Magumu Kuhusu Imani

Baada ya kujiweka wakfu, hatua inayofuata ni imani. Humwongoza mtu kutoka jangwa la uzoefu wa Kikristo na kumwingiza katika nchi ijaayo maziwa na asali. Na hapa, kama ilivyo katika hatua ya kwanza, adui ana ustadi mkubwa wa kubuni magumu na vizuizi. Mtoto wa Mungu, akiuona utimilifu ulio ndani ya Yesu kwa ajili yake, hutamani kuushika. Lakini kila mwalimu anayemwuliza husisitiza kwamba imani peke yake ndiyo iwezayo kuupokea. Lakini akili yake imejaa fumbo kuhusu imani. Kauli hii, badala ya kusaidia, huifanya kuwa ngumu na tata kuliko wakati wowote.

“Bila shaka ni kwa njia ya imani,” asema, “kwa maana najua ya kuwa kila kitu katika maisha ya Kikristo ni kwa imani. Lakini ndilo hilo lifanyalo iwe ngumu hivi, kwa maana sina imani, wala sijui hata ni nini, wala jinsi ya kuipata.” Naye, akiwa amechanganyikiwa na ugumu huu, hutumbukia katika kukata tamaa. Taabu hii hutokana na kutoielewa imani. Kwa kweli, imani ni kitu rahisi kupita vyote ulimwenguni, tena chepesi kuliko vyote kukipata.

Wazo lako kuhusu imani, nadhani, limekuwa kama hili. Waiona kuwa ni kitu cha namna fulani. Ama ni zoezi la kidini la nafsi au hali ya neema ya moyo. Ni kitu kinachoshikika. Ukiwa nayo, waweza kuifurahia. Waweza kuitumia kama hati ya kuingilia upendeleo wa Mungu, au sarafu ya kununulia zawadi zake. Umekuwa ukiiombea imani. Ulitazamia kupata kitu kama hiki. Lakini hukupata kamwe cho chote.

Basi, wasisitiza kwamba huna imani. Lakini imani, kwa kweli, si kitu cha namna hii hata kidogo.

Si kitu kinachoshikika hata kidogo.

Ni kumwamini Mungu tu, na, kama vile kuona, haina maana yo yote pasipo kitu kinachoonwa. Ni sawa na ungefumba macho yako na kutazama ndani ili kuona kama una uwezo wa kuona, kama vile kutazama ndani ili kuona kama una imani. Waona kitu, na hivyo wajua ya kuwa waweza kuona; waamini kitu, na hivyo wajua ya kuwa una imani. Kwa maana, kama vile kuona ni kuona tu, vivyo hivyo imani ni kuamini tu. Jambo pekee la lazima kuhusu kuona ni, kukiona kitu kama kilivyo. Vivyo hivyo, jambo pekee la lazima kuhusu kuamini ni, kukiamini kitu kama kilivyo.

Wema hauko katika kuamini kwako, bali katika kile ukiaminicho. Ukiiamini kweli, wewe umeokoka; ukiuamini uongo, wewe umepotea. Kuamini ni kule kule katika hali zote mbili. Vitu vinavyoaminiwa ni kinyume kabisa. Hilo ndilo lifanyalo tofauti kuu. Wokovu wako huja, si kwa sababu imani yako inakuokoa. Ni kwa sababu inakuunganisha na Mwokozi aokoaye. Imani yako kwa kweli si kitu ila ni kifungo tu.

Nakusihi basi, uione urahisi wa imani. Ni kumwamini Mungu tu asemapo kwamba ametutendea jambo fulani, au atalitenda. Kisha, ni lazima tumtumaini kwamba atalitenda. Ni rahisi kiasi kwamba ni vigumu kulieleza.

Mtu akiuliza maana ya kumtumaini mtu ili anitendee kazi, naweza kujibu hili tu: Maana yake ni kumwacha aitende. Nahisi si lazima niitende mimi mwenyewe. Sote tumewakabidhi wengine kazi za maana. Tulipata pumziko kamili katika kutumaini huku. Ni kwa sababu tulikuwa na uhakika juu ya wale walioipokea. Ni mara ngapi mama huwakabidhi watoto wao wachanga wapendwao kwa yaya, pasipo hata chembe ya wasiwasi?

