Kilio cha Kunguru

“Yeye huwapa wanyama chakula chao, na makinda ya kunguru yaliao.” Zaburi 147:9.

NITAANZA hubiri hii kwa nukuu. Ni lazima niwape, kwa maneno ya Caryl mwenyewe, maelezo yake juu ya kunguru. “Wataalamu wa maumbile hutuambia kwamba kunguru akiisha kuwalisha makinda yake kiotani hata wawe na manyoya kamili na kuweza kuruka mbali, huwatoa nje ya kiota wala hawaachi kukaa humo, bali huwatupa nje wajitafutie riziki yao wenyewe. Basi makinda haya yanapokuwa katika kuruka kwao kwa mara ya kwanza kutoka kiotani, nayo hayajui vema njia za kujisaidia kwa chakula, ndipo Bwana huwapatia chakula.

“Wasemekana na watu wa kuaminika kwamba kunguru ni mkali na mwenye ukali wa ajabu katika jambo hili—mara makinda yake yanapoweza kujitunza yenyewe, hataleta tena chakula kwa ajili yao. Wengine hudai kwamba wazazi hawatawaacha kukaa katika nchi ileile walimozaliwa, na ikiwa ni hivyo, basi ni lazima watangetange. Twasema kwa methali, 'Uhitaji humfanya mama mzee akimbie.' Twaweza kusema, 'na makinda pia.' “

Imekuwa, na labda bado ni, desturi ya wazazi wengine kwa watoto wao, ambao, mara wawezapo kujitegemea na kufaa kwa kadiri yoyote kupata mkate wao, huwafukuza nje ya nyumba kama kunguru afukuzavyo makinda yake nje ya kiota. Basi, alisema Bwana katika andiko hili, makinda ya kunguru yanapokuwa katika shida hii, kwamba yamefukuzwa, nayo yanatangatanga kwa kukosa chakula, ni nani, basi, awapaye riziki? “Je, si mimi, Bwana? Je, si mimi, nimpaye riziki kunguru mzee, nitakayewapa riziki makinda yake, wakati wakaapo kiotani na wanapotangatanga kwa kukosa chakula?”

Sulemani alimtuma mvivu kwa chungu, naye mwenyewe akajifunza mafunzo kutoka kwa wibari, mbwa wa mbio, na buibui! Na tuwe tayari kufundishwa na kiumbe chochote cha Mungu, twende kwenye kiota cha kunguru usiku huu tujifunze kama shuleni. Kwa aliye safi hakuna kilicho najisi, na kwa mwenye hekima hakuna kilicho kidogo kisicho na maana. Wenye ushirikina na wamwogope kunguru kama ndege wa nuksi, na wasiojali wasione zaidi ya kiumbe chenye mabawa katika weusi ung'aao—sisi tu tayari kuona zaidi, na bila shaka hatutakosa kupewa thawabu ikiwa twaweza tu kufundishika.

Kunguru wa Noa hakumrudishia tawi la mzeituni, lakini yetu waweza! Na hata yaweza kutokea kwamba kunguru watatuletea chakula usiku huu kama zamani walivyomlisha Eliya kando ya kijito cha Kerithi. Bwana wetu mbarikiwa wakati mmoja alitoa hoja yenye nguvu sana kutokana na kunguru—hoja iliyokusudiwa kuwafariji na kuwatia moyo watumishi wake waliolemewa na wasiwasi usio wa lazima juu ya mahitaji yao ya kimwili. Kwao hao alisema, “Watafakarini kunguru, kwa kuwa hawapandi wala hawavuni; nao hawana ghala wala uchaga; na Mungu huwalisha. Je, ninyi si bora sana kuliko ndege?”

Nikifuata mantiki ya Bwana wetu—ambayo nyote mtakubali ni lazima ilikuwa sahihi, kwa maana hakuwa mwongo katika kufikiri kwake kamwe, kama vile hakuwa mwongo katika maneno yake—nitatoa hoja usiku huu kwa jinsi hii: Watafakarini kunguru wanapolia! Kwa sauti kali, zisizo na maneno, za kukoroma, hutangaza mahitaji yao, na Baba yenu wa mbinguni huyajibu maombi yao na kuwapelekea chakula! Nanyi pia mmeanza kusali na kutafuta upendeleo wake—je, ninyi si bora sana kuliko wao? Je, Mungu huwajali kunguru, naye hatakujali wewe? Je, hasikii vilio vya makinda ya kunguru katika viota vyao yanapokuwa na njaa na kumlilia ili yalishwe?

Je, nasema, huwapa riziki kwa kuitikia vilio vyao, naye hatakujibu wewe, maskini mtoto wa binadamu utetemakaye, utafutaye uso wake na upendeleo wake kwa njia ya Kristo Yesu? Kazi yote ya jioni hii itakuwa ni kuufafanua tu wazo hilo moja. Nakusudia usiku huu, kwa uongozi wa Roho Mtakatifu, kusema neno kwa wale ambao wamekuwa wakiomba rehema lakini hata sasa hawajaipata—ambao wamepiga magoti, labda, kwa miezi mingi, kwa kilio kimoja kikuu na kichungu mno—lakini hata sasa hawaijui njia ya amani.

Dhambi yao bado inaning'inia kama jiwe la kusagia shingoni mwao. Wanaketi katika bonde la uvuli wa mauti. Hakuna nuru iliyowazukia, nao wanakunja mikono yao na kuugua, wakisema, “Je, Mungu amesahau kuwa na fadhili? Je, amezifungia masikio yake maombi ya nafsi zitafutazo? Je, hataziangalia tena kilio cha huruma cha wenye dhambi? Je, machozi ya wenye kutubu yatadondoka juu ya nchi wala hayatasukuma tena huruma yake?” Shetani, pia, anakuambia wewe, rafiki mpendwa, uliye sasa katika hali hii ya nia, kwamba Mungu hatakusikia kamwe. Kwamba atakuacha ulie hata ufe! Kwamba utaimaliza roho yako kwa kuugua na machozi na kwamba mwishoni utatupwa katika Ziwa la Moto!

