Chumba cha Maombi

“Fumbua kinywa chako sana, nami nitakijaza.” — kutoka Zaburi 81

Siku moja mmisionari kutoka Wales aitwaye Pengwern Jones alikuja kuhubiri kwenye mkutano katika mji uitwao Ludhiana. Alikuwa amesafiri kwa treni usiku kucha. Alikuwa amechoka, na alikuwa na wasiwasi kuhusu hotuba aliyopaswa kutoa mchana ule.

Walipokuwa wakinywa chai asubuhi, Mmarekani mmoja mkimya alimwambia, “Nataka kukuona, nitakusubiri mlangoni.” Alikuwa John. Mlangoni alisema, “Njoo pamoja nami kwenye Chumba cha Maombi.” Waliingia karibu saa mbili asubuhi, nao wakaomba mpaka saa tisa na nusu alasiri! Bwana Jones alisahau kwamba amechoka, na akasahau kuwa na wasiwasi.

Kisha John alimsindikiza mpaka ukumbi wa mkutano, akamshika mkono akasema, “Ingia ukahubiri, hiyo ndiyo kazi yako. Mimi nitarudi kwenye Chumba cha Maombi kukuombea, hiyo ndiyo kazi yangu.” Na siku ile Mungu alisema na watu wengi.

Kwenye mikutano ya Sialkot, John alipenda kulala kifudifudi juu ya zulia la chumba cha maombi na kuomba. Wakati mmoja aliomba kwa mstari wa Biblia ulio juu ya sura hii, akilirudia neno “sana” tena na tena: “Sana, Bwana. Sana.” Alikuwa akimwomba Mungu awafanye watu wake watarajie mambo makubwa.

Chumba cha maombi hakikuwa mahali pa huzuni. Mtu alipopata amani na Mungu, wakati mwingine John alijawa na furaha kiasi kwamba alipiga makofi na hata kucheza, na wengine wakajiunga naye, wakimsifu Mungu!

Mara nyingi John alisahau kula au kulala, na kijana wake msaidizi alikuwa akilia kwa sababu hiyo. Lakini wakati mmoja, kengele ya chakula cha mchana ilipolia, rafiki yake alimsikia akinong’ona, “Baba, je, ni mapenzi yako niende?” Kisha akasema, “Asante, Baba,” akaenda kula chakula cha mchana akitabasamu.

Watu wengine huhubiri, na wengine huwaombea. Kazi zote mbili ni kazi ya Mungu. Unapomwombea mwalimu wako, kanisa lako au rafiki zako, wewe pia unafanya kazi ya Mungu.

Mungu mpendwa, asante kwa sababu ninaweza kuwasaidia watu wengine kwa kuwaombea. Tafadhali wabariki wote wanaonifundisha habari zako. Amina.