Sote twakabidhi afya na maisha yetu kwa wapishi, waendesha magari, madereva wa injini, na makondakta wa treni. Twafanya haya pasipo hofu. Watumishi hawa waliolipwa wangeweza kutuangamiza mara moja kama wangependa au kama wangekuwa wazembe.

Haya yote twayafanya, wala hatuyafanyii ghasia. Mara nyingi twawaamini watu baada ya kufahamiana kidogo tu. Twahitaji ujuzi wa jumla tu wa tabia ya kibinadamu na kanuni za kawaida za kijamii. Kamwe hatuhisi kwamba twafanya jambo la ajabu. Wewe mwenyewe umefanya haya yote, msomaji mpendwa, tena waendelea kuyafanya daima. Usingeweza kuishi katika ulimwengu huu hata siku moja kama usingeweza kuwaamini wenzako wanadamu. Wala haliingii kichwani mwako kusema kwamba huwezi.

Lakini bado husiti kusema, tena na tena, kwamba huwezi kumwamini Mungu wako! Tafadhali, wazia ukitenda katika mahusiano yako na wanadamu kama ufanyavyo katika yale ya kiroho. Wazia kwamba yakupasa kuanza kesho na wazo kichwani mwako: kwamba usingeweza kumwamini ye yote, kwa kuwa huna imani. Wakati wa kifungua-kinywa, ungesema, “Siwezi kula cho chote juu ya meza hii. Sina imani. Siwezi kuamini kwamba mpishi hakutia sumu katika kahawa. Wala kwamba mchinjaji hakuleta nyama yenye ugonjwa. Basi ungekufa njaa. Kisha, ungesema, “Siwezi kupanda treni. “Sina imani, hivyo siwezi kumwamini ye yote.”

Ungelazimika kwenda kwa miguu kila mahali. Ungechoka sana. Tena, usingeweza kufika mahali pengi ambapo ungeweza kufika kwa treni. Rafiki zako au wakala wako wa biashara wangapokuletea taarifa, ungesema, “Samahani, lakini siwezi kukuamini. “Sina imani wala siwezi kumwamini ye yote.” Kama ungesoma gazeti, ungelazimika kuliweka chini. Ungesema, “Siwezi kuamini hata neno moja lisemalo. Sina imani. Siamini kwamba yupo malkia, kwa maana sijapata kumwona. Wala siamini kwamba kuna Ayalandi, kwa maana sijapata kwenda huko.” Nami sina imani, hivyo bila shaka siwezi kuamini cho chote ambacho sijakihisi na kukigusa mwenyewe hasa. Ni jaribu kubwa, lakini siwezi kujizuia, kwa maana sina imani.”

Wazia siku kama hiyo. Ingekuwa maafa kwako. Ingeonekana kuwa ujinga kwa ye yote akutazamaye mchana kutwa. Ujue rafiki zako wangehisi wametukanwa. Watumishi wako wangeacha kazi. Kisha jiulize hili: Kama ni jambo baya hivi kutowaamini wenzako wanadamu, itakuwaje kumwambia Mungu kwamba huwezi kumwamini?

Wasema ni jaribu kubwa, lakini huwezi kujizuia; huna imani. Je, waweza kuwaamini wenzako wanadamu lakini usimwamini Mungu wako? Kwamba waweza kuupokea “ushuhuda wa wanadamu,” lakini huwezi kuupokea “ushuhuda wa Mungu?” Kwamba waweza kuyaamini maandiko ya mwanadamu, lakini huwezi kuuamini ushuhuda wa Mungu? Wewe wawakabidhi viumbe wenzako walio dhaifu, washindwao, mambo yako uyapendayo zaidi. Lakini waogopa kuikabidhi nafsi yako kwa Mwokozi mbarikiwa.

Alimwaga damu yake ili akuokoe. Yeye “aweza kuwaokoa kabisa.”

