Novemba

Novemba 1

Yesu akaachwa peke yake, na yule mwanamke amesimama katikati. Yohana 8:9.

Peke yako na Yesu! Ni mahali gani penye utamu na utakatifu kiasi hicho! Ni kimbilio gani lililobarikiwa ambalo nafsi yaweza kujikimbilia kutoka mashtaka ya Shetani, tuhuma za ulimwengu, na huzuni za maisha! Mahali penye utamu kwa moyo kujifunua wenyewe, kusimulia hadithi yake iliyofichika sikioni mwa upendo, wema, na huruma isiyo na mwisho!

Peke yako na Yesu! Ni jinsi gani Ukristo ungeuonyesha ulimwengu sura tofauti kabisa kama watu wa Bwana wangekuwapo hapo mara nyingi zaidi! Ni unyenyekevu, upole, na upendo ulioje ungetia alama katika shughuli zao zote! Ni utakatifu ulioje ungeandikwa kwenye paji la uso lenyewe, hata wote wapate kuusoma! Ni hukumu chache kiasi gani zingepitishwa juu ya wengine, na ni ngapi zaidi juu yetu wenyewe! Ni utulivu na kunyenyekea na kujitiisha kwa furaha katika shughuli zote za Bwana!

Uwe sana “peke yako na Yesu!” Ndipo safari ya kwenda utukufuni itakapokuwa ya mwanga wa jua, ikiwa ni kupitia malango ya kaburi au kupitia mawingu ya mbinguni.—F. Whitfield.

Novemba 2

Utanijulisha njia ya uzima; mbele za uso wako kuna furaha tele; katika mkono wako wa kuume kuna raha za milele. Zaburi 16:11.

Mtu aendaye katika njia ya uzima huishi mbele za uso wa Mungu atoaye furaha. Kadiri anavyokuwa mwaminifu kwa njia hiyo ya uzima, wala hapotei kwenda kuume wala kushoto, furaha yake huzidi kuwa na kina; naam! huwa mshiriki wa ile furaha tele ambayo Mungu mwenyewe anaishi, na kuenenda, na kuwa nayo. Na maadamu haya ndiyo mafunzo yake katikati ya taabu zote za maisha, tena ana pia pendeleo la kutazamia mambo makuu zaidi yaliyowekwa akiba kwa ajili yake, wakati ulimwengu ule ulio juu zaidi utakapofikiwa, na vivuli vya wakati vitakapopita milele. “Katika mkono wako wa kuume,” apaza sauti mtunga zaburi, “kuna raha za milele.”—W. Hay Aitken.

Novemba 3

Jivikeni unyenyekevu. 1 Petro 5:5.

Je, si mojawapo ya magumu ya kazi ya kanisa kwamba tuna maofisa wengi kuliko wanajeshi? Twahitaji zaidi askari wa kawaida, walio tayari kwenda popote, na kufanya kazi zilizo duni kuliko zote. Tutafanikiwa kufanya mambo makuu zaidi tutakapokuwa sote tayari kutii. Ni singe la bunduki, wala si nembo ya dhahabu, linalohitajika adui atakaposhindwa.—Thomas Champness.

Novemba 4

Yakobo akainua macho yake, akatazama, na tazama, Esau akaja, na watu mia nne pamoja naye. Mwanzo 33:1.

Usiinue macho yako kuwatafuta akina Esau. Wale wautafutao taabu hawatakawia kuiona taabu ya kuitazama. Yainue juu zaidi—kwake yeye ambaye msaada wetu hutoka kwake. Ndipo utakapoweza kukabiliana na taabu zako kwa roho isiyofadhaishwa. Wale walioutazama uso wa Mungu hawana haja ya kuuogopa uso wa mwanadamu atakayekufa. Kuwa na nguvu kwa Mungu ni kuwa na nguvu juu ya maovu yote yanayotutisha.—F. B. Meyer.

Novemba 5

Na tujitakase na uchafu wote wa mwili na roho, tukitimiza utakatifu katika kumcha Mungu. 2 Wakorintho 7:1.

