Sura 6 · dakika 22 za kusoma · dakika 28 za kusikiliza
Yesu Kristo Mwanadamu Halisi
“Naye Neno alifanyika mwili, akakaa kwetu; nasi tuliuona utukufu wake, utukufu kama wa Mwana pekee atokaye kwa Baba, amejaa neema na kweli.”—Yohana 1:14.
“Ambaye yeye mwanzo alikuwa yuna namna ya Mungu, naye hakuona kule kuwa sawa na Mungu kuwa ni kitu cha kushikamana nacho; bali alijifanya kuwa hana utukufu, akatwaa namna ya mtumwa, akawa ana mfano wa wanadamu. Tena, alipoonekana ana umbo kama mwanadamu, alijinyenyekeza akawa mtii hata mauti, naam, mauti ya msalaba.”—Wafilipi 2:6-8.
“Kwa sababu Mungu ni mmoja, na mpatanishi kati ya Mungu na wanadamu ni mmoja, mwanadamu Kristo Yesu.”—1 Timotheo 2:5.
Somo letu katika sura hii ni “Yesu Kristo Mwanadamu Halisi.” Ninayo maandiko matatu, na kiini cha yote nitakayoyasema ni maandiko haya matatu. Andiko la kwanza ni Yohana 1:14: “Naye Neno alifanyika mwili, akakaa kwetu; nasi tuliuona utukufu wake, utukufu kama wa Mwana pekee atokaye kwa Baba, amejaa neema na kweli.” Andiko la pili ni Wafilipi 2:6-8: “Ambaye yeye mwanzo alikuwa yuna namna ya Mungu, naye hakuona kule kuwa sawa na Mungu kuwa ni kitu cha kushikamana nacho; bali alijifanya kuwa hana utukufu, akatwaa namna ya mtumwa, akawa ana mfano wa wanadamu. Tena, alipoonekana ana umbo kama mwanadamu, alijinyenyekeza akawa mtii hata mauti, naam, mauti ya msalaba.” Na andiko la tatu ni 1 Timotheo 2:5: “Kwa sababu Mungu ni mmoja, na mpatanishi kati ya Mungu na wanadamu ni mmoja, mwanadamu Kristo Yesu.”
Tuliona katika sura iliyotangulia kwamba Yesu Kristo alikuwa Mungu, kwamba ndani yake ulikaa utimilifu wote wa Uungu kwa jinsi ya kimwili, kwamba alikuwa na sifa zote zilizo za Kimungu peke yake, kwamba alitenda kazi zote zilizo za Kimungu peke yake, kwamba alishika katika fikira za Agano Jipya nafasi ile ile aliyoishika Yehova katika fikira za Agano la Kale, kwamba alikuwa nafsi inayostahili imani yetu kamili, upendo wetu mkuu kuliko wote, utii wetu usiositasita, na ibada yetu ya moyo wote, kwamba alikuwa Mungu na ndiye Mungu. Lakini katika mafungu tuliyoyachukua kuwa maandiko yetu leo, tunaambiwa kwamba huyu Mmoja wa Kimungu, aliyekuwako tangu milele yote pamoja na Mungu Baba, naye alikuwa Mungu, alifanyika mwanadamu. Katika kufanyika mwanadamu hakuacha kuwa Mungu; bali Neno, yule Neno wa Milele, aliyekuwa pamoja na Mungu naye alikuwa Mungu, aliitwaa asili ya kibinadamu juu yake. Ingawa alikuwa Mungu kweli wa Mungu kweli, alikuwa mwanadamu halisi, mwanadamu kwa kweli na kwa ukamilifu kama mwanadamu ye yote aliyepata kutembea juu ya nchi hii. Fundisho la ubinadamu halisi wa Kristo ni sehemu ya lazima ya imani ya Kikristo kama vile fundisho la Uungu wake halisi lilivyo. Kuna kundi moja kubwa sana la watu wasiouona Uungu halisi wa Yesu Kristo. Hao wamo katika kosa la msingi. Kuna kundi lingine kubwa la watu wanaouona Uungu wake tu, wala hawauoni uhalisi wa ubinadamu wake. Hao nao wamo katika kosa. Fundisho la Mwokozi ambaye ni mwanadamu tu ni fundisho la uongo; na fundisho la Mwokozi ambaye ni Mungu tu ni fundisho la uongo vilevile. Fundisho la Biblia ni kwamba, Yeye aliyekuwa Mungu tangu milele yote, katika nafsi ya Yesu wa Nazareti alifanyika mwanadamu. Yako mafungu mengi katika Biblia yanayoueleza Uungu wa Bwana wetu Yesu kwa namna isiyoweza kukosewa wala kukwepwa. Yako mafungu mengine mengi katika Biblia yanayoueleza ubinadamu kamili wa Bwana wetu Yesu kwa namna isiyoweza kukosewa wala kukwepwa vilevile. Asubuhi hii tunashughulika na fundisho la ubinadamu wake halisi, yaani, kwamba alikuwa mwanadamu halisi.
