Utangulizi wa Maombi

Unaweza kujua jinsi ya kuomba tu ikiwa kwanza unajua maombi ni nini!

Je, umewahi kujiuliza maombi ni nini, kwa nini watu huomba, au kwa nini wengine huomba kila mara kana kwamba ni jambo la muhimu zaidi maishani mwao? Ikiwa ndivyo, kitabu hiki ni kwa ajili yako! Watu wengi wamejifunza kuhusu maombi na wamebarikiwa na yale waliyofundishwa. Hata hivyo, baadhi bado wana maswali kuhusu maombi. Ninaamini kitabu hiki kitajibu maswali mengi, kama si yote, kuhusu maombi. Basi kwa nini kusubiri, tuanze mara moja!

Maombi ni nini?

1. Maombi ni heshima, ni pendeleo la kushirikiana na kuwa na umoja pamoja na Mungu. Kuwa na umoja katika hali hii kunamaanisha kwamba mtu anajua lililo moyoni mwa Mungu na anaweza kufanya lile Mungu anachomwambia. Kwa umoja huu, unaweza kuijua nia ya Kristo, kuishi kama Kristo, kufikiri kama Yeye, na kuwa mkamilifu kama Yeye alivyo. Ndivyo maombi yanavyofanya, yanakusaidia kuwa katika ushirika huo, umoja huo pamoja na Mungu ambapo unaweza kujua la kufanya katika kila hali ya maisha. Jinsi hilo lilivyo la ajabu!

2. Maombi ni njia ya pande mbili. Mungu huzungumza nasi na sisi pia tuna pendeleo la kuzungumza naye.

Hivyo, maombi kamwe si na hayapaswi kuchukuliwa kuwa njia ya upande mmoja ambapo tunaomba kisha tunaondoka. La hasha! Mungu naye huzungumza, na hili ndilo lengo pekee la maombi: kuchangamana na Mungu, kumjua vizuri zaidi, na kufahamu mapenzi yake ni yapi. Katika nyakati zako za maombi, kwa makusudi mpe Mungu nafasi ya kuzungumza nawe pia. Ndivyo unavyoujua moyo wake na mapenzi yake.

Haleluya!

3. Maombi pia ni jambo la lazima. Luka 18:1 inasema: “Imewapasa watu kuomba sikuzote, wala wasikate tamaa.” Ni wazi kwamba hili si ombi. Andiko haliyasemi kwamba watu wanaruhusiwa kuomba, wanaweza kuomba, au huenda wakaomba. Bali, linasema kwamba imewapasa watu kuomba wala wasikate tamaa. Hii inamaanisha kwamba maombi lazima yawe sehemu ya siku yako; nyakati za maombi zinaweza pia kuwa nyakati za kupendeza zaidi katika siku yako. Basi, maombi na yawe mtindo wako wa maisha; kama vile ulavyo hata pale usipohisi kula.

Yesu Kristo, kielelezo kikamilifu Ingawa alijua kwamba ni Mwana wa Mungu Aliye Juu Sana, Yesu alijinyenyekeza kiasi cha kuomba. Tunaona hili katika Luka 6:12: “Ikawa siku hizo aliondoka akaenda mlimani ili kuomba, akakesha usiku kucha katika kumwomba Mungu.”

Mpendwa, usiwe na shughuli nyingi kiasi cha kushindwa kuomba, wala usiwaze kamwe kwamba kutakuja wakati ambao hutahitaji tena kuomba.

Maombi ni mapigo ya moyo wa maisha ya kila mwamini. Bila maombi, huwezi kuchangamana na Mungu kama Yesu alivyofanya. Bila maombi, huenda usijue mapenzi ya Baba kwa ajili ya maisha yako ni yapi. Bila maombi, huenda ikawa vigumu kwako kutumia mamlaka yako katika Kristo. Hii inamaanisha kuchukua mamlaka na kusababisha mambo yaliyo ndani ya Kristo Yesu yatendeke. Unaweza pia kupata shida kuamsha na kutembea katika ufahamu wa uwepo wa Mungu maishani mwako, na mambo mengine mengi ambayo tutayaeleza katika sura zetu zinazofuata.