Utakatifu na Maisha Mapya

Dini ni Jambo la Binafsi

Watu wengine husema kwamba wataujaribu utakatifu wa dini ya Kristo kwa utakatifu wa watu wa Kristo. Nawajibu, hamna haki ya kuliweka swali chini ya jaribio la namna hiyo. Jaribio linalowapasa kulitumia ni kuijaribu ninyi wenyewe—"kuonja na kuona ya kuwa Bwana ni mwema." Kwa kuonja na kuona mtaudhihirisha wema wake, na kwa njia iyo hiyo ni lazima muudhihirishe utakatifu wa Injili yake. Kazi yenu ni kumtafuta Kristo aliyesulubiwa kwa ajili yenu wenyewe, si kuchukua maelezo ya mtu mwingine kuhusu uwezo wa neema wa kuutiisha uovu na kuutakasa moyo. Kwa kuwa Mungu amewapa Biblia, alikusudia muisome, wala si kuridhika kwa kuwasoma watu. Hampaswi kuridhika na hisia zinazoinuka kwa maongezi ya wengine; uwezo wenu pekee wa kuijua dini ya kweli ni, kwa kuwa na Roho wake Mtakatifu akitenda kazi juu ya moyo wenu wenyewe, ili ninyi wenyewe mpate kujionea uwezo wa dini ni nini. Hamna haki ya kuihukumu dini kutokana na jambo lolote la nje au lililo nje yake yenyewe. Na kama mtaidharau kabla ya kujijaribia wenyewe, ni lazima msimame mkiwa mmekiri katika ulimwengu huu kuwa wapumbavu, na katika ulimwengu ujao kuwa wahalifu. Na bado hii ndiyo hali ya watu wengi. Ukimsikia mtu akiitukana Biblia, waweza kwa kawaida kuhitimisha kwamba kamwe hakuisoma. Nawe waweza kuwa na hakika kabisa ukimsikia mtu akinena dhidi ya dini, kwamba kamwe hakujua dini ilivyo. Dini ya kweli, ikishaumiliki moyo, kamwe haimruhusu mtu kugombana nayo. Mtu huyo atamwita Kristo rafiki yake aliye bora zaidi yeye amjuaye Kristo hata kidogo. Tumewaona wengi walioyadharau maburudisho ya ulimwengu huu, lakini kamwe hatukumwona hata mmoja aliyegeuka mbali na dini kwa karaha au kwa kushiba, baada ya kuwa amekwisha kuifurahia. La! la! ninyi mliuchagua udanganyifu wenu wenyewe, na mliuchagua kwa hatari yenu wenyewe; mnaukuza kwa uangamivu wenu wenyewe. Kwa maana kama mnaichukua dini yenu kutoka kwa watu wengine, na kuongozwa na mfano wa wanaokiri ili kuitupilia mbali dini, hata hivyo mna hatia ya damu yenu wenyewe. Mungu hakuwaacha katika ramani isiyo na hakika ya tabia za watu: amewapa Neno lake mwenyewe; neno la ushuhuda lililo imara zaidi, ambalo mwafanya vema kuliangalia.

Utakatifu

Utakatifu ni ramani ya ujenzi ambayo juu yake Mungu hulijenga hekalu lake lililo hai.

