Sura 7 · dakika 20 za kusoma · dakika 26 za kusikiliza
Vipimo vya upendo kwa Mungu
TUJIPIME wenyewe bila upendeleo, tuone kama tumo katika hesabu ya wale wampendao Mungu. Ili kulithibitisha jambo hili, kwa kuwa upendo wetu huonekana vizuri zaidi kwa matunda yake, nitaweka ishara kumi na nne, au matunda kumi na nne, ya upendo kwa Mungu; nasi imetupasa kuchunguza kwa makini kama yoyote ya matunda haya yanamea katika bustani yetu.
1. Tunda la kwanza la upendo ni kumtafakari Mungu daima moyoni. Mtu aliye na upendo, mawazo yake huwa daima juu ya yule ampendaye. Yeye ampendaye Mungu hunyakuliwa na kuchukuliwa juu kwa kumtafakari Mungu. “Niamkapo, nikali pamoja nawe” (Zaburi 139:18). Mawazo ni kama wasafiri katika akili. Mawazo ya Daudi yalishika njia ya mbinguni: Nikali pamoja nawe. Mungu ndiye hazina, na pale ilipo hazina, ndipo ulipo moyo. Kwa jambo hili twaweza kuupima upendo wetu kwa Mungu. Mawazo yetu yamekaa zaidi juu ya nini? Je, twaweza kusema kwamba tunanyakuliwa kwa furaha tunapomfikiri Mungu? Je, mawazo yetu yamepata mabawa? Je, yamepaa juu? Je, tunamtafakari Kristo na utukufu? Lo, jinsi walivyo mbali na kuwa wapenzi wa Mungu wale ambao hawamfikiri Mungu karibu kamwe! “Mungu hayumo katika mawazo yake yote” (Zaburi 10:4). Mwenye dhambi humsukuma Mungu nje ya mawazo yake. Hamfikiri Mungu kamwe, isipokuwa kwa hofu kuu, kama mfungwa amfikirivyo hakimu.
2. Tunda linalofuata la upendo ni kutamani ushirika. Upendo hutamani ukaribu na mazungumzo. “moyo wangu na mwili wangu vinamlilia Mungu aliye hai” (Zaburi 84:2). Mfalme Daudi alipozuiliwa asiifikie nyumba ya Mungu, mahali ilipokuwa hema, ishara ionekanayo ya kuwapo kwake, aliitamani roho yake kwa Mungu, na kwa shauku takatifu ya moyo akamlilia Mungu aliye hai. Wapendanao hupenda kuzungumza pamoja. Tukimpenda Mungu tunazithamini huduma zake takatifu, kwa sababu huko ndiko tukutanapo na Mungu. Yeye husema nasi katika Neno lake, nasi twasema naye katika maombi. Kwa jambo hili na tuupime upendo wetu kwa Mungu. Je, tunatamani ushirika wa karibu na Mungu? Wapendanao hawawezi kukaa mbali kwa muda mrefu. Wale wampendao Mungu wana mapenzi matakatifu; hawajui jinsi ya kukaa mbali naye. Wanaweza kuvumilia kukosa kitu chochote isipokuwa kuwapo kwa Mungu. Wanaweza kuishi bila afya na bila rafiki, wanaweza kuwa na furaha bila meza iliyojaa, lakini hawawezi kuwa na furaha bila Mungu. “Usinifiche uso wako, nisifanane nao washukao shimoni” (Zaburi 143:7). Wapendanao huzimia. Daudi alikuwa karibu kuzimia na kufa alipokosa kumwona Mungu. Wale wampendao Mungu hawawezi kuridhika kwa kuwa na huduma tu, isipokuwa wamfurahie Mungu ndani yake; maana hiyo ingekuwa kama kuramba chupa, wala si asali.
Tuseme nini basi juu ya wale wanaoweza kuishi maisha yao yote bila Mungu? Wanadhani kwamba Mungu ndiye anayeweza kukosekana kwa urahisi kuliko wote: wanalalamika kwamba wanakosa afya na biashara, lakini hawalalamiki kwamba wanamkosa Mungu! Watu waovu hawamjui Mungu; na wangewezaje kupenda wale wasiomjua! Naam, tena ni vibaya zaidi, kwa kuwa hawataki hata kumjua. “Wamwambia Mungu, Uondoke kwetu; kwa maana hatutaki kuzijua njia zako” (Ayubu 21:14). Wenye dhambi hukwepa kumjua Mungu, huhesabu kuwapo kwake kuwa mzigo; je, hawa ni wapenzi wa Mungu? Je, mwanamke yule ampenda mumewe, ambaye hawezi kuvumilia kukaa mbele yake?