Mti wa Uzima, kwa mujibu wa baadhi ya hadithi za kale za marabi, uliinua matawi yake, kwa mwendo wa ndani, juu sana kupita mikono michafu iliyonyoshwa kuyagusa; na hata mikono yetu itakasapo kwa njia ya imani katika Yesu Kristo, tunda lake lililo bora zaidi hutundikwa pasipoweza kufikiwa, likiwa la dhahabu juu ya vichwa vyetu. Utimilifu wa uzima wa mbinguni hupewa tu wale ambao, wakimkaribia Yesu Kristo kwa imani hapa duniani, wamejitakasa kwa njia hiyo na uchafu wote wa mwili na roho.—Alex. McLaren.

Novemba 6

Ile nguzo ya wingu ikaondoka mbele ya uso wao, ikasimama nyuma yao. Kutoka 14:19.

Si sikuzote uongozi ndio tunaohitaji zaidi. Hatari nyingi zetu hutujia kutoka nyuma. Ni za siri, za hila, zikitushambulia tusipojua ukaribu wake. Mjaribu ana ujanja na werevu. Hakutani nasi uso kwa uso. Ni faraja kujua kwamba Kristo huja nyuma yetu wakati hapo ndipo tunapohitaji ulinzi.—J. R. Miller.

Novemba 7

Maovu yamenishinda; nayo maasi yetu, wewe utayafunika. Zaburi 65:3.

Kuna dini nyingi ya bidii inayoishi ndani ya mzunguko wa huzuni wa maneno haya manne ya kwanza, “Maovu yamenishinda,” wala haipati kamwe mwonekano wa kuvuka zaidi ya hapo. Lakini usiweke nukta hapo. Mlete ndani Yeye awezaye kusaidia. “Nayo maasi yetu, wewe utayafunika.” Wakati ule tumleteapo Bwana ndani, wakati huo huo kushindwa hugeuzwa kuwa ukombozi wa ushindi!

Yaandike hayo kwa herufi za dhahabu—Wewe! Wala usipate katika neno hili tumaini litetemekalo tu, au shauku ya kutaka kwa mshangao. Lisikilize hakikisho lake kamili—Wewe utafanya!

Kuna matokeo moja tu yawezayo kuhalalisha uchungu wa Kalvari; kuna matokeo moja tu yawezayo kumridhisha Mwokozi wetu mbarikiwa au sisi wenyewe; nayo ni sisi kuwa washindi juu ya dhambi.—Mark Guy Pearse.

Novemba 8

Kuinena kweli katika upendo. Waefeso 4:15.

Njia iliyo bora zaidi ya kuung’oa uongo ni kuitangaza na kuitenda kweli.—W. Arnot.

Novemba 9

Basi akaondoka, akaenda Sarepta. 1 Wafalme 17:10.

Na iseme vivyo hivyo kwako katika wajibu wowote ambao Bwana aweza kukuita uende, “Akaondoka, akaenda.” Ijapokuwa njia ni yenye taabu au hatari kiasi gani, bado ondoka, kama Eliya, uende. Nenda kwa moyo wa furaha, katika imani, ukiuweka moyo wako ukimtegemea Bwana kwa utulivu, na mwishoni hakika utautazama na kuuimba wema wake. Ijapokuwa umerushwa juu ya bahari ya taabu, waweza kutia nanga juu ya msingi imara wa Mungu, unaosimama thabiti. Una kwa usalama wako ahadi zake kuu mno na za thamani, nawe waweza kusema pamoja na mtunga zaburi, “Mbona umeinama, nafsi yangu? Mbona unafadhaika ndani yangu? Umtumaini Mungu, kwa maana nitamsifu tena, aliye afya ya uso wangu, na Mungu wangu.”—F. W. Krummacher.

Novemba 10

Posho ya kila siku kwa siku yake. 2 Wafalme 25:30.

Vitendo vya kupumua nilivyovifanya jana havitanihifadhi hai leo; sharti niendelee kupumua upya kila dakika, ama sivyo uhai wa kimwili hukoma. Vivyo hivyo neema ya jana na nguvu za kiroho sharti zifanywe upya, na Roho Mtakatifu sharti aendelee kupuliza juu ya nafsi yangu dakika kwa dakika ili nipate kuzifurahia faraja, na ili nizitende kazi za Mungu.—Toplady.