Moyo Mpya

Mungu haahidi kwamba ataiboresha asili yetu, wala kwamba ataitengeneza mioyo yetu iliyovunjika. La; ahadi ni kwamba, atatupa mioyo mipya na roho zilizonyoka. Asili ya mwanadamu imeharibika mno hata kuweza kutengenezwa. Si nyumba iliyoharibika kidogo, hapa na pale kigae kilichopeperushwa kutoka darini, na hapa na pale kipande cha lipu kilichovunjika kutoka dari. La; imeoza kabisa; misingi yenyewe imedhoofishwa; hakuna hata mti mmoja ndani yake ulio imara; imeoza yote tangu paa lake la juu hata msingi wake wa chini kabisa, na iko tayari kuanguka. Mungu hajaribu kuitengeneza; hazitegemezi kuta, wala hauupaki tena mlango; hauremboshi wala kuupamba, bali huamua kwamba nyumba ile ya kale iondolewe kabisa, na kwamba atajenga mpya. Imeharibika mno kuweza kutengenezwa. Kama ingekuwa imeharibika kidogo tu, ingeweza kurudishwa. Kama ni gurudumu moja au mawili ya kitu kile kikuu kiitwacho "Ubinadamu" yaliyoharibika, basi Yeye aliyemfanya mwanadamu angeweza kukirekebisha chote; angeweza kutia jino jipya mahali palipovunjika, na gurudumu jingine mahali palipoharibika, na mtambo ungeweza kufanya kazi upya. Lakini la; kizima chake kimeharibika; hakuna hata nyufa moja isiyovunjika; hakuna mhimili hata mmoja usiotikiswa. "Kichwa chote ni kigonjwa, na moyo wote umezimia. Tangu wayo wa mguu hata utosi wa kichwa hamna uzima ndani yake; ila jeraha, na machubuko, na vidonda vitokavyo usaha." Kwa hiyo Bwana hajaribu kuitengeneza nyumba hii, bali husema, "Nami nitawapa moyo mpya, nami nitatia roho mpya ndani yenu."

Kristo Ndani Yenu

Ni nini kuwa na "Kristo ndani yenu?" Mwana wa Kanisa la Roma huutundika msalaba kifuani mwake; Mkristo wa kweli huubeba msalaba moyoni mwake; na msalaba ndani ya moyo ni mojawapo ya dawa tamu zaidi kwa msalaba mgongoni. Kama unao msalaba moyoni mwako—Kristo aliyesulubiwa ndani yako, tumaini la utukufu—msalaba wa taabu za ulimwengu huu utakuonekana mwepesi vya kutosha, nawe utaweza kwa urahisi kuustahimili. Kristo moyoni, humaanisha Kristo aaminiwaye, Kristo apendwaye, Kristo atumainiwaye, Kristo aposwaye, Kristo ashirikiwaye, Kristo kuwa chakula chetu cha kila siku, na sisi wenyewe kuwa hekalu na jumba ambamo Yesu Kristo hutembea kila siku. Ah! wako wengi walio wageni kabisa wa maana ya usemi huu. Hawajui ni nini kuwa na Yesu Kristo ndani yao. Ijapokuwa wanajua kidogo juu ya Kristo wa Kalvari, hawajui lolote juu ya Kristo moyoni. Basi, kumbuka, kwamba Kristo wa Kalvari hatamwokoa mtu yeyote, isipokuwa Kristo awe moyoni. Mwana wa Mariamu, aliyezaliwa horini, hatakuokoa, isipokuwa azaliwe pia moyoni mwako, na kuishi humo—furaha yako, nguvu yako, na faraja yako.

Lengo Kuu la Maisha

Kama Wakristo, yatupasa daima kutofautishwa na ulimwengu katika lengo kuu la maisha yetu. Ama watu wa kidunia, wengine wao hutafuta utajiri, wengine sifa; wengine hutafuta faraja, wengine anasa. Kwa kadiri ndogo waweza kutafuta lolote kati ya haya, lakini nia yenu kuu na ya msingi kama Mkristo yapaswa daima kuwa kuishi kwa ajili ya Kristo. Kuishi kwa ajili ya utukufu? Naam, lakini kwa ajili ya utukufu wake. Kuishi kwa ajili ya faraja? Naam, lakini faraja yenu yote iwe ndani yake. Kuishi kwa ajili ya anasa? Naam, lakini mnapofurahi, imbeni zaburi, na kufanya melodi mioyoni mwenu kwa Bwana. Kuishi kwa ajili ya utajiri? Naam, lakini kuwa matajiri katika imani. Mwaweza kujiwekea akiba, lakini iwekeni mbinguni, "ambako nondo wala kutu hazidhuru, wala wevi hawavunji na kuiba." Mwaweza kuifanya kazi iliyo ya kawaida kabisa kuwa takatifu kweli kwa kuyaweka wakfu maisha yenu ya kila siku kabisa kwa utumishi wa Yesu, mkichukua kama kauli-mbiu yenu, "Kwangu mimi kuishi ni Kristo." Kuna namna hii ya kuishi maisha yaliyowekwa wakfu hivyo; na kama yeyote akakana uwezekano wake, na asimame akiwa amejihukumu mwenyewe, kwa sababu hafuati agizo lile: "Basi, mlapo, au mnywapo, au mtendapo neno lolote, fanyeni yote kwa utukufu wa Mungu."