I. UZAZI WA KIBINADAMU WA YESU KRISTO
Kwanza kabisa, Biblia inatufundisha kwamba Yesu Kristo alikuwa na uzazi wa kibinadamu. Twasoma katika Luka 2:7, “Akamzaa (yaani, Mariamu) mwanawe, kifungua mimba, akamvika nguo za kitoto, akamlaza horini, kwa sababu hawakupata nafasi katika nyumba ya wageni.” Hapa tunaambiwa kwamba Bwana wetu Yesu Kristo, ingawa alichukuliwa mimba kwa njia isiyo ya kawaida, alikuwa Mwana wa Mariamu. Mariamu alikuwa mama yake kwa kweli kama vile Mungu alivyokuwa Baba yake. Alikuwa na uzazi wa kibinadamu kwa kweli kama vile alivyokuwa na uzazi wa Kimungu. Katika sura ya kwanza ya Injili hii hii ya Luka, katika mstari wa 35, twasoma, “Malaika akajibu akamwambia (yaani, Mariamu), Roho Mtakatifu atakujilia juu yako, na nguvu zake Aliye juu zitakufunika kama kivuli; kwa sababu hiyo hicho kitakatifu kitakachozaliwa kwako kitaitwa Mwana wa Mungu.” Aliitwa Mwana wa Mungu kwa sababu alizaliwa moja kwa moja kwa uweza wa Roho Mtakatifu; lakini Roho Mtakatifu alimjilia Mariamu, naye akawa mama wa Yeye huyu ambaye angeitwa “Mwana wa Mungu.” Si tu kwamba alitoka kwa Mariamu, na kwa njia hiyo kuwa na uzazi wa kibinadamu, bali tunaambiwa waziwazi pia katika Warumi 1:3 kwamba Mwana wa Mungu “Aliyezaliwa katika uzao wa Daudi kwa jinsi ya mwili.” Na katika Matendo 2:30 tunaambiwa kwamba alikuwa “Wa uzao wa viuno vyake (yaani, vya Daudi), kwa jinsi ya mwili.” Na katika Waebrania 7:14, tunaambiwa kwamba “Bwana wetu alitoka katika Yuda.” Ingawa tunaambiwa katika Wagalatia 4:4 kwamba “Hata ulipowadia utimilifu wa wakati, Mungu alimtuma Mwanawe,” tunaambiwa pia kwa uwazi ule ule katika mstari huo huo kwamba Mwana huyu wa Mungu “Alizaliwa na mwanamke.” Uzazi wa kibinadamu wa Bwana wetu na Mwokozi Yesu Kristo ulikuwa sehemu halisi na ya lazima ya nafsi yake kama vile uzazi wake wa Kimungu ulivyokuwa.
II. ASILI YA KIBINADAMU YA KIMWILI YA YESU KRISTO
Lakini si tu kwamba Yesu Kristo alikuwa na uzazi wa kibinadamu; alikuwa na asili ya kibinadamu ya kimwili, mwili wa kibinadamu. Jambo hili linaonekana katika andiko letu la kwanza, “Neno Alifanyika Mwili,” na katika Waebrania 2:14 tunafundishwa “Basi kwa kuwa watoto wameshiriki damu na nyama, Yeye naye (yaani, Bwana wetu Yesu naye) vivyo hivyo alishiriki yayo hayo, ili kwa mauti amharibu yeye aliyekuwa na nguvu za mauti, yaani, Ibilisi.” Maneno yasingeweza kulifanya jambo hili kuwa wazi zaidi, kwamba Bwana wetu Yesu alikuwa na mwili halisi wa kibinadamu, asili halisi ya kibinadamu ya kimwili. Naam, Mtume Yohana anatufundisha katika 1 Yohana 4:2, 3, kwamba kutokuamini uhalisi wa mwili wake wa kibinadamu ni alama ya Mpinga Kristo. Asema, “Katika hili mwamjua Roho wa Mungu; kila roho ikiriyo kwamba Yesu Kristo amekuja katika mwili yatokana na Mungu. Na kila roho isiyomkiri Yesu haitokani na Mungu. Na hii ndiyo roho ya mpinga Kristo ambayo mmesikia kwamba yaja; na sasa imekwisha kuwako duniani.” Walikuwako katika siku za Yohana watu walioukana uhalisi wa asili ya kibinadamu ya Yesu, waliodai kwamba mwili wake ulikuwa mwili wa kuonekana tu, au wa kudhaniwa tu, kwamba ulikuwa njozi, au, kama Wanasayansi wa Kikristo (Christian Scientists) wasemavyo sasa, “wazo la kufa,” naye Yohana, akinena katika hekima na uweza wa Roho Mtakatifu, anatangaza kwamba fundisho hilo ni alama ya Mpinga Kristo. Hii ndiyo alama moja kuu kuliko zote leo, kwamba “Sayansi ya Kikristo” ni ya Mpinga Kristo.