Novemba 11

Na chombo alichokifanya kwa udongo kilipoharibika mkononi mwa mfinyanzi, akakifanya tena chombo kingine, kama ilivyoonekana vema machoni pa mfinyanzi kukifanya. Yeremia 18:4. (R. V.)

Mahali pazuri zaidi na pa juu zaidi pa Mungu pa utumishi katika nchi ile iliyo ng’ambo patajazwa na wanaume na wanawake ambao wamevunjwavunjwa juu ya gurudumu hapa duniani.—G. Campbell Morgan.

Novemba 12

Jijaribuni wenyewe. 2 Wakorintho 13:5.

Kama hali yako ni njema, kuichunguza kutakupa faraja ya hali hiyo. Kama hali yako ni mbaya, kuichunguza hakuwezi kuifanya kuwa mbaya zaidi; naam, ndiyo njia pekee ya kuifanya kuwa njema zaidi, kwa maana kugeuka kunaanza na kushtakiwa kwa dhamiri.—Bishop Hopkins.

Novemba 13

Chagueni hivi leo mtakayemtumikia. Yoshua 24:15.

Kuchagua na kutumika—haya ndiyo yaliyotakwa kwa Waisraeli; haya ndiyo yanayotakwa kwako, haya tu. Kuchagua na kutumika—katika haya mna maisha yote.—Mark Hopkins.

Novemba 14

Bwana, wewe umekuwa makao yetu katika vizazi vyote. Zaburi 90:1.

Huwezi kumzuia tai msituni. Waweza kumkusanyia kwaya ya ndege walio bora zaidi; waweza kumpa tawi juu ya mreteni ulio mzuri zaidi; waweza kuwaamuru wajumbe wenye mabawa wamletee vyakula vitamu vilivyo bora zaidi; lakini atavikataa vyote. Akitandaza mabawa yake ya kifalme, na jicho lake likielekea genge la Alpi, atapaa mbali kwenda maghala yake ya asili katikati ya ngome za miamba na muziki wa mwituni wa dhoruba na maporomoko ya maji.

Nafsi ya mwanadamu, katika kupaa kwake kama tai, haitatulia kwa kitu chochote kilicho pungufu ya Mwamba wa Milele. Maghala yake ya asili ni maghala ya mbinguni. Ngome zake za miamba ni sifa za Mungu. Mkunjuo wa mruko wake wa fahari ni Umilele! “Bwana, wewe umekuwa makao yetu katika vizazi vyote!”—Macduff.

Novemba 15

Yeye amesema. Waebrania 13:5.

Kama twaweza tu kuyashika maneno haya ya imani, tunayo silaha ishindayo yote mkononi mwetu. Ni shaka gani isiyoweza kuuawa na upanga huu wenye makali kuwili? Ni hofu gani isiyoweza kuanguka ikijeruhiwa jeraha la mauti mbele ya mshale huu utokao katika upinde wa agano la Mungu? “Yeye amesema!” Naam; kwa ajili ya furaha katika utulivu wetu, au kwa ajili ya nguvu katika vita vyetu, “Yeye amesema!” sharti liwe kimbilio letu la kila siku.

Kwa kuwa “Yeye amesema” ndilo chanzo cha hekima yote, na chemchemi ya faraja yote, na likae ndani yenu kwa wingi, kama “chemchemi ya maji, ikibubujika hata uzima wa milele.” Ndivyo utakavyokua ukiwa na afya, nguvu, na furaha, katika uzima wa kimungu.—Spurgeon.

Novemba 16

Si mimi tena, bali Kristo yu hai ndani yangu. Wagalatia 2:20.

