Jinsi ya Kuwaleta Watu kwa Kristo
Jinsi ya Kuwashughulikia Wanaolalamika

Sura 9 · dakika 5 za kusoma · dakika 7 za kusikiliza

Jinsi ya Kuwashughulikia Wanaolalamika

1. Wale wanaomlalamikia Mungu.

Wengi kati ya wale unaotaka kuwaongoza kwa Kristo watasema jambo lenye maana kwamba Mungu si mwenye haki na ni mkatili, Ayubu 40:2, na Warumi 9:20, ni mafungu makali sana ya kutumia kwa watafutaji wa aina hii, wala hayahitaji maelezo. Huenda ikafaa kutanguliza usomaji wa mafungu hayo kwa maneno kama haya; “Je, unajua ni dhambi kubwa kiasi gani unayoitenda kwa kumshtaki Mungu kwamba si mwenye haki na ni mkatili? Niruhusu nikusomee anachosema Mungu juu ya jambo hilo katika Neno lake.” Kisha soma mafungu hayo. Warumi 11:33 litafaa kuwaonyesha wanaolalamika kwamba sababu njia za Mungu zinaonekana kuwa si za haki na za ukatili ni kwamba ni za kina mno, wala hazichunguziki; na kwamba tatizo haliko katika njia za Mungu, bali katika upungufu wa ufahamu wao. Waebrania 12:5, 7, 10, 11 yanafaa hasa katika hali ambapo mtafutaji analalamika kwa sababu ya misiba au huzuni zake mwenyewe. Isaya 55:8‒9 mara nyingi litaonekana kuwa la msaada. Si mara chache utakutana na mtu atakayesema kwamba “Mungu si mwenye haki kwa kuwaumba watu kisha kuwatupa jehanamu.” Mgeuzie mtu wa namna hiyo Ezekieli 33:11. Fungu hili linalijibu lalamiko hili kwa kuonyesha kwamba Mungu hafurahii kifo cha mtu mwovu, bali anataka mema yao, na kwamba waovu wanajiletea wenyewe hukumu ya jehanamu kwa kukataa kwao kwa ukaidi kutubu. 1 Timotheo 2:3‒4, linaonyesha kwamba Mungu, mbali na kumwumba mwanadamu ili amtupe jehanamu, anataka watu wote waokolewe. 2 Petro 3:9, linafundisha kwamba Mungu hapendi mtu yeyote apotee, naye anakawisha makusudi yake ili wote wafikilie toba. Yohana 5:40, na Mathayo 23:37, yanaonyesha kwamba sababu nzima ya mwanadamu kutupwa jehanamu ni kukataa kwake mwenyewe kwa makusudi na kwa kuendelea kuja kwa Kristo. Yohana 3:36, na 3:16, pia yanasaidia katika visa vingi.

2. Wale wanaoilalamikia Biblia. Mara nyingi watu watasema, “Biblia inajipinga yenyewe na ni upuuzi;” au “Biblia inaonekana kwangu kuwa upuzi.” Aina mbili za mafungu zinaweza kutumika katika kushughulika na watafutaji wa namna hiyo.

a. 1 Wakorintho 1:18; 2:14; 2 Wakorintho 4:3‒4; Danieli 12:10; Warumi 11:33, 34 na katika hali zilizokithiri 2 Wathesalonike 2:10, 11, 12.

b. Yohana 7:17; Zaburi 25:14; Mathayo 11:25, (tazama maelezo chini ya Wenye Shaka Walio na Nia ya Dhati na Wenye Shaka Ambao ni Wapuuzi.) Wakati mwingine jambo bora la kufanya kwa mtu anayesema Biblia imejaa mambo yanayopingana, ni kumpa Biblia yako na kumwomba akuonyeshe moja. Katika visa vingi hatajaribu kufanya hivyo; kwa sababu watu wanaoilalamikia Biblia, kwa kawaida hawajui chochote juu ya yaliyomo ndani yake. Siku moja mtu mmoja aliletwa kwangu nimshughulikie, nami nilipomwuliza kwa nini hakuwa Mkristo alijibu, “Biblia imejaa mambo yanayopingana.” Mara moja nilimwomba anionyeshe moja. “Lo!” akasema, “imejaa mambo hayo.” Nikasema, “Ikiwa imejaa mambo hayo, unapaswa kuweza kunionyesha moja.” Akasema, “Basi, kuna moja katika Zaburi.” Nikasema, “Nionyeshe.” Akaanza kutafuta kitabu cha Zaburi upande wa nyuma wa Agano Jipya. Nikasema, “Hutafuti Zaburi katika sehemu sahihi ya Biblia. Niruhusu nikutafutie.” Nilimtafutia kitabu cha Zaburi nikampa. Baada ya kupekuapekua akasema, “Ningeweza kuipata, kama ningekuwa na Biblia yangu mwenyewe hapa.” “Vema,” nikasema, “Je, utaileta Biblia yako usiku huu?” Akaahidi kwamba ataileta, akakubali kukutana nami mahali fulani kanisani. Saa iliyopangwa ikafika, lakini yeye hakuja. Miezi kadhaa baadaye, katika mfululizo mwingine wa mikutano katika kanisa lile lile, mmoja wa watendakazi alinisimamisha akasema, “Huyu hapa ni mtu ambaye ningependa umshughulikie; yeye ni mwenye shaka.” Nilimtazama nikamtambua kuwa ni yule mtu yule yule. “Lo!” nikasema, “wewe ndiye mtu aliyenidanganya hapa;” naye kwa aibu nyingi akakiri kwamba ndiye, lakini bado alikuwa akiendelea na mchezo wake wa zamani wa kusema kwamba Biblia imejaa mambo yanayopingana. Katika visa tisa kati ya kumi, watu wanaosema hivi hawajui chochote juu ya Biblia, na unapowaomba wakuonyeshe jambo linalopingana katika Biblia wanajawa na aibu.