Hakika, mwamini mpendwa, jina lako laonyesha kwamba waweza kuamini. Basi, kamwe hutathubutu tena kuutolea udhuru upungufu wako wa imani. Hii yamaanisha, bila shaka, kwamba huna imani katika Mungu. Hukuombwa uwe na imani ndani yako mwenyewe. Kama ungekuwa nayo, ingekuwa hali mbaya sana ya nafsi. Nakusihi, ufikiripo au usemapo mambo haya, uikamilishe sentensi. Sema, “Sina imani katika Mungu, siwezi kumwamini Mungu.” Nina hakika hili litakuwa baya sana kwako karibuni kiasi kwamba hutathubutu kuendelea nalo.

Lakini wasema, siwezi kuamini pasipo Roho Mtakatifu. Vema kabisa; je, utahitimisha kwamba upungufu wako wa imani ni kwa sababu ya Roho mbarikiwa kushindwa kuitenda kazi yake? Ikiwa ni hivyo, basi hulaumiwi.

Hupaswi kuhisi hukumu yo yote. Kila nikuhimizavyo uamini ni bure. Lakini, la! Je, huoni kwamba, kwa kushika msimamo huu, huna imani wala huwezi kuamini? Wewe “umemfanya Mungu kuwa mwongo.” Tena waonyesha kutokuwa na tumaini kabisa kwa Roho Mtakatifu. Kwa maana yeye yu tayari sikuzote kusaidia udhaifu wetu.

Kamwe hatuhitaji kumngoja yeye, yeye hutungoja sisi sikuzote. Nina imani kamili katika Roho Mtakatifu.

Yu tayari sikuzote kuitenda kazi yake. Basi, nawaambia ninyi nyote: mwaweza kuamini sasa, wakati huu huu. Msipofanya hivyo, si kosa la Roho, bali ni lenu wenyewe.

Basi uweke utashi wako upande wa kuamini. Sema, “Bwana nitaamini, naamini,” na uendelee kusema hivyo. Sisitiza kuamini, hata kila dokezo la shaka likujaribupo. Katika kutokuamini kwako, jitupe juu ya neno na ahadi za Mungu. Thubutu kuutumaini uwezo wa Bwana Yesu wa kuokoa. Kama umepata kumwamini rafiki kwa kumkabidhi kitu cha thamani, nakuhimiza ujikabidhi mwenyewe sasa. Ukabidhi mambo yako ya kiroho kwa Rafiki yako wa Mbinguni. Kamwe, kamwe, USITILIE SHAKA kamwe tena.

Na kumbuka, kutumaini na kuhangaika havipatani kuliko mafuta na maji. Je, ungeliita hilo kutumaini? Kama ukimwomba rafiki akutendee jambo, kisha ukatumia siku na usiku wako kuhangaika kama atalitenda vema, je, waweza kuliita hilo kutumaini? Umeiweka nafsi yako mikononi mwa Bwana. Lakini, watumia saa nyingi kila mchana na usiku, ukiwa umejaa wasiwasi ukiuliza-uliza juu yake. Mwamini akikitumaini kitu kwa kweli, huacha kuhangaika juu ya kitu kile alichokitumaini.

Na ahangaikapo, ni ushahidi ulio dhahiri kwamba hatumaini. Tukipima kwa kanuni hii, tazama jinsi tumaini la kweli lilivyo dogo katika Kanisa la Kristo! Si ajabu Bwana wetu aliuliza swali lile lenye kusikitisha, “Atakapokuja Mwana wa Adamu, je, ataiona imani duniani?” Ataona shughuli nyingi na bidii. Kutakuwa na mioyo mingi iliyojitoa. Lakini, je, ataiona imani? Ndicho kitu kimoja akithaminicho zaidi. Ni swali zito, nami natamani kila moyo wa Kikristo ungelitafakari vema. Lakini, maisha yetu yaliyopita na yatutosheleze. Tumeshiriki katika kutokuamini kwa ulimwengu. Basi, sisi tumjuao Bwana wetu mbarikiwa, na tuithibitishe kweli yake.

Uaminifu wake wapita maneno. Yatupasa, kwa mioyo yetu, kumtumaini kikamili.

Nakumbuka, mapema sana katika maisha yangu ya Kikristo, wito fulani katika juzuu ya mahubiri ya zamani. Ulichochea kila hisia yangu ya wororo na uaminifu. Uliwahimiza wote wampendao Bwana Yesu wawaonyeshe wengine ustahili wake kwa imani yao imara katika yeye. Nakumbuka nafsi yangu ililia kwa shauku. Nilitamani kupita katika njia zile za giza. Kutomwamini kwangu kabisa kungekuwa pendeleo la baraka na utukufu.