3. Tunda jingine la upendo ni huzuni. Palipo na upendo kwa Mungu, pana huzuni kwa ajili ya dhambi zetu za kukosa shukrani mbele zake. Mtoto ampendaye baba yake hawezi kuacha kulia kwa kumkosea. Moyo unaowaka kwa upendo huyeyuka kwa machozi. Lo! kwamba mimi niutumie vibaya upendo wa Mwokozi mpendwa namna hii! Je, Bwana wangu hakuteseka vya kutosha msalabani, hata mimi nimtese zaidi? Je, nimpe tena nyongo na siki anywe? Jinsi nilivyokuwa mwasi na mwenye hila! Jinsi nilivyomhuzunisha Roho wake, nikazikanyaga amri zake za kifalme, nikaidharau damu yake! Jambo hili hufungua mshipa wa huzuni ya kimungu, na kuufanya moyo utoke damu upya. “Petro akatoka nje, akalia kwa majonzi” (Mathayo 26:75). Petro alipofikiri jinsi Kristo alivyompenda sana; jinsi alivyochukuliwa juu ya mlima wa kugeuka sura, ambapo Kristo alimwonyesha utukufu wa mbinguni katika maono; na kwamba yeye amkane Kristo baada ya kupokea upendo mkuu namna hiyo kutoka kwake, jambo hili liliuvunja moyo wake kwa huzuni: akatoka nje, akalia kwa majonzi.
Kwa jambo hili na tuupime upendo wetu kwa Mungu. Je, tunamwaga machozi ya huzuni ya kimungu? Je, tunahuzunika kwa ajili ya kukosa kwetu shukrani mbele za Mungu, kwa kuitumia vibaya rehema yake, kwa kutoyazalisha matalanta yetu? Jinsi walivyo mbali na kumpenda Mungu wale wanaotenda dhambi kila siku, wala mioyo yao haiwachomi kamwe! Wana bahari ya dhambi, wala hawana tone la huzuni. Wako mbali sana na kufadhaika, hata wanafanya sherehe kwa dhambi zao. “Utendapo mabaya, ndipo unapofurahi” (Yeremia 11:15). Ewe mnyonge! Je, Kristo alitoka damu kwa ajili ya dhambi, nawe unaicheka? Hawa wako mbali na kumpenda Mungu. Je, mtu ampenda rafiki yake ikiwa anapenda kumdhuru?
4. Tunda jingine la upendo ni ushujaa wa moyo. Upendo ni hodari; hugeuza woga kuwa ujasiri. Upendo humfanya mtu athubutu kukabili shida na hatari zilizo kuu kuliko zote. Kuku mwenye woga atamrukia mbwa au nyoka ili kuwalinda vifaranga wake. Upendo humtia Mkristo roho ya ushujaa na uthabiti. Yeye ampendaye Mungu atasimama kwa ajili ya kazi yake, na kuwa mtetezi wake. “Maana sisi hatuwezi kuacha kuyanena mambo tuliyoyaona na kuyasikia” (Matendo 4:20). Yeye aogopaye kumkiri Kristo ana upendo mdogo tu kwake. Nikodemo alimjia Kristo kwa kunyemelea usiku (Yohana 3:2). Aliogopa kuonekana pamoja naye wakati wa mchana. Upendo huitupa nje hofu. Kama jua lifukuzavyo ukungu na mvuke, ndivyo upendo wa kimungu kwa kiasi kikubwa unavyoifukuza hofu ya kimwili. Je, ampenda Mungu yule anayeweza kusikia kweli zake zilizobarikiwa zikipingwa, naye akanyamaza? Yeye ampendaye rafiki yake atasimama upande wake, na kumtetea anapotukanwa. Je, Kristo anaonekana mbinguni kwa ajili yetu, nasi tunaogopa kuonekana duniani kwa ajili yake? Upendo humtia Mkristo moyo; huuwasha moyo wake kwa bidii, na kuuimarisha kwa ujasiri kama chuma.
