Siri ya Uongozi

Watoto wengi wa Mungu wanahangaishwa sana na jambo la uongozi hata inaweza kusaidia kutoa mawaidha machache kuhusu kuijua njia ambayo Baba yetu angependa tuiendee, na kazi ambayo angependa tuifanye. Uzito wa jambo hili hauwezi kutiwa chumvi; kwa maana sehemu kubwa ya nguvu na amani yetu yamo katika kujua mahali ambapo Mungu angependa tuwe, na katika kuwa hapo hasa.

Mana huanguka tu pale nguzo ya wingu inapotanda; lakini bila shaka itapatikana juu ya mchanga ambao saa chache zilizopita ulikuwa ukimetameta katika mwanga wa moto wa mbinguni, na sasa umefunikwa na dari laini la wingu. Ikiwa tuko pale hasa ambapo Baba yetu wa mbinguni angependa tuwe, tuna hakika kamili kwamba atatupatia chakula na mavazi, na kila kitu kinginecho. Anapowatuma watumishi wake huko Kerithi, atawafanya hata kunguru kuwaletea chakula.

Ni kazi ngapi za Kikristo zimeharibika kwa sababu tumeng'ang'ania kuzianzisha sisi wenyewe, badala ya kuhakikisha ni nini Mungu alikuwa akifanya, na wapi alihitaji uwepo wetu! Tunaota ndoto nzuri za mafanikio. Tunajaribu kuyaamuru. Tunaita kwa msaada wetu kila aina ya mbinu, za kutiliwa shaka au sivyo. Mwishowe tunarudi nyuma, tukiwa tumevunjika moyo na kuona haya, kama watoto waliochanwa na kukwaruzwa na miiba, na kuchafuliwa na tope. Hakuna lolote la haya lingelitokea kama tu tangu mwanzo tungelikuwa chini ya uongozi wa Mungu usiokosea. Angeweza kutujaribu, lakini asingeweza kutuacha tukose.

Kwa kawaida, mtoto wa Mungu, akitamani kuyajua mapenzi ya Baba yake, hugeukia Kitabu kitakatifu, na kuiburudisha imani yake kwa kuona jinsi katika nyakati zote Mungu alivyowaongoza wale waliothubutu kumtumaini kikamilifu, ambao hata hivyo wakati ule lazima walikuwa wamechanganyikiwa kama tunavyokuwa mara nyingi sasa. Twajua jinsi Abrahamu alivyoacha jamaa na nchi, akaanza safari, bila mwongozo mwingine ila Mungu, katika jangwa lisilo na njia kuelekea nchi asiyoijua. Twajua jinsi kwa miaka arobaini Waisraeli walivyoongozwa kupitia rasi ya Sinai, pamoja na vichochoro vyake vya mchanga mwekundu na majangwa yake ya mchanga. Twajua jinsi Yoshua, alipoingia katika Nchi ya Ahadi, alivyoweza kukabiliana na magumu ya nchi asiyoijua, na kuyashinda mataifa makubwa yenye vita, kwa sababu alimwelekea Jemadari wa majeshi ya Bwana, aongozaye daima kwenye ushindi. Twajua jinsi, katika Kanisa la kwanza, Mitume walivyowezeshwa kupenya katika maswali magumu sana, na kutatua matatizo yenye kutatanisha kupita yote, wakiweka misingi itakayoliongoza Kanisa hata mwisho wa dunia; na hii ni kwa sababu walifunuliwa juu ya wayafanyayo na waseme lipi, na Roho Mtakatifu.

AHADI ZA UONGOZI HAZINA UTATA.

Zaburi 32:8: "Nitakufundisha na kukuonyesha njia utakayoiendea." Hii ni hakika ya wazi ya Mungu kwa wale ambao makosa yao yamesamehewa, na dhambi zao zimefunikwa, na walio wepesi kutambua dalili ndogo kabisa ya mapenzi yake kuliko farasi au nyumbu kuhisi lijamu.

Mithali 3:6: "Katika njia zako zote mkiri yeye, naye atayanyosha (au atazifanya wazi) mapito yako." Neno la hakika, ambalo twaweza kulitegemea, ikiwa tu twatimiza masharti yaliyotangulia ya kumtumaini kwa moyo wetu wote, na ya kutoutegemea ufahamu wetu wenyewe.