3. Wale wanaoilalamikia njia ya Mungu ya Wokovu.

Watu wengi sana watasema, “Sioni kwa nini Mungu hangeweza kuwaokoa watu kwa njia nyingine isipokuwa kwa kifo cha mwanawe.” Isaya 55:8, 9, Warumi 11:33 yanafaa katika kushughulika na watu wa namna hiyo. Nimelitumia Warumi 9:20 kwa matokeo mazuri kwa watu wa aina hii. Mwanafunzi kijana aliniambia usiku mmoja, nilipomwuliza kwa nini hakuwa Mkristo, kwamba haoni kwa nini ilikuwa lazima Kristo afe kwa ajili yake; kwa nini Mungu hakumwokoa kwa njia nyingine. Nilifungua Biblia yangu nikamsomea Warumi 9:20, nikamwelekezea swali hilo moja kwa moja, “wewe u nani wa kumjibu Mungu?” kisha nikamwambia, “Je, unatambua unachofanya, kwamba unamhukumu Mungu?” Kijana yule, akiwa amechanganyikiwa sana, akasema “Sikukusudia kufanya hivyo.” “Basi,” nikasema; “hivyo ndivyo unavyofanya.” “Ikiwa ndivyo,” akajibu, “nitayafuta maneno yangu.” Njia nzuri ya kuwashughulikia watu wa namna hiyo ni kuwaonyesha, kwa kutumia mafungu yaliyotolewa katika sura ya “Jinsi ya Kuwashughulikia Wasiojali” kwamba wao ni wenye dhambi waliopotea. Mtu yeyote anapoongozwa kuona hili, njia ya Mungu ya wokovu itajithibitisha kwake kuwa ndiyo hasa inayofaa.

4. Wale wanaowalalamikia Wakristo. Mara nyingi sana tunapojaribu kuwashawishi watu wampokee Kristo kuwa Mwokozi wao, wanajibu; “Kuna wanafiki wengi mno kanisani.” Warumi 14:4 na 12, hasa mstari huo wa pili, yanafaa mno katika kushughulika na watu wa namna hiyo.

Warumi 2:1, na Mathayo 7:1‒5, pia ni bora. Yohana 21:21, 22 linafaa katika kumwonyesha mpinzani kwamba yeye peke yake anawajibika kwa uhusiano wake mwenyewe na Kristo, na kwamba wanayoyafanya wengine hayamhusu. Wakati mwingine mtafutaji atalalamika juu ya jinsi Wakristo walivyomtendea. Katika hali hiyo, zigeuze fikira za mtafutaji kutoka jinsi Wakristo walivyomtendea, kwenda jinsi Mungu alivyomtendea. Kwa kusudi hili tumia Yeremia 2:5; Isaya 53:5; Warumi 5:6‒8. Kisha mwulize kama ukweli kwamba Wakristo walimtendea vibaya ni udhuru wowote kwa jinsi anavyomtendea Baba wa Mbinguni ambaye amemtendea mema hivyo. Usiku mmoja nilimgeukia mzee mmoja nikamwuliza kama yeye ni Mkristo. Akajibu kwamba sivyo, kwamba yeye ni mtu aliyerudi nyuma. Nilimwuliza kwa nini alirudi nyuma. Akajibu kwamba Wakristo walikuwa wamemtendea vibaya. Nilifungua Biblia yangu nikamsomea Yeremia 2:5, “Bwana asema hivi, Baba zenu waliona uovu gani kwangu, hata wakakaa mbali nami, wakaandama ubatili, wakawa ubatili?” Nikasema, “Je, wewe uliona uovu wowote ndani ya Mungu? Je, Mungu hakukutendea mema?” Kwa hisia nyingi mtu yule alikiri kwamba Mungu hakuwa amemtendea vibaya, nami nikamshikilia hapo hapo katika jambo hili la jinsi Mungu alivyomtendea, wala si jinsi wanadamu walivyomtendea, na jinsi yeye alivyomtendea Mungu. Mathayo 18:23‒35; Waefeso 4:30‒32; Mathayo 6:14‒15, pia yanafaa katika kuonyesha ulazima kabisa wa sisi kuwasamehe watu.