Jinsi ya Kudumu Katika Usafi

Yakobo 1:12 yasema, “Heri mtu yule astahimiliye majaribu; kwa maana akiisha kukubaliwa, atapokea taji ya uzima ambayo Mungu amewaahidia wale wampendao.”

Wandugu zangu Wapendwa, Baada ya kujaribu kuwaonyesha jinsi jambo hili lilivyo la kutamanika, na kuwasihi mlipokee, siwezi kujizuia kuona kwamba mashauri machache juu ya njia iliyo bora ya kuitunza baraka ya Utakatifu baada ya kuipata yaweza kuwa ya manufaa. Pasipo shaka, wengi huipata hazina hii takatifu ya Moyo Safi, na kushangilia katika uhakika na furaha iletayo, lakini baada ya kitambo kidogo huipoteza tena. Huingia katika Hekalu Takatifu, kisha, kwa sababu moja au nyingine, hulihama. Hupambana kwa machozi na maombi hata kupanda juu ya Njia Kuu ya Utakatifu, kisha hugeuka kando kuingia katika kijia kimoja au kingine, ambako huwa tena mawindo ya mashaka na hofu na dhambi za siku zile za kale. Hili ni jambo la kusikitisha sana.

Watendao hivyo ndio wateswao zaidi; lakini, ole! Madhara makubwa huwapata wengine pia kwa kukosa uaminifu kwao. Lakini kushindwa kwa wale waipatao neema wasiyatunze waliyoyapokea kusiwakatishe tamaa ninyi mlioingia katika njia hii takatifu, wala kusiwe hoja juu ya kutokudumu kwenu ndani yake.

Mnalopaswa kufanya, Wandugu zangu, ni kukata shauri mioyoni mwenu kwamba, mkiisha kuipata ile Lulu ya Thamani Kubwa, adui yeyote asiwapokonye hazina hiyo. Kwa ajili hiyo, shauri langu la kwanza ni hili: 1. Tafuteni hata mpate uthibitisho ulio imara mioyoni mwenu wenyewe kwamba kazi imekwisha fanyika. Msiridhike na kitu kilicho pungufu ya uhakika kwamba Mungu ameitakasa roho yenu kutoka dhambini kweli kweli.

Msijiache kutulia katika hisia za kupendeza tu, wala katika tumaini la ufunuo utakaokuja baadaye juu ya jambo hili. Endeleeni kushindana, na kuomba, na kuamini, hata mridhike kwamba kazi imetimizwa.

Lakini mwauliza tena, “Nitajuaje kwamba Mungu ameitakasa roho yangu kutoka dhambini?” Najibu, “Mlijuaje kwamba Mungu amewasamehe dhambi zenu? Mlipataje kulijua jambo hilo la thamani? Kwa maana hakika, lilikuwa jambo la thamani mlipookolewa. Nadhani tangu kipawa hicho cha neema kilipokuwa chenu, mmeimba mara elfu au zaidi maneno haya:” “Kamwe sitaisahau siku ile Yesu alipoziosha dhambi zangu.”

“Mlifikiaje uhakika wenu wenyewe kwamba mmeokolewa?” nauliza, nanyi mwajibu kwamba Mungu alilinena moyoni mwenu. Basi, uhakika wa Utakaso wenu utakuja vivyo hivyo.

Roho Mtakatifu atazalisha ndani ya roho yenu ushawishi wa kupendeza kwamba kiburi chote na nia mbaya, na wivu na ubinafsi, vimeondolewa, na kwamba Mungu amewajaza amani na upendo.

Ushawishi huu wa thamani, bila shaka, utakuja kwa namna mbalimbali kwa watu mbalimbali. Kwa wengine utaonekana kama “Raha ya Imani,” kwa wengine kama “Ubatizo wa Moto,” kwa wengine kama “Ujazo wa Upendo,” na kwa wengine kama Kutawazwa kwa Kristo ajaye kumiliki rohoni mwao juu ya Ufalme wa ndani, ulio haki, na amani, na furaha katika Roho Mtakatifu.

Lakini kwa wote sawasawa, kazi ikiwa ya kweli na kamili, utakuwako uthibitisho kwamba damu hutakasa na kwamba moyo u safi. Msiridhike na kitu pungufu ya hili, mkamwachie Mungu, kwa radhi yake njema, kutoa zaidi au kuzuia.

