Biblia kwa Kila Mtu

“Mlipata bure, toeni bure.” — kutoka Mathayo 10

Mwaka 1905 Ramabai aliwaomba wasichana wa Mukti waombe kila asubuhi kwamba Mungu awalete watu wengi wa India karibu naye, “pamoja na sisi wenyewe.” Wasichana wapatao sabini walikuja. Punde mamia walikuwa wakiomba! Siku moja mwezi Juni, Mungu alijibu kwa njia ya ajabu. Wasichana walianza kulia na kuomba na kuomba msamaha kwa mabaya waliyokuwa wamefanya. Wengine walirudisha vitu walivyokuwa wamechukua. Walijawa na furaha. Vikundi vya wasichana vilikwenda kuwaombea watu kila mahali India. Ramabai aliwafundisha kwamba ishara muhimu kuliko zote ya Roho wa Mungu ni upendo.

Ramabai alikuwa na kazi moja kubwa zaidi. Biblia ya lugha yake, Kimarathi, ilitumia maneno marefu na magumu. Wanawake wengi vijijini hawakuweza kuielewa. Basi Ramabai alianza kutengeneza Biblia mpya, kwa maneno rahisi ambayo watu wa kawaida waliyazungumza. Alijifunza Kiebrania na Kigiriki, lugha ambazo Biblia iliandikwa kwazo mara ya kwanza. Wasichana wa Mukti walipanga herufi kwenye mashine yao wenyewe ya kuchapa. Hakukubali kamwe Biblia yake iuzwe. Ni lazima itolewe bure, alisema, kama vile yeye alivyopewa bure.

Mwaka 1921 jambo la huzuni sana lilitokea. Manorama, binti yake, aliyefanya kazi kando yake kwa miaka mingi, aliugua akafariki. Ramabai alisema, “Bwana alitoa, na Bwana ametwaa; jina la Bwana na libarikiwe.”

Ramabai aliimaliza Biblia yake muda mfupi kabla ya kufariki. Alfajiri ya tarehe 5 Aprili 1922, alifariki kwa amani usingizini. Alikuwa na umri wa miaka sitini na mitatu. Wasichana elfu moja walifuata wanawake vijana wa Mukti walipolibeba jeneza lake. Watu wa kila tabaka walisimama bega kwa bega, na mjane mmoja mzee akalia, “Ee, Mama Mkuu, Mama Mkuu!” Mukti ingalipo hata leo, ikiwatunza wanawake na watoto.

Ramabai alipewa upendo wa Mungu bure, basi naye akautoa bure kwa kila mtu. Wewe pia umepewa zawadi njema. Ni nani ambaye ungeweza kumshirikisha upendo wa Mungu leo?

Mungu mpendwa, asante kwa Biblia, na kwa watu kama Ramabai walioishirikisha kwa wengine. Nisaidie kuwashirikisha wengine upendo wako bure. Amina.