5. Tunda la tano la upendo ni moyo unaoguswa. Tukimpenda Mungu, mioyo yetu huuma kwa ajili ya aibu anayotendewa Mungu na watu waovu. Kuona si kingo za dini tu, bali hata za maadili, zikibomolewa, na gharika ya uovu ikiingia; kuona sabato za Mungu zikitiwa unajisi, viapo vyake vikivunjwa, jina lake likivunjiwa heshima; ikiwa mna upendo wowote kwa Mungu ndani yetu, tutayatia mambo haya moyoni. Roho ya haki ya Lutu “ilihuzunishwa sana na mwenendo wa uchafu wa watu waovu” (2 Petro 2:7). Dhambi za Sodoma zilikuwa kama mikuki mingi iliyoichoma roho yake. Jinsi walivyo mbali na kumpenda Mungu wale wasioguswa hata kidogo na aibu anayotendewa! Ikiwa wana amani na biashara tu, hawatii chochote moyoni. Mtu aliyelewa chakari hajali wala haguswi, ingawa mwingine anatoka damu hata kufa kando yake; vivyo hivyo wengi, wakiwa wamelewa kwa divai ya kufanikiwa, heshima ya Mungu inapojeruhiwa na kweli zake zinapolala zikitoka damu, hawaguswi nayo. Kama watu wangempenda Mungu, wangehuzunika kuuona utukufu wake ukiteseka, na dini yenyewe ikigeuka kuwa shahidi aliyeuawa.
6. Tunda la sita la upendo ni kuichukia dhambi. Moto husafisha takataka kutoka katika madini. Moto wa upendo huisafisha dhambi itoke. “Efraimu atasema, Nina nini tena na sanamu?” (Hosea 14:8). Yeye ampendaye Mungu hatakuwa na shauri lolote na dhambi, isipokuwa kupigana nayo vita. Dhambi haipigi heshima ya Mungu tu, bali hata uwepo wake. Je, ampenda mfalme wake yule anayemficha mtu aliye msaliti wa taji? Je, ni rafiki wa Mungu yule apendaye kile anachokichukia Mungu? Kumpenda Mungu na kuipenda dhambi haviwezi kukaa pamoja. Mapenzi ya moyo hayawezi kuelekezwa kwa vitu viwili vinavyopingana wakati mmoja. Mtu hawezi kupenda afya na kupenda sumu pia; vivyo hivyo mtu hawezi kumpenda Mungu na dhambi pia. Yeye anayeiruhusu dhambi yoyote ya siri moyoni mwake, yuko mbali na kumpenda Mungu kama mbingu ilivyo mbali na nchi.
7. Tunda jingine la upendo ni kusulibiwa. Yeye aliye mpenzi wa Mungu amekufa kwa ulimwengu. “Mimi nimesulibiwa kwa ulimwengu” (Wagalatia 6:14). Nimekufa kwa heshima zake na anasa zake. Yeye ampendaye Mungu hapendi sana kitu kingine chochote. Kumpenda Mungu, na kuupenda ulimwengu kwa nguvu, haviwezi kupatana. “Mtu akiipenda dunia, kumpenda Baba hakumo ndani yake” (1 Yohana 2:15). Upendo kwa Mungu humeza upendo mwingine wote, kama fimbo ya Musa ilivyozimeza fimbo za Wamisri. Kama mtu angeweza kuishi katika jua, dunia nzima ingeonekana kama nukta ndogo kiasi gani; vivyo hivyo moyo wa mtu unapoinuliwa juu ya ulimwengu kwa kumstaajabia na kumpenda Mungu, jinsi vitu hivi vya chini vinavyoonekana duni na hafifu! Huonekana kama si kitu machoni pake. Ilikuwa ishara kwamba Wakristo wa kwanza walimpenda Mungu, kwa sababu mali zao hazikukaa karibu na mioyo yao; bali “waliweka fedha zao miguuni pa mitume” (Matendo 4:35).
Upime upendo wako kwa Mungu kwa jambo hili. Tuwafikirie nini wale wasioshiba kamwe vitu vya ulimwengu? Wana ugonjwa wa istiska wa tamaa, wakiona kiu ya mali bila kushiba: “Wanaotamani mavumbi ya nchi” (Amosi 2:7). Usiseme kamwe juu ya upendo wako kwa Kristo, asema Ignatio, wakati unautanguliza ulimwengu mbele ya Lulu ya thamani; na je, si wengi walio hivyo, wanaothamini dhahabu yao kuliko Mungu? Wakiwa na nchi ya kusini, hawajali maji ya uzima. Watamwuza Kristo na dhamiri njema kwa fedha. Je, Mungu atawapa mbingu kamwe wale wanaomdharau hivyo kwa aibu, wakitanguliza mavumbi yang’aayo mbele ya Uungu wenye utukufu? Kuna nini duniani hata tuiwekee mioyo yetu kiasi hicho? Ni Ibilisi tu anayetufanya tuitazame kwa kioo kikuzacho. Ulimwengu hauna thamani halisi ndani yake; ni rangi tu na udanganyifu.