Natamani, usiku huu, kukupa faraja na kitia-moyo kidogo. Nataka kukusihi ulie kwa bidii zaidi! Njoo Msalabani ukaushike, na uape kwamba hutaiacha kivuli chake hata uipate ile karama ambayo nafsi yako inaitamani. Nataka kukusukuma, ikiwa Mungu Roho Mtakatifu atanisaidia, hata useme moyoni mwako, kama Malkia Esta, “Nitaingia kwa mfalme, ambayo si halali; nami nikiangamia, na niangamie.” Nawe uongeze juu ya hayo nadhiri ya Yakobo, “Sikuachi usiponibariki!” Basi, hili ndilo swali lililopo mbele yetu: MUNGU HUWASIKIA MAKINDA YA KUNGURU. JE, HATAKUSIKIA WEWE?

I. Nasema kwamba atafanya hivyo, kwanza, ninapokumbuka kwamba yeye husikia kilio cha kunguru mnyonge, na kwamba wewe, kwa namna fulani, u bora sana kuliko kunguru. Kunguru si kitu ila ndege maskini asiye safi ambaye kifo chake cha ghafula kisingeacha pengo lolote la kuhuzunisha katika uumbaji. Kama maelfu ya kunguru wangevunjwa shingo kesho, sijui kama kungekuwa na kilio na huzuni kubwa yoyote ulimwenguni kwa ajili yao! Yangekuwa tu makundi ya ndege maskini waliokufa, na ndiyo yote.

Lakini wewe u nafsi isiyokufa! Kunguru huisha uhai wake ukiisha—hakuna kunguru tena. Lakini uhai wako huu wa sasa ukiisha, wewe hukoma kuwako—wewe umeanzishwa tu katika bahari ya uhai—umeanza tu kuishi milele. Utaona milima ya kale ya dunia ikibomoka na kuwa si kitu kabla roho yako isiyokufa haijakoma! Mwezi utakuwa umefifisha nuru yake dhaifu, na moto wa jua ulio na nguvu zaidi utakuwa umezimwa katika giza la milele, na bado roho yako itakuwa ingali inasonga mbele katika safari yake ya milele—safari ya milele ya taabu, isipokuwa Mungu akisikia kilio chako—

“Ee, kweli hiyo isiyo na kikomo, Huyu afaye atavaa kutokufa! Mapigo ya akili hayatakoma kucheza kamwe; Kwa kuamshwa na Mungu, hupiga milele, Ya milele kama umilele wake mwenyewe! Juu ya malaika, au chini ya mashetani: Kupaa katika Utukufu, au kushuka katika aibu— Mwanadamu amewekewa hatima isiyoepukika.” Je, wafikiri, basi, kwamba Mungu atamsikia ndege maskini aliyeko na asiyekuwako—aliye hapa dakika moja kisha afutwa katika kuwako—naye hatakusikia wewe, nafsi isiyokufa, ambaye kudumu kwako kutalingana na kwake mwenyewe? Nadhani ni lazima likuguse kwamba ikiwa humsikia kunguru afaye vivyo hivyo atamsikia mwanadamu asiyekufa. Wa kale walisema juu ya Jupita kwamba hakuwa na nafasi ya kushughulikia mambo madogo, lakini Yehova hujinyenyekesha kuvijali viumbe vyake vidogo kabisa, na hata huchungulia ndani ya viota vya ndege! Je, hatawajali kwa rehema roho ambao ni warithi wa umilele wa kutisha?

Zaidi ya hayo, sijapata kusikia kwamba kunguru waliumbwa kwa mfano wa Mungu! Lakini nakuta kwamba, ijapokuwa jamii yetu imenajisiwa, imeharibika sura, na imeshushwa hadhi, hata hivyo hapo mwanzo Mungu alisema, “Na tumfanye mtu kwa mfano wetu.” Kuna jambo fulani juu ya mwanadamu ambalo halionekani katika viumbe vya chini, ambavyo vilivyo bora na vitukufu zaidi vyao viko chini isivyopimika kuliko mtoto duni kabisa wa Adamu. Baraza lilifanyika juu ya kuumbwa kwa mwanadamu, na katika akili yake, na hata katika jinsi mwili wake ulivyowekwa kuisaidia akili, kuna dhihirisho la ajabu la hekima ya Aliye Juu.

Lete hapa aliye na kilema kingi, asiyejulikana, na mwovu kuliko wote wa jamii ya wanadamu, na—ijapokuwa sithubutu kuisifu asili ya kibinadamu kimaadili—hata hivyo kuna hadhi katika hali yenyewe ya kuwa mwanadamu ambayo haionekani katika wanyama wote wa kondeni, wawe jinsi wawavyo. Behemothi na Lewiathani wamewekwa chini ya mguu wa mwanadamu. Tai hawezi kupaa juu kama roho ya mwanadamu ipaavyo, wala simba hawezi kula chakula cha kifalme kama kile ambacho roho ya mwanadamu hukitamani. Nawe wafikiri kwamba Mungu atamsikia kiumbe wa chini na duni kama kunguru na bado asikusikie wewe, uliye mmoja wa jamii iliyofanywa kwa mfano wake mwenyewe?

Ee, usimwaze kwa ukali na kwa upumbavu jinsi hiyo yeye ambaye njia zake ni za haki sikuzote! Nitawawekea ninyi wenyewe jambo hili. Je, Maumbile yenyewe hayafundishi kwamba mwanadamu apasa kutunzwa zaidi ya ndege wa angani? Kama ungesikia vilio vya makinda ya kunguru, waweza kuhisi huruma ya kutosha kwa ndege hao hata uwape chakula kama ungejua jinsi ya kuwalisha. Lakini siwezi kuamini kwamba yeyote wenu angewasaidia ndege, na bado asingeruka kwa mbawa za huruma kumwokoa mtoto mchanga anayeangamia ambaye vilio vyake ungeweza kusikia kutoka mahali alipotupwa kwa ukatili wa kutojaliwa! Kama, katika kimya cha usiku, ungesikia kilio cha kusikitisha cha mtu anayekufa kwa ugonjwa, bila kuhurumiwa barabarani, je, usingeondoka na kumsaidia?

Nina hakika ungefanya hivyo kama wewe ni mtu ambaye ungemsaidia kunguru. Kama una huruma yoyote kwa kunguru, bila shaka ungemhurumia mwanadamu zaidi sana! Najua husemwa kwa manong'ono kwamba wako wapumbavu wengine wanaowajali mbwa wasio na makazi kuliko wanaume na wanawake wasio na makazi—na bado yaelekea zaidi kwamba wale wanaowahurumia mbwa ndio wanaowajali wanadamu kwa upole zaidi. Kwa vyovyote vile, ningehisi dhana kubwa kwa manufaa yao kama ningehitaji msaada. Nawe je, hufikiri kwamba Mungu, Mwenye hekima yote, ampapo riziki hawa ndege wachanga kiotani, atakuwa na hakika pia kukujali wewe?

