Uhakika wa Jibu la Maombi

‘Ombeni, nanyi mtapewa; tafuteni, nanyi mtaona; bisheni, nanyi mtafunguliwa; kwa maana kila aombaye hupokea, naye atafutaye huona; naye abishaye atafunguliwa,’—Mathayo vii. 7, 8.

‘Mwaomba, wala hampati, kwa sababu mwaomba vibaya.’—Yakobo iv. 3.

BWANA wetu anarudi hapa katika Mahubiri ya Mlimani kwa mara ya pili kunena juu ya maombi. Mara ya kwanza alikuwa amenena juu ya Baba anayepatikana sirini, na kutoa thawabu kwa dhahiri, naye alikuwa ametupa maombi ya kielelezo (Mathayo vi. 5-15). Hapa anataka kutufundisha jambo ambalo katika Maandiko yote linahesabiwa kuwa jambo kuu katika maombi: uhakika kwamba maombi yatasikiwa na kujibiwa. Angalia jinsi anavyotumia maneno yenye maana karibu ile ile, na kila mara akairudia ile ahadi waziwazi: ‘Ninyi mtapokea, ninyi mtaona, mtafunguliwa;’ kisha anatoa kama msingi wa uhakika huo sheria ya ufalme: ‘Aombaye, hupokea; atafutaye, huona; abishaye, hufunguliwa.’ Hatuwezi ila kuhisi jinsi katika kurudia huku kwa mara sita anavyotaka kukazia ndani sana ya nia zetu kweli hii moja, kwamba twaweza na twapaswa kutazamia kwa uhakika mkubwa jibu la maombi yetu. Baada ya kufunuliwa kwa upendo wa Baba, hakuna, katika mwendo wote wa shule ya maombi, somo la maana zaidi kuliko hili: Kila aombaye, hupokea.

Katika maneno matatu ambayo Bwana anayatumia, omba, tafuta, bisha, imetafutwa tofauti ya maana. Kama ndivyo hasa kusudi lake lilivyokuwa, basi la kwanza, OMBA, lahusu vipawa tunavyoviombea. Lakini naweza kuomba na kupokea kipawa bila Mtoaji. TAFUTA ni neno ambalo Maandiko huitumia kwa Mungu Mwenyewe; Kristo ananihakikishia kwamba naweza kumpata Yeye Mwenyewe. Lakini haitoshi kumpata Mungu wakati wa haja, bila kufikia ushirika wa kudumu: BISHA lanena juu ya kuruhusiwa kukaa pamoja naye na ndani yake. Kwa hiyo kuomba na kupokea kipawa kungeongoza kwenye kutafuta na kumpata Mtoaji, na hili tena kwenye kubisha na kufunguliwa kwa mlango wa nyumba na upendo wa Baba. Jambo moja ni hakika: Bwana anataka tuhesabu kwa uhakika mkubwa kabisa kwamba kuomba, kutafuta, kubisha, hakuwezi kuwa bure: kupokea jibu, kumpata Mungu, moyo na nyumba ya Mungu iliyofunguliwa, ni tunda la hakika la maombi.

Kwamba Bwana aliona ni lazima kuirudia kweli hii kwa namna nyingi hivi, ni somo lenye maana kubwa. Yathibitisha kwamba anaujua moyo wetu, jinsi shaka na kutokumwamini Mungu vilivyo asili kwetu, na jinsi tulivyo tayari kwa urahisi kutulia katika maombi kama kazi ya kidini pasipo jibu. Anajua pia jinsi, hata tunapoamini kwamba Mungu ni Msikiaji wa maombi, maombi ya kuamini yashikayo ile ahadi, ni jambo la kiroho, la juu mno na gumu kwa mwanafunzi mwenye moyo nusu. Kwa hiyo, mwanzoni kabisa mwa mafundisho yake kwa wale watakao kujifunza kuomba, anatafuta kuiweka kweli hii ndani sana ya mioyo yao: maombi yafaa sana; ombeni nanyi mtapokea; kila mtu aombaye, hupokea. Hii ndiyo sheria ya milele isiyobadilika ya ufalme: kama ukiomba usipopokea, ni lazima iwe kwa sababu kuna jambo baya au lililopungua katika maombi. Shikilia; acha Neno na Roho vikufundishe kuomba vema, lakini usiuache ule uhakika anaotaka kuuamsha: Kila aombaye, hupokea.

