatifu. Nisaidie kupanda kwa haraka, nawe uukinge mguu wangu, usije ukajikwaa juu ya mwamba mgumu! Kwa mwito wako naja, basi hutaudhihaki moyo wangu. Ulete pamoja nawe asali kutoka mbinguni, naam, maziwa na divai, na mafuta kwa faida ya nafsi yangu, nalo lisimamishe jua katika mwendo wake, la sivyo muda utakuwa mfupi mno wa kuutazama uso wako, na kuisikia sauti yako laini.

Asubuhi mlimani! Itanifanya kuwa na nguvu na furaha muda wote uliobaki wa siku iliyoanza vyema hivyo.—Joseph Parker.

Januari 2

Ujira wangu u pamoja nami. Ufu. 22:12.

Tutalipwa ujira, si kwa kazi tuliyoifanya tu, bali pia kwa mizigo tuliyoichukua, nami sina shaka kwamba ujira ulio bora zaidi utakuwa kwa wale walioichukua mizigo bila kulalamika. Siku ile atalitwaa yungiyungi, lililokua muda mrefu kati ya miiba, na kuliinua liwe utukufu na ajabu ya ulimwengu wote; na harufu nzuri ya yungiyungi hilo itavuta sifa zisizoelezeka kutoka kwa majeshi yote ya mbinguni.—Andrew Bonar.

Januari 3

Uko wapi? Mwa. 3:9.

Je, unajificha mbali naye yeye ambaye angependa kukutuma ukaifanye kazi yake mwenyewe iliyobarikiwa kwa njia yake mwenyewe? Ee, na nikuambie asubuhi hii, “Bwana anakuhitaji.” Yaweza kuonekana ni jambo dogo tu alilo nalo kwako ufanye, lakini ni jambo la maana. Yeye ana “haja nawe.” Usimgeuzie kisogo; usijitoe nje ya kuweza kutumiwa naye; usianze kwa kujiwekea sheria mwenyewe juu ya utakalofanya na usilofanya; bali paza sauti toka vilindi vya moyo wako, “Mimi hapa, nitume,”—W. Hay Aitken.

Januari 4

Mateso ya mwenye haki ni mengi, bali Bwana humponya nayo yote. Zab. 34:19.

Mateso yote ya mwenye haki hufunguka na kuwa kitu chenye utukufu. Mfungwa haokolewi tu, bali humkuta malaika akimngoja mlangoni. Na kila wokovu huja na baraka yake mahususi. Malaika mmoja aitwaye imani; mwingine, upendo; mwingine, furaha; mwingine, uvumilivu; mwingine, upole; mwingine, wema; mwingine, unyenyekevu; mwingine, kiasi; mwingine, amani. Kila mmoja wa neema hizi husema, “Tumetoka katika dhiki kuu.”—G. Bowen.

Januari 5

Bwana ni . . . wimbo wangu. Zab. 118:14.

Na tumfikirie Mungu mwenyewe akiwa wimbo wetu. Huku ndiko kutimia na ukamilifu wa kumjua Mungu: kumjua hata yeye mwenyewe awe furaha yetu; kumjua hata sifa iwe tamu zaidi, na tele zaidi, na mpya zaidi, na yenye shangwe zaidi, tumwimbiapo. Yeye aliyejifunza siri hii iliyobarikiwa hubeba ufunguo wa dhahabu wa mbinguni—la, ameishusha mbingu hata duniani, wala hana haja ya kuwaonea wivu malaika sasa.—Mark Guy Pearse.

Januari 6

Msiogope, simameni tu, mkauone wokovu wa Bwana. Kut. 14:13.

Mara nyingi Mungu huonekana kuwaweka watoto wake katika hali za shida kubwa mno—akiwaingiza katika msukosuko usio na njia ya kutokea; akitengeneza hali ambayo hekima ya mwanadamu isingeiruhusu, kama ingaliulizwa mapema. Wingu lenyewe ndilo liwaongozalo huko. Yamkini wewe umo katika hali kama hiyo saa hii hasa. Kweli inaonekana yenye kutatanisha na nzito kupita kiasi; lakini ni sawa kabisa. Mwisho wake utamthibitisha kwa wingi zaidi yeye aliyekuleta hapa. Ni jukwaa la kuudhihirisha uweza na neema yake iliyo kuu. Hatakuokoa tu, bali katika kufanya hivyo atakupa fundisho usilolisahau kamwe; ambalo, katika zaburi na wimbo mwingi siku zijazo, utalirejea. Hutaweza kamwe kumshukuru Mungu ipasavyo kwa kuwa amefanya kama alivyofanya.—F. B. Meyer.