“Hamkupita njia hii wakati uliopita,” yamkini. Lakini leo, ni pendeleo lako la furaha kudhihirisha, kama hujawahi kufanya, uaminifu wako wa tumaini kwa Bwana. Anza naye maisha ya imani, yaishiwayo katika tumaini kamili, la kitoto katika yeye. Umemwamini katika mambo machache, naye hakukuangusha. Sasa mwamini kwa ajili ya kila kitu. Uone kama hatakutendea zaidi ya uwezavyo kuomba au kuwaza. Halitakuwa kwa nguvu zako, bali kwa uweza wake mkuu. Litatenda kazi ndani yako kusudi lote jema la mapenzi yake yaliyobarikiwa kupita yote.

Wamtumaini Bwana kusimamia ulimwengu wote na uumbaji wote. Je, shauri lako laweza kuwa tata kuliko haya?

Hupaswi kuwa na wasiwasi juu ya jinsi anavyoyasimamia. Kutupilie mbali shaka isiyostahili namna hiyo! Mtumaini Mungu wako. Angalia jinsi matatizo yote yatakavyotoweka upesi mbele ya utashi ulio imara wa kuamini. Tumaini gizani, mwangani, usiku, na asubuhi. Utaona kwamba, ijapokuwa imani yaweza kuanza kama juhudi kubwa, itakuwa tabia ya asili ya nafsi.

Kwa Mungu mambo yote yawezekana. Marko 11:23“Yesu akamwambia, Ukiweza’! Yote yawezekana kwake yeye aaminiye” “Imani, zamani, ‘ilishinda milki za wafalme, ilitenda haki, ilipata ahadi, ilifunga vinywa vya simba, ilizima nguvu za moto, iliokoka makali ya upanga, ilitiwa nguvu baada ya kuwa dhaifu, ilikuwa hodari vitani, [na] iliyakimbiza majeshi ya wageni.’ Na imani yaweza kulitenda tena.” Bwana wetu asema, “Kwa sababu ya upungufu wa imani yenu. Kwa maana, amin, nawaambia, mkiwa na imani kiasi cha punje ya haradali, mtauambia mlima huu, ‘Ondoka hapa uende kule,’ nao utaondoka, wala halitakuwako neno lisilowezekana kwenu. “Mathayo 17:20 Kama wewe u mtoto wa Mungu, sharti uwe na imani angalau kiasi cha punje ya haradali. Basi, huwezi kusema tena kwamba huwezi kutumaini kwa sababu huna imani. Sema, “Naweza kumtumaini Bwana wangu, nami nitafanya hivyo. Nguvu zote za dunia wala za kuzimu hazitanifanya nimtilie shaka Mkombozi wangu mtukufu, mwaminifu!””

Tukio kubwa kupita yote la karne hii, ukombozi wa watumwa wetu, ni funzo kuu la imani. Watumwa waliupokea uhuru wao kwa imani, kama vile na sisi tupasavyo kuupokea wetu. Walipokea habari njema kwamba serikali ilikuwa imetangaza uhuru wao. Wakawa huru mara ile Tangazo lilipotolewa.

Lakini, hawakuiamini kwa kweli mpaka waliposikia habari njema. Jambo lenyewe lilipaswa kutangulia. Lakini, iliwapasa kuamini kabla jambo lenyewe halijapatikana. Hisia zingefuata mwisho kabisa. Huu ndio utaratibu wa Mungu sikuzote, tena ndio utaratibu wa akili timamu pia.

I. Jambo lenyewe.

II. Imani.

III. Hisia.

Lakini mwanadamu huugeuza utaratibu huu na kusema, I. Hisia. II. Imani. III. Jambo lenyewe. Kama watumwa wangelifuata utaratibu wa mwanadamu kuhusu uhuru wao, huenda wangelibaki utumwani kwa muda. Wangelikataa kuuamini mpaka wangeuhisi. Nimesikia habari za tukio moja lililokuwa hivyo. Katika mji fulani wa mbali wa Kusini, mwanamke fulani wa Kaskazini alikuta, miaka miwili au mitatu baada ya vita, watumwa kadhaa ambao walikuwa hawajaudai uhuru wao. Kauli yake, kwamba Kaskazini ilikuwa imewaweka huru, iliamsha usikivu wa bibi mmoja mzee mweusi. Bibi huyo alimkatiza kwa swali la hamu.

