Bidii Na Wokovu Kamili

Kwa nini tuwe na bidii katika kila jambo isipokuwa katika dini? Je, waweza kunipa sababu yoyote ya jambo hilo?

Kama kuna somo lolote lililokusudiwa kuisukuma mioyo yetu hata vilindi vyake, na kuamsha bidii ya asili yetu, hakika ni dini, ikiwa ni ile ya kweli. Kwa nini tusiwe na bidii? Sijapata kuona sababu nzuri hata sasa. Kwa nini tusipige kelele na kuimba sifa za Mfalme wetu, kama tunavyotazamia kufanya katika utukufu? Kwa nini mtu asilie, na kuugua, na kuwa katika dhiki ya nafsi, kama asemavyo Mtunga-Zaburi, kana kwamba analia kutoka tumbo la kuzimu, anapokuwa amesadiki dhambi yake, na kutambua hatari yake, na kutazamia, isipokuwa Mungu awe na rehema, kuangamizwa?

Kwa nini asingurume kwa ajili ya fadhaa ya roho yake kama alivyofanya Daudi? Je, kuna jambo lisilopatana na hekima ndani yake? Je, kuna jambo lolote linalopingana na sheria za akili ndani yake? Je, kuna jambo ambalo usingeliruhusu chini ya shinikizo lolote kubwa la msiba, au utambuzi wa hatari, au huzuni? Kwa nini tusiwe na dhihirisho hili katika mambo ya nafsi? Walikuwa nalo chini ya agano la kale. Twasoma, tena na tena, kwamba watu walipokusanyika baada ya kipindi cha kurudi nyuma, na kuiacha njia, na kutokuamini, Mungu alipomtuma nabii fulani mwenye mwako na moto kati yao, nao walipokusanyika kandokando ya Karmeli au mahali penginepo, kwamba, katika nyakati fulani, kilio, na, katika nyakati nyingine, furaha, ilikuwa kubwa hata wakaifanya nchi yenyewe kutetemeka, na karibu wakazipasua mbingu kwa sauti ya kilio chao na furaha yao.

Twaambiwa, katika tukio moja, kwamba kelele ilisikika kwa mbali, na, katika tukio jingine, kwamba ilikuwa kama sauti ya maji mengi. Laiti Mungu angetujalia kupata watu, siku hizi, wenye kujishughulisha sana kuhusu dhambi zao na nafsi zao, hata wakalia hivyo. Ingekuwa siku ya furaha kwa dini na kwa ulimwengu kama ingekuwa hivyo. Ikiwa mambo haya ni ya kweli, nadai kwamba hii ndiyo njia yenye akili timamu, yenye busara, na yenye hekima zaidi ya kushughulika nayo; nami nasema kwamba ile njia ya kawaida, yenye baridi, isiyo na moyo, ya kanuni tu (na, kama si hivyo, basi ina mwonekano huo) haipatani na Maandiko.

Mtu fulani alikuwa akizungumza nami kuhusu kuwa na hisia nyingi kiasi hicho katika dini. Nikasema, "Rafiki yangu mpendwa, wadhani Mungu alikupa hisia kwa ajili gani?" Baadhi ya watu waonekana kudhani ni kosa kwamba tuna hisia. Hisia zetu zina sehemu muhimu sana katika mahusiano yetu yote ya kijamii. Kwa nini ungezitenga na dini? Daudi alidhihirisha hisia zake, naye alichukuliwa nazo kiasi kwamba aliviita viumbe vyote vimsifu Bwana, milima na miti ipige makofi na kufurahi. Pata aina sahihi ya dini, nayo itakufanya ufurahi. Kama huna aina sahihi ya hisia, nachelea huna aina sahihi ya dini. Tuna bidii kiasi, na bidii yetu itakapokufa, nachelea nasi tutakufa pia. Walakini, nguvu zetu hazimo katika bidii yetu; wala hazitegemei mitazamo fulani ya kweli, au hisia fulani kuhusu kweli. Bali zategemea kujisalimisha kwa Mungu kwa moyo wote, kikamilifu, kwa dhati; na hilo, likiwa na hisia au bila hisia, ndilo jambo sahihi, na hiyo ndiyo siri ya nguvu zetu. Tuna hisia tukufu kama matokeo; lakini hisia si dini—hisia si utakatifu. Utakatifu ndio chemchemi na chanzo cha bidii. Ndiyo maana ya nguvu zetu kwa umati wa watu.

