Maombi Hayana Budi Yawe Dhahiri

“Yesu akamjibu, akamwambia, Wataka nikufanyie nini?”—Marko 10:51; Luka 18:41.

YULE kipofu alikuwa akipaza sauti kwa nguvu, na hilo mara nyingi, “Mwana wa Daudi, unirehemu.” Kilio chake kilifika masikioni mwa Bwana; alijua alichokitaka, naye alikuwa tayari kumpa. Lakini kabla ya kukifanya, amwuliza: “Wataka nini nikufanyie?” Anataka kusikia kutoka kinywani mwake mwenyewe, si ombi la jumla la rehema tu, bali usemi ulio dhahiri wa haja yake hasa. Mpaka pale atakapoueleza wazi, haponywi.

Hata leo wako waombaji wengi ambao Bwana huwauliza swali lilo hilo, nao hawawezi kupata msaada wanaouomba mpaka wawe wamelijibu. Maombi yetu hayana budi yasiwe kilio kisicho dhahiri kwa rehema zake, wala mlio usio na uhakika kwa baraka, bali usemi ulio wazi wa haja iliyo dhahiri. Si kwamba moyo wake wenye upendo haukifahamu kilio chetu, au haupo tayari kusikia. Bali ayataka hivyo kwa faida yetu wenyewe. Maombi yaliyo dhahiri kama hayo hutufundisha kuzijua haja zetu vyema zaidi. Yadai wakati wa kutosha, na fikira, na kujichunguza kwa makini ili kugundua ni nini hasa haja yetu kubwa kuliko zote. Hututafuta na hutuweka mtihanini kama tamaa zetu ni za kweli na za dhati, ambazo tuko tayari kudumu ndani yake. Hutuongoza kuhukumu kama tamaa zetu ni sawasawa na Neno la Mungu, na kama kweli twaamini ya kwamba tutapokea vitu vile tunavyoviomba. Hutusaidia kuusubiri jibu maalum, na kulitambua litakapokuja.

Na bado ni kiasi gani cha maombi yetu ni cha ukungu na kisicho na shabaha. Wengine hulia kwa rehema, lakini hawajishughulishi hata kidogo kujua rehema hiyo yapaswa kuwafanyia nini. Wengine huomba, labda, waokolewe na dhambi, lakini hawaanzi kwa kuitaja dhambi yoyote kwa jina ambayo ukombozi wake waweza kudaiwa. Wengine tena huomba baraka ya Mungu juu ya wale walio karibu nao, kwa kumwagwa kwa Roho wa Mungu juu ya nchi yao au ulimwengu, na bado hawana uwanja maalum ambapo wasubiri na kutazamia kuliona jibu. Kwa wote hao Bwana husema: Nawe ni nini hasa unachotaka na kunitazamia niifanye? Kila Mkristo ana nguvu zenye mpaka, na kama impasavyo kuwa na uwanja wake maalum wa kazi ambamo hufanya kazi, ndivyo ilivyo kwa maombi yake pia. Kila mwamini ana mzunguko wake mwenyewe, jamaa yake mwenyewe, rafiki zake, na jirani zake. Kama angemtwaa mmoja au zaidi wa hawa kwa jina, angeona ya kwamba hili humwingiza kweli katika shule ya mazoezi ya imani, na kumwongoza katika kushughulika binafsi na kwa shabaha na Mungu wake. Ni pale katika mambo hayo yaliyo dhahiri tunapodai na kupokea majibu kwa imani, ndipo maombi yetu ya jumla zaidi yatakapokuwa ya kuamini na yenye nguvu.

Sote twajua kwa mshangao gani ulimwengu wote uliostaarabika ulisikia jinsi majeshi yaliyozoezwa yalivyorudishwa nyuma na Wabuari wa Transvaal huko Majuba. Nao walikuwa na deni la ushindi wao kwa nini? Katika majeshi ya Ulaya askari hupiga risasi juu ya adui aliyesimama katika makundi makubwa, wala hawazi kamwe kutafuta shabaha kwa kila risasi. Katika kuwinda wanyama Mbuari alikuwa amejifunza somo lingine: jicho lake lililozoezwa lilijua kuituma kila risasi kwa ujumbe wake maalum, kumtafuta na kumpata mtu wake. Kulenga kwa namna hiyo lazima kushinde siku ile katika ulimwengu wa roho pia. Maadamu katika maombi twamimina mioyo yetu tu katika wingi wa maombi, bila kutwaa wakati wa kuona kama kila ombi latumwa kwa kusudi na tarajio la kupata jibu, basi si mengi kati yao yatakayoifikia shabaha. Lakini kama, katika ukimya wa nafsi twainamavyo mbele za Bwana, tungejiuliza maswali kama haya: Ni nini sasa hasa tamaa yangu? je, naitamani kwa imani, nikitazamia kupokea? je, sasa niko tayari kuiweka na kuiacha kifuani mwa Baba? je, ni jambo lililokwisha kukubaliwa kati ya Mungu na mimi ya kwamba nitalipata jibu? tungejifunza kuomba hata Mungu angeona na sisi tungejua ni nini hasa tunachotazamia.