Yesu Kristo hakuwa na mwili wa kibinadamu wakati wa maisha yake hapa duniani tu, bali baada ya ufufuo wake bado alikuwa na mwili wa kibinadamu. Wafuasi wa Millennial Dawn (wafuasi wa Pastor Russell) wanatufundisha kwamba sivyo; kwamba, ingawa kabla ya kufanyika kwake mwili alikuwa kiumbe cha roho kabisa, wakati wa kufanyika kwake mwili alikuwa kiumbe cha kibinadamu kabisa, na tangu kifo na ufufuo wake yeye ni kiumbe cha Kimungu kabisa: mambo hayo yote si ya Kimaandiko, na kwa hiyo si kweli. Yeye mwenyewe alisema baada ya ufufuo wake, “Tazameni mikono yangu na miguu yangu, ya kuwa ni mimi mwenyewe; nishikeni-shikeni, mwone; kwa maana roho haina mwili na mifupa kama mnavyoniona mimi kuwa nayo. Na alipokwisha kusema hayo, aliwaonyesha mikono yake na miguu yake” (Luka 24:39, 40). Na kwa Tomaso katika Yohana 20:27, baada ya Tomaso kuutilia shaka uhalisi wa ufufuo wake, alisema, “Lete hapa kidole chako, uitazame mikono yangu; ulete na mkono wako, uutie ubavuni mwangu; wala usiwe asiyeamini, bali aaminiye.” Si tu kwamba baada ya ufufuo wake, alipokuwa angali hapa duniani, alikuwa na mwili halisi wa kibinadamu, bali hata sasa anao mwili wa kibinadamu katika utukufu. Katika yale maono ya ajabu ya mbinguni aliyopewa Stefano wakati alipopigwa mawe na kuuawa, twasoma katika Matendo 7:55, 56, “Lakini yeye akijaa Roho Mtakatifu, akakaza macho yake mbinguni, akauona utukufu wa Mungu, na Yesu amesimama upande wa kuume wa Mungu. Akasema, Tazama, naona mbingu zimefunuka, na Mwana wa Adamu amesimama mkono wa kuume wa Mungu.” Na atakapokuja tena kuitwaa mamlaka yake ya haki juu ya nchi hii, atakuja na mwili wa kibinadamu, akija kama “Mwana wa Adamu.” Yeye mwenyewe alimwambia Kuhani Mkuu aliposimama mbele yake akihukumiwa, katika Mathayo 26:64, “Lakini nawaambieni, Tangu sasa mtamwona Mwana wa Adamu ameketi mkono wa kuume wa nguvu, akija juu ya mawingu ya mbinguni.” Katika tamko hili la Bwana wetu tunalo tangazo la Uungu wake, lakini pia tangazo lililo wazi vilevile kwamba alikuwa mwanadamu halisi, na kwamba atakuja tena kama mwanadamu mwenye mwili wa kibinadamu, ingawa umetukuzwa. Naam, tunaambiwa katika Wafilipi 3:20, 21 kwamba atakapokuja hivyo, ataigeuza miili hii yetu ya kibinadamu ya sasa, miili ya unyonge wetu wa sasa, ifanane na mwili wake wa utukufu, mwili wake wa kibinadamu uliotukuzwa.
III. ALIKUWA CHINI YA MIPAKA YA KIBINADAMU
Lakini uhalisi na ukamilifu wa asili ya kibinadamu ya Bwana wetu unaonekana si tu katika ukweli kwamba alikuwa na uzazi wa kibinadamu na mwili wa kibinadamu: tunafundishwa pia waziwazi kwamba, ingawa kama Mungu alikuwa na sifa zote na alitenda kazi zote za Uungu, kama mwanadamu alikuwa chini ya mipaka ya kibinadamu.
1. Alikuwa chini ya mipaka ya kimwili iliyo ya lazima kwa ubinadamu. Katika Yohana 4:6 twasoma kwamba Yesu Kristo alichoka. Maneno yenyewe ni haya, “Basi Yesu, hali amechoka kwa safari yake, akaketi hivi kisimani. Ilikuwa yapata saa sita.” Lakini Mungu hachoki kamwe. Twasoma waziwazi katika Isaya 40:28 “Je, hukujua? Je, hukusikia, ya kuwa Mungu wa milele, Bwana, Muumba wa miisho ya dunia, hazimii, wala hachoki?”
Tunaambiwa katika Mathayo 8:24 kwamba Yesu Kristo alilala usingizi. Lakini Mungu halali usingizi kamwe. Twasoma katika Zaburi 121:4, 5, “Tazama, yeye aliye mlinzi wa Israeli hatasinzia wala hatalala usingizi. Bwana ndiye mlinzi wako; Bwana ndiye uvuli wako mkono wako wa kuume.” Kwa kuilinganisha mistari hii miwili, tunaona waziwazi kwamba Yehova (yaani, yule Bwana wa mistari hii) halali usingizi kamwe. Lakini Yesu alilala usingizi; basi ingawa alikuwa Yehova, hakuwa Yehova tu. Alikuwa mwanadamu kwa kweli kama vile alivyokuwa Mungu.