8. Tunda linalofuata la upendo ni hofu. Kwa wacha Mungu, upendo na hofu hubusiana. Hofu ya namna mbili hutokana na upendo.
(i.) Hofu ya kumchukiza. Mke humpenda mumewe, kwa hiyo afadhali ajinyime nafsi yake kuliko kumchukiza. Kadiri tunavyompenda Mungu zaidi, ndivyo tunavyoogopa zaidi kumhuzunisha Roho wake. “Basi nifanyeje ubaya huu mkubwa namna hii, nikamkosa Mungu?” (Mwanzo 39:9). Malkia Eudoksia alipomtisha Krisostomo kwamba atamfukuza uhamishoni, alisema: Mwambieni sihofu kitu ila dhambi. Huo ni upendo uliobarikiwa, unaomtia Mkristo homa kali ya bidii, na baridi ya hofu, ukimfanya atetemeke, wala asithubutu kumkosea Mungu kwa kupenda.
(ii.) Hofu iliyochanganyika na wivu. “Moyo wa Eli ulikuwa ukitetemeka kwa ajili ya sanduku” (1 Samweli 4:13). Haikusemwa kwamba moyo wake ulitetemeka kwa ajili ya Hofni na Finehasi, wanawe wawili, bali moyo wake ulitetemeka kwa ajili ya sanduku, kwa sababu kama sanduku lingetwaliwa, basi utukufu ungekuwa umeondoka. Yeye ampendaye Mungu amejaa hofu, asije kanisa likapatwa na mabaya. Huogopa uovu (ambao ni tauni ya ukoma) usije ukaongezeka, upapa usije ukapata nafasi, Mungu asije akawaacha watu wake. Kuwapo kwa Mungu katika huduma zake takatifu ndiko uzuri na nguvu ya taifa. Maadamu Mungu yupo pamoja na watu, muda huo wote wako salama; lakini roho iliyowashwa kwa upendo kwa Mungu huogopa zisije ishara zionekanazo za kuwapo kwa Mungu zikaondolewa.
Kwa jiwe hili la kupimia na tuupime upendo wetu kwa Mungu. Wengi huogopa amani na biashara zisije zikaondoka, lakini hawaogopi Mungu na Injili yake wasije wakaondoka. Je, hawa ni wapenzi wa Mungu? Yeye ampendaye Mungu huogopa zaidi kupoteza baraka za kiroho kuliko za kidunia. Kama Jua la haki likiondoka katika upeo wetu wa macho, ni nini kitakachofuata ila giza? Kinanda au wimbo wa kanisa vyaweza kutoa faraja gani ikiwa Injili imeondoka? Je, si kama sauti ya tarumbeta au mlio wa bunduki kwenye mazishi?
9. Ikiwa sisi ni wapenzi wa Mungu, tunapenda kile anachokipenda Mungu.
(i.) Tunalipenda Neno la Mungu. Daudi alilithamini Neno, kwa ajili ya utamu wake, kuliko asali (Zaburi 119:103), na kwa ajili ya thamani yake, kuliko dhahabu (Zaburi 119:72). Mistari ya Maandiko ni tajiri kuliko migodi ya dhahabu. Inafaa kweli tulipende Neno; ndilo nyota ya kuongoza inayotuelekeza mbinguni, ndilo shamba ambamo Lulu imefichwa. Mtu yule asiyelipenda Neno, bali anadhani ni kali mno, na angetamani sehemu yoyote ya Biblia ingechanwa itoke (kama mzinzi mmoja alivyotamani kwa ile amri ya saba), hana hata cheche ndogo ya upendo moyoni mwake.
(ii.) Tunaipenda siku ya Mungu. Hatuishiki sabato tu, bali tunaipenda sabato. “Ukiiita sabato siku ya furaha” (Isaya 58:13). Sabato ndiyo inayoudumisha uso wa dini kati yetu; siku hii inapaswa kutakaswa kuwa tukufu kwa Bwana. Nyumba ya Mungu ni jumba la Mfalme mkuu; siku ya sabato Mungu hujionyesha humo kupitia dirisha la kimia. Tukimpenda Mungu tunaithamini siku yake kuliko siku nyingine zote. Juma zima lingekuwa giza kama si siku hii; siku hii mana hushuka maradufu. Sasa, kama wakati wowote, lango la mbinguni li wazi, na Mungu hushuka katika manyunyu ya dhahabu. Siku hii iliyobarikiwa, Jua la haki huichomozea roho. Jinsi moyo wenye neema unavyoithamini siku ile iliyofanywa makusudi ili kumfurahia Mungu!