Imekuwaje kwamba kila tuendako, kama shirika, ishara hizi na maajabu haya hutendeka? Mtu fulani alisema, "Ni jambo la ajabu; tazama yaliyotendeka mahali fulani, na mahali fulani, na mahali fulani.

Wote walikuwa wamejaribu, nanyi mwatuma vijana wawili wa kiume au wa kike, na mara moja mnaufanya mji uwe katika ghasia. Ni nini hicho? Siri ni nini? Je, mtajibu swali hilo?" Basi, ni kule kuacha kila kitu kwa moyo wote, kwa dhamira thabiti, kwa ajili ya Mfalme. Ndivyo ilivyo. Ni kuingia, kama Mitume walivyoingia, wakiwa wamedhamiria kuvuta nafsi, wakiwa wamedhamiria kuusimamisha ufalme wa Yesu Kristo, kwa gharama yoyote ile.

Hicho ndicho chanzo cha nguvu zetu, na ukipata hicho, utakuwa na nguvu, na usipopata hicho, haidhuru una kitu gani kingine. Nataka mwone kwa busara na kwa utulivu kwamba utakatifu huu ni baraka halisi, iliyo dhahiri; kwamba ni ngazi ambayo umati mkubwa wa Wakristo wanaojidai kuwa wa dini katika kizazi hiki hawajaifikia, au hata karibu hawajaitazama juu. Ni ngazi ya juu, lakini ni ngazi ambayo kila mmoja wenu aweza kuifikia, akipenda. Mmesikia ya kutosha kuhusu hilo.

Mmesadiki kwamba mwaweza kuupata. Je, mtaupokea? Bwana ameketi hapo; anawatazama, naye anasema, "Msukosuko huu wote ni wa nini? Maneno haya yote, kuimba huku, na kuomba huku ni kwa ajili ya nini? Mimi hapa nipo. Mnataka niwafanyie nini? Niko tayari kufanya." Nanyi mwasema, "Bwana, nataka unitakase moyo wangu na dhambi, na kunijaza Roho Mtakatifu, na kuniwezesha kuwa na moyo wote na wa dhati katika utumishi wako, na kwenda kuvuta nafsi kwa ajili yako." "Vema sana," asema Bwana, "Niko tayari kuingia hekaluni, kama mtaondoa takataka. Je, mko tayari niingie? Nangoja kuingia nikiwa Mtakasaji; lakini ni lazima mnitengenezee njia iliyonyooka kwa ajili ya miguu yangu. Ni lazima mzitoe mawe, na kuzitupa nje takataka, na kunifanyia njia iliyonyooka."

Je, mtamfanyia njia iliyonyooka? Je, mtakikanyaga chini ya miguu kile kitu kilicholaaniwa ambacho kwa muda mrefu kimewanyima utimilifu wa baraka? Je, mtaacha kubishana juu yake na kujaribu kudai kwamba si kikwazo, hali mnajua kwamba ni kikwazo? Ni wangapi watakaofanya hivyo? Ningetamani tungekuwa na nafasi ya kuweka kiti cha toba. Nasikitika kwamba hatuna. Pamoja na nuru yote mliyo nayo juu ya jambo hili, pamoja na yale ambayo nina hakika Roho Mtakatifu amewafunulia na anaendelea kuwafunulia nafsi zenu, pamoja na utukufu wote ambao anauweka mbele yenu, na nguvu za kuwa na manufaa na furaha, je, mtafanya wakfu huu kamili?

Nuru ya Roho i juu yenu: je, mtatenda? Je, mtatenda? Kila cheche ya nuru mnayoipata bila kuitii, huiacha nafsi yenu katika giza zaidi. Kila mara mnapofika ukingoni mwa ufalme na kutovuka, ndivyo uwezekano wa kuvuka wakati wowote unavyopungua. Nawajua watu waliokuwa wakipanda na kushuka kwa zaidi ya miaka arobaini, kama Waisraeli, na ni jambo la kutiliwa shaka kama watawahi kuingia. Mmekaribia tena. Je, mtavuka? Mwaweza kumwambia Bwana bila kutuambia sisi, ijapokuwa tungependa kujua, na kuwaona mkiweka mguu wenu ng'ambo ya mpaka, kuingia katika Kanaani hii ya amani na nguvu. Je, mtaweka mguu wenu ng'ambo? Ni nani atakayefanya? ni nani atakayefanya? Je, mtasimama na kupaza sauti zenu kwa Bwana na kumwomba?