Katika Mathayo 21:18 twasoma kwamba Yesu Kristo aliona njaa; katika Yohana 19:28 twasoma kwamba Yesu Kristo aliona kiu; katika Luka 22:44 twasoma kwamba Yesu Kristo aliteseka kwa uchungu wa kimwili, uchungu wake ulikuwa mkubwa kiasi kwamba alikuwa karibu kufa kwa uchungu huo; na katika 1 Wakorintho 15:3 twasoma kwamba “Kristo alikufa,” kwamba kifo chake ni sehemu ya lazima ya Injili. Paulo asema katika fungu hili, “Kwa maana naliwatolea ninyi hapo kwanza yale niliyoyapokea mimi mwenyewe, ya kuwa Kristo alikufa kwa ajili ya dhambi zetu, kama yanenavyo maandiko.” Haikuwa kifo cha kuonekana tu, kilikuwa kifo halisi. Haikuwa “njozi.” Wokovu wetu unategemea uhalisi wa kifo chake. “Sayansi ya Kikristo” inaukata moyo wenyewe wa Injili. Mara nyingi tunaulizwa kama ilikuwa asili ya kibinadamu ya Yesu Kristo iliyokufa, au ilikuwa asili ya Kimungu iliyokufa. Haikuwa hii wala ile; asili hazifi, nafsi ndiyo hufa. Alikuwa Yesu aliyekufa, ile Nafsi iliyokuwa Mungu na mwanadamu kwa wakati mmoja. Tunaambiwa kwa maneno yaliyo wazi kabisa katika 1 Wakorintho 2:8, kwamba “Walimsulibisha Bwana wa utukufu,” nasi tuliona katika sura iliyopita kwamba “Bwana wa Utukufu” bila shaka yoyote ni cheo cha Kimungu. Ilikuwa ile Nafsi moja, Yesu, aliyekuwa wa kibinadamu na wa Kimungu kwa wakati mmoja, aliyekufa juu ya msalaba wa Kalvari.
2. Tena, kama mwanadamu, alikuwa chini ya mipaka ya kiakili na ya kimaadili.
Twasoma katika Luka 2:52, “Yesu akazidi kuendelea katika hekima na kimo, na katika kumpendeza Mungu na wanadamu.” Kwa kuwa tunaambiwa hapa kwamba alikua katika hekima, ni lazima awe alikuwa mkamilifu zaidi katika hekima baada ya kukua kuliko alivyokuwa kabla ya kukua; na kwa kuwa alikua katika kumpendeza Mungu na wanadamu, ni lazima awe alifikia daraja la juu zaidi la ukamilifu wa kimaadili alipokua kuliko lile alilokuwa amelifikia kabla ya kukua. Ingawa katika Mtoto wa Bethlehemu Mungu alikuwa amefanyika mwili, hata hivyo alikuwa mtoto mchanga halisi, akakua si katika kimo tu, bali katika hekima na katika kumpendeza Mungu na wanadamu. Kama mwanadamu alikuwa na mipaka katika maarifa; yeye mwenyewe asema katika Marko 13:32, “Walakini, habari ya siku ile na saa ile (yaani, siku na saa ya kurudi kwake mwenyewe) hakuna aijuaye, hata malaika walio mbinguni, wala Mwana, ila Baba.” Bila shaka, maarifa yake yalikuwa na mipaka aliyojiwekea mwenyewe: ili kutuwekea kielelezo, mimi na wewe, tufuate nyayo zake, yeye kwa hiari yake kama mwanadamu aliweka kando maarifa yake ya wakati wa kurudi kwake mwenyewe.
Zaidi ya hayo, tunafundishwa waziwazi na kwa wazi kabisa katika Waebrania 4:15 kwamba Yesu Kristo “Alijaribiwa sawasawa na sisi katika mambo yote.” Lakini tunapokumbuka jambo hili kuwa uthibitisho ulio wazi na kamili wa uhalisi wa ubinadamu wake, si wa kimwili tu bali wa kiakili na wa kimaadili pia, tunapaswa kukumbuka pia yale yanayosemwa katika mstari huo huo, kwamba alijaribiwa “bila kutenda dhambi,” yaani, kwamba hapakuwa na doa wala chembe ndogo kabisa ya dhambi katika kujaribiwa kwake, wala hakukubali hata kwa kitambo kimoja, si kwa wazo wala kwa tamaa wala kwa tendo. Hata hivyo, alijaribiwa, akayashinda majaribu kwa njia ile ile ambayo sisi tunaweza kuyashinda, kwa Neno la Mungu na kwa maombi. Yeye mwenyewe kwa hiari yake alijiweka chini ya mipaka ya lazima ya kimaadili ambayo mwanadamu yuko chini yake, ili amkomboe mwanadamu.