“Lo, bibi, je, sisi tu huru?”

“Bila shaka, ndivyo mlivyo,” mwanamke akajibu.

“Lo, una hakika?” bibi akasisitiza, kwa hamu kubwa.

“Hakika, nina hakika,” yule bimkubwa akajibu, sauti yake ikiwa thabiti na yenye uhakika. “Kwani, yawezekana hamkulijua?”

Vema,” akasema yule bibi, “tulisikia ya kuwa tu huru, basi tukamwuliza bwana, naye akasema hatuko huru, hivyo tukaogopa kuondoka. Kisha tukasikia tena ya kuwa tu huru, basi tukaenda kwa kanali, naye akasema tukae na bwana wetu wa zamani. Basi, tumekuwa tukisitasita tu. Mara nyingine tukadhani tu huru, mara nyingine tukadhani hatuko huru. Lakini sasa, bibi, kama una hakika tu huru, waweza kuniambia yote juu ya jambo hili?” Alipoona kwamba hii ilikuwa haja ya kweli, yule bimkubwa akamweleza kila kitu maskini yule mwanamke.

Alimweleza habari za vita, jeshi la Kaskazini, na Abraham Lincoln. Alinena juu ya Tangazo lake la Ukombozi na uhuru lililoleta.

Yule mtumwa maskini alisikiliza kwa hamu kubwa kupita zote. Aliisikia habari njema. Akaiamini. Na hadithi ilipokwisha, akatoka chumbani kwa jeuri ya kujitegemea kupita kiasi, akisema alipokuwa akienda, -- “Mimi ni huru! Sikai tena na bwana yule wa zamani!” Hatimaye alikuwa amepokea uhuru wake, naye alikuwa ameupokea kwa imani. Serikali ilikuwa imemtangaza kuwa huru tangu zamani. Lakini, hilo halikumfaa. Hakuwa amewahi kuliamini tangazo hili. Habari njema haikumfaidi, kwa kuwa haikuwa “imechanganyika na imani” ndani ya yule aliyeisikia. Lakini sasa akaamini, na kwa kuamini, akathubutu kujihesabu kuwa huru. Na hili, si kwa sababu ya badiliko lo lote ndani yake au katika mazingira yake, wala kwa sababu ya hisia zo zote za moyo wake mwenyewe. Bali, kwa sababu alikuwa na imani katika mwingine. Yeye alikuwa amemjia na habari za uhuru wake.

Je, yanipasa kufanya ulinganisho? Katika ujumbe mia moja, Mungu ametangaza uhuru wetu. Anatuhimiza tujione kuwa huru. Basi imani yako na ilishike tangazo lake, na kulithibitisha kuwa ni kweli. Jitangazie mwenyewe, na kwa rafiki zako, na katika siri ya nafsi yako mbele za Mungu, kwamba wewe u huru. Kataa kuzisikiliza hata kwa dakika moja kauli za uongo za bwana wako wa zamani kwamba bado u mtumwa wake. Kisikuvunje moyo cho chote, wala hisia za ndani wala ishara za nje. Shikilia imani yako licha ya upinzani wote. Nakuahidi, kwa mamlaka ya Bwana wetu, kwamba utaliona likitendeka sawasawa na imani yako.

Kati ya ibada zote tuwezazo kumletea Mungu wetu, hakuna iliyo tamu kwake kama hii, tumaini letu kamili, la kujikana nafsi. Hakuna imletee utukufu mwingi hivyo. Katika kila saa ya giza, kumbuka hili: “Sasa kwa kitambo kidogo mmehuzunishwa kwa majaribu ya namna mbalimbali.” Ndivyo ilivyo. “Kujaribiwa kwa imani yenu kuna thamani kuu kuliko dhahabu ipoteayo, ijapokuwa hujaribiwa kwa moto; ili kuonekane kuwa kwenye sifa na heshima na utukufu wakati wa kufunuliwa kwake Yesu Kristo.”