Ni kwa ajili ya hili, miongoni mwa sababu nyingine, kwamba Bwana atuonya juu ya maneno ya bure yasiyokwisha ya watu wa mataifa, wadhaniao ya kwamba watasikiwa kwa sababu ya kuomba kwao kwingi. Mara nyingi twasikia maombi ya juhudi na bidii kubwa, ambamo wingi wa maombi humiminwa, lakini ambayo Mwokozi bila shaka angeyajibu, “Wataka nini nikufanyie?” Kama nikiwa katika nchi ngeni, kwa faida ya biashara ambayo baba yangu ndiye mwenyewe, hakika mimi mwenyewe ningeandika aina mbili tofauti za barua. Zitakuwako barua za jamaa zinazoeleza mawasiliano yote ambayo upendo huyachochea; na zitakuwako barua za biashara, zenye maagizo ya vile ninavyohitaji. Na huenda zikawako barua ambamo zote mbili zimo. Nayo majibu yatalingana kabisa na barua zenyewe. Kwa kila sentensi ya barua zenye habari za jamaa sitazamii jibu maalum. Lakini kwa kila agizo nitumalo nina hakika ya jibu kama bidhaa iliyotakiwa imepelekwa. Katika kushughulika kwetu na Mungu kipengele cha biashara hakina budi kisikose. Pamoja na usemi wetu wa haja na dhambi, wa upendo na imani na kujitoa, hapana budi pawe na usemi wa shabaha wa kile tunachokiomba na kutazamia kupokea; ni katika jibu ambapo Baba hupenda kutupa alama ya kibali chake na kutukubali kwake.

Lakini neno la Bwana latufundisha zaidi. Hasemi, Wewe watamani nini? bali, Wewe waazimia nini? Mara nyingi mtu hutamani kitu bila kukiazimia. Natamani kupata bidhaa fulani, lakini naona bei yake ni ghali mno; naamua nisiitwae; natamani, lakini siazimii kuipata. Mvivu hutamani kuwa tajiri, lakini haazimii. Wengi hutamani kuokolewa, lakini huangamia kwa sababu hawaazimii. Nia hutawala moyo wote na maisha; kama kweli naazimia kupata kitu chochote kilicho ndani ya uwezo wangu, sipumziki mpaka nikipate. Na hivyo, Yesu atuambiapo, “Wataka nini?” anauliza kama kweli ni kusudi letu kupata tuombalo kwa gharama yoyote, ijapokuwa dhabihu ni kubwa kiasi gani. Je, kweli wataka hivyo kiasi kwamba, ajapoliahirisha kwa muda mrefu, hutanyamaza mpaka akusikie? Ole! ni maombi mangapi ni matamanio tu, yaliyotumwa kwa muda mfupi kisha kusahauliwa, au yaliyotumwa mwaka baada ya mwaka kama jambo la wajibu, hali twaridhika na ombi bila jibu.

Lakini, laweza kuulizwa, je, si vyema zaidi kuyafanya matakwa yetu yajulikane kwa Mungu, kisha kumwachia yeye akadirie kilicho chema zaidi, bila kutaka kusisitiza nia yetu? La hasha. Hii ndiyo asili hasa ya ombi la imani, ambalo Yesu alitaka kuwazoeza wanafunzi wake, ya kwamba haliyajulishi tu matamanio yake kisha kumwachia Mungu uamuzi. Hilo lingekuwa ombi la kujisalimisha, kwa mambo yale ambayo hatuwezi kuyajua mapenzi ya Mungu. Lakini ombi la imani, likiyaona mapenzi ya Mungu katika ahadi fulani ya Neno, hulisihi hilo mpaka lije. Katika Mathayo (9:28) twasoma Yesu alimwambia yule kipofu: “Mwaamini ya kuwa naweza kufanya jambo hili?” Hapa, katika Marko, asema: “Wataka nini nikufanyie?” Katika visa vyote viwili alisema ya kwamba imani ndiyo iliyowaokoa. Na hivyo alimwambia yule mwanamke Msirofoinike pia: “Imani yako ni kubwa: na iwe kwako kama utakavyo.” Imani si kitu ila kusudi la nia likikaa juu ya neno la Mungu, na kusema: Sharti nipate bila shaka. Kuamini kwa kweli ni kuazimia kwa uthabiti.