Januari 7

Sasa ninyi ni nuru katika Bwana; enendeni kama watoto wa nuru. Efe. 5:8.

Uvutano tuutoao ulimwenguni huumbwa na uhusiano wetu na Yesu Kristo; na uhusiano wetu na Yesu Kristo hufunuliwa na uvutano wetu.—Selected.

Januari 8

Basi angalieni sana nafsi zenu. Yos. 23:11. ( Pambizoni. )

Dhahabu haiwezi kutumika kama sarafu maadamu imechanganyika na jiwe na mwamba ambamo imezikwa. Vivyo hivyo nafsi yako haimfai Mungu hata itwaliwe kutoka katika dhambi na mambo ya kidunia na ubinafsi, ambamo imezikwa. Kwa nguvu ya Roho izaayo upya lazima utengwe kwa ajili ya Kristo, ukatiwe muhuri wa sura yake na maandiko yake, na kufanywa kuwa sarafu ya Mungu, itakayochukua mfano wake kati ya wanadamu. Mkristo ni, kwa kusema hivyo, chombo cha Kristo kinachozunguka, sarafu ya ufalme ambaye kwa yeye miamala mikuu ya rehema na neema kwa ulimwengu uliopotea hutekelezwa. Kama vile sarafu inavyowakilisha dhahabu, ndivyo Mkristo asimamavyo badala ya Kristo, akiwakilisha mapenzi yake mema yanayokubalika.—A. J. Gordon.

Januari 9

Aliye mwaminifu katika lililo dogo sana, huwa mwaminifu katika lililo kubwa pia. Lk. 16:10.

Tendo dogo kabisa la maisha laweza kutendwa kwa nia iliyo tukufu kama vile lile lililo kubwa na bora kabisa. Uaminifu hupima matendo kama Mungu ayapimavyo. Dhamiri ya kweli hushughulika na wajibu wetu kama Mungu ashughulikavyo. Wajibu ni wajibu, dhamiri ni dhamiri, haki ni haki, na kosa ni kosa, hata yachapishwe kwa herufi za ukubwa gani. “Kubwa” na “dogo” si maneno ya msamiati wa dhamiri. Yajua maneno mawili tu—haki na kosa.—Alex. McLaren.

Januari 10

Mungu wangu atawajazeni mahitaji yenu yote kwa kadiri ya utajiri wake katika utukufu, ndani ya Kristo Yesu. Flp. 4:19.

Chanzo cha namna gani—“Mungu”! Kipimo cha namna gani—“utajiri wake katika utukufu”! Mfereji wa namna gani—“Kristo Yesu”! Ni pendeleo lako tamu kuyaweka mahitaji yako yote kinyume cha utajiri wake, na kuyapoteza yale ya kwanza mbele ya haya ya pili. Hazina yake isiyokwisha imefunguliwa kwako, kwa upendo wote wa moyo wake; nenda ukatwae kutoka humo, kwa unyofu sahili wa imani, wala hutakuwa na sababu kamwe ya kutazamia kijito cha kiumbe, wala kuegemea nguzo ya kiumbe.—C. H. M.

Januari 11

Hesabuni kuwa ni furaha tupu mnapoangukia katika majaribu mbalimbali. Yak. 1:2.

Hatuwezi kupata hasara kwa kumtumaini Mungu, kwa maana yeye huheshimiwa kwa imani, na huheshimiwa zaidi imani itambuapo upendo na kweli yake nyuma ya wingu zito la njia zake na maongozi yake. Heri wale wanaojaribiwa hivyo! Na tuwe tu safi mbali na kutokuamini na dhamiri yenye hatia. Tutajificha katika mwamba na hema ya Bwana, tukihifadhiwa chini ya mbawa za upendo wa milele hata misiba yote ipite.—Selected.

Januari 12

Heri wale wasioona, wakasadiki. Yoh. 20:29.