Isaya 58:11: "Bwana atakuongoza daima." Haiwezekani kufikiri kwamba angeweza kutuongoza hata kidogo kama asingekuwa akituongoza sikuzote. Kwa maana matukio makubwa zaidi ya maisha, kama yale mawe makubwa yanayoyumba ya Magharibi ya Uingereza, huzunguka juu ya vituo vidogo kabisa. Kijiwe kimoja chaweza kubadili mtiririko wa kijito. Kukua kwa punje moja ya haradali kwaweza kuamua kiasi cha mvua cha bara zima. Basi twaagizwa kuutafuta Uongozi utakaoyakumbatia maisha yote katika mahitaji yake yasiyohesabika.

Yohana 8:12: "Mimi ndimi nuru ya ulimwengu; yeye anifuataye hatakwenda gizani kamwe, bali atakuwa na nuru ya uzima." Yaonekana rejeo hapa ni kule kutanga-tanga jangwani, na Bwana anaahidi kuwa kwa nafsi zote za waaminifu, katika hija yao kuelekea Mji wa Mungu, kama vile ile nguzo ya wingu ilivyokuwa kwa wana wa Israeli katika safari yao kuelekea Nchi ya Ahadi.

Hizi ni mifano tu. Kuba la Maandiko limepambwa kwa maelfu kama hayo, yang'aayo kwa kadiri yake kama nyota ziongozazo msafiri katika bahari kuu. Vema nabii aweza kufupisha urithi wa watumishi wa Bwana kwa kuunena Mji Mtakatifu, "Na watoto wako wote watafundishwa na Bwana; na amani ya watoto wako itakuwa nyingi."

Na bado inaweza kuonekana kwa mioyo kadhaa iliyojaribiwa na yenye woga kana kwamba kila mmoja aliyetajwa katika Neno la Mungu alisaidiwa, bali wao wameachwa bila msaada. Waonekana wamesimama mbele ya matatizo yenye kutatanisha, uso kwa uso na mafumbo ya maisha, wakitamani sana kujua la kufanya, lakini hakuna malaika aliyekuja kuwaambia, wala hakuna lango la chuma lililowafungukia katika gereza la mazingira.

Wengine hulaumu ujinga wao wenyewe. Akili zao ni butu na nzito. Hawawezi kuielewa maana ya Mungu, ambayo ingekuwa wazi kwa wengine. Wana hofu sana ya kutenda vibaya hata hawawezi kujifunza waziwazi lililo sawa. "Ni nani aliye kipofu, ila mtumishi wangu? Au kiziwi, kama mjumbe wangu nimtumaye? Ni nani aliye kipofu kama yeye aliye mkamilifu, na kipofu kama mtumishi wa Bwana?" Lakini, twawatendeaje watoto wetu? Mtoto mmoja ni mwerevu na mwepesi kiasi kwamba dokezo dogo latosha kuionyesha njia; mwingine alizaliwa mzito; hawezi kuipokea maana yako kwa haraka. Je, wamjulisha yule mwerevu peke yake unachotaka? Je, hutamchukua yule mwingine magotini pako na kumfafanulia maagizo yanayomshinda? Je, taabu ya kile kichanga kidogo, kitamaniyo kujua ili kipate kutii mara moja, haifumi kifungo chenye nguvu karibu kupita kile kikufungacho na wale wengine? Ee! watoto waliochoka, waliochanganyikiwa na wapumbavu, aminini upendo mkuu wa Mungu, na kujitupa juu yake, mkiwa na hakika kwamba atashuka hata kwenye ujinga wenu, na kujilinganisha na mahitaji yenu, naye atawachukua "wana-kondoo mikononi mwake, na kuwabeba kifuani mwake, na kuwaongoza polepole wale wanyonyeshao."

Kuna maagizo fulani ya vitendo ambayo lazima tuyazingatie ili tupate kuongozwa kuingia katika nia ya Bwana.

