Kizuizi cha Kweli.

Ingawa si jambo gumu hata kidogo kwenyewe kumwamini yeye asiyeweza kusema uongo, na kumtumaini Yule tunayemjua kuwa anaweza kuokoa, hata hivyo jambo fulani laweza kuingilia kati na kulifanya hata hili kuwa jambo gumu kwa msomaji wangu. Kizuizi hicho chaweza kuwa cha siri, na bado kisiwe kidogo cha kweli. Mlango waweza kufungwa, si kwa jiwe kubwa ambalo kila mtu aweza kuliona, bali kwa komeo lisiloonekana lililoteleza ndani ya kishikio kilicho mbali kabisa na macho. Mtu aweza kuwa na macho mazuri, na bado asiweze kukiona kitu, kwa sababu kitu kingine kimekuja njiani. Usingeweza hata kuliona jua kama leso, au kipande cha nguo tu, kingefungwa juu ya uso wako. Lo, vitambaa ambavyo watu hung'ang'ania kuvifunga juu ya macho yao wenyewe!

Dhambi tamu, iliyohifadhiwa moyoni, itaizuia nafsi isimshike Kristo kwa imani. Bwana Yesu amekuja kutuokoa na kutenda dhambi; na kama tumeazimia kuendelea kutenda dhambi, Kristo na nafsi zetu hazitapatana kamwe. Kama mtu akinywa sumu, na tabibu akaitwa ili kuiokoa hai yake, aweza kuwa na dawa ya hakika tayari; lakini kama mgonjwa akiendelea kuweka chupa ya sumu midomoni mwake, na kuendelea kumeza matone ya mauti, tabibu ataokoaje? Wokovu kwa sehemu kubwa unahusu kumtenganisha mwenye dhambi na dhambi yake, na asili yenyewe ya wokovu ingelazimika kubadilishwa kabla hatujaweza kusema mtu ameokolewa hali akiwa anaipenda dhambi, na kuishi ndani yake kwa makusudi. Mtu hawezi kufanywa mweupe, na bado akaendelea kuwa mweusi; hawezi kuponywa, na bado akabaki mgonjwa; wala hakuna awezaye kuokolewa, na bado akawa mpenzi wa uovu.

Mlevi ataokolewa kwa kumwamini Kristo—yaani, ataokolewa asiwe mlevi tena; lakini kama akiazimia bado kujilewesha, hajaokolewa kutoka humo, wala hajamwamini Yesu kwa kweli. Mwongo aweza kwa imani kuokolewa na uongo, lakini ndipo huacha kusema uongo, na huwa mwangalifu kunena kweli. Mtu yeyote aweza kuona kwa jicho nusu kwamba hawezi kuokolewa asiwe mwongo, na bado akaendelea katika mtindo wake wa zamani wa udanganyifu na uongo. Mtu aliye na uadui na mwingine ataokolewa na hisia hiyo ya uadui kwa kumwamini Bwana Yesu; lakini kama akiapa kwamba bado atatunza hisia ya chuki, ni wazi kwamba hajaokolewa kutoka humo, na ni wazi vilevile kwamba hajamwamini Bwana Yesu hata wokovu. Jambo kuu ni kuokolewa na upendo wa dhambi: hili ndilo tokeo la hakika la kumtumaini Mwokozi; lakini kama tokeo hili likawa mbali sana na kutamaniwa hata likakataliwa, maneno yote ya kumtumaini Mwokozi kwa wokovu ni hadithi tupu. Mtu huenda ofisi ya meli, na kuuliza kama aweza kupelekwa Amerika. Anahakikishiwa kwamba meli iko tayari tu, na kwamba yampasa tu kupanda melini, naye atafika New York upesi. "Lakini," asema yeye, "nataka kubaki nyumbani Uingereza, na kutunza duka langu wakati wote ninaovuka Atlantiki." Wakala adhani anazungumza na mwendawazimu, na kumwambia aende zake, wala asipoteze wakati wake kwa kufanya upumbavu. Kujifanya kumtumaini Kristo akuokoe na dhambi hali bado umeazimia kuendelea ndani yake, ni kumfanyia Kristo dhihaka. Namwomba msomaji wangu asiwe na hatia ya kufuru kama hiyo. Asiote kwamba Yesu mtakatifu atakuwa mlinzi wa uovu.

Je, unauona mti katika picha yangu? Mtambaazi umeota juu yake wote, nao unausonga, ukilinyonya uhai wake, na kuuua. Je, mti huo waweza kuokolewa? Mtunza-bustani adhani waweza. Yu tayari kufanya awezavyo. Lakini kabla hajaanza kutumia shoka lake na kisu chake, aambiwa kwamba haimpasi kuukata mtambaazi. "Ah! basi," asema yeye, "haiwezekani. Ni mtambaazi ndio unaouua mti, na kama wataka mti uokolewe, huwezi kuuokoa mtambaazi. Kama ukinitumaini kuutunza mti, yakupasa kuniacha nimwondoe huyo mtambaazi wa mauti mbali nao." Je, huo si ufahamu wa kawaida? Hakika ndiyo. Huukabidhi mti kwa mtunza-bustani isipokuwa ukimtumaini kukata kile kilicho cha mauti kwake. Kama mwenye dhambi atashikilia dhambi yake, sharti afe ndani yake; kama yu tayari kuokolewa na dhambi yake, Bwana Yesu aweza kulifanya hilo, naye atalifanya kama akikabidhi shauri lake kwa uangalizi wake.