Vionekanavyo ni vivuli: kiini kinapatikana katika visivyoonekana. . . . Hapana shaka, katika Kristo, msingi wa imani yetu hauonekani; lakini ndivyo ulivyo msingi wa mnara ule ulioinua umbo lake refu na wima kati ya mawimbi ambayo juu yake huangazia nuru iokoayo. Waonekana kama unakaa juu ya mawimbi yaliyovingirika; lakini, chini ya hayo, usioonekana wala kuondolewa, umelala mwamba imara ambao juu yake umesimama salama; na tufani ivumapo juu, na mawimbi yavumapo chini, ningeweza kwenda kulala kwa utulivu katika mnara ule wa peke yake baharini. Ukiwa umewekwa juu ya mwamba, na salama kuliko jumba lolote la kifahari lisimamalo juu ya pwani ya mchanga ipigwayo na mawimbi, hauwezi kuondolewa. Sembuse Mwamba wa Milele! Yeye amwaminiye huyo yuko tayari kwa mauti, ameandaliwa kwa hukumu, tayari kwa tarumbeta iliayo siku ya mwisho, kwa kuwa, “Bwana huikomboa nafsi ya watumishi wake, wala hataadhibiwa mtu awaye yote amwaminiye.”—Guthrie.

Januari 13

Katika hili Baba yangu hutukuzwa, kwamba mzae matunda mengi. Yoh. 15:8.

Uwezekano wa namna gani, uvuvio wa namna gani, kwamba twaweza kuuongeza utukufu wa “Baba yetu”! Mioyo yetu huruka kwa wazo hilo.

Jinsi gani hili laweza kufanyika? Kwa kuzaa “majani,”—yaani ungamo la kumpenda? La. Kwa kuzaa matunda kadhaa? La. “Kwamba mzae matunda mengi.” Katika wingi wa mavuno ndimo furaha, utukufu wa mkulima. Kwa hiyo, twapaswa kulenga kuwa Wakristo wa ajabu, wa “mara mia,” wasioridhika ila kwa mavuno makubwa kabisa. Maisha yetu yapaswa kujaa matendo mema. Ndipo wakati wa mavuno tuweze kusema, “Baba, nimekutukuza duniani!”—W. Jennings.

Januari 14

Kila siku nitakubariki, nami nitalisifu jina lako milele na milele. Zab. 145:2.

Kuna mchoro mzuri sana ambao Wajapani huuzoea kuonyesha matakwa yao kwa rafiki zao. Ni sanamu ya ngoma ambamo ndege wamejenga kiota chao. Hadithi isimuliwayo juu yake ni kwamba hapo zamani aliishi mfalme mwema, aliyejishughulisha sana kwa hali njema ya watu wake hata langoni pa jumba lake akaweka ngoma, na kila mwenye kosa la kurekebishiwa au uhitaji wowote, aipige ngoma, na papo hapo, mchana au usiku, mfalme angemkubalia mwombaji kuhudhuria mbele yake na kupata msaada. Lakini katika nchi yote palitawala ustawi na kuridhika kiasi kwamba hakuna aliyehitaji kuomba kitu chochote, nao ndege wakajenga viota vyao ndani yake na kuijaza muziki wa wimbo wao.

Fursa kama hiyo ya neema tunapewa hata na Mfalme wa Mbinguni, na mchana na usiku sikio lake lililo tayari na msaada wake vimo katika kufikiwa na wote wamjiao; lakini kati ya watu wote heri kuliko wote ni wale walioipata duniani heri ambayo ndani yake kila uhitaji husahauliwa, na tumaini hutulia likiwa na uhakika wa usalama katika ulinzi wa Baba hata maombi hutoa nafasi kwa sifa isiyokoma. Wao hufurahi katika Bwana sikuzote.—Mark Guy Pearse.

Januari 15

Watapanda juu kwa mbawa kama tai; watapiga mbio, wala hawatachoka; watakwenda kwa miguu, wala hawatazimia.—Isa. 40:31.

Hii, ee nafsi yangu, ndiyo ushindi wa kuwako kwako—kuweza kutembea pamoja na Mungu! Kupaa ni kwa nafsi changa; ni mahaba ya dini. Kupiga mbio bila kuchoka ni kwa nafsi iliyotukuka; ni uzuri wa dini. Lakini kutembea wala kutozimia ni kwa nafsi iliyokamilika; ni nguvu ya dini.

