Peke Yako na Mungu

“Bali wewe usalipo, ingia katika chumba chako cha ndani, na ukiisha kufunga mlango wako, usali mbele za Baba yako aliye sirini; na Baba yako aonaye sirini atakujazi”—Mathayo 6:6.

BAADA ya Yesu kuwaita wanafunzi wake wa kwanza, aliwapa fundisho lao la kwanza la hadharani katika Mahubiri ya Mlimani. Hapo aliwafafanulia ufalme wa Mungu, sheria zake na uzima wake. Katika ufalme huo Mungu si Mfalme tu, bali ni Baba pia; hatoi vyote tu, bali yeye mwenyewe ni vyote. Katika kumjua na kushirikiana naye peke yake ndimo mna heri yake. Kwa hiyo ilikuwa jambo la kawaida kwamba ufunuo wa maombi na maisha ya maombi ulikuwa sehemu ya fundisho lake juu ya Ufalme Mpya aliokuja kuusimamisha. Musa hakutoa amri wala kanuni yo yote kuhusu maombi; hata manabii wanasema kidogo moja kwa moja juu ya wajibu wa maombi; ni Kristo afundishaye kuomba.

Na jambo la kwanza Bwana awafundishalo wanafunzi wake ni kwamba hana budi wawe na mahali pa siri pa kuomba; kila mmoja lazima awe na sehemu ya faragha ambapo aweza kuwa peke yake na Mungu wake. Kila mwalimu lazima awe na darasa. Tumejifunza kumjua na kumkubali Yesu kuwa mwalimu wetu wa pekee katika shule ya maombi. Ametufundisha tayari huko Samaria kwamba ibada haifungwi tena na nyakati wala mahali; kwamba ibada, ibada ya kweli ya kiroho, ni jambo la roho na la uzima; mtu mzima katika maisha yake yote hana budi awe ibada katika roho na kweli. Na bado atamani kila mmoja ajichagulie mwenyewe mahali maalum ambapo aweza kukutana naye kila siku. Chumba kile cha ndani, mahali pale pa faragha, ni darasa la Yesu. Mahali pale paweza kuwa po pote; mahali pale paweza kubadilika siku hata siku ikiwa itatubidi kubadili makao yetu; lakini mahali pale pa siri ni lazima pawepo, pamoja na wakati wa utulivu ambamo mwanafunzi hujiweka mbele za uwepo wa Bwana wake, ili aandaliwe naye kumwabudu Baba. Hapo peke yake, lakini hapo kwa hakika kabisa, Yesu huja kwetu kutufundisha kuomba.

Mwalimu daima hutamani darasa lake liwe angavu na la kuvutia, lililojaa nuru na hewa ya mbinguni, mahali ambapo wanafunzi hutamani kuja, na kupenda kukaa. Katika maneno yake ya kwanza juu ya maombi ndani ya Mahubiri ya Mlimani, Yesu hutafuta kutuwekea chumba cha ndani mbele yetu katika nuru yake ya kuvutia zaidi. Tukisikiliza kwa makini, mara tutaona jambo kuu alilo nalo la kutuambia juu ya kukaa kwetu humo. Mara tatu hulitumia jina la Baba: “Umwombe Baba yako;” “Baba yako atakujazi;” “Baba yenu anajua mnayohitaji.” Jambo la kwanza katika maombi ya chumbani ni: ni lazima nikutane na Baba yangu. Nuru iangazayo chumbani lazima iwe: nuru ya uso wa Baba. Hewa safi ya mbinguni ambayo Yesu angetaka chumba kijae nayo, angahewa ambamo napaswa kupumua na kuomba, ni: upendo wa Kibaba wa Mungu, ubaba wake usio na mwisho. Hivyo kila wazo au ombi tuvutalo nje litakuwa la tumaini rahisi, la moyoni, kama la mtoto mchanga kwa Baba. Hivi ndivyo Bwana atufundishavyo kuomba: hutuleta katika uwepo hai wa Baba. Tuombalo hapo lazima lifanikiwe. Na tusikilize kwa makini ili tusikie lile Bwana alilo nalo la kutuambia.