Basi, ni ipi dhambi yako uipendayo? Je, ni tendo baya la wazi? Basi aibu yenyewe yakupasa kukufanya uiache. Je, ni upendo wa ulimwengu, au hofu ya watu, au tamaa ya mapato mabaya? Hakika, hakuna jambo lolote miongoni mwa haya lipasalo kukupatanisha na kuishi katika uadui na Mungu, na chini ya ghadhabu yake. Je, ni upendo wa kibinadamu, ulao moyo kama donda ndugu? Je, kiumbe chochote chaweza kushindana na Bwana Yesu? Je, si ibada ya sanamu kukiruhusu kitu chochote cha kidunia kilinganishwe hata kwa kitambo kimoja na Bwana Mungu? "Vema," asema mmoja, "kwangu mimi kuiacha ile dhambi maalum inayonishikilia mateka, kungekuwa hasara kubwa katika biashara yangu, kungeharibu matarajio yangu, na kupunguza manufaa yangu kwa njia nyingi." Kama ndivyo, shauri lako limekwisha jibiwa kwa maneno ya Bwana Yesu, akuagizaye ung'oe jicho lako, na kukata mkono wako au mguu wako, na kuvitupa mbali nawe, afadhali kuliko kutupwa katika jehanamu. Ni afadhali kuingia uzimani kwa jicho moja, na matarajio maskini kabisa, kuliko kuyashika matumaini yako yote, na kuwa nje ya Kristo. Afadhali kuwa mwaminio kilema kuliko mwenye dhambi arukaye. Afadhali kuwa katika safu ya nyuma maisha yako yote katika jeshi la Kristo kuliko kuongoza mstari wa mbele na kuwa afisa mkuu chini ya amri ya Shetani. Ukimpata Kristo, haitakuwa kitu upotezacho. Bila shaka wengi wamelazimika kupatwa na yale yaliyowalemaza na kuwafanya vilema kwa maisha haya; lakini kama kwa njia hiyo wameingia katika uzima wa milele, wamekuwa wenye faida kubwa.

Yaishia hapa, rafiki yangu, kama ilivyokuwa kwa John Bunyan; sauti sasa yanena nawe, na kusema—

JE, UTASHIKA DHAMBI YAKO NA KWENDA JEHANAMU?

AU

UIACHE DHAMBI YAKO NA KWENDA MBINGUNI?

Jambo hili yapasa liamuliwe kabla hujaondoka mahali hapa. Kwa jina la Mungu, nakuuliza, Litakuwa lipi—Kristo na wokovu, au dhambi uipendayo na hukumu? Hakuna njia ya katikati. Kungoja au kukataa kuamua kwa hakika kutakuwa uamuzi wa hakika kwa yule mwovu. Yeye asimamaye akiuliza kama atakuwa mwaminifu au la, tayari yu nje ya mstari ulionyooka: yeye asiyejua kama atamani kutakaswa na dhambi hutoa ushahidi wa moyo mchafu.

Kama unatamani sana kuiacha kila njia mbaya, Bwana wetu Yesu atakuwezesha kufanya hivyo mara moja. Neema yake tayari imebadili mwelekeo wa tamaa zako: kwa kweli, moyo wako umefanywa upya. Kwa hiyo, mtegemee yeye akutie nguvu upigane na majaribu yatokeapo, na kuzitimiza amri za Bwana siku kwa siku. Bwana Yesu ni hodari katika kumfanya kilema aruke kama kulungu, na katika kuwawezesha wale walio na ugonjwa wa kupooza wajitwike vitanda vyao na kutembea. Atakuwezesha kuyashinda yale mazoea mabaya. Atamtoa hata shetani ndani yako. Naam, kama ungekuwa na mashetani saba, angeweza kuwafukuza mara moja; hakuna kikomo cha uwezo wake wa kusafisha na kutakasa. Sasa kwa kuwa u tayari kufanywa mzima, kizuizi kikuu kimeondolewa. Yeye aliyeunyoosha utashi aweza kuzipanga nguvu zako zote nyingine, na kuzifanya zitende kwa sifa yake. Usingelitamani kwa bidii kuiacha dhambi yote kama yeye asingekuelekeza kwa siri upande huo. Kama ukimtumaini sasa, itakuwa wazi kwamba ameanza kazi njema ndani yako, nasi twahakikishiwa kwamba ataiendeleza.