Kanisa na Ulimwengu

Jamaa Moja

Ulimwengu wa Mungu ni mmoja: mbingu na nchi hazikutengana kama vile kutokuamini kulivyoota ndoto. Kama vile Bwana alivyo na jamaa moja tu, iliyoandikwa katika daftari moja, iliyokombolewa kwa damu moja, iliyohuishwa kwa Roho mmoja, ndivyo nyumba hii yote ikaavyo katika makao mamoja milele. Sisi tulio mwilini twakaa katika chumba cha chini, ambacho nyakati nyingine ni chenye giza na baridi, lakini chenye alama za kutosha kwamba ni chumba katika nyumba ya Mungu; kwa maana kwa jicho la imani yetu, mara nyingi huangazwa kwa mng'ao wa mbinguni, na sisi, naam sisi, tungali hapa, kwa arabuni zilizobarikiwa twafanywa washirika wa urithi wa watakatifu katika nuru. Ni nyumba ile ile, nasema, lakini chetu ni chumba cha chini, hali ndugu zetu waliotukuzwa wako juu huko katika ghorofa ya juu, ambako nuru ya jua huingia daima, ambako hakuna upepo wa baridi wala pumzi yenye sumu iwezayo kufika kamwe. Na, kwa kiasi kikubwa, kuna mfano kati ya chumba cha chini na chumba cha juu. Kama vile hapa duniani tunavyojiweka tayari kwa mbinguni, ndivyo hali ya watakatifu duniani ilivyo mbingu iliyoonyeshwa mapema. Kwa mambo mengi hali ya mtoto wa Mungu duniani ni kivuli cha hali yake mbinguni; na kama ilivyo tabia ya watakatifu huko juu, ndivyo inavyopaswa kuwa tabia ya watakatifu hapa chini. Twaweza kwa salama kabisa kuwatwaa kuwa mfano wetu zile roho zilizotukuzwa. Hatuna haja ya kuogopa kwamba tutapotoshwa kwa kuwaiga, kwa kujifunza shughuli zao, au kwa kujaribu kushiriki furaha zao. Bila shaka mambo ya mbinguni ni ruwaza za mambo ya duniani, na kama wao walivyo mbele ya kiti cha enzi ndivyo tunavyopaswa kuwa sisi. La; ndivyo tutakavyokuwa kwa kadiri tuishivyo kulingana na mapendeleo yetu, na kupokea mfano na sura ya Bwana wetu Yesu Kristo.

Majina Machache Hata Katika Sardi

"Unayo majina machache hata katika Sardi, wasioyachafua mavazi yao." Hapa tuna hifadhi ya pekee. Litie alama kwa uangalifu. "Unayo majina machache." Machache tu; si machache kama wengine wadhanivyo, lakini si mengi kama wengine wawazavyo. Machache yakilinganishwa na wingi wa wenye kukiri: machache yakilinganishwa hata na watoto wa kweli wa Mungu, kwa maana wengi wa wao wameyachafua mavazi yao. Walikuwapo wachache tu, na hao wachache walikuwa hata katika Sardi. Hakuna Kanisa duniani lililo bovu kiasi kwamba halina "wachache."

Jipeni moyo, Wakristo; wako wachache katika Sardi. Msikate tamaa kabisa. Baadhi ya mashujaa hawakugeuza migongo yao siku ya vita; baadhi ya watu hodari bado wanapigania kweli. Lakini kuwa mwangalifu, kwa maana, labda, wewe si mmoja wa wale "wachache." Kwa kuwa wako "wachache" tu, imepasa kuwe na kujichunguza kukubwa kwa mioyo. Na tuyatazame mavazi yetu, tuone kama yamechafuliwa. Na kwa kuwa wako "wachache" tu, uwe na bidii. Kadiri wafanyakazi wa kuifanya kazi walivyo wachache, ndivyo ilivyo sababu kubwa zaidi ya wewe kuwa na bidii. "Uwe tayari wakati ukufaao na wakati usiokufaa." Ee! kama tungekuwa na mamia nyuma yetu, tungeweza kusema, "Waache wao waifanye kazi;" lakini kama tumesimama na "wachache" tu, imempasaje kila mmoja wa wale wachache kujitahidi!

Basi, jichocheeni ninyi wenyewe kwa bidii iliyo kubwa kuliko zote, kwa maana kweli wako wachache tu katika Sardi wasioyachafua mavazi yao. Zaidi ya yote, uwe na maombi. Pelekeni vilio vyenu vya bidii kwa Mungu ili awazidishe waaminifu, ili aongeze hesabu ya wateule wasimamao imara, na kwamba alisafishe Kanisa. Mlilie Mungu ili siku ije ambapo dhahabu ile safi tele haitakuwa hafifu tena; wakati utukufu utakaporudi tena Sayuni. Mwombe Mungu aliondoe wingu, aliondoe "giza litakaloweza kushikika." Uwe na maombi maradufu, kwa maana wako wachache tu katika Sardi wasioyachafua mavazi yao.

Kanisa na Ulimwengu

Watu Wakristo wapasa kuishi hivi hata ingekuwa kazi bure kunena juu ya kulinganisha kati yao na watu wa ulimwengu. Isingekuwa kulinganisha, bali kutofautisha. Isingewezekana kuwa na kipimo cha viwango: mwaminio apasa kuwa kinyume dhahiri na cha wazi kwa yeye asiyezaliwa mara ya pili. Maisha ya mtakatifu yapasa kuwa juu kabisa na nje ya orodha ile ile ya maisha ya mwenye dhambi. Twapaswa kuwalazimisha wakosoaji wetu wasikiri kwamba wenye maadili ni wema, na Wakristo ni wema kidogo zaidi; bali hali ulimwengu ni giza, sisi twapaswa kuwa nuru waziwazi; na hali ulimwengu unakaa katika yule Mwovu, sisi twapaswa kuwa wa Mungu kwa dhahiri kabisa, na kuyashinda majaribu ya yule Mwovu. Mbali kama ncha za dunia zilivyoachana, ndivyo yalivyo uzima na mauti, nuru na giza, usafi na dhambi. Yapasa kuwe na tofauti kubwa kati ya mtu wa kilimwengu na Mkristo, kama ilivyo kati ya kuzimu na mbinguni, kati ya uharibifu na uzima wa milele. Kama vile tunavyotumaini mwishoni kwamba kutakuwa na shimo kubwa litutengalo na hukumu ya wasiotubu, ndivyo yapasavyo kuwe hapa shimo lenye kina na upana kati yetu na wasiomcha Mungu. Usafi wa tabia yetu wapasa kuwa hivi, hata watu ni lazima watambue juu yetu kwamba sisi ni wa kabila lingine na lililo bora zaidi. Kama tungekuwa vile tunavyokiri kuwa, isingekuwa vigumu kumtambua Mkristo na mtu wa kilimwengu. Lakini, ole! Kanisa limechanganywa mno, hata inatubidi kupunguza kujisifu kwetu, wala hatuwezi kuiinua tabia yetu kama tungetaka. Ee, ije ile saa ambapo "wenyeji wetu uko mbinguni," na maisha duni ya mtu wa kilimwengu yatakemewa na tabia yetu iliyo mfano wa Kristo! Mungu na atujalie kuzidi kuwa dhahiri mzao mteule, ukuhani wa kifalme, taifa takatifu, watu wa milki ya Mungu; mpate kuzitangaza fadhili zake yeye aliyetuita tutoke gizani tuingie katika nuru yake ya ajabu.