3. Tena, kama mwanadamu, alikuwa chini ya mipaka katika njia aliyoipata nguvu na katika njia aliyoitumia nguvu. Yesu Kristo aliipata nguvu kwa ajili ya kazi ya Kimungu aliyoifanya alipokuwa hapa duniani, si kwa Uungu wake uliofanyika mwili, bali kwa maombi. Twasoma katika Marko 1:35, “Na asubuhi na mapema sana kungali giza, akaondoka, akatoka akaenda mahali pasipokuwa na watu, akaomba huko.” Tena twasoma kwamba kabla hajamfufua Lazaro kutoka kwa wafu, na kumwita atoke kaburini kwa Neno lake, aliinua macho yake kwa Mungu akasema, “Baba, nakushukuru kwa kuwa umenisikia,” jambo linaloonyesha bila shaka yoyote kwamba nguvu ambayo kwayo alimfufua Lazaro kutoka kwa wafu haikuwa nguvu yake ya asili, ya kuzaliwa nayo, ya Kimungu, bali ilikuwa nguvu iliyopatikana kwa maombi. Imetajwa si chini ya mara ishirini na tano kwamba aliomba. Aliipata nguvu kwa ajili ya kazi na kwa ajili ya ushindi wa kimaadili kama wanadamu wengine wanavyoipata, kwa maombi. Alikuwa chini ya masharti ya kibinadamu ya kupata kile alichokitamani. Aliipata nguvu kwa ajili ya kazi za Kimungu na miujiza aliyoifanya kwa kutiwa mafuta na Roho Mtakatifu. Twasoma katika Matendo 10:38, “Jinsi Mungu alivyomtia mafuta Yesu wa Nazareti kwa Roho Mtakatifu na nguvu; naye akazunguka huku akitenda kazi njema, na kuwaponya wote walioonewa na Ibilisi; kwa maana Mungu alikuwa pamoja naye.” Na tunafundishwa, zaidi ya hayo, kwamba katika siku za kujinyenyekeza kwake alikuwa chini ya mipaka katika kuitumia nguvu. Yeye mwenyewe alisema muda mfupi kabla ya kusulibiwa kwake na kutukuzwa kwake kulikofuata, katika Yohana 14:12, “Amin, amin, nawaambia, Yeye aniaminiye mimi, kazi nizifanyazo yeye naye atazifanya; naam, na kubwa kuliko hizo atafanya, kwa kuwa mimi naenda kwa Baba,” na maana yake iliyo dhahiri ni kwamba, katika siku za mwili wake palikuwa na mpaka katika kuitumia kwake nguvu, lakini baada ya kutukuzwa kwake, alipotukuzwa pamoja na Baba kwa utukufu ule aliokuwa nao pamoja naye kabla ulimwengu haujakuwako, pasingekuwa tena na mipaka katika kuitumia nguvu yake; na kwa hiyo sisi, tukiwa tumeunganishwa na Bwana wetu Yesu, si katika kujinyenyekeza kwake, bali katika kutukuzwa kwake na kurudishwa kwake katika utukufu wake wa Kimungu, tutafanya kazi kubwa kuliko zile alizozifanya katika siku za kujinyenyekeza kwake.
IV. UHUSIANO WA KIBINADAMU WA YESU KRISTO NA MUNGU
Ukamilifu wa ubinadamu wa Yesu Kristo unaonekana katika jambo lingine tena, nalo ni kwamba, uhusiano aliokuwa nao na Mungu kama mwanadamu ulikuwa uhusiano wa mwanadamu, hata Mungu alikuwa Mungu wake. Yeye mwenyewe amwambia Mariamu katika Yohana 20:17, “Usinishike; kwa maana sijapaa bado kwenda kwa Baba; lakini enenda kwa ndugu zangu, ukawaambie, Ninapaa kwenda kwa Baba yangu naye ni Baba yenu, na Mungu wangu naye ni Mungu wenu.” Maana iliyo dhahiri ya maneno haya ni kwamba uhusiano wa Yesu Kristo na Mungu Baba ulikuwa uhusiano wa mwanadamu. Anamtaja Mungu Baba kuwa “Mungu wangu.” Ingawa alikuwa na sifa zote na alitenda kazi zote za Uungu, Yesu Kristo, Mwana, alikuwa chini ya Baba. Jambo hili linaeleza maneno ya Bwana wetu ambayo yamewatatanisha wengi wanaoamini Uungu wake, maneno kama yale, kwa mfano, ya Yohana 14:28, ambapo Yesu asema, “Mlisikia ya kuwa mimi naliwaambia, Naenda zangu, tena nakuja kwenu. Kama mngalinipenda, mngalifurahi kwa sababu naenda kwa Baba; kwa kuwa Baba ni mkuu kuliko mimi.” Mara nyingi swali huulizwa, “Ikiwa Yesu Kristo ni Mungu, Baba angewezaje kuwa mkuu kuliko yeye?” Jibu lake rahisi sana ni hili: kwamba yeye, kama Mwana, alikuwa chini ya Baba; sawa na Baba katika kuwa na sifa zote zilizo za Kimungu peke yake, na katika kutenda kazi zote za Kimungu, na kama mwenye kustahili ibada yetu ya moyo wote, lakini chini ya Baba katika cheo chake. Uhusiano wa Yesu Kristo na Baba unafanana na uhusiano wa mke na mume katika jambo hili, kwamba mke aweza kuwa sawa kabisa na mume, lakini hata hivyo, “Kichwa cha Mwanamke ni Mwanamume,” yeye yuko chini ya mwanamume, kama vile tunavyoambiwa katika mstari huo huo (1 Wakorintho 11:3) “Kichwa cha Kristo ni Mungu,” yaani, Yesu Kristo, Mwana, yuko chini ya Baba.