Kwanza, “Usali mbele za Baba yako aliye sirini.” Mungu ni Mungu ajifichaye kwa jicho la mwili. Maadamu katika kumwabudu Mungu tumeshughulishwa hasa na mawazo yetu wenyewe na jitihada zetu, hatutakutana naye yeye aliye Roho, yeye Asiyeonekana. Lakini kwa mtu ajitengaye na yote yaliyo ya ulimwengu na ya mwanadamu, na kujiweka tayari kumngoja Mungu peke yake, Baba atajifunua kwake. Anapoacha na kuutupa na kuufungia nje ulimwengu, na maisha ya ulimwengu, na kujisalimisha ili aongozwe na Kristo hadi katika siri ya uwepo wa Mungu, nuru ya upendo wa Baba itamzukia. Usiri wa chumba cha ndani na mlango uliofungwa, kujitenga kamili na yote yanayotuzunguka, ni kielelezo cha, na hivyo msaada kwa, patakatifu pale pa ndani pa kiroho, siri ya hema ya Mungu, ndani ya pazia, ambapo roho yetu hukutana kweli na yeye Asiyeonekana. Na hivyo tunafundishwa, tangu mwanzo kabisa wa kutafuta kwetu siri ya maombi yenye matokeo, tukumbuke kwamba ni ndani ya chumba cha ndani, ambapo tuko peke yetu na Baba, ndipo tutakapojifunza kuomba ipasavyo. Baba yuko sirini: kwa maneno haya Yesu anatufundisha alipo akitungoja, alipo apatikanapo daima. Wakristo mara nyingi hulalamika kwamba maombi ya faragha si kama inavyopasa kuwa. Hujihisi wanyonge na wenye dhambi, moyo ni baridi na wenye giza; ni kana kwamba wana kidogo sana cha kuomba, na katika kile kidogo hakuna imani wala furaha. Wamekata tamaa na kuzuiliwa na maombi kwa wazo kwamba hawawezi kumjia Baba kama ipasavyo au kama wanavyotaka. Mwana wa Mungu! msikilize Mwalimu wako. Anakuambia kwamba uendapo kwenye maombi ya faragha wazo lako la kwanza lazima liwe: Baba yuko sirini, Baba ananingoja huko. Kwa sababu tu moyo wako ni baridi na usio na maombi, jiingize katika uwepo wa Baba mpendao. Kama baba awahurumiavyo watoto wake, ndivyo Bwana anavyokuhurumia. Usiwe ukifikiria jinsi ulivyo na kidogo cha kumletea Mungu, bali jinsi alivyo na vingi vya kukupa. Jiweke tu mbele zake, na uangalie juu usoni pake; fikiri upendo wake, upendo wake wa ajabu, wa upole, wenye huruma. Mwambie tu jinsi kila kitu kilivyo na dhambi na baridi na giza: ni moyo wa Baba wenye upendo utakaoupa mwanga na joto moyo wako. Ee fanya alisemalo Yesu: Funga tu mlango, ukamwombe Baba yako aliye sirini. Je, si jambo la ajabu? kuweza kwenda peke yako na Mungu, Mungu asiye na mwisho. Kisha kutazama juu na kusema: Baba yangu!

“Na Baba yako aonaye sirini atakujazi.” Hapa Yesu anatuhakikishia kwamba maombi ya sirini hayawezi kuwa bila matunda: baraka yake itajidhihirisha katika maisha yetu. Twapaswa tu, sirini, peke yetu na Mungu, kumkabidhi yeye maisha yetu mbele ya wanadamu; naye atatuthawabisha waziwazi; atahakikisha kwamba jibu la maombi laonyeshwa dhahiri katika baraka yake juu yetu. Bwana wetu angetufundisha hivyo kwamba kama vile ubaba usio na mwisho na uaminifu ndivyo Mungu atukutanavyo navyo sirini, vivyo hivyo kwa upande wetu inapaswa kuwako unyenyekevu wa imani kama wa mtoto, ujasiri kwamba maombi yetu kweli hushusha baraka. “Yeye amwendeaye Mungu lazima aamini ya kwamba yeye ni mwenye kuwapa thawabu wale wamtafutao.” Baraka ya chumbani haitegemei nguvu au hisia zenye moto ambazo kwazo naomba, bali hutegemea upendo na uweza wa Baba ambaye kwake nakabidhi mahitaji yangu. Na kwa hiyo Mwalimu ana haja moja tu: Kumbuka Baba yako yuko, naye huona na kusikia sirini; nenda huko ukae huko, kisha urudi tena kutoka huko kwa ujasiri: Atakujazi. Mtumaini kwa ajili hiyo; umtegemee: maombi kwa Baba hayawezi kuwa bure; atakuthawabisha waziwazi.