I. ‑‑ NIA ZETU LAZIMA ZIWE SAFI.

Jicho lako likiwa safi, mwili wako wote nao umejaa nuru." (Luka 11:34.) Umekuwa gizani sana siku hizi, na labda fungu hili litaonyesha sababu. Jicho lako halikuwa safi. Kumekuwako upotofu fulani wa kuona ‑‑ upogo wa kiroho; na hili limekuzuia kutambua dalili za mapenzi ya Mungu, ambazo vinginevyo zingekuwa wazi kama adhuhuri.

Ni lazima tuwe waangalifu sana katika kuzihukumu nia zetu, tukizichunguza kama wapelelezi walio kwenye milango ya Bunge la Uingereza wamchunguzavyo kila mgeni aingiaye. Tunapokuwa tumekwisha okolewa kwa neema ya Mungu kutoka aina za dhambi zilizo dhahiri zaidi, bado twaweza kudhuriwa na utendaji wa siri wa ubinafsi katika saa zetu takatifu na nzuri kuliko zote. Hutia sumu nia zetu. Hupuliza uozo juu ya matunda yetu mazuri kabisa. Hunong'ona sifa za kudanganya masikioni mwetu yaliyofurahishwa. Huigeuza roho kutoka kusudi lake takatifu, kama vile marundo ya chuma juu ya meli za baharini yanavyoipotosha sindano ya dira kutoka ncha yake.

Maadamu kunako wazo lolote la faida binafsi, fikira yoyote ya kupata sifa na pongezi za wanadamu, lengo lolote la kujitukuza, itakuwa vigumu kabisa kuligundua kusudi la Mungu kwetu. Lango sharti lifungwe kwa uthabiti dhidi ya haya yote kama twataka kuisikia ile sauti ndogo ya utulivu. Nuru zote za kando sharti ziondolewe kama twataka kuliona jiwe la Urimu na Thumimu liking'aa kwa "Ndiyo" ya Mungu, au likitiwa giza kwa "Hapana" yake.

Mwombe Roho Mtakatifu akupe jicho safi, na kuchochea moyoni mwako lengo moja tu: lile lililomtia Bwana wetu nguvu, na kumwezesha kulia, alipoyatazama maisha yake, "Nimekutukuza duniani." Neno hili na liwe kauli-mbiu ya maisha yetu, "Atukuzwe Mungu juu mbinguni." Ndipo "mwili wetu wote utakapojaa nuru, usiwe na sehemu yenye giza, kama wakati taa ing'aayo itoapo nuru."

II. ‑‑ MAPENZI YETU LAZIMA YASALIMISHWE.

"Hukumu yangu ni ya haki; kwa sababu siyatafuti mapenzi yangu mwenyewe, bali mapenzi yake aliyenipeleka." (Yohana 5:30.) Hii ndiyo siri ambayo Yesu hakuitenda tu, bali aliifundisha pia. Kwa namna moja au nyingine alikuwa akisisitiza daima mapenzi yaliyosalimishwa, kuwa ndio ufunguo wa maarifa kamilifu. "Mtu ye yote akitaka kuyatenda mapenzi yake, atajua."

Kuna tofauti kubwa kabisa kati ya mapenzi yaliyozimwa na yale yaliyosalimishwa. Mungu hadai kwamba mapenzi yetu yapondwe kabisa, kama mishipa ya mikono ya mtawa isiyotumika. Yeye huomba tu kwamba yamwambie "Ndiyo." Yakiwa laini kwake kama tawi la mtiwili kwa mkono uliozoea.

Mara nyingi, meli ilipokaribia gati, nimemtazama yule kijana mdogo akichukua nafasi yake chini ya sitaha ya nyuma, macho na masikio yake yamemkazia nahodha, akingoja kupaza sauti kila neno alisemalo kwa wahandisi wenye masizi walio chini; na mara nyingi nimetamani kwamba mapenzi yangu yayarudie kwa usahihi na kwa upesi maneno na mapenzi ya Mungu, ili maumbile yote ya chini yapate kutii.