Ni dhahiri kutokana na yale tuliyoyasoma katika Neno la Mungu, kwamba Yesu Kristo kwa kila hali alikuwa mwanadamu wa kweli, mwanadamu halisi, mwanadamu kamili. Ilimpasa “katika mambo yote” “kufananishwa na ndugu zake” (linganisha Waebrania 2:17). Alikuwa chini ya masharti yote ya maisha, ya kimwili, ya kiakili na ya kimaadili, yaliyo ya lazima kwa asili ya kibinadamu. Kwa kila hali alikuwa mwanadamu halisi. Alifanyika hivyo kwa hiari yake ili awakomboe wanadamu. Tangu milele yote alikuwako “katika namna ya Mungu,” na angeweza kubaki “katika namna ya Mungu,” lakini kama angebaki hivyo, tungalipotea. Kwa hiyo, kwa ajili ya upendo wake kwetu, sisi jamii iliyoanguka, kama tunavyofundishwa katika mojawapo ya maandiko yetu (Wafilipi 2:5-8), yeye “Hakuona kule kuwa sawa na Mungu kuwa ni kitu cha kushikamana nacho; bali alijifanya kuwa hana utukufu, akatwaa namna ya mtumwa, akawa ana mfano wa wanadamu. Tena, alipoonekana ana umbo kama mwanadamu, alijinyenyekeza akawa mtii hata mauti, naam, mauti ya msalaba.” Lo, upendo wa ajabu! kwamba kwa ajili ya upendo wake kwetu aitwae asili yetu juu yake, akiupa kisogo utukufu uliokuwa wake tangu milele yote, na kujitwika aibu yote na mateso yote yaliyohusika katika ukombozi wetu, na kufanyika mmoja wetu ili afe kwa ajili yetu na kutukomboa! Lo, jinsi ilivyo ya ajabu “Neema ya Bwana wetu Yesu Kristo, ya kuwa ingawa alikuwa tajiri, alikuwa maskini kwa ajili yetu, ili sisi tupate kuwa matajiri kwa umaskini wake.” (2 Wakorintho 8:9.) Alishiriki asili ya kibinadamu ili sisi tupate kuwa washirika wa tabia ya Uungu. Falsafa ya asili ya Kimungu na ya kibinadamu ya Kristo, falsafa ya Agano Jipya, ni falsafa ya ajabu mno, falsafa ya ajabu kuliko zote ambazo ulimwengu umepata kusikia, na, Mungu ashukuriwe, ni falsafa ya kweli.
Lakini huenda mtu akauliza, “Tutalipatanishaje fundisho la Biblia la Uungu wa kweli wa Yesu Kristo na fundisho la Biblia la asili halisi ya kibinadamu ya Yesu Kristo, fundisho kwamba alikuwa Mungu halisi na fundisho kwamba alikuwa mwanadamu kwa kweli vilevile?” Jibu la swali hili ni rahisi sana. Kupatanisha mafundisho si kazi yetu kuu. Kazi yetu ya kwanza ni kuchunguza maana ya mafungu mbalimbali ya Biblia, yakichukuliwa kwa tafsiri yake ya asili na ya kisarufi. Kisha, tukiweza kuyapatanisha, vema; tusipoweza, tunapaswa hata hivyo kuyaamini yote mawili, na kuuacha upatanisho wa mafundisho hayo mawili yanayoonekana kupingana kwa maarifa yetu yanayozidi kuongezeka, tunapoendelea kuwa na ushirika na Mungu na kujifunza Neno lake. Ni kanuni ya upumbavu kabisa na yenye madhara ya kufasiri Biblia, kwamba ni lazima tufasiri kila fungu la Biblia kwa namna ambayo twaweza kulipatanisha kwa urahisi na kila fungu lingine. Ni kanuni hii ya kufasiri inayozaa theolojia ya upande mmoja, na kwa hiyo isiyo ya kweli. Mtu mmoja, kwa mfano, huyachukua mafungu ya Kikalvini katika Biblia na kuyaamini, naye huyapotoa na kuyapindisha mafungu mengine, yale yanayofundisha uhuru wa mwanadamu, ili yalingane na yale yanayofundisha ukuu wa Mungu, naye anakuwa Mkalvini wa upande mmoja. Mtu mwingine huyaona tu yale mafungu yanayofundisha waziwazi uwezo wa mwanadamu wa kujiamulia mwenyewe, naye hutafuta kuyapotoa yote yanayofundisha ukuu wa Mungu, na hekima na mapenzi ya Mungu yanayoamua mambo tangu zamani, ili yalingane na mawazo yake, naye anakuwa