Dini ni Jambo la Sasa

Dini ni lazima iwe jambo la sasa, kwa sababu sasa unao uhusiano wa karibu hivyo na wakati ujao. Twaambiwa katika Maandiko kwamba maisha haya ni majira ya kupanda, na wakati ujao ni mavuno, "apandaye kwa mwili wake, katika mwili wake atavuna uharibifu; bali apandaye kwa Roho, katika Roho atavuna uzima wa milele." Kama mbegu izaavyo mmea, vivyo hivyo maisha haya ya sasa huzaa milele ijayo. Mbingu na kuzimu, baada ya yote, ni matokeo tu ya tabia yetu ya sasa, kwa maana je, haikuandikwa, "aliye mtakatifu na azidi kutakaswa; adhalimuye na azidi kudhulumu?" Je, hatujui ya kwamba katika moyo wa kila dhambi hukumu husinzia? Je, si kweli ya kutisha kwamba chembe ya adhabu ya milele hulala katika kila haja mbaya, kila wazo lisilo takatifu, kila tendo lisilo safi, hata kuzimu ni kulipuka tu kwa lava iliyolala usingizi, iliyokuwa tulivu hivi, hata wakati mlima ulipofunikwa kwa majani mabichi, hata kileleni pake, mauti huja na kuiamuru lava ile ipande; na chini ya vilele vya kuwako kwa milele kwa mwanadamu, lava ya moto ya taabu ya milele hujimwaga yenyewe? Lakini ilikuwako tayari kabla, kwa maana dhambi ni kuzimu, na uasi dhidi ya Mungu ni utangulizi wa taabu. Ndivyo ilivyo na mbingu; najua ya kuwa mbingu ni thawabu, si ya deni bali ya neema; lakini bado Mkristo anacho ndani yake kile kinachomtangulizia mbingu. Kristo alisema nini? "Nawapa kondoo zangu uzima wa milele." Hakusema, "Nitawapa," bali "Nawapa." Mara tu waaminipo katika mimi, nawapa uzima wa milele. "Yeye alaminiye yeye aliyenipeleka, ana uzima wa milele; wala haingii hukumuni." Mkristo anavyo ndani yake vitalu vya mbegu vya paradiso; kwa wakati wake nuru ipandwayo kwa ajili ya wenye haki, na furaha ipandwayo kwa ajili ya wanyofu wa moyo, itachipuka, nao watavuna mavuno. Je, si dhahiri, basi, kwamba dini ni jambo tunalopaswa kuwa nalo hapa? Je, haikufunuliwa waziwazi kwamba dini ni muhimu kwa wakati wa sasa? Kwa maana kama maisha haya ni majira ya kupanda ya wakati ujao, nawezaje kutarajia kuvuna katika ulimwengu mwingine mavuno mengine tofauti na yale niliyokuwa nikiyapanda hapa? Nawezaje kutumaini kwamba nitaokoka wakati ule, isipokuwa nimeokoka sasa? Nawezaje kuwa na tumaini kwamba mbingu itakuwa urithi wangu wa milele, isipokuwa arabuni imeanza katika nafsi yangu mwenyewe hapa duniani?