Ni kwa kukosa unyenyekevu huu ndipo mara nyingi tunakosa uongozi tuutafutao. Kuna mabishano ya siri kati ya mapenzi yetu na ya Mungu. Nasi hatutakuwa sawa hata tutakapomruhusu achukue, na kuvunja, na kufanya upya. Ee! tafuta jambo hilo. Kama huwezi kutoa, mwache achukue. Kama huna nia, ungama kwamba u tayari kufanywa kuwa na nia. Jikabidhi kwake ili afanye kazi ndani yako, kutaka na kutenda kwa kadiri ya mapenzi yake mema. Ni lazima tuwe kama udongo laini, tayari kuchukua umbo lolote ambalo Mfinyanzi mkuu aweza kuchagua, ndipo tutakapoweza kuutambua uongozi wake.

III. ‑‑ TWALAZIMIKA KUTAFUTA MAARIFA KWA AJILI YA AKILI ZETU.

Bila shaka hii ndiyo hatua inayofuata. Mungu ametupa vipawa hivi vya ajabu vya nguvu za akili, naye hatavipuuza. Katika neema hafuti utendaji wa kipawa chochote miongoni mwa vipawa vyake vya ajabu, bali huvitumia kwa kuwasilisha makusudi na mawazo yake.

Basi ni jambo la maana kupita yote, kwamba tuzilishe akili zetu kwa mambo ya hakika, kwa habari za kutegemewa, kwa matokeo ya uzoefu wa wanadamu, na (zaidi ya yote) kwa mafundisho ya Neno la Mungu. Ni jambo la kustaajabisha mno kuona jinsi Biblia ilivyojaa maisha ya watu na historia, hata karibu hakuna shida hata moja katika maisha yetu isiyoweza kulinganishwa na kurasa zile za ajabu. Hakuna kitabu kama Biblia kwa kutoa nuru juu ya vituo vyenye giza vya maisha ya mwanadamu.

Hatuna haja wala haki ya kukimbia huku na huko kuwauliza rafiki zetu tunayopaswa kufanya; lakini hakuna ubaya katika kujitahidi kukusanya habari zote za kutegemewa, ambazo juu yake mwali wa fikira takatifu na kusudi lililowekwa wakfu waweza kula na kukua kuwa na nguvu. Ni juu yetu hatimaye kuamua kama Mungu atakavyotufundisha, lakini sauti yake yaweza kutujia kupitia sauti ya busara iliyotakaswa, ikitenda juu ya vitu tulivyokusanya. Bila shaka, nyakati fulani Mungu aweza kutuamuru kutenda kinyume na akili zetu, lakini haya ni ya nadra sana; na ndipo wajibu wetu utakuwa wazi kiasi kwamba hapawezi kuwa na kosa. Bali kwa sehemu kubwa Mungu atanena katika matokeo ya kufikiri kwa makini, tukipima na kulinganisha faida na hasara.

Petro alipofungwa gerezani, wala hakuweza kwa vyovyote kujiokoa mwenyewe, malaika alitumwa kumfanyia yale asiyoweza kujifanyia mwenyewe; lakini walipokwisha pita mtaa mmoja au miwili ya mji, malaika alimwacha ili alifikirie jambo mwenyewe. Hivyo ndivyo Mungu atutendeavyo hata sasa. Ataagiza mwenendo wa miujiza kwa njia za miujiza. Lakini pale nuru ya kawaida ya akili itoshapo kazi ile, atatuacha tutende kama nafasi itakavyoruhusu.

IV. ‑‑ TWALAZIMIKA KUWA SANA KATIKA MAOMBI KWA AJILI YA UONGOZI.

Zaburi zimejaa maombi ya dhati ya kutaka uongozi ulio wazi: "Ee Bwana, unionyeshe njia yako, uniongoze katika njia iliyo sawa, kwa sababu ya adui zangu." Ni sheria ya nyumba ya Baba yetu kwamba watoto wake waombe wanachohitaji. "Mtu ye yote akipungukiwa na hekima, na aombe kwa Mungu, awapaye wote kwa ukarimu, wala hakemei."