Mwarminiani wa upande mmoja; na ndivyo ilivyo katika mfululizo wote wa mafundisho. Ni upumbavu mtupu, bila kutaja ufidhuli, kulishika Neno la Mungu kwa udanganyifu namna hii. Kazi yetu ni kuchunguza maana iliyokusudiwa waziwazi ya fungu tunalojifunza, kama inavyoamuliwa na matumizi ya maneno, muundo wa kisarufi na muktadha; na tukiisha kuipata maana iliyokusudiwa waziwazi, tuiamini, tukiweza kuipatanisha na jambo lingine tulilokwisha kulijua na kuliamini, au tusipoweza. Tunapaswa kukumbuka sikuzote kwamba mara nyingi kweli mbili, zote mbili zikiwa kweli waziwazi, ambazo wakati mmoja zilionekana kutopatanika kabisa au kupingana moja kwa moja, sasa, kwa maarifa yetu yaliyoongezeka, zinaonekana kupatana kwa uzuri. Kwa hiyo hatupaswi kuona ugumu wowote kukubali ukweli kwamba kweli ambazo bado zinaonekana kwetu kupingana, sasa hivi zinapatana kikamilifu katika hekima isiyo na mipaka ya Mungu, na siku moja zitapatana kikamilifu katika akili zetu, tutakapoukaribia zaidi ujuzi wa Mungu wa mambo yote. Biblia, kwa namna isiyo na hofu kabisa, inauweka Uungu kamili wa Yesu Kristo karibu kabisa na ubinadamu halisi wa Yesu Kristo. Kwa mfano, twasoma katika Mathayo 8:24, “Na tazama, palitokea msukosuko mkuu baharini, hata chombo kikafunikwa na mawimbi; lakini yeye (Yesu) alikuwa amelala.” Hapa tunalo tamko lililo wazi la ubinadamu halisi wa Bwana wetu, lakini mistari miwili baadaye, katika mstari wa 26, twasoma, “Akawaambia, Mbona mmekuwa waoga, enyi wa imani haba? Mara akaondoka, akaukemea upepo na bahari; kukawa shwari kuu.” Hapa tunaona Uungu wake ukiangaza waziwazi, hata pepo na mawimbi vikilitii neno lake. Si ajabu wanafunzi waliulizana, “Huyu ni mtu wa namna gani, hata pepo na bahari humtii?” (Mathayo 8:27). Jibu ni wazi: ni Mwanadamu wa Kimungu.
Tena twasoma katika Luka 3:21, “Ikawa, watu wote walipokuwa wakibatizwa, na Yesu naye amebatizwa, akawa anaomba, . . .” Hapa tunamwona Yesu katika ubinadamu wake, akibatizwa na akiomba. Hakika huyu ni mwanadamu. Lakini katika sehemu iliyobaki ya mstari huo na katika mstari unaofuata twasoma, “Mbingu zikafunuka; Roho Mtakatifu akashuka juu yake kwa mfano wa kiwiliwili, kama hua; sauti ikatoka mbinguni, Wewe ndiwe Mwanangu, mpendwa wangu, nimependezwa nawe.” Hapa Mungu kwa sauti inayosikika anatangaza kwamba yeye ni wa Kimungu, kwamba ni Mwana wake. Tena katika Yohana 11:38 twasoma, “Basi Yesu, hali akiugua tena nafsini mwake, akafika kaburini. Nalo lilikuwa pango, na jiwe limewekwa juu yake.” Hapa tunamwona Yesu katika ubinadamu wake, lakini mistari minne chini zaidi, katika mstari wa 43 na wa 44, twasoma, “Naye akiisha kusema hayo, alipaza sauti yake kwa nguvu, Lazaro, njoo huku nje. Yule aliyekufa akatoka.” Hapa tena Uungu wake unaangaza.
Katika Luka 9:28 twasoma, “Baada ya maneno hayo yapata siku nane, aliwachukua Petro na Yohana na Yakobo, akapanda mlimani kwenda kuomba.” Hapa tunauona waziwazi kabisa ubinadamu wake, mipaka yake, kumtegemea kwake Mungu; lakini katika mstari unaofuata, mstari wa 29, twasoma, “Alipokuwa akiomba, sura ya uso wake ilibadilika, na mavazi yake yakawa meupe yenye kumeta-meta.” Hapa tunaona Uungu wake ukiangaza, na tena katika mstari wa 35, twasoma habari ya sauti iliyotoka katika wingu, ikisema, “Huyu ni Mwanangu, mteule wangu; msikieni yeye.” Hapa Uungu wake unaonekana tena bila shaka yoyote.