Ajabu ya uzima ulio katika Yesu ni hii—nawe utaiona kuwa hivyo, tena umeiona kuwa hivyo, kama umewahi kuchukua Agano lako Jipya na kujaribu kulifanya kuwa kanuni ya maisha yako ya kila siku—kwamba hakuna tendo hata moja unaloitwa kulitenda ambalo unahitaji kuwa, ambalo utakuwa, katika shaka yoyote ya maana kwa dakika kumi kuhusu jambo ambalo Yesu Kristo, kama angekuwa hapa, Yesu Kristo akiwa hapa, angependa ufanye katika hali hizo na kwa vitu ambavyo unaitwa kutenda navyo. Nafsi iyapokeayo maneno ya Yesu, nafsi ambayo kwa njia ya maneno ya Yesu huingia katika nafsi yenyewe ya Yesu, nafsi imjuayo kuwa uwepo wake wa kila siku na sheria yake ya kila siku—haisiti kamwe.—Phillips Brooks.

Novemba 17

Na jirani yangu ni nani? Luka 10:29.

“Jirani yako ni nani?” Ni yeye ateseaye, popote alipo, awaye yote, awavyo vyote. Popote usikiapo kilio cha dhiki, popote umwonapo mtu yeyote aliyeletwa katika njia yako kwa bahati na mabadiliko ya maisha (yaani, kwa Maongozi ya Mungu), ambaye u katika uwezo wako kumsaidia—yeye, ajapokuwa mgeni au adui—yeye ndiye jirani yako.—A. P. Stanley.

Novemba 18

Naye atuthibitishaye . . . katika Kristo, na kututia mafuta, ni Mungu; ambaye ndiye aliyetutia muhuri, na kutupa arabuni ya Roho mioyoni mwetu. 2 Wakorintho 1:21, 22.

Mkristo atiwapo “muhuri” na Roho Mtakatifu, atiwapo “muhuri” kuwa mali ya Bwana wake, hapatakuwa na haja ya kuuliza, “Sura hii na chapa hii ni ya nani” juu ya yule aliyetiwa “muhuri”? Ni ya Mfalme, bila shaka. Kila mtu aweza kuiona sura.

Muhuri una faida gani kama hauwezi kuonwa?

Je, sura ya Mfalme imepigwa juu yetu kwa kuonekana, kwa kudumu? Imepigwa juu ya kila mwamini aliyejaa Roho, aliyetiwa “muhuri.”—John McNeil.

Novemba 19

Watafurahi, na kuiona timazi mkononi mwa Zerubabeli. Zekaria 4:10.

Ni furaha kwa Mkristo kujua ya kuwa timazi sasa i mkononi mwa Zerubabeli wetu mkuu, na ya kwamba atakapotokea, utawala mbaya wa ulimwengu utakwisha. Vipimo vya uongo na makadirio ya uongo ya wanadamu vitafagiliwa mbali. Vipimo vya “manufaa,” vya “dhamiri,” vya “kila mtu kufikiri apendavyo, ikiwa tu ana ukweli”—hivi, na vimbilio vyote kama hivyo vya uongo vitakuwa kama utando wa buibui. Kipimo cha vitu vyote kitakuwa Kristo, na Kristo Mpima wa vitu vyote.

Jinsi kila kitu kitakavyogeuzwa! Ni kupinduliwa juu chini kulioje kwa yote yaliyoko sasa!

Siku iliyobarikiwa, na iliyotamaniwa—jubilei kuu ya ulimwengu, Sabato ya nchi iliyotazamiwa kwa muda mrefu, furaha ya viumbe vinavyougua, na pumziko tulivu la asili! Ni nani asingelia, “Njoo, Bwana Yesu, ukomeshe ndoto hii yenye taabu! Vunja vivuli vya usiku mrefu wa giza wa dhambi na huzuni, kuugua na machozi, kukata tamaa na mauti!”—F. Whitfield.

Novemba 20

Ulimwenguni mnayo dhiki; lakini jipeni moyo; mimi nimeushinda ulimwengu. Yohana 16:33.

Dhiki ni upuraji wa Mungu—si kutuangamiza, bali kupata kile kilicho chema, cha mbinguni, na cha kiroho ndani yetu kikitenganishwa na kile kilicho kibaya, cha kidunia, na cha mwili. Hakuna kitu kidogo kuliko mapigo ya maumivu kitakachofanya haya. Ubaya washikamana sana na wema, ngano ya dhahabu ya wema ndani yetu imefungwa sana ndani ya makapi yenye nguvu ya maisha ya kale hata ni fimbo nzito tu ya mateso iwezayo kuleta utengano huo.—J. R. Miller.