(iii.) Tunazipenda sheria za Mungu. Roho yenye neema huifurahia sheria kwa sababu inazuia mapito yake ya dhambi. Moyo ungekuwa tayari kukimbia ovyo katika dhambi kama usingewekewa vizuizi vilivyobarikiwa na sheria ya Mungu. Yeye ampendaye Mungu huipenda sheria yake — sheria ya toba, sheria ya kujikana nafsi. Wengi husema wanampenda Mungu lakini wanazichukia sheria zake. “Na tuvipasue vifungo vyao, na kuzitupa kamba zao mbali nasi” (Zaburi 2:3). Maagizo ya Mungu yamefananishwa na kamba; huwafunga watu katika mwenendo mwema; lakini waovu hudhani kamba hizi zimebana mno, kwa hiyo husema, Na tuzipasue. Hujifanya kumpenda Kristo kama Mwokozi, lakini humchukia kama Mfalme. Kristo anatuambia habari za nira yake (Mathayo 11:29). Wenye dhambi wangetaka Kristo aweke taji juu ya vichwa vyao, lakini si nira shingoni mwao. Angekuwa mfalme wa ajabu yule ambaye angetawala bila sheria.
(iv.) Tunaipenda picha ya Mungu; tunaipenda sura yake ing’aayo ndani ya watakatifu. “Yeye ampendaye Yeye aliyezaa, ampenda na yeye aliyezaliwa naye” (1 Yohana 5:1). Inawezekana kumpenda mtakatifu, lakini bila kumpenda kama mtakatifu; twaweza kumpenda kwa ajili ya jambo jingine, kwa ajili ya akili yake, au kwa sababu ni mchangamfu na mkarimu. Mnyama humpenda mtu, lakini si kwa kuwa ni mtu, bali kwa sababu humlisha na kumpa majani. Lakini kumpenda mtakatifu kwa kuwa ni mtakatifu, hii ni ishara ya upendo kwa Mungu. Tukimpenda mtakatifu kwa ajili ya utakatifu wake, kwa kuwa ana kitu cha Mungu ndani yake, basi tunampenda katika hali hizi nne.
(a) Tunampenda mtakatifu, ingawa ni maskini. Mtu apendaye dhahabu hupenda kipande cha dhahabu, hata kikiwa katika tambara: vivyo hivyo, ingawa mtakatifu yuko katika matambara, tunampenda, kwa sababu kuna kitu cha Kristo ndani yake.
(b) Tunampenda mtakatifu, ingawa ana kasoro nyingi zake binafsi. Hakuna ukamilifu hapa. Kwa wengine, hasira ya haraka hushinda; kwa wengine, kigeugeu; kwa wengine, kuupenda ulimwengu kupita kiasi. Mtakatifu katika maisha haya ni kama dhahabu ingali katika mawe yake; takataka nyingi za udhaifu humshikamana, lakini tunampenda kwa ajili ya neema iliyo ndani yake. Mtakatifu ni kama uso mzuri wenye kovu: tunaupenda uso mzuri wa utakatifu, ingawa una kovu. Zumaridi iliyo bora kuliko zote ina dosari zake, nyota zing’aazo kuliko zote zina kufifia kwake, na watakatifu walio bora kuliko wote wana kasoro zao. Wewe usiyeweza kumpenda mwenzako kwa sababu ya udhaifu wake, ungetaka Mungu akupendeje wewe?
(c) Tunawapenda watakatifu ingawa katika mambo fulani madogo wanatofautiana nasi. Huenda Mkristo mwingine hana nuru nyingi kama wewe, na hilo laweza kumfanya akosee katika mambo fulani; je, utamvua utakatifu mara moja kwa sababu hawezi kuifikia nuru yako? Palipo na umoja katika misingi ya imani, inapasa pawe na umoja katika mapenzi ya moyo.
(d) Tunawapenda watakatifu, ingawa wanateswa. Tunayapenda madini ya thamani, ingawa yamo tanuruni. Mtakatifu Paulo alichukua mwilini mwake chapa za Bwana Yesu (Wagalatia 6:17). Chapa hizo zilikuwa, kama makovu ya askari, za heshima. Imetupasa kumpenda mtakatifu akiwa katika minyororo sawa na akiwa katika nguo nyekundu za heshima. Tukimpenda Kristo, tunawapenda viungo vyake vinavyoteswa.