Ili kuithibitisha zaidi imani hii katika upendo wa Kibaba wa Mungu, Kristo hunena neno la tatu: “Baba yenu anajua mnayohitaji kabla ninyi hamjamwomba.” Kwa mtazamo wa kwanza laweza kuonekana kana kwamba wazo hili lalifanya ombi lisihitajike sana: Mungu anajua vema kuliko sisi tunachohitaji. Lakini tunapopata ufahamu wa ndani zaidi juu ya maombi ni nini hasa, ukweli huu utasaidia sana kuiimarisha imani yetu. Utatufundisha kwamba hatuhitaji, kama wapagani, kwa wingi na kwa msisitizo wa maneno yetu, kumlazimisha Mungu asiyetaka atusikilize. Utatuongoza kwenye fikira takatifu na kimya katika maombi kadiri utuletavyo swali: Je, Baba yangu anajua kweli kwamba nahitaji hiki? Utatupa, mara tuongozwapo na Roho hadi kwenye uhakika kwamba ombi letu kweli ni kitu ambacho, kwa mujibu wa Neno, twahitaji kwa ajili ya utukufu wa Mungu, ujasiri wa ajabu wa kusema, Baba yangu anajua nakihitaji na sharti niwe nacho. Na kama kutakuwako kuchelewa katika jibu, litatufundisha katika saburi ya utulivu kushikilia: BABA! WEWE WAJUA nakihitaji. Ee uhuru na unyenyekevu wa heri wa mtoto ambao Kristo Mwalimu wetu angependa sana kuukuza ndani yetu, tunapomkaribia Mungu: na tumtazame Baba juu hata Roho wake auifanye kazi hiyo ndani yetu. Na wakati mwingine katika maombi yetu, tunapokuwa katika hatari ya kushughulishwa sana na maombi yetu yenye moto na msisitizo, hata kusahau kwamba Baba anajua na kusikia, na tunyamaze tuli na kusema tu kwa utulivu: Baba yangu huona, Baba yangu husikia, Baba yangu hujua; itasaidia imani yetu kulipokea jibu, na kusema: Twajua ya kuwa tunazo zile haja tulizomwomba.

Na sasa, ninyi nyote mlioingia upya katika shule ya Kristo ili mfundishwe kuomba, yatwaeni mafundisho haya, yatendeni, na mumtumaini yeye awakamilishe ndani yake. Kaeni sana katika chumba cha ndani, mlango ukiwa umefungwa—mkiwa mmefungiwa mbali na wanadamu, mkiwa mmefungiwa pamoja na Mungu; ni hapo Baba anawangoja, ni hapo Yesu atakapowafundisha kuomba. Kuwa peke yako sirini pamoja na BABA: hii na iwe furaha yako iliyo kuu. Kuwa na hakika kwamba BABA atayathawabisha waziwazi maombi ya sirini, hata yasiweze kubaki bila baraka: hii na iwe nguvu yako siku baada ya siku. Na kujua kwamba BABA anajua kwamba wahitaji ukiombalo; huu na uwe uhuru wako wa kuleta kila hitaji, katika hakika kwamba Mungu wako atakidhi kwa kadiri ya utajiri wake, katika utukufu, ndani ya Kristo Yesu.

“BWANA, UTUFUNDISHE KUSALI.”

Mwokozi mbarikiwa! kwa moyo wangu wote nakuhimidi kwa kuweka chumba cha ndani, kama shule ambapo wewe hukutana na kila mmoja wa wanafunzi wako peke yake, na kumfunulia Baba. Ee Bwana wangu! iimarishe imani yangu hivyo katika upendo wa upole na fadhili za Baba, hata kila mara nijihisipo mwenye dhambi au mwenye taabu, wazo la kwanza la papo hapo liwe kwenda mahali ninapojua Baba ananingoja, na ambapo maombi hayawezi kamwe kwenda bila baraka. Wazo kwamba yeye anajua hitaji langu kabla sijaomba na linilete, katika utulivu mkuu wa imani, nitumaini kwamba atatoa akihitajicho mwanawe. Ee mahali pa maombi ya sirini pawe kwangu sehemu ipendwayo kuliko zote duniani.

Na, Bwana! unisikie niombapo kwamba ubariki kila mahali vyumba vya siri vya watu wako waaminio. Ufunuo wako wa ajabu wa upole wa Baba na uwaweke huru Wakristo wote vijana kutoka katika kila wazo la maombi ya sirini kuwa wajibu au mzigo, na uwaongoze kuyahesabu kuwa pendeleo lililo kuu kuliko yote la maisha yao, furaha na baraka. Uwarudishe wote waliokata tamaa, kwa sababu hawawezi kupata cho chote cha kukuletea katika maombi. Ee uwape kufahamu kwamba wana budi tu kuja na utupu wao kwake yeye aliye na vyote vya kutoa, na afurahiaye kuvitoa. Si kile walicho nacho cha kumletea Baba, bali kile Baba angojacho awape, na kiwe wazo lao moja.

Na ubariki hasa chumba cha ndani cha watumishi wako wote wafanyao kazi kwa ajili yako, kama mahali ambapo kweli ya Mungu na neema ya Mungu hufunuliwa kwao, ambapo hupakwa mafuta mapya kila siku, ambapo nguvu zao hufanywa upya, na baraka hupokelewa kwa imani, ambazo kwazo watawabariki wenzao wanadamu. Bwana, tuvute sisi sote chumbani karibu zaidi na wewe na Baba. Amina.