Sura 6 · dakika 6 za kusoma
Kizuizi Katika Njia ya Kuamini.
Yamkini msomaji anahisi kizuizi katika kuamini. Na afikiri. Hatuwezi kuamini kwa tendo la papo hapo. Hali ya moyo tuiitayo kuamini ni matokeo, yanayofuata baada ya hali fulani za awali za moyo. Tunafikia imani hatua kwa hatua. Yaweza kuwako imani ya papo kwa hapo; lakini kwa kawaida twaifikia imani kwa hatua: twapendezwa, twafikiri, twasikia ushahidi, twasadikishwa, na hivyo twaongozwa kuamini. Basi, ikiwa nataka kuamini, lakini kwa sababu fulani nagundua kwamba siwezi kuifikia imani, nifanyeje? Je, nisimame kama ng'ombe anayekodolea macho lango jipya; au, kama kiumbe mwenye akili, nitumie njia zinazofaa? Kama nikitaka kuamini jambo lolote, nifanyeje? Tutajibu kwa kufuata kanuni za akili timamu.
Kama ningeambiwa kwamba Sultani wa Zanzibar ni mtu mwema, na jambo hilo lingekuwa la kunivutia, sidhani ningehisi kizuizi chochote katika kuliamini. Lakini kama kwa sababu fulani ningekuwa na shaka juu yake, na bado nikitamani kuamini habari hiyo, ningetendaje? Je, nisingetafuta habari zote zilizo katika uwezo wangu kumhusu Mfalme huyo, na kujaribu, kwa kuchunguza magazeti na nyaraka nyingine, kuifikia kweli? Bora zaidi, kama angalibahatika kuwa katika nchi hii, na angalinionana nami, nami ningeweza pia kuzungumza na watu wa baraza lake, na raia wa nchi yake, ningesaidiwa sana kufikia uamuzi kwa kutumia vyanzo hivi vya habari. Ushahidi uliopimwa na maarifa yaliyopatikana huelekeza kwenye imani. Ni kweli kwamba imani katika Yesu ni kipawa cha Mungu; lakini hata hivyo kwa kawaida huikirimu kwa kadiri ya sheria za akili, na kwa hiyo twaambiwa kwamba "imani huja kwa kusikia, na kusikia huja kwa neno la Mungu." Kama unataka kumwamini Yesu, sikia habari zake, soma habari zake, mfikiri, mjue, na hivyo utaona imani ikichipuka moyoni mwako, kama ngano ichipukayo kwa unyevunyevu na joto vitendavyo juu ya mbegu iliyopandwa. Kama ningetaka kuwa na imani kwa tabibu fulani, ningeomba ushuhuda wa uponyaji wake, ningetamani kuona vyeti vilivyothibitisha ujuzi wake wa kitaaluma, nami ningependa pia kusikia analosema juu ya maradhi fulani yaliyo magumu. Kwa kweli, ningetumia njia za kujua, ili nipate kuamini.
Uwe na bidii nyingi katika kusikia habari za Yesu. Roho kwa mamia hufikia imani katika Yesu chini ya huduma imwekayo wazi na kwa daima. Ni wachache wabakiao bila kuamini chini ya mhubiri ambaye somo lake kuu ni Kristo aliyesulubiwa. Usimsikilize mhudumu wa aina nyingine yoyote. Wako wa aina hiyo. Nimesikia habari za mmoja aliyekuta katika Biblia yake ya mimbarani karatasi yenye maneno haya, "Bwana, sisi twataka kumwona Yesu." Nenda mahali pa ibada ili umwone Yesu; na kama huwezi hata kusikia jina lake likitajwa, ondoka uende mahali pengine ambapo anafikiriwa zaidi, na kwa hiyo ana uwezekano zaidi wa kuwapo.
Uwe na bidii nyingi katika kusoma habari za Bwana Yesu. Vitabu vya Maandiko ndizo yungiyungi ambazo katikati yake yeye hulisha. Biblia ni dirisha ambalo kupitia hilo twaweza kutazama na kumwona Bwana wetu. Isome hadithi ya mateso yake na mauti yake kwa uangalifu wa uchaji, na kabla ya muda mrefu Bwana atafanya imani iingie kwa siri nafsini mwako. Msalaba wa Kristo hauthawabishi imani tu, bali huzaa imani. Mwamini mwingi aweza kusema—
"Nikutazamapo, umejeruhiwa, wahuzunika, Umekata roho, juu ya mti uliolaaniwa, Punde nahisi moyo wangu waamini Ya kuwa umeteseka hivi kwa ajili yangu."Kama kusikia na kusoma havitoshi, basi kwa makusudi uelekeze akili yako ikafanye kazi ya kulichunguza jambo hili kwa kina, na ulimalize. Ama uamini, au ujue sababu ya wewe kutoamini. Lichunguze jambo hilo hadi kufikia mwisho wa uwezo wako, na umwombe Mungu akusaidie kufanya uchunguzi kamili, na kufikia uamuzi wa kweli upande mmoja au mwingine. Fikiri Yesu alikuwa nani, na kwamba je muundo wa nafsi yake haumstahilishi kupewa tumaini. Fikiri alilolifanya, na je hili nalo si msingi mwema wa kumtegemea. Mfikiri akifa, akifufuka kutoka kwa wafu, akipaa, na akiishi daima ili kuwaombea wakosaji; nawe uone je hili halimstahilishi kutegemewa nawe. Kisha mlilie, uone kama hatakusikia. Usher alipotaka kujua kama Rutherford kweli alikuwa mtu mtakatifu kama alivyosemwa, alikwenda nyumbani kwake kama mwombaji, akapata mahali pa kulala, akamsikia mtu wa Mungu akiumimina moyo wake mbele za Bwana wakati wa usiku. Kama ungependa kumjua Yesu, mkaribie kadiri uwezavyo kwa kuichunguza tabia yake, na kwa kuiomba upendo wake.