Kama huu ndio upendo kwa Mungu, tunapoipenda sura yake ing’aayo ndani ya watakatifu, lo basi, jinsi walivyo wachache wapenzi wa Mungu wanaopatikana! Je, wanampenda Mungu wale wanaowachukia wale wanaofanana na Mungu? Je, wanampenda Kristo mwenyewe wale waliojaa roho ya kulipiza kisasi juu ya watu wake? Mke yule awezaje kusemwa kwamba anampenda mumewe, ambaye anaichana picha yake? Hakika Yuda na Yuliani hawajafa bado; roho yao ingali hai ulimwenguni. Ni nani wenye hatia ila wasio na hatia! Kosa gani lililo kubwa kuliko utakatifu, ikiwa Ibilisi angekuwa mmoja wa baraza kuu la mahakama! Watu waovu huonekana kuwaheshimu sana watakatifu waliokwisha kufa; huwatangaza watakatifu waliokufa, lakini huwatesa walio hai. Ni bure watu kusimama wakati wa kukiri Kanuni ya Imani, na kuuambia ulimwengu kwamba wanamwamini Mungu, hali wanachukizwa na mojawapo ya vifungu vya Kanuni hiyo, yaani, ushirika wa watakatifu. Hakika, hakuna ishara kubwa zaidi ya mtu aliyeiva kwa ajili ya jehanum kuliko hii: si kukosa neema tu, bali kuichukia.
10. Ishara nyingine iliyobarikiwa ya upendo ni kuwa na mawazo mema juu ya Mungu. Yeye ampendaye rafiki yake hufasiri kwa maana iliyo bora kila anachokitenda rafiki yake. “Upendo haufikiri mabaya” (1 Wakorintho 13:5). Uovu wa moyo hufasiri yote kwa maana mbaya kuliko zote; upendo hufasiri yote kwa maana iliyo bora. Ni mfasiri bora wa maongozi ya Mungu; haufikiri mabaya. Yeye ampendaye Mungu ana maoni mema juu ya Mungu; ingawa Mungu anamtesa kwa ukali, roho yake hupokea yote vizuri. Hii ndiyo lugha ya roho yenye neema: “Mungu wangu anaona jinsi nilivyo na moyo mgumu, kwa hiyo anapigilia ndani kabari moja ya mateso baada ya nyingine, ili auvunje moyo wangu. Anajua jinsi nilivyojaa michanganyiko mibaya ya mwili, jinsi nilivyougua homa ya mapafu, kwa hiyo ananitoa damu, ili kuniokoa uhai wangu. Shauri hili kali ni la kuua uovu fulani, au la kuizoeza neema fulani. Jinsi Mungu alivyo mwema, asiyeniacha peke yangu katika dhambi zangu, bali anaupiga mwili wangu ili kuiokoa roho yangu!” Hivyo yeye ampendaye Mungu hupokea kila jambo kwa nia njema. Upendo huyapa matendo yote ya Mungu maana ya haki na unyofu. Wewe ulio mwepesi kumnung’unikia Mungu, kana kwamba amekutendea vibaya, ujinyenyekeze kwa ajili ya jambo hili; ujiambie hivi, “Kama ningempenda Mungu zaidi, ningekuwa na mawazo mema zaidi juu ya Mungu.” Ni Shetani anayetufanya tuwe na mawazo mema juu yetu wenyewe, na mawazo magumu juu ya Mungu. Upendo hupokea yote kwa maana iliyo njema kuliko zote; haufikiri mabaya.
11. Tunda jingine la upendo ni utii. Yeye aliye na amri zangu, na kuzishika, ndiye anipendaye” (Yohana 14:21). Ni jambo la bure kusema tunampenda Kristo mwenyewe, ikiwa tunazidharau amri zake. Je, mtoto yule ampenda baba yake, ambaye anakataa kumtii? Tukimpenda Mungu, tutamtii katika mambo yale yanayopingana na mwili na damu. (i.) Katika mambo magumu, na (ii.) Katika mambo ya hatari.