‘Ombeni, nanyi mtapewa.’ Kristo hana kichocheo chenye nguvu zaidi cha maombi ya kudumu katika shule yake kuliko hiki. Kama vile mtoto apaswavyo kuthibitisha hesabu kuwa ni sahihi, ndivyo ushahidi kwamba tumeomba vema ulivyo, lile jibu. Kama tukiomba tusipopokea, ni kwa sababu hatujajifunza kuomba vema. Basi kila mwanafunzi katika shule ya Kristo na alichukue neno la Bwana kwa unyofu wote: Kila aombaye, hupokea. Alikuwa na sababu nzuri za kunena bila masharti hivyo. Na tuwe waangalifu tusidhoofishe Neno kwa hekima yetu ya kibinadamu. Anapotuambia mambo ya mbinguni, na tumwamini: Neno lake litajieleza lenyewe kwake yeye alaminiye kabisa. Kama maswali na magumu yakiinuka, tusitafute kuyatatua kabla ya kulikubali Neno. La; na tumkabidhi Yeye yote: ni kazi yake kuyatatua: kazi yetu ni kwanza na kikamilifu kulikubali na kulishika sana ahadi yake. Katika chumba chetu cha ndani, na katika chumba cha ndani cha moyo wetu pia, Neno na liandikwe kwa herufi za nuru: Kila aombaye, hupokea.

Kwa mujibu wa mafundisho haya ya Bwana, maombi yana sehemu mbili, yana pande mbili, ya kibinadamu na ya Kimungu. Ya kibinadamu ni kuomba, ya Kimungu ni kutoa. Au, kuyaangalia yote mawili kwa upande wa kibinadamu, kuna kuomba na kupokea—nusu mbili zinazofanya kizima. Ni kana kwamba angetuambia kwamba hatupaswi kutulia pasipo jibu, kwa sababu ndiyo mapenzi ya Mungu, ndiyo kanuni katika jamaa ya Baba: kila ombi la kuamini kama la mtoto hujibiwa. Kama hakuna jibu lijalo, hatupaswi kuketi katika uvivu ujiitao kunyenyekea, na kudhani kwamba si mapenzi ya Mungu kutoa jibu. La; ni lazima kuwe na jambo katika maombi lisilo kama Mungu apendavyo, la kitoto na la kuamini; ni lazima tutafute neema ya kuomba ili jibu lipate kuja. Ni rahisi zaidi sana kwa mwili kunyenyekea pasipo jibu kuliko kujitoa lipekuliwe na kutakaswe na Roho, hata liwe limejifunza kuomba yale maombi ya imani.

Ni mojawapo ya alama za kutisha za hali ya ugonjwa ya maisha ya Kikristo siku hizi, kwamba wako wengi mno wanaotosheka pasipo kupata kwa dhahiri jibu la maombi. Wanaomba kila siku, wanaomba mambo mengi, na kutumaini kwamba baadhi yao yatasikiwa, lakini wanajua kidogo tu juu ya jibu la moja kwa moja na dhahiri la maombi kuwa kanuni ya maisha ya kila siku. Na ndilo hili Baba analipenda: anatafuta mawasiliano ya kila siku na watoto wake kwa kusikiliza na kujibu maombi yao. Anataka nimjie siku baada ya siku nikiwa na maombi ya dhahiri; anataka siku baada ya siku kunitendea ninaloliomba. Ni katika jibu lake la maombi ndipo watakatifu wa zamani walijifunza kumjua Mungu kuwa yeye aliye Hai, nao wakachochewa kusifu na kupenda (Zaburi xxxiv., lxvi. 19, cxvi. 1). Mwalimu wetu anangoja kukazia hili katika nia zetu: maombi na jibu lake, mtoto aombaye na baba atoaye, vyahusiana kila kimoja na chenzake.

Kunaweza kuwa na visa ambavyo jibu ni kukataa, kwa sababu ombi si kwa mujibu wa Neno la Mungu, kama vile Musa alipoomba kuingia Kanaani. Lakini bado, kulikuwa na jibu: Mungu hakumwacha mtumishi wake katika mashaka juu ya mapenzi yake. Miungu ya wapagani ni bubu na haiwezi kunena. Baba yetu humjulisha mtoto wake wakati asipoweza kumpa aombalo, naye huliondoa ombi lake, kama vile Mwana alivyofanya huko Gethsemane. Wote wawili, Musa mtumishi na Kristo Mwana, walijua kwamba walilokuwa wakiliomba si kwa mujibu wa yale Bwana aliyokuwa amenena: maombi yao yalikuwa ni dua ya unyenyekevu kama isingewezekana uamuzi kubadilishwa. Mungu atawafundisha wale wafundishikao na kumpa muda, kwa Neno lake na Roho, kama ombi lao ni kwa mujibu wa mapenzi yake au sivyo. Na tuliondoe ombi, kama si kwa mujibu wa nia ya Mungu, au tudumu hata jibu lije. Maombi yamewekwa ili kupata jibu. Ni katika maombi na jibu lake ndipo penye kubadilishana upendo kati ya Baba na mtoto wake.