Moyo wako wasema, “Ndiyo.” Basi tangu sasa jibu kutokuamini kwa moyo wako kwa kuugeuza dhidi yake mwenyewe hoja yake ya haki. Lakini nakusikia ukisema, “Aa, lakini kunguru si mwenye dhambi kama mimi! Aweza kuwa ndege asiye safi, lakini hawezi kuwa najisi kama nilivyo mimi kimaadili. Aweza kuwa mweusi kwa rangi, lakini mimi ni mweusi kwa dhambi! Kunguru hawezi kuvunja Sabato, hawezi kuapa, hawezi kuzini! Kunguru hawezi kuwa mlevi! Hawezi kujitia unajisi kwa maovu kama yale ambayo mimi nimechafuliwa nayo.”

Najua hayo yote, Rafiki, nayo yaweza kukuonekana kwamba yanaifanya hali yako kuwa isiyo na tumaini zaidi, lakini sidhani kwamba kweli inafanya hivyo. Fikiri tu juu yake kwa dakika moja. Je, hili lathibitisha nini? Basi, kwamba wewe ni kiumbe uwezaye kutenda dhambi, na, kwa hiyo, kwamba wewe ni roho mwenye akili unayeishi kwa maana ambayo kunguru haishi. Wewe ni kiumbe unayetembea katika ulimwengu wa roho! Wewe u wa ulimwengu wa nafsi ambamo kunguru hana sehemu. Kunguru hawezi kutenda dhambi, kwa sababu hana roho, hana nafsi. Lakini wewe u kiumbe mwenye akili ambaye sehemu yako iliyo bora ni nafsi yako. Basi, kwa kuwa nafsi ni ya thamani isivyopimika kuliko mwili! Na kwa kuwa kunguru—nanena kwa mfumo wa kawaida sasa—si kitu ila mwili hali wewe ni dhahiri nafsi pamoja na mwili—ama sivyo usingekuwa na uwezo wa kutenda dhambi—naona hata katika wazo lile jeusi la kukatisha tamaa mwanga fulani!

Je, Mungu huujali mwili, na damu, na mifupa, na manyoya meusi, naye hataijali akili yako, na nia yako, na busara yako, na dhamiri yako, na nafsi yako isiyokufa? Ee, ukifikiri tu juu yake, ni lazima uone kwamba haiwezekani kilio cha kunguru kupata kusikilizwa na sikio la Wema wa Mungu, na maombi yako yadharauliwe na kupuuzwa na Aliye Juu—

“Kidudu chenye mabawa madogo, Kirukacho tu katika mwale mmoja wa jua la kiangazi. Ua ambalo pumzi ya Majira ya Machipuko Huliamsha katika uhai kwa nusu siku. Chembe ndogo kabisa, unywele mwororo zaidi, Vyote huhisi uangalizi wa Baba yetu wa mbinguni.” Basi, bila shaka, atakiheshimu kilio cha mnyenyekevu, wala hatayakataa maombi yao!

Siwezi kuacha hoja hii bila kutaja kwamba kutajwa kwa kunguru kwapasa kumtia moyo mwenye dhambi. Kama mwandishi mmoja wa zamani aandikavyo, “Miongoni mwa ndege hamtaji mwewe wala kipanga, ambao huthaminiwa sana na kulishwa na wafalme. Bali huchagua ndege yule mwenye kuchukiza na mwenye hila, kunguru akoromaye, ambaye hakuna mtu amthaminiye ila kwa kuwa hula mizoga ambayo ingemsumbua. Tazama basi, na kustaajabia Majaliwa na fadhili za Mungu, kwamba amwandalie riziki kunguru, kiumbe wa rangi ya kusikitisha hivyo na wa sauti isiyo na wimbo hivyo—kiumbe achukizaye watu wengi, na wa nuksi kwa baadhi. Kuna Majaliwa makuu ya Mungu yaonekanayo katika kumwandalia riziki chungu, akusanyaye chakula chake wakati wa kiangazi—lakini yaliyo makuu zaidi katika kunguru, ambaye, ijapokuwa husahau, au hajali kujiandalia mwenyewe, hata hivyo Mungu humwandalia na kumwekea akiba.”

Mtu angedhani Bwana angesema juu ya kunguru, Waache wajitafutie wenyewe au waangamie! La, Bwana Mungu hakidharau kiumbe chochote kilichofanywa na mikono yake. Kunguru amepata kuwako kwake kutoka kwa Mungu, na kwa hiyo kunguru ataandaliwa riziki naye. Si hua tu mzuri asiye na hatia, bali hata kunguru mbaya hupata chakula chake kutoka kwa Mungu. Jambo lionyeshalo waziwazi kwamba kukosa ubora ndani yako, wewe mwenye dhambi mweusi, ulio kama kunguru, hakutazuia kilio chako kusikilizwa Mbinguni! Kutostahili kwako damu ya Yesu itakuondolea, na unajisi wako atausafisha kabisa. Mwamini Yesu tu, nawe utaona amani!

II. Kisha, katika sehemu inayofuata, kuna tofauti kubwa sana kati ya kilio chako na kilio cha kunguru. Makinda ya kunguru yaliapo nadhani hujua vigumu wanachotaka. Wana silika ya asili iwafanyayo kulia kwa ajili ya chakula, lakini kilio chao chenyewe hakidhihirishi hitaji lao. Ungeligundua upesi, nadhani, kwamba walimaanisha chakula—lakini hawana usemi wa kutamka—hawatamki hata neno moja! Ni kilio cha daima tu, cha kukoroma, cha kutamani na ndiyo yote.

