Kushinda Katika Maombi

Kwanza tunashinda mbele za Mungu kabla ya kushinda mbele za wanadamu.

Katika muktadha wa maombi, maombi ya kushinda ni yale yanayoendelea kwa ustahimilivu hadi yafikie matokeo yanayotarajiwa. Kabla hatujaendelea mbele zaidi, ningependa tukumbuke kwamba tunashinda katika roho kwanza kabla ushindi haujaonekana katika hali ya mwili. Angalia jinsi Yakobo alivyotaka kurudi katika nchi yake ya asili. Yote ambayo Mungu alikuwa amembariki nayo aliyachukua, naye alikuwa tayari kurudi nyumbani.

Lakini alikumbuka kwamba alikuwa amemdanganya ndugu yake Esau. Wakati huu Esau alikuwa amejiimarisha, jambo lililompa Yakobo sababu tosha ya kuogopa. Alipojiandaa kwa safari, moyo wake haukuwa na amani, naye akajikuta yuko peke yake. Yakobo alifahamu kwamba asiposhinda mbele za Mungu, hangeshinda mbele za Esau.

Usiku ule, malaika akamtokea Yakobo, naye akashindana naye hadi asubuhi. Yakobo hakukata tamaa; alishikilia hadi malaika alipombariki. Jambo hili lilionyesha kwamba Yakobo alikuwa ameshinda mbele za Mungu, jambo lililomwandaa kufanikiwa mbele za Esau.

“Akasema, Jina lako hutaitwa tena Yakobo, ila Israeli; kwa maana umeshindana na Mungu, na wanadamu, ukashinda.” Mwanzo 32:28.

Tofauti na maombi yetu ya kawaida, maombi ya kushinda huchipuka kutoka mzigo mzito ulio moyoni mwa mtu. Ni aina ya maombi ambayo Roho Mtakatifu hukusukuma kuendelea nayo hadi uone matokeo. Kama tulivyokwisha eleza mapema, maombi ya kushinda ni ya lazima; hayakomi hadi yafikie kusudi lake. Yanapita zaidi ya kumshukuru Bwana tu kwa wema wake; yanahusisha maombi ya nguvu.

“Kadhalika Roho naye hutusaidia udhaifu wetu, kwa maana hatujui kuomba jinsi itupasavyo, lakini Roho mwenyewe hutuombea kwa kuugua kusikoweza kutamkwa.” Warumi 8:26.

Bila Roho Mtakatifu, mtu hawezi kushinda katika maombi kwa sababu hakuna, au ni kidogo sana kinachoweza kubadilika tunapoomba kwa jinsi ya kimwili. Kwa nini? Hatuwezi kujua ni nini hasa kilicho sahihi kusema, na jinsi ya kukisema ili kuleta mabadiliko, lakini Roho ndiye mwongozo wetu.

Je, unahisi kwamba umefanya kila kitu lakini bado huoni matokeo? Endelea mbele! Usikome hadi ufanikiwe. Hata kama haionekani kufanya kazi, kwa hakika inafanya kazi. Adui anajua unaweza kushinda ukiendelea kusonga mbele. Yeye hujishughulisha tu na watu wanaokata tamaa kwa sababu anajua kwamba hao tayari wameshindwa. Kwa hiyo, usikate tamaa! Ikiwa unahisi mzigo wa kuomba, hakikisha unaomba. Mungu hatakupa zaidi ya uwezo wako. Chochote akupacho, pia hukupa nguvu ya kushinda! Haleluya!

Lakini kabla ya kuomba, ni muhimu kutubu jambo lolote baya lililo katika maisha yako. Baada ya hapo, pokea msamaha kisha endelea mbele. Nena kwa lugha nyingine kwa maana hukusaidia kutimiza mambo yanayohitajika kwa jambo hilo. Kisha, linena neno la Mungu kwa ujasiri. Roho Mtakatifu anapoujaza moyo wako, unalinena neno la Mungu kwa ujasiri. “Hata walipokwisha kuomba, mahali pale walipokusanyika pakatikiswa, wote wakajaa Roho Mtakatifu, wakanena neno la Mungu kwa ujasiri.” Matendo 4:31.

Maombi ya kushinda hufanya nini?

Hudumisha uvuvio. Kama huombi, utapoteza ile fadhili/mng’ao uambatanao nayo. “Kwa bidii msiwe walegevu; mwe na juhudi katika roho; mkimtumikia Bwana.” Warumi 12:11. Kamwe usilegee katika bidii!

Unafanyaje hivyo? Kwa kutafakari neno la Mungu. Fanya hivyo tena na tena, na uache liwe sehemu yako.

Maombi ya kushinda pia hutusafisha na kutufanya kuwa watukufu zaidi kuliko tulivyoingia kabla ya kuomba. Kadiri unavyozidi kuomba, ndivyo unavyozidi kung’aa.