Ni lazima kutengana kwa moyo wetu na Mungu kuwe kwa kina kiasi gani, hata tunaona ni vigumu hivi kuzishika ahadi kama hizi. Hata tunapoyakubali maneno na kuamini ukweli wake, imani ya moyoni, ile iliyonayo kikamilifu na kuzifurahia, huja polepole sana. Ni kwa sababu maisha yetu ya kiroho bado ni dhaifu sana, na uwezo wa kuzichukua fikira za Mungu ni hafifu sana. Lakini na tumtazame Yesu atufundishe kama asivyoweza mtu ye yote ila Yeye. Tukiyachukua maneno yake kwa unyofu, na kumtumaini kwa Roho wake kuyafanya ndani yetu kuwa uzima na nguvu, yataingia hivyo ndani ya utu wetu wa ndani, hata uhalisia wa kiroho wa Kimungu wa kweli iliyomo yatumiliki kweli kweli, nasi hatutatosheka hata kila ombi tutoalo libebwe kuelekea mbinguni juu ya maneno ya Yesu Mwenyewe: ‘Ombeni, nanyi mtapewa.’

Wanafunzi wenzangu wapendwa katika shule ya Yesu! na tujiweke kujifunza somo hili vema. Na tuyachukue maneno haya kama vile yalivyonenwa. Tusiache akili ya kibinadamu idhoofishe nguvu yake. Na tuyachukue kama Yesu ayatoavyo, na kuyaamini. Yeye atatufundisha kwa wakati wake jinsi ya kuyaelewa kikamilifu: na tuanze kwa kuyaamini bila shaka. Na tuchukue muda, kila mara tuombapo, kuisikiliza sauti yake: Kila aombaye, hupokea. Tusifanye mang’amuzi hafifu ya kutokuamini kwetu kuwa kipimo cha yale imani yetu iwezayo kutazamia. Na tutafute, si tu wakati wa nyakati zetu za maombi, bali sikuzote, kuushika sana ule uhakika wa furaha: maombi ya mwanadamu duniani na jibu la Mungu mbinguni yamekusudiwa kila moja kwa jenzake. Na tumtumaini Yesu atufundishe kuomba hivi hata jibu lipate kuja. Atafanya hivyo, kama tukilishika sana neno alitoalo leo: ‘Ombeni, nanyi mtapokea.’

‘BWANA, UTUFUNDISHE KUOMBA.’

Ee Bwana Yesu! nifundishe kuelewa na kuamini uliyoniahidi sasa. Halikufichwa kwako, Ee Bwana wangu, ni kwa hoja gani moyo wangu unatafuta kujiridhisha, jibu lisipokuja. Kuna wazo kwamba maombi yangu hayapatani na shauri la siri la Baba; kwamba pengine kuna kitu bora zaidi ungenipa; au kwamba maombi kama ushirika na Mungu ni baraka ya kutosha pasipo jibu. Lakini bado, Bwana wangu mbarikiwa, naona katika mafundisho yako juu ya maombi kwamba hukunena juu ya mambo haya, bali ulisema waziwazi hivi, kwamba maombi yaweza na yapaswa kutazamia jibu. Wewe watuhakikishia kwamba huu ndio ushirika wa mtoto na Baba: mtoto huomba na Baba hutoa.

Bwana mbarikiwa! Maneno yako ni ya amini na kweli. Ni lazima iwe, kwa sababu ninaomba vibaya, ndipo mang’amuzi yangu ya maombi yaliyojibiwa hayako wazi zaidi. Ni lazima iwe, kwa sababu ninaishi kidogo mno katika Roho, ndipo maombi yangu yako kidogo mno katika Roho, na kwamba nguvu ya maombi ya imani inakosekana.

Bwana! nifundishe kuomba. Bwana Yesu! nakutumaini kwa jambo hilo; nifundishe kuomba katika imani. Bwana! nifundishe somo hili la leo: Kila aombaye hupokea. Amina.