2. Mkiisha kuridhika kwamba Mungu ameutakasa moyo wenu, ungameni jambo hilo. Hamna budi kufanya hivyo mkitaka kuidumisha Baraka. Wengi wa watu Watakatifu kuliko wote, wanaume kwa wanawake, ambao ulimwengu umewajua, kwa kushawishiwa na haya isiyo ya kweli, au woga, au sababu nyingine, wamezuiliwa kuyakiri mambo ya ajabu ambayo Mungu amewatendea, na kwa hivyo wamemhuzunisha Roho Mtakatifu na kuipoteza Baraka. Shetani atawajaribu kuificha nuru yenu chini ya pishi vivyo hivyo, lakini hamna budi kumpinga na kuungama kwa ujasiri mbele ya wote wanaowazunguka Wokovu ambao Mungu amewapa.

Ukirini ninyi wenyewe. Semeni tena na tena moyoni mwenu: “Utukufu, Utukufu, Yesu aniokoa; Utukufu, Utukufu kwa Mwana-Kondoo”; Sasa Damu itakasayo imenifikia, Utukufu, Utukufu kwa Mwana-Kondoo!”

Ukirini kwa Mwokozi wenu. Mwambieni kwamba mwamtumaini, na kumtukuza kwa yale aliyowatendea. Ungameni kwa Wandugu zenu kila mpatapo nafasi ifaayo. Na lijulikane katika jamaa yenu wenyewe. Huenda si tu kwamba litawasaidia sana ninyi, kwa wale walio karibu nanyi na wapenzi wenu kujua aliyowatendea Mungu, bali laweza kuwa baraka kubwa kwao. Bila shaka, mtakuwa waangalifu msionyeshe kitu chochote mfano wa roho ya majivuno, na kumpa Mungu utukufu wote kwa yote aliyowajalia kuyafurahia, nami nina hakika hamtafanya maungamo kana kwamba mnawahukumu Wandugu wale ambao hawajaletwa kuuona na kuumiliki Wokovu huu mkuu. Upendo utakuwa katika maneno yenu yote na pia moyoni mwenu.

Lakini hamna budi kuungama kwamba Mungu ameutakasa moyo wenu, na kwamba, kwa Roho wake, awawezesha kuishi siku kwa siku pasipo kumhuzunisha. Huenda, nyakati nyingine, ukawa msalaba. Lakini hamna budi kuuchukua, na katika kufanya hivyo, mtakuwa nuru na nguvu na furaha kwa Wandugu na rafiki zenu.

3. Ili kuidumisha Baraka, hamna budi kujitahidi kuishi katika roho ile ile ya kujisalimisha, na utii, na kujitoa wakfu kwa Mungu, kama ile mliyoingia nayo katika kuifurahia. Mambo yenu ya kila siku hayana budi kuwa yale tuyaimbayo mara nyingi: “Basi hapa nakuachia kilicho chako, Ufinyange upendavyo udongo wako utulivu, Lakini nijalie kuipokea chapa yako, Unijalie kuyatii maneno yako yote, Nitumike kwa moyo mmoja na jicho moja, Na kwa utukufu wako niishi na kufa.”

4. Ili kuyadumisha mambo haya, hamna budi kuendelea katika roho ile ile ya kutumaini iliyoileta Baraka moyoni mwenu kwanza. Hamkukipokea kipawa cha Usafi kwa hisia, wala kwa maarifa, wala kwa matendo; la, wala kwa shauku wala kwa maombi. Mliamini, mkaokolewa. Kama mngalisema, Sitaamini, au, Siwezi kuamini kwamba Yesu hutakasa isipokuwa nihisi kazi imefanyika moyoni mwangu, msingaliweza kufurahia kuwa nako. Mlitumaini, kazi ikafanyika. Hamna budi kwenda mbele katika roho iyo hiyo. Zitakuwako saa ambazo yote yataonekana kuwa magumu na giza na ukiwa.