Lakini wewe wajua unachohitaji, na ijapokuwa maneno yako ni machache, moyo wako wajua uchungu wake mwenyewe na dhiki yake mbaya. Kuugua kwako na kulia kwako kuna maana dhahiri. Ufahamu wako uko mkono wa kuume wa moyo wako wenye njaa. Wajua kwamba wahitaji amani na msamaha. Wajua kwamba wamhitaji Yesu, damu yake ya thamani, haki yake kamilifu. Basi, ikiwa

Mungu husikia kilio kigeni, cha kubwabwaja, kisicho dhahiri kama kile cha kunguru, je, hufikiri kwamba atayasikia pia maombi ya busara na yenye maana ya nafsi maskini, yenye uhitaji, yenye hatia, imliliayo, “Ee Mungu, unirehemu mimi mwenye dhambi”? Bila shaka busara yako yakuambia hivyo!

Zaidi ya hayo, makinda ya kunguru hayawezi kutumia hoja, kwa maana hayana ufahamu. Hayawezi kusema kama uwezavyo wewe—

“Yeye ajua hoja ningezichukua Kushindana na Mungu wangu, Ningesihi kwa ajili ya rehema yake mwenyewe, Na kwa ajili ya damu ya Mwokozi.”

Wana hoja moja, yaani, uhitaji wao mkuu, uwalazimishao kilio chao, lakini zaidi ya hili hawawezi kwenda. Na hata hili hawawezi kulipanga kwa utaratibu, wala kulieleza kwa lugha. Lakini wewe una hoja tele tayari mkononi, nawe una ufahamu wa kuzipanga kwa mstari na kuziandaa ili kukizingira Kiti cha Enzi cha Neema. Bila shaka, ikiwa ombi tupu la uhitaji wa kunguru usiotamkwa lashinda mbele za Mungu, wewe utashinda zaidi sana mbele za Aliye Juu ikiwa waweza kutetea hoja yako mbele zake na kumjia ukiwa na hoja kinywani mwako! Njoo, ewe uliyekata tamaa, ukamjaribu Bwana wangu! Nakusihi, sasa, kilio hicho cha huzuni kipae hata masikioni mwa rehema! Fungua moyo huo unaopasuka, ukamwage kwa machozi ikiwa maneno yamekushinda!

Kunguru, hata hivyo, nachelea, mara nyingine ana faida kubwa kuliko baadhi ya wenye dhambi wamtafutao Mungu kwa maombi, yaani katika hili: makinda ya kunguru huwa na bidii zaidi juu ya chakula chao kuliko baadhi walivyo juu ya nafsi zao. Lakini hili si kitu cha kukukatisha tamaa, bali ni sababu ya wewe kuwa na bidii zaidi kuliko ulivyokuwa. Kunguru wanapohitaji chakula, hawaachi kulia hata wakipate. Hakuna kumtuliza kinda la kunguru mwenye njaa hata kinywa chake kijae, na hakuna kumtuliza mwenye dhambi akiwa kweli na bidii hata moyo wake ujae rehema ya Mungu. Natamani baadhi yenu mngesali kwa bidii zaidi! “Ufalme wa mbinguni hupatikana kwa nguvu, nao wenye nguvu wauteka kwa nguvu.”

Mwana-Puritani mmoja wa zamani alisema, “Maombi ni mzinga uliowekwa langoni pa Mbinguni ili kupasua milango yake.” Ni lazima uuteke mji kwa vita ukitaka kuupata! Hutapanda kwenda Mbinguni kwa kitanda cha manyoya. Ni lazima uende kwa hija—hakuna kwenda katika nchi ya Utukufu hali umelala usingizi mzito—wavivu wenye ndoto watapaswa kuamka Jehanamu! Ikiwa Mungu amekufanya uhisi nafsini mwako uhitaji wa wokovu, lia kama mtu aliye macho na aliye hai! Uwe na bidii! Lia kwa sauti kuu! Usiache! Ndipo nadhani utaona kwamba hoja yangu itakuwa ya haki kabisa—kwamba katika mambo yote maombi ya busara, yenye hoja, yenye ufahamu yaelekea zaidi kushinda mbele za Mungu kuliko kelele tupu za kupiga yowe na kubwabwaja za kunguru—na kwamba akisikia kilio kama cha kunguru—ni hakika zaidi kwamba atakisikia chako.

III. Kumbuka kwamba maudhui ya maombi yako yanapendeza zaidi sikioni mwa Mungu kuliko kilio cha kunguru kwa ajili ya chakula. Yote yale ambayo makinda ya kunguru huyaomba ni chakula—wape mzoga kidogo nao wamemaliza. Kilio chako lazima kimpendeze zaidi sana sikioni mwa Mungu, kwa maana wewe waomba msamaha kwa njia ya damu ya Mwanawe mpendwa. Ni kazi tukufu zaidi kwa Aliye Juu kutoa karama za kiroho kuliko za kimwili. Vijito vya Neema ya Mungu hububujika kutoka chemchemi za juu. Najua yeye ni mnyenyekevu hivi kwamba hajivunji heshima hata anapoangusha chakula kinywani mwa kinda la kunguru, lakini hata hivyo kuna heshima zaidi juu ya kazi ya kutoa amani, na msamaha, na upatanisho kwa wana wa watu.

Upendo wa Milele uliweka njia ya rehema tangu kabla ya kuwekwa misingi ya ulimwengu, na Hekima isiyo na kikomo imejishughulisha, pamoja na uweza usio na mipaka, kutimiza kusudi la Mungu. Bila shaka Bwana lazima apate furaha kubwa katika kuwaokoa wana wa watu! Ikiwa Mungu apendezwa kumwandalia riziki mnyama wa kondeni, je, hufikiri kwamba hufurahi zaidi sana kuwaandalia watoto wake mwenyewe? Nadhani ungeliona kazi ipendezayo zaidi katika kuwafundisha watoto wako mwenyewe kuliko katika kumlisha ng'ombe wako tu, au kutawanya shayiri kati ya ndege mlangoni pa ghala, kwa sababu katika kazi ya kwanza kungekuwa na jambo tukufu zaidi, ambalo lingeziamsha kwa ukamilifu zaidi nguvu zako zote na kukutoa nafsi yako ya ndani.

Sijaachwa hapa katika kubahatisha. Imeandikwa, “Hufurahia rehema.” Mungu atumiapo uweza wake hawezi kuwa na huzuni, kwa maana yeye ni Mungu mwenye furaha. Lakini kama kuna jambo lolote liwezekanalo kama Uungu Usio na Kikomo kuwa na furaha zaidi wakati mmoja kuliko mwingine, ni pale anaposamehe wenye dhambi kwa njia ya damu ya thamani ya Yesu. Aa, Mwenye dhambi, umliliapo Mungu wampa nafasi ya kufanya lile apendalo kulifanya zaidi ya yote! Hufurahia kusamehe, kumkumbatia Efraimu wake kifuani mwake, kusema juu ya mwanawe mpotevu, “Alikuwa amepotea, naye ameonekana; alikuwa amekufa, naye yu hai tena.” Hili lamfariji zaidi moyo wa Baba kuliko kumchinja ndama aliyenona, au kuchunga makundi ya milima elfu.