Je, waweza kutembea ukiwa mweupe katika barabara za watu zilizotiwa doa? Je, waweza kuwagusa walio wachafu na wenye unajisi wa dunia na kuyaweka mavazi yako safi? Je, waweza kukutana na watenda dhambi nawe usinajisike? Ndipo umezidi kupaa kwa tai!—George Matheson.

Januari 16

Musa akawa mlimani siku arobaini, mchana na usiku. Kut. 24:18.

Maisha ya ushirika na Mungu hayawezi kujengwa kwa siku moja. Huanza kwa kumrejea yeye katika kila jambo kwa mazoea, saa kwa saa, kama Musa alivyofanya Misri. Lakini huendelea hata vipindi vingi na virefu zaidi vya ushirika; nayo hupata kilele chake na furaha yake katika siku na usiku wa kuombea na kungoja na mazungumzo matakatifu.—F. B. Meyer.

Januari 17

Elisha akasema, Bwana, nakuomba, umfumbue macho yake apate kuona. 2 Fal. 6:17.

Haya ndiyo maombi tunayohitaji kuyaomba kwa ajili yetu wenyewe na kwa ajili ya mmoja na mwenzake, “Bwana, tufumbue macho yetu tupate kuona”; kwa maana ulimwengu unaotuzunguka, kama vile uliomzunguka nabii, umejaa farasi na magari ya vita ya Mungu, yakingoja kutuchukua hata mahali pa ushindi wenye utukufu. Na macho yetu yakisha kufumbuliwa hivyo, tutaona katika matukio yote ya maisha, yawe makubwa au madogo, yawe ya furaha au ya huzuni, “gari” kwa ajili ya nafsi zetu. Kila kitu kinachotujia huwa gari mara tunapokitendea hivyo; na, kwa upande mwingine, hata jaribu dogo kabisa laweza kuwa gari la kutuponda hata kwenye taabu au kukata tamaa tukiliona hivyo. Ni juu ya kila mmoja wetu kuchagua yatakayokuwa. Yote yategemea, si juu ya matukio hayo yalivyo, bali juu ya jinsi tuyapokeavyo. Tukilala chini yake, na kuyaacha yatugandamize na kutuponda, huwa magari ya kuponda, lakini tukipanda ndani yake, kama katika gari la ushindi, na kuyafanya yatuchukue kwa ushindi mbele na juu, huwa magari ya Mungu.—Smith.

Januari 18

Mambo yote hufanya kazi pamoja kwa wema kwa wale wampendao Mungu. Rum. 8:28.

Katika majaribu elfu moja si mia tano yake yatendayo kazi kwa wema wa mwamini, bali mia tisa tisini na tisa yake, na moja zaidi.—George Müller.

Januari 19

Utamfanyia Haruni mavazi matakatifu. Kut. 28:2.

Je, hatuna mavazi ya buluu, na urujuani, na yenye kudokeza uzuri? Tunayo mavazi ya sifa; tumevikwa Bwana Yesu. Je, hatuna mapambo? Pambo la roho ya upole na utulivu, machoni pa Mungu, ni la thamani kubwa. Je, hatuna njuga za dhahabu? Tunazo njuga za dhahabu za matendo matakatifu. Maneno yetu ni njuga, matendo yetu ni njuga, makusudi yetu ni njuga. Kila tuendapo, mwendo wetu hueleweka hivyo kuwa mwendo kuelekea mahali patakatifu, matendo matakatifu, tabia takatifu.—Joseph Parker.

Januari 20

Ee Bwana, wakati wa asubuhi utaisikia sauti yangu; wakati wa asubuhi nitakupangia maombi yangu, nami nitatazama. Zab. 5:3.

Asubuhi ni lango la siku, nalo lapaswa kulindwa vyema kwa maombi. Ni ncha moja ya uzi ambao juu yake matendo ya siku yamepangwa, nalo lapaswa kufungwa fundo vyema kwa ibada. Kama tungaliuhisi zaidi utukufu wa maisha tungekuwa waangalifu zaidi wa asubuhi zake. Yeye akimbiaye toka kitandani kwenda kazini asingoje kuabudu ni mpumbavu kama vile ambaye hakuvaa nguo zake, au kuosha uso wake, na si mwenye busara kama vile ambaye alikimbilia vitani bila silaha wala deraya. Na iwe fungu letu kuoga katika mto utiririkao taratibu wa ushirika na Mungu, kabla ya joto la jangwa na mzigo wa njia kuanza kutuelemea.—Spurgeon.

