“Na Yule Je?”

“Kwa kuwa Mwana wa Adamu alikuja kutafuta na kuokoa kilichopotea.” — kutoka Luka 19

Mwaka 1908 John alihisi huzuni kubwa kwa ajili ya watu wa vijijini ambao hawakumjua Yesu. Marafiki zake walimsikia akiomba, “Baba, nipe roho hizi, la sivyo nitakufa!” Alimwomba Mungu mtu mmoja kila siku ambaye angemwamini Yesu na kubatizwa.

Baadhi ya hesabu kubwa zilizo katika vitabu vya zamani kuhusu John haziwezi kuthibitishwa leo. Lakini kumbukumbu za misheni zinaonyesha kwamba mamia na mamia ya watu walibatizwa katika wilaya yake katika miaka ile. John alisema kwamba ilikuwa kazi ya “sisi”: yeye mwenyewe pamoja na wasaidizi wake Wahindi.

Asubuhi moja John na wahubiri wawili Wahindi waliomba, nao wakawa na uhakika kwamba Mungu angewapa watu kumi siku ile. Walipanda mkokoteni wakaenda kijiji kimoja cha mbali. Waliimba na kuhubiri mchana kutwa, lakini hakuna aliyejali. Wale wahubiri waliona njaa na kiu, wakataka kurudi nyumbani. John hakukubali kuondoka.

Mwishowe walisimama kwenye nyumba ndogo kuomba maji ya kunywa. Mwenye nyumba aliwapa maziwa pamoja na maji, akawakaribisha ndani. Tayari alijua mengi kuhusu Yesu! Aliwaita mkewe na watoto wake, na familia nzima ikaamua kumfuata Yesu. John aliwabatiza wote. Hao wakawa tisa.

Kufikia sasa giza lilikuwa linaingia, na njia ya kurudi nyumbani ilipita kando ya ukingo hatari wa mto. Wale wahubiri walijaribu kumpandisha John kwenye mkokoteni, lakini yeye aliendelea kuuliza, “Na yule je?”

Kisha yule baba akatoka nje. “Kumbe, yule pale!” akasema. Mpwa wake, mvulana aliyeishi pamoja na familia ile, alikuwa ametoka kwenda kucheza! Ilikuwa wazi kwamba mvulana huyo alimwamini Yesu, kwa hiyo naye akabatizwa. “Hao ndio kumi,” John akasema, akapanda mkokoteni. Walifika nyumbani salama gizani.

Yesu ni kama mchungaji anayekwenda kumtafuta kondoo mmoja aliyepotea. Kila mtu ni wa thamani kwake. Hiyo inamaanisha kwamba wewe pia ni wa thamani kwake.

Yesu mpendwa, asante kwa sababu ulikuja kunitafuta. Tafadhali wasaidie rafiki zangu wasiokujua waje kwako pia. Amina.