Basi tangu hapo, rafiki wapendwa, kwa kuwa mnaomba kitu ambacho kitamheshimu Mungu zaidi sana kukitoa kuliko karama tupu ya chakula kwa kunguru, nadhani unakuja mpigo wenye nguvu wa nyundo yangu ya hoja usiku huu ili kukivunja vipande-vipande kutokuamini kwenu! Mungu Roho Mtakatifu, Mfariji wa kweli, na afanye kazi ndani yenu kwa nguvu! Bila shaka Mungu awapaye kunguru chakula hatawanyima amani na msamaha wenye dhambi wamtafutao. Mjaribu! Mjaribu wakati huu huu! La, msisogee! Mjaribu sasa!

IV. Hatuna budi kusimama katika jambo lolote moja hali somo zima ni tele hivyo. Kuna chanzo kingine cha faraja kwako, yaani, kwamba kunguru hawakuamriwa mahali popote kulia. Wanapolia, ombi lao halina ruhusa ya himizo lolote maalum kutoka kinywani mwa Mungu. Lakini wewe una ruhusa itokanayo na mahimizo ya Mungu ya kukikaribia Kiti cha Enzi cha Mungu kwa maombi!

Kama tajiri angeifungua nyumba yake kwa wale wasioalikwa, bila shaka angewapokea wale walioalikwa. Kunguru huja bila kuamriwa kuja, lakini hawaachwi kwenda mikono mitupu! Wewe umeamriwa kuja kama mgeni ulioalikwa—wawezaje kunyimwa? Je, wafikiri hukuambiwa uje? Sikiliza haya: “Kila atakayeliitia jina la Bwana ataokoka.” “Uniite siku ya taabu; nitakuokoa, nawe utanitukuza.” “Enendeni ulimwenguni mwote, mkaihubiri Injili kwa kila kiumbe. Aaminiye na kubatizwa ataokoka; asiyeamini atahukumiwa.” “Mwamini Bwana Yesu Kristo, nawe utaokoka.” “Tubuni, mkabatizwe kila mmoja wenu kwa jina lake Bwana Yesu.”

Haya ni mahimizo yaliyotolewa bila kizuizi chochote juu ya tabia. Yanakukaribisha kwa hiari—la, yanakuamuru uje. Ee, baada ya haya, je, waweza kufikiri kwamba Mungu atakudharau? Dirisha limefunguliwa, kunguru anaingia ndani na Mungu wa rehema hamfukuzi nje! Mlango umefunguliwa, na Neno la Ahadi lakuamuru uje—usifikiri kwamba atakunyima, bali amini afadhali kwamba “atakupokea kwa neema na kukupenda kwa hiari,” ndipo utakapo “kumtolea ndama za midomo yako.” Kwa vyovyote vile, mjaribu! Mjaribu hata sasa!

V. Tena, kuna hoja nyingine na yenye nguvu zaidi sana. Kilio cha kinda la kunguru si kitu ila kilio cha asili cha kiumbe, lakini kilio chako, kikiwa cha kweli, ni matokeo ya kazi ya Neema ya Mungu moyoni mwako. Kunguru amliliapo Mbinguni si kitu ila nafsi ya kunguru mwenyewe iliayo—lakini wewe uliapo, “Ee Mungu, unirehemu mimi mwenye dhambi”—ni Mungu Roho Mtakatifu aliaye ndani yako!

Ni uzima mpya ambao Mungu amekupa uliao kwenye chanzo kilichoutoa ili kuwa na ushirika na mawasiliano na Chanzo chake kikuu. Yamhitaji Mungu mwenyewe kumfanya mtu asali kwa unyofu na kwa kweli! Twaweza, tukifikiri juu yake, kuwafundisha watoto wetu “kusema maombi yao,” lakini hatuwezi kuwafundisha “kusali.” Waweza kutengeneza “kitabu cha maombi,” lakini huwezi kuweka hata chembe ya “maombi” ndani ya kitabu, kwa maana ni jambo la kiroho mno lisiloweza kufungiwa kati ya kurasa. Baadhi yenu, labda, mwaweza “kusoma maombi” katika jamaa. Sitaishutumu desturi hiyo lakini nitasema hivi juu yake—waweza kuyasoma “maombi” hayo kwa miaka sabini na bado usisali hata mara moja—kwa maana maombi ni jambo tofauti kabisa na maneno matupu.

Maombi ya kweli ni biashara ya moyo pamoja na Mungu, na moyo haufiki kamwe katika biashara ya kiroho na bandari za Mbinguni hata Mungu Roho Mtakatifu atiapo upepo ndani ya tanga na kuiharakisha meli iingie bandarini mwake. “Hamna budi kuzaliwa mara ya pili.” Ikiwa kuna maombi yoyote ya kweli moyoni mwako, ujapoisijua siri yake, Mungu Roho Mtakatifu yuko pale! Basi, ikiwa husikia vilio visivyotoka kwake mwenyewe, atavisikia zaidi sana vile vitokavyo kwake! Labda umekuwa ukijitatiza kujua kama kilio chako ni cha asili au cha kiroho. Hili laweza kuonekana la maana sana, na bila shaka ndivyo lilivyo—lakini kilio chako kiwe hiki au kile, endelea kumtafuta Bwana!

Labda unatilia shaka kama vilio vya asili husikiwa na Mungu. Nikuhakikishie kwamba husikiwa. Nakumbuka nikisema jambo fulani juu ya somo hili wakati mmoja katika mahali fulani pa ibada pa Wakalvini wa kupindukia. Wakati huo nilikuwa nikihubiri kwa watoto na nikiwahimiza kusali. Ilitokea niseme kwamba muda mrefu kabla ya wongofu wowote halisi nilikuwa nimesali kwa ajili ya rehema za kawaida, na kwamba Mungu alikuwa amesikia maombi yangu. Hili halikuwapendeza ndugu zangu wema wa shule ya hali ya juu mno! Na baadaye wote wakanizunguka kwa madai ya kutaka kujua nilichomaanisha, lakini kwa kweli ili kunibisha na kunilaumu kadiri ya asili na desturi yao.

