Jinsi ya Kuwaleta Watu kwa Kristo
Jinsi ya Kuwashughulikia Wakaidi na Waliodanganyika

Sura 11 · dakika 6 za kusoma · dakika 7 za kusikiliza

Jinsi ya Kuwashughulikia Wakaidi na Waliodanganyika

1. Wakaidi

Kuna aina kadhaa za wakaidi. Kwa mfano, wako wale wanaosema “Sitaki uzungumze nami.” Katika hali kama hiyo kwa kawaida ni bora kumpa mtu huyo fungu fulani la maandiko lenye kuchoma, na kuliacha lijisemee lenyewe, kisha kumwacha peke yake ili alitafakari. Warumi 6:23; Waebrania 10:28, 29; Waebrania 12:25; Marko 16:16; Mithali 29:1, na Mithali 1:24‒33, ni mafungu yanayofaa kwa kusudi hili.

Kisha wako wale wanaosema “Siwezi kusamehe.” Mathayo 6:15 na 18:23‒35, yanafaa kutumiwa kuonyesha kwamba lazima wasamehe au wapotee. Wafilipi 4:13, na Ezekieli 36:26, yatawaonyesha jinsi wanavyoweza kusamehe. Kuna watu wengi sana wanaozuiliwa wasimjie Kristo kwa sababu ya roho isiyosamehe. Wakati mwingine kizuizi hiki kinaweza kuondolewa kwa kumfanya mtu huyo apige magoti, amwombe Mungu amwondolee roho yake isiyosamehe. Wakati mmoja nilijadiliana kwa muda mrefu na mtafutaji mmoja aliyekuwa amesadikishwa dhambi kwa kina, lakini alizuiliwa asimpokee Kristo kwa chuki iliyokuwa moyoni mwake juu ya mtu fulani aliyemkosea. Aliendelea kusisitiza kwamba hawezi kusamehe. Mwishowe nikasema, “na tupige magoti tumweleze Mungu jambo hili.” Akakubali, na mara tu tulipopiga magoti akabubujikwa na machozi mengi, kizuizi kikaondolewa, naye akampokea Kristo papo hapo.

Tena wako wale wanaosema “Naupenda ulimwengu kupita kiasi.” Marko 8:36, ndilo andiko kuu la kutumia kwa kundi hili. Luka 14:33, litaonyesha ulazima kamili wa kuuacha ulimwengu. Luka 12:16‒20; 1 Yohana 2:15, 16, 17, yataonyesha upumbavu wa kuung’ang’ania ulimwengu, na Zaburi 84:11, Warumi 8:32, yataonyesha kwamba Bwana hatawanyima kitu cho chote kilicho chema.

Wako wale wanaosema “Siwezi kukiri kosa nililotenda.” Mithali 28:13, litaonyesha taabu na ole ambavyo hakika vitafuata kosa hilo lisipokiriwa. Wengine watasema “Sitaki kukiri hadharani.” Warumi 10:10; Mathayo 10:32, 33, yataonyesha kwamba Mungu hatakubali kitu kingine cho chote. Marko 8:38; Yohana 12:42, 43, na Mithali 29:25, yataonyesha hatari ya kutokukiri hivyo. Wako wale wanaosema “Nataka kufuata njia yangu mwenyewe.” Isaya 55:8‒9, litaonyesha jinsi njia ya Mungu ilivyo bora zaidi, na Mithali 14:12, linaonyesha matokeo ya kufuata njia yetu wenyewe. Mwishowe wako wale wanaosema “Simpokei Kristo wala simkatai.” Mathayo 12:30, litaonyesha kwamba lazima wafanye moja au jingine. Mstari huu umetumiwa kuwasadikisha watu wengi sana.

2. Waliodanganyika

a. Chini ya kichwa hiki wanakuja Wakatoliki wa Kirumi. Njia nzuri ya kumshughulikia Mkatoliki wa Kirumi ni kumwonyesha ulazima wa kuzaliwa mara ya pili, na kuzaliwa mara ya pili ni nini. Yohana 3:3, 5, 7, linaonyesha ulazima wa kuzaliwa mara ya pili. Kuzaliwa mara ya pili ni nini kunaonyeshwa katika Ezekieli 36:25‒27; 2 Wakorintho 5:17; 2 Petro 1:4. Wakatoliki wengi wa Kirumi huelewa kuzaliwa mara ya pili kuwa ni ubatizo, lakini ni rahisi kuwaonyesha kwamba lugha iliyotumika hailingani na ubatizo. Zaidi ya hayo, katika 1 Wakorintho 4:15, Paulo anawaambia Wakristo wa Korintho kwamba aliwazaa kwa njia ya Injili. Kama kuzaliwa mara ya pili kungemaanisha ubatizo, basi lazima angekuwa amewabatiza, lakini katika 1 Wakorintho 1:14, anatangaza kwamba hakuwa amewabatiza. Matendo 8:13, 21, 23, linaonyesha kwamba mtu anaweza kubatizwa, na bado moyo wake usiwe “mnyofu mbele za Mungu,” hata akawa “hana sehemu wala fungu katika jambo hili.” Ni vema kwenda hatua moja zaidi na kumwonyesha mtafutaji dalili za kuzaliwa mara ya pili ni zipi. 1 Yohana 2:29; 3:9, 14‒17; 5:1, 4, yanatoa dalili za kuzaliwa mara ya pili kwa mujibu wa Biblia. Swali linalofuata litakalozuka ni “Jinsi ya kuzaliwa mara ya pili.” Swali hili linajibiwa katika Yohana 1:12; 1 Petro 1:23; Yakobo 1:18.