Katika wakati wa mabadiliko na shida, twahitaji kuwa sana katika maombi, si magotini tu, bali katika ile namna tamu ya maombi ya ndani, ambamo roho hujitoa daima kwa Mungu, ikiomba ionyeshwe mapenzi yake; ikisihi yapate kuchapwa juu ya uso wake, kama vile miili ya mbinguni ijipigavyo picha juu ya karatasi iliyoandaliwa. Akiwa amefungwa katika maombi kama haya mwaminifu mwenye kutumaini aweza kukanyaga sitaha ya meli ya baharini usiku baada ya usiku, akiwa na hakika kwamba yeye aziongozaye nyota katika mizunguko yake hatashindwa kuiongoza nafsi isiyo na lengo lingine ila kuyatenda mapenzi yake.

Namna moja nzuri ya kuomba wakati wa hivi ni kuomba kwamba milango ifungwe, kwamba njia izibwe, na kwamba kila juhudi isiyo kulingana na mapenzi ya Mungu izuiwe tangu mwanzo wake kabisa. Weka jambo hilo mikononi mwa Mungu kabisa tangu mwanzo, naye hatashindwa kuivunja miradi na kulishinda lengo lisilo kulingana na mapenzi yake matakatifu.

V. ‑‑ TWALAZIMIKA KUUNGOJEA UFUNUKO WA TARATIBU WA MPANGO WA MUNGU KATIKA MAONGOZI YAKE.

Misukumo ya Mungu ndani yetu na neno lake nje yetu sikuzote huthibitishwa na Maongozi yake yanayotuzunguka, nasi twapaswa kungoja kwa utulivu hata haya matatu yatakapoelekea katika nukta moja.

Nyakati fulani yaonekana kana kwamba ni lazima tutende. Kila mtu asema ni lazima tufanye jambo fulani; na, kweli, mambo yaonekana yamefikia hali ya kukata tamaa kiasi kwamba ni lazima. Nyuma yetu wako Wamisri; kuume na kushoto ni majabali yasiyofikika; mbele yetu ni bahari. Si rahisi nyakati kama hizo kusimama kimya na kuuona wokovu wa Mungu; lakini ni lazima. Sauli alipojilazimisha, na kutoa sadaka, kwa sababu alidhani kwamba Samweli amekawia kuja, alifanya kosa kubwa la maisha yake.

Mungu aweza kukawia kuja katika sura ya Maongozi yake. Kulikuwa na kukawia kabla ya jeshi la Senakeribu kulala kama majani yaliyonyauka kuuzunguka Mji Mtakatifu. Kulikuwa na kukawia kabla Yesu hajaja akitembea juu ya bahari alfajiri na mapema, au kufanya haraka kumfufua Lazaro. Kulikuwa na kukawia kabla malaika hajaenda kasi upande wa Petro usiku uliotangulia kuuawa kwake kulikotarajiwa. Yeye hukaa muda wa kutosha kuijaribu subira ya imani, lakini si dakika moja nyuma ya saa ya mwisho ya uhitaji. "Maana njozi hii bado ni kwa wakati ulioamriwa, lakini mwishoni itanena, wala haitasema uongo; ijapokawia, ingojee; kwa kuwa haina budi kuja, haitakawia."

Ni jambo la ajabu sana jinsi Mungu atuongozavyo kwa mazingira. Wakati mmoja njia yaweza kuonekana imezibwa kabisa, kisha punde baadaye tukio dogo fulani hutokea, ambalo laweza kutoonekana kubwa kwa wengine, bali kwa jicho makini la imani lasema mengi. Nyakati fulani ishara hizi hurudiwa kwa njia mbalimbali kama jibu la maombi. Si matokeo ya bahati nasibu, bali ni kufunguka kwa mazingira kuelekea njia tunayopaswa kuiendea. Nazo huanza kuongezeka, kadiri tusongavyo mbele kuelekea lengo letu, kama vile taa zifanyavyo tukaribiapo mji wenye watu wengi, tunapopita nchini kwa treni ya usiku ya kasi.

Nyakati fulani watu hutamani malaika aje kuwaonyesha njia yao; jambo hilo laonyesha tu kwamba bado wakati wao wa kusonga haujafika. Kama hujui unalopaswa kufanya, simama kimya hata utakapojua. Na wakati wa kutenda utakapofika, mazingira, kama vimulimuli, yatametameta njiani mwako; nawe utakuwa na hakika kubwa kwamba u sawa, wakati mashahidi watatu wa Mungu wanapokubaliana, kiasi kwamba usingeweza kuwa na hakika zaidi hata kama malaika angekuita mbele.