“Walinizunguka kama nyuki. Naam, kama nyuki walinizunguka pande zote!” Baada ya muda, kama nilivyotazamia, wakaishukia burudani yao ya kawaida ya kutukana majina. Wakaanza kusema huku ni Uarminiani wa daraja gani! Na usemi mwingine walioupenda kunipa, ulikuwa cheo cha “Mfulasti”—cheo, kwa njia, chenye heshima hivi hata ningaliweza kuwashukuru kwa moyo kwa kunibandika kwa yale niliyokuwa nimeyatoa! Lakini kusema kwamba Mungu apaswa kusikia maombi ya watu wa asili kulikuwa kitu kibaya zaidi kuliko Uarminiani kwao, ikiwa, kweli, kitu chochote kingeweza kuwa kibaya zaidi! Wakanukuu andiko lile la uwongo, “Maombi ya waovu ni chukizo kwa Bwana,” ambalo niliwajibu upesi kwa kuwauliza kama wangeweza kunipatia andiko hilo katika Neno la Mungu, kwa maana nilithubutu kudai kwamba ibilisi ndiye aliyeasisi msemo huo, na kwamba haumo Biblia hata kidogo.

“Sadaka ya waovu ni chukizo kwa Bwana” imo katika Biblia, lakini hilo ni jambo tofauti sana na “maombi ya waovu.” Na zaidi ya hayo kuna tofauti dhahiri kati ya neno waovu lililokusudiwa hapo na mtu wa asili tuliyekuwa tukibishana juu yake. Sidhani kwamba mtu aanzaye kusali kwa namna yoyote aweza kuhesabiwa kuwa miongoni mwa “waovu” waliokusudiwa na Sulemani, na kwa hakika hayumo miongoni mwa wale wageuzao masikio yao wasisikie Sheria, ambao juu yao imeandikwa kwamba maombi yao ni chukizo.

“Naam, lakini,” walisema, “yawezaje kuwa kwamba Mungu aweze kusikia maombi ya asili?” Na nilipositi kwa dakika moja, mwanamke mmoja mzee aliyevaa joho jekundu akajipenyeza katika mduara ile ndogo iliyonizunguka na kuwaambia kwa njia yenye nguvu sana, kama mama katika Israeli alivyokuwa, “Mbona mwainua swali hili, mkisahau alichokisema Mungu mwenyewe! Ni nini hiki msemacho, kwamba Mungu hasikii maombi ya asili? Je, hawasikii makinda ya kunguru wanapomlilia yeye? Nanyi mwafikiri wao hutoa maombi ya kiroho?”

Papo hapo wale watu wa vita wakakimbia—hakuna kushindwa kulikokuwa kamili zaidi—na kwa mara moja katika maisha yao ni lazima walihisi kwamba yamkini wangeweza kukosea! Bila shaka, ndugu, hili laweza kuwatia moyo na kuwafariji! Sitawapangia sasa hivi kazi ya kutafuta kama maombi yenu ni ya asili au ya kiroho—kama yatoka kwa Roho wa Mungu au hayatoki—kwa sababu hilo laweza, labda, kuwakatisha tamaa. Ikiwa maombi yatoka moyoni mwako hasa, twajua jinsi yalivyofika humo, ijapokuwa wewe usijue. Mungu huwasikia kunguru, nami naamini atakusikia wewe, na naamini, zaidi ya hayo, ijapokuwa sitaki sasa kuinua swali hilo moyoni mwako, kwamba husikia maombi yako, kwa sababu—ujapokuwa usijue—kuna kazi ya siri ya Roho wa Mungu inayoendelea ndani yako ambayo inakufundisha kusali.

VI. Lakini nina hoja zenye nguvu zaidi na zilizo karibu zaidi na shabaha. Makinda ya kunguru yaliapo, hulia peke yao. Lakini uombapo wewe una Mmoja mwenye nguvu kuliko wewe akiomba pamoja nawe! Msikie mwenye dhambi yule akilia, “Ee Mungu, unirehemu mimi mwenye dhambi”? Sikiliza! Wasikia kile kilio kingine kipandacho pamoja na chake? La, husikii, kwa sababu masikio yako ni mazito na butu, lakini Mungu hukisikia. Kuna sauti nyingine, iliyo kuu na tamu zaidi ya ile ya kwanza, na yenye kushinda zaidi sana, ipandayo wakati ule ule na kusihi, “Baba, wasamehe kwa njia ya damu yangu ya thamani.”

Mwitikio wa mnong'ono wa mwenye dhambi ni mtukufu kama ngurumo ya radi! Kamwe mwenye dhambi hasali kwa kweli bila Kristo kusali wakati ule ule! Huwezi kumwona wala kumsikia, lakini kamwe Yesu hazitibui kilindi cha nafsi yako kwa Roho wake bila nafsi yake pia kutibuliwa. Ee, Mwenye dhambi, maombi yako, yafikapo mbele za Mungu, ni jambo tofauti sana na yalivyo yatokapo kwako!

Mara nyingine watu maskini hutujia na maombi ambayo wanataka kuyapeleka kwa Kampuni fulani au Mtu fulani mkuu. Huleta ombi na kutuomba tuwasilishe kwa niaba yao. Limeandikwa vibaya sana kwa herufi, limeandikwa kwa jinsi ya ajabu sana, na twaweza tu kufahamu kwa shida wanachomaanisha. Lakini hata hivyo, kuna kadiri ya kutosha kutufahamisha wanachohitaji. Kwanza kabisa twawaandikia nakala safi, kisha, tukiisha kueleza jambo lao, twaweka jina letu wenyewe chini. Na tukiwa na ushawishi wowote, bila shaka wao hupata wanachotamani kwa nguvu ya jina lililotiwa sahihi chini ya ombi.

