Sura 67 · dakika 1 za kusoma · dakika 1 za kusikiliza
Jinsi tunavyopaswa kumwita Bwana na kumhimidi wakati shida inapotubana
Mwanafunzi
JINA lako lihimidiwe milele, Ee Bwana, Wewe uliyetaka jaribu hili na taabu hii vinijie. Siwezi kuviepuka, lakini imenipasa kukimbilia Kwako, ili unisaidie na kuvigeuza viwe kwa faida yangu. Sasa nimefadhaika, Bwana, na moyo wangu hauna raha, kwa maana nateswa sana na mateso haya ya sasa.
Baba mpendwa, niseme nini? Nimebanwa kwa njia kali. Uniokoe na saa hii, ambayo hata hivyo nimeifikia ili Wewe utukuzwe nitakaponyenyekezwa sana na kuwekwa huru na Wewe. Basi, ikupendeze kuniokoa, Bwana, kwa maana mimi, maskini mnyonge nilivyo, naweza kufanya nini, au niende wapi bila Wewe? Unipe uvumilivu, Bwana, hata sasa hivi. Unisaidie, Mungu wangu, nami sitaogopa, hata nikihuzunishwa kiasi gani.
Lakini hapa, katikati ya taabu hizi, niseme nini? Mapenzi yako yatimizwe, Bwana. Nimestahili kabisa kutaabishwa na kuhuzunishwa. Lakini imenipasa kuvumilia. Laiti ningeweza kuvumilia kwa saburi, mpaka dhoruba ipite na utulivu urudi! Lakini mkono wako ulio mweza yote waweza kuliondoa jaribu hili kwangu, au kulipunguzia shambulio lake nguvu ili nisizame kabisa chini yake, kama ulivyonitendea mara nyingi sana hapo awali, Wewe, Mungu wangu, Rehema yangu. Na kadiri hali yangu inavyozidi kuwa ngumu, ndivyo badiliko hili la mkono wa kuume wa Aliye juu linavyokuwa jepesi zaidi Kwako.