Mazingira ya maisha yetu ya kila siku ni kwetu dalili isiyokosea ya mapenzi ya Mungu, yanapopatana na misukumo ya ndani ya Roho na Neno la Mungu. Maadamu yamesimama tuli, ngoja. Utakapolazimika kutenda, yatafunguka, na njia itafanyika kupitia bahari na mito, majangwa na miamba.

Mara nyingi twafanya kosa kubwa, tukidhani kwamba Mungu hatuongozi hata kidogo, kwa sababu hatuwezi kuona mbali mbele. Lakini hii siyo njia yake. Yeye huahidi tu kwamba hatua za mtu mwema zitaongozwa na Bwana. Si mwaka ujao, bali kesho. Si maili ijayo, bali yadi ijayo. Si mchoro wote, bali kishono kinachofuata katika nguo. Ukitazamia zaidi ya hili utakata tamaa, na kurejea gizani. Bali hili litakuhakikishia kuongozwa katika njia iliyo sawa, kama utakavyokiri utakapoyatazama kutoka vilele vya utukufu.

Hatuwezi kulitafakari kwa kina kupita kiasi funzo la wingu lililotolewa katika somo lile zuri la picha juu ya Uongozi (Hesabu 9:15‑23): "Na siku ile maskani iliposimamishwa wingu likaifunika maskani, ndiyo hema ya ushuhuda; na wakati wa jioni palikuwa juu ya maskani kama kuonekana kwa moto, hata asubuhi. Ndivyo ilivyokuwa daima; wingu liliifunika mchana, na kuonekana kwa moto usiku. Na kila wingu lilipoinuliwa juu ya hema, ndipo wana wa Israeli waliposafiri; na mahali pale wingu liliposimama, ndipo wana wa Israeli waliposimamisha hema zao. Kwa amri ya Bwana wana wa Israeli walisafiri, na kwa amri ya Bwana walisimamisha hema; siku zote wingu lilipokaa juu ya maskani walikaa hemani mwao. Na hapo wingu lilipokaa juu ya maskani siku nyingi, ndipo wana wa Israeli waliishika amri ya Bwana, wasisafiri. Na palikuwa na wakati ambapo wingu lilikaa juu ya maskani siku chache; kwa amri ya Bwana walikaa hemani mwao, na kwa amri ya Bwana walisafiri. Na palikuwa na wakati ambapo wingu lilikaa tangu jioni hata asubuhi; na wingu lilipoinuliwa asubuhi, ndipo walisafiri; kama ni mchana au usiku wingu lilipoinuliwa, walisafiri. Kama ni siku mbili, au mwezi, au mwaka, wingu lilipokaa juu ya maskani, likikaa juu yake, wana wa Israeli walikaa hemani mwao, wasisafiri; lakini lilipoinuliwa walisafiri. Kwa amri ya Bwana walikaa hemani, na kwa amri ya Bwana walisafiri; waliishika amri ya Bwana, kwa amri ya Bwana kwa mkono wa Musa."

Na tuangalie juu kwa kutosha ili kupata uongozi. Na tuitie moyo nafsi yetu kumngojea Mungu peke yake hata itakapopewa. Na tuisitawishe ile unyenyekevu ambao yeye atauongoza katika hukumu. Na tutafute kuwa wepesi wa kufahamu, ili tuweze kuona dalili ndogo kabisa ya mapenzi yake. Na tusimame na viuno vilivyofungwa na taa zilizowashwa, ili tuwe wepesi kutii. Heri watumishi hao. Wataongozwa kwa njia iliyo sawa hata mji wa dhahabu wa watakatifu.

Kwa kunena juu yangu mwenyewe, baada ya miezi ya kungoja na kuomba, nimekuwa na hakika kabisa juu ya Uongozi wa Baba yangu wa mbinguni; na kwa mkazo wa uzoefu binafsi, ningetia moyo kila nafsi yenye taabu na iliyochanganyikiwa isomayo maneno haya kumngojea Bwana kwa saburi, hata atakapoyaonyesha wazi mapenzi yake.