Wakati mmoja huenda ningehitaji ushahidi ili kunifanya nimwamini Bwana Yesu; lakini sasa namjua vema sana, kwa kumjaribu, hata ningehitaji ushahidi mwingi mno ili kunifanya nimtilie shaka. Sasa ni jambo la kawaida zaidi kwangu kutegemea kuliko kutoamini: huu ni utu mpya ukishinda; haikuwa hivyo mwanzoni. Uzuka wa imani, mwanzoni, ni chanzo cha udhaifu; lakini tendo baada ya tendo la kutegemea hugeuza imani kuwa mazoea. Uzoefu huipa imani uthibitisho wenye nguvu.
Sifadhaishwi na shaka, kwa sababu kweli niaminiyo imefanya muujiza ndani yangu. Kwa njia yake nimepokea na bado nashika uzima mpya, ambao zamani nilikuwa mgeni kwao: na huu ni uthibitisho wa aina yenye nguvu kuliko zote. Mimi ni kama yule mtu mwema na mkewe waliokuwa wakitunza mnara wa taa kwa miaka mingi. Mgeni mmoja, aliyekuja kuutazama mnara wa taa, akichungulia dirishani juu ya ukiwa wa maji, alimwuliza yule mama mwema, "Je, huogopi usiku, dhoruba inapovuma, na mawimbi makubwa yanapofurika juu kabisa ya taa? Je, huhofu kwamba mnara wa taa, na vyote vilivyomo, vitachukuliwa? Nina hakika mimi ningeogopa kujiweka tumaini katika mnara mwembamba katikati ya mawimbi makuu." Yule mama akasema kwamba wazo hilo halimjii kamwe sasa. Alikuwa ameishi pale muda mrefu hata akajihisi salama juu ya mwamba wa upweke kama vile alivyokuwa alipoishi bara. Naye mumewe, alipoulizwa kama hahisi wasiwasi upepo unapovuma kimbunga, alijibu, "Naam, nahisi wasiwasi wa kuzitunza taa vizuri, na mwanga uendelee kuwaka, lisije likavunjika chombo chochote." Kuhusu wasiwasi juu ya usalama wa mnara wa taa, au usalama wake mwenyewe ndani yake, hayo yote alikuwa ameyapita. Ndivyo ilivyo kwa mwamini aliyekomaa. Aweza kusema kwa unyenyekevu, "Najua niliyemwamini, na kusadiki ya kwamba aweza kukilinda kile nilichokiweka amana kwake hata siku ile." Tangu sasa mtu yeyote asinisumbue kwa shaka na maswali; nachukua nafsini mwangu ithibati za kweli na nguvu za Roho, wala sitakubali hoja zenu za hila. Injili kwangu ni kweli: naridhika kuangamia kama si kweli. Naihatarisha hatima ya milele ya nafsi yangu juu ya ukweli wa injili, nami najua ya kwamba hakuna hatari ndani yake. Shughuli yangu moja ni kuzitunza taa ziwake, ili kwa hiyo niwafaidie wengine. Bwana na anipe mafuta ya kutosha kulisha taa yangu, ili nipate kumulika mwali kuvuka bahari yenye giza na hatari ya maisha, nami naridhika kabisa.
Sasa, ewe mtafutaji uliye na taabu, ikiwa ni hivyo, kwamba mhudumu wako, na wengine wengi uwatumainio, wamepata amani kamili na raha katika injili, kwa nini si wewe pia? Je, Roho wa Bwana amepungukiwa? Je, maneno yake hayawatendei mema wanaokwenda kwa unyofu? Je, wewe pia hutajaribu wema wake wa kuokoa?
Injili ni kweli kabisa, kwa maana Mungu ndiye Mwandishi wake. Iamini. Mwokozi ana uwezo kamili, kwa maana yeye ni Mwana wa Mungu. Mtegemee. Damu yake ya thamani ina nguvu nyingi kuliko zote. Itazame ili upate msamaha. Moyo wake wa neema una upendo mwingi kuliko yote. Ukimbilie mara moja.
Hivyo ningetamani kumsihi msomaji aitafute imani; lakini kama hana nia, niwezaje kufanya zaidi? Nimemleta farasi majini, lakini siwezi kumfanya anywe. Hata hivyo, na ikumbukwe hili—kutoamini ni kwa makusudi ushahidi unapowekwa mbele ya mtu, naye akakataa kuuchunguza kwa uangalifu. Yeye asiyetamani kujua na kuikubali kweli, ni yeye mwenyewe wa kujilaumu kama akifa na uongo katika mkono wake wa kuume. Ni kweli kwamba "Aaminiye na kubatizwa ataokoka": ni kweli vilevile kwamba "asiyeamini atahukumiwa."