Novemba 21

Nikasikia nyuma yangu sauti kuu, kama ya baragumu, ikisema . . . Andika. Ufunuo 1:10, 11.

Ni jambo tamu sana kuona ya kwamba sauti kutoka mbinguni ilimwambia Yohana, “Andika.” Je, sauti hiyo haitujii sisi? Je, hawako wale ambao wangeonja furaha za mbinguni kama tungewaandikia maneno ya msamaha na upendo? Je, hawako wengine ambao wangeyafuta machozi yao kama tungewakumbusha furaha zilizopita, tulipokuwa maskini kama wao walivyo sasa? Naam, je, hawawezi baadhi, wasomao maneno haya sahili, kuweka ndani ya bahasha kitu chenye sahihi yao ambacho kingeufanya moyo wa mjane ucheze kwa furaha?

Kalamu yetu inafanya nini? Je, inaongeza furaha katika maisha ya watu wengine? Kama ndivyo, basi malaika waweza kunyoosha vinubi vyao tuketipo mezani petu. Wametumwa kuwahudumia warithi wa wokovu, nao wangefurahi kuiangalia kalamu yetu kuwa inaandika muziki wao waimbe, kwa sababu tuandikacho hufanya furaha ya wateja wao kuwa timilifu.—Thomas Champness.

Novemba 22

Maana yeye ampendaye Bwana humrudi. Waebrania 12:6.

Twapaswa sikuzote kukumbuka ya kuwa adhabu ya mkono wa Baba yetu wa mbinguni yapasa kufasiriwa katika mwanga wa uso wa Baba yetu; na siri za ndani za utawala wake wa kiadili zitazamwe kwa njia ya upendo wake mwororo.—Selected.

Novemba 23

Yeye awaitaye ni mwaminifu, naye ndiye atakayefanya hayo. 1 Wathesalonike 5:24.

Uaminifu wa kidunia hauwezekani ila kwa kupokea vipawa vya mbinguni. Kama vile kwa hakika kila jani liotalo ni hasa maji ambayo mmea umeyapata kutoka mawinguni, na kaboni ambayo umeipata kutoka angani, ndivyo kwa hakika mema yetu yote yatakavyotolewa hasa kutoka mbinguni na vipawa vya mbinguni. Kama vile kwa hakika kila donge la makaa uwekalo motoni mwako lina ndani yake miali ya jua iliyofungiwa ndani miaka hii elfu iliyopita tangu lipoyumbayumba likiwa la kijani msituni, ndivyo kwa hakika kila tendo jema linavyojumuisha ndani yake vipawa kutoka juu. Wala hakuna mtu aliye safi ila kwa kupewa; na kila kitu chema na kila kitu kilicho kamili hutoka kwa Baba wa mianga.—Alex. McLaren.

Novemba 24

Mkiimba kwa neema mioyoni mwenu, kumwimbia Bwana. Wakolosai 3:16.

Kumbuka maisha yako yapasa kuwa maisha ya kuimba. Ulimwengu huu ni kanisa kuu la Mungu kwa ajili yako. Wewe wapaswa kuwa mmoja wa waimbaji wa Mungu, na kunapasa kuwa na sadaka ya kuendelea ya sifa na shukrani ikipanda juu kutoka moyoni mwako, ambayo Mungu atapendezwa nayo daima. Wala hapapaswi kuwa na sadaka ya midomo tu, bali na kujitoa kwa maisha kwa furaha. Naam, kwa furaha, wala si kwa kulazimishwa. Kila kipawa cha asili yetu chapasa kutolewa kwake katika utumishi wa furaha, kwa maana Bwana Yehova ni wimbo wangu na nguvu zangu pia.—W. Hay Aitken.

Novemba 25

Zikumbukeni siku za kwanza. Waebrania 10:32.