Lakini je, nia kama hiyo haipingani na kutegemea kwetu Mungu na kujisalimisha kwetu kwake? La hasha; bali ndiyo kujisalimisha kwa kweli kunakomheshimu Mungu. Ni pale tu mtoto alipoitoa nia yake mwenyewe katika kujisalimisha kabisa kwa Baba, ndipo apokeapo kwa Baba uhuru na nguvu ya kutaka atakalo. Lakini, mara mwamini alipoyakubali mapenzi ya Mungu, kama yalivyofunuliwa kwa Neno na Roho, kuwa nia yake pia, ndipo yalipo mapenzi ya Mungu kwamba mtoto wake aitumie nia hii iliyofanywa upya katika utumishi wake. Nia ndiyo nguvu iliyo kuu kuliko zote nafsini; neema yataka zaidi ya kila kitu kuitakasa na kuirudisha nia hii, mojawapo ya sifa kuu za sura ya Mungu, katika utumizi ulio kamili na ulio huru. Kama mwana, aishiye kwa ajili ya faida za baba yake tu, asiyeitafuta yake bali mapenzi ya baba yake, aaminiwavyo na baba katika biashara yake, ndivyo Mungu asemavyo na mtoto wake kwa kweli yote, “Wataka nini?” Mara nyingi ni uvivu wa kiroho ambao, chini ya kivuli cha unyenyekevu, hukiri kwamba hauna nia yoyote, kwa sababu waogopa taabu ya kuyatafuta mapenzi ya Mungu, au, yakikwisha kupatikana, mapambano ya kuyadai kwa imani. Unyenyekevu wa kweli sikuzote hufuatana na imani iliyo na nguvu, ambayo hutafuta tu kujua ni nini kilicho sawasawa na mapenzi ya Mungu, kisha kwa ujasiri hudai kutimizwa kwa ahadi: “Ombeni mtakalo lote, nanyi mtatendewa.”

“BWANA, UTUFUNDISHE KUOMBA.”

Bwana Yesu! nifundishe kuomba kwa moyo wangu wote na nguvu zangu zote, ili pasiwe na shaka kwako wala kwangu juu ya kile nilichokiomba. Nijalie nijue vyema nikitamanicho hata, kama vile maombi yangu yanavyoandikwa mbinguni, niweze kuyaandika duniani pia, na kulitambua kila jibu lijapo. Na imani yangu katika kile Neno lako lililoahidi na iwe wazi kiasi kwamba Roho aweze kweli kunitendea ndani yangu uhuru wa kutaka kwamba litakuja. Bwana! fanya upya, imarisha, takasa kabisa nia yangu kwa ajili ya kazi ya maombi yenye nguvu.

Mwokozi mbarikiwa! nakusihi unifunulie unyenyekevu wa ajabu unaotuonyesha, ukituuliza hivyo tuseme tutakalo wewe ulifanye, na kuahidi kufanya lolote tutakalo. Mwana wa Mungu! siwezi kulielewa; naweza tu kuamini ya kwamba kweli umetukomboa kabisa kwa ajili yako mwenyewe, nawe watafuta kuifanya nia, iliyo sehemu yetu iliyo tukufu kuliko zote, kuwa mtumishi wako aliye hodari kuliko wote. Bwana! nakutolea nia yangu bila kujizuia hata kidogo, kuwa ndiyo nguvu ambayo kwayo Roho wako atatawala nafsi yangu yote. Na aimiliki, aiongoze katika kweli ya ahadi zako, na kuifanya kuwa na nguvu katika maombi hata niisikie sikuzote sauti yako ikisema: “Imani yako ni kubwa: na iwe kwako kama utakavyo.” Amina.