Katika Mathayo 16:16, 17, twasoma, “Simoni Petro akajibu, akasema, Wewe ndiwe Kristo, Mwana wa Mungu aliye hai. Yesu akajibu, akamwambia, Heri wewe, Simoni Bar-yona; kwa kuwa mwili na damu havikukufunulia hili, bali Baba yangu aliye mbinguni.” Hapa pana tangazo lililo wazi la Yesu mwenyewe la Uungu wake. Lakini mistari minne chini zaidi katika sura hiyo, katika mstari wa 21, twasoma, “Tangu wakati huo Yesu alianza kuwaonyesha wanafunzi wake ya kwamba imempasa kwenda Yerusalemu, na kupata mateso mengi kwa wazee na wakuu wa makuhani na waandishi, na kuuawa, na siku ya tatu kufufuka.” Hapa tunalo tangazo lililo wazi kuliko yote la uhalisi na ukamilifu wa ubinadamu wake.
Katika Waebrania 1:6, twasoma habari ya Bwana wetu Yesu, “Na tena, yeye (yaani, Mungu Baba) amletapo mzaliwa wa kwanza ulimwenguni, asema, Na wamsujudu malaika wote wa Mungu.” Hapa pana tangazo lisiloweza kukosewa wala kukwepwa kabisa kwamba Yesu Kristo ni Nafsi ya Kimungu, anayepaswa kuabudiwa kama Mungu na malaika pamoja na wanadamu; na mistari miwili chini zaidi twasoma tangazo hili lingine la Uungu wake kamili, “Lakini kwa habari za Mwana asema, Kiti chako cha enzi, Ee Mungu, ni cha milele na milele.” Hapa tena Mwana anatangazwa kwa maneno yaliyo wazi kabisa kuwa Mungu; anaitwa Mungu. Lakini katika sura inayofuata kabisa, Waebrania 2:18, twasoma, “Kwa maana kwa kuwa yeye mwenyewe aliteswa akijaribiwa, aweza kuwasaidia wao wanaojaribiwa.” Hapa tunalo tangazo lililo wazi kuliko yote yawezekanayo la uhalisi wa asili yake ya kibinadamu.
Katika Waebrania 4:14 twasoma, “Basi, kwa kuwa tuna kuhani mkuu aliyeingia katika mbingu, Yesu, Mwana wa Mungu, na tuyashike sana maungamo yetu.” Hapa tunalo tangazo lililo wazi la Uungu wake; lakini katika mstari unaofuata kabisa, twasoma, “Kwa maana hatuna kuhani mkuu asiyeweza kuchukuana nasi katika udhaifu wetu; bali yeye alijaribiwa sawasawa na sisi katika mambo yote, bila kutenda dhambi.” Hili ni mojawapo ya matangazo yaliyo wazi kuliko yote yanayopatikana katika Biblia ya utimilifu na ukamilifu wa ubinadamu wake.
Fundisho la Uungu wa Yesu Kristo na fundisho kwamba Yesu Kristo alikuwa mwanadamu halisi huenda pamoja katika Biblia. Je, ninyi mnamwamini Mwokozi wa namna gani, Bwana Yesu wa namna gani? Je, mnamwamini Mwokozi aliye mwanadamu, na mwanadamu tu? Basi hammwamini yule Mwokozi anayeonyeshwa katika Biblia. Kwa upande mwingine, je, mnamwamini Mwokozi aliye Mungu, na Mungu tu? Basi hammwamini Mwokozi wa Biblia. Bwana Yesu, Bwana wetu na Mwokozi wetu, anayeonyeshwa kwetu katika Biblia, ni Mungu kweli wa Mungu kweli, na wakati huo huo ni ndugu yetu, mwanadamu mwenzetu, wala haoni haya kutuita ndugu. Lo, namshukuru Mungu kwamba ninaye Mwokozi aliye Mungu, mwenye sifa zote na uweza wote wa Uungu, ukamilifu wote wa Uungu, Mwokozi ambaye hakuna neno lililo gumu mno kwake. Namshukuru Mungu kwamba Mwokozi wangu ni Yeye aliyeziumba mbingu na nchi, naye huzishika nguvu zote za maumbile na za historia katika mamlaka yake; lakini vilevile namshukuru Mungu kwamba Mwokozi wangu ni ndugu yangu mwanadamu, Yeye aliyejaribiwa katika mambo yote sawasawa na mimi, Yeye aliye katika hali ya kuweza kuzichukua dhambi zangu, kwa upande mmoja kwa sababu yeye ni Mungu, na kwa upande mwingine kwa sababu yeye ni mwanadamu. Mwokozi aliye wa Kimungu tu asingeweza kuwa Mwokozi kwangu. Mwokozi aliye wa kibinadamu tu asingeweza kuwa Mwokozi kwangu. Lakini Mwokozi ambaye ndani yake Uungu na ubinadamu hukutana; Mwokozi aliye Mungu na mwanadamu kwa wakati mmoja, ndiye hasa Mwokozi ninayemhitaji, na Mwokozi mnayemhitaji ninyi, Mwokozi awezaye kuwaokoa kabisa wote wamjiao Mungu kwa yeye.