Matendo 3:19, ni andiko zuri la kutumia kwa Wakatoliki wa Kirumi, kwa kuwa linaonyesha ulazima wa toba na kuongoka. Toba ni nini kutaonyeshwa na Isaya 55:7; Yona 3:10. Njia nyingine tena ya kuwashughulikia Wakatoliki wa Kirumi ni kuwaonyesha kwamba ni fursa ya mwamini kujua kwamba ana uzima wa milele. Karibu sikuzote Wakatoliki wa Kirumi hukosa uhakika. Hawajui kwamba wamesamehewa, bali wanatumaini kusamehewa siku moja. Ukiweza kuwaonyesha kwamba tunaweza kujua kwamba tumesamehewa na kwamba tuna uzima wa milele, jambo hilo litaamsha ndani ya wengi sana miongoni mwao hamu ya kuwa na uhakika huu. 1 Yohana 5:13, linaonyesha kwamba ni fursa ya mwamini kujua. Matendo 13:38, 39; 10:43, Yohana 3:36, yanafaa sana katika kuwaongoza kufikia uhakika huu. Njia nyingine tena ya kuwashughulikia (lakini si vema kuitumia mpaka uwe umekwisha kupiga hatua fulani pamoja nao) ni kuwaonyesha faida ya kujifunza Biblia. Mafungu mazuri kwa kusudi hili ni Yohana 5:39; 1 Petro 2:1, 2; 2 Timotheo 3:13‒17; Yakobo 1:21, 22; Zaburi 1:1, 2; Yoshua 1:8; Marko 7:7, 8, 13; Mathayo 22:29. Mafungu haya, isipokuwa lile la 1 Petro 2:1, 2, kwa kweli yote yako sawa katika Biblia ya “Douay,” yaani Biblia ya Kikatoliki ya Kirumi, kama yalivyo katika Biblia ya Kiprotestanti, na mara nyingi ni vema, unapomshughulikia Mkatoliki, kutumia Biblia ya Kikatoliki.

Njia nyingine tena ya kumshughulikia Mkatoliki wa Kirumi ni kutumia njia ile ile ambayo ungetumia katika kumshughulikia mwenye dhambi asiyetubu—yaani kuamsha ndani yake hisia kwamba yeye ni mwenye dhambi na anamhitaji Kristo. Kwa kusudi hili tumia Mathayo 22:37, 38; Wagalatia 3:10, 13; Isaya 53:6.

Watu wengi hudhani kwamba hakuna faida ya kuzungumza na Wakatoliki wa Kirumi, kwamba hawawezi kuletwa kwa Kristo. Hili ni kosa kubwa. Wengi wao wanatamani kitu fulani wasichokipata katika kanisa Katoliki la Kirumi, na ukiweza kuwaonyesha kutoka katika neno la Mungu jinsi ya kukipata, wanakuja kwa urahisi sana, nao huwa Wakristo wenye bidii sana. Usilishambulie kanisa Katoliki la Kirumi. Wape kweli, na kwa wakati wake makosa yatajishughulikia yenyewe. Mara nyingi mashambulizi yetu hufunua tu ujinga wetu.

Kuna jambo moja ambalo sikuzote tuna faida juu yake katika kumshughulikia Mkatoliki wa Kirumi; nalo ni kwamba kuna amani na nguvu katika Ukristo kama tuujuavyo sisi ambazo hazimo katika Ukristo kama waujuavyo wao, nao huitambua tofauti hiyo.

b. Wayahudi. Njia bora ya kumshughulikia Myahudi ni kumwonyesha kwamba Biblia yake mwenyewe inamwelekea Kristo. Mafungu yenye msaada zaidi ya kutumia ni Isaya 53; Danieli 9:26; Zekaria 12:10. Pia kuna mafungu yenye manufaa katika Agano Jipya; kitabu kizima cha Waebrania, hasa sura ya tisa na ya kumi, na sura ya saba, mistari ya 25 hadi 28, na Injili nzima ya Mathayo. Wayahudi wengi sana leo wanachunguza madai ya Yesu wa Nazareti, nao wako tayari kufikiwa juu ya jambo hili. Kizuizi kikubwa katika njia ya Myahudi kujitokeza kama Mkristo ni mateso ya kutisha ambayo lazima ayavumilie akifanya hivyo. Kizuizi hiki kinaweza kukabiliwa kwa mafungu ambayo yamekwisha kutolewa chini ya kichwa “Wale Wanaoogopa Kuudhiwa.”

(Maelezo. Kuna vijitabu vingi vizuri kwa ajili ya Wayahudi ambavyo vinaweza kupatikana kutoka Mildmay Mission to the Jews, 79 Mildmay Road, London.)

c. Wafuasi wa Uwasiliani-pepo. Mambo ya Walawi 19:31; 20:6; Kumbukumbu la Torati 18:10‒12; 2 Wafalme 21:1, 2, 6; 1 Nyakati 10:13; Isaya 8:19, 20; 1 Yohana 4:1‒3; 2 Wathesalonike 2:9‒12, ni mafungu ya kutumiwa kwa kundi hili.

Katika kuwashughulikia watu wa kila aina waliodanganyika, ni vema kuanza kwa kutumia Yohana 7:17, na kuwafikisha mahali ambapo wanatamani kwa moyo wote kuijua kweli. Hakuna tumaini la kumtoa mtu katika udanganyifu wake, isipokuwa anatamani kuijua kweli.

Umemaliza Jinsi ya Kuwashughulikia Wakaidi na Waliodanganyika