Hizo zitakuwa saa ambazo itawapasa kuvipiga vita vya imani, na kushikamana na mwanzo wa uthabiti wenu, mjisikiapo vema au vibaya, moyo wenu uonekanapo kuwa mgumu au laini, kwamba Damu hutakasa. Lishikeni sana.

5. Ili kuutunza moyo ulio safi, hamna budi kuyapinga majaribu. Mtapata majaribu, yatakuja kutoka pande mbalimbali, lakini hasa kutoka kwa ibilisi, katika njia tatu za pekee: -- (a) Atajaribu kuwavuta kando mrudi katika mazoea ya zamani, yaliyo ya mashaka kwa asili yake au maovu waziwazi.

Atazijua sehemu zenu dhaifu. Wekeni ulinzi maradufu hapo.

(b) Atadokeza matakwa na tamaa zake mbaya mwenyewe, kisha atajaribu kuwashawishi kwamba zatoka moyoni mwenu wenyewe. Atasema, “Wawezaje kuwa uliyetakaswa na kuwa na mawazo ya dhambi kama hayo?” Yakataeni mazao yake machafu. Mwambieni si yenu. Mwambieni kwamba mwayachukia.

Mwambieni ni yake mwenyewe.

(c) Atajitahidi kuwafanya mdhani mmeipoteza Baraka kwa sababu si sikuzote mnajisikia kama mnayo. Lakini mwapaswa kuishi si kwa hisia bali kwa imani.

6. Ili kuutunza moyo safi, hamna budi kuendelea kwa uangalifu kuzitumia njia zile ambazo Mungu ameziweka kwa msaada wenu. Usafi hauwaingizi katika hali yoyote ifanyayo matumizi ya njia hizo, kwa kuudumisha na kuuongeza, kuwa si lazima.

7. Ili kuidumisha Baraka: (a) Hamna budi kuomba, nami nawasihi sana muombe kwa saa zilizowekwa na kwa vipindi maalum.

(b) Hamna budi kuisoma na kuichunguza Biblia yenu.

(c) Someni vitabu na majarida yenye mafundisho na kutia moyo juu ya somo la Utakatifu.

(d) Kesheni na pia kuomba. Muwe macho sikuzote.

8. Endeleeni kupigana kwa ajili ya roho za watu, msivutwe kando kuingia katika shughuli ya kibinafsi juu ya mambo yenu wenyewe, wala katika kuwapatia Wandugu wengine mambo yayo hayo tu. Naona ni vema mtenge sehemu ya wakati na nguvu zenu kwa wajibu wa kujitakasa nafsi zenu na wa kueneza Wokovu kamili kati ya Wandugu zenu. Lakini hakuna kitu kiwezacho kuwaondolea wajibu wa kupigana kwa ajili ya Wokovu wa roho zinazokufa zinazowazunguka.

Nina nafasi ya neno moja jingine tu. Ni la maana sana. Kwa mkazo wote niwezao nataka kumwambia kila asomaye Barua hizi, ikiwa kwa sababu yoyote ile mtaupoteza uhakika kwamba damu ya Yesu yawatakasa; au ikiwa, jambo la huzuni zaidi, mtaipoteza baraka ya Usafi, kimbilieni mara moja miguuni pa Mwokozi wenu, ungameni kosa lenu, jitoeni tena kwa utumishi kamili wa Bwana wenu, na kuzama tena katika ile Chemchemi iliyofunguliwa kwa dhambi na unajisi; kisha, mkifaidika kwa huzuni na masikitiko ya kuanguka kwenu, anzeni upya kuishi maisha ya imani katika Mwokozi atakasaye.

“Ijapo majeshi elfu yashambulia, Dunia elfu ziitikise roho yangu, Ninayo ngao itakayoituliza ghadhabu yao, Na kuyarudisha nyuma majeshi ya kigeni: Imechorwa juu yake Mwana-Kondoo atokaye damu, Nathubutu kuamini katika jina la Yesu.

“Ili kunikomboa kutoka mikononi mwa Shetani, Ili kuniweka huru na ulimwengu huu mbaya, Kuzitakasa dhambi zangu na kuvifungua vifungo vyangu, Na kuniokoa na uovu wote, Bwana wangu na Mungu wangu alikuja kutoka mbinguni; Nathubutu kuamini katika jina la Yesu.”

--- MWISHO ---