Nionyeshe Yaliyo Mazuri

“Yo yote yenye kupendeza, yo yote yenye sifa njema, yatafakarini hayo.” — kutoka Wafilipi 4

Siku moja John alikuwa na wasiwasi kuhusu mchungaji mmoja Mhindi. Mchungaji huyo alionekana kuwa amepoa katika upendo wake kwa Mungu, na kanisa lake nalo lilikuwa limepoa. Basi John aliingia chumbani mwake ili amwombee.

Alipiga magoti akaanza, “Ee Baba, wewe wajua jinsi alivyopoa —” Lakini hakumaliza kamwe. Alihisi kana kwamba kidole kimewekwa juu ya midomo yake. Na moyoni mwake akamsikia Mungu akisema, “Yeye amgusaye, aigusa mboni ya jicho langu.” Mboni ya jicho ni katikati ya jicho, sehemu tunayoilinda kwa uangalifu kuliko zote. Mungu alikuwa akisema, “Mtu huyu ni wa thamani kubwa sana kwangu.”

John alishtuka sana. Alikuwa amekuja kumwombea mchungaji, lakini badala yake alikuwa ameanza kumlalamikia mbele za Mungu. Akalia, “Unisamehe, Baba, kwa kuwa nimekuwa mshtaki wa ndugu mbele zako!”

Kisha akakumbuka mstari wa Biblia ulio mwanzoni mwa sura hii, akaomba ombi jipya: “Baba, nionyeshe mambo yaliyo ya kupendeza na yenye sifa njema katika maisha ya ndugu yangu.”

Mara moja John alianza kukumbuka mambo mazuri. Mchungaji huyo alikuwa ameacha kila kitu ili amfuate Yesu, na familia yake mwenyewe ilimtendea vibaya kwa sababu hiyo. Alikuwa amefanya kazi kwa bidii kwa miaka mingi. Alikuwa amewasaidia watu wa kanisa lake kuacha kugombana. Alikuwa mume mwema. John alitumia muda wake wote wa maombi akimshukuru Mungu kwa ajili yake.

Muda mfupi baadaye, John alisikia kwamba Mungu alikuwa amembariki sana mchungaji huyo, na kwamba alikuwa akihubiri tena “kwa moto.” Rafiki yake John aliamini kwamba jambo hilo lilitokea wakati ule ule John alipokuwa akimshukuru Mungu kwa ajili yake.

Mtu anapotuudhi, ni rahisi kumnung’unikia, hata mbele za Mungu. Wakati ujao, jaribu kumwomba Mungu akuonyeshe jambo zuri kuhusu mtu huyo, kisha umshukuru kwa ajili ya jambo hilo.

Mungu mpendwa, nisaidie nisiwanung’unikie watu wengine. Nionyeshe mambo mazuri yaliyo ndani yao, na unisaidie kukushukuru kwa ajili yao. Amina.