Hivi ndivyo Bwana Yesu Kristo afanyavyo na maombi yetu maskini! Huyafanyia nakala safi, huyatia muhuri wa damu yake mwenyewe ya upatanisho, huweka jina lake mwenyewe chini, na hivyo hupanda hata Kwenye Kiti cha Enzi cha Mungu. Ni maombi yako, lakini ee, ni maombi yake, pia! Nalo ni jambo la kuwa maombi yake ndilo lifanyalo yashinde. Basi, hii ni hoja ya nyundo nzito—ikiwa kunguru hushinda wanapolia peke yao kabisa, ikiwa kubwabwaja kwao maskini huwaletea wanachohitaji kwao wenyewe—yatashinda zaidi sana namna gani maombi ya huzuni ya mwenye dhambi maskini atetemakaye awezaye kusema, “Kwa ajili ya Yesu,” na awezaye kuzikaza hoja zake zote kwa sihi ile ya baraka, “Bwana Yesu Kristo anastahili! Ee Bwana, nipe kwa ajili yake”?

Nataraji kwamba hawa watafutao ambao nimekuwa nikiwaambia, ambao wamekuwa wakilia kwa muda mrefu hivyo na bado wanaogopa kwamba hawatasikiwa kamwe, wasingoje muda mrefu zaidi bali wapate upesi jibu la neema la amani! Na kama hawatapata bado haja ya mioyo yao, natumaini kwamba wataweza kutiwa moyo kudumu hata siku ya Neema itakapopambazuka. Una ahadi ambayo kunguru hawana, na hilo laweza kufanya hoja nyingine kama wakati ungeturuhusu kukaa juu yake. Ewe utetemakaye, kwa kuwa una ahadi ya kusihi, usiogope kamwe bali utasikiwa Kwenye Kiti cha Enzi cha Neema!

Na sasa, niseme na mwenye dhambi, katika kuhitimisha, KAMA UMELIA BILA MAFANIKIO, ENDELEA KULIA. “Nenda tena mara saba,” naam, na mara sabini mara saba! Kumbuka kwamba rehema ya Mungu katika Kristo Yesu ndilo tumaini lako pekee!

Ing'ang'anie, basi, kama mtu anayezama aing'ang'aniavyo kamba pekee iliyo karibu. Ukiangamia hali unaomba rehema kwa njia ya damu ya thamani, utakuwa wa kwanza aliyepata kuangamia hivyo! Endelea kulia! Lia tu! Lakini ee, amini pia! Kwa maana kuamini huleta nyota ya asubuhi na mapambazuko ya siku.

John Ryland mkewe, Betty, alipokuwa akifa, alikuwa katika dhiki kuu ya nia, ijapokuwa alikuwa Mkristo kwa miaka mingi. Mumewe akamwambia kwa njia yake ya kipekee lakini yenye hekima, “Basi, Betty, unaumwa nini?” “Ee, John, nafa, wala sina tumaini, John!” “Lakini, mpenzi wangu, waenda wapi, basi?” “Naenda Jehanamu!” lilikuwa jibu. “Basi,” akasema, akifunika uchungu wake wa ndani kwa uchekeshaji wake wa kawaida, akikusudia kupiga pigo ambalo lingegonga msumari kichwani hakika na kuzikimbiza shaka zake upesi, “Wakusudia kufanya nini utakapofika huko, Betty?” Mwanamke yule mwema hakuweza kutoa jibu, naye Bwana Ryland akaendelea, “Wafikiri utasali utakapofika huko?”

“Ee, John,” akasema, “ningesali mahali popote. Siwezi kujizuia kusali!” “Basi, sasa,” akasema, “watasema, 'Huyu hapa Betty Ryland akisali hapa. Mtoeni nje! Hatutaki mtu yeyote akisali hapa! Mtoeni nje!” Njia hii ya ajabu ya kulieleza ilileta nuru nafsini mwake naye akaona mara moja upuuzi wa dhana yenyewe kwamba nafsi imtafutayo Kristo kweli, na bado itupwe mbali milele kutoka Uwepo wake! Lia, Nafsi! Lia tu! Maadamu mtoto aweza kulia, yu hai. Na maadamu waweza kukizingira Kiti cha Enzi cha Rehema, kuna tumaini kwako! Lakini sikia kama vile uliavyo, na amini uyasikiayo, kwa maana ni kwa kuamini ndipo amani hupatikana.

Lakini ngoja kidogo, nina jambo lingine la kusema. Je, yamkini kwamba huenda tayari umeipata ile baraka hasa unayoililia? “Ee,” wasema, “nisingeomba kitu ambacho tayari nimekipata! Kama ningejua ninacho, ningeacha kulia, na kuanza kusifu na kumbariki Mungu.” Basi, sijui kama nyote watafutao mko katika hali salama hivyo, lakini nasadiki kwamba wako baadhi ya nafsi zitafutazo ambazo zimekwisha kupokea ile rehema wanayoiomba. Bwana, badala ya kuwaambia usiku huu, “Nitafuteni uso wangu,” anasema, “Mbona mwanililia? Nimekusikia wakati uliokubalika, na siku ya wokovu nimekusaidia. Nimeyafuta makosa yako kama wingu, na dhambi zako kama wingu zito. Nimekuokoa. Wewe u wangu. Nimekusafisha na dhambi zako zote. Enenda zako, ukafurahi.”

Katika hali kama hiyo sifa ya kuamini yafaa zaidi kuliko maombi ya taabu. “Ee,” wasema, “Lakini haiwezekani kwamba nina rehema hali bado naitafuta.” Basi, sijui. Rehema mara nyingine huanguka katika hali ya kuzimia nje ya lango. Je, haiwezekani kwake kuingizwa ndani hali angali katika hali hiyo ya kuzimia, naye afikiri wakati wote kwamba angali nje? Aweza kusikia mbwa akibweka bado, lakini aa, Nafsi maskini, atakapozindukana, ataona kwamba yu ndani ya kilango na yu salama!

Basi baadhi yenu huenda mmeanguka katika kuzimia kwa kukata tamaa wakati ule ule mnapomjia Kristo. Kama ni hivyo, Neema Kuu na ikuponye, na labda mimi naweza kuwa njia, usiku huu, ya kufanya hivyo. Ni nini kile mnachokitafuta? Baadhi yenu mnatazamia kuona maono mang'avu, lakini natumaini msifanikiwe kamwe kwa hayo kwa maana hayafai hata senti kwa elfu. Maono yote ulimwenguni tangu siku za miujiza, yakikusanywa pamoja, ni ndoto tupu tu, baada ya yote—na ndoto si kitu ila ubatili! Watu hula chakula kingi cha jioni kisha kuota—ni tumbo lisiloweza kumeng'enya, au msisimko wa ugonjwa wa ubongo—na ndiyo yote! Kama ndio ushahidi wote ulio nao wa wongofu utafanya vema kuutilia shaka. Nakusihi usitosheke nao kamwe—ni takataka duni ya kujengea matumaini yako ya milele.