(i.) Katika mambo magumu. Kwa mfano, katika kuiua dhambi. Kuna dhambi fulani ambazo si karibu nasi tu kama vazi, bali ni za thamani kwetu kama jicho. Tukimpenda Mungu, tutajipanga kupigana nazo, kwa nia na kwa matendo. Tena, katika kuwasamehe adui zetu. Mungu anatuamuru, kwa adhabu ya kifo, tusamehe. “Mkasameheane” (Waefeso 4:32). Jambo hili ni gumu; ni kama kuogelea dhidi ya mkondo. Sisi ni wepesi kusahau fadhili, na kukumbuka maudhi; lakini tukimpenda Mungu, tutapuuza makosa. Tunapofikiri kwa makini ni talanta ngapi Mungu ametusamehe, ni dharau na machukizo mangapi amevumilia mikononi mwetu, jambo hili hutufanya tuandike kwa kufuata kielelezo chake, na kujitahidi afadhali kuyazika maudhi kuliko kuyalipiza.
(ii.) Katika mambo ya hatari. Mungu anapotuita tuteseke kwa ajili yake, tutatii. Upendo ulimfanya Kristo ateseke kwa ajili yetu; upendo ndio mnyororo uliomfunga msalabani; vivyo hivyo, tukimpenda Mungu, tutakuwa tayari kuteseka kwa ajili yake. Upendo una sifa ya ajabu: ndio neema isiyovumilia kuliko zote, na tena ndiyo neema ivumiliayo kuliko zote. Ni neema isiyovumilia kuliko zote kwa maana moja; haitavumilia dhambi inayojulikana ikae rohoni bila kutubiwa, haitavumilia maudhi na aibu wanazotendewa Mungu; hivyo ndiyo neema isiyovumilia kuliko zote. Lakini ndiyo neema ivumiliayo kuliko zote; itavumilia matukano, vifungo, na kufungwa gerezani, kwa ajili ya Kristo. “Mimi ni tayari, si kufungwa tu, bali hata kufa kwa ajili ya jina la Bwana Yesu” (Matendo 21:13). Ni kweli kwamba si kila Mkristo ni shahidi aliyeuawa kwa ajili ya imani, lakini ana roho ya ushahidi huo ndani yake. Husema kama Paulo, “Mimi ni tayari, si kufungwa tu”; ana nia ya moyo ya kuteseka, Mungu akimwita. Upendo utawachukua watu juu kupita nguvu zao wenyewe. Tertuliani anaeleza jinsi wapagani walivyoteseka sana kwa ajili ya upendo kwa nchi yao. Kama chemchemi ya asili inapanda juu hivyo, hakika neema itapanda juu zaidi. Ikiwa upendo kwa nchi yao utawafanya watu wateseke, si zaidi sana upendo kwa Kristo? “Upendo huvumilia yote” (1 Wakorintho 13:7). Basili anasimulia habari za bikira mmoja aliyehukumiwa kuchomwa moto, ambaye, alipopewa uhai wake na mali yake kama angesujudu mbele ya sanamu, alijibu, “Uhai na fedha na viende, karibu Kristo.” Lilikuwa neno la heshima na la bidii lile la Ignatio, “Na nisagwe kwa meno ya wanyama wakali, ikiwa naweza kuwa ngano safi ya Mungu.” Jinsi mapenzi ya kimungu yalivyowachukua watakatifu wa kwanza juu kupita kuupenda uhai, na kuiogopa mauti! Mtakatifu Stefano alipigwa kwa mawe, Mtakatifu Luka alitundikwa juu ya mzeituni, Mtakatifu Petro alisulibiwa Yerusalemu kichwa chini. Mashujaa hawa wa kimungu walikuwa tayari kuteseka, kuliko kwa woga wao kulifanya jina la Mungu liteseke. Jinsi Mtakatifu Paulo alivyouthamini mnyororo wake aliouvaa kwa ajili ya Kristo! Alijisifu kwa huo, kama mwanamke ajivunavyo kwa vito vyake, asema Krisostomo. Na Ignatio mtakatifu alivaa pingu zake kama bangili ya almasi. “Wasikubali kufunguliwa” (Waebrania 11:35). Walikataa kutoka gerezani kwa masharti ya dhambi; waliutanguliza unyofu wao mbele ya uhuru wao.
Kwa jambo hili na tuupime upendo wetu kwa Mungu. Je, tuna roho ya ushahidi wa kufa kwa ajili ya imani? Wengi husema wanampenda Mungu, lakini jambo hilo laonekanaje? Hawataacha faraja ndogo kuliko zote, wala kubeba msalaba mdogo kuliko yote kwa ajili yake. Kama Yesu Kristo angetuambia, “ Nawapenda sana, ninyi ni wapenzi kwangu, lakini siwezi kuteseka, siwezi kuutoa uhai wangu kwa ajili yenu,’ tungeutilia shaka upendo wake sana; na je, Kristo asingetushuku sisi, tunapojifanya kumpenda, lakini hatuko tayari kuvumilia chochote kwa ajili yake?