Januari 21

Ee Bwana, unijulishe njia zako, unifundishe mapito yako. Zab. 25:4.

Kuna njia ambayo kila mtoto wa Mungu apaswa kuiendea, na ambayo ndani yake peke yake Mungu aweza kuandamana naye.—Denham Smith.

Januari 22

Basi, imesalia raha kwa watu wa Mungu. Ebr. 4:9.

Tamu jinsi gani muziki wa kengele hii ya kwanza ya mbinguni uelea juu ya maji ya mauti kutoka minara ya Yerusalemu Mpya. Ewe msafiri, uliyezimia chini ya safari yako ndefu na ngumu, uusikie! Ni raha. Ewe askari, ungali umebeba juu yako damu na mavumbi ya vita, uusikie! Ni raha. Ewe mwendaji baharini, uliyerushwa juu ya mawimbi ya dhambi na huzuni, uliyefukuzwa huku na huku juu ya bahari ya dunia iumbuayo ya mageuzi, uusikie! Bandari imeonekana; hayo mawimbi yenyewe yakupigayo yaonekana kusema kwa sauti ndogo—“Hivyo humpa mpendwa wake raha.” Ni ile pumzi ndefu ya kuwako hatimaye imejibiwa. Taabu na uchungu wa juma refu la dunia umekwisha. Utulivu wa Sabato yake isiyovunjika umeanza. Mwanadamu, mwanadamu aliyechoka, ameipata hatimaye ile raha aliyoitafuta muda mrefu katika kifua cha Mungu wake!—Macduff.

Januari 23

Chini ya uvuli wake. Wim. 2:3.

Frances Ridley Havergal asema: Naonekana kuona picha nne zinazodokezwa na hayo: chini ya uvuli wa mwamba katika tambarare yenye uchovu; chini ya uvuli wa mti; karibu zaidi, chini ya uvuli wa bawa lake; iliyo karibu na kusogelea kabisa, katika uvuli wa mkono wake. Hakika mkono huo ni ule mkono uliotobolewa, ambao mara nyingi waweza kutugandamiza kwa uchungu, na hata hivyo daima ukituzunguka, ukitutegemeza na kututia uvulini!

Januari 24

Naye akafanya kama kwamba anataka kuendelea mbele. Lk. 24:28.

Je, Mungu hafanyi hivi sikuzote? Hutujia kwa Roho wake Mtakatifu kama alivyowajia wale wanafunzi wawili. Hunena nasi kwa kuhubiriwa kwa Injili, kwa Neno la Mungu, kwa njia mbalimbali za neema na mazingira ya maongozi ya maisha; na akiisha kunena hivyo, hufanya kama kwamba anataka kuendelea mbele. Ikiwa sikio limefumbuliwa kwa sauti yake na moyo kwa Roho wake, ndipo maombi yatapaa juu, “Bwana, ukae nami.” Lakini kama sauti hiyo haijaacha alama, ndipo hupita, kama alivyofanya mara elfu, akiuacha moyo kila mara ukiwa mgumu zaidi ya kwanza, na sikio likiwa limefumbwa zaidi kwa wito wa Roho.—F. Whitfield.

Januari 25

Mungu wangu atakuwa nguvu zangu. Isa. 49:5.

Ee, msiombe maisha rahisi! Ombeni kuwa watu wenye nguvu zaidi! Msiombe kazi zilizo sawa na nguvu zenu; ombeni nguvu zilizo sawa na kazi zenu! Ndipo kufanya kazi yenu hakutakuwa muujiza. Bali ninyi wenyewe mtakuwa muujiza. Kila siku mtajistaajabia wenyewe, kwa utajiri wa uzima ulioingia ndani yenu kwa neema ya Mungu.—Phillips Brooks.

Januari 26

Akiidharau aibu. Ebr. 12:2.

