Machozi Dirishani mwa Treni

“Alipokuwa angali mbali, baba yake alimwona, akamwonea huruma, akaenda mbio, akamwangukia shingoni, akambusu sana.” — kutoka Luka 15

Palikuwa na kijana mmoja ambaye baadaye rafiki zake walimwita “J. N.” Alitoka katika familia ya Kihindu ya tabaka la juu, akasoma katika shule ya misheni, na akamwamini Yesu. Mwanzoni familia yake ilikasirika. Kisha wakawa wema sana kwake, naye akarudi nyumbani. Huko alipata marafiki waliomshawishi kunywa pombe kupita kiasi, naye akamwacha Yesu.

Lakini hakuwa na furaha, basi akaja kwa John. John alimkaribisha kama yule baba katika hadithi ya Yesu kuhusu mwana aliyepotea, na J. N. akaja kuishi naye. Lakini mara kwa mara alirudi kwenye pombe. Zaidi ya mara moja aliiba hata nguo za John akaziuza! John alitabasamu tu, akamwambia rafiki yake kwamba ingembidi abaki katika nchi tambarare zenye joto kiangazi kile, kwa sababu hakuwa amebakiwa na nguo za kumpa joto.

Siku moja J. N. alikuwa ameketi ndani ya treni iliyokuwa ikienda katika mji wa Lahore. Alisema kwa jeuri kwamba alikuwa akirudi kwa marafiki zake wa zamani. John aliinama dirishani mwa behewa, akimsihi asiende. Mama mmoja aliyefanya kazi kituoni aliona machozi yakitiririka mashavuni mwa John. Lakini kijana yule hakutaka kusikiliza, na treni ikaondoka.

Kesho yake tu, yule mama alimwona J. N. akirudi. Uso wake ulikuwa umepauka. “Ninarudi kwake,” alisema. “Sikuweza kusahau machozi yake.” Alipomkuta John, John alikuwa akiomba. John alimkumbatia akasema, “Nilikuwa nikiomba sasa hivi kwamba Mungu akurudishe kwangu, na tazama, amenijibu!”

Hadithi ya J. N. haina mwisho mzuri na rahisi. Miaka mingi baadaye bado alikuwa akihangaika. Lakini hakusahau kamwe jinsi John alivyompenda sana.

Yesu huendelea kuwapenda watu hata wanapokosea tena na tena. Anakupenda wewe hivyo pia. Naye anaweza kukusaidia kuwapenda watu wengine kwa namna hiyo.

Yesu mpendwa, asante kwa kuwa hukomi kunipenda, hata ninapokosea. Nisaidie kuwapenda watu walio vigumu kupendwa. Amina.