Labda unatazamia hisia za ajabu sana—si kabisa mshtuko wa umeme, bali kitu cha kipekee na cha ajabu sana. Niamini, hukuhitaji kamwe kuhisi ile mienendo ya ajabu unayoithamini sana. Hisia zote za ajabu ambazo baadhi ya watu husema juu yake kuhusiana na wongofu zaweza kuwa za manufaa kwao au zisiwe, lakini nina hakika kwamba kwa kweli hazina uhusiano wowote na wongofu hata kuwa za lazima kwake!

Nitakuwekea swali au mawili. Je, unaamini kwamba wewe u mwenye dhambi? “Ndiyo,” wasema. Lakini nikiliondoa lile neno “mwenye dhambi”? Je, wamaanisha kwamba unaamini umeivunja Sheria ya Mungu, kwamba u mkosaji asiyefaa kitu dhidi ya utawala wa Mungu? Je, waamini kwamba umezivunja moyoni mwako, kwa vyovyote, Amri zote, na kwamba wastahili adhabu ipasavyo? “Ndiyo,” wasema, “siamini hilo tu, bali nalihisi! Ni mzigo ninaobeba pamoja nami kila siku.”

Sasa jambo lingine zaidi—je, waamini kwamba Bwana Yesu Kristo aweza kuiondoa dhambi hii yako yote? Ndiyo, unaamini hilo. Basi, je, waweza kumtumaini akuokoe? Wahitaji kuokolewa. Huwezi kujiokoa mwenyewe. Je, waweza kumtumaini akuokoe? “Ndiyo,” wasema, “tayari nafanya hivyo.” Basi, rafiki yangu mpendwa, kama wamtumaini Yesu kweli, ni hakika kwamba umeokoka, kwa maana una ushahidi pekee wa wokovu ulio wa kudumu kwa yeyote wetu! Kuna ushahidi mwingine ufuatao baadaye, kama utakatifu na Neema za Roho, lakini ushahidi pekee ulio wa kudumu kwa walio bora wa watu wanaoishi ni huu—

“Sileti kitu mikononi mwangu,
Nashikamana tu na Msalaba wako.”

Je, waweza kutumia ubeti wa Jack mchuuzi—

“Mimi ni mwenye dhambi maskini na si kitu kabisa,
Lakini Yesu Kristo ndiye Yote katika Yote yangu”?

Natumaini utaenda mbali zaidi katika uzoefu juu ya mambo fulani kuliko haya, baada ya muda, lakini sitaki usonge hata inchi moja mbele kuhusu msingi wa ushahidi wako na sababu ya tumaini lako. Simama hapo tu, na kama sasa waondoa macho yako kutoka kila kitu kilicho ndani yako au nje yako, ukayaelekeza kwa Yesu Kristo, na kutumaini mateso yake Kalvari na kazi yake yote ya upatanisho kuwa msingi wa kukubaliwa kwako mbele za Mungu, umeokoka! Hukuhitaji kitu chochote zaidi! Umepita kutoka mautini kuingia uzimani. “Amwaminiye hahukumiwi.” “Aaminiye yuna uzima wa milele.”

Kama ningekutana na malaika sasa hivi katika ule ushoroba nitokapo mlangoni mwangu kuingia chumbani mwangu cha mavazi, naye aniambie—“Charles Spurgeon, nimetoka Mbinguni kukuambia kwamba umesamehewa,” ningemwambia—“Najua hilo bila wewe kuniambia jambo lolote la namna hiyo! Nalijua kwa mamlaka bora zaidi ya yako.” Na kama angeniuliza jinsi nilivyolijua, ningejibu, “Neno la Mungu ni bora kwangu kuliko neno la malaika, naye amesema—'Amwaminiye hahukumiwi.' Namwamini yeye, na kwa hiyo sihukumiwi—nami nalijua bila malaika kuniambia hivyo.”

Msiwe, ninyi wenye taabu, mkitazamia malaika, na ishara, na ushahidi, na alama. Ikiwa unategemea kazi iliyokamilika ya Yesu, tayari una ushahidi bora wa wokovu wako ulimwenguni! Una Neno la Mungu kwa hilo—ni nini zaidi kinachohitajika? Je, huwezi kulipokea Neno la Mungu? Waweza kulipokea neno la baba yako. Waweza kulipokea neno la mama yako—mbona huwezi kulipokea neno la Mungu? Ee, mioyo miovu jinsi gani lazima tuwe nayo tukimtilia shaka Mungu mwenyewe!

Labda wasema usingefanya jambo kama hilo. Ee, lakini wamtilia Mungu shaka, kama humtumaini Kristo—kwa maana, “asiyeamini amemfanya Mungu kuwa mwongo.” Kama humtumaini Kristo, wasema kwa hakika kwamba Mungu ni mwongo! Hutaki kusema hivyo, sivyo? Ee, amini ukweli wa Mungu! Roho wa Mungu na akulazimishe kuamini rehema ya Baba, na uweza wa damu ya Mwana, na utayari wa Roho Mtakatifu kuwaleta wenye dhambi kwake!

Njooni, wasikilizaji wangu wapendwa, ungananeni nami katika ombi kwamba mpate kuongozwa na Neema ya Mungu kuona ndani ya Yesu yote mnayoyahitaji—

“Maombi ni nguvu ya kiumbe, pumzi yake hasa na kuwako kwake.
Maombi ni ufunguo wa dhahabu uwezao kufungua kilango cha rehema.
Maombi ni sauti ya miujiza iliyoiambia hatima, na iwe hivyo.
Maombi ni neva nyembamba iisogezayo misuli ya Uweza-Wote,
Kwa hiyo, sali, ewe kiumbe, kwa maana mahitaji yako ni mengi na makuu.
Akili yako, dhamiri yako, na kuwako kwako, mahitaji yako yakukabidhi kwenye maombi,
Dawa ya masumbufu yote, tiba kuu ya maumivu yote,
Mharibu wa shaka, dawa ya uangamivu, kizuizi cha wasiwasi wote.”