Ninyi si Mali Yenu Wenyewe

Kama wewe ni mtoto wa Mungu, wewe ni mali ya Kristo kabisa na wote pia. Lakini je, hawako wengi wanaoonekana kudhani kwamba kama wataweka pembe moja katika nafsi zao kwa ajili ya dini yao, yote yatakuwa sawa? Shetani aweza kutembea juu ya mashamba mapana ya busara yao na ufahamu wao, naye aweza kutawala juu ya mawazo yao na fikira zao; lakini kama katika kijishimo fulani cha utulivu kikahifadhiwa mfano wa dini, yote yatakuwa sawa. Ee! msidanganyike katika hili; Kristo kamwe hajawahi kumgawana mtu nusu kwa nusu. Atakuchukua wewe wote, ama sivyo hatakuchukua kabisa. Atakuwa Bwana aliye juu, Bwana Mkuu, Mfalme kamili, ama sivyo hatajishughulisha nawe kabisa. Waweza kumtumikia Shetani, ukitaka, lakini umtumikiapo yeye, hutamtumikia Kristo pia. Kama hujatolewa kabisa kwa Mungu—kama, katika nia na kusudi la nafsi yako, kila wazo, na haja, na uwezo, na kipaji, na miliki havijatolewa na kuwekwa wakfu kwa Kristo, huna sababu ya kuamini kwamba umekombolewa kwa damu yake ya thamani. Katika watu wake, aliowanunua wawe wake mwenyewe, yeye atatawala bila mshindani. Kristo hatakuwa mmiliki wa nusu wa mtu yeyote.

Asili na Neema

Kamwe hutamwona Mungu katika asili, hata utakapokuwa umejifunza kumwona Mungu katika neema. Tumesikia mengi juu ya kupanda kutoka asili hata kwa Mungu wa asili. Haiwezekani! Mtu angeweza vilevile kujaribu kwenda kutoka kilele cha Alpi hata mbinguni. Bado kuna shimo kubwa kati ya asili na Mungu kwa akili ya kiasili. Ni lazima kwanza kabisa umwone Mungu aliyefanyika mwili katika nafsi ya Kristo, kabla hujamwona Mungu mwenye uweza wote katika uumbaji aliouumba. Umesikia mengi juu ya watu wanaopendezwa kuabudu katika vichaka vya msitu, wanaodharau kuhudhuria patakatifu pa watakatifu. Naam; lakini kulikuwa na ukweli mdogo ndani yake. Mara nyingi kuna sauti kubwa palipo na utupu mwingi; nawe mara kwa mara utakuta ya kuwa watu wale wanenao zaidi juu ya ibada hii ya kiasili, ndio wale wasiomwabudu Mungu kabisa. Kazi za Mungu ni njia mnene mno kuiruhusu nuru ipite. Njia ni yenye kupwaya na hewa ni yenye giza, tukienda kwa njia ya viumbe ili kumtambua Muumba kwa ukamilifu. Lakini nimwonapo Kristo, naona njia mpya na iliyo hai ya Mungu kati ya nafsi yangu na Mungu wangu, iliyo wazi na yenye kupendeza kabisa. Namjia Mungu wangu mara moja, na nimpatapo katika Kristo, namkuta kila mahali pengine pia.

Ushahidi wa Maisha Mapya

"Ikiwa mmeonja ya kuwa Bwana ni mwenye fadhili," huo ni ushahidi wa hakika wa badiliko la kimungu; kwa maana watu kwa asili hawapati furaha yoyote katika Yesu. Sitauliza uzoefu wenu ulivyokuwa, au usivyokuwa; kama Kristo ni wa thamani kwenu, kumekuwa na kazi ya neema moyoni mwenu; kama mnampenda, kama uwepo wake ndio furaha yenu, kama damu yake ndilo tumaini lenu, kama utukufu wake ndio lengo lenu na shabaha yenu, na kama nafsi yake ndio upendo wa daima wa nafsi yenu, hamngeweza kuwa na ladha hii kwa asili, kwa maana mlikuwa wafu; hamngeweza kuipata ladha hii kwa kujifunza, kwa maana hii ni muujiza ambao hakuna ila Mungu aliye juu ya asili angeweza kuutenda ndani yenu. Kila Mkristo aliyejaribiwa na kutaabika, ambaye, hata hivyo, anaonja ya kuwa Bwana ni mwema, na afarijike kwa hili. "Wanyofu wanakupenda."