12. Yeye ampendaye Mungu atajitahidi kumfanya aonekane mwenye utukufu machoni pa wengine. Wale walio na upendo watawasifu na kuutangaza uzuri wa wale wanaowapenda. Tukimpenda Mungu, tutaeneza sifa za ubora wake, ili tuuinue umaarufu wake na heshima yake, na kuwavuta wengine wampende. Upendo hauwezi kunyamaza; tutakuwa kama tarumbeta nyingi, tukitangaza neema ya Mungu itolewayo bure, upendo wake upitao yote, na utukufu wa ufalme wake. Upendo ni kama moto: pale unapowaka moyoni, utalipuka midomoni. Utakuwa fasaha katika kuzitangaza sifa za Mungu: upendo lazima upate njia ya kutoka.
13. Tunda jingine la upendo ni kutamani kufunuliwa kwake Kristo. Tangu sasa nimewekewa taji ya haki, wala si mimi tu, bali na wote wanaopenda kufunuliwa kwake” (2 Timotheo 4:8). Upendo hutamani muungano; Aristoteli anatoa sababu yake: kwa kuwa furaha hububujika kutokana na muungano. Muungano wetu na Kristo utakapokuwa kamili katika utukufu, ndipo furaha yetu itakapotimizwa. Yeye ampendaye Kristo hupenda kufunuliwa kwake. Kufunuliwa kwake Kristo kutakuwa kufunuliwa kwa heri kwa watakatifu. Kuonekana kwake sasa kunafariji sana, anapoonekana kwa ajili yetu kama Mtetezi (Waebrania 9:24). Lakini kufunuliwa kule kwingine kutafariji zaidi bila kipimo, atakapotokea kwa ajili yetu kama Bwana-arusi wetu. Siku ile atatupa vito viwili. Upendo wake; upendo mkuu na wa kushangaza kiasi kwamba ni rahisi kuuhisi kuliko kuueleza. Na mfano wake. “atakapodhihirishwa tutafanana naye” (1 Yohana 3:2). Na kutokana na hivi viwili, upendo na kufanana naye, furaha isiyo na kipimo itabubujika ndani ya roho. Si ajabu basi kwamba yeye ampendaye Kristo hutamani kufunuliwa kwake. “Na Roho na Bibi-arusi wasema, Njoo! Amina; na uje, Bwana Yesu” (Ufunuo 22:17, 20). Kwa jambo hili na tuupime upendo wetu kwa Kristo. Mtu mwovu ambaye dhamiri yake imemhukumu huogopa kufunuliwa kwake Kristo, na hutamani asifunuliwe kamwe; lakini wale wampendao Kristo hufurahi kufikiri juu ya kuja kwake mawinguni. Hapo wataokolewa na dhambi zao zote na hofu zao zote, wataachiliwa bila hatia mbele ya wanadamu na malaika, na watahamishwa milele kuingia katika paradiso ya Mungu.
14. Upendo utatufanya tuinamie huduma zilizo duni kuliko zote. Upendo ni neema ya unyenyekevu; hautembei nje kwa fahari, utatambaa kwa mikono yake, utainama na kujitoa kwa jambo lolote ambalo kwalo waweza kumtumikia Kristo. Kama tuonavyo katika Yusufu wa Arimathaya, na Nikodemo, wote wawili watu wenye cheo, lakini mmoja anaushusha mwili wa Kristo kwa mikono yake mwenyewe, na mwingine anaupaka manukato mazuri. Ingeweza kuonekana ni jambo kubwa kwa watu wa cheo chao kujishughulisha na huduma ile, lakini upendo uliwafanya waifanye. Tukimpenda Mungu, hatutaona kazi yoyote kuwa duni mno kwetu, ambayo kwayo twaweza kuwasaidia viungo vya Kristo. Upendo hauna kinyaa; utawatembelea wagonjwa, utawasaidia maskini, utaosha majeraha ya watakatifu. Mama ampendaye mtoto wake haoni haya wala hachagui; atamfanyia mtoto wake mambo yale ambayo wengine wangeyadharau kuyafanya. Yeye ampendaye Mungu atajinyenyekeza hata kwa huduma iliyo duni kuliko zote ya upendo kwa Kristo na viungo vyake.
Haya ndiyo matunda ya upendo kwa Mungu. Heri wale wanaoweza kuyaona matunda haya, yaliyo mageni kwa tabia zao za asili, yakimea ndani ya roho zao.