Siku za kwanza—nyakati za majaribu, za mashindano, za kukata tamaa, za kujaribiwa. Kama tungezikumbuka hizi mara nyingi zaidi, ni kwa furaha kuu kiasi gani zaidi tungefanya sitara ya uaminifu wa Mungu kuwa kimbilio letu, tukipaza sauti pamoja na mtunga zaburi, “Kwa kuwa umekuwa msaada wangu, kwa hiyo katika uvuli wa mbawa zako nitafurahi.”—R. Fuller.

Novemba 26

Bwana . . . ndiye makao yako. Zaburi 91:9.

Twaenda nyumbani pasipo mpango. Twapanga ziara zetu, kisha twaenda nyumbani kwa sababu zimekwisha. Wajibu, mahitaji, mambo mengi, hutuongoza kwenda kwingine; lakini moyo hutupeleka nyumbani. Amebarikiwa, amebarikiwa mno yeye ambaye mawazo yake hupaa juu kwa Mungu, si kwa sababu yanasukumwa kama mtumbwi wa mvuvi uliokumbwa na ukali wa dhoruba, si kwa sababu yanalazimishwa na mahitaji au hofu, si kwa sababu yanaongozwa na mkono wa wajibu, bali kwa sababu Mungu yumo katika makao yake na nyumbani kwake. Yakiwa yamefunguliwa kutoka mambo mengine, mawazo huenda nyumbani kupumzika.

Katika Mungu mtu aliyebarikiwa hukuta upendo unaokaribisha. Hapo ndipo mahali penye jua. Hapo taabu hufunguliwa na kazi husahauliwa. Hapo pana uhuru wa furaha, utulivu wenye furaha, pumziko, na kufanywa upya kwa nguvu zetu—nyumbani pamoja na Mungu.—Mark Guy Pearse.

Novemba 27

Watu hawa walioupindua ulimwengu. Matendo 17:6. Wala hakuna lolote la mambo haya linitikisalo. Matendo 20:24.

Watu wanaousukuma ulimwengu ni wale wasioruhusu ulimwengu uwasukume.—Selected.

Novemba 28

Aligusa panda la nyonga ya Yakobo katika ule mshipa uliopooza. Mwanzo 32:32.

Lolote lile liwezalo kuiwezesha nafsi, ambayo Mungu amekusudia kuibariki, kusimama kumpinga Yeye, Mungu ataligusa. Laweza kuwa kiburi cha mali, au cha ushawishi, au cha mapendo; lakini halitaachwa—Mungu ataligusa. Laweza kuwa kitu cha asili kama mshipa; lakini kama linamnyang’anya mtu baraka ya kiroho Mungu ataligusa. Laweza kuwa kitu kidogo kama mshipa; lakini ushawishi wake katika kumfanya mtu kuwa na nguvu katika kupinga baraka utatosha kulihukumu—naye Mungu ataligusa. Na chini ya mguso huo litanywea na kukauka, nawe utachechemea hata mwisho wa maisha.

Kumbuka ya kwamba mshipa haunywei kamwe ila chini ya mguso wa mkono wa malaika—mguso wa upendo mwororo.—F. B. Meyer.

Novemba 29

Kwa Mungu mambo yote yawezekana. Marko 10:27.

Kutoamini husema, “Mambo kadha wa kadha yawezaje kuwa?” Kumejaa “vipi”; bali imani ina jibu moja kuu kwa yale “vipi” elfu kumi, na jibu hilo ni—Mungu!—C. H. M.

Novemba 30

Ninyi ni hekalu la Mungu aliye hai; kama Mungu alivyosema, Nitakaa ndani yao, na kutembea kati yao. 2 Wakorintho 6:16.

Mahekalu haya yalijengwa kwa ajili yake. Na ayajaze kikamilifu hata, kama lile hekalu la mashariki la kioo katika hadithi ya kale, hekalu lisionekane, bali mwanga wa jua wenye utukufu tu, ambao si kwamba huangaza ndani yake tu, bali kupitia ndani yake, na kuta zake zenye kung’aa zote hazionekani.—A. B. Simpson.