Na jinsi gani hilo laweza kufanyika? Kwa njia mbili. Panda mlimani, na vitu vilivyo tambarare vitaonekana vidogo sana; kadiri upandavyo juu zaidi ndivyo vitakavyoonekana visivyo na maana zaidi. Shika ushirika na Mungu, na maadui watishao hapa wataonekana wasio na nguvu hata kidogo. Njia nyingine ni, inua pazia na kutazama kilicho nyuma yake. Vilima vifupi vilivyo chini ya mguu wa nchi fulani ya milima yaweza kuonekana virefu vitazamwapo toka tambarare, maadamu vilele vyenye theluji vimefunikwa na ukungu; lakini upepo mdogo uvumapo na kuondoa ukungu toka vilele vilivyoinuka, hakuna atazamaye vile vilima vidogo vya kijani mbele. Vivyo hivyo vizuizi vya dunia na shida na masumbufu ya dunia huonekana virefu sana hata wingu litakapoinuka. Lakini tuonapo vile vilele vikuu vyeupe, kila kilicho chini hakionekani kuwa kirefu sana baada ya yote. Mtazame Yesu, na hilo litazidogosha shida.—Alex. McLaren.

Januari 27

Je! Saa za mchana si kumi na mbili? Yoh. 11:9.

Ukweli wenyewe wa Mkristo kuwa hapa, wala si mbinguni, ni ushahidi kwamba kazi fulani inamngoja.—William Arnot.

Januari 28

Si kama nitakavyo mimi, bali kama utakavyo wewe. Mt. 26:39.

Hakuna masikitiko kwa wale ambao mapenzi yao yamezikwa katika mapenzi ya Mungu.—Faber.

Januari 29

Mungu aliye hai. Dan. 6:20.

Mara ngapi twapata maneno haya katika Maandiko, na hata hivyo ni jambo hili hasa ambalo twaelekea sana kulisahau! Twajua imeandikwa “Mungu aliye hai”; lakini katika maisha yetu ya kila siku hakuna kitu ambacho kwa vitendo tunakisahau sana kama ukweli kwamba Mungu ni Mungu Aliye Hai; kwamba sasa yeye ni vile vile alivyokuwa miaka elfu tatu au nne iliyopita; kwamba ana uweza ule ule wa enzi, upendo ule ule wa kuokoa kwa wale wampendao na kumtumikia kama alivyokuwa nao daima, na kwamba atawatendea sasa yale aliyowatendea wengine miaka elfu mbili, tatu, nne iliyopita, kwa sababu tu yeye ni Mungu aliye hai, yeye Asiyebadilika. Ee, kwa hiyo jinsi gani twapaswa kumtumaini, na katika nyakati zetu za giza kuu tusisahau kamwe ukweli kwamba yeye bado yu na milele atakuwa Mungu Aliye Hai!—George Müller.

Januari 30

Basi tulizikwa pamoja naye kwa njia ya ubatizo katika mauti, ili kama Kristo alivyofufuka katika wafu kwa njia ya utukufu wa Baba, vivyo hivyo na sisi tuenende katika upya wa uzima. Rum. 6:4.

Hayo ndiyo maisha tunayoitwa kuyaishi, na hayo ndiyo maisha ambayo ni pendeleo letu kuyaongoza; kwa maana Mungu hatupi wito bila kuwa pendeleo, wala hatupi pendeleo la kupanda juu zaidi bila kutunyoshea mkono wake atuinue. Panda juu na juu zaidi katika hali halisi na tukufu za uzima wa ufufuo, ukijua ya kuwa uzima wako umefichwa pamoja na Kristo katika Mungu. Jinasue mbali na kila kizuizi, kipe kisogo kila unajisi, jitoe kama udongo mikononi mwa mfinyanzi, ili akutie muhuri wa utimilifu wa utukufu wake mwenyewe wa ufufuo, ili wewe, ukitazama kama katika kioo utukufu wa Bwana, ubadilishwe toka utukufu hata utukufu kama kwa Roho wa Bwana.—W. Hay Aitken.

Januari 31

Kristo ni yote, na katika yote. Kol. 3:11.

Utumishi wa Kristo ndio shughuli ya maisha yangu.
Mapenzi ya Kristo ndiyo sheria ya maisha yangu.
Uwepo wa Kristo ndio furaha ya maisha yangu.
Utukufu wa Kristo ndio taji la maisha yangu.—Selected.